!! حاجات وبتفرح

البحر موج عطشـــــان للرقص والمغني

مشتاق بقاله زمـــان يقول ويسمعنا

مش كل شيء بيفوت في عمرنـــا بيجرح

قلب الحياة مليان ... حاجات وبتفرح

-----------------------------------------

اسكندرية وحشتني ... أي والله

فرحه

لونها لون فرحه

Photo Copyrights

عني

كنت هكتب هنا عن الوعي وانتشاره و و و
بس دلوقتى هكتب عني

كنت قولت قبل كدا ف نوت اني بسمي نفسي " أمل "

اعتقد اني سيد الأفكار الحالمة في هذا الوطن
رغم كل اكتئابي وحزني ومودي الوحش دايما بس انا دايما مفعم بالافكار اللى نفسي احققها، ورغم كل الشواهد علي صعوبة التحقيق واحيانا الاستحالة، بس للأسف بفضل كدا.
فاكر من اكتر من سنتين بشوية كنا شغالين علي حلم، مكانش فكرتي، بس شاركت فيه واخلصت ليه جدا، مكنتش لوحدي كنت وسط ناس كتير، ولكن الناس فضلت تقع لحد ما فضلنا شوية صغيرين ووقع الحلم كله.
الحلم كان مجلة بتجمع كليات الحاسبات ف مصر، لسه فاكر الاجتماعات ولسه عندي الداتا بتاعه اول تلت اعداد اللى كنا مجمعينها، عيبي اني مخلص لأحلامي زيادة عن اللازم،ولحد وقت قريب كنت بفكر ازاي يقوم الحلم دا من تاني.
من اكتر من سنة عملت فكرة جديدة وحلم تاني من احلامي السعيدة :)، ونفس اللى حصل وقع الناس من حواليا مرة كمان، بغض النظر عن الاسباب، الحلم التاني كان اسمه اقرأ تكون ... حلمي الشخصي الكامل الأول.
والحلم كان موقع عليه مجموعه كتب بنحطها كل شوية علي اكونتات لينا ونعمل مجلة إلكترونية للموقع، عملنا عدد وحيد ووقفنا.
وانتهي الحلم وما فكرتش ارجعه رغم اني لقيت ليه صدي كويس، بس ليس كل ما يمني به المرأ نفسه يلقاه.
من كدا حوالي تسع شهور بدأنا حلم جديد، الـ"نا" بتعود علينا فهمي، اسامة، عبد الرحمن، وانا، الحلم لسه عايش، لكنه بيصارع من اجل الحياة، الحلم اسمه "ابدأ" اسرة طلابية ف الكلية، كان هدفنا نغير الطلاب زمايلنا ونخليهم احسن ونخلي الكلية احسن، واشتغلنا علي قد ما نقدر، مكناش لوحدنا، بس كالعادة وقع الناس من حوالينا، لكن وجود التلاته دول غيري حواليا مخليني لسه قادر في الحزن افرح، قادر اتابع ف الحلم دا شوية، الحلم دا اول حلم بينزل علي ارض الواقع، وعلشان كدا شفنا فيه عذاب.
قبل ما احكي عن العذاب حصل موقف ليا في الكلية انى اتحطيت في قسم غير اللى نفسي فيه ف الكلية وقعدت كتير احاول اغير، وفي يوم قابلني صديقي محمد اكرام قولتله بكل الفرحة اللى علي وشي ياهو خلصنا الورق، محمد قالى رجعوك القسم بتاعنا، قولتله قسم ايه اتوافق علي ورق الاسرة وعندنا اول ايفنت الاسبوع دا :D
طول عمر احلامي عندي هي انا، لما بتتحقق بكون في قمة نشوتي، نشوة تحقيق حلم، تحقيق هدف.
العذابات بقي لما نزلنا علي ارض الواقع اتمثلت في بيروقراطية الدولة اولا، تعنت الموظفين والعمداء ومشاكل امن الجامعة وكل الكلام الفاضي دا، تاني حاجة بقي وعي الموظفين، تصور لما حد يقولك انت مالك ومال الكلية ما تخليك ف مذاكرتك، ولما حد يقولك روح مش هخلص الورق دا خليك ف نفسك وملكش دعوة بزمايلك كل واحد يشوف نفسه، ولما نحط باسكتس ف الكلية للطلبة يشيلها عمال النضافة، الطلاب نفسهم كانوا واحد م العذابات، بإنهم يحسسوك انك شخص م القمر، وان مفيش فايدة و و و و، دي بس مجرد نفحات ومش وقته احكي كل حاجة، خصوصا ان الحلم دا يحتضر ويجاهد من اجل البقاء.

رغم كل اللى بيحصل دا عندي امل، عندي امل التوريث ما يحصلش، وعندي امل اشوف البلد احسن، وعندي امال كتير.
رغم ان مفيش حاجة مبشرة، ورغم اني من جوايا خايف علي امالي واحلامي، بس مؤمن بيها حتي الثمالة-إن كان للإيمان ثمالة-.

عندي امل لدرجة اني بدأت فكرة جديدة، وحلم جديد، حلم كبيييييييييييير، متعب، مرهق، وبدأت أجمع الناس من حوالين الحلم دا، ناس يؤمنوا بيه، علشان محدش منا يقع تاني زي ما حصل قبل كدا، ورغم خوفي ع الحلم دا، وصعوبته، مش فـ ذاته، بس ف الاحداث من حواليه، بس بحلم وعندي أمل وهحاول احققه، من جوايا خايف، خايف منه وخايف عليه وخايف عليا شخصيا لو الحلم دا ما اتحققش.
مش عارف ممكن يحصل ايه
اموت او اهاجر او اشوفلي علبة سردين اتحشر فيها !!
مش عارف
وعلشان كدا عايزة ينجح علشان ما اتحطش ف الاختبار دا
ولان الاختبار الاخير مش هقبل بيه
والتاني مش هتحمله
ف الاول هيكون النتيجة

في احتمال اخير هو اللى هيحصل لو ما قدرش الحلم دا يعيش ولو اني بتمني ما يحصلش ...
يتولد حلم جديد !!

مستر أمل !!
أنا

بحر الحياة

الدنيا بتاخد وبتدي

الليل لو طول هيعدي

*****

حاول تتغير ومسيرك تقدر

وبلاش نستسلم يوم للحزن

ما دام عايشين

*****

لو ينسي الواحد احزانه

هيشوف الورد والوانه

لو نفتح للدنيا قلوبنا

هتدق الأحلام علي بابنا

*****

!! حبها من قلبك

!! حبها هتحبك

.. أضحك للدنيا

.. الفرحة هتيجي

ف غمضة عين

**********

بكرة هيجي أكيد

هيجينا حلم جديد

منير

!! بعضن

بيقولوا الحب بيقتل الوقت
وبيقولوا الوقت بيقتل الحب
يا حبيبي ... تعا تا نروح
!! قبل الوقت وقبل الحب


بديت القصة تحت الشتي
بأول شتي حبوا بعضن
وخلصت القصة بتاني شتي
تحت الشتي ... تركوا بعضن


حبوا بعضن ... تركوا بعضن


يا حبيبي ... شو نفع البكي
شو إله معنا بعد الحكي ...
ما زال قصص كبيرة
وليالي سهر وغيرة
تخلص بكلمة صغيرة


 حبوا بعضن ... تركوا بعضن

فيروز - الاخوين رحباني 

خوف

كما طفل صغير يتعلم الحبو يتحسس بخوف ما يحيط به

عزف

لإنني حين أبكي أطلب من الحياة آلا تبكي معي

فـ بكاءي كما ناى حزين في غابة استوائية يهوى العزف وحيدا

!!!

والله كان هيبقي هنا بوست مبسوط

شكرا

شكرا جدا

جنون

وهج

ناي

مشروخ يا ناااااي ... متغنيليش

زعجك وجعني آاااه ... وانا ما كفانيش

هوة

استهواه البقاء في هوة الصمت العميقة ... السحيقة

كذب

بيحاول ف الحزن يفرح

بس مش قادر

وجع

موجوووووووووووووووووووع

حرية

جاي من بلادي الغريبة

لا زاد ولا مية

وغربتي ... صاحبتي

بتحوم حواليا

وانتى تقوليلي بحبك

تحبي ايه فيا

ودا حب ايه دا

اللى من غير

!! أي حرية

sdd

sorrow, depression and darkness

راجع

أنا راجع زي زمان

طفل في عين الأحزان

وصدقني

صدّقني

ما تستاهلشي الحياه مننا كل يوم دمعه

ولا تفضل عيون البشر دامعه

خليك مع اللي رافض ..

الحزن واللوعه

والمسافر المهاجر واللي قاعد ..

ومتلهّف ع الميعاد

تنوّر للي متغرّب .. تنوّر له على شطوط البعاد

تفكّرُه بضحكة المحروسه اللي دايبه ..

في ليالي الصبر والموال

من قصيدة "النجم" - مجدي نجيب

المراحل الخمس

المراحل الخمسة للإنتحار

الإنكار : لا مش عايز انتحر طبعا

الغضب : اوف الواحد يموت ويستريح

المساواة : عايش زي ميت هتفرق ف ايه 

الاكتئاب : المرحلة الحالية بالنسبة ليا

القبول : استعنا ع الشقا بالله

مكعب سكر

ضــــــايع مني ازاة المـاية

ومش راضية الطيــــارة تطير

راح الصبر ورجـــــــع الصبر

وتعب القلــــــب ولسه كتير

اه يا تيشرت العمر يا ابيض

لفيت بيـك مشـاوير مشـاوير

املك صورة انـــا فيها صغير

شكلي اتغير مــــــا عرفتوش

كـــــان في جيوبي مكعب سكر

دا السكر مــــــا لقيتهوش

وامــــا اتقطعت من الساعة

وقع الســــــاعة لقتني كبير

اعرف واحد قــــــال لواحد

اهمل صاحبـــــك واقسي عليه

واحد قـــــال للواحد نفسه

انت مــزعل صـــــاحبك ليه

واحد حــــــاول يعرف واحد

طلع الـــــــواحد صفر كبير

بلاك تيما


Download MP3
Watch YouTube

أسمعها بلا توقف من بداية العيد

خطاب بعلم الوصول

ازيك يا عم عيد

تصدق واحشني

ما تقولش بتيجي كل سنة والكلام دا علشان مش باكل منه ، دا انا كل سنة ف الميعاد اللى الناس بيقولوا انك بتيجي فيه بستني ومش بتيجي ، ما تقولش بتيجي بس ، طيب بأمارة ايه ؟؟

تعرف ، يمكن تكون بتعدي علي ناس وناس ، واكيد انا من الناس اللى مش بتعدي عليهم

اصله مش معقول تكون بتيجي وانا بقالي يجي سبع سنين بستناك وانت بتضحك عليا ، تعرف انا يمكن من اخر ايام اعدادي ومعرفكش ، نسيت شكلك وريحتك ، بغض النظر عن ريحة اللحمة اللى بيقولوا انها لازمة لما انت تيجي ، وبغض النظر اني بفطر بعد رمضان بس انت ما بتجيش ، دا انا بنزل اصلي العيد زي الناس بردو ، واقول يمكن يجي لو صليت وما بتجيش ، طيب ايه ؟؟

تصدق اني مش فاكر اخر مرة عديت عليا كان شكلك عامل ازاي ، دا انا اخر مرة قالوا انك جيت فيها فضلت مطبق علشان ما تقولش لقتني نايم ولا حاجة ، وفضلت مستني وصليت وسلمت ع الناس اللى اعرفهم واللي معرفهومش ، ولقيت الناس فرحانة وبتقول العيد جه العيد جه ، بس انا مش لقيتك يا عم عيد ، اسئلهم جه فين يقولولي جه ، زهقت ونمت ، وسبتك قاعد معاهم وناسيني ، يا عم عيد .

طب اقولك كمان ، انا بطلت اخد عيدية ، اه والله ، ما انت ما بتجيش ، ومحدش بيقولي اخد عيدية ، وانا مش بقول لحد اني عايز ، ومش بدي لحد عيدية بردو ، تعرف لو علي عيد الكبير ، ماشي ، ليها سبب وهعديهالك واقول دا بسببي ، بس خلاص راح السبب ، فكها بقي وعدي ، طب والصغير ؟؟ مش بسببي بقي ، مليش فيه انا ، وبعدين يا راجل دا انا كنت مبسوط ، اه والله وانت سيد العارفين انا كل فين وفين لما اتبسط ، تيجي انت ليهم كلهم وما تجيليش ؟؟

انا مش زعلان منك علي فكرة ، اصلي انا ف الاساس مش عايز ابقي سعيد

بس ولو يعني

اكسر بخاطري مرة وتعالي وخليني اقول اني سعيد

دا انت تلت تربع كلمة سعيد

تصدق بالله ما مكلمك تاني

ولا هسألك ما جتيش ليه

ولا هسأل فيك

والنهاردة هفضل صاحي لحد الصلا وهصلي وانام

وابقي روحلهم بقي وسبني لوحدي

انا اللى هسيبك لوحدك

!! ياااا .... عم عيد

أحمد تشي

لزاما

لو كان لزاما علينا الرحيل كارهك يا وداع ... ولا بديل

مصر

مهما حصل هتفضلي مصر :)

مبارة الأربع امبارح مكانتش إلا مجرد مبارة حتى انتهاءها بنص ساعة ، لكن بعدها اتغيرت شوية حاجات خلينا نرجع من الاول ، او علي رأي الشوالي ... عاود لي من الاول

قبل المباراة انا كنت مشحون جدا إيجابيا ومتأكد تماما إننا هنفوز بالمباراة لأننا كفرق رياضية أحسن من الشكائر كتير ، ومع إني مضايق من تصرف الشكائريين مع المصريين في الشكائر هناك ، لكن قولت معلش احنا احسن وبنفهم ومبارة تفوت والدنيا تعدي ، اتضايقت جدا خلال المباراة من تصرف لاعبي المصارعة بتوع المنتخب الشكيك وتعمدهم الإيذاء للاعبي المنتخب المصري والضرب بدون كرة ، وعلي رأي صلاح صديقي بيقول : انا عايز اعرف ازاي مدرب يقول للعيبته يتعمدوا الخشونة داخل الملعب ، انا اعرف لاعب بيلعب بخشونة مش فريق كامل ، الحيقية دي من اكتر الحاجات اللى ضايقتني ف الماتش ، لكن اللى حصل بعد كدا لما الماتش انتهي اني اضايقت جدا علشان الفريق الزبالة دا ما يستحقش يطلع كأس حارة دقدق حتي علشان يروح زفت عالم ، والهدف زي الزفت وملوش طعم ولعب زبالة زبالة يعني ، بس خلاص ... ما قد كان قد كان ، وموضوع وخلص ، اضايقت بقي ف الطريق ناس بتصوت وناس بتهبل وناس بتشتم في " مصر " يولع الماتش ع الكورة ، بس مصر لأ احنا ما بننتميش للكورة علشان نخسر ف نشتم في مصر ،  بس اتبسطت في الطريق كان في احتفالية وناس فرحانة بالمنتخب لإنه فعلا لعب حلو ، بس مكانش ليا نفس احتفل معاهم ، المهم رجعت الشقة بتاعتنا ف الزقازيق وفتحت النيل للرياضة وكان إبراهيم حجازي بيتكلم علي اللى بيحصل للمصريين في السودان من ضرب وتهديدات ، الصراحة اكتئبت بسببهم ، يعني فايزين وعملوا كدا ، ساعتها كنت قليل الادب اوي وما مسكتش نفسي .

قبل ما انام قررت اني هلبس العلم زي ما كنت لابسه قبل الماتش بكره واروح بيه الكلية ، وقد كان ...

أول ما نزلت م الشقة هناك ، واحد راجل كبير اتريق بس نفضتله علشان كبير ، وانا مستني اركب للكلية تعليقات كتير علشان اقلع العلم وكله كنت برد عليه ان دي بلدنا ومش ماتش كورة ، وروحت الكلية وكانت التعليقات لكل تعليق مستنيه انا رد ، اللى كان بيقولي لابسه ليه بقوله علشان دي بلدنا واللي مش عاجباه يسيبها ، واللى كان بيقولي اقلعه بقوله اللى مستعر من العلم يسيب البلد ويمشي واللى كان بيقولي ولع فيه بقوله ممكن اولع فيك انت ، وفعلا مكنتش بسكت لحد ، اي حد يعلق تعليق مسموع كنت برد عليه ان دي بلدنا واني فخور اني لابس العلم دا ، المهم فضلت لابسه طول اليوم لحد ما روحت من الزقازيق للبيت وشافني زمايلي من ايام الثانوية البائدة بردو اتريقوا ولكن بردو ما سكتش ومن اجمل الحاجات واحد زميلي شافني وبيقولي لابس ليه ، قولتله علشان دي بلدنا يا عبد الرحيم ومش ماتش كورة وخلص وهتفضل بلدنا وهفضل فخور بالعلم اللى علي كتفي دا ، الصراحة كنت كل لما بقول كدا ببقي فخور بنفسي واني بعمل حاجة راضي عنها اوي ، بس اكتر حاجة عجبتني واحد في الشارع قالى كدا انت قولت الكلمتين الصح ربنا يبارك فيك ، رديت عليه ويا رب الناس كلها تفهم الكلام دا ويبارك في مصر ويخليها لينا ويخلينا ليها .

اخيرا قبل الختام امبارح انتهت عندي بقايا قليلة كانت باقية للعروبة والاخوة والاشقاء ولكنها من اليوم بائدة ولا وجود داخلي إلا لمصر ف المقام الاول ومن ثم الانسانية ف المقام التاني واحب انوه ان شعوب كالشكائر وشبة الجزيرة العربية والخليج العربي لا يصنفوا بالنسبة إلا ضمن البشرية ولا أحمل لهم ادني مشاعر حب او احترام او اي مشاعر حتى الكره لا احمله لهم

هذا وخلص الكلام

عني ولحظات الشتات 4

عندي أنهي المحادثة مع شخص ما قائلا سلام فهذا يعني اما إني غاضب من شيء ما عموما او ربما غير راضي عن هذا الشخص

أما حين أُنهيها بـ مع السلامة فهو إيصال محبة مختوم بختم الأنا العليا الخاصة بيّ

MASR

البلد دي ترابها أغلي ... مرها م الشهد أحلي

مصر عادت

مصر عادت شمسك الذهب

تحمل الارض و تغترب

كتب النيل على شطه 

قصصا بالحب تلتهب

بجد مبسوط جدا ومن باب التوثيق وللذكري وللتأريخ قولت اكتب اللى حصل ،

النهاردة كان يوم ملوش حل ، عملت فرمان ف البيت وقولتلهم اللى هسمع صوته هطرده ، والتليفزيون في اوضه بابا ساب الاوضة وطلع نام ف اوضة تانية ، وانا روحت معلي التليفزيون ع الاخر واخواتي جنبي بس كله عامل سايلنت ، لسه قاعد وهوب بقول يا رب لقيت الكورة قاعدة تتنطط عن جون الجزاير وانا اقول تسلسل ، مش تسلسل ، ف العارضة ، يا زيدااااااااااان ، اوبااااااااااااااااااا ، وقعدت اتنطط ع السرير كنت هكسره ، واشتغلت حسن شحاته بقي ، ارجع يا ابني بلاش اعتراض ، امسك يا ابني اللى ف الزاوية هناك ، المحمدي فاضي يا حسن ،قدام يا تريكة ، ارفع يا معوض ، طلع حمص ونزل بركات يا شحاته ، طلع فتحي ونزل متعب ، متخليهوش يرفع ، باصي يمين ، وخلص الشوط الاول وانا مرتفعه المعنويات ع الأخر ، التاني بدأ ومع الوقت بتنهار المعنويات ، وخلاص حطيت وشي ف البطانية لقيت بركات بيرفع ، مش عارف مين اللى رفع اصلا ، المهم قولت ياااااااااااااااا رب ، وعملها متعب ، وعينك ما تشوف إلا النور ، روحت قالع تي شيرت التريننج اللى كنت لابسه وروحت معور نفسي ف وشي ولقيت دم نازل علي جسمي بس مين ولا يهزك وقعدت اعيييييييييييييييييط واعييييييييييييييط واتنطط واوقول كلام ولا عارف له معني اصلا .

بس سيبك انت ، ماما كانت ميته م التعب وعيانة واتفرجت ع الماتش وبحماس منقطع النظير ، وجدو جدوووووووووووووو اللى عمره ما شاف ماتش ف حياته طلع كان بيتفرج ع الماتش هو كمان ، ومحمد اخويا كل شوية يقف بالعلم بتاعه قدام التليفزيون ويقول مصر مصر مصر ، اقوله اتهد والله ما سامعينك ، بس مين لا حياة لمن تنادي ، ماعدا بابا بقي راح نام وصحي ساعة ما الجزاير كانت هتجيب جون بيقولي كنا جبنا جون ؟؟ قولتله لا دا الجزاير ، قالى الحمد لله ونام ، الأدهي بقي والأمر أوساااااااامة ، اسامة اللى اكاد اجزم انه ما شافش عشر ماتشات علي بعض ف حياته كان متابع المباراة كلها وابدي فيها رأيه الفني ولا طه سماعين في عزه .

انا دمي نشف اصلا

بس الحمد لله علي كدا

اسيبكوا بقي علشان اجهز الميكروباص اللى هنطلع بيه علي ام درمان

بس خلاص

جدول

الجدول الزمني المقترح للأسبوع الحالي

يوم الأحد : نخلص محاضرات ونشوف ألف مبروك للمرة التانية علي التوالي

يوم الاتنين : محاضرتي دكتور محمد أسامة وبعديها ارجع القاهرة انزل وسط البلد أروح روابط

يوم التلات : أجازة !!

يوم الأربع : نقاهة !!

يوم الخميس : حفل المولوية بالمتحف المصري 

يوم الجمعة : حفل سلمي صباحي في الساقية :)

بس خلاص

أدعولي بقي يتنفذ

ربما

فقلــت لنفسي ربمـــــا هي نعمة

فماذا تري ف القدس حين تزورهــا

تري كل مــا لا تستطيع احتمالـه

إذا ما بدت من جنب الدرب دورها

وما كل نفس حين تلقي حبيبها تسر

ولا كل الغيـــاب يضيرهــــــــا

فـإن سرهـا حين اللقـاء لقــاءه

فليس بمأمــون عليهــا سرورهــا

متي تبصر القــدس العتيقـة مـرة

فسوف تراهـا العين حيث تديرهــا

لو موصوفلك

لو موصوفلك تسكت جوا الهيصة وعيش

لو موصوفلك ترجع روح ويا ريت ما تجيش

لو موصوفلك تضحك اضحك علي احزانك

لو موصوفلك تعشق حب واقف ف مكانك

لو تختار في زمانك احسن ما تنقيش

لو موصوفلك وصفة اسئل ناس مش عارفه

واعرف لما تجاوب تسمع ألف مفيش

لو موصوفلك تحلم قضي الليل بردان

واعمل روحك ناسي ... ناسي انك انسان

لو موصوف ترتاح نادي وقول يا جرااااااااااح

ما يغركش براح ساكن ما بيبكيش

غناء والحان : وجيه عزيز ، كلمات : علي سلامة

حملها من هنا

بوح

!! ونشتاق للصمت أحيانا

علي فكرة

وبقولك ...

أنا جرحي ...

نسيته ومسموح

مسموحلك تتعاجبي ولكن ...

فـ ليالي الأحزان ما تعاتبي

دنا ماشي بقلبي المدبوح

مجدي نجيب بتصرف

:)

مش عايز اشوف حد ولا أكلم حد

اعتقاد

معتقدش اني هبقي مبسوط لو ذهب الجميع - جميعا - إلي العالم الأخر

ومع اعتقادي بردو ان الجنه مش هتكون المكان المناسب لشخص مثلي في هذا الوقت لكنني وعلي الرغم من ذلك أعتقد انني لو تواجدت في العالم الأخر سأكون أفضل حالا مما عليه الآن

أمل

استلق في قبرك مستريحا فإنا ها هنا مرابطون

:)

بيننا مليون عصفور وصورة

!

Fuckin' Valentine Day

عجبي !!

حبيت ... لكن حب من غيرحنان

وصاحبت ... لكن صحبة ملهاش أمان

رحت لحكيم واكتر ... لقيت بلوتي

إن اللى جوا القلب ... مش ع اللسان

إلي قلبي

إلي قلبي هم قرب

محمد منير .. منير دائما وابدا قريب كثيرا جدا

محمدالمخزنجي .. يأسرني كثيراالمخزنجي بأسلوبه البديع البسيط السهل الممتنع

أمل دنقل .. ربما بساطه دنقل وعبقرية أشعاره تقربه إلي قلبي لكن مؤكد ان تاريخ حياته القصير صاحب الدور الأكبر

الإمام علي .. عبقرية الأمام علي واعتداله وتطلعي إليه كصورة المسلم المثالي يجعلوه ف صدارة القرب إليّ

تشي جيفارا .. أن بني ادم يحارب الظلم حول العالم لمجرد ضحد الظلم وبس ويكون دا هدفه الوحيد يبقي يستحق انه يبقي دوما في الصدارة

بهاء طاهر .. نقطة النور وحدها كافية انها تجعلني انبهر ببهاء طاهر ، هو الروائي الأروع بالنسبة إليّ

صلاح جاهين .. جاهين كيان متكامل مينفعش يتفصل ، جاهين كله علي بعضه كدا يتملكني

فيروز .. أروع أصوات الوجود علي الإطلاق ، ما زال تعليق محمد حمدي عنها بأنه صوت الرب باقي معي حتي الآن

عبد الباسط عبد الصمد .. مش مجرد قارئ ذو صوت مميز لكنه بيعيش الكلمات وبياخدني لأعيش معاه فيها

أحمد زكي .. زكي كالموجة حين يشتد البحر في هياجه فهو يصل إلي مدي أحساسيه وتقمصه أن يجعلني اعش معه شخصياته

أحمد العسيلي .. أو المفكر الكبير أحمد العسيلي ، صديق ايام الثانوية علي اف ام تي في ، واللي ببرع جدا في تقمص طريقته ف الكلام وبخاصة وانا اقرأ رباعيات جاهين

مورجان فريمان .. ذلك الأسمر البارع ، فيلم ذا بوكيت ليست فقط يكفي كتاريخ كامل له ويأسرني هو والفيلم معا

نجيب ساويرس .. رجل الأعمال الاقرب إليّ في مصر وبتأثر فيا عقليته الرائعة وتفكيره العالي

ساندرا بولاك .. الملاك الجميل والاروع بالنسبة إليّ

أحمد حلمي .. أنحاز لأحمد حلمي كممثل منذ سهر الليالي والسلم والتعبان واعتقد فيه منذ زمن

ناجي العلي .. قصة حياة ناجي العلي ، لوحاته ، قصيدة الأبنودي عنه ، حكاية رضوى عاشوره عنه ، كل دا جعله قريبا

الإمام الشافعي .. رمز الثورة علي القديم ، وشهيد الكلمة في مصر المحروسة

زياد الرحباني .. موسيقي زياد وتجديده في موسيقي الرحبانيه القديمه وثورته سياسيا ودينيا جعلته مختلف ومتميز جدا

المتنبي .. يا أمة ضحكت من جهلها الأمم ، وحدها تكفى هذا الرائع ليكون مني قريبا

محمود درويش .. الثائر المحب الخجول ، فقط أحبه

مارسيل خليفة .. صاحب العود الآسر، وأيضا ثائر

هذا ومازال للقائمة بقية

قالك مقاطعة

بخصوص المقاطعه المقدسة بتاعه بكره
في حاجة قرفاني كدا وهحاول امسك لساني فيها
كل يوم والتاني حد يحط لينك المقاطعه في بروفايله حقه وزي الفل
بس بقي بيروح حاطط الكلمتين دول كمان
"
هنقاطع ليه ؟ 
********* 
لان كل ضغطة من الماوس على الفيس بوك وكل صفحةبنشوفها عليه تعبر فلوس بتدخل للفيس بوك لان لازم الفيس بوك يزود عدد الزيارات اليومية اللى بتسجلها شركة ميكروسوفت ومن خلالها بيبقى زوار الموقع كتير وبالتالى يطلب اكتر واكتر فى ثمن الاعلانات وده غير عقد المساحة اللى بتمنحها شركة ميكروسوفت زيادة مع كل زائر جديد على الفيس بوك " 


اللهم صبرك يا لساني
نفسي اعرف ايه علاقة مايكروسوفت بالموضوع
تقريبا هما فاكريين مايكروسوفت النت دا بتاعها وبتأجر للناس وبتديهم عقد مساحه
تيييييييييييييييييت
اموت واعرف ايه عقد المساحه دا
لا وبتمنحها مايكروسوفت
حد يكسب فيا خيرا ويفهمني الكلمتين اللى فوق
انا واحد بتاع حاسبات ومعلومات
وبقالي خمس سنين بصحي وبنام وبشرب وباكل ع النت اصلا واكتر من ضعفهم مستخدم عادي اني اسمع ف حياتي كلمة عقد
مساحه دي ابدااااااااااااااا
لا وكمان ان مايكروسوفت بتعد الزيارات وبتسجلها ع الفيس بوك 
تيييييييييييييت كمان مرة
انا اول مرة اعرف المعلومة دي
اللهم إلا لو مايكروسوفت اشتغلت مصلحة سجون او تبع امن الدولة
افهم بس حد يفهمني يا بشر
ما يا انا جاهل
يا اما كل واحد بيكوبي وبيبيست الكلمتين الهبل اللى فوق دول يبقي عباره عن
خروف ماشي ف قطيع مش فاهم حاجة بيقوده لاعب سيرك يدعي انه حكيم عبقري

عن الأحتباس الحراري

This post is part of Blog Action Day 09

التدوينة دي جزء من بلوج أكشن داي

--------------------------------------

لما فكرت اتكلم عن التغير المناخي وتأثيره كان اول حاجة جت في بالي هي الاحتباس الحراري ، ويمكن الناس تعرف عنه معلومات متناثرة من هنا وهنا ، انا كمان كان عندي معلومات عامة وتقريبا كنا درسنا عنه ، لكن اكتشفت ان كان منها حاجات غلط ومنها معلومات مش كاملة .

في البداية الغلاف الجوي للأرض بيقوم بعملية حجز لجزء من أشعة الشمس المرتدة من الأرض لتدفئة الكوكب والحفاظ علي درجة الحرارة معتدلة ، لكن ظاهرة الأحتباس الحراري ظهرت لما زادت بعض غازات واهمها ثاني أكسيد الكاربون عن معدلاتها الطبيعية وبدأت تحجز المزيد من أشعة الشمس فبدأ بالتدريج درجة حرارة الكوكب في الأرتفاع .

قبل النصف الاول من القرن العشرين كان بيبقي في زيادة في معدل درجات الحرارة علي كوكب الارض ، لكنها كانت طفيفة للغاية ومش مؤثرة وتأثيرها بيكون غالبا للبراكين حول العالم ، لكن في النصف التاني ومن بداية الحقبة الصناعية بدأت الزيادة تكبر وتبقي ملحوظة ومؤثرة سلبا.

تأثير الاحتباس الحراري ربما غير ملحوظ علي المدي القريب لكن علي المدي البعيد هتتسب في ارتفاع مستوي سطح البحر وهتقل الانهار الجليدية والبحار والمحيطات الجليدية في العالم ، وهتتأثر بالذات منطقة القطب الجنوبي بالإضافة لتوقعات بزيادة نسبة الصحاري شبه الاستوائية وقله مساحة الغابات زي الامازون واللى هيترتب عليه انقراض العديد من الكائنات الحية علي سطح الكوكب .

لمواجهه الامر أغلب دول العالم وقعت علي اتفاقيه اسمها اتفاقية كيوتو لمحاولة الحد من تأثير الاحتباس الحراري وبقاءه في مستوياته العادية الغير خطره .

أيه الحلول للحد من الأحتباس الحراري ؟

في نظري الشخصي ، اعتقد اللجوء للطاقة البديلة وتقليل الاعتماد علي الطاقة الحيوية زي البترول والاعتماد علي الكهربا والطاقة الشمسية ، كمان استخدام الألياف الضوئية في الإنارة بدل اللمبات واللى بتتسبب بردو في زيادة تأثير الاحتباس الحراري ، غير تحديد نسب معينة تلتزم بيها المصانع والشركات الصناعية حول العالم وزيادة الاشجار وبالذات حول الاماكن اللى بتتركز فيها نسب عالية من ثاني اكسيد الكربون .

دي شوية معلومات عن الأحتباس الحراري ورأيي في ازاي نقدر نواجهه

معلومات اكتر هتلاقوها :

هنا

وهنا

وعن اتفاقية كيوتو من هنا

ومعلومات أكتر هتلاقوها لما تدوروا علي النت في الموضوع :)

عالم وسخة

دا اللى هو أحنا ... أحنا عالم وسخة ، ونستاهل كل اللى أحنا فيه ، علشان محدش هو اللى عمل فينا كدا غيرنا ، عالم وسخة التعبير الوحيد في موقفي دا من حرقة الدم اللى أنا فيها دي والله ، إيه رأيكوا نشوف الفيديو دا وبعدين نكمل ؟؟

مبسوطين يا عالم مبسوطين ، اللى فالحين فيه الاغاني حرام ولا حلال ، وابو تريكة هيلعب الماتش الجاي ولا لأ ، مبسوطين ، طبعا مبسوطين علشان هنصعد كاس العالم ، وانا كمان مبسوط ، دا احنا هنحط علي كوكب الارض والكواكب المجاورة وعلي المقيمين خارج المجرة مراعاة فروق التوقيت ، هنصعد كاس العالم ، ملعون ابو الكيميا ، علي العلم ، ع اللي هيتعلموا اصلا ، مالها الكورة ، بتكسب ملايين وزي الفل ، الواحد يخلص ابتدائيه ويروح يتمرن ويبقي احسن من الف دكتور ويفتح الف بيت وعيلة ، وايه يعني ، أهم حاجة أن النقاب فرض ، وشيخ الأزهر ابن تيت ، ونور الشريف راجل عظيم وبيواجه الامبراطورية الصهيونية العالمية وحده وازاي جريدة تفتري عليه ، دا عامل مسلسلين السنة دي رضي الله عنه ، مبسوطين ، انا رأيي نقلب الجامعات ديسكوهات ، وملاعب ، والرجالة تلعب كورة والستات يرقصوا ، وهنحط ع العالم ، وهنصعد كاس العالم ، بس عمرنا ما هنظمه ، أحنا بس هنصعد ليه ، وهناخد الكاس كمان ومن موقفنا بالكاس هنحط ع العالم ، لا تقولي نوبل ولا أي حاجة ، أهم حاجة انك ما تناقش ، ما تناقش أي حد ، دكتورك ف الجامعة ما تناقشهوش ، ولا احنا قولنا نقفل الجامعات اصلا ونقلب الدكاترة مدربين وياخدوا كورسات عند حسن شحاتة ، وشيخ الجامع متناقشهوش علشان هو معاه توكيل رسمي من السماء ان السمع والطاعه له ، قرارات الحكومة ما تناقشهاش علشان الحكومة لا يأتيها الباطل من بين يديها ولا من خلفها ، أحنا أسياد العالم ، أحنا خير أمة اخرجت للناس ، مش مهم نأمر بالمعروف ولا بالمنكر ، أحنا خير أمة وبس ، أحنا شعب الله المختار أصلا ، ولا تقولي بحث علمي ولا تقدم حضاري ، نظمنا كاس العالم للشباب وهنصعد كاس العالم للكبار ، ايه تاني فاضل يتعمل ، احنا وصلنا لأوج المجد أصلا .

هي دي المواضيع بتاعتكوا

يا عالم يا وسخة احنا في مزبلة العالم ، واللى فالحين فيه جمعة الغضب من اجل الأقصي

الأقصي مش هيتحرر طول ما كل واحد فاكر انه هيدعي وبس ، ما كل واحد يحترم نفسه ، ما كل واحد يقرا ، يا أمة اقرأ ، يا أمة بيقرأ كل واحد فيها ف السنة ربع صفحة بس ، الإسرائيلين اللى انتوا مطلعين عين اهاليهم دعا وشتيمة بيقرا الواحد أربعين كتاب ، يا عالم بنت كلب ربع صفحة واربعين كتاب ، النسبة 0.625% ما بينا وما بينهم ف القراية ، مش مكسوفين من نفسنا ، اللى فالحين فيه الكلام ، أحنا عالم وسخة ، وهنفضل عالم وسخة لحد ما نحترم نفسنا ، ومحدش يقولي حكومة ، مكتبة المجلس الثقافي البريطاني في مصر اغلقت لعدم الاقبال ، لعدم الاقبال ، علشان شعب مش عايز يقرا اصلا ، علشان حرام فلوس دافع الضرايب البريطاني تضيع ع الهوا ، تتقفل وتتفتح ف اسرائيل علشان بيقروا ، وبياخدوا نوبل ، م الاخر ايوة زويل مش بتاعنا ولم جه قولتلوا ابني الجامعه زي ما انت عايز وهنديك تصريح ، يا ولاد الكلب ، والباز جه ومشيتوه ، ومصطفي السيد جه ومحدش عبر امه ، راح الخليج بيبوسوا تراب جزمته .

احنا عالم وسخة ، واللى بيحصل فينا دا حقنا ، ومش هناخد نوبل طول ما اكتر شخص بيأثر فينا هو محمد ابو تريكة وتامر حسني ، انا محروق دمي ع الاخر ومش طايق حاجة ، ملعون ابو دا شعب ، شعبنا ، الشعب اللى انا منه ، شعب الله المختار

اتفو

عني بخصوصية

من تجاربي القليلة في الحياة طلعت كدا بشوية حاجات ، منها مثلا اني كشخص مش مؤهل للجواز في الوقت الحالي ولا لسبع سنين قدام ع الأقل ، دا مش لإني مش قد المسئولية ، لكن لإني لسه في حاجات محتاج أكملها في شخصيتي نفسها ، في دروب لسه عايزة تتفتح سواء جوايا او حواليا ، مش كلها هقدر اسبر اغوارها وانا مسئول عن اشخاص تانية غيري لكن طول ما انا لوحدي مش هيقف في طريقي حاجة ، كمان أحلامي وطموحاتيفي منها اللى محتاج يتحقق بدري ويكون فيه كل وقتي محجوز للشغل والمعرفة وبس ومش هيبقي فيه المساحة الكافية لوقت لعيلة او ع الاقل لزوجة مثلا وانا ضد مبدأ أن رب العيلة يفضل طول الوقت برا او مسافر علشان خاطر الفلوس ، كمان انا كشخصية معنديش اي مشكلة في إني أكمل حياتي من غير جواز فالموضوع مش شائك ولا جوهري للدرجة دي ، وانا والوحدة اصدقاء اعزاء فممكن اتجوز الوحدة ونعيش سوا وكفي بها نعمة .

كمان من الحاجات اللى اكتشتفتها من خلال سنين حياتي العشرين اللى عدوا دول ، زي ما الفلوس مش هي كل حاجة ، الحب كمان مش كل حاجة ، ومينفعش حاجة ف الدنيا تكون هي كل حاجة ، ولا حد يكون هو كل حد بالنسبة ليا ع الأقل ، الحب مش كل حاجة لإنه مش كافي لبناء بيت ثابت الاركان ، هو سبب اساسي في قيام بيت واستمرار البقاء دا ، لكنه مش كل حاجة ابدا ، في ادمغه بيقوم عليها البيت ، في افكار لازم تتلاقي ومش لازم تتطابق بيقوم عليها البيت ، في تفاهم فكري مهم جدا لقيام البيت ، في تعاون وفهم للأخر ، دي كلها جزء من حاجات المفروض تكون موجودة وعمر الحب لوحده ما يغني عنها لقيام بيت كامل الاركان .

عمري ما فكرت في العبادات الإسلامية علي إنها عبادات حركية ، وعمري ما فكرت اعمل عبادة ما علشان خوف من النار ، العبادة في نظري لو ملهاش رابط وثيق بربنا واني بعملها علشان أقرب من الرحمن يبقي ملهاش لازمة ، ملهاش لازمة عبادات بتتعمل مجرد حركات ، ملهاش لازمة الصلاة اللى زي تمرينات الرياضة بدون اي ابعاد روحية ، ملهاش لازمة لو بتصلي وانت شايف قدامك النار والصلاة بتبعدك عنها ، ملهاش لازمة غير لو واقف بصلي وحاسس اني فعلا بين يدي الرحمن ، حاسس فعلا انه بينظر ليك وبيسمع مناجاتك ليه ، ملهاش لازمة كل العبادات في نظري بردو لو ما التزمناش بأخلاق الإسلام اللى رسوله قال إنه بعث ليتمم مكارم الاخلاق .

بس كفاية كدا :)

كن فيكون

Please click the image to maximize

(+18) عن غشاء البكارة الصيني والهوة الإخلاقية

ملاحظة مهمة بس البوست لمن هم اكبر من 18 سنة وعنده وعي كامل انه يقرا ويحدد رأي واضح وصريح مش انه يتعامل مع نفسه بكلام كوبي وبيست

من زمان وموضوع غشاء البكارة الصيني اثير بعد موضوع لا اعلم الصراحة صحته نشر ف اليوم السابع

الموضوع عمل لغط كبير جدا والناس فضلت تتكلم - احنا مش بنعرف غير نتكلم اصلا - والناس اتقسموا اتنين واحد بيقول انه هيعمل هوة أخلاقية عميقة والأخر قال انه مبسوط بوجوده لإنه هيلغي فكرة ان غشاء البكارة يكون هو مقياس الشرف للبنت

غير طبعا القسم التالت اللى ملوش ف اي حاجة وكله عنده ماشي

علي" كان عمل شير للينك بيقول ان دا فعلا منتج حقيقي وموجود"

ودا اللينك

http://www.ecplaza.net/product/166925_1102142/artificial_hymen_for.html

انا بس عايز اللى يدخل ع النت يشوف الاستخدام بتاعه

قبل ما اقول ليه الاستخدام خلينا نقول ان غشاء البكارة الصناعي موجود في العالم من قبل ما يجي عندنا بمده اعتقد انها كبيرة يعني مش بدعة اخترعت علشانا ولا حاجة

لو بصينا للأستخدام بتاعه هنلاقي مكتوب :

2. The best time is 20 to 30 minutes before sex.

معني الكلام زي ما انتوا شايفين ان افضل استخدام لغشاء البكارة الصناعي دا قبل الجنس بمدة من عشرين لا تلاتين دقيقة

يعني استخدامه خارج القطر العزيز مصر هو للإشباع الجنسي أو للنشوة الجنسية

يعني سواء استخدام في منظومة الجواز او الفرينديز هناك ، فهو استخدام بالنسبة ليهم اخلاقي تماما لانه بيساعدهم للوصول لحالة سعادة ، واللى هيعملوه في وجوده هيعمله في عدم وجوده وليس واسطة العقد إطلاقا وكان مرة مقاله مش فاكر لمين بس كان دكتور ليه مقاله دايما هناك انا مش فاكره المهم بيقول انه مرة جاله واحد بيطلب منه يعمل لمراته اعادة لغشاء البكارة لانه شعور ممتع لأي رجل وان دا شيء في امريكا مألوف وان في مراكز بتقدم اعادة الغشاء دا كهدية في اعياد الميلاد من الازواج لزوجاتهم يعني دا شيء مألوف جدا هناك

عندنا احنا هنعمل العكس

هيستخدم بعد الانتهاء من ممارسة الجنس لمداراة الفضيحة

انا مش بدعو ان الجنس يكون متاح للجميع زيهم

انا بس ببين الفارق بين استخدامنا واستخدامهم

هما عندهم صدق مع الذات جدا ، حتى لو هما دينيا حرام عندهم العلاقة الجنسية خارج اطار الزواج لكنهم بيمارسوها ما بيحاولوش يداروا دا ويبانوا اعفاء

لا عندهم صراحة ومواجهه للمجتمع والذات لان كل واحد مسئول عن نفسه

طيب وبعدين بالنسبة لينا في مصر

هل غشاء البكارة الصناعي هيعمل هوة أخلاقية ؟؟

اللى عايز اقوله ان الهوة دي أصلا موجودة ودا ما يمنعش انه هيزودها

لكن هو احنا بندور اننا نخلي الحفرة زي ما هي ولا نردمها

كل حملات محاربة غشاء البكارة دا اراها واهية لو فعلا هيتم استيراده

لو الشرطة نفسها منعته هيبقي مرغوب اكتر وهيتفنن الجميع في طرق تهريبه والحصول عليه وتبقي تجاره زي المخدرات كدا وبردو هينتشر

وحتى لو قدرنا نحارب وجوده ، هل هنحارب عمليات الترقيع الموجودة حاليا في شقق تحت بير السلم ؟؟

هل قدرنا اصلا نحاربها وهي اللى موجودة من زمن ليس بالقليل؟؟

ما اعتقدش بل هي بتزيد لأن الطلب عليها بيزيد

طيب والحل ؟؟

غشاء البكارة دا واللى هيسببه من تهاوي في الأخلاق وعيادات الترقيع وما تسببه من تهاوي في الاخلاق وغيرها كتير

دي كلها بالنسبة ليا فروع من شجرة فيها اسباب كتير ولو فضلنا نحارب كل واحد منهم هيزداد جئها تعمقا وإنبات لفروع اكتر مش لازم تكون مرتبطة بموضوع الشرف ولكن في مواضيع تانية كتيرة

والحل بردو ؟؟

الحل في نظري هو اننا نعالج الهوة الاخلاقية نفسها مش المسببات فيها ونقتلع الشجرة دي من أساسها

إننا نعيد الأخلاق للمجتمع المصري

اللى مليان سلبيات مش مضطر اقولها لان كل اللى بيقرا عارفها قبلي واكتر مني

غياب الامان ف الشارع والاحساس بالخوف دايما شعور بيشترك فيه كتير من اللى بيمشي ف الشوارع دلوقتى من تحرش لسرقة لاعتداءات وعلي الجميع ولاد او بنات

دا ملوش دعوة بقي بالغشاء او غيره

مشكلتنا ف الاخلاق

والحل اننا نرجع ليها

الحل اننا نعالج انهيار الاخلاق مش نحارب الحاجات الحالية اللى بتزود الانهيار لان اثناء ما احنا بنحارب فرع فروع تانية كتير اوي بتنمو وتكتر وبتظهر

يا ريت كل الناس اللى عايزة تحارب الحاجة دي تحاول توجه طاقتها لإنها تصلح المجتمع واخلاقياته

احسن كتير

دا رأيي انا الشخصي طبعا

عيد !!

كل سنة وكل اللى بيعدي من هنا دنيته حلوه

مضاجعة

أضاجع الألم ... وحيدا

مساكن شعبية

حين غني الملك .. منير انا قلبي مساكن شعبية .. وحين سمعتها أنا سحبت نفسا من هواء القاهرة الملوث .. موقنا بعقرية هذا الرجل .

أنا قلبي مساكن شعبية ، ربما هو التعبير الأنسب لوصفي ، حاليا .. سابقا .. ومستقبلا .. مساكن شعبية ، مساكن لا ترضي أن تجيئها جرافات فتهدمها لتقيم مكانها فيلا انيقة لفتاة مهما كانت ، أسف ليس هذا عيبا في فتاة أياً من كانت ، إنها طباعي المختلفة والغريبة ، هكذا الحال دوما في حياتي ، ولا اعتقد حقيقة أن ترضي احداهن أن تقيم في مساكن شعبية ، فلا هو يرضي غرورها ولا هو يشبع الأنثي داخلها .

اعترف .. حقيقة .. أنا أكره غرور الأنثي كما كما أكره كبر الرجل ، أكره أن يشعر كل منهما أنه نهاية العالم ، أكره أن يمتلك أحد الأخر ، حتى لو كان باسم الحب ، كثيرون يختلفون معي ، لأعترف الأغلبية إن لم يكن الجميع عاداي يختلفون معي ، لا يهم أنا فقط ابث افكاري الخاصة التي لا تلزم أحدا ، حقيقة أنا لا أعارض أن يمنح أحدهم قلبه كاملا فيلا من دورين كاملين لإحداهن ، حقه وأنا اباركه وأدعو له أن يسعد الرب دوما ، لكنني لست أهلا لذلك ، أنا خارج هذا الإطار لا أعرف كيف تبني الفيلات ( أعرف فقط كيف أعطي القبلات ) ، حقيقة أنا أحمل بين طياتي قلبا يسع الجميع ، ربما أستطاعت إحداهن أن تمتلك مسكنا ( شعبيا أيضا ) ولكنها تجعله يضرب بجذوره في أراضي القلب ويرتفع قليلا ليصبح متفردا بينهم ، ربما هذا هو المسموح داخل تلك المساكن الشعبية المساه قلبي ، وللجميع ، التوسع رأسيا ، أما أن يحاول أحدهم ( إحداهن إن شئنا الدقة ) أن يتوسع أفقيا فهو إذن يتعدي علي حق لي أصيل ، وحينها يصبح هو كالخلية الفاسدة وسط جسد سليم ، فتلفظ ، حقيقة لأ اتحدث عن أمرٍ مفرد ، ولكنني فقط أشرح قلبي لنفسي قبل أن أكتبه علي وريقات ربما تناوله شخص ما عبر من هنا بالقراءة .

في النهاية ... أنا قلبي مساكن شعبية

عني - لحظات الشتات 3

بكتب من جديد لإن يمكن الكتابة الحاجة الوحيدة اللي بتريح صنف من البشر ان كُتب عليا إني أكون منهم صاغرا ...

أكره تماما وجودي في مود الرمادي لا أنا مبسوط ولا أنا مضايق مش هدعي إني بكره أنصاف الحلول لكنى دوما أسعي للكمال فإن لم يكن نصر شامل فهو الموت الزؤام أو بمعني تاني لو مش هبقي مبسوط ما بحبش ابقي مش مبسوط ولا مش مضايق فبحاول اضايق نفسي بقي وخلاص .

بخصوص البوست الى قبل عيد ميلادي اللى فات دا ، في حاجة انا مقتنع بيها جدا ، مفيش إنساس في حياته ما بيتمناش يموت في وقت من الاوقات ، لكن اللى بيصرح بالرغبة دي يبقي مش هينفذ ، وانا لما كنت بكتب البوست حاطه في التصنيف بتاع كن سعيدا ، يعني متخافوش لما اكون قررت انى انهي حياتي هنهيها بنفسي سواء في صمت او في ضجيج لكن هيكون بنفسي .

من اكتر الحاجات اللى بتغير حالتي النفسية إني اشوف حد بيعيش مشاعر او ظروف نفسيه شبه اللى بعيشها ، هيلين هانت في وات آ وامان وانت عملت دا ، كانت انسانة ناجحة جدا في عملها والشركات بتتنافس عليها وحواليها ناس كتير بيقدروا وبيحترموها ، وبجد مش نفاق أو ما شابه ، لكنها في النهاية بتعيش ظروف نفسية سيئة وبتعيش وحدة مزرية .

انا زهقت م الكتابة بسرعة !!

خطب !!

احمد عبد الوهاب !! أحمد عفشة !!

خطب يا جدعان .. يا جدعان خطب

اوباااااااااااااااا

وكمان ما عزمنيش ع الخطوبة

ماشي يا عم شكرا ع الاخر

الف مبروك يا ابو حميد وعقبال ما افرح فيك واشوفك عريس

خالي !!

الاسبوع اللى قبل اللي فات كنت بفطر مع خالي كان يوم 13 رمضان تقريبا

المهم خالي شغال في شركة ليها فروع كتير وهو دايما بيسافر علشان شغلها وكدا

المهم السنة دي رجع مصر ف اول رمضان كدا

بيحكيلي بقي عن صدماته

اول حاجة بيحكي عن وهو راجع ف الطيارة ، في الأول قالى انه رجع علي خطوط مصر للطيران رغم ان ليه وزن 20 كيلو فيما انه علي الشركات التانية 40 لكنه قال ارجع علي طيران بلدي بدل ما ارجع مع حد تاني ، المهم بيقولي الطيارة اتأخرت ساعتين ، اعلنوا انها هتتأخر وبدأ والركاب يدوروا علي مكان يقعدوا فيه مفيش وكان وقتها بعد نص الليل تقريبا ومش فاكر انا كان راجع من دبي ولا قطر المهم بيقول انه فضل ساعتين بحالهم مش لاقي لا هو ولا الركاب اي حاجة يعملوها واضطروا يناموا علي الكراسي العادية ، وهو اصلا عنده الغضروف يعني مش ناقصة ، الطيارة وصلت اخيرا وركبوا وخالي مشحون سلبيا ضد مصر للطيران ، اول ما الطيارة قامت خالي لقي التكييف بارد جدا فطلب منهم يرفعوا درجة الحرارة ، المضيفين اعتذروا بأنه ما ينفعش ، فطلب منهم اي حاجة يتغطي بيها فتره السفر بردو قالوا مفيش ، ففضل مضايق جدا لحد ما جه الاكل ، قالي في ما معناه ان اكل عم عبده بتاع الفول اللى ع ناصية الشارع احسن من الاكل بتاعهم

المهم نادي المضيف وقاله ان الاكل وحش ، المضيف اتأسف وقاله انه مش بإيده وقاله يجيبله حاجة يشربها ، خالي قاله مش عايز حاجة خالص وشكرا علي كدا .

شوية والمضيف رجع وقاله ممكن اتلكم مع حضرتك شوية واخده معاه للمكان بتاع المضيفين

المضيف اعتذرله وقاله انه مش بإيديه اي حاجة ، فخالي رد عليه قاله هل دا جزاءه انه بيشجع طيران بلده يعني ؟؟ وانه مش فارقه معاه الشركة اللى هيركبها ولا الفلوس لان الشركة اللى بتدفع تمن السفر مش هو ، المضيف قاله انه هو نفسه تعبان من الامر دا وقاله بالنص " انا اتحولت من مضيف خادم لمضيف أسف " لاني ما بقولش كلمة زي ما بقول للمسافريين أسف وقاله كمان ان المفروض ع الاقل الطيارة يكون فيها عشر مضيفين او مضيفات لكن هو وزمايله اللى علي الطيارة اربعه بس ودا علي كل خطوط مصر للطيران وهما كمضيفين مش في ايديهم حاجة اصلا ، خالي كان هدي شوية والمضيف عمله قهوة وخلصت الحكاية علي كدا .

خالي رجع البيت لقي انه رجع بشنطة غير شنطته ، واضطر بعدها يروح يغيرها من المطار ، وراجع هيكفر ويسب ويلعن في المطار وبتوع المطار والتجاهل بتاع الناس هناك والقرف والورق والغباء .... واللهم انه صائم بقي

بعد كدا قعد يكلمني عن صولاته وجولاته في المرور ، وقالى انه وقف تلت ساعات في المرور علشان معرفش كان بيعمل ايه في الرخصة ، المهم بيحكيلي عن واحد بيرخص عربيته الجديدة موديل 2009 الراجل اتفاجأ إن عليه غرامات من سنة 2007 ، فبيقول للراجل المسئول يا عم ازاي والله العربية ما كانت اتعملت اصلا ، الراجل يقوله مليش دعوة ادفع الاول يا عم يهديك يرضيك مفيش والراجل ساعتها قال انه هيدفع بدل ما يدفع الغرامات ع التاكسيات ، وقد كان !!

بعد كدا ودي اخر حاجة علشان الناس اللى زهقت بيقولي علي انه كان بيجدد حاجة بردو تانيه مش فاكر ايه بس مصلحة حكومية بردو ف المهم محتاج يخلص ورق ما ف الراجل الموظف خالي بيقوله انه عنده زبيبة صلاه واكله نص وشه والله ونازله علي عينيه كمان ، المهم الراجل موقفهم ساعتين كل شوية يقوله معرفش ايه ناقص ، بعدين يقوله حضرتك عارف الشغل كتير وانا قدامي الاربع دوسيهات دول لازم يخلصوا و و و و و ، المهم خالي قاعد يقول بينه وبين نفسه اكيد لا الراجل مش قصده رشوة دا الصلاة باينه بين عينيه وكمان احنا ف رمضان ، المهم مرات خالي قالتله طيب اديله فلوس بس ، خالي اداله عشرين جنيه وحطها بين ورقتين وقاله طيب شوف كدا الورق دا هنحتاجه ، الراجل رجعله الورق من غير العشرين جنية وقاله لا كدا ورقك كله تمام ومضي الورق وقاله انه كدا كل حاجة خلصت !!!!

خالي قعد مضايق جدا ويقولي ايه اللى احنا فيه دا ، يعني الراجل اللى الصلا مقطعه بعضها واللي سابونا وقاموا صلوا الضهر ورجعوا كملوا الشغل وصلوا ف ساعه ربع ساعه وضوء ونص ساعه صلاة وربع بيختموا قال الصلاة ، وقعد يتكلم بانفعال يعني الناس دي فاهمة الدين ازاي وازاي بترضي علي نفسها كدا ، لا وفي رمضان كمان ، وقال كمان انه بيتخنق لما بيروح الجوامع بيقولي انا نفسي اعرف اللى بيروح يصلي دا ما بيحطش مزيل لرائحة العرق ليه بلاش مزيل يستحمي يا اخي بس مش ابقي بصلي وهموت من الريحة من شمالك ويمينك هما الناس دول ما سمعوش ايه اسمها واتخذوا زينتكم عند كل مسجد ، انا نفسي اعرف الناس دي فاهمة الدين ازاي بس .

خلص الكلام اللى كنت عايز انقله من كلام خالي .... وانا معنديش تعليق !!

كلمتين

ناس كتير في الدنيا بتمر قدام عينيها تجارب الناس وبيجرحها ناس وعمرها ما بتبطل تشوف الدنيا حلوة ، علشان دنيتهم من جواهم حلوة

----------------------------------------

لما بتبقي لوحدك بتفكر اكتر في الدنيا وفي الناس وبتزيد جروحك اللى بتحاول تضحك علي نفسك فيها

!!!

قلبى يا طير مروح يـــــا مروح فى الغروب
يـــا غريب عن الصحاب وغريب عن الدروب
عطشان والمية فى اديا حيران مش لاقى مرسيا

حينا !!

حينما تخبر شخصا ما ينكر ذاته دوما بانه أناني ستجعله يمضي بقيه حياته يفكر في حماقته اللى جعلته يفني روحه من أجل الناس أجمعين ويمضي يتعذب في جزيرة نائيه وحيدا

هدايا عيد ميلادي

ايام قليلة فقط تمضي ويقترب عيد ميلادي

ربما اتذكر منذ مولدي ان هداياي فيه لم تتعدي المرتين إحداهما كانت في مرحلة الابتدائي وكانت كورة من خالي وكانت اقصى امانيا في الوقت دا فعلا ، والتانية مش هتكلم عنها حاليا ولا لاحقا حتي كفاية انها جوايا ، دا غير بقي هدايا علي شكل اوتوجراف او بسكويت بوريو ولا واحدة جلاكسي ودي انا مش بحسبها

المرة دي بقي انا عايز هدايا كتير وعلشان الواحد المفروض يجيب لصاحب عيد الميلاد الحاجة اللي بيحبها فتوفيرا للوقت قولت اجيبلكوا انا قايمة باللي تجيبوه ليا وتوفروا وقتكوا

أولا ما اطلبه متواضع للغاية ويمكن حصره

أولا سأكون ممتنا لو كانت الهدية الأولي رصاصة ذهبية تستقر في منتصف المخ تماما ،سأكون سعيدا أيضا وللغاية لو كانت الهدية عبارة عن القليل من سم السيانيد ، ولن امانع إن سار أحدكم علي خطي أجاثا كرستي واختار لي سم الزرنيخ اللذي لا تظهر اثاره بعد الوفاة ، ربما ابتدع أحدكم فكرة جديدة لإنهاء الحياة وربما استخدم أحد ما بعض من الهوا في " سرنجة مضروبة " يضخها في الوريد ، وبالتأكيد سأسعد كثيرا لو نسج أحدهم مني يوم عيد ميلادي قصة كبيرة تتناولها الصحف صبيحة يوم عيد ميلادي ويصيح باعه الصحف اقرا الحادثاااااااااااااااااه ، ويقف عتاوله رجال الشرطة والمخابرات في بلادنا موقف الحياري ويطالبون بتشريح الجثة فتنهار أمي مطالبة أياهم أنت يتوقفوا عن ذلك ويضيع دمي وسط القبائل وكل سنة وبس

عبيط

يظهر انك انت بس اللى عبيط وعامل نفسك فيها ناصح

!!

علشان يشبهلك

أنا

مصطفى

المبدأ الأول للخليقة

المبدأ الأول للخليقة
معجزة " أتوم " الكبري

الحب

ذلك الصمغ الإلهي الذي يجذب كل منكما للأخر بعد أن يكون قد جذب أجزائكم المفتتة إلي بعضها البعض فينصهر ويتوحد كل منكم مع ذاته

يعود كيانا واحدا وإنسانا بكل تعقيدات ماضيه والحاضر والأجزاء التي ما تزال خفية لم تخرج بعد إلي نور الإله

تمتزج تلك الأجزاء ببطء كأنها كتلة شمع بيضاء ناعمة كلما صهرتها حرارة فتيلها أقتربت جزيئاتها من بعضها البعض

نون - سحر الموجي

ساجي

ازيكم

يوم كمان جميل قضيناه امبارح سويا انا وفهمي ومستر ساجي او موصطفي العوليمي علشان هو مش بيحب حد يقوله ساجي دي

المهم بقي انا وفهمي في الاول روحنا وسط البلد ولفينا شوية كتير حلوين كدا روحنا عزمتني انا علي حسابه من جاد بعدين روحنا ماكدونالدز اخدنا اتنين ميلك شيك بالشيكولاته بعدين اتمشينا لحد قصر النيل ونزلنا ع الاوبرا وبعدين ركبنا للعتبه ومنها ركبنا للغورية

وهناك او ما وصلنا لقينا ساجي ورانا علي طول وكان لقاء طويل طويل طويل وممتع ممتع ممتع

دخلنا عرض التنورة ودي المرة السادسة ليا والثالثة لفهمي والاولي لساجي بس النهاردة مكانش العرض الممتع اوي كان كتير ايام احسن من كدا بمراحل بس كان كويس مكانش سيء يعني

خرجنا من عرض التنورة روحنا وسط البلد بس مشي بقي وكان وقت جامد الصراحة وبما ان الواد ساجي منوفي منوفي يعني خليناه يعزمنا علي ميلك شيك ف ماك تاني اصلنا ما ورناش غيره وقضيناها ف وسط البلد شوية وبعدين روحنا علي فلفلة وروحنا جبنا لب علشان مصطفي كان بيكمل دور المنيفة اللى هو فيه وكان لازم يعزمنا علي لب وعصير وكان انه جاب اللب من جنب سينما ميامي وبعدها روحنا علي كورنيش 26 يوليو وقعدنا هناك شوية كنا بنتناقش انا ومصطفي ساجي في شوية حاجات كدا يعني وبعد كدا كل واحد روح علي بيتهم بس فعلا كنت مبسوط باليوم ومبسوط انى قابلت الواد مصطفي لاني من زمان كنت عايز اشوفه ومقدرش انسي الملف الاخضر بتاع مصطفي اللى قضا معانا اليوم كله وتقريبا كان الملف دا جايبة من عند المأذون أو حاجة كدا يعني

بس خلاص