مصر عادت

مصر عادت شمسك الذهب

تحمل الارض و تغترب

كتب النيل على شطه 

قصصا بالحب تلتهب

بجد مبسوط جدا ومن باب التوثيق وللذكري وللتأريخ قولت اكتب اللى حصل ،

النهاردة كان يوم ملوش حل ، عملت فرمان ف البيت وقولتلهم اللى هسمع صوته هطرده ، والتليفزيون في اوضه بابا ساب الاوضة وطلع نام ف اوضة تانية ، وانا روحت معلي التليفزيون ع الاخر واخواتي جنبي بس كله عامل سايلنت ، لسه قاعد وهوب بقول يا رب لقيت الكورة قاعدة تتنطط عن جون الجزاير وانا اقول تسلسل ، مش تسلسل ، ف العارضة ، يا زيدااااااااااان ، اوبااااااااااااااااااا ، وقعدت اتنطط ع السرير كنت هكسره ، واشتغلت حسن شحاته بقي ، ارجع يا ابني بلاش اعتراض ، امسك يا ابني اللى ف الزاوية هناك ، المحمدي فاضي يا حسن ،قدام يا تريكة ، ارفع يا معوض ، طلع حمص ونزل بركات يا شحاته ، طلع فتحي ونزل متعب ، متخليهوش يرفع ، باصي يمين ، وخلص الشوط الاول وانا مرتفعه المعنويات ع الأخر ، التاني بدأ ومع الوقت بتنهار المعنويات ، وخلاص حطيت وشي ف البطانية لقيت بركات بيرفع ، مش عارف مين اللى رفع اصلا ، المهم قولت ياااااااااااااااا رب ، وعملها متعب ، وعينك ما تشوف إلا النور ، روحت قالع تي شيرت التريننج اللى كنت لابسه وروحت معور نفسي ف وشي ولقيت دم نازل علي جسمي بس مين ولا يهزك وقعدت اعيييييييييييييييييط واعييييييييييييييط واتنطط واوقول كلام ولا عارف له معني اصلا .

بس سيبك انت ، ماما كانت ميته م التعب وعيانة واتفرجت ع الماتش وبحماس منقطع النظير ، وجدو جدوووووووووووووو اللى عمره ما شاف ماتش ف حياته طلع كان بيتفرج ع الماتش هو كمان ، ومحمد اخويا كل شوية يقف بالعلم بتاعه قدام التليفزيون ويقول مصر مصر مصر ، اقوله اتهد والله ما سامعينك ، بس مين لا حياة لمن تنادي ، ماعدا بابا بقي راح نام وصحي ساعة ما الجزاير كانت هتجيب جون بيقولي كنا جبنا جون ؟؟ قولتله لا دا الجزاير ، قالى الحمد لله ونام ، الأدهي بقي والأمر أوساااااااامة ، اسامة اللى اكاد اجزم انه ما شافش عشر ماتشات علي بعض ف حياته كان متابع المباراة كلها وابدي فيها رأيه الفني ولا طه سماعين في عزه .

انا دمي نشف اصلا

بس الحمد لله علي كدا

اسيبكوا بقي علشان اجهز الميكروباص اللى هنطلع بيه علي ام درمان

المبدأ الأول للخليقة

المبدأ الأول للخليقة
معجزة " أتوم " الكبري

الحب

ذلك الصمغ الإلهي الذي يجذب كل منكما للأخر بعد أن يكون قد جذب أجزائكم المفتتة إلي بعضها البعض فينصهر ويتوحد كل منكم مع ذاته

يعود كيانا واحدا وإنسانا بكل تعقيدات ماضيه والحاضر والأجزاء التي ما تزال خفية لم تخرج بعد إلي نور الإله

تمتزج تلك الأجزاء ببطء كأنها كتلة شمع بيضاء ناعمة كلما صهرتها حرارة فتيلها أقتربت جزيئاتها من بعضها البعض

نون - سحر الموجي

* تحليق

صباح النور عليكم علشان انا بكتب بعد الفجر
ازيكم ويا رب تمام
اول امبارح كان يوم رائع جدا ومميز وربنا كلل تعب ايام كتير قبله بالنجاح في اليوم دا
اليوم كان رحلتنا حملة اف سي اي بايونييرز واي تربل اي حاسبات ومعلومات الزقازيق ليوم الهندسة المصري
ولأننا كمنظمين عارفيين الناس عايزة تخرج وتتفسح مش بس تروح حاجة علمية قررنا نعملها رحلة مزدوجة نروح يوم الهندسة المصري بعدين نخرج مع بعض وكان الاقبال علي الرحلة اكتر من ممتاز
خرجنا من الزقازيق الساعة تمانية ونص صباحا ووصلنا قاعة المؤتمرات الساعة عشرة وربع كدا
وخلال الطريق هيصنا وغنينا وعملنا مسابقات وهزرنا وضحكنا وعملنا كل حاجة نفسنا فيها وخلال يوم الهندسة المصري حضرنا اتنين سيشنز وكانوا جامدين جدا جدا يعني وانا عن نفسي استفدت كتير اوي منهم واعتقد كل اللى حضروا وفيهم كنت مبسوط لاني قمت قصاد الناس كلها وقولت انى فخور بكل اللى عملنا زمايلي وانا في حاسبات الزقازيق والنقلة النسبية اللى بدأناها ومكملين فيها بإذن الرحمن وكمان قابلت اكرام اللى الناس كلها كانت مفتقداه فعلا اليوم دا وكمان قابلت شادي وكان ولد رائع من هندسة القاهره وفريق اي تربل اي هناك وبعد كدا اتحركنا متجهيين إلي الازهر بارك
الأزهر بارك بالنسبة ليا واحدة من اروع اماكن القاهرة علي عكس كام بنت كانوا بيشتموا ويلعنوا فيا علشان اخترتها وعايزين يروحوا سيتي ستارز معرفش ينيلوا ايه بس معلش بقي فلاحين ، المهم قضينا هناك وقت رائع للغاية صحيح كان في مشاكل كتييييييييييير بس الحمد لله اتحل جزء منها والباقي في وقت اخر بقي واتمشيت فيها كتير ولفيت كتير واتبسطت اكتر بكتير ورخمت علي مرسي كتير بردو وطلعت عينيه
بعد كدا روحنا الحسين ورغم اني كنت عايز الناس تتمشي م الازهر للحسين لكن لدواعي امنيه علي رأي اخونا البعدا ركبناهم الاتوبيس ونزلنا للحسين والناس اخدت راحتها ع الاخر بس المشكلة ان الوقت كان ضيق وانا نفسي ما حستش بالوقت فجأة بيقولوا احنا وقتنا خلص عايزين نتجمع
ساعتها كان اكرام بيسألني : انت مش قولتلي هتوديني تنورة ، قولتله بس كدا احنا فيها ، وبما اني المشرف ع الرحلة انا واحمد مختار ( وحط تحت كلمة المشرف الف خط لو سمحت والنبي ) فأعتمدت علي مختار وانا كلي ثقة فيه وفضلت واقف لحد ما الناس كلها جت واتطمنت علي كل الناس ( كلهم كلهم يعني ) واتحركوا ومشيت انا ومعايا اكرام وفهمي واسامة وعبد الرحمن نسابق الزمن علشان نلحق حفل التنورة اللى في الغوري ولحقنا من بداية الفقرة التانية كدا
وحفل التنورة دا مش اول مرة اروحه دي التالتة ولو روحت خمسين مرة مش هزهق ابدا إطلاقا بتاتا روحت وبدأ الاستمتاع والتنورة بالنسبة ليا مش مجرد الحركات ولا الموسيقي ولا الصوت انا بروح هناك علشان اغسل روحي من كل الغثاء المنتشر في انحاء الكوكب ، بروح هناك بجد بخرج صااااااااااااااااافي وحاسس انى طاير والكلام بيفضل معلق معايا وبحس اني لو قعدت الف كدا زيهم هطير ف الفضا وابعد بعيد وكمان كنت مبسوط اكتر انها عجبت فهمي واكرام واسامة وعبده لانهم كانوا اول مرة وبناءا علي اقتراحي وكنت خايف ما تعجبش حد فيهم لكن كلنا طلعنا مبسوطين تماما وبعدين روحنا الازهر قعدنا في الساحة شوية وبعدين اكرام عزمنا كلناااااااااااا ع العشا واحتفلنا معاه بالنجاح والتخرج وعقبال يا رب ما نحتفل معاه بالاعفاء وافتتاح الشركة
بجد كان يوم اكتر من رائع بغض النظر عن اشخاص لا تستحق الحياة ومواقف مش تمام حصلت بس المجمل ان اليوم كان حلو جدا ويا رب الناس كلها تكون انبسطت وعقبال المرة الجاية قولوا معايا امين
-------------------------------------------------
اسم البوست تحليق علشان انا بحلق ف السموات العلا وانا مبسوط واكتر بقي والسبب الرئيسي حفل التنورة بتطير فيه لفوق لفوق لفوق

Knowing

فيلم لينكولاس كيدج
انا من اكتر مشجعي نيكولاس كيدج وتقريبا بحب كل افلامه
النهاردة وانا بنزل فيلم نوينج او المعرفة كنت متوقع فيلم جامد بردو
بس حقيقة الفيلم كان اكتر من رائع ، وخلاني فاتح بقي طول الفيلم

بيبدأ الفيلم من خمسين سنة بالظبط واحتفاليه مدرسة بافتتاحها الرسمي والطلاب كلهم قدموا افكار للاحتفال باليوم دا ، الفكرة اللى فازت لطالبة والطالبة دي كانت فكرتها ان كل الطلبة يتخيلوا المستقبل ازاي ويرسموه ويتحط في علبه وما تتفتحش غير بعد خمسين سنة ولكن الطالبة دي ما بتعملش كدا وبتكتب ارقام كتير ف ورقة
مقدمة الفيلم تحبس الأنفاس وتخليك مأخوذ بالفيلم ومهيأ نفسيا لما هو آتي .
وبعد خمسين سنة اللى هو الوقت الحالي بيتم فتح كبسوله الزمن .
الورقة بتوصل لنيكولاس عن طريق ابنه ، وبمجموعه من الحسابات بيلاقي انها مش عشوائيه ولا مجرد ارقام .
حوادث مختلفه بتؤكد ان الورقة دي اللى فيها فعلا حقيقة ، بتتنبأ بحوادث بالوقت والمكان كمان ، وتبدأ محاولات الإنقاذ إلا إن اخر تاريخ بيكون ناقص احداثيات المكان ، حقيقة انا توقعت ان النقص دا معناه انه تاريخ نهاية العالم ، لكن بيستطيع نيكولاس يحصل علي بقية الأرقام ولكن بردو بيكون تاريخ نهاية العالم .
البقية بقي تشوفوها ف الفيلم

--------------------------------------

بس اللى عايز اقوله انى مش مستبعد اللى حصل في الفيلم مش القصة نفسها لأ النهاية ، اللى هي نهاية العالم ولكن السماء تنتقي بعض البشر لأسباب غير معلومه لنا ليعيدوا الكره من جديد ، يعني لو بصينا للتاريخ المعروف لينا والمختلف عليه حتى الآن ، قارة اطلانطا العظمي واعظم حدث خلال تاريخ الكون عرفناه ( وإن كنا لسه مختلفين حياله ) وإذ فجأة بتختفي بكل عظمتها وتقدمها وعلومها و .... ، هل فجأة اختفي العالم كله بأطلانطا وقليلين فقط انتقتهم السماء لتأخذهم بعيدا حتى تنتهي عمليه الإحلال لتتم عمليه التجديد عن طريقهم ؟؟ ، سؤال بدون إجابة . لكن لو بصينا لكل ثقاقات العالم القديمة فكلها اندثرت أو حتي لو لم تندثر فقد ضاعت علومها ، واكبر دليل حضارة الفراعنه العظماء ، اصحاب اكبر قاعده من العلوم والمعرفه والتقدم معترف بيه بين الجميع علي وجه البسيطة ، ولكن إذ فجأة كل شيء بينتهي وبيروح وما بيفضلش غير شواهد جامده لا تحمل أي معاني ، هل حصل نفس الشيء وكان للسماء رأي أخر ؟؟ ، من وجه نظر الفيلم لو طبقناها علي الفراعنه يعني هنقول ان الفراعنه اتعرضوا لكارثة ما افنتهم دون رحمه ولكن بقي بعض اثارهم لم تستطع الكارثه محوها وبعضها الأخر انمحي والاخر اندثر وتباعا بنجد اثار ليه في الوقت الحالي !! حقيقة علي الإطلاق مش مستبعد إن الحياة تكون كدا ، في وقت من الأوقات ترتأي السماء إن كدا كفاية بقي ومن ثم لازم نعمل إحلال وتجديد ، يتم انتفاء النختارين للبداية الجديدة وإنتشالهم من العالم وإيداعهم مكان ما ثم بعد ذلك يعودون بعد الإنتهاء من عمليه الإحلال يعني ربما ، ليه لأ

--------------------------------------

كاتب الفيلم والمخرج : هو اليكس بروياس وهو استرالي مولود في مصر ، لكن القصه فعلا عجبتني والإخراج بتاع راااااائع للغاية

في الأخر بقي اللى يحب يتفرج ع الفيلم .... دوس ع الأيوكون

مبسوط

بقالي كتير مش باجي هنا معرفش ليه
بس مش مهم اديني جيت
النهاردة كان يوم رائع
ماتش مصر والبرازيل كان حكاية
كان فوق الوصف فعلا ، والأجمل بقي كان شعورنا إحنا ، النهاردة كلنا كنا ف كافية ف الزقازيق ، كنا بنشجع كأننا ف الملعب بالظبط ، بجد صوت عصام الشوالي ما اتسمعش طول الوقت ، وكله بيفكرني بالإعلان بتاع كوكا بتاع العصبيين بيشجعوا مصر
وكله عمل فيها حسن شحاته
وشووووووط شوووووووووووط ، يا ابني ارفع ، حرام عليك طفش ، العب لقدام يا *** ، وكلمات تانية يعاقب عليها القانون مع كل غلطة
مش هعلق علي المستوي الفني للعيبة معينه بس الماتش عملنا فيه شغل جامد وكان ممكن نفوز كمان فعلا بس ياللا بقي تتعوض
بس يا رب نكمل كدا بقية المباريات واتمني نطلع دور الاربعة هبقي مبسوط كتير :)
الامتحانات وايامها يمكن ابقي اكتب عنها بعدين بقي

صحيح هتلاقوني هناك كمان كتير الأيام القادمة بقي
http://www.ahmadhima.co.nr/

تشي

في ذكري ميلاد التشي ... وسط البلد ... تشي جيفارا :)

قلبه ساكن .. جوا حارة

من دروب حسن الفقارى

كنت ماشي .. لقيته جنبي

لسه بيولع سيجاره

ع الشفايف بسمة مرة

والقميص طالع لبره

نفسه كان ف دنيا حره

واسمه كان ... تشي جيفارا

تشي جيفارا .. تشي جيفارا .. تشي جيفارا

قلبه كان عصفور برئ

ماشي يتجي الطريق

والطريق كان صعب لكن

حلمه كان وياه رفيق

ع الشفايف بسمه مرة

والقميص طالع لبره

نفسه كان ف دنيا حره

واسمه كاااااااااااااااان .. تشي جيفارا

تشي جيفارا .. تشي جيفارا .. تشي جيفارا

عندي عالم لسه حي

في امل رايح وجاي

مهما هتيجي عتمة

لسه جوا القلب ضي

ع الشقايف بسمة مرة

والقميص طالع لبره

نفسه كان ف دنيا حرة

واسمه كاااااااااااااااااااااااااااااااااااااااااااااااان

واسمه كااااااااااااااااااااااااااااااااااااااااااااااااااااااااااان

تشي جيفارا .. تشي جيفارا .. تشي جيفارا

تشي جيفاراااااااااااااااااااااااااااااااااااااااااا

أُحبك أكثر

تكبّر.. تكبرّ!
فمهما يكن من جفاك
ستبقى، بعيني و لحمي، ملاك
و تبقى، كما شاء لي حبنا أن أراك
نسيمك عنبر
و أرضك سكر
و إني أحبك.. أكثر
يداك خمائل
و لكنني لا أغني
ككل البلابل
فإن السلاسل
تعلمني أن أقاتل
أقاتل.. أقاتل
لأني أحبك أكثر!
غنائي خناجر ورد
و صمتي طفولة رعد
و زنيقة من دماء
فؤادي،
و أنت الثرى و السماء
و قلبك أخضر..!
و جزر الهوى، فيك، مدّ
فكيف، إذن، لا أحبك أكثر
و أنت، كما شاء لي حبنا أن أراك:
نسيمك عنبر
و أرضك سكر
و قلبك أخضر..!
وإنّي طفل هواك
على حضنك الحلو
أنمو و أكبر !

أحبك أكثر (حملها من هنا )
كلمات : محمود درويش
غناء : أميمة خليل

مبسوط

ضاقت فلما استحكمت حقاتها فرجت وكنت اظنها لن تفرج

أنا مبسووووووووووووووووووووووووووووووووووووووووووووووووط جدا
علشان من جوا ابيض
ودي كفاية اوي عليا

حاجة حلوة : بهاء طاهر

النهاردة وزى ما اتفقنا كل يوم بيساوي نفس رقم الشهر هنعمل بوست عن حاجة حلوة ف مصرنا
هنسيبنا بقي من كل السواد وكل الحاجات الوحشة
ايه ف مصرنا حلو
ها يا واد يا احمد
ايه حلو ف البلد
ما حد يفكر معايا يا جماعة
....................
................
............
........
....
..
.

بهــــــــــــــــــــــاء طاهر

قعدت كتير اوي بفكر ف حاجة حلوة ف مصر اي حاجة تعبت كتير اوي بس ف الاخر افتكرت العبقري بهاء طاهر واحد من اروع من قرأت لهم حتى الآن .
النهاردة مش جاي اتكلم عن بهاء طاهر سيته الذاتية او تاريخ حياته ، لكن من منطلق انى قارئ بيحب كتابات الراجل العظيم دا ، اول ما نزلت واحة الغروب كنت لسه بدأت اتعرف علي بهاء طاهر ، كانت علي طول طبعاتها بتنفذ اول بأول روحت بدور عليها مرة ملقيتهاش لكن لقيت نقطة النور لسه فاكر التاريخ جبتها يوم 5 ابريل وخلصتها يوم ستة ابريل 2008 كانت اول علاقتي ببهاء طاهر وظلت العلاقة حتى الان .
نقطة النور بالنسبة ليا هي اروع ما قرأت في حياتي ، وكانت المدخل الاروع لعلاقتي ببهاء طاهر كمية الحزن والروحانية ف الرواية رائعه للغاية وتناسب شخص حالم زيي كتير ، الرواية اللى فيها الناس بتغلط وبتداوي الغلط بالحب وابو خطوة الصالح اللى علي لسانه يُجري الكاتب ينابيع الحكمة .
رواية تدور حول ان الحب طريق الخلاص ، وان انتظار النور مش ف الظلام وحاجات تانية كتير ، الرواية كانت غذاء روحاني متكامل يملي الروح عن اخرها بالحب .
بعد كدا امتلكت واحة الغروب ، مش فاكر جبتها امتى وخلصتها امتي بس هي اكدت علي ان بهاء طاهر متي بدأته فـ سأنهيه الكتاب كان ممتع لأقصي درجة ، تقرا شوية عن واحدة م الشخصيات وبعدين يتركك الكاتب تموت فضول عن اللى هيحصلها وينتقل لمرحلة اخري ولما تندمج اوي ف التانية يعود بيك ليروي ظمأ فضول انتهي لكنه يولد من جديد وهكذا حتى الرواية ، اي عبقري دا اللى بينفذ إلي غياهب النفوس ويبحث فيها ويخرج من جواها ذنوبها وبياضها نقاءها وسوادها وحاجات كتير ، لبهاء طاهر قدرة غريبة علي سبر اغوار النفس البشرية لأبطاله بتخليني اتسائل هو ازاي بيعمل كدا ، لكني بعد قراءة واحة الغروب تعملت ان اكف عن التساؤل ما دام الكاتب بهاء طاهر واكتفي فقط بمتابعة الحكاية للنهاية .
بعد كدا وفي رحلة من رحلاتي المتكررة علي عمر بوك ستور اكملت رحلتي مع بهاء طاهر ، كتاب دار الهلال يحتوي علي الاعمال الاولي للكاتب ، وخالتي صفية والدير والحب ف المنفي منفصلتين حصلت عليهم مرة واحدة .
كانت بداية الترم وفرصة جيدة للقراءة ، بدأت بالحب ف المنفي ، ربما كانت الرواية الأولي اللى تنهمر فيها دموعي ، فـ لواحد زيي من مواليد تسعة وتمانين لم يعرف ابدا طوال حياته عن صبرا وشتيلا غير الاسم وفقط الاسم ، إلا ان ما فعله بهاء طاهر ادخلني وسط القتلي أبكاني كأني وسطهم يؤلمني فقدهم وانا واقف عاجز لا استطيع شيء ، ورمزية الموت وهل احنا مستعدين ليه و لا لأ وهل لما بقول باعلي صوتي يا رب اموت واستريح بيكون قصدي كدا ، غالبا لا كل واحد يفكر كدا لو هو بجد قصده كدا يروح يرمي نفسه علي اول عربية ع المحور .
بعد كدا جائت ضحي وقالت ضحي ، رواية اخدتني كتير وشغلتني كتير هو مين في ايه ويمكن عرفني كتير عن الفترة اللى بتدور فيها الاحداث ولكنه اكد لي بما لا يدع مجالا للشك ان هذا المبدع بهاء طاهر استاذ ارواح وانفس بيعرف ازاي يدخل جوا اوي ويشوف كل الاحاسيس والتعبيرات وكل حاجة لكن الاروع انه بيصيغها ليستطيع الهواة من أمثالى انهم يتعرفوا عليها ويستسيغوها بسهولة .
بقي الكثير من عالم بهاء طاهر لكن كفاية كدا دلوقتى
بهاء طاهر انت من اجمل الحاجات اللى عاصرتها ف مصر
ادام الله علينا نعيم قلمك

عقبال عندكوا

يا دبلة الخطوبة عقبالنا كلنا
صباحو افراح يا فهمي
لوللولولولولولييييييييي

تاج الملك تشي

بسم الله ....

ازيكوا كلكوا يا ناس ياللى بتعدي عليا هنا

النهاردة عامل تاج مخصوص لأصدقاءي من ارض الواقع والفضاء البلوجي الافتراضي

اول حاجة قسم ابولو قصدي قسم الحق ودا مخصوص علشان عفشة باشا حبيبي

واللى يرضي ياخد التاج يبقي بيتعهد امام الله والدولة والناس انه يجاوب بصدق

واللي مش ناوي يجاوب هو عارف عاقبته ;)

ياللا نبدأ

وكالعادة الاسئلة بالأزرق والإجابات بالأحمر واخر الموضوع هاحط الاسئلة كلها ورا بعض علشان نسهل عملية النقل عليكوا

التاج متمرر لكل اللى عندي ع السايد بار بلا استثناء من اول واحد لأخر واحد وبدون إجبار ( لكن في ناس عارفه نفسها مجبرة وإلا .... )

رغيت كتير أنا خلوني أبدأ .......

3

2

1

جووووووووووووووووووووو

1- عيب فيك ومش نفسك تتخلص منه ع الاطلاق

علي فكرة والله بحط الاسئلة قبل ما افكر فى الإجابة واديني دبست نفسي :)

مممممممممممممممممممممممممممممم

ممكن نقول الثقة والشك السريعين والاتنين باخد بيهم احكام مسبقة على الناس فى اول تعارف وبيحتاجوا لوقت اطول لتأكيد دا او ازالة اثاره

2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟

I- هند : لو ربنا كان عين لكل واحد ملاك حارس فأكيد هند الملاك خاصتي 

II- فهمي : ساعات بنظل نبحث فى الدنيا علي اشخاص يخافوا علينا ويفهمونا من غير كلام .... ولما نزهق بتهديهم السماء لينا ... فهمي

III - كيكوووووووووو : اقرب حد ليا من قرايبي وسلواي الوحيدة فى البلد التيت دي

IV- مروة كناريا : مجنونة ورزينة وفيها البدع

V- أحمد عبد الوهاب : أحد أهم الشخصيات اللى بتحمل قلب كبييييييييييييييييييير بس يبيع اي حد علشان الفلوس تيييييييت

3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟

I- سارة : غالبا بتبقي موجودة فى الوقت الصح وليها عليا حق كبير وشكلها مش هتساهولي

II- موصطفي العوليمي : اكتر شخص عايز اقابله واكلمه حتى الان ومعاه ينطبق المثل القائل ... كلنا فى الكأبة بلوجرز

III- ساااااااااااااااالي : المراية بتاعتي لما تواجهني بالحقيقة وتقولي فوق ، ما تعييش

IV- نيرة : أختي الكبيرة ( هي وسالى ) واكتر واحدة روحانية شوفتها بحسها حد شفاف كدا واكتر حد بيقولي اصبر سيبها لربنا :)

V- هبة (بوبا ) : اختي بردو هي كمان بس ايه يخرب بيت ام الطيبة ، ربنا ادها الطيبة اللى ف العالم كله قالها تفرقها ع الناس طمعت فيها واخدتها لوحدها :)

4- العشرة اللى فوق ... ابعت لكل واحد فيهم رسالة !

I- هند : احترت كتير اكتب ايه ؟؟؟ 

II- فهميز : بطل رخامة وحاول تعمل صلح بين قلبك وعقلك للوصول للحل الامثل فى الامور ايها ( وش شيطان بيضحك )

III- كيكوووووووووو : الحياة اكبر من تعقيدك ليها يا بتاع برج العقرب يا رخم 

IV- مرووووووووووووة : هتفضلي اطيب قلب في كليتنا التيييييييييييييت دي ( ربنا معاكي )

V- عب وهاب : لو ما جاوبتش ع التاج دا ليلتك عتبجي طين طييييييييييين

VI- ساااااارة : حاولي تعملي اللى انا مش عارف اعمله حتى الان ... تصالحي مع نفسك

VII- موصطفي : مازلت رغم معرفتي عنك لغز عصي الفهم

VIII- سالى : كل ما بشوف صورتك بتحضرني براءة الدنيا وانها ما تستاهلش حاجة

IX- نيرة : انتى بقي اللى كل لما بشوفك بيطلع للصورة جناحين وهاله بيضا من فوق ... ربنا يحفظك يا رب

X- هبه : محتاجة بردو تتصالحي مع نفسك وتحبيها حتى لو كان علي حساب الناس اللى ادتيهم ونستيكي

كلكوا علي بعض " ربنا يخليكوا ليا يا رب ويوفقكوا دايما ويحقق كل احلامكوا .............. "

5- العشرة اللى فوق دول اكتب لكل واحد كتاب او اغنية بتعبر عنه فى رأيك

I- هند : وسط الدايرة :)

II- فهمي : حكايتي مع الزمان

III- كيكو : اشكيك لمين والخصم انت والحكم

VI- مروة : مجنونة ( محمود العسيلي )

V- احمد عب وهاب : مدد يا رسول الله

VI- ساره : يا طير يا طاير.

VII- موصطفي : اي حاجة لفرويد هتكون مناسبة لكمية التعقيد اللى جواه

VIII- سالي : زي الملايكة

IX- نيرة : نقطة نور بهاء طاهر :)

X- بوبا : كلك علي بعضك حلو

6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟

مممممممممممممممم

سؤال رخم فعلا
انى ما سامحتش حد غلط في حقي

7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟

هخليها بعد م كذا حد يجاوب ع التاج بس هي متسجلة ف دماغي يعني

الاسئلة بقي علشان الكوبي والبيست

1- عيب فيك ومش نفسك تتخلص منه ع الاطلاق

2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟

3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟

4- العشرة اللى فوق ... ابعت لكل واحد فيهم رسالة !

5- العشرة اللى فوق دول اكتب لكل واحد كتاب او اغنية بتعبر عنه فى رأيك

6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟

7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟

مرة كمان التاج متمرر لكل اللى عندي ع السايد بار وخاصة الناس اللى عندي ع الميل 

With a big HUG

Happy Birthday Happy Birthday to me

Happy Birthday to you Ahmad

Happy Birthday

كل سنة وانت طيب يا انا :)

سنة حلوة يا جميل سنة حلوة يا جميل

سنة حلوة يا احمد سنة حلوة يا جميل

صور

نسرين عملت صورة هي كان عندها حق يعني بس غالبا مش دا الشكل الوحيد
ايه رأيك كدا
والله موجود فى الدنيا ودايما من واحنا صغيرين لحد ما نموت

ضحكني يمكن أضحك

نظرا لأني بحاول اخرج من الحالة النفسية السيئة قولت ادور فى الدرايف بتاع الاغاني عن الاغاني المبهجة او اللى بتخليني مبسوط

حبيتك بالصيف

أعطني الناي

شايف البحر

جائت معذبتي

طيري يا طيارة

نحنا والقمر جيران

بكتب اسمك

البوسطة

سلملي عليه

ملك مدينة

حنيت

أديني رجعتلك

حيران

قلبي وروحي وعمري

قولي احبك

ناي

أتحبني

عيد وحب

ضلي زيدي

ها حبيبي

صباحك سكر

عشقك ندا

أحمر شفايف

قلب فاضي

قلبك على قلبي

قلبي مساكن شعبية

علموني عنيكي

أنا بعشق البحر

أسكن بيوت الفرح ( ممكن )

بالحظ وبالصدف

بننجرح ( بحبها ومحدش يقولي اغنية كئيبة )

ابكي

إيدي في جيوبي

أفتح قلبك

إقرار

أنتي

في عشق البنات

حاضر

خايف

لما النسيم

من أول لمسة

شجر الليمون

حواديت

سيا سيا

وسط الدايرة

يا اسكندرية

يا صبية

ملناش غير بعض 

من حقنا 

ساعات المطر 

يمكن اضحك

فرحني .. فرحني

فرحني .. يمكن افرح 

يمكن اضحك 

يمكن اطلع م اللى انا فيه

فرحني ... يمكن احلم

يمكن أغير 

يمكن اقول اللى مخبيه

..........................

ضحكني ... يمكن أضحك

يمكن أفرح

يمكن أطلع م اللى انا فيه

ضحكني ... يمكن أحلم

يمكن أغير

يمكن أقول اللى مخبيه

أقووول

.............

مش يمكن لسه الدنيا جميلة بجد

ولسه فى الصيف والبرد

ولسه الورد

مش جايز يطلع فى العيب

فيا العيب مش فيهم

زغزغني ... زغزغني

زغزغني يمكن أصحي وأقول بالبلدي وأقول بالفصحي

زغزغني يمكن أصحي وأقول بالبلدي وأقول بالفصحي

زغزغني يمكن يمكن أقول بالبلدي وأقول بالفصحي

وأياك ترجع تسكت تاني تقولي مفيش

مفييييييييش

مفيش

.......................

زغزغني يمكن ينفع أرجع أسمع دقة قلبي تاني وأعيش

زغزغني يمكن ينفع أرجع أسمع دقة قلبي تاني وأعيش

 أعييييييييييش ... أعيش

وأعيش

اقرأ ... تكون - خلف الكواليس

مبشر العنوان بتاع البوست

اقرأ تكون الحملة والمجلة اللى بدأناها ومستمرين فيها إن شاء الله
واحنا بنخلص فى العدد الاول من المجلة حصلت عجائب وطرائف زي الفل

اول حاجة بدأنا التنفيذ وبدأنا نوزع التاسكس كل واحد هيعمل ايه
لكن يبدو اننا وش نحس وان الحملة راكبها عفريت لكننا هزمناه والحمد لله مع خسائر فادحة
اول ما بدأنا بدأ دكتور اياد وكان اول واحد مخلص المقال الافتتاحي للمجلة وكان دا دافع كبير لينا اننا نكمل
بدأنا واختارنا العقاد علشان يكون اديب العدد وكان عليا انا اخلص ملف العقاد ومقال تاني اخدت 3 ايام بخلص ملف العقاد وبجمع داتا قريت كتيييييييييير جدا وبدأت بقي اكتب باسلوبي بس كان مرهق جدا بس لما خلصت كنت مبسوط جدا اي واحد فى الدنيا بيكون فرحان وبينسي تعبه لما بيشوف ناتج دا قدامه

بدأت أشوف باقي الناس بقي سمير بسم الله ما شاء الله ظبط نفسه ع الاخر وخلص كل الشغل فى وقته تمام يومين كان رافع كل كتب العقاد ومظبطها كلها وكان فعلا اكتر واحد ملتزم وبعده على طول احمد عمر اللى بردو كان بيرفع كتب تانية

اللى عقدني فى عيشتي بقي فهمي يا عم خلص حاضر ومفيش حاجة لغاية ما جابلي الضغط بس الحمد لله رفع الكتب فى الاخر والنت فصل عنده بعدها ولغاية وقت كتابة البوست دا ( اشطات يا مان ) ودي كانت بداية النحس

مصطفي باشا العوليمي :P
بجد تمام التمام يعني فى تلت ايام خلص اللى نااااااااااااس ( واخدين بالكوا ها ) ما خلصوهوش فى شهر وبجد يستحق نرفعله القبعة

اللى جاي باقي شغل المجلة وكله تسييح فخلينا نعمل اسماء كودية علشان محدش يضربني
اول حاجة المفروض كل واحد عنده كذا حاجة يعملها او كتاب كان النساء من الزهرة والرجال من المريخ الكتاب كان فعلا نحس بما تعنيه الكلمة اللى المفروض يعمل نبذه عن الكتاب بنت صديقتنا ( مش راضي اسيح اهو اي خدمة ) وهي بقي من انصار حقوق المرأة اولا النسخة اللى لقيتها والوحيدة المتوفرة الكترونيا وحشة جدا لكن المشكلة ان فى النص مكتوب تعليق كاتبه المترجم للكتاب بيقول
" وهذا يثبت قول رسولنا ان النساء ناقصات عقل ودين "
معرفش هو كاتبه ليه ولا كان حد اصلا طلب رأيه ولا تعليقه المفروض انه بيترجم بس لكنه مستفز وفتح عليا ابواب جهنم المهم بعد اقناع انها تكمل الكتاب بدون النظر للحاجات دي كمل الكتاب نحسه كل شوية النت يفصل مرة ومرة الكهرباء واول ما تفتح الكتاب ضيوف عندنا
عاااااااااااااااااااااااااااااااااااااااا
الكتاب دا فعلا نحس
اخر عمايل الكتاب المشئوم النت قاطع بقاله اكتر من اسبوع والمقال ما خلصش واتأجل للعدد الجاي إن عشنا بقي

تاني نحس بسم الله ما شاء الله قصدي تالت ( محدش يحسد يا جماعة )
كان فى كتاب تاني وهو لا تحزن لعائض القرني ( انا شخصيا مش بحب الكتاب لكن فى ناس بتدعمه ) المهم كان المفروض حد تاني يخلصه ونبذه عنه لكن ليس كل ما يبغاه المرأ يلقاه ويكمل النحس والجهاز يبوظ
هههههههههههههههههههههههههه
يا سبحان الله فعلا شكله نحس مأثر على كل اللى معانا مرة النت يفصل نهائيا والمرة دي جهاز باظ
طبعا كان فى مقالات تانية الحمد لله وصلت بالسلامة من على جهاز بديل ( الحمد لله ) بس وصلت بقي يوم كام ؟؟ يوم 28 ستة يعني قبل يومين من نزول المجلة ( ايموشن واحد بيشد فى شعره )

اخر حاجة بقي كان المفروض نااااااااااااااس ( واخدين بالكوا ) عليهم مقالين يخلصوا واحد عن كتاب والتاني مفتوح حسب الاختيار وكل يوم اقول فين المقال فين المقال ولا حياة لمن تنادي كل شوية نغير الكتاب اللى هيتكتب عنه قلق فى الحضارة فرويد لا لا لا خلينا فى الامال الكبري لتشارلز ديكنز لا لا لا خلينا فى معرفش ايه
حراااااااااااااااااااااااااام
بس الحمد لله ربنا ستر والحاجة وصلت بس يوم كااااااااااااااااااااااااااااااام ؟؟ يوم 30 يعني اخر يوم اللى المفروض كان الديد لاين يوم 25 اصلا

كدا كله تمام وكله بعت الشغل بتاعه والدنيا فل الفل لااااااااااااااااااا لسه
؟؟
فاضل المقال بتاعي
ياااااااااااااااااللهول هو انا لسه ما كتبتوش
اه كنت مأخره ومش عايز اكتبه لان مكانش في الهام وكتبته يوم 30 كنت صاحي 26 ساعة ورا بعض بالظبط روحت فاتح الوورد وحاط ايديا ع الكي بورد وغمضت عنيا وسبتها تعمل ما بدا ليها وبعدين بفتح عيني بس هو دا قشطة كدا تمام اوي
بس بجد كانت حاجة مسخرة جدا انا اللى قاعد ازعق ومقالاتكوا فين والحاجة فين وخلص يا زفت و و و و لغاية ما انا زهقت من نفسي من كتر الزن عليهم ما خلصتش مقالي
ما دمت انا ما خلصتش بقولهم ليه يخلصوا يعني ما إذا كان رب البيت بالدف ضاربا فشيمه اهل البيت انهم هيخلصوا حاجتهم متأخر أكيد

انا بقي صاحي 26 ساعة قولت انام 3 ساعات بالظبط وصحيت علشان كنت لازم انزل رجعت قعدت ع النت ومرضيتش انام ( تقدروا تقولوا سادية ) والصبح بقي ( اصلي بنام نهارا واصحي ليلا ) على 9 كدا قولت انام واصحي على 1 انزل لمصطفي فتحي حفل التوقيع محمد اخويا الصغير كان ليه رأي اخر وفضل يرخم عليا لغاية ما وصلت الساعة 12 ونمت ساعه لا تغني ولا تسمن من جوع وقمت نزلت لمصطفي بردو وخلصت مصطفي وانا شبه سكران بمعني الكلمة بس نزلت وسط البلد لفينا شوية صغيرين وانا راجع بقي عمي كان فى وسط البلد رجعت معاه بالعربية ساعتين من اول ما ركبت لحد باب البيت وانا ناااااااااااااااااااااااااااااااااااااااايم

طلعت البيت كملت قعده ع النت تاني وما نمتش بردو
ادمان اعمل ايه بس فيا

عموما مبروك علينا كلنا اقرأ تكون العدد الاول وإن شاء الله اللي جاي احسن كتير

* انا مرضتش اذكر اسماء بس المرة الجاية هسيح على كبير والبي بي سي والجزيرة بقي وكله مش هرحم :P

تحياتي
تشي أحمد

عني - لحظات شتات 2

أشتاق للغاية لأن اكتب تلك التدوينة اللتى لن اكتبها الآن

عن اقرأ ... تكون
اجمل فريق عمل فى الدنيا وليه كان رب البيت بالدف ضاربا


عن اصدقاء حقيقين كل يوم بكتشفهم في حياتي وبيمثل تواجدهم فى حياتي بعد أخر ومعني أخر يستحق معاه العمر انى ادور عليه واحاول اعيشه

حفل توقيع كتاب مصطفي فتحي ويوم اكتر من رائع

فسحة فى وسط البلد ( إن كان لنا اننا نسميها فسحة ) لكنها فسحة من الخنقة والملل الدائم مع ناس من احسن ناس على رأي محمد حمدي أصدقاء اليوم الواحد ( مع اختلاف مقصده عن المعني الحقيقي للكلمة )

اشتاق جدا لشط اسكندرية نفسي اكلم البحر واشم ريحة الهوا المعبق بالملح

مشتاق كمان لحضن كبييييييييييييييييييييييييير لاعز صديق فى الدنيا الواد فهمي اللي بجد مفتقده

قبل ما امشي جملة علقت معايا

Yesterday is history , Tomorrow is mystery , But Today is a gift , That's why it's called present .

البراء أشرف - أنت الشاهد

فيلم البراء اشرف اللى اتعرض ع الجزيرة بعنوان " المدونون الصحفييون الجدد "

من هنا لو عايز تنزله على الجهاز

الفيلم هينزل بامتداد flv
ومش هشتغل بالميديا بلاير العادي
ودا برنامج بيشغله ويشغل كل الميديا والامتدادات التانية وانا شخصيا يفضله فى التعامل مع الميديا
والبرنامج من هنا
The KMP Media Player


ومن هنا على يوتيوب

الفيلم جامد جدا ويستحق المشاهدة فعلا وكمان الفيلم هيجرح اوي فيه لقطات فيديو لبلوجرز انا اول مرة الحقيقة اشوفها رغم انها يمكن كانت متوفرة قبل كدا لكنها كلها كدا متجمعه هتخلي الواحد يحس بالاشفاق والخوف على مصر اكتر ما هو خايف

تحياتي
تشي

سقوط فى مكتبة الاسكندرية

فهمي ، سمير ، أنا ، عنتر ( بالترتيب حسب الظهور فى الصورة من اليمين للشمال )


انت تكون فى الاسكندرية
تغير جو وناس وكل حاجة
انها النشوة اللى انتظرها منذ بدأ الخليقة
أنا وصورة على سهوة ( نسبة إلى على سهوة ليه من اغنية السيدة إليسا ) وانا بتأمل البحر وأنظر إلى المجهول من قصاد مكتبة الاسكندرية


ريحة البحر والناس اللى بتصطاد والحبيبة اتنينات ع البحر والهوا اللى يطيرك اتنين كيلو متر واجمل صحبة فى الدنيا
تلاتة من اجمل ايام فى حياتى تقريبا ( لو استثنينا منهم بعض ساعات قليله )
لو اتكلمت هتلكم كتيييييييييييير اوي اصل الايام كانت جامدة موت

أول يوم روحنا مكتبه اسكندرية ولفيناها حته حته ووقعت انا هناك حته وقعه ع الارضية الباركيه
التلاتة زمايلي واقفين وانا بظبط الكاميرا والسيلف تايمر وطالع اجري علشان الحق الصورة وهوووووووووووووووووووووووب روحت متزحلق ع الارضية واخدت حته وقعه ..... لكن ميييييين ما يقع إلا الشاطر قومت فى ثوانى واخدت الصورة معاهم بردو صحيح كانوا هما ميتين على نفسهم م الضحك بس انا كنت واقف ف الصورة عااااااااااادي جدا

خرجنا م المكتبه وطلعنا ع القلعة بس ما دخلنا قضيناها برا ع البحر وفضلنا لغاية غروب الشمس وبعدين طلعنا ع المنشية عند نصب الجندي المجهول قعدنا شوية هناك وبعدين طلعنا على ماكدونالز اتعشينا وشربنا ميلك تشيك الجااااااااااامد وبعدين رجعنا عند الواد فهمي قضينا عنده الليل بنلعب برو إيفيلوشن سوكر ونيد فور سبيد

تاني يوم طلعنا على كوبري ستانلي وقعدنا هناك شوية كتير واخدناها مشي لغاية ستيفانو وروحنا الجراند مول لفينا شوية وبعدين رجعنا على ماكدونالز شربنا ميلك تشيك تاني ومشينا روحنا عند الواد فهمي بردو

طبعا المواقف اللى فى النص واللى لا تنسي كتير بس اللى يفتكر بقي كويس قوي كدا عليكوا وتتكرر إن شاء الله

صحيح قبل ما امشي جمله شوفناها فى سان جيوفاني ( عدينا من قدامه بس ما دخلناش بلاش ذكاء احنا مش ولاد وزرا هنا ) والجملة بتقول :

" وما قصر من الاعمار طول السهر "

الجملة داخله دماغى اوي اوي يعني

تحياتى كتير
تشي أحمد

احمد الهواري فى المحور

حلقة تسعين دقيقة بتاعه اول امبارح واللى كان فيها احمد الهواري واحد من شباب تيت راديو الجامدين جدا

الحلقة لينك مباشر من هنا