تاااااااااااااااااااج الصبااااااااااااااااغ

خالو احمد الصباغ أبي إلا أن يحدفني بتاج فى دماغي بس الحمد لله جت سليمة
الأسئلة بالاحمر وأكيد الإجابة بالأزرق

1- هل توافق على حزف خانة الديانة من البطاقة الشخصية ؟
هى مسئلة شائكة فعلا انا فى حياتي ما بتعاملش على اساس ديانة الواحد وبالنسبة ليا عادي لو اتشالت من البطاقة بس المشكلة لو بتستخدم فى بعض المصالح ولازم يعرفوا الديانة يبقي ما ينفعش تتشال

2- ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
رأي الشخصي مش بحبهم وشايف سلوكهم دا مشكلة نفسية ولكن دي حريتهم الشخصية اللى عايز يعمل حاجة يعملها احنا مش بنحجر على حرية حد بس بشرط ما يأذينيش باللى هو بيعمله دا بالنسبة للاعتراف بيهم لا طبعا لأنهم اصلا مش كيان ومفيش حاجة اسمها الاعتراف بيهم دا مجرد شخص بيحقق رغبة شخصية ليه ومجرد انها شخصية دا بينفي عنها صفة انها كيان يجب الاعتراف بيهوعلشان ما بحبهمش مليش منهم اصدقاء

3- هل تعتقد بوجود إضطهاد للمسيحين فى مصر ؟

لا طبعا عايشين فل الفل أو على الاقل دا اللى انا شايفه حواليا فى المجتمع اللى انا عايش فيه

4- من هو الشخص الذى تختارة لرئاسة مصر ؟
بص إذا اتكلمنا عن الاسماء المطروحة فأنا مش شايف أى حد ممكن يمسك مصر كل واحد بلاقي فيه حته ناقصه ولحد دلوقتى مش عارف مين ممكن ممحطوط فى المكان دا

5- أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟
ولو ان حكاية الحكم والكلام دا كله مش ف دماغي بس لو حصل دا فى الاحلام يعني يبقي بالصلاة على النبي كدا هشوف دكتور اسامة الغزالى حرب ، فاروق الباز اللى هجيبه من ناسا رأسا علشان يساعدنا وأحمد زويل برضه لازم يبقي معانا وكمان المستشار زكريا عبد العزيز واكيد اكيد يعني خالو احمد برضو ومصطفي فتحي ومحمد حمدي واحمد شقير وحد تاني مش لازم اسمه بس هو عارف نفسه ( هو ولا هي ...؟؟ مش مهم ) ولو حصل بقي ونجحت اروح مدي الباز 25 مليون يورو واقوله يشوف حكاية الممر الموازى لنهر النيل اما زويل فاديله كل الامكانيات المتاحة علشان يظبط كل جامعات مصر واديله وزارة التعليم العالي والمستشار زكريا يمسك دار العدل اللى هتكون مستقلة بنفسها ودكتور اسامه هيكون مستشاري الشخصي اكيد وخالو احمد علشان نمسكه نقابة البلوجنج وتبقي بالبطاقة بقي وليهم نادي وتأمين وهيصة اى خدمة يا ردالة (ويا بنات برضو ) نحن فى خدمة الشعب وبالنسبة للأقباط والأخوان والمرأة كمان يشاركوا فى الحكم ما يشاركوش ليه يعني دا بلد ديمكراتيك يا خبيبي

6- فى رأيك الشخصى .. ما هى أفضل مدونة على بلوجر قمت بزيارتها ؟
ليه بس الإحراج بس بص كل اللى ع السايد بار عندي مدونات زى الفل وفى ناس شايفها فوق انها تتحط عندي وبزروهم من بعيد لبعيد زى خالو احمد والاستاذ شقير وغيرهم كتير

7- أيهما تفضل كزوجة .. إمراءه عاملة ، أم ربة منزل ؟
أكيد عامله

8- اذا تزوجت وأنجبت ولدين وبنتين .. أى الأسماء تحب أن تسمى ؟
يوسف ، يحي ، مريم ، .....؟؟؟؟؟؟؟

9- هل تعتقد أن توريث الحكم فى مصر . . سيتم فعلا أم لا ؟
انت رأيك أيه بص هو هيتم بس السؤال هينح ولا لأ بص هو حسب التوقيت اللى هيتم فيه نقدر نعرف هينج ولا لأ

10- فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟
مفيش حاجة اصلا اسمها حكومة مبارك ، مبارك هو الرئيس اللى بيعين الحكومات لكن فى حكومة نظيف وحكومة عبيد وحكومة صدقي وكدا يعني لكن ما وردش عليا حكومة مبارك دي :D

وادينا خلصنا من التاج والحمد لله افوتكوا بعافيه علشان اخد اسبوع نقاهه من التاج الخفيف خالص دا

تشي

5 comments:

soso said...

ممممممممممممم
هوة انت عاوزها عاملة لية ياتشى
ايوة
زوجتك
ربنا يرزقك الخير يااخى

الأستاذ said...

إيه التاج الملغم ده؟
بس إجاباتك جامدة ومنطقية وفي الصميم
ليك وحشة والله
ربنا يكرمك
تحياتي

mesh2dra said...

السلام عليكم

بص إذا اتكلمنا عن الاسماء المطروحة فأنا مش شايف أى حد ممكن يمسك مصر كل واحد بلاقي فيه حته ناقصه ولحد دلوقتى مش عارف مين ممكن ممحطوط فى المكان دا


وده لأن دايما العناصر الكويسة مستبعدة
ودايما لو لقيت وزير فيه منه الرجا مش بيكون ضمن التشكيل الوزارى اللي بعد كده
مش عارفة ده مقصود ولا انا ظالمة ودي مجرد صدفة .....ان بعض الظن اثم :d

اوافقك على بعض اختياراتك في السؤال رقم 5
بس الله ييكرمك بقى تدي شوية حرية للصحافة
وتشوف ايه هى الصحف الصفراء المصيبة وتقفلها وكمان الله يكرمك تخلي خريجي قسم الصحافة وخريجى كلية الاعلام بشكل عام يبقى ليهم نقابة
عيب اوى المرمطة اللي احنا فيها وولا نقابة تحمينا ولا يحزنون
وتلغي الشروط العجيبة اللي حطنها عشان الالتحاق بالنقابة

انا واثقة في اختياراتك
وواثقة في الشغل اللي حتعمله
بس اوعى الكرسي يغيرك
ساعتها مش حدخل على بلوجتك
لأ ساعتها حعمل هاكنج على بلوجاتك وكل ما تعمل بلوج حدمرهولك
وابقى قابلني لو عرفت اصلا تدخل على النت
ها .... الكرسي حيغيرك؟
:ppp

سلاماتي

mesh2dra said...

تشي
عاوزاك توصل رسالة
ده باعتبار انك الحاكم
اللي شغال عندي
ماهو انا الشعب
والحاكم بيشتغل عند الشعب

الرسالة بقى لأسامة يوسف
خليك واقعي
ياريت تبلغه سلاماتي
وتسأله عمل ايه في الامتحانات
والنتيجة اخبارها ايه
ما هو اعدادية... شهادة يا ناس

حتقولي برخامة طب ماتروحي تسأليه انتي
هو انتي صغيرة
حرد بأرخم
وأقولك اني مش عارفة اعمل عنده كومنت حااااااااالص
مش نافع ومش عارفة
تقريبا العيب من عندي
اشمعنى بلوجته .. بردو مش عارفة

بلاش كتر كلام واسمع كلام طنت مش قادرة
يالاااااااااااا
بسررررررررعة

شكرا تشي:)

سلاماتي

Che The Hermit said...

soso
هى الاجابة محتاجة بوست طويل بس انا شايف ان العاملة هتكون عندها خبره حياتيه هتقدر بيها تبني اطفال يقدروا يعايشوا واقع الحياة وكمان هتكون عندها خبرة نتعامل بيها مع بعض فى مشاكل تقف قدامنا كمان يبقي ليها فكرها المستقل الخاص بيها عنى كزوج يعني دي بعض نقاط
ربنا يرزقنا كلنا بالخير والسلام يا رب

الاستاذ
تاج جامد من خالو احمد
ربنا يخليك وسعيد ان الاجابات عجبتك
وانت والله واحشنا ومستني الجزء التالت

مش قادرة
ممممممممم .... حسب الحالة مرة مقصود ومرة مش مقصودة والدنيا بتمشي ما بتستناش حد
وكمان ايه حكاية النقابة وبتاع دي انا "حيالله" حته نائب مش رئيس وزرا بس ابقي فكرني اعمل استجواب بخصوص النقابة بتاعتنا الاول وبعدين على طول الاعلاميين
اه صحيح بخصوص الرسالة علم ونُفذ يا افندم

تحياتي كتير للجميع
تشي