اجمل تيم فى الدنيا

اولي تجاربي على برنامج لذيذ كدا ادهاونى الواد احمد فهمي
وهو بيعمل فلاشات بس لذيذ شوية بس حاسب علشان لو النت مش تمام الاغنية يمكن ما تشتغلش
الفلاش فى اجمد فريق فى الدنيا وهتبقوا تعرفوهم كويس قريب إن شاء الله

الاعجاب والاتباع

الاعجاب والاتباع فرق كبير بينهم لكن منا اللى بيخلط بينهم وبيعتبرهم حاجة واحدة
الاعجاب لا يعني الاتباع لكن العكس صحيح
انا معجب بالشخص او بتفكيره او بطريقة تعبيره او بكتاباته الادبيه لكنى مش متبع تفكيره او طريقته وليا فكري الخاص وثقافتي الخاصة اللى بتتمحور حوليها حياتي
الاتباع انى اعجبت بشخص او بتفكير شخص واتبعته وسرت عليه
كمان احب اوضح ان كتير متبعين ملتهم مش باختيارهم لكن بانهم اتولدوا لقوا ابهاتهم مسلمين او مسيحين او يهود او غير ذلك ( محدش يقولي الفطرة وكدا وسيبوني اكمل كلامي ) احنا ما اخترناش احنا اتولدنا مخيرين الاختيار لما يجي الطفل لما يتولد نقوله الاسلام بيقول كذا والمسيحية بتقول كذا و..... إلخ ونقوله اختار بقي اللى انت شايفه اصح ويبقي كدا اختار الاتباع والاعجاب مش اتباع اعمي
اكمل كلامي واقول ان الاعجاب ما بيكونش بالشخص ككل لكن الاتباع هو اعجاب بشخص ككل والسير وراءه والسير على منهجه
مثلا انا متبع النبي محمد عليه افضل السلام والصلاة معجب بيه كشخصية كاملة اخلاقه وعقله وتفكيره وسلوكه فى مواقف مختلفه وبأختياري مش علشان انا اتولدت كدا
كمان انا معجب بالتشي مش معني كدا انى شيوعى
معجب بالرومي مش معني كدا انى صوفي معجب بصلاح الدين الايوبي مش معني كدا انى كردي
معجب بحسن نصر الله واحمد مطر مش معني كدا انى شيعي
معجب بسيد قطب وحسن البنا مش معني كدا انى اخوان
معجب بعبد الناصر ومش معني كدا انى اشتراكي
معجب ومعجب ومعجب والقائمة تطول ودا ما يعنيش ابدا انى متبع لمنهج اى منهم ولكني فقط معجب بشيء ما فيهم

يا ريت نعرف ازاى نفرق بين الاعجاب والاتباع
مش معني انه معجب بنوال السعداوى انه متبع تفكيرها مش معني انه بيحب النبي عيسي عليه السلام انه مسيحي أو كافر ( الكلام على مصطفي فتحي )
يا ريت نعرف ازاى نحترم اختلاف الاخر عنا
يا ريت نعرف نحترم بعض وعدم القاء الاتهامات جزافا
يا ريت نعرف نتحكم فى كلامنا
يا ريت نتعلم ثقافة الكلام
يا ريت ما ننصبش انفسنا حكام على البشر مكان الحكم الذي لا يموت ونكفر الناس على مزاجنا
تشي

تااااااااج ع السريع

وانا بتمشي وسط عالم البلوجرز اتشنكلت فى مدونة ولقيت عندها تاج وفى الاخر متمرر لكل اللى يقراه وبما انى مش عايز اعمل بوست جديد قلت اخد التاج اجاوب عليه علشان ما يفضلش البلوج ميت كدا كتير

هل تحرص بصدق علي تجديد النيه قبل الدخول علي النت؟؟؟
مش عارف والله

ما رأيك في جريده الدستور؟؟؟
بحب الاسبوعي علشان خالد كساب وصفحه الهجص بس هما عموما مش محايدين وليهم سقطات كتير ودا ما يمنعش انها من احسن الجرايد اللى بقراها بس كل فين وفين بقي لأني بقيت اقرا المصري اليوم ع النت اسهل واوفر

ما رأيك في شويه المدونات دي..(أنا إخوان..إبن أخ..حلم الحريه..مش حاسكت..جهاد المصري)؟؟

ما زورتش غير انا اخوان وهى لواحد بيعبر عن وجهه نظره واراءه بحرية يفتقدها على ارض الواقع فعادي يعني مدونة زى اى مدونة بس صاحبها عنده رساله

هل بعد قراءتك للإجابتين إللي فاتوا ..حسيت إن أنا أيه؟؟ولا تنسي الصدق.؟

والله دي اول مرة ادخل عندك ومش عارف تقصد ايه بالسؤال بس مش تقدر تقول ما حسيتش بحاجة او ان اللى فى دلوقتى مش مخليني احس بحاجة - أى حاجة تاني -

هل تثق في جريده الدستور؟؟؟

مبثقش ف حد تقريبا دلوقتى

أنا بحبكو في الله..فهل تحبونني...ولا تنسوا الصدق؟؟

ما دام مفيش سبب يخليني اكرهك يبقي ما احبكش ليه بحبك فى الله

هل تعمل في السياسه والعمل العام أكثر من الربانيات والروحانيات؟؟؟

هو انا ما بشتغلش فى السياسة اصلا بس بالنسبة للعمل العام هو انا فعلا اكتر من الروحانيات والربانيات



هل الدستور تحب الإخوان,,ولا بتستغلها؟؟

لا بتحبهم ولا بتكرههم

اسم مدونتك؟

أنا كيف أكون

لماذا اخترته ..وماهي نيتك من وراء اختياره؟

والله كنت مخنوق لما مدونتى الاولانية اتاخدت كنت بسمع كاظم وحوار مع النفس وبيقول انا من اكون قلت انا واصلاازاى اكون طلعت فى دماغي عملت المدونة الجديدة كدا

هل فكرت في إغلاق مدونتك؟ والسبب؟

لا مكانش فى سبب لكدا

صورتك في المدونة ورمزيتها ؟؟

صورتى فى اليوسر الاولاني كانت لتيرشت منشور وعليه قلب ودا علشان انا شايف الحب اجمل احساس فى الكون الومفروض ينتشر اكتر واكتر
صورتي اللى فى اليوسر دا واحد بيصلي وجنبه بنته الصغيرة رمزيتها هحتفظ بيها لنفسي

لماذا دخلت عالم التدوين من الاساس؟


اتخنقت من المنتديات ومن الاشراف اللي عليها واللى كان دايما خانقني وكمان كان نفسي اقول كل حاجة من غير ما حد يقولي ليه وعلشان ايه

جمله قيلت لك فى وصف مدونتك؟

أول تعليق ع البلوج القديم بتاعي
خلاص اتدبست.. بردو هتابعه وهتعمل بوست بشكل دورى..ومن بكرة الاقى بوست جديد..معاك ربنا:)

التعليقات بالنسبه لك ,اهميتها؟

ولو انى مش بزعل لو ما لقيتش اى كومنت علشان انا بكتب بس اللى انا عايزة او عايشه او حاسه مش حاجة تاني بس دايما التعليقات بتقولي خلي بالك انت غلط او خلي بالك فى الحته دي فى رأي تاني وهكذا يعني بتصحح دايما اوضاع وبتخلق حاله نقاش جميلة ومفيدة

احلى بوست كتبته ...ضع اللينك , ثم اذكر لماذا؟

http://ana-ma5no2.blogspot.com/2007/10/blog-post_898.html
http://ana-ma5no2.blogspot.com/2007/10/blog-post_25.html
الاتنين دول كانوا وهيفضلوا دايما احسن بوستين كتبتهم الاول علشان كتبته فى لحظة صفاء نفسي وانا لوحدي فى الكلية والتاني علشان كان برده حاجة زى كدا بس مش قوي

حد قل أدبه فى التعليق إيه رد فعلك؟

لا محصلش وعموما مهما حصل مش همسح الكومنت وهرد عليه لو كان كلامه في راي يستحق انى ارد عليه لو رد لأجل قله الادب بس عادي هسيبه ولا كانه كومنت اصلا

أسوأ مدونة؟

مش فاكر غير واحدة بس بتاعه سندباد ودي بس اللى فاكرها يعني تستحق لقب الاسوء

هيحصل ايه لإيميلك لما تموت ؟؟

هيموت معايا

اديت الباسورد لحد قبل كده ؟

كنت اديت حد قبل كدا الباس لكن الباس الجديد مش مع حد خالص ومش عارف ممكن اديه لحد تاني ولا لأ

اسمك؟
أحمد

المشهور بيه وسط اصحابك؟

جيفارا وساعات هيما وساعات تشي

شخصيتك نوعها إيه؟

عادي انسان بيحب الحياة بيخاف م الموت طموح خنيق مرح من برا ومن جوا الله اعلم

السفر بالنسبة لك؟

حلم نفسه احققه واكون لوحدي يعني اكون مع نفسي لنفسي

وقت فراغك بتعمل فيه إيه؟

بقعد ع النت أو بقعد اقرا او بلعب فيفا

المود بتاعك؟
مش عارف ليه بحب اكون حزين وكئيب بعجب نفسي اوى وانا فى المود دا !!!!!

الاكلة المفضلة؟

البطاطس بأى نوع والترايفل فى الحلويات

الصفات اللي أخدتها من بابا؟

يااااااااااااه فاكر اني جاوبت السؤال دا قبل كدا بس هجاوب تاني
الاصرار

الصفات التي أخدتها من ماما ؟

الطيبه

اكتر ست حاجات بكرهها؟
النفاق
الكدب
الكلية
الخيانة
مصطفي كامل
ان ارجع من الكلية الاقي مفيش نت فى البيت

اكتر ست حاجات بحبها؟

الشيكولاتة
اللب
القراية
الفيفا
انى افرح حد او اساعده
ان حد يثق فيا اوى

الشغل بالنسبة لك؟

حاجة مرهقة ومتعبه بس هحبها علشان اعرف اكون حاجة

الانترنت بالنسبه لك؟

كل حاجة تقريبا لأني معرفش اعيش من غير انترنت خاااااااااااااااااااالص بس بدأت احاول اقعد اسبوع كامل من غير انترنت ( دايما بفشل بس اديني بحاول )

امرره لمين ؟
مش لحد معين علشان العيد لأي حد عايز ياخده ولا أقولك اعيد بيه
لأسامة باشا يوسف
ولحبيب قلبي كيكو المطحون
استلموا عيدياتكوا يا رجاله :P:P


الشوق إليها

ساعات بنحتاج لحاجة اصبحت بالنسبة لينا ماضي ساعات بنشتاق ليها

مدونتى القديمة أنا مخنوق محتاجلك من تاني

عشاق الله

أمتى تبقي حياتنا كلها بالطريقة دي كلنا عايزين السمو الروحي مهما اختلفت مذاهبنا
الموقع دا من اجمل المواقع اللى دخلتها تقريبا ع النت

تعريف اصحاب الموقع بنفسهم
• نحن جماعة من الأصدقاء مسيحيين ومسلمين جمعنا القول الكريم أن"تعاونوا على البر والتقوى ولا تعاونوا على الإثم والعدوان" والذي يجد مصداقه في القول الكريم "لنحب بعضنا بعضاًً"........"من لا يحب أخاه الذي أبصره ، كيف يقدر أن يحب الله الذي لم يبصره؟". •ونحن ندعو جميع البشر من خلال هذا الموقع (مهما كانت خلفياتهم الدينية) إلي التخلي عن عصبياتهم العرقية والدينية والفكرية ليتلاقوا في عشق الله وحب الإنسان مهما كان لونه أو مذهبه.



بصوت عالي

النهاردة هو اجمل يوم مر عليا من ساعة ما اتولدت ومش مهم ليه بس هو الاجمل وخلاص
بعد صباح منهك من الصلاة في دير بيدرا سأل المبتدئ رئيس الدير هل تجعل الصلوات الله أقرب منا ؟
أجابه : وهل تجعل كل الصلوات التي في الدنيا الشمس تشرق؟
قال المبتدئ :كلا بالطبع
قال رئيس الدير الله قريب بغض النظر عن صلواتنا
رد المبتدئ هل تقول ان الصلاه عديمة المعنى؟
رد : أبدا اذا لم تستيقظ مبكرا لن ترى شروق الشمس كذلك اذا لم تدعو الله كيف تحس بوجوده ؟؟؟؟

جواب نهائي


بتعيط ولا بتلعب
اللى هيجاوب صح ملوش جايزة كبيرة اوى على فكرة

انا خلصت امتحانات

كنت مستني اخلص امتحانات علشان افوق من قرف الامتحانات دا لانى مش متصور ان ممكن حد يكون بيكره كليته زيي ياللا مش مشكلة ما الدينا بقت كلها تتكره جت ع الكلية يعني
المهم انتى كنت قايل انى مش هدخل نت الاسبوع دا خالص فى الزقازيق لأنى ما رجعتش البيت لسه وقلت اقعد شوية فى الزقازيق
المهم انى خلصت امتحانات وحالتى النفسية باظت خالص معرفش ليه بس هى بتيجي كدا فجأة وكنت مقرر انى اقاضع النت لغاية ما ارجع البيت بعد خمس ايام من النهاردة لكن انا قصاد النت ضعيف جدا ( وقصاد حد تاني برضو ببقي ضعيف ^^ ) المهم دخلت من سيبر وبدخل على بلوج روقان اتفاجئت بخبر وفاة داليا عز انا معرفتش اصلا اعمل ايه او اتكلم حتى كتير مدونين بيروحوا وبندعيلهم دايما بس مين فكر ايه اللى هيحصل لو كان مكانهم مش عارف انا اصلا كنت داخل نت علشان احسن من حالتى النفسية باظت زيادة ياللا مش مشكلة
البوست يمكن يكون بايظ وداخل فى بعضه بس معلش بقي هى جت كدا
هو الشهر دا جري بسرعة كدا ليه
اما حاجة غريبة صحيح

نحن من نسيء

وانا بتمشي فى عالم البلوجرز الواسع عديت على بلوج اسمه سندباد لصاحبه اللى مسمي نفسه ابن السين مع كمية التفاهات اللى البلوج بتاعه ومع ان اللادين زى ما عرفه حد قبل كدا هو طريقه للوصول للحقيقة والحرية واتباعها إلا ان ابن السين دا وضع كل همه فى الإساءة إلى الإسلام والإسلام بيه لا هيزيد ولا هينقص
دا جزء من بوست كتبه ابن السين
ماذا تقرا فى الأخبار عن المسلمين واحوالهم بالطبع لن تجد الا الارهاب والعدوان والقتل وسفك الدماء فتعاليم الاسلام التى تحث على قتل الاخر ومعاداته وتكفيره وماذا تسمع عند الدعاء فى صلاتهم فى اى مسجد من مساجد المسلمين لن تسمع الا (اللهم زلزل الارض من تحت اقدامهم .اللهم يتم اولادهم .اللهم دمر اقتصادهم .اللهم رمل امهاتهم .اللهم ارينا فيهم يوما كيوم عاد وثمود .
أنا مش عايز اعلق على البوست كله لا أنا عايز اعلق على الحته دي بس وأن ازاى أصبحت الاسءة للإسلام منا احنا كمسلمين لأننا نسينا كل الرحمة فى دينا ونسينا أنه دين المعاملة وأصبح دعائنا على الاخرين بيتضمن اننا نتمنى ليهم الموت وان سيداتهم يصبحوا ارامل وان اطفالهم يموتوا كأن دا هو أمر الاسلام لينا من هنا أصبحنا أحنا اللى بنسيء وبنجعل من دعائنا حجة ياخدها علينا البعض مع إن عمر ما الاسلام امرنا بكدا الاسلام ما امرناش بقتل النساء أو الاطفال وما أمرناش ان يكون طريقنا هو القتل والتدمير وأن اللى بيعمل كدا هو عار على الاسلام وصاحب سلوك لايليق على الاطلاق وصمه بالاسلام فالاسلام هو دين السلام وهو اصلا لفظ مشتق من السلام .
يا ريت نكون ارحم من كدا ونعرف ان زى ما احنا هنفضل نتمنى ليهم الموت ربنا مش هيستجيب لأنه اصلا ما أمرناش بالقتل وفى وقت زى دا احنا فى حاجة للحوار اكتر كتير على الاقل لأننا فى موقف الضعيف ودي حقيقة ما ينكرهاش إلا مكابر .
اتمنى اننا قبل ما ندعي نشوف الاسلام صح الاسلام السلس اليسير ومش لازم نكلكع كل حاجة وقبل ما نعمل الحاجة نشوف هيبقي تأثيرها ايه بس كدا كفاية .

Re-Fresh


بعد سرقة بلوجين ليا او مهما كانت التسمية مش هتفرق كتير حبيت اعمل لحياتى ريفرش او زى ما قالي الشخص اللى سرق الميل بتاعى ( هو معتبر انه ما سرقش حاجة وان انا اللى غلطان علشان ما عرفتش احافظ عليه ) المهم انى كنت كلمته فترة مش قليله من على ميلي اللى هو اخده وقالى اخرج برا المربع الكلام مكانش جديد عليا فانا لحد دلوفتى مش ناسي كلام اعز انسانة عندي وكلامها عن صندوق الهوية اللى يمكن وقتها مكنتش فاهمها اوى وهى بتتكلم عنه وكان اكتر شاغلنى اللى هى فيه وألمها اكتر ما كنت بفكر فى نفسي لكن دلوقتى حاولت ابص لها تاني من وجهه نظر مختلفة ورغم انى اصلا مش عارف الاقي الصندوق او المربع او ايا كان لكنى هحاول ابدأ ابص من فوق لحياتى كلها ابصلها من زاوية ملمة احاول اجمع كل التفاصيل وبعدين اخرج التفصيلات اللى مش مهمة مهما كانت كبيرة وابدأ اكبر التفاصيل الصغيرة اللى مش شايفها اوى بس هى مهمه اوى مش عارف ممكن ايه تاني اعمله فى الوقت الحالى بس هحاول انى اجدد حياتى وابدأ ابص من جديد لكل حاجة بصورة مختلفة او من زاوية مختلفة اقصد .
من اجمل الحاجات اللى بشوف انها ممكن تساعد اى شخص فى انه يحسن حياته الانشطة الخيرية ومع انى حاولت اعمل كدا بس ظروف الدراسة والسفر ما قدرتش حتى النشاط جوا الكلية ما حاولتش ادخل فيه لاسباب كتير منها ان اصلا النشاط جوا الكلية شبه ميت وكمان انى اصلا كاره الكلية ( دي عايزة اعادة نظر بردو ) ولولا شوية اصحاب جمال اوى وجدعان اوى وطيبين اوى ما كنتش روحت خالص انا تقريبا تايه اوى حاجات قليلة اوى هى اللى انا متأكد منها ومش عارف الحاجات التانية ايه موقفى منها .

صحيح انا مش ناسي الحملة بتاعه ويكي بالعربي بس المشكلة اللى فى الفترة اللى فاتت اخدتني منها شوية
قبل ما انسي البلوجات دى متهاك عليها واخر تدوينات ليا عليها كانت بتاريخ الجمعة 16/9/2007
cheeeeeez.blogspot.com

cheeeeez.blogspot.com
ana-ma5no2.blogspot.com

كمان قبل ما انسي
ــــــــــــــــــــــــــــــــــــــــــــــــــــــــ
لأجمل انسانة فى الكون بحبك اوى ووحشانى ع الاخر