اقرأ ... تكون - خلف الكواليس



مبشر العنوان بتاع البوست

اقرأ تكون الحملة والمجلة اللى بدأناها ومستمرين فيها إن شاء الله
واحنا بنخلص فى العدد الاول من المجلة حصلت عجائب وطرائف زي الفل

اول حاجة بدأنا التنفيذ وبدأنا نوزع التاسكس كل واحد هيعمل ايه
لكن يبدو اننا وش نحس وان الحملة راكبها عفريت لكننا هزمناه والحمد لله مع خسائر فادحة
اول ما بدأنا بدأ دكتور اياد وكان اول واحد مخلص المقال الافتتاحي للمجلة وكان دا دافع كبير لينا اننا نكمل
بدأنا واختارنا العقاد علشان يكون اديب العدد وكان عليا انا اخلص ملف العقاد ومقال تاني اخدت 3 ايام بخلص ملف العقاد وبجمع داتا قريت كتيييييييييير جدا وبدأت بقي اكتب باسلوبي بس كان مرهق جدا بس لما خلصت كنت مبسوط جدا اي واحد فى الدنيا بيكون فرحان وبينسي تعبه لما بيشوف ناتج دا قدامه

بدأت أشوف باقي الناس بقي سمير بسم الله ما شاء الله ظبط نفسه ع الاخر وخلص كل الشغل فى وقته تمام يومين كان رافع كل كتب العقاد ومظبطها كلها وكان فعلا اكتر واحد ملتزم وبعده على طول احمد عمر اللى بردو كان بيرفع كتب تانية

اللى عقدني فى عيشتي بقي فهمي يا عم خلص حاضر ومفيش حاجة لغاية ما جابلي الضغط بس الحمد لله رفع الكتب فى الاخر والنت فصل عنده بعدها ولغاية وقت كتابة البوست دا ( اشطات يا مان ) ودي كانت بداية النحس

مصطفي باشا العوليمي :P
بجد تمام التمام يعني فى تلت ايام خلص اللى نااااااااااااس ( واخدين بالكوا ها ) ما خلصوهوش فى شهر وبجد يستحق نرفعله القبعة

اللى جاي باقي شغل المجلة وكله تسييح فخلينا نعمل اسماء كودية علشان محدش يضربني
اول حاجة المفروض كل واحد عنده كذا حاجة يعملها او كتاب كان النساء من الزهرة والرجال من المريخ الكتاب كان فعلا نحس بما تعنيه الكلمة اللى المفروض يعمل نبذه عن الكتاب بنت صديقتنا ( مش راضي اسيح اهو اي خدمة ) وهي بقي من انصار حقوق المرأة اولا النسخة اللى لقيتها والوحيدة المتوفرة الكترونيا وحشة جدا لكن المشكلة ان فى النص مكتوب تعليق كاتبه المترجم للكتاب بيقول
" وهذا يثبت قول رسولنا ان النساء ناقصات عقل ودين "
معرفش هو كاتبه ليه ولا كان حد اصلا طلب رأيه ولا تعليقه المفروض انه بيترجم بس لكنه مستفز وفتح عليا ابواب جهنم المهم بعد اقناع انها تكمل الكتاب بدون النظر للحاجات دي كمل الكتاب نحسه كل شوية النت يفصل مرة ومرة الكهرباء واول ما تفتح الكتاب ضيوف عندنا
عاااااااااااااااااااااااااااااااااااااااا
الكتاب دا فعلا نحس
اخر عمايل الكتاب المشئوم النت قاطع بقاله اكتر من اسبوع والمقال ما خلصش واتأجل للعدد الجاي إن عشنا بقي

تاني نحس بسم الله ما شاء الله قصدي تالت ( محدش يحسد يا جماعة )
كان فى كتاب تاني وهو لا تحزن لعائض القرني ( انا شخصيا مش بحب الكتاب لكن فى ناس بتدعمه ) المهم كان المفروض حد تاني يخلصه ونبذه عنه لكن ليس كل ما يبغاه المرأ يلقاه ويكمل النحس والجهاز يبوظ
هههههههههههههههههههههههههه
يا سبحان الله فعلا شكله نحس مأثر على كل اللى معانا مرة النت يفصل نهائيا والمرة دي جهاز باظ
طبعا كان فى مقالات تانية الحمد لله وصلت بالسلامة من على جهاز بديل ( الحمد لله ) بس وصلت بقي يوم كام ؟؟ يوم 28 ستة يعني قبل يومين من نزول المجلة ( ايموشن واحد بيشد فى شعره )

اخر حاجة بقي كان المفروض نااااااااااااااس ( واخدين بالكوا ) عليهم مقالين يخلصوا واحد عن كتاب والتاني مفتوح حسب الاختيار وكل يوم اقول فين المقال فين المقال ولا حياة لمن تنادي كل شوية نغير الكتاب اللى هيتكتب عنه قلق فى الحضارة فرويد لا لا لا خلينا فى الامال الكبري لتشارلز ديكنز لا لا لا خلينا فى معرفش ايه
حراااااااااااااااااااااااااام
بس الحمد لله ربنا ستر والحاجة وصلت بس يوم كااااااااااااااااااااااااااااااام ؟؟ يوم 30 يعني اخر يوم اللى المفروض كان الديد لاين يوم 25 اصلا

كدا كله تمام وكله بعت الشغل بتاعه والدنيا فل الفل لااااااااااااااااااا لسه
؟؟
فاضل المقال بتاعي
ياااااااااااااااااللهول هو انا لسه ما كتبتوش
اه كنت مأخره ومش عايز اكتبه لان مكانش في الهام وكتبته يوم 30 كنت صاحي 26 ساعة ورا بعض بالظبط روحت فاتح الوورد وحاط ايديا ع الكي بورد وغمضت عنيا وسبتها تعمل ما بدا ليها وبعدين بفتح عيني بس هو دا قشطة كدا تمام اوي
بس بجد كانت حاجة مسخرة جدا انا اللى قاعد ازعق ومقالاتكوا فين والحاجة فين وخلص يا زفت و و و و لغاية ما انا زهقت من نفسي من كتر الزن عليهم ما خلصتش مقالي
ما دمت انا ما خلصتش بقولهم ليه يخلصوا يعني ما إذا كان رب البيت بالدف ضاربا فشيمه اهل البيت انهم هيخلصوا حاجتهم متأخر أكيد

انا بقي صاحي 26 ساعة قولت انام 3 ساعات بالظبط وصحيت علشان كنت لازم انزل رجعت قعدت ع النت ومرضيتش انام ( تقدروا تقولوا سادية ) والصبح بقي ( اصلي بنام نهارا واصحي ليلا ) على 9 كدا قولت انام واصحي على 1 انزل لمصطفي فتحي حفل التوقيع محمد اخويا الصغير كان ليه رأي اخر وفضل يرخم عليا لغاية ما وصلت الساعة 12 ونمت ساعه لا تغني ولا تسمن من جوع وقمت نزلت لمصطفي بردو وخلصت مصطفي وانا شبه سكران بمعني الكلمة بس نزلت وسط البلد لفينا شوية صغيرين وانا راجع بقي عمي كان فى وسط البلد رجعت معاه بالعربية ساعتين من اول ما ركبت لحد باب البيت وانا ناااااااااااااااااااااااااااااااااااااااايم

طلعت البيت كملت قعده ع النت تاني وما نمتش بردو
ادمان اعمل ايه بس فيا

عموما مبروك علينا كلنا اقرأ تكون العدد الاول وإن شاء الله اللي جاي احسن كتير

* انا مرضتش اذكر اسماء بس المرة الجاية هسيح على كبير والبي بي سي والجزيرة بقي وكله مش هرحم :P

تحياتي
تشي أحمد

22 comments:

ahmedomar said...

ههههههههههههههههههههههههه

معلش يا هيما انت الكبير بردة

هههههههههههههههههههههههههههههههه

مبروك العدد الاول

وان شاء الله فى تقدم مستمر

تحياتى

Drop of the Ocean said...

هههههههههههههههه
ايه الناس دى ياربى
انت جايبهم منين ، مش فاهمة
!!
انا لو منك اطردهم م الحملة واستبدل قوما غيرهم :)
ده ياعالم اهم حاجة الكومتمنت (على رأى شريف كومتمنت :))

ولسه اللى جاى اسود م السواد ياجميل
(واحد مطلع لسانه)

e_emy said...

هههههههههههه

دايما اى حاجه ف اولها صعبة
وعلشان ننجح لازم نواجه الصعاب
وان شاء الله تبقوا ف تقدم مستمر

و
مبروووك العدد الاول
وربنا يوفقكم يااااااارب

تقبل مرورى
سلام

Moustafa` said...

مبروك يا بوب

Oss said...

مبروك يامان على أول عدد
وربنا يكرمكم
انا لسه منزله امبارح
همخمخ فى وهاعلق عليه بعدين

شكلكوا جروب جامد
هقعد اعيط زى الجندى بتاع الطريق الى ايلات
ياريتنى كنت معاهم
ياريتنى كنت معاهم

Che Ahmad said...

عومار

يا سلام لو كل الناس زيك يا عمور والله انت اللى فيهم انت والواد سمير الصراحة

ربنا يبارك فيك ومبروك علينا جميعا

تشي

Che Ahmad said...

دروب

جرررررررررر

مش عارف جايبهم م المريخ

ممكن فعلا اطردهم صحيح
بس للأسف مش هلاقي ناس زيهم تاني
خلاص استحمل وأمري لله

وبالنسبة للجاي انتى عارفاني فى الشغل ( ايموشن ماسك عصاية )

انا قولت اهو :P

تشي

Che Ahmad said...

إيمي

فعلا كل حاجة فى الاول بتبقي صعبة وبعد كدا بردو صعبة :D

ربنا يبارك فيكي ويسمع منك

تشي

Che Ahmad said...

مصطفي

ربنا يبارك فيك سيادتك

وايه التعليق المقتضب دا ( أيه رأيك فى المقتضب دي جامدة مش كدا )

محسسني انك رجل اعمال وخايف تضيع وقت فى الكومنت امال لو مكنتش قاعد اشكر فيك دا كله

عيال اخر زمن

تشي

Che Ahmad said...

اوسامة

ربنا يبارك فيك يا جميل

مستني تعليقك ورأيك على العدد الأول

وبالنسبة للطريق إلى إيلات تنفع تبقي معاهم على فكرة

يوووووووه قصدي ينفع تبقي معانا
هكلمك ع الميل لما ارجع بقي

تشي

ka2en Makboot said...

فكرة جميلة وفريق عمل هايل

بس هو لازم التيم ليدر يشد فى شعره ويتحرق دمه والناقص يكمله بنفسه

زي المخرج فى الافلام كدا لازم يبقى شخصية لاسعة من كتر الضغط هههههه

ربنا يوفقكم يارب

abo salah said...

بعد السلام عليكم

هههههههههههه
ولا يهمك يا أبو حميد

لازم تكون البداية كده
لكن بعد كده الأمور هتتظبط

وربنا يكرمكم علي المجهود الرائع دا
ويجعله فى ميزان حسناتكم

تحياتي

•«ρяoιd»•™ said...

الف الف مبروك

و الفكره حلوه قوي

تحياتي

هناء صابر said...

مبرووك عليكم الموقع و العدد الأول من المجلة ..
حقيقى ..فكرة الحملة هايلة ومهمة جدا ...
اتمنى ا المشاركة الفعالة فيها ..
او ان يحدث تعاون بينكم و بيننا _جمعية مصر للثقافةو الحوار _ فى القاهرة و الإسكندرية ....
مجهود رائع ..
و حملة موفقة باذن الله
لك منى تحية ..

هناء صابر
جمعية مصر للثقافة و الحوار
رئيس مجلس ادارة الجمعية
د/ محمد سليم العوا

Anonymous said...

مبروووك ياباشا

فى تقدم دايم ياباشا
شد حيلك

Che Ahmad said...

two in one

مبسوط ان الفكرة عجبتك ويارب الشغل نفسه يعجبك اكتر

وفعلا زي ما بتقولي لازم الواحد يشد في شعره

ربنا معانا كلنا

نورتينا
تشي

Che Ahmad said...

ابو صلاح باشا

ربنا يخليك يا جميل ع الدعاء

وإن شاء الله الأمور تتظبط اكتر

مستنينك معانا

تحياتي
تشي

Che Ahmad said...

برويد

والله وليك وحشة يا راجل فعلا

ربنا يبارك فيك ومبسوط جدا ان الفكرة عجبتك

سلامات يا جميل
تشي

Che Ahmad said...

م / هناء

ربنا يبارك فيكي
وفعلا مبسوط ان الفكرة عجبت ناس كتير ويا رب تحقق اهدافها

واكيد يشرفنا مشاركتك معانا

تحياتي
تشي

Che Ahmad said...

المواطن الزهقان

ربنا يبارك فيك يا جميل

ويا رب دايما فى تقدم

تحياتي
تشي

بنت من زحل A girl from Saturn said...

مبروووووووووووووك
وعقبال الأاعداد الجاية إن شاء الله
وربنا يعينكوا
انا كمان وجماعة زمايلى بنعمل مجلة وطالع عينا الحمد لله
ربنا يستر وتتم على خير
ربنا معاكوا

Che Ahmad said...

ربنا يبارك فيكي يا نور

ويا رب يكون العدد عجبك

وربنا يوفقكوا فى مجلتكوا وتتم علي احسن ما يكون

تحياتي
تشي