ِشيوخ العصر وعصر الجواري

فى تحديثين للبوست تحت .....
-----------------------------------

واقعه اوردتها جريدة الجمهورية طبعا انا مش بقرا الجمهورية علشان محدش ياخد عني فكرة وحشة ولا حاجة :D
بس بجيبها علشان اختى فى الثانوية العامة

المهم بقي يا سيدي الواقعة بتتكلم عن الشيخ خالد الجندي وواقعه ضربه من احدي السيدات قصاد مبني التليفزيون

المهم فى الخبر سطرين
الاول :
المعروف أن الشيخ تزوج عدة مرات وتفاوت زيجاته بين العرفي والرسمي والمسيار
التاني :
الاعتداء علي الشيخ خالد الجندي ليس الأول من نوعه وانما تعرض لمثله عدد من مشايخ الفضائيات والدعاة الجدد قبل فترة مثل عمر عبدالكافي والشيخ محمد جبريل وآخرين ليس هنا مجال الحديث عنهم أو عن ارتباطاتهم العاطفية وزوجاتهم


يعني الشيخ خالد الجندي تعددت زوجاته بين الرسمي والعرفي والمسيار كأنه بيعود بينا للعصر الجاهلي والجواري ومش هو لوحده لا دا كمان الشيخ عمر عبد الكافي والشيخ محمد جبريل واللى بعد عن التليفزيون والاضواء بعد فضيحته وزواجه العرفي وكمان الشيخ محمد هداية واللى مطلق مراته ومش مخليها تشوف اولادها من 7 سنين بهدله فى المحاكم وهو رافش حقها الشرعي والقانوني بل وكمان طلع ما اسموش هدايه دا بس للشهرة ( الخبر قريته عند هارمليس فى جزء ومضات اللى فى السايد بار عنده وموجود فى المصري اليوم )
حكاية كمان ليست بالخفية
ولكن بيتشدق بيها هواه الدين الشكلي عن ابو اسحاق الحويني ويذكرونها بإجلال وهم بيحكوابنفس الطريقة التاليه والحديث موجه ليا :
عارف كان مرة واحد اتصل بالشيخ الحويني ع الهوا وقاله ازاي يا شيخ بتدعوا لربنا وانت مش متجوز اربعه ( !!!!! ) فما كان من الشيخ بعدها على طول إلا انه اتجوز الرابعه لانه كان متجوز تلاته بس !!!!!!!!!!!!!!!!!
يعني الشيخ اتجوز اربعه علشان يرضي الراجل وبيدعي كمان ان التعدد هو سنه عن الرسول وإن دل الرأي العقيم دا يدل عن جهل الشيوخ هؤلاء بالدين اللى بيتكلموا عنه
ربما تكون علاقه هؤلاء الشيوخ بالنساء هى طريقة كشفهم للناس وكشف تشدقهم بالدين واتخاذه كتجارة بس

خير محمد هداية من المصري اليوم من هنا
خبر خالد الجندي من هنا
والجزء التاني للخبر من هنا


تحديث مهم لكل من اتهمني بسوء نيتي
---------------
الموضوع معمول لنقد ظاهرة انتشرت فى مليون غيرها يستحق النقد بس دا شيء ما يخصنيش انا نقدت دي علشان عايز انقدها اللى شايف ان فى حاجات تاني تستحق النقد اكتر ينقدها عنده انا مش ملزم انقد كل حاجة انا بنقد اللى ما يعجبنيش ويلح عليا انى اكتب عنه
بخصوص الموضوع دا بالذات
انا اللى مضايقني مش انهم غلطوا فكل ابن آدم خطاء لكن المؤسف فى الامر ان دول مش اي حد دول دعاه الاسلام دعاه الدين اللى طول اليوم ع الفضائيات شغالين قال الله وقال الرسول والمفروض انهم قدوة لينا كناس عاديه هما بيعلمونا الدين المفروض انهم يعملوا باللى بيقولوه لكن علي العكس تماما مواقفهم كلها يندي لها الجبين
والدليل على المواقف اللينكات الموجودة اما موقف الشيخ الحويني فدا ذكره ليا واحد سلفي بشده ويعشق ابو اسحاق ويعقوب وحسان وذكره ليا على اساس انها حاجة يفخر بيها مش موقف يحسب ضده الشيخ وهحاول اوصل للفيديو بتاعه

تحديث 2
----------------
فى المصري اليوم اتكتب تبرئه للشيخ خالد الجندي من الاتهام اللى ارودته الجمهورية ولكن لتوضيح وجهه نظري من البوست .......
هدفي من البوست هو الحسرة على حال شيوخ الايام دي ودعاه الاسلام وقد ايه اصبح استهوانهم بالدين وازاي بيدعوا لما لا يفعلون مش مجرد نقد لما حدث لخالد الجندي ...
الناس بتقول انهم يخطأوا لانهم بشر دا صح تماما بس اللى اعرفه انهم فى مراكز دعوية كمثل عليا وهما مش اي حد المفروض دي اول حاجة تاني حاجة ان من يخطئ يعترف بخطأه ولا يتمادى الوقائع اللى فاتت كلها مؤكدة بالنسبة ليا ويمكن فى ادله مش موجودة ع النت منها خبر محمد جبريل اللى من زمان جدا ومعرفتش الاقيه فى مصدر ع النت وكمان فيديو الشيخ ابو اسحاق الحويني لكني واثق من الخبرين تمام الثقة
خالد الجندي بنتقد اراءه من زواج المسيار وتحليله ودا كان هدفي من العنوان ( وعصر الجواري ) لانه بيحلل الزواج دا وخبر الشيخ هداية ومحمد جبريل فالشيخ هداية مثلا سبع سنين زوجته وراه علشان تشوف اولادها وهو رافض لو افترضنا انه اخطأ لما ما خلاهاش تشوف اولادها فاولي بيه انه يستمع لما يدعو هو إليه على شاشات الفضائيات ويرجع إلى صوابه ويعترف بخطأه ويمكنها من رؤية اولادها والشيخ جبريل حكاية زوجته العرفية المنقبة اعتقد اشهر من اني احكيها واولي بيه وهو القارئ الدائم للقرآن فى رمضان حتى تدمع عيناه انه يتقي الله وما يقرأه في زيجته دي اما موقف الشيخ ابو اسحاق الحويني فهو مش خطأ منه هو شايف انه بكدا بيكمل دينه وبيتبع سنه الرسول من الزواج من الرابعه ودا شيء فى نظره يشرفه لكني بنتقد حصر الدين والتدين فى الزواج من رابعه او ثالثة واعتبار ان التعدد سنه عن النبي " ص " وهو امر إن دل فهو يدل عن ضيق رؤية وتفسير زيجات الرسول وكمان اختلاف العصور

دا رأيي المتواضع للغاية واللي انا متمسك بيه للغاية حتى يثبت خطأه ويقنعني احد بان الصواب جانبني

خبر فى المصري اليوم بتبرئه الشيخ خالد الجندي من اتهام السيدة المجهولة من هنا

خالص تحياتي ...
تشي أحمد

Lovely Quotes

دي بعض من الكوتس او الاقتباسات لبعض اشهر الشخصيات اللى انا شخصيا بحبها
:)


" أولاً يتجاهلونك , ثم يسخرون منك , ثم يقاتلونك , ثم تفوز أنت "

المهاتما غاندي

.
.

" إن الضمير لا يحول أبد دون ارتكاب الخطيئة ، ولكنه يمنع من التمتع بها "

ثيودور درايزر

.
.

" ينبغي على الإنسان إما أن يتألم كثيراً أو أن يموت شاباً "

مثل دانيماركي

.

.

" يا بني إذا خدعك أحد فانخدعت له فقد خدعته ! "

معاوية ابن أبي سفيان**

.
.

" في قلبي زهرة .. لايمكن لأحد أن يقطفها "

فيكتور هوجو

.
.

" شكراً للأشواك علمتـني الكثير ... "

طاغور

.
.

" لا أعرف شيئًا ولا أملك شيئًا أجملَ وأغلى من الرَّغبة في المعرفة "

أدونيس

.
.

" اثنان بالمئة من الناس يفكرون، ثلاثة بالمئة من الناس يعتقدون أنهم يفكرون، وخمس وتسعون بالمئة من الناس يفضلون الموت على التفكير "

برنارد شو

.
.

" نحن نبني الكثير من الجدران ، والقليل من الجسور "

اسحاق نيوتن

.
.

" مأساة الحياة هي موت شيء داخل الانسان..وهو حي "

ألبرت شوايتزر

.
.

" الإنسان لا يريد المعرفة التي تعذِّب إرادته ؛ وهو يفضل أن يكون مغفَّلاً سعيدًا على أن يكون ذكيًّا معذَّبًا . "

عبد الله القصيمي

.
.

" كلما ازددت معرفة لبعض الناس, ازددت حبا لكلبي "

جون وليام *

.
.

" إن الذي يرسم الصورة الجميلة لا يشترط أن يكون هو أيضا جميلا "

شوبنهاور *

.
.

من العظماء مَن يشعر المرءُ في حضرتهم بأنه صغير، ولكن العظيم بحقّ، هو الذي يشعر الجميع في حضرته بأنهم " عظماء. "

مكسيم غوركي

.
.

إن كنا ننتقم من الذين يسيئون إلينا فهذا عمل إنساني،
وان كنا لا ننتقم من المسيئين إلينا فهذا عمل فلسفي..
لكن إن كنا نعمل الخير مع الذين يسيئون إلينا فهذا عمل إلهي

أكليمندس الإسكندري

.
.

" أنت لك طريقُك، وَ أنا لي طريقي . أما بالنّسبة للطّريق الصّائب ، الطّريق الصّحيح ، الطّريق الأوحَد .. فلا وُجودَ له "

نيتشه

.
.

" إنّ قوّتك ما هيَ إلاّ مصادفة نشأت مِن ضعفٍ لدَى الآخرين .. "

جوزيف كونراد

.
.

" أن تتوقّع مِن العالم أن يعاملك بعدل لأنّك إنسَان طيّب .. يُشبه نوعًا ما توقّعك ألاّ يهاجمك الثّور لأنّك نبَاتي "

لاندرو *

اضغط على اسم صاحب الكلمات علشان تعرف معلومات عنه
* مفيش صفحة ليه فى ويكيبيديا
** صفحته فى ويكيبيديا مشكوك فى صحتها ومطروحه للنقاش

لسه فى قلبي حد

" أنا لا أحكي الحواديت .. الحواديت هى اللى بتحكيني "

تشي أحمد

* الصورة من على جروب ضربه شمس ع الفيس بوك

اقرأ .. تكون ؟؟ - 2

فى بوست عندي ومن حوالي شهرين بالظبط اتكلمت عن حملة

اقرأ ... تكون

البوست من هنا

الحملة اللى كنت بطالب فيها بتفعيل دور القراءة كصاحبة الدور الاهم فى إثراء الثقافة عندنا كشباب مصري
بحاول نشرها كحل امثل فى نظري للقيام من الكبوة وللتحرك شوية نحو مقدمة الركب اللى بشك اصلا اننا لسه بننتمي ليه

اول الفكرة جاتلي وانا قاعد فى الكلية بقرا فى كتاب ولقيت كل لما اخلص كتاب بينتقل تلقائيا ( وعن طيب خاطر ) من إيدي لإيادي اخري تقري ونظرا لأنى والحمد لله عندي كمية مختلفة من الكتب فتكفلت بتوفير كتب لكل اللى نفسه يقرأ بس كان فى اطار اصدقائي وبس ومعرفتش اخرج بفكرة نشر الكتب من الدايرة دي وعلشان كدا خرجت برا الدايرة دي بفكرة جروب الفيس بووك ولكننا اكتشفنا انه مش هيكون ليه دور غير دور دعائي بس لنشر الفكرة لكننا محتاجيين حاجة اكبر من كدا علشان يكون فى فعلا هدف للفكرة او الحملة ويكون هدف ملموس
فكرنا فى حاجات كتير لقينا ان بعضها تحقيقه مستحيل تقريبا دلوقتى على الاقل فى الاجازة دي


فكرنا فى عمل مكتبة على موقع الفور شيرد متقسمه حسب المجالات المختلفة لكن الفكرة كانت هتبقي متأخرة شوية ومش هتحقق الهدف بردو نظرا لان الفورشيرد ليه داونلود ريت محدد مش مسموح بتدعيه لكل اي بي
وعلشان كدا فكرنا فى موقع نرفع عليه الكتب ولقينا كذا موقع بيدعم التنزيل المباشر وبدأنا فى تنفيذ موقع مجاني ( لان الامر كله تطوعي تماما ) وإن شاء الله هنحاول فى اسرع وقت نخلص الموقع ورفع الكتب بس هنحتاج وقت علشان نطلع حاجة راضيين عنها فى المقام الاول لأننا وانا اول واحد ما بحبش حاجة تطلع من تحت إيدي ناقصه ابدا وبدقق فى اقل التفاصيل

فى تفاصيل كتير مش وقت الكلام عنها بس يا ريت لو حد عنده قدره ع المساعدة فى اي حاجة يا ريت يقولي ويا ريت بردو لو حد عنده افكار بس مجرد افكار يقولهالنا

خالص وارق تحياتي
تشي أحمد

طعم البيوت

جاى من بلاد البعيدة لا زاد ولا ميه
وغريتى صحبتى بتحوم حواليا
وانتي تقوليلى بحبك تحبى ايه فيا
وده حب ايه ده اللى من غير اى حريه

بأغنية ولا أروع بيبتدي الملك شريط ولا أروع بجد الشريط كله رائع بموسيقته وكلماته وتوزيعاته واكيد صوت الملك اللى توج الشريط
يونس بجد اغنية رائعه وبالذات افتتاحيتها

بعد كدا اغنية مش محتاج اتوب وبجد زى ما قال الملك الحب عمره ما كان خطيئة او غلطة

مش محتاج اتوب حبك مش ذنوب
ولا عشقك خطية خطية
انا محتاج ادوب قلب وروح وتوب
يااجمل حاجة فيا

محتاج للصلاة على الهدية بتاعه ربنا الحب والحبيب هديه مش ابدا خطيئه

وبعدين اغنية بجد عجبتني وعيشتها بالكامل

من غير كسوف
ايوه انا مليت من كتر ما استنيت
وتعبت لما داريت احساسى بعنيكى

طعم البيوت وحاله فكرتني بمساكن شعبيه مع الفارق طبعا ولكنها جامدة جدا

اللمة لما تحلى في ساعة العصاري
تفتح مزاد عالحب تلقي الف شاري
شاهد بيشهد م البداية للنهاية
وكل ركن في قلبه يحكيلك حكاية وكفاية لما تلاقيه
فاتح دراعه بيناديك
ويقول تعالا في حضني ده انت واحشني موت

معاكي بجد صوت منير فى الاغنية دي بالذات حسيته مختلف والأغنية رتمها بردو مختلف وكلماتها رائعه

معاكى بضحك بصوت عالى
ومش خايف وانا عارف
قلبك من الحزن مش خالى
بيفرحنى صوتك الهامس
اسرح لما نتهامس
فى صوتنا لما يتلامس
ويسرقنى نغم هامس
ويحلالى

اغنية لزاماً وصعوبة لحظة الفراق

لو كان لزاما علينا الرحيل
كارهك ياوداع ولا بديل
والمستحيل انى امسح دمعة
مستحيل اخبى لوعتي مستحيل

تحت الياسمينة واغنية تعبر عن الوحدة خير تعبير واحدة وبكاء وحنين وشجر الياسمين بيصعب عليه حاله دي تاني اغنية بحبها فى الشريط

تحت الياسمينه فى الليل
نسمة والورد محازينى
الاغصان عليا تميل
تمسحلي فى دمعة عينى

فى اغنية كمان بحبها بس هى قديمة اصلا وتوزيعها بس اللى جديد وهى أغنية سؤال وانا اصلا بحبها من زمان
دي اكتر اغاني عجبتني فى الشريط والشريط اصلا عمل لي حالة من البهجه ونساني حاجات كتير

اخيييرا نزل الشريط
وشكرا يا ملك

أسف

أنا أسف لكل حد زعلته فى اي حاجة
يمكن فى حاجات كتير مش واخد بالي منها
يمكن فى حاجات كتير غلط بتحصل بعديها
يمكن فى حاجات حلوة ومش بشوفها

فى ناس كتير بتشرف بمجرد وجودها فى حياتي
وناس كتير بتمني مكنتش عرفتها

متأكد تماما دلوقتى انى مش محتاج لحد لا اللي يشرفني ولا اللى ما يشرفنيش
بقت الحياة كلها عبث وكلام فاضي ومش مستاهله حتى واحد يبصلها

عايز ابعد عن كل حد اعرفه
اقفل البلوج والميل واغير نمرة الموبايل واروح حته بعيدة محدش يعرفني فيها

امتحانات

واحدة من الجمل اللى انا مؤمن بيها جدا ومع ذلك بخرقها دايما بغباء ازلي وبثقة كبيرة فى ناس يمكن ما تستحقش الثقة

" لا تلم غيرك على إفشاء سرك إذا لم تستطع انت كتمه "

يمكن فعلا ثقتي كانت فى غير محلها

او يمكن ما بقاش حد بيعرف يشيل اسرار

اكتشفت اخيرا ان فترة الامتحانات خير ما يكشف الصديق اللى بجد عن الصديق الـ أي كلام

وللأسف ملقتش حد بجد وكله أي كلام ( كله بدون استثناء )

مش معني كدا عدم وجود صداقه لكنها موجودة وانا اللى مش لاقيها او موجودة وانا بضيعها
ايهما او كلاهما
* سوري ع البوستس الاخيرة الرخمة دي بس هى اصلا فترة امتحانات ومحدش بيعدي وانا ما بحبش اشيل فى نفسي

فأكبر من جمالك كبريائي

ردا على بوست عمر ولحاجة فى نفس يعقوب مش مهم هتقضي ولا لأ

بوست عمر من هنا الاول

ساعات المسامحة بتتفسر على إنها ضعف فى الشخصية
قد ايه كنت دايما بسامح
لكن لما يكون مطلوب منك انك تسامح حد جرحك اوي وبتحبه اوي واعتبر مسامحتك ليه قبل كدا ضعف فى شخصيتك يبقي ايه
بتبقي واقف فى منطقة وسط على يمينك مسامحة وعلى شمالك حنق بالغ وغصه واقفه فى الزور مش راضيه تعدي

بتبقي عايز تسامح بس يمر قدامك شريط ذكريات تقعد تفكر هو فعلا هقدر اسامح

عايز اسامح اوي بس كل لما اقول هسامح تيجي حاجة تخليني اقول ليه دا كله
انا عمري ابدا ما عرفتكيش كدا
خليني اسامحك


على فكرة صحيح :
لقد أخطأتى حين ظننتى أني
أبيع رجولتي وأذل نفسي

كان غباء تفسير حبي على انه ضعف مني

فما أنا عبد سيدة وكأس

تقولين الهوي شيء جميل
ألم تقرأ قديما شعر قيس
أ جئت الآن تصطنعين حبا
ذبحتي به الفؤاد ولم تحسي
*****
تقولين الهوي شيء جميل
ألم تقرأ قديما شعر قيس
أ جئت الآن تصطنعين حبا
ذبحتي به الفؤاد ولم تحسي
*****
أ قاسيه المشاعر غادريني
أ قاسيه المشاعر غادريني
***
فما أنا عبد سيدة وكأس
فما أنا عبد سيدة وكأس
*****
لقد أخطأت حين ظننتى أني
أبيع رجولتي وأذل نفسي
***
لقد أخطأت حين ظننتى أني
أبيع رجولتي وأذل نفسي
***
فأكبر من جمالك كبريائي
واعنف من لظي شفتيك فأسي
***
لا فما أنا عبد سيدة وكأس
لا فما أنا عبد سيدة وكأس
*****
أ قاسيه الوصال إلىّ ردي
أ قاسيه الوصال إلىّ ردي
لهيب عواطفي وجحيم حسي
لهيب عواطفي وجحيم حسي
***
أ قاسيه الوصال إلىّ ردي
أ قاسيه الوصال إلىّ ردي
لهيب عواطفي وجحيم حسي
لهيب عواطفي وجحيم حسي
*****
لقد دمرت أيامي وعمري
فجف ت دمعتي وأنبح همسي
*****
اعيديني إلى أصلي جميلا
*****
فمهما كنتى
فمهما كنتي
فمهما كنتي
***
أجمل منكِ نفسي
*****
لا فما أنا عبد سيدة وكأس
لا لا فما أنا عبد سيدة وكأس

تقولين ....

الأول

النهاردة امتحان يقال عليه احصا
انا داخل عامل حسابي على كدا
قوم ايه بقي افاجأ اننا بنمتحن تاريخ
او مش تاريخ هو حاجة كدا مش عارفلها دي ايه

اوعي تفتكروا ان دي سخرية لا والله دا بجد

اقسم بالله الدفعة النهاردة كاملة جالها حالة ذهول

دفعة كاملة البنات بتعيط والصبيان عملوا دماغ م الامتحان

وصلت لدرجة انى خلاص طالع بفكر ايه اخر اللي بيحصلنا دا

وصلت لدرجة انى لو اخدت الجنسية الاسرائيلية احسن كتير

انا مش هعمل كدا طبعا بس فكرت فى كدا

ايه يعني اخرتها لا تعليم ولا حرية ولا اي حاجة فى الدنيا ولا اللى بيحب مجال بيبقي فيه ولا اي حاجة

المهم عدي امتحان ومحدش حط فيه قلم

فى اللينك دا انطباعات بعض طلبة دفعتنا عن الامتحان
http://www.fci4all.com/forums/index.php?act=findpost&pid=47109

zzzzzzzzz

ززززززززززززززززززززززززززززززززززززززززززززززززززززززززززززز

لو كانت الزقازيق هى الجنة لتركتها بسبب الناموس

مخنوق م المذاكرة والناموس والامتحانات والقرف والكلام الفاضي اللى بناخده

الحب حرية

المرة دي فى حاجة واقفة ف زوري وعايز اتكلم عنها

انا هتكلم من وجهه نظري الشخصية جدا علشان ناس كتير اتكلمت فى الموضوع دا قبلي

الحكاية وما فيها حكاية الجواز واجبار الاهل البنت انها تتجوز اي حد ما دام بينام كل يوم على كوم فلوس وشقه ع النيل وشغال شغلانة زى الفل هو ولا بيفهم فيها حاجة بس معاه واسطة قد الدنيا وخاله العقيد الفلانى وعمه اللوا العلانى وشيل يا ابني الليلة دا انت لقطة والله والواحد يخلص من الهم اللى على قلبه دا اللى اسمه بنته مجازا


بضايق من الشخصية اللى بالمنظر دا ومش بحترمها مش بحترم اي اب يبيع بنته لمجرد عريس جاهز بدون ما يلتفت إليها مش بحترم اى انسان بيحجر الحب وبيعتبره " قله أدب ونقص دين " مش بحترم اللى مستني بنته تقول ووشها ف الارض " موافقه يا بابا " لمجرد انه موافق

صديقي العزيز احمد فهمي بيقولي يا ابني امال عايز ايه ما هو لازم كل اب خايف على بنته وبيتمنالها حد ما تتبهدلش معاه ولا تتعب وردي المعروف بس دا بيبعيها وهى يمكن تكون ما بتحبوش يرد هو تاني ما كل ابهات مصر كدا
يااااااااااا سلام وانا علشان كلهم كدا يبقي دي حاجة حلوة الرسول عليه افضل تسليم قال " وإن تتبع أكثر من فى الارض يضلوك " وقال كمان " لا تكن إمعه .... " يعني مش علشان الناس كلها كدا يبقي دا الصح ومش علشان الناس كلها كدا انا كمان اكون كدا

صديقي العزيز الاخر احمد عبد الوهاب قالي ان الاسلام وسيدنا محمد بيطالبونا اننا نزوج البنت لمن احبت فى واقعه ايام رسول الله ( أنا مش عارف الواقعة بالظبط لكن احمد حكهالي واكيد لو فيها حاجة مش مظبوط هيقولها فى التعليقات وهصلحها ودا معناها) الواقعة بتقول ان اهل فتاه راحوا لرسول الله وقالوا انهم اختاروا لبنتهم رجل علشان تتزوجه لكنها كانت بتحب شخص اخر وكان رد رسول الله زوجوها لمن احبت ( أو كما قال عليه الصلاة والسلام )

رسول الله إذا طالب بزواج البنت لمن تحب ( طبعا لما يكون انسان محترم مش لمن تحب اى واحد والسلام )

أنا متأكد تماما ان مهما الأهل قفلوا على بناتهم مش هيقدروا يحكموهم وهيحبوا من وراهم يبقا لزمتها ايه بقي ما نكون اصحاب ولما بنت او ولد يحب اهله يعرفوا وينصحوه ويكونوا دايما معاه بيقولوله دا الصح ودا الغلط واعمل كذا وما تعملش كذا ليه الحب عندنا هو الخطيئة ليه دايما الحب عندنا ممنوع الاقتراب او التصوير او التخيل او الحلم بيه ليه دايما الاهل بيحطوا حواليه ملاااااين الاسلاك الشائكة وهو اسمى المشاعر الانسانية وليه رغم كل اللى الأهل بيعملوه بردو الولاد او البنات بيحبوا بعيد عن الاهل وبيخبوا عن اهلهم وبيفضلوا دايما خايفين على حبهم لما يظهر للنور ليه دايما الاهل لينا زى " البعبع " اللى دايما خايفين نحكيلهم ليه كل اب مش صديق بنته بيثق فيها وبتثق فيه وبيضمها لما تحب ويقولها والله وكبرتي وبقيتي عروسة ويتعرف ع اللى هى حبته ويبقي الحب دا شجرة جميلة ونضيفة هو بيرعاها بنفسه دل ما تطلع الشجرة دي بينهم هما الاتنين مش لاقيه حد يرعاها ويخاف عليها

منكرش ان اغلب ناس مصر بيفكروا بالطريقة الجاهليه دي يمكن يكون اهلي انا كدا ( ويمكن لا لسه مش عارف ) وناس كتير اوي اوي كدا وحواليا وحوالين كل حد بيقرا ومش بعيد حد يكون شايف ان دا الحل الامثل فى الجواز وان جواز الحب دا قلة ادب وقله حيا وكفر وخروج عن الملة كمان
لكن مهما عمل الاهل او اي حد مش هيمنعوا الحب بين البشر

عايز نظرة كدا لواحدة بتحب واحد واهلها خلوها تتجوز غيره بالذمة هتحب " الشخص التاني اللى المفروض جوزها " هتبقي باصه فى عنيه وشايفها حبيبها اللى " اتسرق منها " دا عدل وهيرضيكوا هل هيرضيكوا انها تبقي نايمة فى السرير بتحلم بحبيبها وجوزها جنبها هل هيرضيكوا انها تعمل حاجة من اتنين :-
الأول تبقي اله تفريخ .. تولد وتربي وتعمل الاكل وتكنس وتعسل ومنزوعة المشاعر والاحاسيس إلا مشاعر محرمة لحبيبها المفقود ودمتم
التاني .. انها تكره العيشة مع حد ما بتبادلوش اي مشاعر وترجعلكوا مطلقة بعدها

رجوع تاني لأحمد فهمي لما بقوله يا ابني انا لو مكان اي اب لكنت شجعت بنتى ع الحب وكنت صاحبها وصديقها لأني عارف ان من غيري هتحب وهتتحب يبقي ليه بقي العناد والمكابرة فهمي قالى وانا كمان ساعتها

يا كل اهل فى كل حته لا هتمنعوا الحب ولا اللى بيحبوا خلوكوا اصحابنا علشان تكسبونا ونكون بيكوا احلي ولربنا اقرب وما تسيبوناش نكرهكوا ونكره التصريح ليكوا بحاجة ايا كانت

منير بيقول

دا الحب حرية .. الحب حرية
والقلب لو يتقتل ابدا ملوش دية

الحب حرية عايزنها حرية بإرادتكوا اوكي مش عايزين هنخليها حرية ومن وراكوا والاختيار ليكوا
القلوب مش هتتقتل ولو قتلتوها علشان شايف مصلحة فى كدا هتترد سهامكوا ليها بكل قوة وغضب ووحشية
اي اهل هيمنعوا بنتهم او ابنهم من اللى بيحوه هيعيش طول عمره ( او عمرها ) يكرهوا اهلهم

يارب كل اهل يحضنوا كل قصه حب طاهرة بين اتنين علشان ما نلاقيش بعد كدا اطفال معقدين نفسيا او بيوت مفيهاش نفحة حب وكل حوار بين الام والاب عن الفلوس والمصروف والدروس الخصوصية والولد عايز يروح للدكتور والفلوس قليلة وخناقة اخر كل يوم
( او على رأي سحر الموجي ... تحتل سخمت البيت وتعيث فيه فساد )

خلص كلامي

**********
تحديث
بوست طلب منى احمد عبد الوهاب انى احط لينكه وهو عن شروط الحب فى الاسلام بدل ما يكتبها تاني فى كومنت
من هنا

أرق تحياتي
تشي أحمد

We're Back

أنا رجعت تاني

فترة غياب صغيرة جدا

شكر كبييييييييييييييييييييييييييييييييييييييير

-------------------------

لمصطفي العليمي بجد كنت محتاج اتكلم معاك من زمان ومقدر انك اخدت من وقتك الثمين جداااااااااااااااااااا ساعة علشانى وبجد كانت بفايدة كبيرة اوي اوي اوى ، بحبك

*****

لهند كمان لانها كانت اكتر حد وقف جنبي ف الفترة اللي فاتت بجد وعملت فرق كبييييييييييييييييييييييير اوي ومعرفش كنت هعمل ايه من غيرها " ومصطفي " ربنا يخليكي ودايما تكوني احسن

*****

لساره لانها بردو وقفت معايا كتير وكانت دافع فى اوقات كتير ، شكرا كتييييييييييييييييييير اوي ساره

*****

سالى ومحمود سعودي الاتنين بردو شكرا كتييييييييييييييييييييييييييير اوي وعملتوا فرق كبير معايا

*****

ناس تانية كمان بردو ليهم كل شكر نيرة واية شكرا كتير

*****

كل اصحابي اللى حواليا واللى كانوا بيطلعوا منى ضحكة من جوا اوي مكنتش بعرف اوصلها وبينسوني ولو مؤقتا كل الحاجات اللى مضايقاتي

*****

شكرا كتييييييييييييييييييييييير ليكوا كلكوا وبجد مبسوط اوى انى حواليا ناس اكتشفت انها فعلا بتحبني كدا

*****

الفترة الجاية امتحاناتي والدنيا معايا بايظة اوى وما فتحتش كتاب ومخنوق م المذاكرة كليا ومش طايق ابص فى ورق ولا اي حاجة خالص

**********

*****

معايا ومع كل المطحونين فى النظام التعليمي المتخربأ دا ربنا

سلاماتي

تشي

Bfffff

والله دا بجد حقيقة لسه حالا عامل الاختبار ودي النتيجة

98%How Addicted to Blogging Are You?

الرأي الأخر

فى رد على الموضوع بتاع الجروب اللى ع الفيس بووك واللى كنت عملته قبل كدا جالي رد من عصام وفيه شوية اسئلة واستفسارات ولان التعليق كان كبير حبيت افتحله موضوع لوحده وعلشان اجاوب باستفاضه على الاسئلة ....

دا رد عصام

::: D ξ S ї g ή є я ::: said...

اسمحلي اخي العزيز أرد عليك ...

اول شيء ماهو تحديد الهدف من الموضوع اللي حضرتك نزلته :

1- عايز تقول انك غير عن الناس ؟
وده حقك .

2- عايز تقول للناس ممكن تفوقو من النوم بتاعكو ؟!
ودي حاجه حلوه ان فيه حد صاحي على الأقل !!!

لكن عندي تعليق صغير اشمعنى الجروب ده هوا للي حرق دمك !! مافيه حاجات كتير احنا بنعمله على نفس الشكل !!!
وبنفس الطريقه !!!
تسمح لي اجاوب عنك زي ما جاوبت عن اللي عمل الجروب برضو ( ده اسمه ارهاب فكري )

ماهو ارهااااب الفكري ؟؟
هوا انك تخلي الناس تسوي الحاجه اللي انت عايزها من غير ما تقول لهم اعملو كده بشكل مباشر !!
ازاي ..بص يا باشا
انت دلوقت قاعد في النص مع ناس روشه واخر جمال بيتكلمو عن الدين وعن نصرة النبي عليه السلاة والسلام
هما مش كويسين اوي في الصلاه بس اهم قاعدين بيتكلمو في حاجه ممكن تشفع لهم
تقوم حضرتك داخل عليهم في النص وتقلو لهم ايه رأيكم نروح نسمع حاجه مزيكاتي ونعمر الجو ونزبط لنا مزه حلوه الكل هيسكت احنا كنا في صلاه ودين وانت صاحب مزاج بقى !!
تقوم حضرتك تعمل تصويت علشان تظهر انك مش لوحدك اوي واننا كلنا وحشين ومحدش احسن من التاني ...
اللي عايز يروح المسجد يروح احنا كلنا رايحين على الكفتيريا..
طبعا علشان تخلي اللي عايز يروخح المسجد وتظهره بمظهر انه انسان ناقص لازم تقول الكلمه بطريقه بايخه شويه وترمي بوشك شمال شويه ولما تقول كلمة الكفتريا ارفع صوتك ولعلع علشان يتزبط الجو !!!


ده الارهاب الفكري !! الجروب اللي حضرتك زعلان منه انا شايف انه مالوش داعي يبقى جروب على الفيس بس الكلام اللي في الجروب مافيهوش اي عيب ولا اي حاجه يا باشا علشان تنزل حضرتك موضوع ( ولا تعليق ) علشان تقول الجروب سخيف !!!!

طب يا باشا مافيه قنوات أسخف وأسخف !!!

مافيه استفتاءات هااايفه عن فنانين وممثلات وعالم بنت ستين جزمه اكلونا واكلو ام البلد ...
ولا هيا مجرد نفخ كلام وخلاص ؟؟؟
ولا هيا شويه برطشه كلام والسلام
اتمنى ما تحددش تاني في حديثك وتكون شخص واعي بأصول الحضاره
ويا سيدي انا عايزك تتكلم براحتك وتفتح قلبك ..
بس رتب أفكارك واعرف انت عايز تتكلم عن ايه بالزبط !!
هل انت عايز تتكلم عن الجروب ولا عن الارهاب الفكري اللي بنعيشه كل يوم ولا عن الضغط النفسي اللي بتلاقيه في كل حته ولا عن الناس اللي بتشارك في جروب زي ده ولا عن موضوع الاستفتاءات حقيقي ولا بس مجرد فلم هندي !!!
ويا معلم ( معلش احنا بنتكلم )


باي

May 6, 2008 10:23 AM

اول حاجة تحديد الهدف من موضوعي
مش لازم يكون فى هدف ما غير انى لقيت حاجة مش عجبانى وعلقت عليها بطرقتي وفى البلوج بتاعي
لكن خلينا نقول انى غير الناس دي ودي فعلا حقيقة وانا مش لوحدي غيرهم ولو انا مش مختلف عنهم مكنتش نزلت البوست اللى فات وانى بقول اصحوا دا برضه صحيح لكني مش هقول للناس كلها اصحوا فـ ع الاقل الناس اللى بتيجي عندي بلفت نظرها لحاجة زى كدا لفتت نظري انا كمان واختلفت معاها يمكن اكون غلطان او حاجة ....

حاجة كمان والله الجروب ما حرقش دمي اصلا لانى مش هحرق دمي على حاجة هايفة ومش مجرد إبداء رأيي يعتبر ان دمي اتحرق وكمان مش الجروب دا لوحده والله اللى مضايقني لا دا في كتير وكنت بجمعهم علشان اعمل موضوع عنهم بس مش للبلوج هنا لحته تانية لما اخلص الموضوع إن شاء الله ابقي اتكلم عنها

جاوبت عني ... ماشي ولا يهمك
انا بقي كدا بعمل ارهاب فكري
ماشي اوكي
انت شبهتني فى كلامك بالشخص اللى مش عايز الناس تروح للدين ويروحوا الكافتيريا او فى الموضوع بتاعنا انا مش عايز الناس تنصر الاسلام !!!!!! بس على الاطلاق الكلام دا غلط تماما
انا قلت ما نمشيش ورا حد واحنا مش فاهميين الكلام قولت ما ينفعش نبقي زي الاغنام منقادين بدون وعي منا .... ايه الفرق بين واحد بيفهم وواحد بيمشي ورا الهوجة وخلاص
الفرق ان فى واحد شاف الناس بتعمل حاجة ما عملش زيهم وخلاص لا قال اما اشوف الكلام دا صح ولا غلط لقي حاجات صح وحاجات غلط عمل الصح وساب الغلط مفيهاش حاجة دي
انا ما قولتش ما نروحش نعمل التصويت بس لما نروح يبقي فاهميين رايحيين نعمل ايه
قولت كمان ما اقولش ياللا نروح نصوت بكذا وكذا وكذا بدون وعي منا والمفروض محدش يقول امشوا ورايا فى كدا
المفروض لو حد عايز الناس تروح تصوت يقول فى استفتاء فرنسي من عشر اسئلة السؤال الاول معناه كذا وإجاباته الاولي معناها كذا والتانية كذا والتالتة كذا والناس تروح تختار كل واحد واللى يناسبه مش يقول روحوا اعملوا زى ما انا بقول وبس

حضرتك شايف ان الكلام مفيهوش اي عيب ..... بس انا وعلى العكس تماما شايف عيوب كتيره فى الكلام ومش فى الكلام وبس لا وفى اللي مصدقين على الكلام دا واللى قاربوا 31 ألف ونص عضو

عيوب الكلام ان شخص واحد بس بيطلب من الناس انها تعمل اللى هو عاوزه وبس والناس مشيت وراه بدون تفكير
عيوب الكلام ان الشخص دا اصلا مش عارف الهدف الحقيقي من الجروب واللى انا وضحته فى البوست اللى فات
عيوب الجروب كله اننا بقينا بنجري نعمل اي حاجة بمجرد ذكر اسم الدين بدون تفكير وكأن ديننا بيأمرنا بإلغاء العقل

الجروب سخيف ... انا ما قولتش كدا لكن اديني بقول انه جروب تافهه لان اللى عامله مش عارف اصلا هو بيتكلم عن ايه ولا عارف الهدف من الحاجة اللي بيتكلم عنها بالذمة فى بعد كدا تفاهه ؟!!؟

نيجي لحته فى قنوات اسخف وفى استفتاءات ألعن
وانا مالي بدا كله ؟؟؟ أنا شوفت حاجة ما عجبتنيش قولت رأيي فيها
بتفكرني بالعادة الدايمة بتاعتنا
اقول احمد وحش تقولي ما محمد كمان وحش
يا عم ايه جاب محمد دلوقتى
بقول احمد وحش قولي اه وحش او قول لا حلو وملهاش لازمة سيرة محمد خالص
اعتقد كلامي واضح

وبعدين اي بلد اللى حضرتك بتتكلم عنها
حضرتك فى البروفايل بتاعك وفى الفيس بوك من السعودية
إذا كنت بتتكلم عن السعودية فدا حقك لانها بلدك وانا الصراحة معرفش ظروفها ولا احوالها بالظبط علشان اتكلم عنها
اما إذا كنت تقصد مصر فدا مش من حقك لانها مش بلدك ( دا حسب كلامك انت فى البروفايل بتاعك ) وكمان الفنانين والعالم اللى حضرتك قولت عليهم ( ولاد ستين جزمة ) واخد بالك حضرتك جمعتهم كلهم ويمكن فيهم اللى احسن مني ومنك وحتى لو مفيش هما كلهم وامهاتهم هيقتصوا منك يوم القيامة لأنك غلطت فيهم وشبهتهم بالجزم مع إن ربنا خلقهم بني ادمين وربنا قال ( ولقد كرمنا بني أدم ) تيجي انت يا بني ادم تهين بني ادم زيك وتشبهه بالجزمة !!!!؟ ( بقف ع الواحدة انا صح ... عادي يعني مفيهاش حاجة كلامك وانت مسئول عنه )
نرجع للموضوع تاني العالم دول اللي هما الفنانين والفنانات اكلوا اي بلد بقي من وجهه نظر حضرتك و ( اكلونا ) المفروض مقصود بيها مين بردو .... عموما مش دي مربط الفرس انا بس كنت احب يبقي كلامك اوضح وبطريقة احسن شوية

وهى مش مجرد نفخ كلام وخلاص ولا ( برطشة ) لكنه كلام مقتنع بيه كله حرفيا ومقتنع انه رأي يستحق
وحتى لو هو نفخ كلام و ( برشطة ) بلوجي وبكتب عليه اللى انا عايزة ودي حريتي الشخصية اكتب اللى انا عايزة زى ما حريتك تكتب اللى انت عايزة

ومش عارف تقصد ايه بـ " اتمني ما تحددش تاني فى حديثك وتكون شخص واعي بأصول الحضاره " الصراحة انا صحكت فى الحته دي ومش عارف معناها كويس ( مش بتريق والله بس دا اللى حصل ) يعني ايه واعي بأصول الحضارة ؟؟؟؟

وبعدين بتطلب مني ارتب افكاري واتكلم عن حاجة محدد
انا اتكلمت عن الجروب وبس لا جيت اتكلمت عن ارهاب فكرى ولا حاجة اتكلمت عن الجروب والكلام اللى عليه وبردو حتى لو فيلم هندي ( مش بحب الافلام الهندي على فكرة ) فدا من حقي ع البلوج بتاعي اعمل الافلام اللى انا عايزاها

اسف لو كلامي فى نبرة شديدة شوية لكنها رد ع نفس نبرة كلامك الموجهه ليا
وعموما اتكلم براحتك فلكل زائر لدينا له حق الرد :D

تحياتي
تشي أحمد

البراء أشرف - أنت الشاهد

فيلم البراء اشرف اللى اتعرض ع الجزيرة بعنوان " المدونون الصحفييون الجدد "

من هنا لو عايز تنزله على الجهاز

الفيلم هينزل بامتداد flv
ومش هشتغل بالميديا بلاير العادي
ودا برنامج بيشغله ويشغل كل الميديا والامتدادات التانية وانا شخصيا يفضله فى التعامل مع الميديا
والبرنامج من هنا
The KMP Media Player


ومن هنا على يوتيوب

الفيلم جامد جدا ويستحق المشاهدة فعلا وكمان الفيلم هيجرح اوي فيه لقطات فيديو لبلوجرز انا اول مرة الحقيقة اشوفها رغم انها يمكن كانت متوفرة قبل كدا لكنها كلها كدا متجمعه هتخلي الواحد يحس بالاشفاق والخوف على مصر اكتر ما هو خايف

تحياتي
تشي

ملعون ابو الغباء

-*فى تحديث فى اخر البوست*-

انا نفسي اعرف كمية الغباء والانقيادية فينا كعرب هيفضل لحد امتى
جروب مخصوص ع الفيس بوك معمول مخصوص علشان التصويت للإسلام فى استفتاء عامله قال التلفزيون الفرنسي قال ولو قطعنا بانه فعلا صحيح مش اشتغاله لكن الالعن بقي فى الكلام اللى عالجروب انا اعرف اني اقول لحد روح جاوب على استفتاء مش روح جاوب على استفتاء باللى اقولك عليه دا

وعلشان تظهر الصورة دا الكلام اللى فى الجروب

التلفزيون الفرنسي يصوت عن أهم دين في العالم..

والإسلام حتى الان ولله الحمد في المقدمة..

فشدوا همتكم ليبقى داااااااائماً وأبداً في المقدمة..

التصويت في هذا الرابط

http://www.arte.tv/fr/934300.htm

طريقة التصويت هي :

في السؤال الأول الاختيار الخامس

Musulmane

أما بقية الأسئلة اختر الجواب الأول ما عدا السؤال قبل الأخير اختر الجواب الثاني
Une regle de vie
والسؤال الأخير اختر الإجابة التي تناسب عمرك.

أتمنى من الجميع التصويت ..
صوت لن تخسر شيئاهي 10 ثوان من وقتك ..


شرح الأسئلة :

السؤال الأول :

أي الأديان الأقرب والذي ترتاح له نفسك؟
De quelle religion vous sentez-vous le plus proche ?
الجواب: الإسلام Musulmane

السؤال الثاني:

هل أنت مؤمن Etes-vous croyant?
الجواب: نعم Oui

السؤال الثالث:

هل تحضر مكان العبادة ( هل تذهب للمسجد مثلاً) Fréquentez-vous un lieu de culte?
الجواب: بانتظام Regulièrement

السؤال الرابع:

هل تمارس العبادة؟ Pratiquez-vous la prière?
الجواب: بانتظام. Regulièrement

السؤال الخامس:

هل يجب على المسئولين الدينيين أن يناقشوا موضوعات حديث السّاعة ؟
Les autorités religieuses doivent-elles prendre position sur les thèmes d'actualité ?
الجواب: نعم على الكل Oui sur tous

السؤال السادس:

هل تعتقد أن الدين يجيب على حاجيات الفرد؟
Pensez-vous que la religion répond aux attentes de l'individu?
الإجابة: نعم. Oui

السؤال السابع:

الدين بالنسبة لك: La religion est-elle pour vous :
الجواب: قاعدة حياة Une règle de vie

السؤال الثامن:

في أي فئة تصنف عمرك؟ -- ؟Dans quelle tranche d'age vous situez-vous ?
الجواب: تحت 20 سنة
بين 20- 35 سنة
بين 35 - 55 سنة
اكبر من 55

ثم اضغط على voter للتصويت

وسوف تري نتيجة التصويت بشاشة اخري حال ضغطك على التصويت

وابشروا بالخير الاسلام هو الاعلى نسبة والحمد لله

انا بقي وفى الكلام دا كله نفسي اعرف معناه ايه انى اروح اقول لواحد فى استفتاء روح اختار كذا وكذا وكذا ليه هو حمار ما بيفهمش يعني
ما يمكن انا مش بروح اصلي بانتظام فى الجامع ولا مش بمارس العبادة بانتظام لازم يعني اجاوب على الاسئلة بنفس الكلام اللى هما قاليلين عليه ولا ايه

بس فى ديمقراطية سابوا كل واحد يجاوب اخر سؤال على مزاجه ( لا والنبي ) (غطيني وصوتي يا بهيييييييييييييييه ) هو المفروض نكون كلنا نفس الحاجة ونفس الاجابات يعني ولا ايه
دا الرسول عليه افضل التسليم قال فيما معناه " لا تكن إمعه إذا احسن الناس احسنوا وإذا اساؤوا اسئت " يعني مش علشان الناس بتعمل انا كمان اعمل بدون اقتناع قالوا السؤال الاول اختار اول حاجة يبقي اختارها وانا زى الحمار " ولا مؤاخذة " كأن ربنا خلقنا بدون عقول

المصيبة الاكبر بقي ان التصويت مش لاكتر دين فى العالم التصويت علشان يشوفوا التزام الناس بالدين وتعاملهم معاه فى المراحل السنية المختلفه ورأيهم حول علاقة الدين بالحياة العامة وكدا مش بيشوفوا اكتر دين انتشار فى العالم " يا اغبيا " لكن الفهم السطحي سمه مميزة لينا على الدوام وبقينا " بنهيص " فى اى حاجة والسلام

حاجة كمان بقي تغيظ عدد الناس اللى ف الجروب 31 ألف وكسر يعني فى اكتر من 31 ماشيين والسلام ورا كلام وخلاص ما فكروش يشغلوا عقلهم ويقولوا صح ولا غلط ..... لنا الله
* صحيح : كان المفروض يتحط بدل كلمة العرب المسلمين لكن من الخطأ لصق الاسلام بالمسلمين دلوقتى لأنهم ما يعبروش عنه بحال من الاحوال ( طبعا إلا من رحم ربي وهم قله قليلة جدا جدا جدا جدا جدا )

دا لينك الجروب لو حد عايز يلقي نظرة
http://www.facebook.com/group.php?gid=6117092052

* تحديث ( 1 )

إضافة للمتميز دوما صديقي العزيز احمد عبد الوهاب
HaMaDa 3aFshA said...

احمد باشا وملاحظاته الجميلة
بس اسمحلى برده التمسلهم العذر يمكن مش فاهمين كويس وبعدين الحب اعمى وكلنا محبين للرسول "ص"وكله كان عاوز يقدم اى حاجة يقدر عليها
بس هما غلطوا فى حاجة هو احنا كلنا لما نقول ايوة احنا فعلا ملتزمين مية مية يعنى طريقة معيشتنا ونظام حياتنا هو ده الاسلام وهى دى تعاليمه احنا لو قلنا اننا فى التمام وبنفذ بالحرف وبصوا لاخلاقنا ونظام حياتنا اللى زى الزفت الا من رحم ربى هنودى الاسلام فى داهية هيقولوا دول اكتر ناس بتطبق ومع ذلك اكثقرهم فسادا يبقى ظلمنا الاسلام اللى ما قالش على حاجة من اللى احنا بنعملها انهاردة كل ذنبه ان احنا انتسبناله يبقى حرام نضيعه وسط الاديان دا حتى الاسلام ما قالش اكدبوا ولا حتى فى المزاح
وشكرا

دا الكومنت بتاع احمد وفعلا هو عنده حق فى الحته التانية ( مش بتاعه التمسلهم العذر علشان انا مش هلتمسلهم :D )
المهم فعلا لو كلنا روحنا وسمعنا الكلام وجاوبنا زى ما هم قايلين كدا يبقي الاسلام كدا اكتر دين ناس عملت منه فوتنج واكتر ناس منه بتصلي دايما وبتروح الجوامع وبتتبعه فى امور حياتها المختلفة ..... قشطة اوى لحد هنا نبص بقي لحال المسلمين اخلاق زى الزفت ، فساد ، رشاوي ، احتكار ، استغلال ، كره وبغضاء وكل حاجة وحشة ...... !! طيب لو دول المسلمين ولما هما مرتبطين بإسلامهم .... يبقي اكيد هو دا اسلامهم
استني استني استني بتقول ايه يعني احنا بدل ما نرفع الاسلام بنسيء إليه .. اه والله بنسيء ، شوفت ازاى ... يعني يضاف ع الكلام اللى فوق ان الهدف اللى هما راسمينه فى عقولهم كمان مش هيتحقق ............. أشك لو اصلا فى عندهم عقول علشان يعملوا حاجة زي كدا ... ملعون ابو الغباء اللى عمل عشش وبيوت فى عقولنا كمان مرة

******************

خلص كلامي وتحياتى
تشي أحمد