رسيني

اممممممم، مش عارفه ليه فتحت كشكولي النهاردة علشان اكتب عنك ... اكيد مش علشان شوفتك النهاردة ما انا دايما بشوفك يعني مش جديدة، يمكن علشان شوفتك ف المول اللى بنروحه دايما سوا علشان فاضي ومفيهوش ناس كتير ؟، غالبا لأ بردو، أقولك انا ليه ؟ أنا عارفه اه بس مش عايزة اقولك! الحقيقة علشان التي شيرت اللى كنت لابسها النهاردة، التي شيرت الوحيدة اللى قولتلي انك هتشتريها من برا المول ومش من الماركتين اللى مش بتلبس غيرهم، فاكر لما روحنا المحل الصغير اللى علي ناصية الشارع اللى فيه بيتنا؟ الراجل اللى بيطبع الكلام او الصور علي الهدوم دا، فاكر ساعتها اخترنا ايه، قصدي انا اخترت، قولتلي اختار انا اي حاجة وهترضي بيها انت، قولتلك ساعتها حتى لو اخترت كلمة من تلت حروف بس اولها زي اخرها وف النص غمزة ؟ رديت انت عليا بالكلمة نفسها، ضحكنا والراجل بص لينا بصه مش تمام، ساعتها اخترت انا كلمة رسيني، وطلعت من شنطتي صورة مركب مطبوعة ابيض واسود، والراجل ساعتها ابتسم وقالي انت بتفهمي يا بنوته، من ساعتها وانت بتقولي يا بنوته، او من ساعتها ولحد يوم الخميس 12 يوليو 2012، لما قولتلي ان الدنيا الواسعة اوي دي مليانة دومات، الدوامة اللى اخدتنا خلصت وكل واحد شدته دوامة تانية، ساعتها ما بكتش انا، وقولتلك لا يا حبيبي دوامتنا ما خلصتش ولا حاجة، انت بس بتعرف تعوم، ونسيت تعلمني.

فاكر بقية كلامك يومها ؟ اصلي مش فاكراه ولا فاكره اني سمعت حاجة يومها، فاكره بس استغربي طول الطريق لبيتنا وانت بتوصلني، لما قولتلي بمنتهي البرود مش هسيبك تروحي لوحدك، خليني اوصلك لأخر مرة، بس فاكره اوي اخر جملة قولتهالك واخر كلمة قولتهالي، فاكرهم انت؟

قولتلك انا : الدنيا دي كل يوم تخيب ظني وتفوقني علي حاجة جديدة تدهشني، وما بعرفش ما اندهشّ.

رديت انت قولتلي ما تبطليش.

وطلعت انا لحد الدور الخامس بغني ما تبطليش يوم تحلمي، ماما سألتني وهي بتضحك ايه يا بت الضحك والغنا تتحسدي، قولتلها مبسوطة يا ماما بلاش، يا رب دايما يا اختي سمعتها منها قبل ما تقولها.

زي بالظبط ما سمعت كلامك ليله ما قولته وزي ما شوفته ف عينيك قبل ما تقوله، صحيح ! هو انا بكتب دا كله ليه، اه افتكرت، كنت عايزة اقولك انك وحشتني، تصبح علي ورد مش مني :)

28-6-2013