اقرأ .. تكون ؟؟



اقرأ ... تكون ؟؟ يعني أيه وليه ؟؟
اقرأ اول تكليف نزل على سيدنا محمد عليه افضل الصلاوات وهو واحد من الحاجات اللى اصبحنا بنفتقدها فى وطنا العربي ومصرنا الجميلة بالأخص بقيت تشوف كل شاب وشابه ماسكين الموبايل بيلعبوا فيه او فى ودانهم الام بي ثري وبيسمعوا اغاني او بيهزروا مع بعض أو ..... كلها حاجات مهما كانت هى ايه لكنها فى الاخر تضيع وقت ع الفاضي
لكن لو جينا بصينا مين ماسك كتاب ( مش بتاع المدرسة والكلية ) كتاب فى اى مجال بيحبه وبيقرا فيه ، لا يمكن دي رابع المستحيلات عند العرب ، ولو جينا بصينا كدا ولقينا واحد ماسك كتاب وبيقرا فيه الباقي مش هيسيبه ::::
" أيه يا عم المثقف "
" ايه الثقافة دي كلها "
" فين النضارة بتاعتك "
إلى اخر التعليقات المستفزة اللى تخلي الشخص يحرقهم ويحرق الكتاب ويحرق نفسه بالمرة معاهم

نرجع لموضوعنا بقي " القراءة " انا عن نفسي شايف ان القراية واحدة من اهم الحاجات اللى لازم نهتم بيها لازم زى ما بنقلد الغرب فى كل حاجة فى الهدوم والمزيكا والكلام نقلدهم بردو فى الحاجات الكويسة يعني فى الغرب اغلب اوقات الفراغ فى الكليات والمواصلات العامة الناس بتستغلها علشان تقري والقراية بوجه عام فى اي مجال حسب الشخص اللى هيقرا هتفيد الشخص وهتوسع عقله وتفكيره وهتخليه يعرف حاجات اكتر ومعلوماته هتزيد

فى مصر هنا كمية السطحية بين الشباب تخلي الواحد محتاج يركز شوية " هو انا هفضل زى الناس كلها كدا هما ضايعين يبق انا زيهم وهو انا احسن منهم فى ايه " لا اكيد ممكن نكون احسن من اللى حوالينا ربنا سبحانه وتعالي قال " وإن تتبع أكثر من فى الأرض يضلوك " يعني مش علشان كل الناس مش بتقري يبقي انا موجعش دماغي والرسول عليه الصلاة والسلام قال " لا تكن إمعه إذا أحسن الناس احسنت وإذا اساءوا اسئت " من الحديث والأية الكريمة بيوضح اوي اننا ماينفعش نمشي ورا الناس فى كل حاجة وفى اى حاجة ولازم يكون لينا موقف خاص وفكر خاص ودا مش هيجي غير بأننا نقرا ونفهم وننقد وناقش

ولأن دلوقتى معيار الانسان بيعرف قد ايه مش معاه كام ( دا عند الناس المحترمة اللى مش كل همها الفلوس )

وعلشان دا كله وحاجات تانية كتييييييييير انا يمكن معرفهاش
لازم نقرا ..
علشان كدا عملت الحملة والجروب
أقرأ ... تكون
أقرأ علشان تكون إنسان يحترم وليه فكره وثقافته الخاصة مش ماشي ورا الناس وخلاص وهو مش عارف حاجة

ياللا كلنا نقري نتعاون ونجيب الكتب مع بعض واللى عنده يدي اللى معندوش علشان كلنا نقري ونفهم ونعرف
ياللا كلنا نكون ........


تحياتى
تشي أحمد

16 comments:

Drop of the Ocean said...

الله عليك ياباشا
I'M IN !!
المعرفة بتدي الواحد "قوة داخلية" ممكن تغيرله حياته ونظرته للدنيا كلها ، بجد الواحد بعد كل كتاب بيقرأ بيحس انه بقى "انسان" افضل ايا كان المحتوى الفكرى للكتاب طول ما ليه محتوى "طبعا بعيد عن كتاب طريقك إلى عالم الطبيخ او كيف تصطادين عريسا" ، احلى حاجة لما الافق يوسع ادامك وتكتشف بعد جديد للدنيا كل مرة ، فعلا الناس بقت تتكسف تقول كلمة "معرفة" او "ثقافة" او "فكر" كأنها مرادفات مبيستخدمهاش غير الناس السايكو و غريبى الاطوار .. لازم نخلص من الحكاية دى لأنها راميانا كام قرن لورا والدنيا بتجرى فوقنا وبتدوس علينا .. اجازة العقول دى مش ناوية تخلص؟ خلينا نقرأ و ندخل لعقولنا اى حاجة لها لازمة عشان تنتج فكر ليه لازمة

فعلا اقرأ لتكون :))
تسلم دماغك يااحمد

أسامه يوسف said...

القرايه
مممممممممممممممم
تصدق انى اناباخبى حوار انى باقرا وباكتب تجنباً للتريقه
ماحدش يعرف انى باكتب عالنت حتى
وكل اللى يعرفوا المدونه من عندى تقريباً قرايبى اللى بيقروا

فى ناس فاكره ان الواحد لازم يقرا كتب ثقافيه او فلسفيه او سياسيه
والروايات دى مضيعه للوقت
فالناس اللى بتسمع الكلام ده ومالهومش بالقايمه اللى فوق بتسيب الكتب خالص

ده طبعاً غلط لان الانسان بيقرا اللى بيحبه
واللى بيحبه هيفيده

فى ياتشى حاجه بافكر فيها
ان القصه بتاعة العربى تكون من اختيار الطالب
نشوف الطلبه عايزه ايه ونقدم لهم ده
وبكده نشجعهم على القرايه
بدل الصقر الجرئ وشجرة الدر


تحياتى

Layla said...

يا سلام عليك ...مبادرة في وقتها تمام

تحياتي لك
:)

Anonymous said...

أنا مقدرش أعيش لو مخلصتش كتاب على الأقل بالأسبوع ..
لسه مخلص رواية "بيت الأشباح" لإيزابيل الليندي وطعمها لسه على لساني لو فاهم أنا قصدي إيه ..

الفكرة إن الحملة حلوة وكل حاجة .. بس لازم يكون في حلول عملية .. عملية تبادل عناوين أو تبادل كتب أو اختراع مكتبة إلكترونية .. المشروع مش لازم يكون شعارات وبس .. :)

أحمد

صفا سارة said...

يا ريت فعلا الكل يقرأ فى اى مجال بيحبه ومش شرط يكون كتب بس
وان شاء الله هنقرأ عشان نكون

Che Ahmad said...

دروب
الله عليكي انتى
بعد كل كتاب بخصله بحس بطاقه عظيمة
بحس بنشوة
كأنى كنت عطشان اوي وشربت
محتاجين نعمل اعادة ترتيب اوراق لحياتنا الثقافية علشان نعرف نتحرك لقدام
والاجازة خلاص قربت تخلص على فكرة

تحياتي
تشي

Che Ahmad said...

اسامة باشا
انا بقي عايز الناس كلها تقري واللى بيقري يقول للناس كلها علشان دي حاجة يفتخر بيها
عارف ان التريقة والحركات الرخمة دي بس معلش يا رب هما كمان يقروا ويبطلوا تريقه

وزى ما بتقول كل واحد يقري اللى هو حايه واللى شايفه مناسب ليه

وبالنسبة لحكاية قصه العربي كلامك مظبوط اوي بس مين اللى بيسمع
اقولك على حاجة جاتلي فكره هقولهالك بس لو عرفت انفذها

تحياتى يا كبير
تشي

Che Ahmad said...

مارفل
شكرا اوى على تشجيعك
وايدك معانا بقي ما تشجعش كدا من غير حركة

عايزينك تساعدنا وهقولك ازاى قريب

تحياتى
تشي

Che Ahmad said...

أحمد باشا
انا بردو كدا بس حسب الكتاب ممكن كتاب ياخد شهر ويمكن يومين وحلوة اوى حته لسه طعمه على لسانى بجد وصف فى الجول لانى لسه مخلص تغيردة البجعة وطعهمها لسه على لساني

وبما ان الفكرة حلوة يبقي اكيد هنعمل حاجة إن شاء الله
المكتبة الإلكترونية فى الطريق اهي بس نخلص امتحانات الميد تيرم بتاعتنا الاسبوع الجاي

مش شعارات وخلاص انت فاكرنا تبع الحكومة ولا أيه وعايزين ايدك معانا بقي فى الكتب اللى هنوفرها

تحياتى
تشي

Che Ahmad said...

صفا
يا ريت فعلا الناس تقري علشان تكون
واستني المكتبه قريب هيكون فيها حاجات كتير كل اللى هنقدر نوفره هنجيبه
بس نخلص الميدتيرمات الاول
ادعيلنا

تحياتي
تشي

mohand said...

عندك حق طبعا

ويكفي ان متوسط قراءة العرب للكتب اقل نسبه علي مستوي العالم

حتي لو ادخنا عليهم الكتب الدراسيه كمان

ودي المصيبة

اقراء تعيش حر

تحياتي

Che Ahmad said...

مهند
مش عارف دي حاجة متحملينها احنا ازاي وكمان بالكتاب المدرسي

عايز ايدك معانا فى مشروع إلكتروني هنعمله كدا ويا رب يفيد الناس

تحياتى
تشي

a7mad said...

انت عارف المشكلة ايه (او متهيألي معايا انا) ؟
ان كم المزاكرة اللي ورايا بيبقى كبير اوي...وما بصدق اخلص مزاكرة عشان اقوم اعمل اي حاجة تانية...زمان كنت بقرأ كتير بس دلوقتي بعد ما بخلص مزاكرة مبيجيليش نفس ابص في كتاب

هو الجروب بتاع الفيس بوك ده انت اللي عامله ؟؟ ويا ريت تقولي اسم الاغنية اللي انت مغلها في البلوج عشان عجبتني

اخوك: احمد

سارة درويش said...

بجد بجد حملة رووووووووعة

وبجد جيت على الجرح فى موضوع ان الناس مش بتقرا ومش بتسيب اللى بيقرا فى حاله

عارف حتى لو مش اتريقوا عليه ما بيخليهوش يعرف يركز ، سواء بسبب نظراتهم او بسبب الدوشة اللى عاملينها ، دا حتى مكتبة الكلية ما تطيقش تقعد فيها خمس دقايق .. اول مرة فى حياتى اشوف مكتبة الناس تدخل تتكلم فيها ، وامناء المكتبة اصلا جايبين راديوا ومشغلينه على الاخر ..

الحملة جميلة وفكرتها مبتكرة وبجد محتاجينها تسلم ايدك

Che Ahmad said...

أبو حميد
انا مش شايف فيها مشكلة او يمكن لأني منفض الكلية اصلا
بس مهما كان كل المذاكرة دي عقم فكري ولازم اقري علشان استعيد روحي وعقلي من جديد

الجروب بتاع الفيس بوك انا اللى عامله اه
واسم الاغنية ملناش غير بعض لوجيه عزيز

تحياتي
تشي أحمد

Che Ahmad said...

سارورة

عايزينك بقي تشاركي فى الحملة وتثريها وتنشري بين الناس اللي حواليكي القراية علشان يبقي الحملة ليها لازمة

تحياتي
تشي أحمد