إلي حبيبتي

إلي حبيبتي المستحيلة، ربما، المجهولة، حتما ...

رجاء، كوني سعيدة، تلك السعادة الأبدية التي تزين مُحياكِ، لكاتبي المفضل جملة يقول فيها "شقائنا معا، الذي محا سعادتنا معا" لذا فـ علي أحدنا أن يكون سعيدا علي الأقل، ولذا وجبت عليكِ السعادة، لأنني أنا الشقي بالسليقة، فـ لأجلك -أولا- ولأجلنا، ولأجلي أخيرا، كوني سعيدة، فـ كونك سعيدة سيجعلني تلقائيا مريض بها، أو ربما معافي بها، أيهما ترينه أكثر ملائمة، وأعدك سيدتي أن أواظب علي السعادة متي استقامت علي شفتيك ابتسامة، وأنا كما أخبرتي صديقتي الأثيرة والأقرب إلي وتر القلب " لايق عليك الإنبساط يا فتى "، وصديقتي هذه واحدة ممن لا تستقيم الحياة بدونهم، إن كنت أنا معبدا فـ سيكون له أعمدةٌ خمس، وستكونين أنتي سقفه، أما هي فأحد تلك الأعمدة، أما الأربعة الأخرون فـ ستعرفينهم وحدك، متابعة قصيرة لحياتي الإلكترونية ستجعَلُكِ تتعرفين علي أثنين منهم علي الأقل، والأخيران يستلزم بعض التضحية والتفتيش في القلب لتعرفي عنهم، حسنا، سيلزمك أيضا التعرف علي أمي، ليست أمي التي انجبتني بالتأكيد، لكنها أخري إن كانت الألهة بالانتخاب، لأعطيتها صوتي لتصبح إلهه أبدية، دون فقرة محددة في دستور الألهة تحظر عليهم المكوث أكثر من مدتين متتاليتن، وإن وجدت فـ لها أن تُستَثنى، سترينها تذكرني دوما حين أري السواد يغمرني في عيون الجميع بأنني " رائع..وبهّي , تماما كما دفقة شجن ووخزة حنين " ليضيء وجهي مرتين، أولهما لتفضلها علي بـ غزير كرمها مما قد لا استحقه، وأخري لأن الكلام يلامس روحي فتُشرق فـ أشرق.

توقفنا عند السعادة، رجائي الذي لا يجوز لكي أن ترديني عنه خائبا، شيء أخير لتعرفيه عني، مجنون أنا، وإني لأظن أن الأصل في الحياة الجنون، فـ المرؤ منا يولد مجنونا فـ يأخذ أبويه علي عاتقيهم مهمة إعادته إلي الحظيرة، فقد يستجيب، وقد ينزع لجامه كما فرس جامح، وكوني أخترت الأخير، فـ وجب عليّ من أمانة الضمير - أو ما تبقي منه - أن أخبركِ، وللأمانة أيضا، فـ أنا أفضلك مثلي، متعافيةً من داء العقل، مؤمنة بالجنون.

هذا إلي الآن، وحين نلتقي ذكريني أن أُخبركِ سرًا لم يطلع عليه أحدٌ من العالمين.

عظيم محبتي

MASR

البلد دي ترابها أغلي ... مرها م الشهد أحلي

مساكن شعبية

حين غني الملك .. منير انا قلبي مساكن شعبية .. وحين سمعتها أنا سحبت نفسا من هواء القاهرة الملوث .. موقنا بعقرية هذا الرجل .

أنا قلبي مساكن شعبية ، ربما هو التعبير الأنسب لوصفي ، حاليا .. سابقا .. ومستقبلا .. مساكن شعبية ، مساكن لا ترضي أن تجيئها جرافات فتهدمها لتقيم مكانها فيلا انيقة لفتاة مهما كانت ، أسف ليس هذا عيبا في فتاة أياً من كانت ، إنها طباعي المختلفة والغريبة ، هكذا الحال دوما في حياتي ، ولا اعتقد حقيقة أن ترضي احداهن أن تقيم في مساكن شعبية ، فلا هو يرضي غرورها ولا هو يشبع الأنثي داخلها .

اعترف .. حقيقة .. أنا أكره غرور الأنثي كما كما أكره كبر الرجل ، أكره أن يشعر كل منهما أنه نهاية العالم ، أكره أن يمتلك أحد الأخر ، حتى لو كان باسم الحب ، كثيرون يختلفون معي ، لأعترف الأغلبية إن لم يكن الجميع عاداي يختلفون معي ، لا يهم أنا فقط ابث افكاري الخاصة التي لا تلزم أحدا ، حقيقة أنا لا أعارض أن يمنح أحدهم قلبه كاملا فيلا من دورين كاملين لإحداهن ، حقه وأنا اباركه وأدعو له أن يسعد الرب دوما ، لكنني لست أهلا لذلك ، أنا خارج هذا الإطار لا أعرف كيف تبني الفيلات ( أعرف فقط كيف أعطي القبلات ) ، حقيقة أنا أحمل بين طياتي قلبا يسع الجميع ، ربما أستطاعت إحداهن أن تمتلك مسكنا ( شعبيا أيضا ) ولكنها تجعله يضرب بجذوره في أراضي القلب ويرتفع قليلا ليصبح متفردا بينهم ، ربما هذا هو المسموح داخل تلك المساكن الشعبية المساه قلبي ، وللجميع ، التوسع رأسيا ، أما أن يحاول أحدهم ( إحداهن إن شئنا الدقة ) أن يتوسع أفقيا فهو إذن يتعدي علي حق لي أصيل ، وحينها يصبح هو كالخلية الفاسدة وسط جسد سليم ، فتلفظ ، حقيقة لأ اتحدث عن أمرٍ مفرد ، ولكنني فقط أشرح قلبي لنفسي قبل أن أكتبه علي وريقات ربما تناوله شخص ما عبر من هنا بالقراءة .

في النهاية ... أنا قلبي مساكن شعبية

عني - لحظات الشتات 3

بكتب من جديد لإن يمكن الكتابة الحاجة الوحيدة اللي بتريح صنف من البشر ان كُتب عليا إني أكون منهم صاغرا ...

أكره تماما وجودي في مود الرمادي لا أنا مبسوط ولا أنا مضايق مش هدعي إني بكره أنصاف الحلول لكنى دوما أسعي للكمال فإن لم يكن نصر شامل فهو الموت الزؤام أو بمعني تاني لو مش هبقي مبسوط ما بحبش ابقي مش مبسوط ولا مش مضايق فبحاول اضايق نفسي بقي وخلاص .

بخصوص البوست الى قبل عيد ميلادي اللى فات دا ، في حاجة انا مقتنع بيها جدا ، مفيش إنساس في حياته ما بيتمناش يموت في وقت من الاوقات ، لكن اللى بيصرح بالرغبة دي يبقي مش هينفذ ، وانا لما كنت بكتب البوست حاطه في التصنيف بتاع كن سعيدا ، يعني متخافوش لما اكون قررت انى انهي حياتي هنهيها بنفسي سواء في صمت او في ضجيج لكن هيكون بنفسي .

من اكتر الحاجات اللى بتغير حالتي النفسية إني اشوف حد بيعيش مشاعر او ظروف نفسيه شبه اللى بعيشها ، هيلين هانت في وات آ وامان وانت عملت دا ، كانت انسانة ناجحة جدا في عملها والشركات بتتنافس عليها وحواليها ناس كتير بيقدروا وبيحترموها ، وبجد مش نفاق أو ما شابه ، لكنها في النهاية بتعيش ظروف نفسية سيئة وبتعيش وحدة مزرية .

انا زهقت م الكتابة بسرعة !!

حينا !!

حينما تخبر شخصا ما ينكر ذاته دوما بانه أناني ستجعله يمضي بقيه حياته يفكر في حماقته اللى جعلته يفني روحه من أجل الناس أجمعين ويمضي يتعذب في جزيرة نائيه وحيدا

!!

علشان يشبهلك

تعالوا نفرح

النهاردة زي ما اتفقنا في الجروب اللى عمله فاروق انه هيكون يوم الفرحة
انا فعلا تعبان ومش قادر بس قولت لأ
لازم اعمل البوست
احنا يعني بنفرح كل يوم
يعني ايه افرح بقي !؟
يعني افضل معاكي وقت طويل اسمعك وبس .
يعني اخرج مع فهمي ونروح اي حته .
يعني ابقي دايما مع اصدقائي كلهم بدون استثناء .
يعني اخد الحضن اللي ليا عندك .
يعني ابقي مع زمايلي في رحلة تبع الكلية وكل الناس شايف في عيونها بتقول مبسوطة .
يعني تشوف مجهودك اللى عملته نتايجه في عيون الناس .
يعني تلاقي ناس بتحبك وانت ما تعرفهومش .
يعني تفضل دايما محتفظ بالامل حتى وإن خفت أحيانا .
يعني تلاقي قلوب حواليك بتضمك وتخاف عليك .
يعني تشوف ابتسامه حواليك .
يعني تروح حفل تنورة في وكالة الغوري وتفضل قاعد طول العرض ع الأرض وعادي جدا وهتموت م النشوة
الفرحة ... موجودة بس أحنا بننساها بمزاجنا
دا بقي بمناسبة الفرحة والنشوة والتنورة فيديو لرقصات وموسيقي وتواشيح التنورة مقصوص من الوان السما السابعة


-----------------------------------------
الصورة من تصميمي والفيديو انا اللى عامله ايديت بإشراف من الدايركتور احمد فهمي

قرف

زهقت
هقولكوا سر
انا بسمي نفسي بيني وبين نفسي " أمل "
يمكن علشان بحب أمل دنقل أوي بس الأهم علشان أنا دايما عندي أمل
ساعات بلاقيه بيروح بس بيجي تاني بعدها
بس انا خلاص اتخنقت
النهاردة بس كنت مع احمد مختار بنظبط لحدث كبير او احداث مختلفه يعني علشان نجمع حاسبات مصر كلها ونقدر ننهض بصناعه تكنولوجيا المعلومات في البلد
وقاعدين نجهز ونتناقش ونبعت لناس ونكلم في ناس ونروح لدا ونشوف دا و و و و
ومجهز مع نفسي انى هنزل الزقازيق كتير علشان خاطر الاحداث دي وهنعمل انشطة و و و و
انا مش بقول دا بشكر ف نفسي
انا بقول اننا مش لوحدي بنعمل علشان نعمل حاجة للبلد دي
من غير شعارات ولا يحزنون بنعمل علشان عايزينها احسن بلد ف الدنيا وبس
بس مش يكون المقابل انهم يسرقونا عيني عينك وفي اهم حاجة في شغلنا في الانترنت
وببجاحة كمان
انا مش عارف ايه اللى بيحصل دا
النت في امريكا 15 ميجا ب45 دولار يعني 225 جنية مصري يعني ارخص من الاتنين ميجا هنا لا وكمان بيعملوه محدد
انا والله زهقت وما بقتش طايق دي بلد ولا دي حكومة
وانا اللى طول عمري مش عايز اهاجر وبقول مش هنهاجر ( إلا مرة واحدة بس ) دلوقتي عايز اتنيل اهاجر ومش عايز اقعد ف البلد دي اصلا ومحدش يقولي البلد دي محتاجه حد البلد محتاجه واحد ياخدها قلمين علشان تفوق وانا ما اتعودتش اضرب حد

خاطر

ازيكم
البوست دا مجرد حاطر في بالي
يا ريت ما يضايقش حد لانه ما يضايقش المفروض ، بس دي حاجات جوايا عايزة تتقال ...
هبقي مبسوط لو مت قريب ... مبسوط باللى حققته حتى الان في الحياة ، صحيح في حاجات لسه ما كملتش ف دوري اللي انا برسمه كل يوم علي مسرح الحياة لكن لحد اللحظة دي الدور مكتمل
عارف ان علاقتي بربنا مش تمام ويمكن دي الخلل اللى ف حياتي والحاجة اللى مخلياني مقلق من الموت ، نفسي اكمل الحته دي وبعد كدا اموت ، علي فكرة مش خوف لاني مش بعرف اخاف من ربنا ولا بشوفه كدا ، انا بشوفه حضن كبير مستنينا نترمي فيه فأي لحظة ، محتاج اقرب منه علشان بس بحبه ونفسي ابقي معاه ، سهله مش صعبه
بجد لو النقطة دي اكتملت جوايا هبقي مبسوط اوي لو مت ومش هيبقي عندي اي مشاكل
ما بقتش حابب الحياة ولا عايز اكمل فيها
مش بسبب اشخاص والله بس بسبب الحياة نفسها
قبل ما امشي ، شكرا لكل واحد دخل حياتي ... اللى دخل ضاف واللى دخل جرح واللى دخل حضن واللى دخل اتحضن لكل حد قابلته في حياتي شكرا علشان انت بطريقة او بأخري خليت حياتي في مرحلة ما منها احسن
شكرا ليكوا كلكوا

Not FCI4ALL any more

م الاخر ومن غير كلام كتير
انا بعلن انى من هنا ورايح مش عضو ف منتدي اف سي اي فور اول ولا انتمي ليه ولا عضو منه وغير موافق علي نظامه الحالي ولا الغير حالي حتى ومعترض علي الاشراف الحالي وحالة تكميم الافواه الموجودة داخل المنتدي ولا حاله الوهبنه اللتي اعترته فجأه في موقف مؤسف محزن للغاية
الخبر دا هيفرح ناس ان احمد إبراهيم هيبطل يضايقنا ويطلعنا غلطانين وهيسيبنا نغسل عقول الناس براحتنا
بس انا فعلا زهقت م الغباء والخنقة وحرقه الدم ع المنتدي دا والناس اللى ما بتسمع لغيرها وما بتحترمش الاختلاف
هنيئا لكم ولكن

Excuse me, I have the honor That I do not belong to you
I do not belong to the FLOCK

صفحة من كتالوجي أنا

لكل منا كاتلوجه الخاص ربما يتيحه للبعض يقرأه وربما استأثر به نفسه فأخفاه داخل نفسه عن العيون ومنا من اخفاه لكن عيون بعض المتلصصين ارتئت منه صفحات عده او ربما اخفاه فأبا المحيطون به إلا أن يضعوا هم له كتالوجا خاصاً إما لجهلهم بانه قد اخفي كتالوجه الشخصي او هم عالمون ويريدون اجباره علي إظهار كاتلوجه خاصته لهم بإيجاد اخر بديل مزيف واخرين أخفوه لكنهم يكشفون كل حين وأخر عن بعض صفحات منه عن طيب خاطر ... وأنا من هذا الصِنف الأخير .......
في تلك الصفحة المعنونة بـ " متي يجب ان تتجنبني " يمكنك أن تقرأ :
أسوء حالاتي هي تلك اللي اتقوقع داخل نفسي رافضا ان احدثك او ابدي اي رد فعل ... وربما في هذه اللحظة تحديدا عليك أن تتركني لحال سبيلي مبتعدا قدر الإمكان حتي أعود أنا إليك إن عدت .
عليك أيضا أن تتركني عندما تسمع مني " ماشي " بدلا من " حاضر " فـ " حاضر " الخاصة بي تعني رضا عن الاحداث المحيطة أما تلك الـ " ماشي" فليست تعبر إلا عن استيائي من شيء ما - أو شخص ما .
في تلك الصفحة أيضا يمكنك أن تقرأ :
أحذر كل الحذر أن تحاول أن تنتزع مني أعترافا ما في واحدة من تلك الحالات فلن تستطيع ابدا وليس ذلك كل شيء فـ أنت أيضا سوف تزيد همومي قليلا .
إذا رأيتني أمسك القلم وأكتب فلا ترغب ف التعرف علي مضمون ما أكتب فـ أنا ها هنا أبث همومي علي الورق فلا تقاطعني ... ربما جعلتك تري ما أكتب - فلست دائما قادرا علي إحراجك - لكن مرة اخري لتعرف انك في هذه الحالة تزيد همومي أيضا .
إن حاولت التخفيف عني ورفضت فلا تلح في ذلك فأنا - وإن كنت إنسانا لحوحا - فإنني أكره انى يتصيدني لحوحا أخر في مثل هذه اللحظات اللتي أنأى فيها بنفسي عن الجميع .
******
إضافة جديدة حديثا للصفحة :
تقلصت كثيرا قدرتي علي الحكي والفضفضة فـ عفوا لا تؤاخذوني علي هذا فهو - وربي - ليس بيدي ، واتركوني حتى آتي أنا بنفسي طالبا لحظات من اثمن اوقاتكم لأفرغ حكاياتي أمامك بلا أدني شعور بالذنب أو حتي بالندم .
هذه بعض تعليمات من إحدي الصفحات من كتالوجي أنا أفضيت بها إلي من قرأ بكامل إرادتي ورضاي
هذا وأخيراً

" ربنا لا تحملنا ما لا طاقة لنا به "

ههح

اعتذر مقدما لكل اللى هيقرا كلامي ويضايق

واعتذر مؤخرا لكل حد قولتله لا وقولتله كلام مليان امل لاني اكتشفت ان مفيش اصلا اي امل واللى كان جوايا خلص وانحسر وضاع

بعتذر لكل واحد قال عايز اسافر من البلد دي وقولتله لا خليك وما تستسلمش لاني انا اصلا مقدرتش اقاوم وبقول زيهم عايز اسافر

بجد بقيت مخنوق منها للأبد وعند اول فرصة ولاي مكان ف الدنيا هسيبها وهمشي ( ماعدا اسرائيل علشان الناس اللى بتقف ع الواحدة ) المهم بجد والله ف اي فرصة ممكنة للسفر والذهاب لأي حته هروح

حاليا انا مش منتظر الفرصة تيجي انا بدور اصلا علي مكان ينفع ادرس فيه برا المخروبة ومعنديش اي مشكلة ف انى اروح اي حته

ومحدش يكلمني عن الانتماء لاني اصلا فقدت الانتماء للمكان او حتى للناس انفسهم

مبقاش في حاجة مخلينا اتمسك بالبلد او البقاء فيها

ابسط حقوقي اني اختار القسم اللى ادرس فيه تم اغتصابها مني ف كليتنا المصون بسبب تحيز كل دكتور للقسم بتاعه والخلافات الشخصية بين الدكاترة

مش كفاية اصلا الكلية مش بتعلم حاجة لا كمان مش عيزينا نختار اقسامنا

بجد بقيت مش طايق اروح الكلية ومن ساعه ما قالوا كدا مش بفتح كتاب ( هو انا اصلا كنت بفتح كتاب قبل كدا ) ولا ليا نفس احضر محاضرات ولا سكاشن ولا اي حاجة ف الدنيا

وبجد نفسي الاقي اي فرصة لدراسة الكومبيوتر ساينس برا مصر واقدر استغلها بعيد عن البيروقراطية والمعوقات الكتير

دا مش السبب الوحيد علشان اقول عايز اهج علي فكرة

بس دا القشة التى قسمت ظهر البعير

البلد كلها بايظة وانا كل شوية اقول يا صبر

وتبوظ وانا اقول يا صبر ولكن هيهات الدنيا بايظة اصلا وانا صبري نفد

ليله ليله عيد الليلة ليلة عيد

كل سنة وكل حد واي احد فى اي حته فى مجرة الطريق اللبني

طيب وبخير وبصحة وسعادة وسلامه وحب وكل حاجة حلوة ربنا خلقها فينا وجوانا وعلي وجه البسيطة

كل سنة ومصر بخير وطبية ومش بعافية شوية

كل سنة والعالم بخير من غير ازمات

كل سنة والفلسطنين احرار من غير لا فتح ولا حماس

كل سنة ومصر مصرية مش اي حاجة تانية يا اخواننا البعدا

كل سنة والزمالك بيتغلب ( مخصوص كيدا في كيكو العزيز )

كل سنة واصدقائي وانا بنحب بعض وبنخاف علي بعض ودايما مع بعض

كل سنة وحاجة كمان مش قايلها

كل سنة وكفاية كدا

تاج الملك تشي

بسم الله ....

ازيكوا كلكوا يا ناس ياللى بتعدي عليا هنا

النهاردة عامل تاج مخصوص لأصدقاءي من ارض الواقع والفضاء البلوجي الافتراضي

اول حاجة قسم ابولو قصدي قسم الحق ودا مخصوص علشان عفشة باشا حبيبي

واللى يرضي ياخد التاج يبقي بيتعهد امام الله والدولة والناس انه يجاوب بصدق

واللي مش ناوي يجاوب هو عارف عاقبته ;)

ياللا نبدأ

وكالعادة الاسئلة بالأزرق والإجابات بالأحمر واخر الموضوع هاحط الاسئلة كلها ورا بعض علشان نسهل عملية النقل عليكوا

التاج متمرر لكل اللى عندي ع السايد بار بلا استثناء من اول واحد لأخر واحد وبدون إجبار ( لكن في ناس عارفه نفسها مجبرة وإلا .... )

رغيت كتير أنا خلوني أبدأ .......

3

2

1

جووووووووووووووووووووو

1- عيب فيك ومش نفسك تتخلص منه ع الاطلاق

علي فكرة والله بحط الاسئلة قبل ما افكر فى الإجابة واديني دبست نفسي :)

مممممممممممممممممممممممممممممم

ممكن نقول الثقة والشك السريعين والاتنين باخد بيهم احكام مسبقة على الناس فى اول تعارف وبيحتاجوا لوقت اطول لتأكيد دا او ازالة اثاره

2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟

I- هند : لو ربنا كان عين لكل واحد ملاك حارس فأكيد هند الملاك خاصتي 

II- فهمي : ساعات بنظل نبحث فى الدنيا علي اشخاص يخافوا علينا ويفهمونا من غير كلام .... ولما نزهق بتهديهم السماء لينا ... فهمي

III - كيكوووووووووو : اقرب حد ليا من قرايبي وسلواي الوحيدة فى البلد التيت دي

IV- مروة كناريا : مجنونة ورزينة وفيها البدع

V- أحمد عبد الوهاب : أحد أهم الشخصيات اللى بتحمل قلب كبييييييييييييييييييير بس يبيع اي حد علشان الفلوس تيييييييت

3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟

I- سارة : غالبا بتبقي موجودة فى الوقت الصح وليها عليا حق كبير وشكلها مش هتساهولي

II- موصطفي العوليمي : اكتر شخص عايز اقابله واكلمه حتى الان ومعاه ينطبق المثل القائل ... كلنا فى الكأبة بلوجرز

III- ساااااااااااااااالي : المراية بتاعتي لما تواجهني بالحقيقة وتقولي فوق ، ما تعييش

IV- نيرة : أختي الكبيرة ( هي وسالى ) واكتر واحدة روحانية شوفتها بحسها حد شفاف كدا واكتر حد بيقولي اصبر سيبها لربنا :)

V- هبة (بوبا ) : اختي بردو هي كمان بس ايه يخرب بيت ام الطيبة ، ربنا ادها الطيبة اللى ف العالم كله قالها تفرقها ع الناس طمعت فيها واخدتها لوحدها :)

4- العشرة اللى فوق ... ابعت لكل واحد فيهم رسالة !

I- هند : احترت كتير اكتب ايه ؟؟؟ 

II- فهميز : بطل رخامة وحاول تعمل صلح بين قلبك وعقلك للوصول للحل الامثل فى الامور ايها ( وش شيطان بيضحك )

III- كيكوووووووووو : الحياة اكبر من تعقيدك ليها يا بتاع برج العقرب يا رخم 

IV- مرووووووووووووة : هتفضلي اطيب قلب في كليتنا التيييييييييييييت دي ( ربنا معاكي )

V- عب وهاب : لو ما جاوبتش ع التاج دا ليلتك عتبجي طين طييييييييييين

VI- ساااااارة : حاولي تعملي اللى انا مش عارف اعمله حتى الان ... تصالحي مع نفسك

VII- موصطفي : مازلت رغم معرفتي عنك لغز عصي الفهم

VIII- سالى : كل ما بشوف صورتك بتحضرني براءة الدنيا وانها ما تستاهلش حاجة

IX- نيرة : انتى بقي اللى كل لما بشوفك بيطلع للصورة جناحين وهاله بيضا من فوق ... ربنا يحفظك يا رب

X- هبه : محتاجة بردو تتصالحي مع نفسك وتحبيها حتى لو كان علي حساب الناس اللى ادتيهم ونستيكي

كلكوا علي بعض " ربنا يخليكوا ليا يا رب ويوفقكوا دايما ويحقق كل احلامكوا .............. "

5- العشرة اللى فوق دول اكتب لكل واحد كتاب او اغنية بتعبر عنه فى رأيك

I- هند : وسط الدايرة :)

II- فهمي : حكايتي مع الزمان

III- كيكو : اشكيك لمين والخصم انت والحكم

VI- مروة : مجنونة ( محمود العسيلي )

V- احمد عب وهاب : مدد يا رسول الله

VI- ساره : يا طير يا طاير.

VII- موصطفي : اي حاجة لفرويد هتكون مناسبة لكمية التعقيد اللى جواه

VIII- سالي : زي الملايكة

IX- نيرة : نقطة نور بهاء طاهر :)

X- بوبا : كلك علي بعضك حلو

6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟

مممممممممممممممم

سؤال رخم فعلا
انى ما سامحتش حد غلط في حقي

7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟

هخليها بعد م كذا حد يجاوب ع التاج بس هي متسجلة ف دماغي يعني

الاسئلة بقي علشان الكوبي والبيست

1- عيب فيك ومش نفسك تتخلص منه ع الاطلاق

2- اقرب خمس اصدقاء ليك في حياتك الواقعية ( بتتقابلوا دايما يعني ) واوصف كل واحد فيهم بجمله ؟؟

3- أقرب خمس اصدقاء ليك من حياتك الافتراضية ع النت ( وجودكوا الاكبر ع الشبكة العنكبوتية ) وبردو جملة لكل واحد فيهم ؟؟

4- العشرة اللى فوق ... ابعت لكل واحد فيهم رسالة !

5- العشرة اللى فوق دول اكتب لكل واحد كتاب او اغنية بتعبر عنه فى رأيك

6- حاجة وحشة جدا عملتها ف حق حد وما ندمتش عليهاوهتكررها لو حصلت ؟؟

7- أكتب رسالة لأي حد او حاجة او شيء او كيان او اياً كان فى الكون بدون اي قيد؟؟

مرة كمان التاج متمرر لكل اللى عندي ع السايد بار وخاصة الناس اللى عندي ع الميل 

Sico !!

سيكو !!!

أه

انا سيكو

مش شتيمة تقدر تقول عليها معناها مريض نفسي

ومين منا مش مريض نفسي بس هل هتعرف انك مريض نفسي فعلا

مممممممممممممممممم

انا مش جاي اتكلم عن السيكو ولا عن المرضي النفسيين

انا جاي اتكلم عني

حاجات فى حياتي ....

فى حاجات بحبها وحاجات بعملها بس هي غريبة جدا

مثلا ادماني للإنترنت بقي حقيقي ادمان بمعني الكلمة بل بقي عالم موازي ليا بعيش فيه بكامل حواسي متناسي العالم الحقيقي اللى بيحيط بيا بل ان الاهانة ليا فيه من حد صديق بتعني انتهاء علاقتنا علي ارض الواقع ولانه اصبح عالمي بقيت بجتذب فيه أصدقائي وزمايلي وقرايبي كمان بل كونت فيه صداقات مع ناس بقوا اقرب من اصدقاء ليا فى الكيان الواقعي بل اصبحوا من اقرب الناس ليا على الاطلاق ، كمان بقي ان حد يقولي ممكن تمسح ميلي او يمسح هو ميلي او يعمل اجنور معناها نهاية مشهده فى قصه حياتي الذاخرة بالاحداث والاشخاص وربما تجاهل شخص ليا علي ارض الواقع مش بيكون بنفس ما بيعمل كدا ع الويب لان تجاهل ارض الواقع ممكن يكون سوء تفاهم او او او لكن ع الويب يعني ولجدير الأسف النهاية تماما .

كمان فيا حاجة غريبة اوي لازم في حاجة دايما في " بقي - اللى هو فمي يعني -" مهما كانت ممكن لبيسه القلم - غطاء القلم يعني - ودي دايما وانا بكتب او وانا في محاضرة او كدا يعني ، لبانه ودي غالبا لما يكون معايا صديقي دائما - علي وزن حبيبي دائما كدا - احمد فهمي في كافتريا الكلية .

بحب جدا أقول كلمة عارف أو عارفه بس لمجرد انى اجذب انتباه اللى قدامي غالبا ببقي فعلا هقول حاجة وساعات ببقي مش هقول وساعات تانية ببقي فعلا هقول بس بغير رأيي بقي .

ساعات بزعل من حاجات متزعلش - مش زي العيال الحاجات اصلا متزعلش العيال - بس هي حاجات بتوجعني من جوا او بتعملي تأثير مش اي حد هيحسه ولا هيتعبه ولا اي حاجة خالص لأي حد بس ليا انا في تأثير تاني غامض يمكن مريب ساعات بس الاهم انه بيخصني لوحدي مش اي حد الأسوء بقي ان ساعات ممكن حاجة متزعلش بس انا اخدها علي عقلي - زي علي صدري كدا - واعملها عملية تجديد وتغير واضيفلها شوية بهارات من خيالاتي واخليها حاجة تزعل .... أه والله بس اعمل ايه فى نفسي بقي .

ايه كمان بقي محنرف حزن وكأبة ، صحيح دايما في اسباب لكدا بس طلعلي مرة يكون مفيش سبب .......... هطلع سبب معرفتش هخلق سبب بجد مش هزار محترف بمعني الكلمة الكأبة بتجري في دمي مكان كريات الدم البيضاء - أصلي اهلاوي - مش بحب اكلم حد وانا مخنوق او مكتئب صحيح في اشخاص بيفرضوا نفسهم وبستريح لما بيفرضوا نفسهم رغم انى وانا بكلمهم مش ببقي عايز اكلمهم - حد فهم حاجة - المهم انهم اشخاص قليلين اوي ربنا يخليهم ليا يااااااا رب

كفاية كدا علشان انا رغيت كتير .................

سلاماتي ومودتي وخالص حبي

أحمد فهمي

أحمد فهمي

واحد من اهم الرجال فى العالم

محدش فيكوا او ع الاقل قليلين اوي اللى يعرفوه

بس هو فعلا كدا

بالنسبة ليا انا

احمد فهمي

 صديقي العزيز

تاني أرزل شخص فى العالم 

اكتر حد بزعل منه فى الدنيا وبروح اصالحه

وانا كمان مش ملاك بزعله بردو كتير

بس والله بحسن نية وهو عارف مش بيبقي قصدي حاجة وحشة

هو كمان مش بيبقي قصده يزعلني

بس مش بيعرف يفرق انه لما مضايق مني علشان حاجة وانا مش عايز اتكلم فيها يبقي المفروض يسكت

دايما بيلومني علي اخطاء الماضي مع انه خلاص انتهي مش هيرجع

بس بحبه

مضايق منه اوي الفترة دي علشان هو بجد بعيد

بس واحشني بردو

ممممممممممممممممممممم

انا كمان بعيد عنه

ايه السبب فى كدا

مش عارف بس بقوله علي حاجات مني مزعلاه انا اسف كتير

انت عارف ان مهما قولت من كلام مش هيعبر عن حاجة

كنت واحشني بس حبيت اكتب الكلمتين دول لاني فاشل فى المواجهه المباشرة

With a big HUG

Happy Birthday Happy Birthday to me

Happy Birthday to you Ahmad

Happy Birthday

كل سنة وانت طيب يا انا :)

سنة حلوة يا جميل سنة حلوة يا جميل

سنة حلوة يا احمد سنة حلوة يا جميل

إقرار

إقرار

أقر انا الموقع ادناه بأنى قمت بتغير اسم اليوسر بتاعى من
Che The Mad
إلى
Che The Hermit
وأنا فى كامل قواى العقلية والجسدية

وهذا إقرار منى بذلك

التوقيع
تشي