وحشتيني

وحتشيني !!
عارف اني بقالي كتير ما عدتش ولا سألت ولا اي حاجة، بس والله علي بالي دايما، وحياة ضحي علي بالي، صحيح انتي وحشتيها هي كمان وبتسلم عليكي كتير.
معلش بقي عديها المرة دي، كان عندي شغل كتير اوي، وكان عندنا موقع في الواحات كان لازم نسلمه بدري وكنا اصلا متأخرين في الشغل، ما هو انا لو بشتغل مع بهايم اصلا كانوا انجزوني، لكن استخصار الباشا صاحب الشغل ومقاول معفن بيطلع علي دماغي انا.
سيبك سيبك هو انا جاي اوجع دماغك ولا ايه، المشروع طلع حلو ف الاخر وعجب كل الناس، صحيح مش عاجبني اوي بس من امتي بيعجبني حاجة.
اه بالظبط زي بيتنا اللى عملته من اوله لأخره، بس مكانش هيبقي حلو كدا من غير ديكوراتك، فاكره النجمة اللي علقتيها في ركن الاوضة، اه سوري مش نجمة، الكوكب، وقولتيلي لو فتحنا فتحه في المكان دا والسما كانت صافية هنشوف كوكب الزهرة منور كأنه نجم مكسوف، اشمعني مكسوف صحيح، كل مرة اسئلك ومش بتجاوبي، واقولك انا علشان لونه شبه خدودك لما بتبقي مكسوفه، بتضحكي وما بتجاوبينيش.
امبارح جيتي في بالي وضحي بتسألني عن ألبوم الصور بتاعنا، نسيت اقولك صحيح انها اشتركت في فريق السباحة ف النادي، بعد ما عدت تسع سنين علشان زي ما قولتيلي انه غلط ع الاطفال يبدأوا قبل كدا، لحد دلوقتي مش عارف جبتي معلومتك دي منين، بس ياللا علشان ما تزعليش بس والله.
فاكره لما كنت البت ضحي لسه ما اتعلمتش المشي وبتجري ورا دايرة الشمس الصغيرة اللي داخله من الشباك، وانا افضل اخبي فيها وهي تدور ومش لاقيها، وانتي بتضربيني ف كتفي وتقوليلي ابطل رخامة عليها، فاكره انها اول مرة وقفت علي رجليها كانت لما خليت دايرة الشمس دي تيجي علي ركبتي وهي وقفت علشان تمسكها.
صحيح عارفه نفسها تطلع ايه ؟؟ قال ايه رائدة فضاء، وتروح الشمس، غلبت افهمها ان محدش بيروح الشمس وهي مش مقتنعة، كنتي بتفهميها الحاجة ازاي يا اروبة انتي ؟ جبتلها كتاب مصور عن الفضا غاصت فيها، تعرفي اول امبارح قالتلي ايه ؟ بتقولي انا بتعلم سباحة علشان اعرف لما اطلع ف الفضا اعوم هناك، البت دي ذكية جدا، اكيد زيي طبعا، وزيك وزيك.
تعرفي، كنت ساعات بغير منها ومنك سوا، منها لما بتاخدك مني، ومنك لما بتجري عليكي وانا قاعد، مكنتش بزعل طبعا، بس كنت بحضنكوا انتوا الاتنين في نفس الوقت.
بحبكوا اه وهفضل للأبد.
هقولها انك بتسلمي عليها.
ياللا بقي كفاية رغي، هقرالك الفاتحة ويس وهمشي
مع السلامة :)

5 comments:

Boba said...

:( ميتة صح كنت حاسس كدا

ديما بنحب الحوالينا اكتر لما بنفقدهم


بسي روعة اوي يا واد :)

maii said...

مليانه بالاحساس ...روعه يا أحمد
طول عمرك بجد حساس وكلامك مليان إحساس لانه بيطلع مالقلب
الكلام اللي بيطلع مالقلب بيوصل القلب
وبجد وصلت قلبي
بس فعلا جامده جدا
:)

Che Ahmad said...

بوبا

تسلميلي:)

مي
تسلميلي بردو:)

Anonymous said...

وجعتلي قلبي اوي اوي ربنا يسامحك

Che Ahmad said...

آمين :)