عينه عشوائية

دا بول ع الفيس بوك ودي نتايجه لغاية ما انا عملت الفوت بتاعي عليه
لو اخدنا الناس اللى عملت فوت هنا كعينه عشوائية للشعب المصري هنلاحظ حجم الهوه واللى لازم وابداً تخلينا في ذيل قائمة دول العالم ونحسب ضمن سقط المتاع اللي ما بيفرقش مع حد
خلينا نشوف البول وهعلق عليه

	the icon amr diab 535
	adel emam 472
	Abo Treka 756
	Amr Khaled 575
	ahmed zweel 300

في المقدمة خالص يتصدر لاعب الأهلي والمنتخب محمد أبو تريكة بعدد756 صوت بنسبة 28.66% ولو ركزنا شوية هنلاقي ان الناس بتتعامل مع تريكة علي انه بطل ، او سوبر هيرو بيسعدها دايما وبيحققلها نجاحات مبهره وعلشان كدا رفعناه فوق اوي لدرجة انه في المركز الأول من خمس أشخاص هما تقريبا كل منهم الأشهر في مجاله

رقم اتنين في القائمة هو عمرو خالد بـ 575 صوت وبنسبه 21.8% من مجموع الأصوات ، وعمرو هنا بيمثل المثل الأعلي للبعض بعد دعوته الوسطية المعتدله اللى جذبت كتير من الشباب لطريقه

التالت هو عمرو دياب بنسبه أقل قليلا 535 صوت أو 20.28% وعمرو هو قمة الهرم الموسيقي في الوطن العربي حسب الخريطة العامه حتى لو شاف البعض عكس كدا لكنه حتى الان رقم واحد في الوطن العربي

رابعا عادل إمام ب472 صوت بنسبه 17.89% وعادل إمام هو ملك الكوميدينات في التلاتين سنة اللى فاتوا ودا خلاه يتربع علي قمه الممثلين اللى بيمثلهم هنا ف البول دا

أخيرا بقي بيقبع في القاع أحمد زويل !!!!!!!!! بعدد أصوات يكسف 300 صوت أو 11.37 من مجموع الأصوات وأحمد زويل هو أشهر عالم مصري واللي حاصل علي جايزة نوبل ومرشح ليها مرة كمان

------------------------------------
دي الإحصاءيات المباشرة
لو بصينا كدا بشوية عمق فى المركز الأول المصريين بينظروا لأبو تريكة علي أنه المثل الأعلي أو القيمة أو البطل زي ما قولت فوق ، ودا لسبب رئيسي في رأيي وهو انعدام البطل وثقافه صناعه الأبطال الفعليين فبقينا بندور علي ابطال هشه ذوات انجازات هشه أيضا لأنهم اللى عندنا واللى ملوش بطل يعمله بطل .
بعد كدا عمرو خالد ، وعمرو هو الداعيه الديني الوسطي اللى انتشر بسرعه البرق بين الشباب بطريقته السلسه الجذابه اللى وصلت لعدد كبير من الشباب ووصل لأنه بقي بالنسبة ليهم البطل او المثل الأعلي وربما المخلص كمان ، وبغض النظر عن رأيي في عمرو كمصلح اجتماعي اكتر منه داعيه دينيه إلا انه وصل لعدد كبير وضعه ف المكانه التانيه .
وراه بقي عمرو دياب ، واللى واحد زميلي علق عليه دا مش مطرب اصلا وملوش دعوة بالطرب ، لكن كاريزما عمرو وذكاءه وانتشاره خلوه مثل اعلي وقدوة تتبع بين شباب المحروسة لدرجة إنه حصل علي المركز التالت
رابعا بيحل عادل إمام ، واللى بينتمي لعالم الفنانين واللى حصل علي نسبه تقارب العشرين في المية ودا رغم ما ينشر دايما علي الوسط الفني عموما ، وما يتناوله عادل إمام من " هيافه " في أفلامه إلا إن كل دا لم يمنع من انه ما زال الأختيار الأول عند البعض وضعته في المركز الرابع .
المصيبة بقي إن أحمد زويل موجود في المركز الأخير وبنسبه لم تكمل الـ 12 في المية حتى ورغم إنه لو غابت القدوة أو البطل المفروض ندور علي الشخص الصح لكن يبدو إن دا ما حصلش بدليل إن الأكثر استحقاقاً في رأيي علي الأقل يقبع بكل خجل في المركز الأخير . !!!

نظره كمان صغيره هنلاقي بيها إن المجالات اللى بيهتم بيها المصريين طبقا للبول كالتالي
في البداية الرياضة متفوقه علي الدين في المركز الأول ، ودا حقيقة ويمكن يلاحظ دا اى شخص يبص لأي جامع أو حتى كنيسة ساعه أي ماتش للمنتخب وهيحس فعلا بحجم الرياضة داخل الشعب المصري المتفوقة علي أي حاجة وكمان نفس الفكرة في عدد القنوات الرياضية المتكاثرة دوما واللى كلها سبحان الله بتكسب ومفيش حاجة منها بتقفل واكيد دا راجع للإقبال اللى عليها ( البديل بس هي اللى بتقفل علشان مش كلها رياضة !! )
في المركز التاني الدين ( أو التدين أيهما شئت ) ودا بيتماشي مع البحث اياه اللى أثبت إن المصريين اكتر شعوب العالم تدينا ( اللهم تقبل )
بعد كدا الموسيقي والغنا وهيظهر دا في كمية المغنيين وشركات الغنا اللى كل كام يوم بتطلع وكمية الأصوات الغريبة اللى بنسمعها كل يوم أو كمية الفلوس اللى بتتصرف علي الألبومات سنوياً
بعد كدا الفن في المركز قبل الأخير واهتمام المصريين الواسع بيه هيبان في كمية القنوات اللى موجودة سواء للأفلام او للمسلسلات علي النايل سات واللى زادت بدرجة مرعبه وكمية الفلوس المصروفة علي الحاجات دي وكمان كمية الأخبار المخصصة ليهم .
وفي المركز الأخير يقبع العلم !!! العلم هو أخر اهتمام للمصريين !! وليه يهتموا بيه اصلا ، ما أكيد دا لازم يبقي حالنا ما دام العلم هو اخر اهتماماتنا ، لازم نبقي الكلاب اللى بتعوي بجوار القافله السائرة إلي المالانهاية ، القافله الغير مستعده ابدا للتوقف لانتظارنا لما ننهض من غفلتنا وغباءنا وتخلفنا
العلم في المركز الأخير !!!
صدق المتنبي لما قال : يا أمة ضحكت من جهلها الأمم

خدني الحنين

كلام كتبته ف امتحان الجرافيكس قبل ما اخرج

- اخدني الحنين بعد السنين جابني هنا ... تذكر تلك الكلمات لمطربه المفضل - سابقا - وهو يقاتل بحذائه المهترئ* احجار شارعه القديم ، تلك الاحجار اللتي كانت يوما ما - قبل أن يذهب لبلاد الخليج ليملأ جيبه بأموال النفط ورأسه بأفكار ظلاميه - احجار منزله ... ومنزلها
- هنا للمكان اللى اتولد فيه حلمنا ... حبه الأول ، والوحيد من كانت دوما في قلبه رغما عن عقله ، اللذي لا يفتأ يذكره يا ابني دي بتاعه سياسه وعامله فيها مناضله سيبك منها ، بنت الجيران ... أوة ست الحسن والكمال كما احب ان يناديها دوما أو ست الحزن والجمال ** كما ناداها اخر مره رآتها عينيه وهي تحاول ان تثنيه عن عزمه السفر ، أن يظل في بلاده ، أم الدنيا ، لكنه كان حازما ... كأسمه سوف يذهب حيث المال والجاه والمنصب وعندما يعود بالمال سوف يحصل علي السلطه والحصانه فيمتلك الفدادين الأراضين وذهب بخياله وقال السماوات أيضاً .... فووووووق ... افاقته كلماتها واوقفت تدافع افكاره علي لسانه وعقلها ، واخبرته حانقه عليه - أو قل له - هترجع بقلوس لكن فاضي من جوا ، هترجع من غير مبادئ ، هه ، و لامن امتي وانت عندك مبادئ أصلا ، روح ، وابقي ارجع لنا الشيخ ابو عمر - قالتها بحرقه من تذكرت كيف اتفقا علي اسم اول اطفالهما - ولا حاجة ، روح يا .... يا باشمهندس حازم .
- وبكينا فيه وضحكنا فيه من قلبنا ... تذكر كيف كانت تضحك علي نكاته القديمه دونما ان تمل سماعها كأنها المرة الأولي التي تسمعها فيها ، كيف كانت ابتسامتها دوما تنير له الطراقات ، كيف اوصلته دفعات التشجيع من عيونها ليصل لكليه الهندسة قسم البترول ، تذكر ايضا كيف بللت كتفيه دمعا وهي تقول من بين نهنهاتها ، أنا شيلت ماده يا حازم ، وكيف يومها واسها كثيرا ثم قال ، عندنا ف هندسه اللي يشيله ماده دا اقول واجب يعني ، ثم ضحك ، ذهلت قليلا فضحكت ، ضحكا سويا فأضاء الكون وضمها كثيرا يومها ... واياما كثر .
- هنا بلقي نفسي وروحي ... لا يجد نفسه ولا روحه ، لا هنا ولا في اي مكان اخر ، ما عادت تمثل له الامكنه شيء ... أي شيء إلا مجرد بعد اخر ف الحياة ، لم تعد تعنيه ولا حتي الاشخاص يعنوه ، لم يعد يعرف أين يذهب الآن بعد أن دُمر حيه بالكامل ، تحول إلي احجار بفعل مايكنات عملاقه لا تعرف فقط إلا أمر المحافظ ولا يعرف أيهما - الماكينات أو المحافظ - للقلب معني .
- هنا ببقي أنا ... ما عاد يذكر أصلا من هو ، هو أنا مين ؟! ، باغته السؤال مفاجئاً ، فلم يدر إجابه ، أخرج نفسه من دوامه الافكار التي باغتته قائلا لنفسه بصوت عالٍ : أيه دا أنا بدندن بأغنيه ازاي ، الأغاني حرام أصلا .

-----------------------------------------------------
* ليك انك تتخيل ليه رجع من بلاد النفط بحذاء مهترئ .. يمكن اخدله تلاتلاف جلده واترحل ، او امير معجبوش شكله فطرده م البلد ، او لأن المصري ارخص م التلاجة فقالك نرميه ، او لأنه بيتنازل عن كرماته وهو بياخد التأشيره فمش فارقه كتير لو أخدوا فلوسه وهو راجع والخيارات مفتوحه لكل واحد
** عنوان ديوان للشاعر ماجد يوسف

كلمتين

عجبته نص رسمه الطباشيرة
والاستاذ قالهم يرسموا دايرة
بس هو عاجبته اوي النص التحتاني منها
ورسم نص دايرة باصص لفوق
زي ابتسامة بريئة
شافه الاستاذ زعقله
وضربه عصايتين
ما زعلش وفضل فرحان
ماشي طول الطريق بابتسامة
هابله صحيح بس جميلة
اصلها من قلبه وبريئة
رجع البيت فضل يرسم
انصاص دواير بتضحك
دخلت مامته وزعقت
وقالتله كلمتين
زعل شوية وعمل نفسه نايم
بالليل باباه راجع
فتح نور اوضته لقاه
بيرسم حاجات
شافها لقاها دواير
انصاص دواير
بصله كتير
واداله قلمين
عيط الولد
ومن يومها بيرسم انصاص دواير
بس باصه لتحت
وراسمه وش زعلان
م الدنيا الغريبة
اللى استكرت عليه ضحكتين

عفوا لقد نفذ رصيدكم 4 كلاكيت تاني مرة

من كام شهر ياسمين كان كاتبه عندها قصه ع البلوج بتاع ارض الاحزان
ياسمين واحدة من اروع الناس اللى قريتلهم ع النت وخاصة انها غالبا بتكتبي ف منطقتي المفضلة
القصة ياسمين كتبتها من زمان علي اربع اجزاء
قريت الاول والتاني والتالت والرابع
لما جيت للجزء الرابع احبطت وقولتلها مش دي النهاية المناسبة
قالتلي اكتب المناسبة
كتبتها وكنت المفروض انشرها وما نشرتهاش غير دلوقتى بقي
كل رقم فوق بيودي لجزء م الاجزاء والجزء الرابع لو شيلناه هنحط مكانه النهاية بتاعتي دي

**********
دي النهاية اللى انا كتبتها
................................................................................

اجتذبته رائحه الورود المميزة واعادت معها ذكريات ازمنة مضت
يا الله ... لم يغلق الجرح بعد
نظر حوله متجهما ورأي الساعي يدور ويدور
فى النهاية لم يقاوم فضوله نادي عليه بنظره المتفحص وإن لم تخف توتره
نظر للورد وعينيه بدأت فى العد
37 وردة تماما ... يبدو انها لم تنس العد ولم تنس رقمه المفضل بعد
يا الله ... لم الآن والذكري تنزوي ف جانب اسود بعيد من الذاكرة
اعادته الذكري شهورا للخلف
ضحكة واحدة مشرقه تخرج من قلبين صافيين
أكان قلبها حينئذ ينوي للهروب
أكان عقلها يفكر ف البعد
تقدمت به الذاكره قليلا وتذكر مجلسه مع صديقه
تذكر كيف اخبره صديقه بأنها " عملتلك Ignore "
لماذا تجاهلته وهو في امس الحاجة إليها
لماذا وهو لم يسيء إليها
لماذا وهو الذي فجر ينبوع مشاعر لا ينضب ولا ينهل من سواها
لماذا اتته الطعنة منها وهو اللذي كان يترقبها من الكل إلاها
لماذا هي دون كل البشر
لماذا هذا التوقيت
لماذا لم تقل انها لا تحبه
كانت ستكفيه ......
لكنها تركته علي حبل المشنقة
لا هي حررته ولا هي قضت عليه
تركته يتعذب بها ورحلت
افاق من ذكرياته علي رنته تليفونه
هذا رقمهها ما زال يتذكره رغم انه ازاله من قائمة الارقام ... لكن للعقل ذاكرة لم تنضب بعد
نظر للرقم وعاد للعقله يفكر
لم قد يعود إليها
ما تركت شيء في قلبه إلا واكله الجرح النازف ليضمد نفسه بنفسه
حتى وإن كانت الآن اصدق أهل الآرض
فليس بالصدق فقط نحيا
نحتاج الامان
وهو لن يأمنها ثانيه
لا علي قلبه ولا علي روحه ولا علي نفسه

نظر للرقم في حيرة ثم ترك الموبايل علي مكتبه
ونظر للساعي
عدل من نظارته فوق انفه
غريبة دي يا عم حسين ، كوباية قهوة سادة اسود من لون مكتبي كدا من فضلك

تمت

بـــــــــراح

الشعر المحبوس ف العيون

وشعر الغجرية المجنون

والنفس ع الحبيب بتهون

والليل المليان بالمجون

كله بيطلب السماح

نفسه ف حته براح

زي طير السما مرتاح

لكنه خايف م الجراح

باصص لفوق للسما

بيسأل مين أنا

لكن حياة العنا

ما رضيالوش الهنا

طالب بالليل نور

بس الليل مقهور

علشان يجيب النور

محتاج ورق ممهور

الحب ف القلوب

الحب بلا ذنوب

الحب يبدر الحبوب

للناس لأجل تتوب

العيون ملاياها الدموع

تايهه وسط الجموع

والدمع يهد القلوع 

وصوت البكا مسموع

قلوبنا وحيدة وتعبانين

كما النجوم تايهين

ف الدنيا حيرانين

للحبيب مش واصلين

----------------------------

كتبتها ف امتحان الأم أي أس اللي ما حليتش فيه بربع جنية مخروم حتى ولا بريزة من الفضة الصغيرة الجديدة دي

بس كدا

حياة موت

في بلادنا ... يحيا الموت ، لا يغرنك تناقض الكلمات فـ حين تنتهي الحياة يأتي الموت ، لكننا .... في بلادنا ، ابتدعنا للموت حياة ينادي بيننا .... كل يوم هل من آت معي فاصطحبه من كان منكم آت فليختر طريقه إلي !! ، هل غابت عنا تلك النكتة المبكية المضحكة عن الموت في مصر (1) ... إذا أردت الموت غريقا فلتفعل كذا وإن أردت الموت حريقا فلتذهب إلي كذا .... وهكذا من طرق للموت كثيرة .

إن كان لإبليس أن يغادرنا علي باب سفارة كندا (2) فإن الموت قد حل عنه بديلا مقيما متعدد الاختيارات ولك وحدك حق اختيار ، إن كان إبليس قد تركنا لعموم فسادناوزيادته عن احتماله هو رأس الفساد ، فإن حلول الموت جاء بسبب رضانا عن هذا الفساد ، واستكاننا إليه ، وتأقملنا معه ، واعتباره فرضا إلهيًا لا يرد أبدًا .

نحن - في بلادنا - نحيا ف الموت ونموت ... فنزيده حياة ، حين نموت نأقلم انفسناعلي تقبل الكوارث ، علي تقبل اختيارًا جديدًا من خيارات الموت العديدة أصلا، ليس المؤسف تقبلنا للأمر وفقط ، لكن المؤسف - حقًا - أننا تفننا ف ابتداع واختيار أشكال للموت جديدة ، طرح هو خياراته لنختار .... فزدناه نحن الخيارات ، حل علينا الموت ضيفًا فأكرمناه ، زاد ظله ، بدل استثقاله دعونا .. رحبناه .. واحتفينا به .

أصبحنا نلعن الفساد ف المساء وف الصباح نتمرغ فيه ونشربه كأسًا حتى الثمالة ، نبغض الموت دوما وف الليل - ليس فقط ف الليل - نبتدع أسبابه ونفكر له ف خيار جديد .

يا الله ... لم الحياة تلفظنا .... كأنا يومًا لم نكن ... أبناء الحياة

1- نكتة عن الموت ف مصر من هنا

2- قصيدة علي باب سفارة كندا للرائع علي سلامة من هنا

الاسبرانتو

الاسبرانتو

تعرف معني الكلمة " الاسبرانتو " اغلب المصريين والعرب عموما ما سمعوش عن الكلمة وما يعرفوش هي تعني أيه من الأصل والكلمة عبارة اسم للغة عالمية جديدة بالنسبة لينا في الوطن العربي تماما ولكنها بدأت الانتشار في مختلف أنحاء العالم في الفترة الأخيرة وبدأ تدريسها في بعض جامعات أوروبا وأسيا وأمريكا وأستراليا أو بمعني أخر بدأت تدريسها في العالم عدا أفريقيا بالكامل وأمريكا الجنوبية وبعض مناطق من أسيا وتشمل المنطقة العربية .

الاسبرنتو بيتوقع ليها إنها تكون اللغة العالمية الأكثر في العالم في غضون العشرين عاما المقبلة واللغة دي في الأصل اخترعها لودفيج أليعازر زامنهوف في أواخر القرن قبل الماضي وتحديدا في عام 1887 لكنه أصلا انه بدأ فيها في أواخر السبعينيات وبدايات الثمانينات واستمر في تطوير اللغة لمدة حوالي عشر سنوات تقريبا وبدأ في نشرها في سنة 1887 وبدأ عدد الناس المتحدثين بيها حول العالم يزبد باطراد يوحي بنجاح اللغة دي واللغة دي أصلا ميزتها البساطة في كلماتها والقواعد السهلة جدا بتاعتها واللي ما بتحتويش على أي شواذ ودا اللي بيسهل استخدام اللغة وتعلمها واللي بيقدر الوقت المطلوب لتعلم لغة الاسبرانتو بـ 3 أشهر فقط وهو زمن قياسي مقارنة بأي لغة أخري واللي بيحتاج تعلمها لأكتر من 3 سنين .


زاد عدد متحدثي لغة الاسبرانتو بسرعة كبيرة لسهولتها المطلقة وفي سنة 1905 عمل متحدثي اللغة حول العالم أول كونجرس لهم وكان في فرنسا واستمر الكونجرس سنويا ماعدا سنوات الحربين العالميتين وكان عدد اللي بيحضر الكونجرس 2000 أو 3000 شخص ولكنهم كانوا أوقات بيزيدوا ل6000 شخص .


التفكير فى الاسبرانتو كلغة دولية لا تخص دولة بذاتها نبع من الحساسيات بين القوميات فالفرنسي مثلا معتز بلغته و مش عايز يتعلم انجليزي او يتعامل بيه مع الناس وعايز يتعامل بالفرنسية ، والايطالي كذلك ( العرب مش كدا كأنهم نسوا لغتهم اصلا ) والصينين بردوا مش عايزين يتعاملوا مع الانجليزية كلغة عالمية وعلشان إزالة الحساسيات دي وإيجاد لغه يجتمع الكل عليها وما تكونش تنتمي للأمة معينه أو دولة أو شعب بعينه وعلشان كدا بدأت عالمية اللغة تزيد وبيتوقع ليها العلماء انها تكون اللغه الاولي فى العالم فى سنة 2020 ولو حبينا نعدد ميزات الاسبرانتو كلغة :


1- عالمية : عن طريقها يقدر الاشخاص من مختلف القوميات التعامل مع بعض


2-محايدة : يعني ما تنتميش للشعب او دولة محددة .


3- سهله : بالنسبة لبقية لغات العالم الاسبرانتو سهله جدا فى تعلمها وسهولتها بتكون تقريبا بنسبة 8.33 % لبقية اللغات


ولعل واحدة من اهم الحاجات اللى ادت لأنتشار الاسبرانتو كمان هى الهدف الرئيسي والفكرة الرئيسية ليها كلغة وهو التسامح واحترام الناس من مختلف الامم والثقافات والاسبرنتو فى الاصل تعني " الدكتور اللذي يتمني " وكان يطلق عليها الدكتور اسبرانتو لكن تم اختصار الاسم للأسم المعروفة بيه اللغة دلوقتى حول العالم وهو الاسبرانتو ، والاسبرانتو ليها رمز هو النجمة الخضراء وعن رمزية الشعار فاللون الاخضر يرمز للأمل أما اللنجمه خماسية الاطراف فهي بتعني قارات العالم الخمسة .
لو حبينا نتكلم عن حروف وتكوين اللغة
لغة الاسبرانتو حروفها لاتينيه فى الاصل وبتتكون من 28 حرف هما حروف اللغه الانجليزية ماعدا حرف
" q "
وبعض الحروف مكرره مع " أكسون " فوقها وطبعا بيختلف النطق بين الحرفين ، الاسماء فى لغه الاسبرانتو كلها بتنتهي بالحرف
" o "
الجمع كله فى اللغه بينتهي بالحرف
" j"
وبيضاف حرف
" n "
أما الصفات فبتنتهي بالحرف
" a "
واكتر حاجة بتميز الاسبرانتو كلغة عدم وجود شواذ فيها يعني القاعدة على الكل
ولو بصينا للأفعال مثلا هنلاقي ان الفعل فى المصدر بينتهي بالحرف
" i "
الأفعال بصيغة المضارع تنتهي دائماً ب
" as "
و بصيغة الماضي بـ
" is "
أما صيغة المستقبل فتنتهي بـ
" os "
أما الظروف فى اللغة فهي نفس صورة الصفات لكن مع تبديل حرف
" a "
بحرف
" e "
ومن الاسباب المهمة اللى علشانها لازم نبدأ نتعلم الاسبرانتو بخلاف انها متوقع انها تكون قريب جدا اللغه العالمية الاولي :
سهوله الحصول على معلومات حول اي من القضايا الدولية ، وكمان الإطلاع على ثقافات دول وشعوب تانية ، وكمان هيتخلق حاله من التوازن بين الاشخاص المتحدثين ومحدش يحس انه احسن لانه بيتكلم بلغته الأم ، بخلاف كدا عن طريق اتقان الاسبرانتو ممكن تكون نشط فى مؤسسات دوليه وتكون عضو نشط فى تنظيم كتير من المؤتمرات العالمية بنفسك ، وكمان هتقدر تلاقي اصدقاء اكتر من اماكن مختلفه من العالم ودا هيزود معرفتك الثقافية وعلاقاتك الدولية
وأخيرا بعد دا كله ازاى نقدر نتعلم اللغة دي
عن طريق الموقع دا نقدر وبالتعليم الذاتي نعلم نفسنا


http://ar.lernu.net/index.php

تاج الملك تشي

بسم الله ....

ازيكوا كلكوا يا ناس ياللى بتعدي عليا هنا

النهاردة عامل تاج مخصوص لأصدقاءي من ارض الواقع والفضاء البلوجي الافتراضي

اول حاجة قسم ابولو قصدي قسم الحق ودا مخصوص علشان عفشة باشا حبيبي

واللى يرضي ياخد التاج يبقي بيتعهد امام الله والدولة والناس انه يجاوب بصدق

واللي مش ناوي يجاوب هو عارف عاقبته ;)

ياللا نبدأ

وكالعادة الاسئلة بالأزرق والإجابات بالأحمر واخر الموضوع هاحط الاسئلة كلها ورا بعض علشان نسهل عملية النقل عليكوا

التاج متمرر لكل اللى عندي ع السايد بار بلا استثناء من اول واحد لأخر واحد وبدون إجبار ( لكن في ناس عارفه نفسها مجبرة وإلا .... )

رغيت كتير أنا خلوني أبدأ .......

3

2

1

جووووووووووووووووووووو

1- عيب فيك ومش نفسك تتخلص منه ع الاطلاق

علي فكرة والله بحط الاسئلة قبل ما افكر فى الإجابة واديني دبست نفسي :)

مممممممممممممممممممممممممممممم

ممكن نقول الثقة والشك السريعين والاتنين باخد بيهم احكام مسبقة على الناس فى اول تعارف وبيحتاجوا لوقت اطول لتأكيد دا او ازالة اثاره

2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟

I- هند : لو ربنا كان عين لكل واحد ملاك حارس فأكيد هند الملاك خاصتي 

II- فهمي : ساعات بنظل نبحث فى الدنيا علي اشخاص يخافوا علينا ويفهمونا من غير كلام .... ولما نزهق بتهديهم السماء لينا ... فهمي

III - كيكوووووووووو : اقرب حد ليا من قرايبي وسلواي الوحيدة فى البلد التيت دي

IV- مروة كناريا : مجنونة ورزينة وفيها البدع

V- أحمد عبد الوهاب : أحد أهم الشخصيات اللى بتحمل قلب كبييييييييييييييييييير بس يبيع اي حد علشان الفلوس تيييييييت

3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟

I- سارة : غالبا بتبقي موجودة فى الوقت الصح وليها عليا حق كبير وشكلها مش هتساهولي

II- موصطفي العوليمي : اكتر شخص عايز اقابله واكلمه حتى الان ومعاه ينطبق المثل القائل ... كلنا فى الكأبة بلوجرز

III- ساااااااااااااااالي : المراية بتاعتي لما تواجهني بالحقيقة وتقولي فوق ، ما تعييش

IV- نيرة : أختي الكبيرة ( هي وسالى ) واكتر واحدة روحانية شوفتها بحسها حد شفاف كدا واكتر حد بيقولي اصبر سيبها لربنا :)

V- هبة (بوبا ) : اختي بردو هي كمان بس ايه يخرب بيت ام الطيبة ، ربنا ادها الطيبة اللى ف العالم كله قالها تفرقها ع الناس طمعت فيها واخدتها لوحدها :)

4- العشرة اللى فوق ... ابعت لكل واحد فيهم رسالة !

I- هند : احترت كتير اكتب ايه ؟؟؟ 

II- فهميز : بطل رخامة وحاول تعمل صلح بين قلبك وعقلك للوصول للحل الامثل فى الامور ايها ( وش شيطان بيضحك )

III- كيكوووووووووو : الحياة اكبر من تعقيدك ليها يا بتاع برج العقرب يا رخم 

IV- مرووووووووووووة : هتفضلي اطيب قلب في كليتنا التيييييييييييييت دي ( ربنا معاكي )

V- عب وهاب : لو ما جاوبتش ع التاج دا ليلتك عتبجي طين طييييييييييين

VI- ساااااارة : حاولي تعملي اللى انا مش عارف اعمله حتى الان ... تصالحي مع نفسك

VII- موصطفي : مازلت رغم معرفتي عنك لغز عصي الفهم

VIII- سالى : كل ما بشوف صورتك بتحضرني براءة الدنيا وانها ما تستاهلش حاجة

IX- نيرة : انتى بقي اللى كل لما بشوفك بيطلع للصورة جناحين وهاله بيضا من فوق ... ربنا يحفظك يا رب

X- هبه : محتاجة بردو تتصالحي مع نفسك وتحبيها حتى لو كان علي حساب الناس اللى ادتيهم ونستيكي

كلكوا علي بعض " ربنا يخليكوا ليا يا رب ويوفقكوا دايما ويحقق كل احلامكوا .............. "

5- العشرة اللى فوق دول اكتب لكل واحد كتاب او اغنية بتعبر عنه فى رأيك

I- هند : وسط الدايرة :)

II- فهمي : حكايتي مع الزمان

III- كيكو : اشكيك لمين والخصم انت والحكم

VI- مروة : مجنونة ( محمود العسيلي )

V- احمد عب وهاب : مدد يا رسول الله

VI- ساره : يا طير يا طاير.

VII- موصطفي : اي حاجة لفرويد هتكون مناسبة لكمية التعقيد اللى جواه

VIII- سالي : زي الملايكة

IX- نيرة : نقطة نور بهاء طاهر :)

X- بوبا : كلك علي بعضك حلو

6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟

مممممممممممممممم

سؤال رخم فعلا
انى ما سامحتش حد غلط في حقي

7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟

هخليها بعد م كذا حد يجاوب ع التاج بس هي متسجلة ف دماغي يعني

الاسئلة بقي علشان الكوبي والبيست

1- عيب فيك ومش نفسك تتخلص منه ع الاطلاق

2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟

3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟

4- العشرة اللى فوق ... ابعت لكل واحد فيهم رسالة !

5- العشرة اللى فوق دول اكتب لكل واحد كتاب او اغنية بتعبر عنه فى رأيك

6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟

7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟

مرة كمان التاج متمرر لكل اللى عندي ع السايد بار وخاصة الناس اللى عندي ع الميل 

عشرة جنية

- على باب الميكروباص

- والنبي يا ابني شيل عني الكرتونة دي

- شكرا يا ابني إلهي ينجحك ويرزقك من وسع 

- ربنا يخليكي يا حاجة ، انا عملت حاجة دا انا زي ابنك

- ربنا يحفظكوا يا ابني ، اصل دي الكرتونية بتاعه التومين رايحة جايبها من اخر الدنيا علشان العيال ولادي والدنيا بقت مش مستحمله وابوهم بقي ربنا يرحمه

- ربنا يخليهموملك ويخليكي ليهم

..................

- ايوة يا اسطي الناصية الجاية

- حاضر يا حاجة

- ناولني والنبي يا ابني الكرتونة

تبص للكرتونة بحسرة وعليه بقعة زيت كبيرة من اسفلها وصاحت في جزع

- ازازة الزيت انكسرت

لم يدري ماذا يفعل إلا وهو يخرج عشرة جنيهات من جيبه ويضعها خفية فى الكرتونة من الداخل ويناولها الكرتونة وتأخذها لترحل

..................

فى منزلها

- يا حسام يا ابني خد

- ايوة يا اماه

- انا لقيت العشرة جنية دي فى الكرتونة وانا عارفه انها مش بتاعتنا يا ابني تاخدها بكره الصبح توديها المسجد يمكن في غيرنا محتاجينها اكتر منا يا ابني

- حاضر يا اماه انتى تأمري بكرة وانا راجع م الكلية هوديها ، تصبحي على خير

بابتسامه ودعوة بقيمة عشرات العشرة جنية

- وانت من خير يا ابني ، ربنا يسهلك طريقك ويوقفلك ولاد الحلال وينجحك يا ابني وكل اللى زيك

يقبل رأسها ويدها

- ربنا يخليكي ليا يا ست الكل

---------------------

قصة قصيرة من وحي الخيال

أقوالي

بعض من كلمات كنت بكتبها اوقات الكلية بين السكاشن ووسط المحاضرات

" دعوني لنفسي ... فالوحدة خير صديق "

" لم نقتفي دوما أثر ... من غابوا عن النظر "

" الحب أن نحب لأجل الحب ... لا أسباب ولا مسببات "

" المحبون كالسائرون على السحب ... لا يدرون من أين ولا إلى أين ولكنهم يسيرون "

" الحالمون فى دنيانا اما ان يعيشوا معذبين ... او يموتوا سريعا ليستريحون "

" السفر إلى المجهول هو أروع سفر ... فهو بلا انتهاء "

" العمر لحظة ... تستحق العيش "

" المصائب والاحزان ... قلما تأتي فرادى "

" لم دوما الخيارات المتاحة ... كلها حمقاء "

" أنا لست ملاكا قد هوى ... ولست بفتى يسيره الهوى "

" ما طار طير وارتفع إلا وبلغ أعالي السحب "

" هناك بعض اشياء تمنعنا عن المضي قدما ... ينبغي أن نتوقف هنا وندع التاريخ يسطر البقية "

تحياتي ..
تشي

اقرأ .. تكون ؟؟

اقرأ ... تكون ؟؟ يعني أيه وليه ؟؟
اقرأ اول تكليف نزل على سيدنا محمد عليه افضل الصلاوات وهو واحد من الحاجات اللى اصبحنا بنفتقدها فى وطنا العربي ومصرنا الجميلة بالأخص بقيت تشوف كل شاب وشابه ماسكين الموبايل بيلعبوا فيه او فى ودانهم الام بي ثري وبيسمعوا اغاني او بيهزروا مع بعض أو ..... كلها حاجات مهما كانت هى ايه لكنها فى الاخر تضيع وقت ع الفاضي
لكن لو جينا بصينا مين ماسك كتاب ( مش بتاع المدرسة والكلية ) كتاب فى اى مجال بيحبه وبيقرا فيه ، لا يمكن دي رابع المستحيلات عند العرب ، ولو جينا بصينا كدا ولقينا واحد ماسك كتاب وبيقرا فيه الباقي مش هيسيبه ::::
" أيه يا عم المثقف "
" ايه الثقافة دي كلها "
" فين النضارة بتاعتك "
إلى اخر التعليقات المستفزة اللى تخلي الشخص يحرقهم ويحرق الكتاب ويحرق نفسه بالمرة معاهم

نرجع لموضوعنا بقي " القراءة " انا عن نفسي شايف ان القراية واحدة من اهم الحاجات اللى لازم نهتم بيها لازم زى ما بنقلد الغرب فى كل حاجة فى الهدوم والمزيكا والكلام نقلدهم بردو فى الحاجات الكويسة يعني فى الغرب اغلب اوقات الفراغ فى الكليات والمواصلات العامة الناس بتستغلها علشان تقري والقراية بوجه عام فى اي مجال حسب الشخص اللى هيقرا هتفيد الشخص وهتوسع عقله وتفكيره وهتخليه يعرف حاجات اكتر ومعلوماته هتزيد

فى مصر هنا كمية السطحية بين الشباب تخلي الواحد محتاج يركز شوية " هو انا هفضل زى الناس كلها كدا هما ضايعين يبق انا زيهم وهو انا احسن منهم فى ايه " لا اكيد ممكن نكون احسن من اللى حوالينا ربنا سبحانه وتعالي قال " وإن تتبع أكثر من فى الأرض يضلوك " يعني مش علشان كل الناس مش بتقري يبقي انا موجعش دماغي والرسول عليه الصلاة والسلام قال " لا تكن إمعه إذا أحسن الناس احسنت وإذا اساءوا اسئت " من الحديث والأية الكريمة بيوضح اوي اننا ماينفعش نمشي ورا الناس فى كل حاجة وفى اى حاجة ولازم يكون لينا موقف خاص وفكر خاص ودا مش هيجي غير بأننا نقرا ونفهم وننقد وناقش

ولأن دلوقتى معيار الانسان بيعرف قد ايه مش معاه كام ( دا عند الناس المحترمة اللى مش كل همها الفلوس )

وعلشان دا كله وحاجات تانية كتييييييييير انا يمكن معرفهاش
لازم نقرا ..
علشان كدا عملت الحملة والجروب
أقرأ ... تكون
أقرأ علشان تكون إنسان يحترم وليه فكره وثقافته الخاصة مش ماشي ورا الناس وخلاص وهو مش عارف حاجة

ياللا كلنا نقري نتعاون ونجيب الكتب مع بعض واللى عنده يدي اللى معندوش علشان كلنا نقري ونفهم ونعرف
ياللا كلنا نكون ........

لينك جروب الحملة ع الفيس بووك
http://www.facebook.com/group.php?gid=7939609948

تحياتى
تشي أحمد

محاولات جادة للحياة

بدأت أول خطوة

ادعولي الدنيا تكمل معايا زي ما بتمني وادعولي واجه كل الصعاب واتخطها

ربنا معايا

تشي

My Desktop

دا الديسكتوب عندي بحبه جدا
وبحس لما بشوفه بألفه غريبة
كل لما ازهق اروح جايبه واقفل كل حاجة تانية دونه

اضغط ع الصورة علشان تشوفها بالحجم الطبيعي ليها

غزة

دي صور كنت عملتها علشان حصار غزة
حبيت اشاركوا بيها
يا ريت تقولولي رأيكوا
بتقبل النقد بصدر رحب كتييييير

والصورة دي بخط ايدي عاديه يعني

تشي

يــــــــــــــــــــــــــــا ربي

يــــــــــــــــــــــا رب
إن ضاقت قلوب الناس
عما فيا
.........
فعفوك لا يضيق

-----------
الصورة من تصميمي

اجمل تيم فى الدنيا

اولي تجاربي على برنامج لذيذ كدا ادهاونى الواد احمد فهمي
وهو بيعمل فلاشات بس لذيذ شوية بس حاسب علشان لو النت مش تمام الاغنية يمكن ما تشتغلش
الفلاش فى اجمد فريق فى الدنيا وهتبقوا تعرفوهم كويس قريب إن شاء الله

من هنا