البراء أشرف - أنت الشاهد

فيلم البراء اشرف اللى اتعرض ع الجزيرة بعنوان " المدونون الصحفييون الجدد "

من هنا لو عايز تنزله على الجهاز

الفيلم هينزل بامتداد flv
ومش هشتغل بالميديا بلاير العادي
ودا برنامج بيشغله ويشغل كل الميديا والامتدادات التانية وانا شخصيا يفضله فى التعامل مع الميديا
والبرنامج من هنا
The KMP Media Player


ومن هنا على يوتيوب

الفيلم جامد جدا ويستحق المشاهدة فعلا وكمان الفيلم هيجرح اوي فيه لقطات فيديو لبلوجرز انا اول مرة الحقيقة اشوفها رغم انها يمكن كانت متوفرة قبل كدا لكنها كلها كدا متجمعه هتخلي الواحد يحس بالاشفاق والخوف على مصر اكتر ما هو خايف

تحياتي
تشي

ملعون ابو الغباء

-*فى تحديث فى اخر البوست*-

انا نفسي اعرف كمية الغباء والانقيادية فينا كعرب هيفضل لحد امتى
جروب مخصوص ع الفيس بوك معمول مخصوص علشان التصويت للإسلام فى استفتاء عامله قال التلفزيون الفرنسي قال ولو قطعنا بانه فعلا صحيح مش اشتغاله لكن الالعن بقي فى الكلام اللى عالجروب انا اعرف اني اقول لحد روح جاوب على استفتاء مش روح جاوب على استفتاء باللى اقولك عليه دا

وعلشان تظهر الصورة دا الكلام اللى فى الجروب

التلفزيون الفرنسي يصوت عن أهم دين في العالم..

والإسلام حتى الان ولله الحمد في المقدمة..

فشدوا همتكم ليبقى داااااااائماً وأبداً في المقدمة..

التصويت في هذا الرابط

http://www.arte.tv/fr/934300.htm

طريقة التصويت هي :

في السؤال الأول الاختيار الخامس

Musulmane

أما بقية الأسئلة اختر الجواب الأول ما عدا السؤال قبل الأخير اختر الجواب الثاني
Une regle de vie
والسؤال الأخير اختر الإجابة التي تناسب عمرك.

أتمنى من الجميع التصويت ..
صوت لن تخسر شيئاهي 10 ثوان من وقتك ..


شرح الأسئلة :

السؤال الأول :

أي الأديان الأقرب والذي ترتاح له نفسك؟
De quelle religion vous sentez-vous le plus proche ?
الجواب: الإسلام Musulmane

السؤال الثاني:

هل أنت مؤمن Etes-vous croyant?
الجواب: نعم Oui

السؤال الثالث:

هل تحضر مكان العبادة ( هل تذهب للمسجد مثلاً) Fréquentez-vous un lieu de culte?
الجواب: بانتظام Regulièrement

السؤال الرابع:

هل تمارس العبادة؟ Pratiquez-vous la prière?
الجواب: بانتظام. Regulièrement

السؤال الخامس:

هل يجب على المسئولين الدينيين أن يناقشوا موضوعات حديث السّاعة ؟
Les autorités religieuses doivent-elles prendre position sur les thèmes d'actualité ?
الجواب: نعم على الكل Oui sur tous

السؤال السادس:

هل تعتقد أن الدين يجيب على حاجيات الفرد؟
Pensez-vous que la religion répond aux attentes de l'individu?
الإجابة: نعم. Oui

السؤال السابع:

الدين بالنسبة لك: La religion est-elle pour vous :
الجواب: قاعدة حياة Une règle de vie

السؤال الثامن:

في أي فئة تصنف عمرك؟ -- ؟Dans quelle tranche d'age vous situez-vous ?
الجواب: تحت 20 سنة
بين 20- 35 سنة
بين 35 - 55 سنة
اكبر من 55

ثم اضغط على voter للتصويت

وسوف تري نتيجة التصويت بشاشة اخري حال ضغطك على التصويت

وابشروا بالخير الاسلام هو الاعلى نسبة والحمد لله

انا بقي وفى الكلام دا كله نفسي اعرف معناه ايه انى اروح اقول لواحد فى استفتاء روح اختار كذا وكذا وكذا ليه هو حمار ما بيفهمش يعني
ما يمكن انا مش بروح اصلي بانتظام فى الجامع ولا مش بمارس العبادة بانتظام لازم يعني اجاوب على الاسئلة بنفس الكلام اللى هما قاليلين عليه ولا ايه

بس فى ديمقراطية سابوا كل واحد يجاوب اخر سؤال على مزاجه ( لا والنبي ) (غطيني وصوتي يا بهيييييييييييييييه ) هو المفروض نكون كلنا نفس الحاجة ونفس الاجابات يعني ولا ايه
دا الرسول عليه افضل التسليم قال فيما معناه " لا تكن إمعه إذا احسن الناس احسنوا وإذا اساؤوا اسئت " يعني مش علشان الناس بتعمل انا كمان اعمل بدون اقتناع قالوا السؤال الاول اختار اول حاجة يبقي اختارها وانا زى الحمار " ولا مؤاخذة " كأن ربنا خلقنا بدون عقول

المصيبة الاكبر بقي ان التصويت مش لاكتر دين فى العالم التصويت علشان يشوفوا التزام الناس بالدين وتعاملهم معاه فى المراحل السنية المختلفه ورأيهم حول علاقة الدين بالحياة العامة وكدا مش بيشوفوا اكتر دين انتشار فى العالم " يا اغبيا " لكن الفهم السطحي سمه مميزة لينا على الدوام وبقينا " بنهيص " فى اى حاجة والسلام

حاجة كمان بقي تغيظ عدد الناس اللى ف الجروب 31 ألف وكسر يعني فى اكتر من 31 ماشيين والسلام ورا كلام وخلاص ما فكروش يشغلوا عقلهم ويقولوا صح ولا غلط ..... لنا الله
* صحيح : كان المفروض يتحط بدل كلمة العرب المسلمين لكن من الخطأ لصق الاسلام بالمسلمين دلوقتى لأنهم ما يعبروش عنه بحال من الاحوال ( طبعا إلا من رحم ربي وهم قله قليلة جدا جدا جدا جدا جدا )

دا لينك الجروب لو حد عايز يلقي نظرة
http://www.facebook.com/group.php?gid=6117092052

* تحديث ( 1 )

إضافة للمتميز دوما صديقي العزيز احمد عبد الوهاب
HaMaDa 3aFshA said...

احمد باشا وملاحظاته الجميلة
بس اسمحلى برده التمسلهم العذر يمكن مش فاهمين كويس وبعدين الحب اعمى وكلنا محبين للرسول "ص"وكله كان عاوز يقدم اى حاجة يقدر عليها
بس هما غلطوا فى حاجة هو احنا كلنا لما نقول ايوة احنا فعلا ملتزمين مية مية يعنى طريقة معيشتنا ونظام حياتنا هو ده الاسلام وهى دى تعاليمه احنا لو قلنا اننا فى التمام وبنفذ بالحرف وبصوا لاخلاقنا ونظام حياتنا اللى زى الزفت الا من رحم ربى هنودى الاسلام فى داهية هيقولوا دول اكتر ناس بتطبق ومع ذلك اكثقرهم فسادا يبقى ظلمنا الاسلام اللى ما قالش على حاجة من اللى احنا بنعملها انهاردة كل ذنبه ان احنا انتسبناله يبقى حرام نضيعه وسط الاديان دا حتى الاسلام ما قالش اكدبوا ولا حتى فى المزاح
وشكرا

دا الكومنت بتاع احمد وفعلا هو عنده حق فى الحته التانية ( مش بتاعه التمسلهم العذر علشان انا مش هلتمسلهم :D )
المهم فعلا لو كلنا روحنا وسمعنا الكلام وجاوبنا زى ما هم قايلين كدا يبقي الاسلام كدا اكتر دين ناس عملت منه فوتنج واكتر ناس منه بتصلي دايما وبتروح الجوامع وبتتبعه فى امور حياتها المختلفة ..... قشطة اوى لحد هنا نبص بقي لحال المسلمين اخلاق زى الزفت ، فساد ، رشاوي ، احتكار ، استغلال ، كره وبغضاء وكل حاجة وحشة ...... !! طيب لو دول المسلمين ولما هما مرتبطين بإسلامهم .... يبقي اكيد هو دا اسلامهم
استني استني استني بتقول ايه يعني احنا بدل ما نرفع الاسلام بنسيء إليه .. اه والله بنسيء ، شوفت ازاى ... يعني يضاف ع الكلام اللى فوق ان الهدف اللى هما راسمينه فى عقولهم كمان مش هيتحقق ............. أشك لو اصلا فى عندهم عقول علشان يعملوا حاجة زي كدا ... ملعون ابو الغباء اللى عمل عشش وبيوت فى عقولنا كمان مرة

******************

خلص كلامي وتحياتى
تشي أحمد

نزار ... ملهمي

*بوست لابد منه مع ان فى قبله بس حكم القدر بقي

نزار قباني
فى ذكراك العاشرة
بحبك

سقوط فى مكتبة الاسكندرية

فهمي ، سمير ، أنا ، عنتر ( بالترتيب حسب الظهور فى الصورة من اليمين للشمال )


انت تكون فى الاسكندرية
تغير جو وناس وكل حاجة
انها النشوة اللى انتظرها منذ بدأ الخليقة
أنا وصورة على سهوة ( نسبة إلى على سهوة ليه من اغنية السيدة إليسا ) وانا بتأمل البحر وأنظر إلى المجهول من قصاد مكتبة الاسكندرية


ريحة البحر والناس اللى بتصطاد والحبيبة اتنينات ع البحر والهوا اللى يطيرك اتنين كيلو متر واجمل صحبة فى الدنيا
تلاتة من اجمل ايام فى حياتى تقريبا ( لو استثنينا منهم بعض ساعات قليله )
لو اتكلمت هتلكم كتيييييييييييير اوي اصل الايام كانت جامدة موت

أول يوم روحنا مكتبه اسكندرية ولفيناها حته حته ووقعت انا هناك حته وقعه ع الارضية الباركيه
التلاتة زمايلي واقفين وانا بظبط الكاميرا والسيلف تايمر وطالع اجري علشان الحق الصورة وهوووووووووووووووووووووووب روحت متزحلق ع الارضية واخدت حته وقعه ..... لكن ميييييين ما يقع إلا الشاطر قومت فى ثوانى واخدت الصورة معاهم بردو صحيح كانوا هما ميتين على نفسهم م الضحك بس انا كنت واقف ف الصورة عااااااااااادي جدا

خرجنا م المكتبه وطلعنا ع القلعة بس ما دخلنا قضيناها برا ع البحر وفضلنا لغاية غروب الشمس وبعدين طلعنا ع المنشية عند نصب الجندي المجهول قعدنا شوية هناك وبعدين طلعنا على ماكدونالز اتعشينا وشربنا ميلك تشيك الجااااااااااامد وبعدين رجعنا عند الواد فهمي قضينا عنده الليل بنلعب برو إيفيلوشن سوكر ونيد فور سبيد

تاني يوم طلعنا على كوبري ستانلي وقعدنا هناك شوية كتير واخدناها مشي لغاية ستيفانو وروحنا الجراند مول لفينا شوية وبعدين رجعنا على ماكدونالز شربنا ميلك تشيك تاني ومشينا روحنا عند الواد فهمي بردو

طبعا المواقف اللى فى النص واللى لا تنسي كتير بس اللى يفتكر بقي كويس قوي كدا عليكوا وتتكرر إن شاء الله

صحيح قبل ما امشي جمله شوفناها فى سان جيوفاني ( عدينا من قدامه بس ما دخلناش بلاش ذكاء احنا مش ولاد وزرا هنا ) والجملة بتقول :

" وما قصر من الاعمار طول السهر "

الجملة داخله دماغى اوي اوي يعني

تحياتى كتير
تشي أحمد

انا فى ألكس

أنا دلوقتى فى إسكندرية

بدون بس للتأريخ لتلك اللحظة التاريخية والفارقة فى حياة الشعوب

وللأسف كل الأسف انا مبسوط :D

تشي

كلمتين وبس

كلمتين وبس كان عملها مهند ( الباحث عن الحقيقة ) عنده وانا خدتها منه كأنها تاج

انا عندي اتنين ليست واحدة لزمايلي فى الكلية وواحدة لزمايلي فى البلوجنج
ناخدهم بقي بالترتيب

أحمد شقير
اجمل بلوج بحب اقراه وادخل فى عالم البلوجنج كله
*--~--**--~--**--~--*
فهمي باشا
الحته الحمرا اللى ع الشمال وحبيب قلبي
*--~--*
احمد عنتر
ابيض من جوا .. ومن برا كمان
*--~--*
بونبوني
طيبة زيادة عن اللازم ودا ما بقاش بياكل الايام دي مع الناس
*--~--*
جهاد
من الناس القليلة اللى بحترمها فى الكلية ، وبحبه فى الله
*--~--*
عمر باشا
واحد من اجمل والذ الناس فى الكلية وربنا يخلصه م الحزن للأبد
*--~--*
احمد عبد الوهاب
ساعه الجد بيبقي اخويا الكبير وساعه الهزار بيبقي اخويا الصغير
*--~--*
مرمر
بتقول ان الحياة حلوة بيقين ومش عارف دا من ايه اصلا
*--~--*
رامي
عايز يكون وهيكون علشان نفسه وبس
*--~--*
مروة
ربنا يسعدك يا رب وما تشوفيش حزن تاني ابدا
*--~--*
سمير
واحد من مفكري كليتنا القليلين واللى دايما باستمتع وانا بتكلم معاه
*--~--*
معتز
ربنا يهيده ويعقل شوية ويكتب بوست عدل بدل الغرزة اللى فتحها دي :D
*--~--**--~--**--~--*
دروب
فاضلك نقطة واحدة بس تكمل وتبقي انسانة كاملة فى نظري
*--~--*
كيكووووووووو
تاني اكتر واحد بغلبه فى الفيفا بعد محمد سعد
*--~--*
نيرة
حاجة كدا تحس انها من كوكب تاني واختي الكبيرة
*--~--*
سعوووووووودي
سعودي بالنسبة ليا بمعني الامل وعنده تفائل جامد جدا ربنا يرزقنا
*--~--*
بسمه
من ساعه ما ظهرت نتيجة امتحاناتها وهي رامية البلوج ومش بتعبره
*--~--*
يووووووووتا
عقل كبير وقلب طفل صغير
*--~--*
ابو صلاح
عاش من شافه ( مشروع التخرج واخده منا ) بس حسه فى الكتابة رائع
*--~--*
ساجي
متفائل وبيكتب كتير جدا وفى كلية طب ( مش عارف دا كله مع بعض ازاي )
*--~--*
صفا
لو فى قدامها خيارات متاحه كانت عملت حاجة مختلفة
*--~--*
اسامة يوسف
مستقبل بااااااااااهر بس ربنا يستر عليه م التعيلم المصري
*--~--*
محمد صبحي
دماغ جامدة جدا وبيضرب فى الصميم
*--~--*
سالي
مكتئبة زيي وهنعمل مجلة سوا :D
*--~--*
يمنى
بتعجبني آراءها فى الحياة
*--~--*
الاستاذ
معارض بدرجة حكيم
*--~--*
مصطفي فتحي
بيدخل عش الدبابير برجليه علشان يطفشها منه
*--~--*
محمد حمدي
اديب بس ليه اراء غريبة شويتين
*--~--*
أحمد (أحمديزم )
شخصية مختلفه وبحبه وبحب تفكيره
*--~--*
دكتور ضياء
من اكتر الشخصيات اللى بحب اقرا ليها وبحب تفكيرها
*--~--*
دكتور روفي
حاجة دماغ بروح اقري بس وما بعرفش اعلق " بيخوني قلمي هناك "
*--~--*
مهند
اهلاوي ومصري وشبهي كتير
*--~--*
سيادة العقيد المهندس الاستاذ الدكتور آبي
اجمل حاجة ان ليها رأيها فى كل حاجة
*--~--*
البراء أشرف
يستحق القراءة جدا
*--~--*
احمد الدريني
فعلا زى ما بيقول مدونته افيون فعلا
*--~--*
سوووووووو
بروح هناك اغير جو الكأبة العام واراءه فى السينما بتبهرني
*--~--*
احمد الصباغ باشا
زعيم مدوني المنطقة والمناطق المجاورة
*--~--*
زيزي
بتخليني احس ان يمكن فى حد اكتر كأبة وحزن منى
*--~--*
آيه
أخف دم شوفته فى البلوجنج ورلد
*--~--*
كاميليا
مساحة للقلب بس بردو ما بعرفش ارد هناك
*--~--*
شاهي
رومانسيه جدا وهتبقي ثورجية قريب :D
*--~--*
لميا
فى انتظار الفرج قريب وتفتح البلوج
*--~--*
علاء القمحاوي
كفاية انه من تيت راديو دا وسام شرف اصلا
*--~--*
نسرين بسيوني
بختلف معاها وبتفق بس مش هتفق معاها فى انها زملكاوية ابدا :D
*--~--*
هشام علام
ثائر للأبد كفاية الوصف دا
*--~--**--~--**--~--*

وكدا نكون خلصنا واكتفينا والتاج لكل واحد من دول عنده لسيت فيها اصدقاء البلوجنج بتوعه

تحياتي كتير
تشي أحمد

احمد الهواري فى المحور

حلقة تسعين دقيقة بتاعه اول امبارح واللى كان فيها احمد الهواري واحد من شباب تيت راديو الجامدين جدا

الحلقة لينك مباشر من هنا

اول شعور لواحد هيقرا اخر بوستين ان كلامي متناقض او اني شخص متناقض
بلاش حد يحكم كدا علشان محدش عارف حاجة

.....3

هو انا اللى ببعد ولا الناس
يا أي حد ويا كل حد
لو انا بعدت فدا احسنلك
ولو انت اللى كنت بعدت فدا احسنلي
او مش احسنلي بس مشيها احسنلي

بوست كنت كتبته قبل كدا ومسحته علشان خاطرك

سؤال يراودني

ألم يأن بعد وقت الرحيل !؟

حسنا ايها الكون لقد اكتفيت فلتذهب إلى الجحيم كل الجحيم ولتتركني وحيدا اعاني ... فالوحدة خير دواء

مش معني البوست انى بتحدي او بقولك انا بنشر البوست اهو
البوست معناه الحياة بقت سراب واوهام وما بتقش مستني منها حاجة

خد قرار

خد قرار - اغنية لسلمي الصباحى وشريف
كلمتها رائعه وانا بحب صوت سلمي


خد بس قرار واطلع للدنيا بتستناك
خد بس متناش وحدك بقلوبنا معاك

اياك فى سواقي الوهم تدور
اخرج م الضلمة لأجمل نور

مروفوووووووع الرأس ما انتاش مكسور

خد بس قرار وابدأ من تاني عيد الحسابات
خد بس قرار متقولش خلاص الوقت اهو فات

قدامك دنيا فاتحه إيديها بتنده ليك
قدامك بكره واهل وناس واصحاب حواليك

خد بس قرار بإيديك دا امبارح فاااااااااااات

قلوبنا معاك
كلنا وياااااك
ويييييييييييييييياك
ويااااااااااااااااااااااااااااااااااااك

الأغنية من هنا على ديبوست فايلز

مذاكرة ... مستحيل

الاسبوع دا اللى المفروض انه فى حساباتي انه اصبح منصرم رغم انه لسه باقي منه يومين كاملين إلا انه خلاص ذهب
قضيت الاسبوع فى المدينة الجامعية وللعلم انا بكرهها جدا بس فعلا مجرد القعدة معه زمايلي والناس اللى بحبهم خلانى انسي كل واى حاجة وحشة فيها
اسبوع كامل هو اسبوع الميد تيرمات
اسبوع المفروض انه مذاكره طحن ما ذاكرتش اصلا
لا طحن ولا غير طحن للحق يوم واحد بس ذاكرت فيه
المهم بقي ايه يا سيدي
قضيت اسبوع تهيييييييييييييييييييييييييييييس
كنا حوالى عشرة فى اوضه ما تتحملش غير اربعه ويبقوا مش طايقين بعض بس شيلنا بعض وعملنا احلي تهييس الصراحة
حركات ومقالب وحيااااااااة جامدة ولتذهب المذاكرة إلى الجحيم
من اجمل المواقف الصراحة كان مع الواد سمير الجامد اللى كنت برخم عليه جامد جدا جدا بس هو ما كانش بيسكت وكانت ايده اطول منه بس كله كان تهريج
ولعل مما يذكر 3 زجاجات مياة تم تفريغهم على سمير فى إطار التهريج المتبادل وبردو اسقاطه من فوق السرير بتاعه رأسا بضربه قوية من قدمي تسببت فى ان ايده فضلت 3 ايام مش قادر يحركها ( أحسن يا مان )
اللي كان حكاية كان اخر يوم وكان علينا امتحان انجلش لكننا نفضنا له وقضيناها فى " الجونينة " بتاعه المدينة كان يوم مسخرة وكله اتضرب فى اليوم دا وقعدنا ولعبنا لعبة الصراحة وكل واحد قال رأيه فى الموجودين بمنتهي الصراحة كان يوم قشطة اوي يعني
وحشتوني والله يا شباب وياللا تتكرر مرة كمان بس ما تبقاش فى المدينة

كلمة لكل واحد قبل ما امشي

فهمي حبيب قلبي
انت عارف ان كلامي مش هيعبر عن حاجة عموما بحبك

احمد باشا عبد الوهاب
مطرقة بشرية ودماغ كبيرة ربنا يخليك يا كبير

سمير المهاجر
فى وجودك دايما بكون مبسوط

معتز " وزة :) "
ابن بلد وراجل بجد

رامي " يامي "
الفترة الجاية مهمة اوي خلي بالك واعمل لنفسك علشان محدش هيخاف عليك قدك

احمد عنتر
اعرف انت عايز تكون ايه الاول

صلاح " ابن الناظر " (لسه مش بلوجر )
فاكهة اي حاجة وكل حاجة بس إيده تقيله

مفيش حد نسيته كدا باين
كفاية كدا وكان فى كلام كتير بس هرب مني ونسيته
كويس اصلا انى كتبت البوست دا

تحياتى كتير اوي
تشي أحمد

..... 2

بوستين ليهم علاقه بحالتي النفسية ومرتبطين ارتباط وثيق .... للغاية
أيها الرب ... علاء القمحاوي

I Did Not Die ! - Ahmedism

.....

أنا .......

ربنا يرحمه ويرحمنا

أحمد فلاح ... صديقي
النهاردة الصبح فى الكلية سمعنا خبر وفاته او حد فى العلية عندهم
قعدنا شوية على ما اتأكدنا انه هو فعلا
صدمة جت لكل واحد كان يعرفه
احمد كان الاسبوع اللى فات عايز منى الفيفا على فلاشة
واللى قبله كان بيعزمني على فرح عمه تقريبا
كل لما بفتكر بضايق
كان ممكن اى حد يبقي مكانه
انا .... أو أي حد تاني من زمايلنا
ربنا يرحمه ويرحمنا ويغفر له ويهدينا

**( التعليقات مقفولة علشان مش بحب كلمات المواساه الفارغة ويا ريت اللى يدعليه يكون بظهر الغيب مش فى كومنت )

اقرأ .. تكون ؟؟

اقرأ ... تكون ؟؟ يعني أيه وليه ؟؟
اقرأ اول تكليف نزل على سيدنا محمد عليه افضل الصلاوات وهو واحد من الحاجات اللى اصبحنا بنفتقدها فى وطنا العربي ومصرنا الجميلة بالأخص بقيت تشوف كل شاب وشابه ماسكين الموبايل بيلعبوا فيه او فى ودانهم الام بي ثري وبيسمعوا اغاني او بيهزروا مع بعض أو ..... كلها حاجات مهما كانت هى ايه لكنها فى الاخر تضيع وقت ع الفاضي
لكن لو جينا بصينا مين ماسك كتاب ( مش بتاع المدرسة والكلية ) كتاب فى اى مجال بيحبه وبيقرا فيه ، لا يمكن دي رابع المستحيلات عند العرب ، ولو جينا بصينا كدا ولقينا واحد ماسك كتاب وبيقرا فيه الباقي مش هيسيبه ::::
" أيه يا عم المثقف "
" ايه الثقافة دي كلها "
" فين النضارة بتاعتك "
إلى اخر التعليقات المستفزة اللى تخلي الشخص يحرقهم ويحرق الكتاب ويحرق نفسه بالمرة معاهم

نرجع لموضوعنا بقي " القراءة " انا عن نفسي شايف ان القراية واحدة من اهم الحاجات اللى لازم نهتم بيها لازم زى ما بنقلد الغرب فى كل حاجة فى الهدوم والمزيكا والكلام نقلدهم بردو فى الحاجات الكويسة يعني فى الغرب اغلب اوقات الفراغ فى الكليات والمواصلات العامة الناس بتستغلها علشان تقري والقراية بوجه عام فى اي مجال حسب الشخص اللى هيقرا هتفيد الشخص وهتوسع عقله وتفكيره وهتخليه يعرف حاجات اكتر ومعلوماته هتزيد

فى مصر هنا كمية السطحية بين الشباب تخلي الواحد محتاج يركز شوية " هو انا هفضل زى الناس كلها كدا هما ضايعين يبق انا زيهم وهو انا احسن منهم فى ايه " لا اكيد ممكن نكون احسن من اللى حوالينا ربنا سبحانه وتعالي قال " وإن تتبع أكثر من فى الأرض يضلوك " يعني مش علشان كل الناس مش بتقري يبقي انا موجعش دماغي والرسول عليه الصلاة والسلام قال " لا تكن إمعه إذا أحسن الناس احسنت وإذا اساءوا اسئت " من الحديث والأية الكريمة بيوضح اوي اننا ماينفعش نمشي ورا الناس فى كل حاجة وفى اى حاجة ولازم يكون لينا موقف خاص وفكر خاص ودا مش هيجي غير بأننا نقرا ونفهم وننقد وناقش

ولأن دلوقتى معيار الانسان بيعرف قد ايه مش معاه كام ( دا عند الناس المحترمة اللى مش كل همها الفلوس )

وعلشان دا كله وحاجات تانية كتييييييييير انا يمكن معرفهاش
لازم نقرا ..
علشان كدا عملت الحملة والجروب
أقرأ ... تكون
أقرأ علشان تكون إنسان يحترم وليه فكره وثقافته الخاصة مش ماشي ورا الناس وخلاص وهو مش عارف حاجة

ياللا كلنا نقري نتعاون ونجيب الكتب مع بعض واللى عنده يدي اللى معندوش علشان كلنا نقري ونفهم ونعرف
ياللا كلنا نكون ........

لينك جروب الحملة ع الفيس بووك
http://www.facebook.com/group.php?gid=7939609948

تحياتى
تشي أحمد

صور قاتمه

الأسبوعين دول انا مطبق فى الزقازيق يعني ما روحتش البيت
بس نزلت وسط البلد علشان احضر حفل توقيع كتاب تهامي اللى فى عمر بوك استور
وانا رايح م الزقازيق للقاهرة وانا راجع شوفت كام منظر اضايقت اوي الصراحة وكمان افتكرت كام موقف عدوا عليا ما يتنسوش ومواقف تجرح اوي وتضايق كتير
هبدأ بالمواقف اللى عدت عليا النهاردة
اول موقف قبل ما اتحرك م الزقازيق
نازل م التاكسي عند الموقف لقيت ولاد كتير م اللى بيعيشوا فى الشارع بصراحه كنت مضايق قوي ( عليهم مش منهم ) بس مقدرتش اعمل حاجة
شوية روحت اشوف الحجز لقيت لسه فاضل يجي ساعة وربع قلت اجيب حاجة اكلها جيبت باكو بوريو لأني اصلا بعشقه
المهم شويه ولقيت بنت من اللى قابلتهم لما نزلت بصت في باكو البوريو اديتهولها وانا مضايق اوي على الولاد دول كلهم اللى في الشارع وكل يوم والتاني الحكومة دايرة تقول مفيش مشاكل
امال يا ربي دول ايه بس دول مش مشاكل
دول تقدم ورقي
*****
دي واحدة ، التانية وانا فى المترو
نزلت كلية الزراعة قبل عبود وركبت مترو للسادات وانا راكب لقيت واحد قاعد وبنته الصغيره علي حجره
الراجل يبص لبنته ويبوسها وبعدين يقعد يكلم نفسه ويقلب ايديه وكان خلاص شكله هيعيط وكل شوية يبص للبنت ويبوسها ويضمها ليه اكتر
بجد المنظر كان صعب اوي اوي ومكنش عايز توضيح ان الراجل طحنته رحاية الدنيا وخايف على بنته من مستقبل اقل ما يقال عنه انه اسود سواد ليله من غير نجوم ولا قمر
ما بقيتش عارف اعمل ايه ساعتها الراجل صعبان عليا اوي بس اى تدخل منى معناه جرح لكرامته ومقدرتش اخليني ابطل اتابعه وما ابصش عليه وعلى بنته اللى زى القمر واللى شكلها بيقول ما كملتش تلات سنين على بعض
معرفش الراجل كان بيفكر في ايه بالظبط بس اكيد كان خايف
خايف م الاسعار وخايف البنت تنام من غير عشا وخايف وخايف وخايف
وكل يوم والتاني الحكومة طالعه تقول الحياة حلوة وميت فل وعشرة
*****
التالتة دي من قبل كدا والاخيرة علشان ما اتعبكوش معايا
المرة دي كانت وانا مع بابا ساعة مولد النبي اللى فات دا
واحدة جاية تشتري حلاوة المولد لولادها ومعاها ابنها الصغير الست عايزة تشتري لولادها حلاوة بصت على حلاوة كويسة ونضيفة بس للأسف طلعت غالية اشترت م الرخصية ... الرخيصة اللى هى انشف مال حجر وما تتاكلش وما حدش يرضي يبصلها اصلا بس هتعمل ايه يعني ما هى لازم تأكل عيلها علشان ما يبصوش لبرا وما يطلبوش حاجة من ايد حد وفى نفس الوقت معهاش اللى يخليها تشتري الحلو
نظره عينيها بجد جرحتى اوى ومكنتش عارف اتصرف فى وقتها
فكرت فى الموقف بعدين لقيت انى كان ممكن اتصرف واديها اللى هى عايزاه الحلو ومن غير ما اجرحها او احسسها بانها محتاجه بس ساعتها مقدرتش اخدت هى الوحشة ومشيت وانا مضايق اوي
لحد دلوقت زعلان من نفسي انى معملتش الصح وما اديتهاش الحاجة الكويسة وبتمني الوقت يرجع من تاني علشان اعمل دا لكن تفكيري ما اسعفنيش ساعتها
ربنا يسامحنى لو كنت غلطان
بس بعيد عني انا
فين الدولة والحكومة من كل دا
ليه فى ناس بتاكل اكل محدش يرضي يأكله للحيوانات اللى عنده
ليه فى ناس اصلا مش لاقيه تاكل
ليه فى ناااااااااااااااااااااااااااس كتييييييييييييييييييييييييييير اوي بتنام من غير عشا وبتصحي من غير فطار
انا مضايق اوي وكاره الدنيا اوي وتعبان اوي
حتى حسبي الله ونعم الوكيل بدأت افقد الامل انها تنفع معاهم ( انا مش بكفر لا سمح الله بس ما بقتش عارف اعمل ايه )
انا زهقان

وصلـــــــــــــــــــــــــــــــــــــــــــــــــــــــت

بدأ أول نشاط من كتيبه كليات الحاسبات والمعلومات
فى البلوج بتاعنا
http://fcis-daily.blogspot.com/
مستنيكوا هناك وانتظروا كل جديد منا قريب جدا