الجنة التي سيدخلها مبارك

من زمان كدا مده كبيرة وانا تاعبني موضوع الجنة والنار، مين هيدخل الجنة ومين هيدخل النار، وليه اللى هيدخل دي هيدخل دي ومش العكس، في الإسلام فمن ابتغي غير الإسلام دينا فلن يقبل منه وهو في الأخرة من الخاسرين، ما بين متشدد بيقول إن الإسلام تعني دين محمدٍ عليه الصلاه والسلام فقط، وما بين آخرين يقولون ان الإسلام هو مله إبراهيم ومن تبعه من النبيين فيصبح أهل الكتاب من يهود ومسيحيين من المرضي عنهم حسب الآية، ثم حديث الرسول فيما معناه ان من قال لا إله إلا الله دخل الجنة ( وفي بيزودوا ووقرت في قلبه ) ، حلو اوي لحد كدا، انا بقي مؤمن تماما بألوهية الله ووحدانيته ورسله، اروح بقي اقتل وازني واسرق واعمل اللى نفسي فيه وف الاخر شوية تعذيب ثم نعيم الجنة الذي لا شقاء بعده وهنسي كل اللي فات!
دي رقم واحد
اتنين، من وحي امل دنقل، الله لم يغفر خطيئة الشيطان حين قال لا، الشيطان موحد بالله ومؤمن بيه وبرسله و يوم القيامة اكتر من اكتر تقي ف دنيانا دي، ربنا مش هيعفو عنه لانه تحداه! مع ان ربنا العفو اللي رحمته وسعت كل شيء!! ماعدا الشيطان!!
تلاتة، مين بقي هيدخل الجنة، مبارك هيدخل الجنة علشان موحد ومؤمن بوجود ربنا، وشوية تعذيب يفوتوا ولا حد يموت ومنه للجنة وش، تشي جيفارا اللى حارب الظلم دائما وابدا بدون اسباب غير نصره الملظومين هيدخل النار علشان مكان مؤمن بربنا !! مبارك الظالم هيدخل الجنة وجيفارا اللي قاتل لإحلال العدل هيدخل النار! وعجبي
حبيب العادلي الموحد المؤمن المسلم اللي فشخ وكلابه تمانين مليون خروف قصدي بني ادم هيدخل الجنة فيما ان غاندي الكافر عابد البقر اللي طرد المحتل بدون قطره دماء وبمبدأ اللاعنف هيدخل النار علشان هو مش مؤمن بربنا ولا بالإسلام
بني ادم مسلم هيدخل الجنة رغم انه مقضيها سرقه وقتله اتنين ونام مع ستين واحدة وكان بيرجع يصلي العشا بالليل وساعات بيصلي الفجر هيدخل الجنة بعد ما يتعذب شوية علي ذنوبه.
علي العكس واحد غربي ملحد كافر اخترع ستين اختراع ( نفس عدد البنات اللي نام معاهم الشاب اللى فوقه علي طول) وكان بيمشي ف الشارع يساعد اي حد محتاج مساعده وكان بيتطوع في جهات خيريه في دول العالم التالت هيدخل النار بقي علشان مش مؤمن بربنا !!

هو مش ربنا ادانا عقل ؟؟ طيب اللى معرفش يوصله بالعقل هيعمل ايه ؟؟ هيدخل النار؟؟ طيب ما هو حاول وجرب وفشل؟؟ الفشل مش عيب ولو فشل، فشل علشان ما قدرش يوصل بعقله اللى ربنا اداهوله !! طيب ايه!!
يعني واحد عمل حاجات كتير اوي كويسة جدا وما عملش حاجة وحشة هيدخل النار لمجرد انه فشل في الوصول ؟؟
وواحد مولود واصل جاهز هيدخل الجنة وهو عمل كل شيء وحش في حياته !!
هو في واسطه عند ربنا؟؟ اللى اتولد لأهل مسلمين هيدخل الجيش قصدي الجنة واللى اتولد لاهل فكرتهم عن الدين انه فكره ما كانت منتشرة في القرون الوسطي وحاليا في العالم التالت !!

مش عارف مجرد كلام محتاج جواب حد يرد إن كان يملك رد

27 comments:

Anonymous said...

اهلا بيك فى بدايه طريق الفكر الالحادي .. مفيش جواب غير ان الاديان والالهه .. ممكن تكون حقيقه .. وممكن تكون خديعه .. دي نظريتي .. غيري مؤمن بالقطع بانها خديعه .. وغيري مؤمن بالقطع انها حقيقه .. شوف الحل اللى يريحك نفسيا وعيش بيه ..

halaS demahoM said...

ايه ده يا ابني
انت متأكد ان انت اسمك أحمد؟؟؟
انت مين يا ابني عشان تتكلم علي ربنا ولا الاسلام ولا الجنه والنار بالطريقه دي

اخرتك وحشه علي فكره

ده دين
يعني لما تتكلم عليه يبقي نتكلم بأدب واحترام ومش بمزاجك كمان

ولو انت شارب مخدرات او خمره او اي حاجه تذهب العقل
يبقي تستني الاول لما تفوق وتتكلم
مش جاي تخرف كده علي طول

عيب عليك لما توقع مكانتك عند ناس بتحترمك عشان خاطر اسمك احمد بكلام ملوش اي لازمه

موضوع الجنه والنار ده محدش يعرفه غير ربنا
هو اعلم باللي في قلوب الناس وعارف مين يستحق ومين ميستحقش

\\
ما بين متشدد بيقول إن الإسلام تعني دين محمدٍ عليه الصلاه والسلام فقط، وما بين آخرين يقولون ان الإسلام هو مله إبراهيم ومن تبعه من النبيين
\\
الاسلام هو دين سيدك وسيدي وسيد اهل الارض جميعا وهو محمد صلي الله عليه وعلي اله وصحبه وسلم
ومش المتشددين هما اللي بيقولوا كده
ده ربنا هو اللي بيقول كده
وريح بالك
وبدل ما انت عمال تقرا كتب لناس من الشيعه والملحدين والكفره
اقعد مره واقرا القران
يمكن الايه دي تريحك شويه

يقول الله السميع العليم جل شأنه : { قُلْ يَا أَهْلَ الْكِتَابِ تَعَالَوْا إِلَى كَلِمَةٍ سَوَاءٍ بَيْنَنَا وَبَيْنَكُمْ أَلَّا نَعْبُدَ إِلَّا اللَّهَ وَلَا نُشْرِكَ بِهِ شَيْئًا وَلَا يَتَّخِذَ بَعْضُنَا بَعْضًا أَرْبَابًا مِنْ دُونِ اللَّهِ فَإِنْ تَوَلَّوْا فَقُولُوا اشْهَدُوا بِأَنَّا مُسْلِمُونَ (64) يَا أَهْلَ الْكِتَابِ لِمَ تُحَاجُّونَ فِي إِبْرَاهِيمَ وَمَا أُنْزِلَتِ التَّوْرَاةُ وَالْإِنْجِيلُ إِلَّا مِنْ بَعْدِهِ أَفَلَا تَعْقِلُونَ (65) هَا أَنْتُمْ هَؤُلَاءِ حَاجَجْتُمْ فِيمَا لَكُمْ بِهِ عِلْمٌ فَلِمَ تُحَاجُّونَ فِيمَا لَيْسَ لَكُمْ بِهِ عِلْمٌ وَاللَّهُ يَعْلَمُ وَأَنْتُمْ لَا تَعْلَمُونَ (66) مَا كَانَ إِبْرَاهِيمُ يَهُودِيًّا وَلَا نَصْرَانِيًّا وَلَكِنْ كَانَ حَنِيفًا مُسْلِمًا وَمَا كَانَ مِنَ الْمُشْرِكِينَ (67) إِنَّ أَوْلَى النَّاسِ بِإِبْرَاهِيمَ لَلَّذِينَ اتَّبَعُوهُ وَهَذَا النَّبِيُّ وَالَّذِينَ آَمَنُوا وَاللَّهُ وَلِيُّ الْمُؤْمِنِينَ (68) وَدَّتْ طَائِفَةٌ مِنْ أَهْلِ الْكِتَابِ لَوْ يُضِلُّونَكُمْ وَمَا يُضِلُّونَ إِلَّا أَنْفُسَهُمْ وَمَا يَشْعُرُونَ (69) يَا أَهْلَ الْكِتَابِ لِمَ تَكْفُرُونَ بِآَيَاتِ اللَّهِ وَأَنْتُمْ تَشْهَدُونَ (70) }( القرآن الحكيم ، آل عمران ) .

\\
فيصبح أهل الكتاب من يهود ومسيحيين من المرضي عنهم حسب الآية
\\
ايوه فعلا هما من اهل الكتاب
بس مش الناس بتوع اليومين دول
هو ربنا عمره حلل الزنا ولا قال للستات يلبسوا محزق ويمشوا بشعرهم
الغير مسلمين بس هما اللي بيعملوا كده
هما حرفوا الكتب اللي ربنا نزلها عليهم
عشان كده هما يعنبروا كفره
ولو راجعت شوية تاريخ كمان
هتلاقي ان منهم ناس مكنوش معترفين بوجود نبيهم حتي لما جاب لهم معجزات زي ماهما عاوزين

\\
اروح بقي اقتل وازني واسرق واعمل اللى نفسي فيه وف الاخر شوية تعذيب ثم نعيم الجنة
\\
ومين قالك تسرق ولا تزني يا عم انت
ومين قالك ان كل اللي بيقول لا اله الا الله بتكون من قلبه اساسا
اللي بتكون طالعه من قلبه مبيعملش الكلام اللي انت بتقول عليه ده
ولو عمله يبقي بيستهبل ومش عارف حاجه
ومش قاعده يعني
عشان واحد مسلم زنا يبقي كل المسلمين زناه يعني
المفروض اللي يقول لا اله الا الله يعمل بيها
ابقي اقرا الحته دي وانت تعرف المسلمين اللي علي حق

قيل لعائشة - رضي الله عنها: (( أخبرينا بأعجب شيء رأيتيه من رسول الله صلى الله عليه وسلم؟ قال: فسكتت ثم قالت: لما كانت ليلة من الليالي. قال: ((ياعائشة ذريني أتعبد الليلة لربي)) قلت: والله إني أحب قُربك، وأحب ما يسرك .

قالت: فقام فتطهر، ثم قام يصلي. قالت: فلم يزل يبكي، حتى بل حِجرهُ ! قالت : وكان جالساً فلم يزل يبكي صلى الله عليه وسلم حتى بل لحيته ! قالت: ثم بكى حتى بل الأرض ! فجاء بلال يؤذنه بالصلاة ، فلما رآه يبكي ،

قال: يارسول الله تبكي ، وقد غفر الله لك ما تقدم من ذنبك وما تأخر؟! قال: (( أفلا أكون عبداً شكورا ؟! لقد أنزلت علي الليلة آية ، ويل لم قرأها ولم يتفكر فيها ! {إِنَّ فِي خَلْقِ السَّمَاوَاتِ وَالأَرْضِ ...} الآية ))

\\
مع ان ربنا العفو اللي رحمته وسعت كل شيء!! ماعدا الشيطان
\\
غصب عنك يا حبيبي مش برضاك
ربنا رحمته وسعت كل شئ
محدش قال الا الشيطان
وهو مين \\من وحي امل دنقل،\\ ده عشان تسمع كلامه وتؤمن بيه اوي كده

halaS demahoM said...

\\
مبارك هيدخل الجنة علشان موحد
\\
ايه المشكله
إن الله لا يغفر أن يشرك به ويغفر ما دون ذلك لمن يشاء ومن يشرك بالله فقد ضل ضلالاً بعيداً
الايمان بالله موجود
اي حاجه غير كده ممكن ربنا يغفرها لمن يشاء

\\
تشي جيفارا اللى حارب الظلم دائما وابدا بدون اسباب غير نصره الملظومين هيدخل النار علشان مكان مؤمن بربنا
\\
مين قالك انه حارب الظلم
يا حبيبي انتوا مضحوك عليكوا
وبعدين مادام كافر يبقي القضيه مقفوله
والله وحده هو اللي اعلم هلي هيغفر له ولا لاء مش انا ولا انت ولا اي حد يقدر يتكلم في القصه دي
\\
مبارك الكلب الظالم هيدخل الجنة وجيفارا اللي قاتل لإحلال العدل هيدخل النار! وعجبي
\\
مين قال كده
محدش يعرف اساسا مين يدخل الجنه ومين يدخل النار
انت مترعفش مبارك عشان تقول عليه كلب ومتعرفش جيفارا عشان تقول عليه عادل

واعتقد انه من الاحترام انك تحترم ولاة الامور
يعني حتي لو مبارك كلب ميحقش ليك انك تقول عنه كده
عشان ده رئيسك
ومش برضاك بردوا
ده غصب عنك
يعني الراجل ليه مننا كل احترام

تعرف الامام مالك
شكلك متعرفوش
اقولك انا
يقول ابن خلكان عن واقعة ضرب الإمام مالك : " فلم يزل بعد ذلك الضرب في علو ورفعة ، وكأنما كانت السياط حليا حلى به " ، ويقول ابن الجوزى – كما في شذور العقود - : " وفيها – أي في سنة سبع وأربعين ومائة – ضرب مالك بن أنس سبعين سوطا لأجل فتوى لم توافق غرض السلطان " .

- رغم هذه السابقة ، ورغم الإيذاء البدني الذي وصل إلى سبعين ضربة بالسوط على جسد الإمام ، إلا أن ذلك لم يدعه إلى التحريض على السلطة الحاكمة والخروج عليها ، فكانت رؤية الإمام مالك هي عدم الخروج على من تغلب من الأئمة ، وكان يرى أن المفسدة في ظلم أولى الأمر إذا رافقه استقرار سياسي واستتباب للأمن أخف وأهون من المفسدة التي تقترن بالعنف والخروج والثورة ، وما يصاحب ذلك وما يعقبه من قتل ودماء ومطاردات وصراعات وتضييق وفوضى وعدم استقرار

كلامك ملوش اي لازمه
وكلام في الهوا
\\
هو مش ربنا ادانا عقل
\\
هو ادانا عقل بصراحه
بس مش عارف بالنسبه ليك ايه الظروف
اللي يقول كلام بالحجم والخطوره دي
معتقدش انه يبقي عنده ذرة عقل


\\
وواحد مولود واصل جاهز هيدخل الجنة وهو عمل كل شيء وحش في حياته
\\
طب احمد ربنا علي النعمه اللي انت فيها
وغيرك مش لاقيها
مش تقول اي كلام كده والسلام
ده لو رينا خد منك كل حاجه واداك الاسلام بس
ده انت تبوس ايدك وش وضهر
والحمد لله
دي افضل نعمه

\\
هو في واسطه عند ربنا؟؟ اللى اتولد لأهل مسلمين هيدخل الجيش قصدي الجنة واللى اتولد لاهل فكرتهم عن الدين انه فكره ما كانت منتشرة في القرون الوسطي وحاليا في العالم التالت
\\
عندك واسطه لربنا وساكت
ما تقول من الاول
ولا ده سؤال
شكله سؤال وعاوز اجابه
الرسول هو شفيعنا يوم القيامه
بس دي شفاعه مش واسطه
والله عجبا لامر المؤمن ان امره كله خير
بس المؤمن بقي

الكلام ده اكبر منك بكتيييييير
لو مصطفي محمود عايش كنت اتصلتلك بيه وخليته يكلمك في الموضوع ده

وارجع واقولك
اللي يكون اسمه احمد ويتبسط اوي لما الناس تقوله يا جيفارا اكتر من احمد
من الطبيعي اني مستغربش الكلام ده عليه
اقولك ومتزعلش مني
خساره فيك اسم احمد اللي انت مش مقدر قيمته
وخساره فيك الاسلام اللي بتتريق عليه وتقول ع الجنه جيش

مجرد راي
مـــحــــمـــد صــلاح عــبــد الــرحــمــن

!! a7mad sala7 !! said...

لا حول ولا قوة الا بالله


قبل اى حاجة انا عاوز اقولك انى بجد متأزى اوى من الكلام اللى بشوفه ده

عشان خسارة لما يبقي شاب مسلم متعلم على قدر من الثقافة ويبقي تفكيره بالشكل ده
يبقي سيبنا ايه للجهلة

انت كده بدل ما تستغل علمك ومعرفتك فى نفع انت ضريت نفسك ودخلت نفسك فى حتة محظورة

الكلام اللى بتقوله ده لا يدل غير على انك على بداية طريق الالحاد
لا دانت مشيت فيه خطوتين تلاتة

واللى يخليك تقول كده النهارده ممكن تيجي بكره تقول هو ربنا فين وامتى وازاى
وكان فى ايه قبله وايه بعده
_اعوذ بالله من الشيطان الرجيم_
ربنا هو الاول والاخر .. وهو الحكم وهو العدل
ومهما عليت بمخك وبمستوى تفكيرك مش هتوصل لاى حاجة فى الاتجاه ده

يعنى دخلت فى عداد الخطر

والخطر كده موسع موقفش عليك لوحدك
خطرك اكبر من خطر الجاهل اللى ميعرفش حاجة فى الدنيا
على الاقل هو فى حاله ومبيأزيش الا نفسه
لكن انت كده بوضعك ده ماشي توزع سموم ع البشر
عشان لما يخش واحد نفسه ضعيفه وينساق للكلام اللى انت كاتبه ده يبقي شديته معاك
شيلت ذنبك وذنبه
وذنب كل واحد هيمشي وراكو

الكلام دا مبدأيا

بالنسبة للموضوع انا مش هخوض فيه اوى لانى مش على القدر الكافي من التدين اللى يخليني ارد على كل كلمة
واخطر حاجة الفتوى .. فمش انا اللى هفتى

بس هقولك اساسيات بسيطة ممكن تكون انت مش واخد بالك منها

اولا انت مش اختصاصك انك تعرف مين هيدخل الجنة ومين هيدخل النار
والموضوع دا المفروض ميتعبكش ولا يشغل بالك اصلا
وما خلقت الانس والجن الا ليعبدون
كل عمل بتعمله ابتغاء لوجه الله يعتبر عبادة
لكن اللى بتتكلم فيه ده مش عبادة خالص
دا تدخل فى شئون الخالق

حتت الاديان دى
من ابتغى غير الاسلام دينا فلن يقبل منه
دين الاسلام زى مانت قولت هو الدين اللى نزل على جميع الانبياء
هو دا الاسلام
وكل نبي كان ليه رساله
بيوصلها ويسلم الراية للنبي اللى بعده
وكلهم مسلمين

الاختلاف اللى احنا بنتكلم فيه
دا فى الديانات
والديانة غير الدين
الدين واحد هو دين الاسلام
الديانة زى اليهودية .. المسيحية .. الاسلامية

يعنى هما لما كتبو فى البطايق
الديانة كذا .. هما غلطو وعملوها صح
لان هى ديانة فعلا

كل انسان على عهد ديانته ماشي صح
واللى بيتبع يهوديته صح بتوصله للمسيحية
واللى بيتبع مسيحيته صح بتوصله للاسلام
والاسلام اخر الرسالات والديانات
اللى هو القران يعنى
غير كده يبقي تحريف

واحنا ملناش دعوة بالتحريف واللى بيحرفو
لكم دينكم ولى دين

مفيش بقي متشددين ومش متشددين فى الحتة دى
الامر محسوم

لكن اللى مات على ديانته (الديانات السماوية) فى وقتها هو مسلم وماشي صح

واساس اى ديانة من الديانات السماوية لا اله الا الله

ولا اله الا الله دى مش بالكلام بس
دى قول وفعل

يعنى مقولش لا اله الا الله وانا مبعملش بيها

يعنى مثال بسيط
المسلم اللى مبيصليش ليس على الاسلام فى شيئ

!! a7mad sala7 !! said...

وحتت انك تبقي مؤمن ان لا اله الا الله تدخلك الجنة دى رخصة من عند ربنا
كرمك بيها وكرم ذوى العقول السليمة
اللى بيتبعه منهجه وماشيين على نهج رسله
فانت المفروض تحمد ربنا على كده .. بس

وبعدين مفيش حاجة اسمها شوية تعذيب
شوية دى مش نسبة وتناسب بينك وبين ربنا

روح حط نفسك فى فرن عيش مولع لمدة 10 دقايق
هتخرج متفحم .. دا لو عرفو يخرجوك

فما بالك بنار جهنم
وكل ما جلدك يقع يبدلك بجلد تانى

ونار جهنم ب70 نار من نار الدنيا

كفاية مشهد يوم القيامة
يوما كان مقداره خمسين الف سنة مما تعدون

يعنى شيئ عقلك الادمى لا يمكن ان يتخيله
ولا هييجي يوم تقدر بس تتخيله
الموضوع مش بالسهولة اللى بتتخيلها دى

وبعدين جيفارا ولا غندى ولا غيرهم
اكيد كانو فى عهد ديانة معينة
او نبي معين
واكيد وصلتهم الرسالة ومامنوش بيها
يبقي ربنا يحاسبهم على كده مش احنا

وحتى لو موصلتلهمش
بردو ربنا هيحاسبهم بمعرفته
وهو وحده اعلم دول من اهل الجنة ولا لا

زى بردو ما مبارك وغيره وكل الدنيا هتتحاسب ومحدش يعرف مصيرهم غير ربنا

وبعدين لما واحد يعبد بقر
وهو عارف ومتيقن ان فى شيئ فوق البقر وفوق كل حاجة
يبقي دا ليس على العقل بشيئ
ولا يستحق انك تمشي وراه اصلا
لانه بنى ادم عنيد
يكتم الحق وهو يعلم
والعند يورث الكفر

"من لم يرضي بقضائي ولم يصبر علي بلائي ولم يذكر نعمائي ولم يقنع بعطائي فليخرج من تحت سمائي وليتخذ له ربا
"سواي

دول بقي يشوفو رب تانى ويعيشوا فى نعمه
يعنى ميستحقوش من ربنا اى فضل او نعمة
ومع ذلك رزقهم كان مكتوب
زى ما رزق كل كافر غير مطيع لربنا مكتوب .. بغض النظر عن دينه ولا ملته

بس ميتساواش بقي بالمؤمن الموحد
وميخشش الجنة زيه فى الاخر

يعنى مش معنى ان جيفارا او غيره عملو انجازات وخدمو البشر ان ربنا كان عاجز انه يوقف مسيرتهم ولا كان اللى هما وصلوله دا تكريم ليهم
ولا حتى كان من باب اولى انه يخسف بيهم الارض ساعتها لانهم ملحدين
مش كده خالص .. ربنا خلق كل لما يسر له
الحياة كلها ماشية بموازين لا يعلمها الا الله
بس يوم القيامة كل واحد بياخد حقه بالظبط
"سامتعه قليلا ثم اضطره الى عذاب اليم"
ومتعته هى الشهرة اللى وصلها واللى من خلالها بتهتفله انت واللى ماشيين على دربك
بس هو خسر اخرته اللى هى خير وابقي

ومش احنا بردو اللى هنقول دا حقه كذا ودا حقه مش كذا
دى بتاعة ربنا بس سبحانه وتعالى


اخيرا عشان ترتاح فعلا وتريح قلبك
عليك انك تقرا القران
وتتدبر معانيه واحكامه
وتحس حلاوته بقلبك .. ساعتها هيستريح عقلك
منهجك وتشريعك هو اللى تاخد منه كل توجيهاتك
القران والسنة كفيلين اوى انك تلاقي منهج تمشي بيه فى حياتك

نحن قوم أعزنا الله بالإسلام فإن ابتغينا العزة بغيره أذلنا الله

لكن السكة اللى بتمشي فيها دى اخرتها مش كويسة

ربنا يهديك وايانا

Che Ahmad said...

انونيموس

مش بداية الفكر الالحادي ولا حاجة
الايمان بوجود إله او الالحاد في نظري مسأله نفسية بحته ملهاش دعوة بالافكار

;)

Che Ahmad said...

cave man

اسمي مش مهم ف حاجة بس هو احمد ع العموم
انا مين واحد عادي بيفكر بصوت عالي
بالنسبة لأخرتي انت متعرفهاش لا حلوة ولا وحشة

بخصوص اتكلم فهو بمزاجي ومحدش ليه دعوة واللى مش عاجبه ما يدخلش البلوج بتاعي وكفي الله المؤمنين شر القتال

وبعدين شارب ايه ؟؟ انت كويس يا حبيبي
ع العموم هو انا حاليا مش بشرب بس حتى لو بشرب انت زعلان ليه م الكلام ؟؟

وكمان كبر لحكاية مكانتي عند ناس دي
انا يهمني بس مكانتي عند نفسي واني ابقي راضي عني ليس إلا

مش هرد علي بقية كلامك يا مستر محمد بما اني انا شارب ;)

Che Ahmad said...

محمد مرة كمان

بص يا سيدي
كل كلامك فاكس جدا
وحكاية كتب الشيعه والملحدين والخروج عن الحاكم واحترام ولي الامر

فاكس جدا
جدا يعني

Che Ahmad said...

احمد صلاح

انا معنديش محظورات
ربنا اداني عقل وقالي افكر فيه فانا بفكر بيه وبصوت عالي

اللي نفسه ضعيفه وهي يمشي ورا كلامي زي الخروف مليش فيه انا
كل واحد عنده عقل يفكر في الكلام واللى خايف علي نفسه ما يعديش عليا بسيطة خالص

بقية كلامك مش هرد عليه بردو علشان بيدور برا نقطة التساؤل بتاعتي

maii said...

مش عارفه يا احمد
السؤال ده ياما دار علي دماغي وأنا صغيره ولحد دلوقتي
وأنا صغيره لما كنت أروح أسأل بابا كان يقولي أن ربنا هو أعلم وأحنا مش بأدينا نقيم البشر ونقول علي ده هيدخل ولا ده هيخرج بس برده فضل السؤال محيرني
وكنت اقول باباان في ناس كتيييييييييييير مش مسلمين بس بيعاملو ربنا فتعاملاتهم وبيحترموه اكتر من كتير مسليمن
وهو برده يرد يقول الله أعلم

وكان في حاجه برده بتحيرني جداااااااااا جدا لما يجي مثلا يقولك اللي هيحفظ اسماء الله الحسني هيدخل الجنه او اللي يموت له ابن شهيد بيشفعله او ما شبه ذلك
كنت افضل اقول ان يعني لو عمل كده يعمل كل حاجه بعد كده وبرده هيدخل الجنه
واللي مات له شهيد يعمل كل حاجه وحشه ويدخل الجنه
ولما كبرت دلوقتي بقي السؤال فضل محيرني بس رجعت قولت زي بابا
أن الله أعلم


طبعا تعليق عقيم مافيهوش رد
لكني حبيت اكتب اللي جوايا فقط من ناحيه الموضوع ده

3rby said...

انا اللي عجبني اكتر من البوست البقين دول:
"عيب عليك لما توقع مكانتك عند ناس بتحترمك عشان خاطر اسمك احمد بكلام ملوش اي لازمه"

احه

"
واعتقد انه من الاحترام انك تحترم ولاة الامور
يعني حتي لو مبارك كلب ميحقش ليك انك تقول عنه كده
عشان ده رئيسك
ومش برضاك بردوا
ده غصب عنك"
هههههههههههههههههههه
عندك حق غصب عنا

!! a7mad sala7 !! said...

للاسف كنت متوقع انك تناقش بشكل احسن من كده

انا مش متعود منك كده بصراحة

وبعدين كنت متوقع انك ياما ترد رد كبيييييييير او بس رد فعلا
ياما تقتنع بشيئ من الكلام ده ومتقولش اكتر من كده


بس ردودك دى هى فعلا الكلام الفاكس اللى انت بتقول عليه

يعنى مثلا لما تقول
//انا يهمني بس مكانتي عند نفسي واني ابقي راضي عني ليس إلا//

دى بالنسبة لانسان مسلم .. ليس لها اى اساس من الصحة

عشان انت المفروض يبقي اللى يهمك اولا هو ان ربنا يبقي راضي عنك
وبعد كده تشوف اى اهتمامات تانية
يا فرحتى لما تبقي راضي عن نفسك وربنا ساخط عليك
مش هتشوف خير فى دنيتك ولا فى اخرتك


//اللي نفسه ضعيفه وهي يمشي ورا كلامي زي الخروف مليش فيه انا//

لا طبعا ليك فيه
ومش بمزاجك
كل كلمة بتقولها بتتحاسب عليها
وانت بتكتب هنا وعارف ان فى ناس كتير بتقرا
ولما تعمل ذنب وتمرره لغيرك
عداد بيعدلك

ميبقاش زى اللى ولع عود كبريت ورماه فى الجاز
ويقول انا مليش دعوة .. انا ولعت فى النقطة دى بس


وعلى فكرة لو قريت الكلام كله هتلاقي انى مخرجتش خالص عن اللى انت سالت عنه
لان انا مش جاى ادى درس
انا جاى ارد عليك

انت كده مش شايف الكلام لانه مش جاى على مزاجك

!! a7mad sala7 !! said...

بالنسبة للاخت اللى ردت

يا ريت كنتى تقري الردود اللى فوق يمكن كنتى لقيتي شوية اجابات تريحك



بالنسبة للاخ اللى رد

عاجبني اوى انك سبت الموضوع
وسبت المناقشة
وسبت القضية كلها
وداخل بس تقول لفظ مش كويس


ونعم المشاركة الفعالة

Che Ahmad said...

مي وعربي

منورين

Che Ahmad said...

احمد صلاح

بص يا سيدي حاجتين تعليق علي كلامك

ليه انا ما ردتش ؟؟
علشان انت جاي تقنعني
انا بعرض افكار مش بقنع حد
انت جاي تقنعني
انا مش عايز اقتنع
لو جاي تعرض افكارك كنت اهتميت

لكن انت جاي تقنعني بالعافية ايم سوري انا مش الشخص المناسب لدا

انا يهمني انا عند نفسي
بالنسبة لانسان مسلم ايه
كبر دماغك والنبي محدش ليه حق يتكلم بالاسلام وانا بتكلم بنفسي بس ومش من حق تقول اي حاجة عليا دا شيء يعود ليا انا وبس ليس إلا

اخر نقطة
مفيش حاجة اسمها مش بمزاجك
طريقة كلامك فعلا فعلا غبية اي والله
ع العموم هو بمزاجي ومش بمزاجك ولا مزاج حد تاني وانا مش بولع ف حاجة يا افندم انا بعرض افكار مليانة بصيغ مختلفة ف الدنيا كلها وجوا كل واحد وكل واحد بيعبر عنها بطريقته

ع العموم هبقي مبسوط لو البوست اثار تساؤلات جوا ناس واستفزهم للاجابة عنها

بالنسبة للكلام
انا مش شايفه لانه مش كلام جاي يتعرض
دا كلام جاي يغتصب

وللاسف البلوج مش المكان المناسب لدا

اخيرا ملكش دعوة بالناس اللي بترد ولو حبيت ترد عليهم يبقي باسماءهم مش الاخ والاخت

halaS demahoM said...

بص يا سيد احمد
ربنا ادي كل واحد دماغه اللي مريحاه
وانت مادام مستريح كده
يبقي خلاص
اي حاجه غير كده مش هتجيب فايده

بس انت للاسف دماغك مش مريحاك خااااااالص
بس انت بتحاول تقنع نفسك انك مستريح
ومش بس كده
ده انت بتحاول تقنعنا كمان
تصور
صدقتك انا واقتنعت
لاء
ريللي ريللي صدقتك واقتنعت

ع العموم يا سيدي براحتك
بس اسال واحد مختص في الحكايه دي مادام دماغك بتاكلك وعاوز جواب صحيح ومريح
س ل ا م ي

!! a7mad sala7 !! said...

مش عايز تقتنع ازاى يعنى

اذا كان انت كاتب بنفسك

//مش عارف مجرد كلام محتاج جواب حد يرد إن كان يملك رد//

مانا رديت اهو
وبعدين افكار ايه
هو احنا هنبتدع فى الدين
دى منهج يا حبيبي
منهج محطوط من قبل مانت تتولد وانا اتولد
هى دى فيها افكار

انا مش بقنعك بالعافية ولا حاجة
انا مش ماسكلك عصاية عشان تصدق الكلام
انا بذكرك بس مش اكتر
وبعدين مش بقولك كلام من دماغى
دانا قايلك فوق مش انا اللى هفتى
ذكر بالقران من يخاف وعيد

انت واحد بتقول انا مليش محظورات
يبقي انت كده قفلت باب المناقشة خلاص
مفيش داعى نكمل
انت حر فى معتقداتك وفى تصرفاتك
ومحدش قال انى بغصبك

وكمان انا شايف ان خسارة ان حد يضيع وقته عشان يقنعك اصلا
لانك بتقولى لانسان مسلم ايه كبر دماغك

كبر دماغك!!

لو فى حد بيفهم وقرا الكلام دا كله
هيقولك مين اللى طريقته غبية فعلا
انا ولا انت

انت بتكتب الكلام ومش بتدور على حلول
عاوز اللى فى دماغك بس اللى يبقي صح
كلها مسألة عند

يعنى بالطريقة دى فعلا المناقشة معاك تبقي دون جدوى

فول استوب

Anonymous said...

فعلا لو كان عندك ذرة عقل من اللي بتدندن عليه مكنتش سألت الاسئله دي

اصحاب العقول في راحه

Che Ahmad said...

محمد بيه

دماغي مش مريحني ولا حاجة
دماغي قاعد يسأل طول الوقت

وعلي فكرة انا مش مهتم اقنع حد بحاجة وبالذات لو عني لاني اصلا ولا بيهمني اي حد
شيء يخصني محدش ليه اي تلاتين دعوة

Che Ahmad said...

صلاح

.

انونيموس

معلش بقي
انت صاحب العقل

maii said...

الاستاذ اللي أسمه صلاح
حضرتك محدش طلب منك تحللي اللغز ده
انا قريت كلام وحسيت اني سألته لنفسي فوقت مالايام ومالاقيتش اجابه وأنا بطبعي لما بحتار في أجابه حاجه بروح أختار الناس اللي تجاوبلي عليها
وأعتقد اني ما وجهتلكش كلامي وما طلبتش منك مساعده
ولا أيه؟
ده اولا يعني
ثانيا بقي
انا واحده مؤمنه بربنا كويس جدا وده أنا أعلم بيه يعني مش محتاجه حد يقولوهولي
بس من حقي لو لاقيت حاجه مش فاهماها فديني اني أتشغل بيها
ومش من حق أي حد برده يجي يفتي ويرد عليا
مالاخر يعني حضرتك ترد عالبوست وبس مالكش دعوه بأراء الناس عليه
أوكي
يا أخ

I.S.C said...

بص انا ممكن أأذيك بكلامك دا.. بس اعرف انك دخلت المربع.

I.S.C

Che Ahmad said...

وكاله الاستخبارات بحالها عندنا

:P

elharery said...

مع إحترامى لحضرتك
من حقك تفكر بس لازم يكون عندك العلم الكافى لتوصل لاستنتاجات حقيقية وأجوبة لأسألتك
أقرأ لعلماء الدين وردودهم على القضايا دى
فمثلا بالنسبة (لمن قال لا إله إلا الله دخل الجنة) قالو "أن القول (قول القلب واللسان) وحده ليس كاف في دخول الجنة، بل لا بد من العمل ( عمل القلب والجوارح)..

http://www.saaid.net/


وأنصحك كمان تقرأ كتاب مصطفى محمود (حوار مع صديقى الملحد)
http://www.al-mostafa.info/data/arabic/depot2/gap.php?file=003875.pdf

طبعا مبقولش إن حضرتك ملحد لكن الكتاب فعلا فيه إستدلالات عقلية على أسالة كتير

وفى النهاية بقولك إن الوصول لإجابات يتطلب علم بجانب العقل لأن لو الموضوع عقل بس كان أى واحد جاهل بس ذكى خرجلنا بنظريات بدون دراسة وقوانين

Boba said...

بغض النظر عن اي حاجة انا مبسوط بالبوست و الكومنتات
فكرتني بحاجات كتير..فرحت اوي لما افتكرتها
:)
ثانكس ليكو كلكوا

!! a7mad sala7 !! said...

هههههههههههههههههه

جواهر بنت محمد بن عبد الرحمن آل ثاني said...

قالوا من قبلي كلاماً كثيراً كنت أريد قوله..و لكني سأختصر لك و و سأقوله بأسلوب آخر.
أولاً..النبي إبراهيم كان حنيفاً مسلماً و الدين الإسلامي هو ناسخ لكل الأديان السابقة,و بذلك عندما ينزل المسيح عيسى من السماء في أواخر الدنيا يحكم بشريعة الإسلام لا بشريعته!
ثانياً..الشيطان قبل أن يتكبر و يغتر بنفسه و يرفض السجود إلى آدم..كان من الملائكة و كان اسمه عبدالرحمن! و خطئية الكبر و الغرور من الأخطاء التي لا تغتفر.نعم رحمة الله تسع كل شيء..و لكننا لا نستطيع الحديث هنا عن الشيطان.
ثالثاً..لا يمكن لأحد أن يعرف إن كان أحد سيدخل الجنة أو النار حتى و إن كان مسلماً!لأن معرفة ذلك يتطلب معرفة إن كان هذا الشخص مؤمناً و موحداً بالله بلسانه و قلبه و جوارحه, و هذا طبعاً من الأشياء التي لا يعرفها إلا الله.و بالنسبة إلى ما قلته أنه يمكن للمسلم أن يعبث و يلهو ليدخل النار قليلاً و يخرج إلى الجنة..هذا كلام غير أكيد كما إنه استهانة بعذاب النار و لا تنسى بأن الجنة و النار طبقات من الدرك الأسفل إلى الدرجة الأعلى.
أريد أن أشير أيضاً إلا أن جيفارا ليس بطلاً و ابحث عن سيرته, كما أن مبارك قد لا يكون بذلك السوء..فنحن لا نعرفه جيداً!
أرجو أن تتقبل رأيي بسعة صدر..شكراً.