أنا

مصطفى

المبدأ الأول للخليقة

المبدأ الأول للخليقة
معجزة " أتوم " الكبري

الحب

ذلك الصمغ الإلهي الذي يجذب كل منكما للأخر بعد أن يكون قد جذب أجزائكم المفتتة إلي بعضها البعض فينصهر ويتوحد كل منكم مع ذاته

يعود كيانا واحدا وإنسانا بكل تعقيدات ماضيه والحاضر والأجزاء التي ما تزال خفية لم تخرج بعد إلي نور الإله

تمتزج تلك الأجزاء ببطء كأنها كتلة شمع بيضاء ناعمة كلما صهرتها حرارة فتيلها أقتربت جزيئاتها من بعضها البعض

نون - سحر الموجي

ساجي

ازيكم

يوم كمان جميل قضيناه امبارح سويا انا وفهمي ومستر ساجي او موصطفي العوليمي علشان هو مش بيحب حد يقوله ساجي دي

المهم بقي انا وفهمي في الاول روحنا وسط البلد ولفينا شوية كتير حلوين كدا روحنا عزمتني انا علي حسابه من جاد بعدين روحنا ماكدونالدز اخدنا اتنين ميلك شيك بالشيكولاته بعدين اتمشينا لحد قصر النيل ونزلنا ع الاوبرا وبعدين ركبنا للعتبه ومنها ركبنا للغورية

وهناك او ما وصلنا لقينا ساجي ورانا علي طول وكان لقاء طويل طويل طويل وممتع ممتع ممتع

دخلنا عرض التنورة ودي المرة السادسة ليا والثالثة لفهمي والاولي لساجي بس النهاردة مكانش العرض الممتع اوي كان كتير ايام احسن من كدا بمراحل بس كان كويس مكانش سيء يعني

خرجنا من عرض التنورة روحنا وسط البلد بس مشي بقي وكان وقت جامد الصراحة وبما ان الواد ساجي منوفي منوفي يعني خليناه يعزمنا علي ميلك شيك ف ماك تاني اصلنا ما ورناش غيره وقضيناها ف وسط البلد شوية وبعدين روحنا علي فلفلة وروحنا جبنا لب علشان مصطفي كان بيكمل دور المنيفة اللى هو فيه وكان لازم يعزمنا علي لب وعصير وكان انه جاب اللب من جنب سينما ميامي وبعدها روحنا علي كورنيش 26 يوليو وقعدنا هناك شوية كنا بنتناقش انا ومصطفي ساجي في شوية حاجات كدا يعني وبعد كدا كل واحد روح علي بيتهم بس فعلا كنت مبسوط باليوم ومبسوط انى قابلت الواد مصطفي لاني من زمان كنت عايز اشوفه ومقدرش انسي الملف الاخضر بتاع مصطفي اللى قضا معانا اليوم كله وتقريبا كان الملف دا جايبة من عند المأذون أو حاجة كدا يعني

بس خلاص

تعالوا نفرح

النهاردة زي ما اتفقنا في الجروب اللى عمله فاروق انه هيكون يوم الفرحة
انا فعلا تعبان ومش قادر بس قولت لأ
لازم اعمل البوست
احنا يعني بنفرح كل يوم
يعني ايه افرح بقي !؟
يعني افضل معاكي وقت طويل اسمعك وبس .
يعني اخرج مع فهمي ونروح اي حته .
يعني ابقي دايما مع اصدقائي كلهم بدون استثناء .
يعني اخد الحضن اللي ليا عندك .
يعني ابقي مع زمايلي في رحلة تبع الكلية وكل الناس شايف في عيونها بتقول مبسوطة .
يعني تشوف مجهودك اللى عملته نتايجه في عيون الناس .
يعني تلاقي ناس بتحبك وانت ما تعرفهومش .
يعني تفضل دايما محتفظ بالامل حتى وإن خفت أحيانا .
يعني تلاقي قلوب حواليك بتضمك وتخاف عليك .
يعني تشوف ابتسامه حواليك .
يعني تروح حفل تنورة في وكالة الغوري وتفضل قاعد طول العرض ع الأرض وعادي جدا وهتموت م النشوة
الفرحة ... موجودة بس أحنا بننساها بمزاجنا
دا بقي بمناسبة الفرحة والنشوة والتنورة فيديو لرقصات وموسيقي وتواشيح التنورة مقصوص من الوان السما السابعة


-----------------------------------------
الصورة من تصميمي والفيديو انا اللى عامله ايديت بإشراف من الدايركتور احمد فهمي

قرف

زهقت
هقولكوا سر
انا بسمي نفسي بيني وبين نفسي " أمل "
يمكن علشان بحب أمل دنقل أوي بس الأهم علشان أنا دايما عندي أمل
ساعات بلاقيه بيروح بس بيجي تاني بعدها
بس انا خلاص اتخنقت
النهاردة بس كنت مع احمد مختار بنظبط لحدث كبير او احداث مختلفه يعني علشان نجمع حاسبات مصر كلها ونقدر ننهض بصناعه تكنولوجيا المعلومات في البلد
وقاعدين نجهز ونتناقش ونبعت لناس ونكلم في ناس ونروح لدا ونشوف دا و و و و
ومجهز مع نفسي انى هنزل الزقازيق كتير علشان خاطر الاحداث دي وهنعمل انشطة و و و و
انا مش بقول دا بشكر ف نفسي
انا بقول اننا مش لوحدي بنعمل علشان نعمل حاجة للبلد دي
من غير شعارات ولا يحزنون بنعمل علشان عايزينها احسن بلد ف الدنيا وبس
بس مش يكون المقابل انهم يسرقونا عيني عينك وفي اهم حاجة في شغلنا في الانترنت
وببجاحة كمان
انا مش عارف ايه اللى بيحصل دا
النت في امريكا 15 ميجا ب45 دولار يعني 225 جنية مصري يعني ارخص من الاتنين ميجا هنا لا وكمان بيعملوه محدد
انا والله زهقت وما بقتش طايق دي بلد ولا دي حكومة
وانا اللى طول عمري مش عايز اهاجر وبقول مش هنهاجر ( إلا مرة واحدة بس ) دلوقتي عايز اتنيل اهاجر ومش عايز اقعد ف البلد دي اصلا ومحدش يقولي البلد دي محتاجه حد البلد محتاجه واحد ياخدها قلمين علشان تفوق وانا ما اتعودتش اضرب حد

خاطر

ازيكم
البوست دا مجرد حاطر في بالي
يا ريت ما يضايقش حد لانه ما يضايقش المفروض ، بس دي حاجات جوايا عايزة تتقال ...
هبقي مبسوط لو مت قريب ... مبسوط باللى حققته حتى الان في الحياة ، صحيح في حاجات لسه ما كملتش ف دوري اللي انا برسمه كل يوم علي مسرح الحياة لكن لحد اللحظة دي الدور مكتمل
عارف ان علاقتي بربنا مش تمام ويمكن دي الخلل اللى ف حياتي والحاجة اللى مخلياني مقلق من الموت ، نفسي اكمل الحته دي وبعد كدا اموت ، علي فكرة مش خوف لاني مش بعرف اخاف من ربنا ولا بشوفه كدا ، انا بشوفه حضن كبير مستنينا نترمي فيه فأي لحظة ، محتاج اقرب منه علشان بس بحبه ونفسي ابقي معاه ، سهله مش صعبه
بجد لو النقطة دي اكتملت جوايا هبقي مبسوط اوي لو مت ومش هيبقي عندي اي مشاكل
ما بقتش حابب الحياة ولا عايز اكمل فيها
مش بسبب اشخاص والله بس بسبب الحياة نفسها
قبل ما امشي ، شكرا لكل واحد دخل حياتي ... اللى دخل ضاف واللى دخل جرح واللى دخل حضن واللى دخل اتحضن لكل حد قابلته في حياتي شكرا علشان انت بطريقة او بأخري خليت حياتي في مرحلة ما منها احسن
شكرا ليكوا كلكوا

* تحليق

صباح النور عليكم علشان انا بكتب بعد الفجر
ازيكم ويا رب تمام
اول امبارح كان يوم رائع جدا ومميز وربنا كلل تعب ايام كتير قبله بالنجاح في اليوم دا
اليوم كان رحلتنا حملة اف سي اي بايونييرز واي تربل اي حاسبات ومعلومات الزقازيق ليوم الهندسة المصري
ولأننا كمنظمين عارفيين الناس عايزة تخرج وتتفسح مش بس تروح حاجة علمية قررنا نعملها رحلة مزدوجة نروح يوم الهندسة المصري بعدين نخرج مع بعض وكان الاقبال علي الرحلة اكتر من ممتاز
خرجنا من الزقازيق الساعة تمانية ونص صباحا ووصلنا قاعة المؤتمرات الساعة عشرة وربع كدا
وخلال الطريق هيصنا وغنينا وعملنا مسابقات وهزرنا وضحكنا وعملنا كل حاجة نفسنا فيها وخلال يوم الهندسة المصري حضرنا اتنين سيشنز وكانوا جامدين جدا جدا يعني وانا عن نفسي استفدت كتير اوي منهم واعتقد كل اللى حضروا وفيهم كنت مبسوط لاني قمت قصاد الناس كلها وقولت انى فخور بكل اللى عملنا زمايلي وانا في حاسبات الزقازيق والنقلة النسبية اللى بدأناها ومكملين فيها بإذن الرحمن وكمان قابلت اكرام اللى الناس كلها كانت مفتقداه فعلا اليوم دا وكمان قابلت شادي وكان ولد رائع من هندسة القاهره وفريق اي تربل اي هناك وبعد كدا اتحركنا متجهيين إلي الازهر بارك
الأزهر بارك بالنسبة ليا واحدة من اروع اماكن القاهرة علي عكس كام بنت كانوا بيشتموا ويلعنوا فيا علشان اخترتها وعايزين يروحوا سيتي ستارز معرفش ينيلوا ايه بس معلش بقي فلاحين ، المهم قضينا هناك وقت رائع للغاية صحيح كان في مشاكل كتييييييييييير بس الحمد لله اتحل جزء منها والباقي في وقت اخر بقي واتمشيت فيها كتير ولفيت كتير واتبسطت اكتر بكتير ورخمت علي مرسي كتير بردو وطلعت عينيه
بعد كدا روحنا الحسين ورغم اني كنت عايز الناس تتمشي م الازهر للحسين لكن لدواعي امنيه علي رأي اخونا البعدا ركبناهم الاتوبيس ونزلنا للحسين والناس اخدت راحتها ع الاخر بس المشكلة ان الوقت كان ضيق وانا نفسي ما حستش بالوقت فجأة بيقولوا احنا وقتنا خلص عايزين نتجمع
ساعتها كان اكرام بيسألني : انت مش قولتلي هتوديني تنورة ، قولتله بس كدا احنا فيها ، وبما اني المشرف ع الرحلة انا واحمد مختار ( وحط تحت كلمة المشرف الف خط لو سمحت والنبي ) فأعتمدت علي مختار وانا كلي ثقة فيه وفضلت واقف لحد ما الناس كلها جت واتطمنت علي كل الناس ( كلهم كلهم يعني ) واتحركوا ومشيت انا ومعايا اكرام وفهمي واسامة وعبد الرحمن نسابق الزمن علشان نلحق حفل التنورة اللى في الغوري ولحقنا من بداية الفقرة التانية كدا
وحفل التنورة دا مش اول مرة اروحه دي التالتة ولو روحت خمسين مرة مش هزهق ابدا إطلاقا بتاتا روحت وبدأ الاستمتاع والتنورة بالنسبة ليا مش مجرد الحركات ولا الموسيقي ولا الصوت انا بروح هناك علشان اغسل روحي من كل الغثاء المنتشر في انحاء الكوكب ، بروح هناك بجد بخرج صااااااااااااااااافي وحاسس انى طاير والكلام بيفضل معلق معايا وبحس اني لو قعدت الف كدا زيهم هطير ف الفضا وابعد بعيد وكمان كنت مبسوط اكتر انها عجبت فهمي واكرام واسامة وعبده لانهم كانوا اول مرة وبناءا علي اقتراحي وكنت خايف ما تعجبش حد فيهم لكن كلنا طلعنا مبسوطين تماما وبعدين روحنا الازهر قعدنا في الساحة شوية وبعدين اكرام عزمنا كلناااااااااااا ع العشا واحتفلنا معاه بالنجاح والتخرج وعقبال يا رب ما نحتفل معاه بالاعفاء وافتتاح الشركة
بجد كان يوم اكتر من رائع بغض النظر عن اشخاص لا تستحق الحياة ومواقف مش تمام حصلت بس المجمل ان اليوم كان حلو جدا ويا رب الناس كلها تكون انبسطت وعقبال المرة الجاية قولوا معايا امين
-------------------------------------------------
اسم البوست تحليق علشان انا بحلق ف السموات العلا وانا مبسوط واكتر بقي والسبب الرئيسي حفل التنورة بتطير فيه لفوق لفوق لفوق

Memo

في الكلية مع لاب اكرام ، واحد من اهم الايام في حياتي واكثرها جهدا

مهندسة نسرين الصابر ... أفخر انني عملت معاها كثيراً

من يملك كهذا الفتي ضحكة بهذا الصفاء إلا الأطفال

اسكندرية ... بحرك عجايب

الأزهر بارك ... المرة الوحيدة اللى خرجت فيها مع أسرتي

اسكندرية ... نحن والقمر جيران

أحزنني أكثر من عدم استطاعتي ان اكمل فيكي انهم تخلوا عني

في الكلية ... ليت صفاء البال يعود يوما

اسكندرية ... منذ تلك المرة مازال قلبي يفتقد الابتسامه

فهمي ... وهل يخفي القمر

الصداقة ... تبقي

أذهب بعيداً ... عادتي لا تشتري

بيد جراح رسمتها وبجهد لم يشعر به غيري ... IEEE

بكل الحب ومن كل قلبي وبأحب قمصاني إليّ كتبتها ... FCI Pioneers

أنا وفهمي ... هي أشياء لا تشتري

مجلة ابدأ العدد الأول ... ابني الأول يخرج للنور

محمد إكرام ... قليلون هم من تسع اذرعهم الدنيا بما رحبت

تبرعات

النهاردة كنت في الخليفة المأمون مع زمايلي بنجيب لاب توب لواحد زميلنا بغض النظر عن انهم نزلوا يلفوا ف الحر والزحمة وموقف غريب مش ناوي احكية قابلنا بس كان مقزز يعني
بس اللى جاي اتكلم عليه النهاردة موش كدا
واحنا رايحين الزقازيق بعد ما خلصنا وجبنا اللاب عفشة قالنا تعالوا نصلي العصر ، ومع انى كنت عايز امشي علي طول بس كان العصر بيأذن قولت اخلي عندي دم ودخلنا صلينا ف جامع في البدروم كدا صغير مساحته ما تكملش تلاتين متر ف عشرين متر او اقل كتير كمان انا كدا ببالغ شوية بس هو ف الحدود دي
المهم اول ما داخلين لقيت كولدير قولت كويس الجو نار ودخلنا اتوضينا ودخلت الجامع نفسه ، اول الجامع تكيفين ع البوابة استفتاح يعني ، وبجد الجو ايه تحس انك دخلت الجنه ولا حاجة ، المهم تبص اماك تلاقي كولدير عن يمينك كولدير عن شمالك كولدير في قفاك كولدير
دا بجد والله مش هزار انا في نص مساحه الجامع بس ودي اللى شوفتها علشان ما دخلتش الباقي من جوا لقيت تلاته كولديرات كلهم ف مساحه لا تتعدي 6*4 متر بدون ادني مبالغة والله
وفي نفس المساحة عن يمينك تلاقي تكييف شمالك تكييف قدامك تكييفين وفوقك تكييف ودي كمان بجد والله
خمس تكيفات في نفس المساحة بالظبط ، ولما خرجت برا لقيت ان في تكيفين تانيين من ناحية واحدة ف مساحه والله اقل من تلاته متر جنب بعض من ناحية واحدة من الجزء التاني من الجامع دا ، يعني كدا سبعه تكيفات غير اللى ما شوفتوش ،في مساحه اقل من 20*30 متر سبع تكيفات وتلت كولديرات ودول اللى انا شوفتهم بس غير اللى ما شوفتوش ... او يعني وما خفي كان اعظم
والمشكلة كمان ان الجامع حاطيين صندوق مكتوب التبرعات لتجديد وترميم المسجد حقيقة تحضرني هنا جملة خالده للرائع سعيد صالح في العيال كبروا مخاطبا والده حين يخبره ان بنته سوسو هتشتغل رقاصه ، تيييييييييييييييييييت يا ابو سوسو ، بنتك هترقص وانت هتفتح يا ابو سوسو

بجد ايه الزفت دا
الجامع دا مساحته صغيره وبحسبه صغيرة واني عديت اللى كانوا بيصلوا بعد الصلا ما كملوش الميت واحد
يعني لو قولنا ان الجامع بيخدم 100 واحد في كل صلاة خلال اليوم وفيه كمية التكيفات والكولديرات دي ، كليتنا المصون مفيهاش ولا كولدير واحد حتى وميتها لا تصلح للاستخدام الحيواني علي فكرة ودا مش هزار ، ولما ركبوا فيها كولدير بقي بينزل مية محروقه ، ودا مش هزار والله بجد كأنك بتاكل اكل محروق وانت بتشرب المية اللى درسنا زمان انها لا طعم ولا لون لها ولا رائحه
دي مش مبالغة إطلاقا
كليتنا المصون مدرج واحد من مدرجاتها الاربعة فقط بيحتوي علي تكيفات والباقي مجهز بمراوح نصها مش شغال واللي شغال بيكركر كانه بيشد شيشه لزيادة تركيزنا في العملية البتنجانيه علي رأي عبرحمان
ليه اللى بيحصل دا يعني
ليه اهدار الفلوس دا يعني
بلاش الكلية
ميتين ام الناس المحروقين مش لاقين لا جواز ولا شقق ولا شغل ولا اي حاجة مش اولي بالفلوس دي
دا تكييف واحد ولا اتنين هيكفوا المساحة دي والكولديرات دي واحد بس يكفي ، انا النهاردة محروق اوي ، مسجد رسول الله كان بجريد وسعف النخل لا كان بالرخام ولا كان بالزبرجد
ما هو يعني حرام اللى بيحصل دا ليه الفلوس اللى بتتصرف ع الفاضي دي ، في حاجات كتير اولي ممكن تتصرف فيها وتفيد ناس اكتر
انا عندي رؤية كدا للفلوس دي عموما
بس خليها لبوست جاي بقي

أنا أبكي

أنا أمضي قبل ميعادي ... مبكر
عمرنا أضيق منا ،
عمرنا أصغر... أصغر
هل صحيح ، يثمر الموت حياة
هل سأثمر
في يد الجائع خبزا ، في فم الأطفال سكّر ؟
أنا أبكي !

---------------------------------------
شعر : محمود درويش

أكرهكم جميعا

وإذا لم يكن من الموت بد ... فمن الجيد أن أموت الآنَ

21

بدون هزار او ادني حس سخرية
بجد حقيقي عاوز اجابة
كل حد يعرفني يعني
هتعمل ايه لو عرفت اني هموت بعد سنه وشهرين
بالظبط يوم 8/9/2010
عايز اجابة من غير تريقة واللى هيتريق همسح كومنته اصلها مش طالبه خفه دم

عينه عشوائية

دا بول ع الفيس بوك ودي نتايجه لغاية ما انا عملت الفوت بتاعي عليه
لو اخدنا الناس اللى عملت فوت هنا كعينه عشوائية للشعب المصري هنلاحظ حجم الهوه واللى لازم وابداً تخلينا في ذيل قائمة دول العالم ونحسب ضمن سقط المتاع اللي ما بيفرقش مع حد
خلينا نشوف البول وهعلق عليه

	the icon amr diab 535
	adel emam 472
	Abo Treka 756
	Amr Khaled 575
	ahmed zweel 300

في المقدمة خالص يتصدر لاعب الأهلي والمنتخب محمد أبو تريكة بعدد756 صوت بنسبة 28.66% ولو ركزنا شوية هنلاقي ان الناس بتتعامل مع تريكة علي انه بطل ، او سوبر هيرو بيسعدها دايما وبيحققلها نجاحات مبهره وعلشان كدا رفعناه فوق اوي لدرجة انه في المركز الأول من خمس أشخاص هما تقريبا كل منهم الأشهر في مجاله

رقم اتنين في القائمة هو عمرو خالد بـ 575 صوت وبنسبه 21.8% من مجموع الأصوات ، وعمرو هنا بيمثل المثل الأعلي للبعض بعد دعوته الوسطية المعتدله اللى جذبت كتير من الشباب لطريقه

التالت هو عمرو دياب بنسبه أقل قليلا 535 صوت أو 20.28% وعمرو هو قمة الهرم الموسيقي في الوطن العربي حسب الخريطة العامه حتى لو شاف البعض عكس كدا لكنه حتى الان رقم واحد في الوطن العربي

رابعا عادل إمام ب472 صوت بنسبه 17.89% وعادل إمام هو ملك الكوميدينات في التلاتين سنة اللى فاتوا ودا خلاه يتربع علي قمه الممثلين اللى بيمثلهم هنا ف البول دا

أخيرا بقي بيقبع في القاع أحمد زويل !!!!!!!!! بعدد أصوات يكسف 300 صوت أو 11.37 من مجموع الأصوات وأحمد زويل هو أشهر عالم مصري واللي حاصل علي جايزة نوبل ومرشح ليها مرة كمان

------------------------------------
دي الإحصاءيات المباشرة
لو بصينا كدا بشوية عمق فى المركز الأول المصريين بينظروا لأبو تريكة علي أنه المثل الأعلي أو القيمة أو البطل زي ما قولت فوق ، ودا لسبب رئيسي في رأيي وهو انعدام البطل وثقافه صناعه الأبطال الفعليين فبقينا بندور علي ابطال هشه ذوات انجازات هشه أيضا لأنهم اللى عندنا واللى ملوش بطل يعمله بطل .
بعد كدا عمرو خالد ، وعمرو هو الداعيه الديني الوسطي اللى انتشر بسرعه البرق بين الشباب بطريقته السلسه الجذابه اللى وصلت لعدد كبير من الشباب ووصل لأنه بقي بالنسبة ليهم البطل او المثل الأعلي وربما المخلص كمان ، وبغض النظر عن رأيي في عمرو كمصلح اجتماعي اكتر منه داعيه دينيه إلا انه وصل لعدد كبير وضعه ف المكانه التانيه .
وراه بقي عمرو دياب ، واللى واحد زميلي علق عليه دا مش مطرب اصلا وملوش دعوة بالطرب ، لكن كاريزما عمرو وذكاءه وانتشاره خلوه مثل اعلي وقدوة تتبع بين شباب المحروسة لدرجة إنه حصل علي المركز التالت
رابعا بيحل عادل إمام ، واللى بينتمي لعالم الفنانين واللى حصل علي نسبه تقارب العشرين في المية ودا رغم ما ينشر دايما علي الوسط الفني عموما ، وما يتناوله عادل إمام من " هيافه " في أفلامه إلا إن كل دا لم يمنع من انه ما زال الأختيار الأول عند البعض وضعته في المركز الرابع .
المصيبة بقي إن أحمد زويل موجود في المركز الأخير وبنسبه لم تكمل الـ 12 في المية حتى ورغم إنه لو غابت القدوة أو البطل المفروض ندور علي الشخص الصح لكن يبدو إن دا ما حصلش بدليل إن الأكثر استحقاقاً في رأيي علي الأقل يقبع بكل خجل في المركز الأخير . !!!

نظره كمان صغيره هنلاقي بيها إن المجالات اللى بيهتم بيها المصريين طبقا للبول كالتالي
في البداية الرياضة متفوقه علي الدين في المركز الأول ، ودا حقيقة ويمكن يلاحظ دا اى شخص يبص لأي جامع أو حتى كنيسة ساعه أي ماتش للمنتخب وهيحس فعلا بحجم الرياضة داخل الشعب المصري المتفوقة علي أي حاجة وكمان نفس الفكرة في عدد القنوات الرياضية المتكاثرة دوما واللى كلها سبحان الله بتكسب ومفيش حاجة منها بتقفل واكيد دا راجع للإقبال اللى عليها ( البديل بس هي اللى بتقفل علشان مش كلها رياضة !! )
في المركز التاني الدين ( أو التدين أيهما شئت ) ودا بيتماشي مع البحث اياه اللى أثبت إن المصريين اكتر شعوب العالم تدينا ( اللهم تقبل )
بعد كدا الموسيقي والغنا وهيظهر دا في كمية المغنيين وشركات الغنا اللى كل كام يوم بتطلع وكمية الأصوات الغريبة اللى بنسمعها كل يوم أو كمية الفلوس اللى بتتصرف علي الألبومات سنوياً
بعد كدا الفن في المركز قبل الأخير واهتمام المصريين الواسع بيه هيبان في كمية القنوات اللى موجودة سواء للأفلام او للمسلسلات علي النايل سات واللى زادت بدرجة مرعبه وكمية الفلوس المصروفة علي الحاجات دي وكمان كمية الأخبار المخصصة ليهم .
وفي المركز الأخير يقبع العلم !!! العلم هو أخر اهتمام للمصريين !! وليه يهتموا بيه اصلا ، ما أكيد دا لازم يبقي حالنا ما دام العلم هو اخر اهتماماتنا ، لازم نبقي الكلاب اللى بتعوي بجوار القافله السائرة إلي المالانهاية ، القافله الغير مستعده ابدا للتوقف لانتظارنا لما ننهض من غفلتنا وغباءنا وتخلفنا
العلم في المركز الأخير !!!
صدق المتنبي لما قال : يا أمة ضحكت من جهلها الأمم

إسكندرية

تدخل نسمة صبية
أقول دي إسكندرية
أقول دي إسكندرية يا عيني وقمرها ناداني
يا قمــــــــــــــــر
يا اسكندراني
نص عمري ضاع في لفّي ع المواني

-----------------------------
Photo Copyright
الكلمات : أغنية لمنير

Knowing

فيلم لينكولاس كيدج
انا من اكتر مشجعي نيكولاس كيدج وتقريبا بحب كل افلامه
النهاردة وانا بنزل فيلم نوينج او المعرفة كنت متوقع فيلم جامد بردو
بس حقيقة الفيلم كان اكتر من رائع ، وخلاني فاتح بقي طول الفيلم

بيبدأ الفيلم من خمسين سنة بالظبط واحتفاليه مدرسة بافتتاحها الرسمي والطلاب كلهم قدموا افكار للاحتفال باليوم دا ، الفكرة اللى فازت لطالبة والطالبة دي كانت فكرتها ان كل الطلبة يتخيلوا المستقبل ازاي ويرسموه ويتحط في علبه وما تتفتحش غير بعد خمسين سنة ولكن الطالبة دي ما بتعملش كدا وبتكتب ارقام كتير ف ورقة
مقدمة الفيلم تحبس الأنفاس وتخليك مأخوذ بالفيلم ومهيأ نفسيا لما هو آتي .
وبعد خمسين سنة اللى هو الوقت الحالي بيتم فتح كبسوله الزمن .
الورقة بتوصل لنيكولاس عن طريق ابنه ، وبمجموعه من الحسابات بيلاقي انها مش عشوائيه ولا مجرد ارقام .
حوادث مختلفه بتؤكد ان الورقة دي اللى فيها فعلا حقيقة ، بتتنبأ بحوادث بالوقت والمكان كمان ، وتبدأ محاولات الإنقاذ إلا إن اخر تاريخ بيكون ناقص احداثيات المكان ، حقيقة انا توقعت ان النقص دا معناه انه تاريخ نهاية العالم ، لكن بيستطيع نيكولاس يحصل علي بقية الأرقام ولكن بردو بيكون تاريخ نهاية العالم .
البقية بقي تشوفوها ف الفيلم

--------------------------------------

بس اللى عايز اقوله انى مش مستبعد اللى حصل في الفيلم مش القصة نفسها لأ النهاية ، اللى هي نهاية العالم ولكن السماء تنتقي بعض البشر لأسباب غير معلومه لنا ليعيدوا الكره من جديد ، يعني لو بصينا للتاريخ المعروف لينا والمختلف عليه حتى الآن ، قارة اطلانطا العظمي واعظم حدث خلال تاريخ الكون عرفناه ( وإن كنا لسه مختلفين حياله ) وإذ فجأة بتختفي بكل عظمتها وتقدمها وعلومها و .... ، هل فجأة اختفي العالم كله بأطلانطا وقليلين فقط انتقتهم السماء لتأخذهم بعيدا حتى تنتهي عمليه الإحلال لتتم عمليه التجديد عن طريقهم ؟؟ ، سؤال بدون إجابة . لكن لو بصينا لكل ثقاقات العالم القديمة فكلها اندثرت أو حتي لو لم تندثر فقد ضاعت علومها ، واكبر دليل حضارة الفراعنه العظماء ، اصحاب اكبر قاعده من العلوم والمعرفه والتقدم معترف بيه بين الجميع علي وجه البسيطة ، ولكن إذ فجأة كل شيء بينتهي وبيروح وما بيفضلش غير شواهد جامده لا تحمل أي معاني ، هل حصل نفس الشيء وكان للسماء رأي أخر ؟؟ ، من وجه نظر الفيلم لو طبقناها علي الفراعنه يعني هنقول ان الفراعنه اتعرضوا لكارثة ما افنتهم دون رحمه ولكن بقي بعض اثارهم لم تستطع الكارثه محوها وبعضها الأخر انمحي والاخر اندثر وتباعا بنجد اثار ليه في الوقت الحالي !! حقيقة علي الإطلاق مش مستبعد إن الحياة تكون كدا ، في وقت من الأوقات ترتأي السماء إن كدا كفاية بقي ومن ثم لازم نعمل إحلال وتجديد ، يتم انتفاء النختارين للبداية الجديدة وإنتشالهم من العالم وإيداعهم مكان ما ثم بعد ذلك يعودون بعد الإنتهاء من عمليه الإحلال يعني ربما ، ليه لأ

--------------------------------------

كاتب الفيلم والمخرج : هو اليكس بروياس وهو استرالي مولود في مصر ، لكن القصه فعلا عجبتني والإخراج بتاع راااااائع للغاية

في الأخر بقي اللى يحب يتفرج ع الفيلم .... دوس ع الأيوكون

تتابع كلمات

وجودك علي الأرض هو قمة العبثية
كيف يترك القمر سماه
ليجالسني علي طاولتي الدائرية
كيف يهبط إلي البسيطة
ليريني ابتسامته السحرية
يسحب كرسي ويمازحني
ليكشف عن اسنان ذهبية
كيف يدع نجوم علياءه
ويحادثني انا ابن البشرية
هل تخلي عن كبرياءه
ام اصابته لوثه عقليه
أم انه لم يلتزم بقوانين
فقانونه هو أن الحب حرية

-------------------------------------------
علشان محدش يدعي عليا حاجة دا لا هو شعر ولا نثر ولا اي حاجة
مجرد تتابع كلمات مر علي دماغي بعد يوم طويل مرهق