(+18) عن غشاء البكارة الصيني والهوة الإخلاقية

ملاحظة مهمة بس البوست لمن هم اكبر من 18 سنة وعنده وعي كامل انه يقرا ويحدد رأي واضح وصريح مش انه يتعامل مع نفسه بكلام كوبي وبيست

من زمان وموضوع غشاء البكارة الصيني اثير بعد موضوع لا اعلم الصراحة صحته نشر ف اليوم السابع
الموضوع عمل لغط كبير جدا والناس فضلت تتكلم - احنا مش بنعرف غير نتكلم اصلا - والناس اتقسموا اتنين واحد بيقول انه هيعمل هوة أخلاقية عميقة والأخر قال انه مبسوط بوجوده لإنه هيلغي فكرة ان غشاء البكارة يكون هو مقياس الشرف للبنت
غير طبعا القسم التالت اللى ملوش ف اي حاجة وكله عنده ماشي

علي" كان عمل شير للينك بيقول ان دا فعلا منتج حقيقي وموجود"
ودا اللينك
http://www.ecplaza.net/product/166925_1102142/artificial_hymen_for.html

انا بس عايز اللى يدخل ع النت يشوف الاستخدام بتاعه

قبل ما اقول ليه الاستخدام خلينا نقول ان غشاء البكارة الصناعي موجود في العالم من قبل ما يجي عندنا بمده اعتقد انها كبيرة يعني مش بدعة اخترعت علشانا ولا حاجة
لو بصينا للأستخدام بتاعه هنلاقي مكتوب :
2. The best time is 20 to 30 minutes before sex.
معني الكلام زي ما انتوا شايفين ان افضل استخدام لغشاء البكارة الصناعي دا قبل الجنس بمدة من عشرين لا تلاتين دقيقة
يعني استخدامه خارج القطر العزيز مصر هو للإشباع الجنسي أو للنشوة الجنسية
يعني سواء استخدام في منظومة الجواز او الفرينديز هناك ، فهو استخدام بالنسبة ليهم اخلاقي تماما لانه بيساعدهم للوصول لحالة سعادة ، واللى هيعملوه في وجوده هيعمله في عدم وجوده وليس واسطة العقد إطلاقا وكان مرة مقاله مش فاكر لمين بس كان دكتور ليه مقاله دايما هناك انا مش فاكره المهم بيقول انه مرة جاله واحد بيطلب منه يعمل لمراته اعادة لغشاء البكارة لانه شعور ممتع لأي رجل وان دا شيء في امريكا مألوف وان في مراكز بتقدم اعادة الغشاء دا كهدية في اعياد الميلاد من الازواج لزوجاتهم يعني دا شيء مألوف جدا هناك

عندنا احنا هنعمل العكس
هيستخدم بعد الانتهاء من ممارسة الجنس لمداراة الفضيحة
انا مش بدعو ان الجنس يكون متاح للجميع زيهم

انا بس ببين الفارق بين استخدامنا واستخدامهم
هما عندهم صدق مع الذات جدا ، حتى لو هما دينيا حرام عندهم العلاقة الجنسية خارج اطار الزواج لكنهم بيمارسوها ما بيحاولوش يداروا دا ويبانوا اعفاء
لا عندهم صراحة ومواجهه للمجتمع والذات لان كل واحد مسئول عن نفسه

طيب وبعدين بالنسبة لينا في مصر

هل غشاء البكارة الصناعي هيعمل هوة أخلاقية ؟؟
اللى عايز اقوله ان الهوة دي أصلا موجودة ودا ما يمنعش انه هيزودها
لكن هو احنا بندور اننا نخلي الحفرة زي ما هي ولا نردمها
كل حملات محاربة غشاء البكارة دا اراها واهية لو فعلا هيتم استيراده
لو الشرطة نفسها منعته هيبقي مرغوب اكتر وهيتفنن الجميع في طرق تهريبه والحصول عليه وتبقي تجاره زي المخدرات كدا وبردو هينتشر
وحتى لو قدرنا نحارب وجوده ، هل هنحارب عمليات الترقيع الموجودة حاليا في شقق تحت بير السلم ؟؟
هل قدرنا اصلا نحاربها وهي اللى موجودة من زمن ليس بالقليل؟؟
ما اعتقدش بل هي بتزيد لأن الطلب عليها بيزيد

طيب والحل ؟؟
غشاء البكارة دا واللى هيسببه من تهاوي في الأخلاق وعيادات الترقيع وما تسببه من تهاوي في الاخلاق وغيرها كتير
دي كلها بالنسبة ليا فروع من شجرة فيها اسباب كتير ولو فضلنا نحارب كل واحد منهم هيزداد جئها تعمقا وإنبات لفروع اكتر مش لازم تكون مرتبطة بموضوع الشرف ولكن في مواضيع تانية كتيرة

والحل بردو ؟؟
الحل في نظري هو اننا نعالج الهوة الاخلاقية نفسها مش المسببات فيها ونقتلع الشجرة دي من أساسها
إننا نعيد الأخلاق للمجتمع المصري
اللى مليان سلبيات مش مضطر اقولها لان كل اللى بيقرا عارفها قبلي واكتر مني
غياب الامان ف الشارع والاحساس بالخوف دايما شعور بيشترك فيه كتير من اللى بيمشي ف الشوارع دلوقتى من تحرش لسرقة لاعتداءات وعلي الجميع ولاد او بنات
دا ملوش دعوة بقي بالغشاء او غيره

مشكلتنا ف الاخلاق
والحل اننا نرجع ليها
الحل اننا نعالج انهيار الاخلاق مش نحارب الحاجات الحالية اللى بتزود الانهيار لان اثناء ما احنا بنحارب فرع فروع تانية كتير اوي بتنمو وتكتر وبتظهر

يا ريت كل الناس اللى عايزة تحارب الحاجة دي تحاول توجه طاقتها لإنها تصلح المجتمع واخلاقياته
احسن كتير

دا رأيي انا الشخصي طبعا

36 comments:

صفا سارة said...

جبت المفيد انما تعمل ايه فى مجتمع متناقض ومقرف بيفضل يستخبى ويعمل نفسة مش شايف المشكلة وينفى فيها ويفضل يحاول يثبت انه راعى القيم والاخلاق بمجرد مظاهر لكن محاولة لتصحيح اخلاق بجد نادرة جدا كله كلام وبس فعلا بيقولك من اكتر الشعوب تدينا ازاى مش عارفة

Anonymous said...

انا احب الخص رأي في ثلاث نقط
اولا :ان غشاء البكاره ده مش مقياس لشرف البنت زي ما حضرتك قولت في البوست
ثانيا:اننا فعلا لو اعتبرنا ان دي هي المشكله الاساسيه وقررنا نعمل حل من الاتنين هو اننا نمنعها فده مش حل لان لو المجتمع نفسه فاسد فلو منعناها برده لو ليه رغبه فيها هيستخدمها ويجيبها اما لو صرحنا بيها فده يمكن يزيد من الهوه الاخلاقيه اللي حضرتك بتتكلم عليها دلوقتي وهي فعلا موجوده في مجتمعنا بدرجه كبيره
ثالثا بقي وده االاهم :ان انا من رأي حضرتك طبعا ان العيب مش فأننا نستورد ولا نهرب ولا نمنع ولا نصرح دخول غشاء البكاره الصيني ...لأه الحل في اخلاق مجتمع بحاله وامانه عند كل فرد ....يعني هي فعلا عيبها والفكره السائده ليهاعند مجتمعنا انها بتداري الفضيحه وبس فقط لا غير
انا اخيرا بعد كلامي اللي هو مكتوب عن اقتناع برأي حضرتك ومؤيد ليه احب اقول انها مشكله اخلاق ولازم نحاول نحلها

Anonymous said...

يا عم احترم نفسك بقي

فى فرق بين الصراحة والوقاحة

Che Ahmad said...

اقولك انا ازاي
تدين من نوعيه من برا هللا هللا

Che Ahmad said...

انونيموس واحد
عجبتني دماغك

Che Ahmad said...

انونيموس 2

انت زعلان ليه
انا مش محترم يا سيدي اصلا
وبعدين انا كتبت فوق تحذير
يعني قايل اني هكتب كلام ممكن يضايق ناس وناس لا
ف كل واحد لو حاسس ان ف كلام ممكن يضايقه من العنوان بلاش يقرا
سهله جدا وانا مش بضرب حد علي ايده
دي اول حاجة

اتنين
دي مدونتي انا واكتب عليها اللى انا عايزة وقاحه بقي او غيره دا ما يخصش حد غيري واللي مش عاجبه الكلام في 2 مليون مدونة غيري ممكن يقراهم

تالت حاجة والاخيرة
انا حتى لو بتكلم بوقاحه بتكلم بأسمي وقدام الناس مش بتخفي ورا انونيموس مجهول

ومن غير تحياتي

Anonymous said...

وفر تحياتك للى عايزين يقرو عن غشاء البكارة ويتثقفو

وكاتبلى تحذير

دا التحذير دا اللى بيشد الناس

يا راجل بقي بلا قلة ادب


وبعدين انا اكتبلك اسمي ليه طالما متعرفنيش ومعنديش مدونة
اهو رد من ضمن الردود
رد انت بس فى المضمون

ومن غير تحياتى بردو
اوفرها لموضوع محترم

Che Ahmad said...

مش مشكلتي ان المجتمع عقيم وغبي والممنوع فيه دايما مرغوب
مش مشكلتي ان الناس بتدور عن الحاجة اللى ما تناسبهاش وتقراها
مش مشكلتي انك مريض وبتقرا حاجة مس مناسباك ولو ما قريتش تبقي بتتغابي وتعلق علي حاجة ما قريتهاش

بالنسبة لقلة الادب قولتلك انى مش محترم اصلا في التعليق اللى فات

Anonymous said...

انا انونيموس واحد
علي الرغم من اننا بنختلف في حاجات كتير من افكارك الي ان الموضوع اللي انت كتبته ده بجد مشكله وانا مقتنعه بيه جدا
وبقول للانينومس الاخرين انهم اخدوا الموضوع بسطحيه جدا ونظروا للموضوع علي انك بتتكلم في حاجه عيب وما ينفعش تتكلم فيها ما نظروش للموضوع علي انه مشكله بجد وان لا حياء في العلم ....طبعا هيقولوا ان ده مش علم ...لا هو علم اي مناقشه تخص اي شئ جديد في العلم يبقي علم حتي وان كان ضدد تقاليد مجتمعنا ...يعني مش بمناقشته يبقي احنا حطمنا التقاليد دي
انا طولت ...سوري ...بس كان نفسي اقول الكلام ده

Che Ahmad said...

شكرا كتير علي ردك
اوجزتي حاجات كتير

واعتقد اتنين بنات ردوا عادي جدا وولد رد رد متشنج ومضايق وكأني ....... ولا بلاش

ع العموم مش مشكلة
شكرا كتير ع الرد وابقي طولي براحتك
التطويل مطلوب عندنا وما تخليش حاجة في نفسك :)

halaS demahoM said...

احمد باشا ابراهيم
حبيبي
بس هنا مش حبيبي
للاسف
ارجو تقبل الموضوع بصدر رحب
بعد اذن سيادتك طبعا
انا بحييك جدا جدا ع الموضوع ده
اتقل عليه بس
ده فاتوره للي جاي
معلش هنختلف بس عادي
عشان متدورش كتير
انا محمد صلاح
ارد بقي في رد تاني عشان كفايا علي الرد ده لغيت هنا

halaS demahoM said...

بص يا سيد احمد
مش عارف ادخلك منين بصراحه
\\
عندهم صراحة ومواجهه للمجتمع والذات لان كل واحد مسئول عن نفسه
\\
احب ادخل من النقطه دي
طايب يا عم هما شعب كده احنا مالنا احنا
كل واحد ليه عاداته وتقاليده
وزي ما الناس دي لا بتحترمك ولا بتحترم عاداتك ولا تقاليدك
انت ليه تقدرهم كل التقدير ده وتتكلم عن عاداتهم
ثانيا مينفعش تقول كل واحد مسئل عن نفسه
يعني ايه؟
فين انت من
كلكم راع وكلكم مسئول عن رعيته
ويعني ايه كمان
اختي تعمل حاجه وحشه وتقول مسئوله عن نفسها
دي بتشئ ليا كأخ ولابوها ولعيلتها كلها ولدينها
لاء مش كل واحد مسئول عن نفسه

هننتقل لجزئيه تانيه خالص
انت ليه كتبت موضوع زي كده؟
انت حر وكل حاجه ... محدش فتح بؤه
بس واحد زي حالاتي لا كان يعرف اي شئ عن الموضوع ده
يا مان انت اللي بتعمل دعايه للحاجات دي بكتاباتك عنها
واكيد في ناس مش عارفه حاجه عن الموضوع ده هتعرف لما تقرا الموضوع
طب ليه نعرف واحده متعرفش حاجه عن الموضوع ده
ونشدها لتحت
لانها بيكون فاضل بينها وبين الرزيله شعر
والشعره دي بتكون البكاره
لما تيجي انت تقولهم الحل موجود
وفي غشاء بكاره صيني وتمنه معقول
النوع ده من البنات مش هيفكر
وعلي طول هيروح للرزيله
والحل ب100 جنيه
عمليه سهله جدا
مبقولش ان الحاجات دي مش موجوده
لاء موجوده وبكثره كمان... انا معاك
بس في ناس علي وشك ومانعهم مانع ازاي نقولهم ده مش مانع؟

\\
إننا نعيد الأخلاق للمجتمع المصري
اللى مليان سلبيات مش مضطر اقولها لان كل اللى بيقرا عارفها قبلي واكتر مني
غياب الامان ف الشارع والاحساس بالخوف دايما شعور بيشترك فيه كتير من اللى بيمشي ف الشوارع دلوقتى من تحرش لسرقة لاعتداءات وعلي الجميع ولاد او بنات
دا ملوش دعوة بقي بالغشاء او غيره
\\
يعني ايه يعني؟؟
يتدعي علي ابنك وتكره اللي يقول امين
بتشوه صورة بلدك ولما حد يقولك بلدك وحشه تقوله لاء؟
طب ما انت بتقول اهون
لاء يا جماعه
مصر لسه بخير
وزي مافي الوحش اللي الناس ملهاش سيره غيره
اكيد في الحلو
أمتي كالمطر لا يُدرى أوله خير أم آخره خير
الامه هتفضل بخير الي يوم القيامه
وده مش كلامي ولا كلامك
هتقولي انا بحاول اصلح الدنيا
هقولك الصلاح بيبدأ بصلاح القلوب
وابدأ بنفسك
ولو حبيت تصلح يبقي بالفعل ولو مفيش وسيله غير الكتابه
يبقي نكتب الحلو
فهمتني؟

والله يا جماعه احنا اللي بنعمل دعايه للحاجات دي
\\
هل غشاء البكارة الصناعي هيعمل هوة أخلاقية ؟؟
\\
وهوه كبيره كمان
وبعد كده كل واحد مش هيعرف اللي معاه اصلي ولا صيني
ههههههههه
لاء يا احمد
انت بتحفذ علي نشر الزفت ده وتحاول تطلع العيب فينا
عاوز تحط البنزين جمب النار وانت عارف انها هتولع
وتقول هنبقي نطفي الولعه

\\
لو الشرطة نفسها منعته هيبقي مرغوب اكتر وهيتفنن الجميع في طرق تهريبه والحصول عليه وتبقي تجاره زي المخدرات كدا وبردو هينتشر
\\
ماهي لو الشرطه معملتش كده
هتلاقي الشعب كله ماشي بيشرب مخدرات في الشارع ومش خايف ولا همه حاجه
غير لما يكون بيشرب في خفاء وخايف حد يشوفه
في حاجه صحيحه وفي حاجه اصح منها
والاصح ان الشرطه متعملش غير كده

طولت انا عليك
صح؟
ماشي
تقبل مروري
س ل ا م ي

Che Ahmad said...

محمد صلاح
انا معنديش مشكلة مع اي حد يرد بأي طريقة علي فكرة وحتى لو معرفوش عادي يعني
المشكلة اني مش بحب حد يتخفي وراء انونيموس ويتكلم بطريقة مش ظريفة
منور

Che Ahmad said...

بص خلينا نبدأ من كلامك

اولا مين قالك انهم مش بيحترموك ولا عاداتك وتقاليد كدا رخامة ، بغض النظر عن انهم اصلا ميعرفونا ولا عاداتنا وتقاليدنا علشان يكروهوا ولا يحبوا
بس إذا كنت ان اشخصيا مش بحترم لا مجتماعاتنا ولا تقاليدنا
انت محسنني ان التقاليد دي قرآن منزل ، لا دي حاجات ربما صابت او جانبها الصواب ومن حق كل شخص يتفق او يختلف معاها
وبعدين ايه المشكلة لما احترم واتلكم عن حاجة عجبني فيهم ، عادي جدا انا بتكلم عن نقطة كويسة جدا فيهم واتمني انها تبقي موجودة عندنا دا مش عيب
وبعدين انا ما قولتش كل واحد مسئول عن نفسه اصلا بلاش تأويل للكلام في غير موضعه
ومع اني فعلا ملتزم بأن كل واحد مسئول عن نفسه ودي مختلفه عن كلكم راع بس انا اصلا ما قولتش كدا ف الموضوع
----------
بخصوص ليه بتكلم عن الموضوع دا
اولا الموضوع الناس كلها بتتكلم عنه واكتر من جريدة كتبت عنه ، انا مش بتكلم ف حاجة لوحدي مثلا ولا بعلن عن حاجة
كون انك متعرفش دا تقصير منك انت انا مش مسئول عنه ولا احاسب انك عرفت مني ولا من غيري ، وبعدين كمان انا مش بساعد حد ع الرزيلة وانا في رأيي يعني لو واحده عايزة تزني ودي مشكلتها ومستنية غشاء بكاره صناعي تبقي انسانة مزيفة ومعندهاش شجاعه انها تواجه الناس برغبتها وبتدور علي حاجة تتخفي وراها ، دي شخصية مريضة في مجتمع مريض بيداري عيوبه ومش بيقدر يواجهها
----------
انا مش بشوه صورة حد
انا بتكلم عن سلبيات في بلدي محتاجة تتغير
وبلاش الكلمتين بتوع الخير والبتاع احنا اصلا مش امة محمد ، لما نبقي بنمشي بتاعليمه ومش بناخد رشاوي ولا بنعاكس بنات ولا بنغتاب ولا بننم علي حد نبقي فينا خير ، أما ان كل واحد يصلح نفسه وينسي التانيين دا مش في قوانيني ولا قوانين حد بيتمني صلاح البشرية وإن كنت انت شايف كدا اعمل بيه بس سوري انا مش كدا ، وبعدين اكتب الحلو والوحش اخبي عليه ؟؟
مش فاهم يعني ، لازم اكتب الوحش ووجهه نظري فيه ورأيي ومحاولتي لأصلاحه علشان نعرف نصلحه مش هندفن كالعادة رؤسنا في الرمال .
----------
وكمان انا مش بعمل دعاية لحاجة ، انا بتكلم عن رأيي وانا مش أول ولا اخر واحد يتكلم وبعدين دا هما اصلا كام واحد اللى بيقروا ليا وحتي لو هما مليار واحد كل واحد مسئول يعرف الكلام ويفهمه ويحدد رأيه منه انا مش بقول قرآن الناس هتعمل من غير ما تفكر ، دا حتى القرآن لازم نفكر فيه .
بخصوص الهوة ما قولتش لا
انا قولت انها موجودة اصلا بس هو بيزودها ، مرة تانية بلاش تأويل كلامي غير ما يحتمل
----------
بخصوص بقي اللى بيعمل حاجة ف الخفاء ما دي مش حاجة حلوة ، اللى خايف يشرب خشيش علشان الحكومة ما يشربس يا اما يتحداها ويشرب ما دام مش شايف انه بيعمل حاجة غلط ، دي ازدواجية غريبة جدا

سلامات

maryoma said...

بجد الموضوع رائع يا أحمد .. واللى أروع منه الردود عليه
بالنسبة للموضوع لازم طبعًا نتكلم عن الحاجات الوحشة ونطلعها ونحاول نتكلم عنها ونصلحها مش ندفن راسنا ف الرمل زى النعام (ملحوظة ..انظر اسفل التعليق)...
وطبعا العيب الاول والاخير ف الاخلاق اللى تدهورت عند الناس ..الاخلاق الحقيقية اللى بجد هى اللى بتنتج من جوه الشخص نفسه مش عشان انا خايفة او هتعاقب او حد هايشوفنى لو عملت كده ومعملوش يبقى ابقى بنت عندىاخلاق .. لأ .. انا ابقى بنت عندى اخلاق لو كل الخيارات متاحة قدامى وانا اللى اخترت ابعد عن الحرام والعيب بمزاجى وتبعًا لطريقة تفكيرى وتقديرى لمعايير الخطأ والصواب هى دى الأخلاق اللى بجد
اما بالنسبة للتعليقات .. واضح جدا قد ايه كم الازدواجية اللى عندنا واللى بتبان فى اننا نحب نعمل الحاجة بس مانتكلمش عنها عشان عيب
وبالنسبة للانونيموس اللى بينقدوا بشكل مش محترم بكل بساطة اللى مش عاجبه الكلام مايقراش ولو قرا ومعجبهوش يبقى ميعلقش ولو علق يبقى باسلوب مهذب
اللى بيتكلموا عن العيب والحرام يشوف نفسه وهو بيشتم حد وملوش ان هو يتهم حد بالباطل وبيغلط وخلاص من غير مايناقش بطريقة مهذبة ويقول رايه
وكمان متخفى عشان محدش يعرفه يعنى بيضرب ويجرى ومش بيواجه ودى مشكلة معظمنا
وبحترم حد زى محمد صلاح -بالرغم من انى مش متفقة معاه -لكن هو حد متحضر ناقش واتحاور وقال رايه بكل صراحة وف نفس الوقت باسلوب مهذب واهم حاجة انه موضوعى مش داخل يشتم وخلاص ووجهه نظره تحترم حتى لو مش عاجبانى
عذرًا للإطالة
أصلى كأنى ماصدقت لقيت فرصة وقلت اتكلم
وكمان لما قريت الموضوع ف الجرايد وع النت استفزيت انى اقول رايى
ولما قريت التعليقات استفزيت اكتر انى ارد
وف النهاية انا شايفة ان حل كل مشاكلنا الخاصة او العامة هو كلمتين وبس
" المواجهة ... والحوار"
نواجه يعنى نعترف ان فيه مشكلة اصلا .. ونحاور يعنى نتكلم عشان نوصل لحل
ملحوظة اخيرة
دايما نقول عن الهروب اننا بندفن نفسنا ف الرمل زى النعام
المقولة دى خطأ لأن النعام مش بيعمل كده
"النعام بيعيش ف جماعات ولما الإناث بتضع البيض نظرًا لكبر حجم النعامة بيختاروا منهم احسن نعامة فيهم واكثرهم صحة عشان ترقد ع البيض بتاعهم كلهم فهى بتحفر حفرة وتضع البيض كله فيها وعشان كتر عدد البيض فهى بتقوم كل فترة وتقلب البيض تحط اللى فوق تحت واللى تحت فوق عشان كل البيض تشمله بحنان بطنها ودفئها وعشان تعمل كده بتنزل منقارها ف الحفرة عشان تقلب البيض ..معرفش مين بقى ابن الحلال
اللى شاف نعامة بتقلب بيضها افتكرها بتهرب من الصياد وطلعت الإشاعة يعنى مش كفاية مش عارفين نواجه مشاكلنا كمان بنتبلى ع النعام
ربنا يسامحنا ويهدينا

Che Ahmad said...

maryoma
اولا منورة
ثانيا متفق معاكي جدا في تعريفك للاخلاق وامتي يكون البني ادم ذو اخلاق وامتي لأ
بالنسبة للتعليقات انا في حاجة مستغرب جدا منها ، إن تقريبا كل البنات شايفين الموضوع عادي جدا او ع الاقل مش موضوع ممنوع ان يكتب عنه ، علي العكس الولاد ودي حاجة غريبة جدا
وع العموم الإطالة عندنا هنا مرحب بيها وردودك كمان مرحب بيها
بالنسبة لوجهه نظرك ف الحل انا متفق معاكي انها واحدة من اهم الحاجات اللى محتاجينها هي المواجهة وبالنسبة للحوار محتاجين الاول نتعلم كيفية الحوار بعدين نتحاور

بالنسبة للنعام انا قولت ندفن راسنا ف الرمل بس ما قولتش زي النعام :D
انتى اللى قولتي مش انا وانا ما قولتش كدا علشان عرفت من فتره ان النعام احسن منا شويتين ومش بيدفن راسه ولا حاجة
احنا اللى خايبين وبنتداري ف النعام

منورة :)

maryoma said...

اولا الانسان بينور لما يفكر واحنا بنفكر يبقى لازم ننور بس ممكن كده نتكهرب
وثانيًا انا فعلاخدت بالى ان البنات موافقين لكن الولاد لأ ... دى ممكن تكون عشان البنات دماغها اتفتحت اكتر او عندها قابلية لده وممكن يكون التفكير الشرقى برضه مأثر ف الولاد
وده مجرد رأى مش بقول كده على كل البنات ولا كل الولاد
ثالثًا احنا فعلا لازم نتعلم ازاى نتحاور
وده هييجى بتجربة الحوار لحد مانتعلم
رابعًا انا عارفة انك مقولتش كده ع النعام انا كنت بقول راى اغلب الناس وانا كنت منهم لحد ما قريتها فعرفت الصح
شكرا

Che Ahmad said...

تصقيفة علي الانسان بينور لما بيفكر
بس الفكر مش بيكرهب غير اللى بيخافوا م المعرفة
بالنسبة للتفكير انا مش شايف حاجة اسمها شرقي وغربي ما انا انتمي للشرق ومش كدا ومصر ف الستنيات مكانتش كدا
الفكر بس اتغير شويتين تلاته كتير
العفو :D

maryoma said...

ارفع القبعة للتصقيفة
الفكر ممكن يكرهب بس مش اللى بيخاف من المعرفه بالعكس ده ممكن يكهرب اللى عايز يعرف اكتر بس ماستخدمش الفكر صح
وده يمكن تفسير لحالة المجانين العاقلين اللى موجودين ف المستشفيات الكتير
دول مش مجانين قد ماهما اشخاص هشة مش قادرين بالتفكير يتعاملوا مع شوية منغصات ف حياتهم او مش عارفين يفكروا فى التعامل مع المنغصات دى
الفكر هنا كهرب لانه مشتغلش صح
وانا موافقة طبعًا ان الفكر مطلوب فى كل شىء بس برضه اعترف ان فيه حاجات لازم نقبلها كما هى لان الحاجات دى لو تناولناها بالتفكير الغير سليم او الغير محكوم - بينا طبعًا - ده هيؤدى الى اختلالات نفسية وده اللى حاصل مع الناس الهشة اللى مقدرتش تستحمل تصدق شوية حاجات فعاشت ف المستشفى يطلق عليها خطأ لفظ مجانين
بالنسبة للشرقى والغربى والقبلى والبحرى
اكيد فيه استثناءات وانا قلت كده وفيه ناس بتفكر بدماغها بغض النظر هى موجودة فين
لكن ده لاينفى وجود عوامل معينة بتأثر ف التفكير
اللى قدر يتخلص من الوحش منها كويس واللى مقدرش هو ده اللى مش قادر يواجه ولا يحاور وبيرفض وخلاص
وده دليل انه متأثر بيها
وده دليل على وجود التصنيفات دى
الإنسان مننا وهو صغير بيبقى زى العجين بيتشكل من خلال اهله اللى بيربوه البيئة اللى عايش فيها المدرسة الاصدقاء الحاجات اللى بيسمعها تصنيفه كنوع او كموجود ف منطقة معينة
لحد لما ينضج هو ويبتدى يفلتر نفسه يعنى يرمى كل الحاجات اللى مش مقتنع بيها ويخلى الحاجات اللى عجباه ويزود عليها من عنده ويبتدى يبنى تفكيره ومبادئه
بس كل مايمنعش ان فيه شوية عوامل غصب عنه اتأثر بيها ف فترة
اخدها بعد كده او ماخدهاش دى بقى مشكلته وده تفكيره وده تصنيفه
لكن ف النهاية الإنسان هو الإنسان ولو ملوش عنوان كما قال الكينج

Che Ahmad said...

هو أنا الحقيقة مش بشوف ان في حاجة لازم نقبلها زي ما هي ، نفكر ولو لقينا اننا مش عارفين بتفكيرنا ليها وصال نبدأ ندور ونقرا ونعرف علشان نعرف

بالنسبة لكلامك عن الانسان وتطوره الفكري خلال المراحل صيغتي فكرة عندي من زمان مش عارف اصيغها او اعبر عنها بالوضوح دا
ياللا كمان تسقيفة

واكيد متفق مع الملك

maryoma said...

الحقيقة انى اصدق انى عمرى ماهوصل للحقيقة إلا إذا روحت للحقيقة الكبرى وهى الموت
فطبيعى اننا نفضل نلهث وراء الحقيقة إلا أن ننتهى نهاينا الطبيعية عشان نعرف الحقيقة الكبرى
البروبليم ف حكاية انى اصدق انى عمرى ماهوصل للحقيقة وده مايمنعش انى ادور عليها لانى شايفة ان دى شغلتنا ف الحياة وطبيعى هبقى متضايقة احيانًا انى مش قادرة اوصل
وده اللى بيخلينى اكتئب لفترة وده شايفاه شىء صحى جدا بل مطلوب
وده مفهومى للاكتئاب وعدم الرغبة العام ف اى شىء واللى واثقة ان مفيش حد متفق معايا فيه وانى لازم اخرج من الاكتئاب ده بعد فترة وافوق وارجع ادور تانى ع الحقيقة
لكن الناس بقى اللى مبيقدروش يخرجوا من نوبات الاكتئاب الطبيعية دى وبيفضلوا فيها على طول هما دول اللى بنقول عليهم مجانين
اكتئابى ده هو اللى بيحافظ لى على اتزانى النفسى من الحين للآخر
وانا نزلت القبعه خالص عشان لو تحب تصقف تانى
وانا اتفق مع الملك لما يقول
"إيديا ف جيوبى وقلبى طرب..سارح ف غربة بس مش مغترب .. وحدى لكن ونسان وماشى كده .. ببتعد معرفش أو بقترب"

Che Ahmad said...

ايديا هتوجعني كدا
تعريفك للموت بإنه الحقيقة الكبري بيثير كدا شوية تساؤلات بس بلاش منها دلوقتى
متفق معاكي تماما في الاكتئاب
الاكتئاب في نظري انا كمان حاجة صحية
بس مشكلتها لما بتطول ودي بتبقي نسبية حسب الفتره الزمنية للشخص مش بس نسبية بين الاشخاص
ممكن فتره طويلة ممكن مرة قصيرة ممكن حاجة تفوقنا بسرعه وممكن نكون احنا نفسنا زهقنا ومش عايزين نفوق
بس ف النهاية احنا الوحيدين القادرين اننا نخرجنا من اي اكتئاب او ع الاقل لو في مسببات خارجية احنا بنبقي عارفينها ونقدر نوفرها
فقط لو أردنا
بالنسبة لأغنية الملك والرباعية الجاهينية فهي في نظري عبقرية
كعبقرية الموت تماما

SNAKE SNIPER said...

ان الذين "يحبون"ان تشيع الفاحشه في الذين آمنوا لهم عذاب أليم في الدنيا والآخرة

كونك تحب ان تشيع الفاحشه غير ان تسعى غير ان تهم باشاعه انها مجرد رضا !او اقل

لقد امرنا الله عز وجل على لسان رسوله صلى الله عليه وسلم ان اذا بلينا ان نستتر

ولم الاستتار؟ اليس هذا واقعا؟ ام انه دفن الرأس في التراب؟

ان الاستتار ياسادة هو منع لان يكون الجو العام ملوثا بمظاهر التلوث

وقد قال نبيك صلى الله عليه وعلى اله وسلم

كل امتي معافى الا المجاهرون !

لو افترضنا ان شخص كفر بالله واستحل معصية ما

ماذنب المجتمع كي يذوق ويلات التقليد ؟!من سفاء القوم ؟

نعم لابد من مكافحة الازمات الاخلاقيه من الاصول الى الفروع ولكن لايمكن ان نسكت على الصغائر التي قد تجر كبائر اذا شاعت عند العامه

وامثلة ذلك في دين الله تعالى كثيره "لمن يؤمن به ويعمل به "

ياسااده ان دين الله هو "كتلوج " الانسان هو خلقه وهو ادرى بما يضره وماينفعه وقد بين ذلك حين ارسل الرسل وشرع الشرائع

لايستقيم ان نقدم العقل على النقل ونحكم العقل ثم اذا وافق هوانا القرآن والسنه عملنا به واذا لم يوافق ضربنا به عرض الحائطّ!

قال علي بن ابي طالب رضي الله عنه : لو كان الدين بالعقل لكان المسح على باطن الخفين اولى من ظاهرهما !

هدانا الله جميعا الى خيري الكتاب والسنه وردنا اليهما رد جميلا من غير فتن ولا علماء سوء

Che Ahmad said...

snake sniper

مش بحب طريقة كلامك هنا مش عارف ليه
حاسسها متعالية ومتغطرسة كمان

عن الفاحشة انا مش بحبها تشيع ولا حاجة ولا بهتم انها تشيع ، لكن انا بهتم بالصدق مع النفس والله لو الفاحشة هتشيع بس مش بتشيع خوفا من غشاء بكاره مش خوفا من ربنا ولا خوفا من قوانين البلد يبقي تشيع احسن ، ع الاقل علشان يبقي في صدق مع النفس

عن الاستتار بقي
دا لما يكون في حاجة فيها فضيحة مثلا لكن انا بناقش موضوع علي الساحة حاليا منتج جديد ف الاسواق وانا بناقش تواجده وتأثيره علي البيئة المحيطة

الاستتار غير دفن الرؤوس في الرمال
الاستتار لما يكون في مشكلة خاصة بنداري عليها ونحلها في صمت من غير صخب ، لكن دفن الرؤوس ف الرمال اننا نعمل مش شايفنها زي ما بنعمل من عشرات السنين ونتذرع بكلام المصطفي ونأوله حسب اهدافنا بطريقة ميكافيلية حقيرة .

بخصوص بقي التقليد
يعني ايه " ماذنب المجتمع كي يذوق ويلات التقليد ؟ "
يعني ايه ؟؟
هو المجتمع دا بيعمل اللى يشوفه قدامه وخلاص بدون تفكير ؟؟؟؟؟؟
لو كدا فعلا يبقي يستاهل ، لانه ما استخدمش اداه اداها ليه المولي اسمها العقل

كلمات زي العامة ، ويا سادة ، تقيلة علي قلبي ومحسساني اني بكلم بني ادم من العصر الجاهلي علي فكرة

عن امثلة ذلك بقي ف دين الله مستني امثلة

بخصوص الكتالوج بقي ، انا ما اتكلمتش عن الدين هنا ولا قولت عليه عكس ما انت قولت

بخصوص العقل والنقل انا اقدم العقل علي النقل وعلي النص ومش لوحدي انا مش ببتدع ، وانا مش بضرب بصحيح النصوص عرض حوائط لكن فقط بحاول افهم النص بعقلي حتى لو قاصر فربنا هيحاسبني علي فهمي ليه مش حد تاني

الحقيقة اول مرة ابقي مش مبسوط من تعليقك ومش مبسوط وانا برد عليك معرفش ليه ، او بمعني تاني اداءك النهاردة مش عاجبني
يمكن لانك اتكلمت برا الموضوع اصلا حتى وإن كان يمت للموضوع يعني

ع العموم منور

SNAKE SNIPER said...

السلام عليكم ورحمة الله

معذرة ان كان كلامي شديد اللهجه او كنت ترى شيئا من هذا القبيل

واردت ان اعقب على بعض النقاط واعتذر ان كان الكلام كثيرا ولكنه مهم جدا

\\عن الفاحشة انا مش بحبها تشيع ولا حاجة ولا بهتم انها تشيع\\

المقصود هنا ايضا ليس الاشخاص لان الشخص ان اذنب شيئا فعلى نفسه ولكن الشيء الذي فيه دواعي الفاحشه لابد ان يقطع دابره ويغلق بابه من الاساس حتى وان لم يقصد اشاعتها فالمصلحه هي المصحله العامه اولا
ودرء المفاسد مقدم على جلب المصالح ولا يدرء الشر بما هو أشر منه



الاستتار غير دفن الرؤوس في الرمال\\
\\
صحيح ولا شك ولكن ان تستتر عند فعل المعصيه هو الواجب كي لاتشيع وتصبح ظاهره للعيان والعامه: منهم العلماء ومنهم ضعاف الايمان ومنهم السفهاء ومنهم ومنهم... فاذا شاعت الظاهره استحلها الناس جهلا ربما والقوا اللائمه على انتشارها ونحوها
فإلف المعصيه (اي التعود على رؤيتها ومخالطتها في عموم الناس ) خطير جدا ومنها : أنه ينسلخ من القلب استقباحها ، فتصير له عادة ، فلا
يستقبح من نفسه رؤية الناس له ، ولا كلامهم فيه .
وهذا عند أرباب الفسوق هو غاية التهتك وتمام اللذة ، حتى يفتخر أحدهم بالمعصية ، ويحدث بها من لم يعلم أنه عملها ، فيقول : يا فلان ، عملت كذا وكذا .


وهذا الضرب من الناس لا يعافون ، وتسد عليهم طريق التوبة ، وتغلق عنهم أبوابها في الغالب ، كما قال النبي - صلى الله عليه وسلم : كل أمتي معافى إلا المجاهرون ، وإن من الإجهار أن يستر الله على العبد ثم يصبح يفضح نفسه ويقول : يا فلان عملت يوم كذا وكذا كذا وكذا ، فهتك نفسه ، وقد بات يستره ربه .


فما بالك بتفشيها للعيان فضلا عن التحدث بها

يقول الامام ابن القيم :

ان المعاصى مواريث من ذلك ان كل معصية من المعاصى هى ميراث عن أمة من الأمم التى أهلكها الله عز وجل
فاللوطية : ميراث عن قوم لوط
وأخذ الحق بالزائد ودفعه بالناقص " ميراث عن قوم شعيب
والعلو فى الآرض بالفساد " ميراث عن قوم فرعون
والتكبر والتجبر : ميراث عن قوم هود
فالعاصى لابس ثياب بعض هذه الأمم وهم أعداء الله

فتفشي هذه الظواهر في المجتمع سبب لهلاكهم
جميعا

Che Ahmad said...

محمد
انا مسحت تعليقيك التانيين وانا ابدا ابدا مش بمسح تعليقات حتى لو بتشتمني شخصيا واعتقد دا حصل فوق
لكن الصراحة مش بحب الكوبي وبيست
مش بحب النقل
وكل كلامك ما اقنعنيش إطلاقا
ما زال العقل عندي ف المقدمة وبفارق كبير عن النقل وما زال الجميع يعتمد علي النقل لإقناعي باهميته عن العقل ودا غلط المفروض يحصل العكس
مش هرد علي كلامك لانه كله نقل وفقط ومفيش فيه فرصه لتشغيل العقل
انا اسف

SNAKE SNIPER said...

السلام عليكم

\\وما زال الجميع يعتمد علي النقل لإقناعي باهميته عن العقل ودا غلط المفروض يحصل العكس\\

هاهو العكس فهل من مهتدي؟
http://oh-my-minder.blogspot.com/2009/10/blog-post_05.html

وفقنا الله للحق جميعا

Anonymous said...

اولا انا انينموس واحد
ثانيا :يا جماعه حرام عليكم انتم بتستفزوني بأرائكم دي الموضوع جميل جدا والمناقشه البناءه فيه هتبقي احلي مش الهجوم احنا عايزين نوصل لحل للمشكله الاخلاقيه مش نفضل نهاجم وخلاص وانتم بتهاجموا وخلاص ...هو احنا اتأخرنا من شويه ولا حصلنا اللي حصل في بلدنا ده من شويه ما هو من مهاجمتكم وخلاص واسلوب الكوبي بيست اللي احمد بيقول عليه واننا بنسيب المشاكل الاساسيه ونفضل نتوهه نفسنا لفرعيات مالهاش اي لازمه ...ده كله ليه عشان نتكلم وبس ...يا جماعه ناقشوا مش تهاجموا وخلاص
ثالثا بقي وده الاهم :انتم عارفين ليه البنات هي بس اللي مؤيده الموضوع ده لان البنت بترد علي الموضوع وكأنه موضوع عادي في المجتمع وبتناقشوا لكن الولد بمجرد ما يشوف اي كلمه تخص الموضوع ده بيركبه ميت عفريت ويتهيأله انه بيدافع عن شرفه والدم يطلع في نفوخه بقي ...قال ايه شرقي
طيب سوري بقي انا ممكن اقول ان البنت لو عندها اصلا اخلاق مالاول هتقدرتحافظ عن نفسهاومحدش يلمسهااصلا طيب ما هو ممكن البنت تكون محافظه علي عذرويتها بس لو مش عندها اخلاق او هي اساس مش خايفه علي نفسها ومن ربنا يا عالم بقي هي ممكن تكون عملت ايه ماهو مش هيبان بقي ...يبقي الولد هيجي يتقدم وهو مش عارف اي حاجه عنها غير انها عذراء لكن يا عالم عملت ايه مع اي حد قابلته قبله كان عامله حدود مع اي حد قابلته قبله ولا كانت سوري يعني _سداح مداح_ يبقي ساعتهاالولد علي عماه ولا يعرف حاجه عنها غير انها عذراء
يا جماعه دي مسأله صراحه مع النفس وادب وتربيه
عشان كده احنا بنتكلم فيها

Che Ahmad said...

محمد العوضي
انا قريت بداية الكلام ومش متحمس لكن اوعدك هقراه كامل عسي

بس عايز اقولك حاجة
انت ليه عايز كل الناس تبقي زيك

ربنا قال إنا خلقتناكم شعوبا وقبائل لتعارفوا

يعني في اختلاف والاختلاف هو سنة الكون والحياة والاختلاف دا الهدف منه التعارف ان يكون في تعارف وتقبل بين الناس ما قالش لتشابهوا علشان كله يبقي زي كله

سلامات

Che Ahmad said...

انونيموس واحد
سلمت يمناكي بجد
موافق علي كل كلامك
وبالذات في الاستفزاز :D
وكمان في مسألة الشرف عند الراجل الشرقي اللى مقايسها غريبة وغبية
منورة كالعادة

someone said...

وصلت هنا قدرا..

بصراحة شيئ مؤسف ان أجد ذلك الكلام يخرج من مسلم وخاصة الردود فيها بشاعة أكثر من الموضوع نفسه.أسأل الله أن يهديني ويهديك.

و عندي نصيحه لك لكن اعذرني لن تكون علي الخاص لعدة اسباب.

النصيحة :
قم فتوضأ و تطهر و قم لصلاة الفروض في المسجد في أوقاتها مع جماعة المسلمين و عليك بمسك المصحف الكريم وقراءة ما تيسر لك يوميا . و كن كذلك لمدة شهر من الان و لا تضيع شيئا مما ذكر مهما كانت الاسباب .. فستتغير و اتحداك ..شرط أن تفعل هذا ونيتك خالصه لله.

و هذه النصيحه ليست نقلا ولا من فراغ .

تم

Che Ahmad said...

بصراحة انا كمان اجد انه شيء مؤسف تعليق زي تعليقك دا يخرج من إنسان
بخصوص الهداية ربنا يهدي البشرية إن شاء الرحمن

بخصوص النصيحة شكرا
لكن انا مش بحب حد ينصحني علي فكرة غير القربين مني فقط ، فعذرا خلي نصحتك لشخص تاني
وبعدين انا مش بحب جد يأمرني ومش بحب حد يفرض عليا تحديات ويشرط عليا
انا اسف تعليقك كله مضايقني

SNAKE SNIPER said...

بسم الله الرحمن الرحيم

\\بس عايز اقولك حاجة
انت ليه عايز كل الناس تبقي زيك

ربنا قال إنا خلقتناكم شعوبا وقبائل لتعارفوا

يعني في اختلاف والاختلاف هو سنة الكون والحياة والاختلاف دا الهدف منه التعارف ان يكون في تعارف وتقبل بين الناس ما قالش لتشابهوا علشان كله يبقي زي كله
\\

بالنسبه للآيه الكريمه فهي تقول ياايها الناس انا خلقناكم من ذكر وانثى وجعلناكم شعوبا وقبائل لتعارفوا* ان اكرمكم عند الله اتقاكم

اذن الاختلاف
هنا يتكلم ليس عن العقيده وانما التنوع في الاجناس والمناطق وهي الديمغرافيا ولذلك قال ان اكرمكم عند الله اتقاكم لكي يؤكد انه ليس الاختلاف عقدي



وفي آيه اخرى قال ولقد ارسلنا في كل امة ان اعبدوا الله واجتنبوا الطاغوت

فالعقيدة اولا مهما اختلفت الاجناس والشعوب وستجد في رابط الموضوع الآنف ذكره معنى ذلك

والاختلاف في الدين الاسلامي لايكون في العقيده وانما في الاحكام الفقهية فهناك 4 مذاهب فقهية كلها متفقه في عقيدة واحده ولا مجال للإختلاف فيها عند اهل السنه والجماعة

وهنا نقطه مهمه جدا لاينبغي ان نفسر القرآن بدون الرجوع الى اهل العلم لأن ذلك بمثابة العامل الذي يتصرف حسب منطقه بدون ان يرجع الى المهندس المختص والنتيجه ستكون انهيار المبنى وعدم بنيانه بالشكل الصحيح كذلك العلم الشرعي اذا فسرناه بغير علم مسبق بالاحكام سيقودنا الى اعظم مصيبه وهي النار اعاذنا الله منها
حتى لانكون ممن قال الله سبحانه وتعالى فيهم:

الذين ضل سعيهم في الحياة الدنيا وهم يحسبون انهم يحسنون صنعا


وفقنا الله جميعا لما يحبه ويرضاه

Che Ahmad said...

محمد
انا قولتلك قبل كدا اني لا أؤمن أصلا بوجود ما يمسي بعلماء دين في الاسلام من الاساس

Anonymous said...

والله بتتعب نفسك يا أحمد :D:D

أنا لما قريت المقال كان عادي بالنسبة لي .. ممكن عشان كان رأيي زي رأيك أول ما سمعت عن الموضوع

بس الغريب إني اقرى الردود دي
تحياتي

Che Ahmad said...

تلاقيك لسه جديد
الردود دي منتشرة اوي عندنا ف الكلية
عاااااااااااادي جدا