اجابات بالفرعوني

التاج اللى ف التدوينة قبل اللى فاتت المفروض اني اجاوب عليه
فيلم ذا بوكيت ليست شوفته من زمان من كام شهر كدا
وقعدت افكر ف السؤالين اللى انا كتبتهم دول وعملت منهم تاج
بعد الفيلم قعدت افكر ف السؤالين دول بالذات
هو انا لقيت البهجة ف حياتي ؟؟
قعدت افكر كتير وبعدين مش عارف
وقولت اكيد لآ ما لقيتهاش دي اصلا الحياة كئيبة ومخنقة والواحد مش طايقها
يمكن كان المود ساعتها رخم ومش تمام وكنت مخنوق م الاجازة او حاجة بس كان فعلا حاجات كتير مكنتش طايقها وكنت مضايق
بس دلوقتى بجد بفكر تاني هو انا لقيت البهجة ف حياتي
بفتكر زمايلي اللى هما بجد اقرب ليا من حاجات كتير ف الدنيا
الناس اللى بجد حطت علامات ف حياتي
اكيد انا لقيت البهجة وانا مبسوط معاهم
وانا فرحان وانا معاهم
حتي وانا مكتئب ولوحدي بردو مش بحسبها انها لا تنضم للبهجة
علي العكس بعتبرها جزء منها بل وبتديني قوة دافعه كمان وبتطلع من جوايا كلام كتير حلو انا بحبه
ايوة طبعا لقيت البهجة ف حياتي ف كل حاجة جوة بشوفها حواليا وف اصحابي اللى ربنا اداهوملي وف كل الناس اللى حواليا بيحبوني وبحبهم
السؤال التاني من ساعه ما شوفت الفيلم وانا بقول ايوة طبعا
اصل انا تكويني الداخلي ما بعرفش ابقي مبسوط وحواليا حد مش مبسوط وحاجات تانية كتير يعرفها القريبين مني
بس مينفعش اعيش من غير البهجة منتشرة ف الناس اللى حواليا لازم يبقوا مبتهجين علشان انا كمان اعرف اعيش
ولو مش مبسوطين بعمل جاهدا علشان اديهم الحب او البهجة او الحاجات اللى تخليهم مبسوطين
ما انكرش ان ساعات بفشل ف كدا
وساعات كمان بضايق ناس ويمكن احطهم ف مود وحش بس غالبا ما بيبقاش بقصد مني وبحاول اغير دا علي قد ما اقدر
يعني
دول اجاباتي ع التاج بتاعي اللى سؤاللين بس

تحياتي ..،
أنا

تاج فرعوني

التاج دا عبارة عن سؤالين
بس السؤالين متعلقين بالفراعنه القدماء
وهما من فيلم ذا بوكيت ليست واحد من اجمل الافلام اللى شوفتها فعلا
كلام كارتر في الفيلم هو التاج .... خلينا نبدأ

المصريون القدماء كان لديهم اعتقاد بهذا الخصوص
حين تصل ارواحهم إلي الجنه فالآلهه تسألهم سؤالين
إجابتهم تقرر إذا ما كانوا سيقبلون ام لا

السؤالين بقي هما التاج

(1)
هل وجدت البهجة في حياتك ؟؟
(2)
هل تسببت في منح البهجة للأخرين ؟؟

التاج لأي حد عايز يجاوب عليه
سواء عنده ف البلوج
او في رد عندي هنا لو يحب

محبتي

تاج الملك تشي

بسم الله ....

ازيكوا كلكوا يا ناس ياللى بتعدي عليا هنا

النهاردة عامل تاج مخصوص لأصدقاءي من ارض الواقع والفضاء البلوجي الافتراضي

اول حاجة قسم ابولو قصدي قسم الحق ودا مخصوص علشان عفشة باشا حبيبي

واللى يرضي ياخد التاج يبقي بيتعهد امام الله والدولة والناس انه يجاوب بصدق

واللي مش ناوي يجاوب هو عارف عاقبته ;)

ياللا نبدأ

وكالعادة الاسئلة بالأزرق والإجابات بالأحمر واخر الموضوع هاحط الاسئلة كلها ورا بعض علشان نسهل عملية النقل عليكوا

التاج متمرر لكل اللى عندي ع السايد بار بلا استثناء من اول واحد لأخر واحد وبدون إجبار ( لكن في ناس عارفه نفسها مجبرة وإلا .... )

رغيت كتير أنا خلوني أبدأ .......

3

2

1

جووووووووووووووووووووو

1- عيب فيك ومش نفسك تتخلص منه ع الاطلاق

علي فكرة والله بحط الاسئلة قبل ما افكر فى الإجابة واديني دبست نفسي :)

مممممممممممممممممممممممممممممم

ممكن نقول الثقة والشك السريعين والاتنين باخد بيهم احكام مسبقة على الناس فى اول تعارف وبيحتاجوا لوقت اطول لتأكيد دا او ازالة اثاره

2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟

I- هند : لو ربنا كان عين لكل واحد ملاك حارس فأكيد هند الملاك خاصتي 

II- فهمي : ساعات بنظل نبحث فى الدنيا علي اشخاص يخافوا علينا ويفهمونا من غير كلام .... ولما نزهق بتهديهم السماء لينا ... فهمي

III - كيكوووووووووو : اقرب حد ليا من قرايبي وسلواي الوحيدة فى البلد التيت دي

IV- مروة كناريا : مجنونة ورزينة وفيها البدع

V- أحمد عبد الوهاب : أحد أهم الشخصيات اللى بتحمل قلب كبييييييييييييييييييير بس يبيع اي حد علشان الفلوس تيييييييت

3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟

I- سارة : غالبا بتبقي موجودة فى الوقت الصح وليها عليا حق كبير وشكلها مش هتساهولي

II- موصطفي العوليمي : اكتر شخص عايز اقابله واكلمه حتى الان ومعاه ينطبق المثل القائل ... كلنا فى الكأبة بلوجرز

III- ساااااااااااااااالي : المراية بتاعتي لما تواجهني بالحقيقة وتقولي فوق ، ما تعييش

IV- نيرة : أختي الكبيرة ( هي وسالى ) واكتر واحدة روحانية شوفتها بحسها حد شفاف كدا واكتر حد بيقولي اصبر سيبها لربنا :)

V- هبة (بوبا ) : اختي بردو هي كمان بس ايه يخرب بيت ام الطيبة ، ربنا ادها الطيبة اللى ف العالم كله قالها تفرقها ع الناس طمعت فيها واخدتها لوحدها :)

4- العشرة اللى فوق ... ابعت لكل واحد فيهم رسالة !

I- هند : احترت كتير اكتب ايه ؟؟؟ 

II- فهميز : بطل رخامة وحاول تعمل صلح بين قلبك وعقلك للوصول للحل الامثل فى الامور ايها ( وش شيطان بيضحك )

III- كيكوووووووووو : الحياة اكبر من تعقيدك ليها يا بتاع برج العقرب يا رخم 

IV- مرووووووووووووة : هتفضلي اطيب قلب في كليتنا التيييييييييييييت دي ( ربنا معاكي )

V- عب وهاب : لو ما جاوبتش ع التاج دا ليلتك عتبجي طين طييييييييييين

VI- ساااااارة : حاولي تعملي اللى انا مش عارف اعمله حتى الان ... تصالحي مع نفسك

VII- موصطفي : مازلت رغم معرفتي عنك لغز عصي الفهم

VIII- سالى : كل ما بشوف صورتك بتحضرني براءة الدنيا وانها ما تستاهلش حاجة

IX- نيرة : انتى بقي اللى كل لما بشوفك بيطلع للصورة جناحين وهاله بيضا من فوق ... ربنا يحفظك يا رب

X- هبه : محتاجة بردو تتصالحي مع نفسك وتحبيها حتى لو كان علي حساب الناس اللى ادتيهم ونستيكي

كلكوا علي بعض " ربنا يخليكوا ليا يا رب ويوفقكوا دايما ويحقق كل احلامكوا .............. "

5- العشرة اللى فوق دول اكتب لكل واحد كتاب او اغنية بتعبر عنه فى رأيك

I- هند : وسط الدايرة :)

II- فهمي : حكايتي مع الزمان

III- كيكو : اشكيك لمين والخصم انت والحكم

VI- مروة : مجنونة ( محمود العسيلي )

V- احمد عب وهاب : مدد يا رسول الله

VI- ساره : يا طير يا طاير.

VII- موصطفي : اي حاجة لفرويد هتكون مناسبة لكمية التعقيد اللى جواه

VIII- سالي : زي الملايكة

IX- نيرة : نقطة نور بهاء طاهر :)

X- بوبا : كلك علي بعضك حلو

6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟

مممممممممممممممم

سؤال رخم فعلا
انى ما سامحتش حد غلط في حقي

7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟

هخليها بعد م كذا حد يجاوب ع التاج بس هي متسجلة ف دماغي يعني

الاسئلة بقي علشان الكوبي والبيست

1- عيب فيك ومش نفسك تتخلص منه ع الاطلاق

2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟

3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟

4- العشرة اللى فوق ... ابعت لكل واحد فيهم رسالة !

5- العشرة اللى فوق دول اكتب لكل واحد كتاب او اغنية بتعبر عنه فى رأيك

6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟

7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟

مرة كمان التاج متمرر لكل اللى عندي ع السايد بار وخاصة الناس اللى عندي ع الميل 

كلمتين وبس

كلمتين وبس كان عملها مهند ( الباحث عن الحقيقة ) عنده وانا خدتها منه كأنها تاج

انا عندي اتنين ليست واحدة لزمايلي فى الكلية وواحدة لزمايلي فى البلوجنج
ناخدهم بقي بالترتيب

أحمد شقير
اجمل بلوج بحب اقراه وادخل فى عالم البلوجنج كله
*--~--**--~--**--~--*
فهمي باشا
الحته الحمرا اللى ع الشمال وحبيب قلبي
*--~--*
احمد عنتر
ابيض من جوا .. ومن برا كمان
*--~--*
بونبوني
طيبة زيادة عن اللازم ودا ما بقاش بياكل الايام دي مع الناس
*--~--*
جهاد
من الناس القليلة اللى بحترمها فى الكلية ، وبحبه فى الله
*--~--*
عمر باشا
واحد من اجمل والذ الناس فى الكلية وربنا يخلصه م الحزن للأبد
*--~--*
احمد عبد الوهاب
ساعه الجد بيبقي اخويا الكبير وساعه الهزار بيبقي اخويا الصغير
*--~--*
مرمر
بتقول ان الحياة حلوة بيقين ومش عارف دا من ايه اصلا
*--~--*
رامي
عايز يكون وهيكون علشان نفسه وبس
*--~--*
مروة
ربنا يسعدك يا رب وما تشوفيش حزن تاني ابدا
*--~--*
سمير
واحد من مفكري كليتنا القليلين واللى دايما باستمتع وانا بتكلم معاه
*--~--*
معتز
ربنا يهيده ويعقل شوية ويكتب بوست عدل بدل الغرزة اللى فتحها دي :D
*--~--**--~--**--~--*
دروب
فاضلك نقطة واحدة بس تكمل وتبقي انسانة كاملة فى نظري
*--~--*
كيكووووووووو
تاني اكتر واحد بغلبه فى الفيفا بعد محمد سعد
*--~--*
نيرة
حاجة كدا تحس انها من كوكب تاني واختي الكبيرة
*--~--*
سعوووووووودي
سعودي بالنسبة ليا بمعني الامل وعنده تفائل جامد جدا ربنا يرزقنا
*--~--*
بسمه
من ساعه ما ظهرت نتيجة امتحاناتها وهي رامية البلوج ومش بتعبره
*--~--*
يووووووووتا
عقل كبير وقلب طفل صغير
*--~--*
ابو صلاح
عاش من شافه ( مشروع التخرج واخده منا ) بس حسه فى الكتابة رائع
*--~--*
ساجي
متفائل وبيكتب كتير جدا وفى كلية طب ( مش عارف دا كله مع بعض ازاي )
*--~--*
صفا
لو فى قدامها خيارات متاحه كانت عملت حاجة مختلفة
*--~--*
اسامة يوسف
مستقبل بااااااااااهر بس ربنا يستر عليه م التعيلم المصري
*--~--*
محمد صبحي
دماغ جامدة جدا وبيضرب فى الصميم
*--~--*
سالي
مكتئبة زيي وهنعمل مجلة سوا :D
*--~--*
يمنى
بتعجبني آراءها فى الحياة
*--~--*
الاستاذ
معارض بدرجة حكيم
*--~--*
مصطفي فتحي
بيدخل عش الدبابير برجليه علشان يطفشها منه
*--~--*
محمد حمدي
اديب بس ليه اراء غريبة شويتين
*--~--*
أحمد (أحمديزم )
شخصية مختلفه وبحبه وبحب تفكيره
*--~--*
دكتور ضياء
من اكتر الشخصيات اللى بحب اقرا ليها وبحب تفكيرها
*--~--*
دكتور روفي
حاجة دماغ بروح اقري بس وما بعرفش اعلق " بيخوني قلمي هناك "
*--~--*
مهند
اهلاوي ومصري وشبهي كتير
*--~--*
سيادة العقيد المهندس الاستاذ الدكتور آبي
اجمل حاجة ان ليها رأيها فى كل حاجة
*--~--*
البراء أشرف
يستحق القراءة جدا
*--~--*
احمد الدريني
فعلا زى ما بيقول مدونته افيون فعلا
*--~--*
سوووووووو
بروح هناك اغير جو الكأبة العام واراءه فى السينما بتبهرني
*--~--*
احمد الصباغ باشا
زعيم مدوني المنطقة والمناطق المجاورة
*--~--*
زيزي
بتخليني احس ان يمكن فى حد اكتر كأبة وحزن منى
*--~--*
آيه
أخف دم شوفته فى البلوجنج ورلد
*--~--*
كاميليا
مساحة للقلب بس بردو ما بعرفش ارد هناك
*--~--*
شاهي
رومانسيه جدا وهتبقي ثورجية قريب :D
*--~--*
لميا
فى انتظار الفرج قريب وتفتح البلوج
*--~--*
علاء القمحاوي
كفاية انه من تيت راديو دا وسام شرف اصلا
*--~--*
نسرين بسيوني
بختلف معاها وبتفق بس مش هتفق معاها فى انها زملكاوية ابدا :D
*--~--*
هشام علام
ثائر للأبد كفاية الوصف دا
*--~--**--~--**--~--*

وكدا نكون خلصنا واكتفينا والتاج لكل واحد من دول عنده لسيت فيها اصدقاء البلوجنج بتوعه

تحياتي كتير
تشي أحمد

تاج تربيع

تاجين واحد هجاوب عليه بس والتاني هجاوب عليه وهمرر لكل خلق الله دا انا هفتري بس أصبروا
*********************

أيه صاحبة بلوج ( ايامهم سابقا ) بلا نيلة حاليا لقطت من عندها تاج كدا فى اللذيذ وقلت نجاوب عليه وثوابنا عند ربنا بقي

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
دايرة مفرغة

كنت تفضل الدخول مستقل او تتبع حزب معين ؟؟؟؟
اكيد مستقل

اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
معتقدش هفضل على طول مستقل زى ما انا لان مفيش اى برنامج من بتوع الاحزاب عاجبني

اول حاجه هتعملها لنفسك ولاسرتك ؟؟؟؟؟
مش هعمل حاجة كأن مفيش حاجة حصلت هعمل للناس مش ليا

ايه المشروع اللى ناوى تعمله لاهل دايرتك ؟؟؟؟
المواصلات المشكلة الازلية لازم احلها او اتحل انا

قعدت فى المجلس جنب نائب مميز . من هو النائب ؟؟
هقعد فى حته فاضية لوحدي مش هقعد جنب حد اهو الواحد ياخد راحته فى النوم برضه

قدمت سؤال للحكومه ايه هو السؤال ؟؟؟؟؟
سمعتوا عن حاجة اسمها الفقرا !!؟؟

طلب احاطه موضوعه ايه ؟؟؟
التعليم واحواله اللى لا تسر اى حد والجزء الضئيل اللى متوفر ليه من ميزانية الدولة مقارنة بدول تانية زى اسرائيل اللى موفره 25% من الميزانية للتعليم مقابل 7 % بس عندنا

وبتقدمه لمين ؟؟؟؟
وزيري التعليم العالى والتربية والتعليم ورئيس الوزراء ووزير المالية

استجواب لاتنين من الوزراء موضوعه ايه ؟؟؟؟وبتستجوب مين؟؟؟
أنظر عاليه
دول تلاته ومعاهم رئيس الوزرا

انت مع الخصخصه ؟؟؟؟؟؟
أه بس لو مققنه يعني مش كل حاجة هنبيع فى حاجات ينفع وحاجات لا وكمان يبقي البيع مش نهائي ممكن يبقي إدارة بس زى ما كان بيحصل فى المترو كدا مثلا وكمان الاصول والاراضي نفسها تبقي للدولة

هل انت مع قطع العلاقه مع اسرائيل ؟؟؟؟؟وما يترتب عليه من معامله العدو ؟؟؟
مينفعش نقوم فى يوم وليلة نقول هنقطع معاهم احنا معناش حاجة نرد بيها عليهم لما نقطع علاقتنا معاهم لما يكون لينا وجود يحترم وكلمة عليا نبقي نقطع نحرق نـ**** زى ما نحب غير ان فى اتفاقيات مينفعش ننقضها كدا هى مش لعبة وواحد يقول والله ما انا لاعب

هل تؤيد الحرب على العراق ؟؟؟؟؟؟؟؟
لا أكيد مش علشان هى دولة صديقة ولا عربية ولكن علشان المبررات الواهية اللى الحرب قامت بيها لكن لو فى دولة حتى لو عربية او اسلامية لكن بتعمل ارهاب بس ارهاب بجد مش اللى امريكا بتضحك بيه ع الدقون يبقي لازم تقف عند حدها

هل تؤيد مرور الامريكان فى القناه ؟؟؟؟؟؟
الكلمة مطاطية كتير الامريكان
فى العام اؤيد اى عابرات او سفن للتجارة او الصناعة شغال وماله
لكن لو للحرب يبقي حسب موقفي من الحرب نفسها هل اؤيدها ولا لأ

هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟
محصلش والله
هو مستر ساركوزى جاب سيرتي فى التحقيقات ولا أيه !!!؟

بتمرر التاج ده لمين ؟؟؟؟؟
التمرير فى التاج اللى تحت

*********************************************
دا كان التاج الاول
اما اللى جاى فهو تاني تاج واللي هجاب عليه وهمرره لكل حد اعرفه ولو حد عايز يخده خير وبركه بس يبقي يسيبلي لينك البلوج بتاعه علشان نبقي نطلع ع الاجابات

1- انت ليه بقيت مدون ( يعنى ايه خلى الفكرة بتاعت التدوين تجيلك اصلا ) ؟؟

مش فاكر الموقف ساعتها كان ايه بالظبط بس كنت مخنوق من المنتديات والاشراف وكدا عملت مدونة علشان ابقي ملك نفسي

2- ايه هى اول مدونة عرفتها ؟؟

هى مدونة دلوقتى ما بقاش بيتحط فيها بوستات وهى دي اللى خلتني ابقي بلوجر وكمان المدونة بتاعه الوعي المصري

3- ايه اكتر سلبية انت شايفها فى المدونات؟؟

مممممممممممممم سؤال لذيذ بس مش عارف له إجابة صراحة

4- ايه اكتر حاجة لمستها بتفيد المجتمع من التدوين ؟؟

يعني بتزود خبرات الشباب وبتزود مدارك العقل والاستيعاب وبتوضح فكرة وجوب تقبل الاخر

5- هل غير التدوين جواك حاجة معينة ؟؟

اه إلى حد كبير

6- هل لقيت التدوين كتفريج هم ومنبر عالى تقدر صوتك يتسمع من عليه ؟؟

لقيت فيه تفريج هم فعلا وبنسبة كبيرة كمان

7- هل حسيت ان التدوين عالم كبير انت عايش جواه واصبحت فرد منه ؟؟

أه وبنسبه كبيرة جدا لدرجة انى مش بقوم من قصاد الكومبيوتر طول اليوم لما اكون فاضي ومفيش ورايا دراسة لو ورايا بقي دراسه بيقل اليوم لخمس ساعات بس انترنت وتدوين

8- هل اكتسبت صداقات من التدوين ؟؟

كتير وبعتز بيها اكتر من الصداقات اللى فى ارض الواقع بنسبه كبيرة بس مش تماما لأن فى ناس مينفعش حد يتخطاهم

9- لو اكتسبت صداقات .. ايه تقيمك ليهم بالنسبة لأصدقاء اللى تعرفهم من الشغل او ( الدراسة أو الجيران أو ... ) ؟؟

بالنسبة ليا انا معظم اصدقاء دراستي طول اليوم ( الاجازات يعني ) نايمين وبالليل ع القهوة ودا مش مودي خالص فبقضيها انا طول الليل والنهار ع النت والتدوين ومفيش مانع شوية جيمز بين الحين والاخر

10- هل أثر التدوين فى نظرتك للحياة من حواليك ؟؟

أه كتير

11- هل قفلت ( أو فكرت تقفل ) مدونتك فى يوم ؟؟ وليه ؟؟
لا محصلش لانى حتى لو بطلت تدوين هتفضل المدونة وقت من حياتى وفترة اعتز بيها حتى لو ندمت عليها لكنها فترة مش هتتمسح

12- هل فكرت تسيب التدوين تماما وتخرج من العالم دا ؟؟ وليه ؟؟
لا لأنه بصراحه عجبني كتير وانتشلني من عالم الواقع لعالم تاني رائع بتختار فيه انت كل حاجة تكون فين امتى وازاى ومحدش بيجبرك تكون فى المكان اللى انت عايزه

13- هتمرر التاج لميييييييييييييييييييين ؟؟
لكل اللى عندي فى الجرازر ريدنج ليست اللى عندي ع السايد بار وعلشان محدش يبقي ليه حجة هكتبهم كل اللى اتوقع انهم يردوا بترتيبهم فى الليست ودا ترتيب عشوائي اصلا
ودروب فروم ذا اوشن بردو
اكيد حبيب قلبي اللى مقدرش انساه فى الاوقات الجميلة دي كييييييييييييييييييييييييكو
وحبيب قلبي التاني بقي احمد باشا فهمي
ومش قادرة كمان
ولمرمر اللى بقاله شهرين سايبة المدونة من غير جرة قلم
ولأبو صلاح علشان يرجع بقوة للمدونة
ولمحمد باشا صبحي اللى تقريبا اكتر حد خد منى تاجات
وللجميل جدا ساجي علشان يبطل شوية من الخزعبلات بتاعته :P
والوافدة الجديدة على عالم التدوين صفا
ولنيرة علشان الدعوة الجميلة بتاعه الاسبوع اللى فات :D
ولسالي صاحبة المستند المفقود واللى شكلها اتحولت علشانه للتحقيق وما ظهرتش من ساعتها ع البلوج
وليوتا البرئية هدية علشان الاغانى الجامدة اللى هى بتجيبها دي
وللواد سمير المهاجر قصدي المسافر اللى اتمسح سهوا وهيرجع بإذن لله لليست
وللمعلم يمني اللى بتغيييييييييييييييييييييييب وتغيب وترجع ببوست كل شهر
ولرامي متسر برويد مكافأة علشان الشريط الجديد
وللأستاذ سمير شاهين بتاع السيما :P
ولمصطفي فتحي عسي ان يرد عليه
ولسعودي علشان يعرف يكمل السعوديات بتاعته على راحته
ولمحمد باشا حمدي المؤلف العظيم
ولأنين ناي دكتور روفي
ولأبي اللى مجهزه لها علشان تاخده بالمركبة وهى جاية
ولنقيب المدونين التخليلي خالو أحمد الصباغ
وللكبير مقاما اسامة باشا يوسف
ولأيه فى ايامها سابقا ولا حالبا مليش دعوة ردا ع التاج اللى فوق خالص
ولمهند باشا الاهلوى اللى زى يعني احسن ناس احسن جمهور احلي فريق وسمعني احلي سلام :P
ولزيزي اللى بتتكلم عن الظمأ وهى معاها البيركله
ولنسرين بسيوني عسي ان تذكرها الاسكندريه

وكدا كفاية اوى للغاية خالص علشان انا حاسس انى فى فرح
واى حد عايز التاج يتفضله مع اطيب التمنيات بالتوفيق على رأي بتوع امتحانات التربية والتعليق

تشي

تاااااااااااااااااااج الصبااااااااااااااااغ

خالو احمد الصباغ أبي إلا أن يحدفني بتاج فى دماغي بس الحمد لله جت سليمة
الأسئلة بالاحمر وأكيد الإجابة بالأزرق

1- هل توافق على حزف خانة الديانة من البطاقة الشخصية ؟
هى مسئلة شائكة فعلا انا فى حياتي ما بتعاملش على اساس ديانة الواحد وبالنسبة ليا عادي لو اتشالت من البطاقة بس المشكلة لو بتستخدم فى بعض المصالح ولازم يعرفوا الديانة يبقي ما ينفعش تتشال

2- ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
رأي الشخصي مش بحبهم وشايف سلوكهم دا مشكلة نفسية ولكن دي حريتهم الشخصية اللى عايز يعمل حاجة يعملها احنا مش بنحجر على حرية حد بس بشرط ما يأذينيش باللى هو بيعمله دا بالنسبة للاعتراف بيهم لا طبعا لأنهم اصلا مش كيان ومفيش حاجة اسمها الاعتراف بيهم دا مجرد شخص بيحقق رغبة شخصية ليه ومجرد انها شخصية دا بينفي عنها صفة انها كيان يجب الاعتراف بيهوعلشان ما بحبهمش مليش منهم اصدقاء

3- هل تعتقد بوجود إضطهاد للمسيحين فى مصر ؟
لا طبعا عايشين فل الفل أو على الاقل دا اللى انا شايفه حواليا فى المجتمع اللى انا عايش فيه

4- من هو الشخص الذى تختارة لرئاسة مصر ؟
بص إذا اتكلمنا عن الاسماء المطروحة فأنا مش شايف أى حد ممكن يمسك مصر كل واحد بلاقي فيه حته ناقصه ولحد دلوقتى مش عارف مين ممكن ممحطوط فى المكان دا

5- أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟
ولو ان حكاية الحكم والكلام دا كله مش ف دماغي بس لو حصل دا فى الاحلام يعني يبقي بالصلاة على النبي كدا هشوف دكتور اسامة الغزالى حرب ، فاروق الباز اللى هجيبه من ناسا رأسا علشان يساعدنا وأحمد زويل برضه لازم يبقي معانا وكمان المستشار زكريا عبد العزيز واكيد اكيد يعني خالو احمد برضو ومصطفي فتحي ومحمد حمدي واحمد شقير وحد تاني مش لازم اسمه بس هو عارف نفسه ( هو ولا هي ...؟؟ مش مهم ) ولو حصل بقي ونجحت اروح مدي الباز 25 مليون يورو واقوله يشوف حكاية الممر الموازى لنهر النيل اما زويل فاديله كل الامكانيات المتاحة علشان يظبط كل جامعات مصر واديله وزارة التعليم العالي والمستشار زكريا يمسك دار العدل اللى هتكون مستقلة بنفسها ودكتور اسامه هيكون مستشاري الشخصي اكيد وخالو احمد علشان نمسكه نقابة البلوجنج وتبقي بالبطاقة بقي وليهم نادي وتأمين وهيصة اى خدمة يا ردالة (ويا بنات برضو ) نحن فى خدمة الشعب وبالنسبة للأقباط والأخوان والمرأة كمان يشاركوا فى الحكم ما يشاركوش ليه يعني دا بلد ديمكراتيك يا خبيبي

6- فى رأيك الشخصى .. ما هى أفضل مدونة على بلوجر قمت بزيارتها ؟
ليه بس الإحراج بس بص كل اللى ع السايد بار عندي مدونات زى الفل وفى ناس شايفها فوق انها تتحط عندي وبزروهم من بعيد لبعيد زى خالو احمد والاستاذ شقير وغيرهم كتير

7- أيهما تفضل كزوجة .. إمراءه عاملة ، أم ربة منزل ؟
أكيد عامله

8- اذا تزوجت وأنجبت ولدين وبنتين .. أى الأسماء تحب أن تسمى ؟
يوسف ، يحي ، مريم ، .....؟؟؟؟؟؟؟

9- هل تعتقد أن توريث الحكم فى مصر . . سيتم فعلا أم لا ؟
انت رأيك أيه بص هو هيتم بس السؤال هينح ولا لأ بص هو حسب التوقيت اللى هيتم فيه نقدر نعرف هينج ولا لأ

10- فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟
مفيش حاجة اصلا اسمها حكومة مبارك ، مبارك هو الرئيس اللى بيعين الحكومات لكن فى حكومة نظيف وحكومة عبيد وحكومة صدقي وكدا يعني لكن ما وردش عليا حكومة مبارك دي :D

وادينا خلصنا من التاج والحمد لله افوتكوا بعافيه علشان اخد اسبوع نقاهه من التاج الخفيف خالص دا

تشي