حداد

لأجل ضحايا التعذيب في مصر
ولأجل روح خالد سعيد

حداد

وحشتيني

وحتشيني !!
عارف اني بقالي كتير ما عدتش ولا سألت ولا اي حاجة، بس والله علي بالي دايما، وحياة ضحي علي بالي، صحيح انتي وحشتيها هي كمان وبتسلم عليكي كتير.
معلش بقي عديها المرة دي، كان عندي شغل كتير اوي، وكان عندنا موقع في الواحات كان لازم نسلمه بدري وكنا اصلا متأخرين في الشغل، ما هو انا لو بشتغل مع بهايم اصلا كانوا انجزوني، لكن استخصار الباشا صاحب الشغل ومقاول معفن بيطلع علي دماغي انا.
سيبك سيبك هو انا جاي اوجع دماغك ولا ايه، المشروع طلع حلو ف الاخر وعجب كل الناس، صحيح مش عاجبني اوي بس من امتي بيعجبني حاجة.
اه بالظبط زي بيتنا اللى عملته من اوله لأخره، بس مكانش هيبقي حلو كدا من غير ديكوراتك، فاكره النجمة اللي علقتيها في ركن الاوضة، اه سوري مش نجمة، الكوكب، وقولتيلي لو فتحنا فتحه في المكان دا والسما كانت صافية هنشوف كوكب الزهرة منور كأنه نجم مكسوف، اشمعني مكسوف صحيح، كل مرة اسئلك ومش بتجاوبي، واقولك انا علشان لونه شبه خدودك لما بتبقي مكسوفه، بتضحكي وما بتجاوبينيش.
امبارح جيتي في بالي وضحي بتسألني عن ألبوم الصور بتاعنا، نسيت اقولك صحيح انها اشتركت في فريق السباحة ف النادي، بعد ما عدت تسع سنين علشان زي ما قولتيلي انه غلط ع الاطفال يبدأوا قبل كدا، لحد دلوقتي مش عارف جبتي معلومتك دي منين، بس ياللا علشان ما تزعليش بس والله.
فاكره لما كنت البت ضحي لسه ما اتعلمتش المشي وبتجري ورا دايرة الشمس الصغيرة اللي داخله من الشباك، وانا افضل اخبي فيها وهي تدور ومش لاقيها، وانتي بتضربيني ف كتفي وتقوليلي ابطل رخامة عليها، فاكره انها اول مرة وقفت علي رجليها كانت لما خليت دايرة الشمس دي تيجي علي ركبتي وهي وقفت علشان تمسكها.
صحيح عارفه نفسها تطلع ايه ؟؟ قال ايه رائدة فضاء، وتروح الشمس، غلبت افهمها ان محدش بيروح الشمس وهي مش مقتنعة، كنتي بتفهميها الحاجة ازاي يا اروبة انتي ؟ جبتلها كتاب مصور عن الفضا غاصت فيها، تعرفي اول امبارح قالتلي ايه ؟ بتقولي انا بتعلم سباحة علشان اعرف لما اطلع ف الفضا اعوم هناك، البت دي ذكية جدا، اكيد زيي طبعا، وزيك وزيك.
تعرفي، كنت ساعات بغير منها ومنك سوا، منها لما بتاخدك مني، ومنك لما بتجري عليكي وانا قاعد، مكنتش بزعل طبعا، بس كنت بحضنكوا انتوا الاتنين في نفس الوقت.
بحبكوا اه وهفضل للأبد.
هقولها انك بتسلمي عليها.
ياللا بقي كفاية رغي، هقرالك الفاتحة ويس وهمشي
مع السلامة :)

الجنة التي سيدخلها مبارك

من زمان كدا مده كبيرة وانا تاعبني موضوع الجنة والنار، مين هيدخل الجنة ومين هيدخل النار، وليه اللى هيدخل دي هيدخل دي ومش العكس، في الإسلام فمن ابتغي غير الإسلام دينا فلن يقبل منه وهو في الأخرة من الخاسرين، ما بين متشدد بيقول إن الإسلام تعني دين محمدٍ عليه الصلاه والسلام فقط، وما بين آخرين يقولون ان الإسلام هو مله إبراهيم ومن تبعه من النبيين فيصبح أهل الكتاب من يهود ومسيحيين من المرضي عنهم حسب الآية، ثم حديث الرسول فيما معناه ان من قال لا إله إلا الله دخل الجنة ( وفي بيزودوا ووقرت في قلبه ) ، حلو اوي لحد كدا، انا بقي مؤمن تماما بألوهية الله ووحدانيته ورسله، اروح بقي اقتل وازني واسرق واعمل اللى نفسي فيه وف الاخر شوية تعذيب ثم نعيم الجنة الذي لا شقاء بعده وهنسي كل اللي فات!
دي رقم واحد
اتنين، من وحي امل دنقل، الله لم يغفر خطيئة الشيطان حين قال لا، الشيطان موحد بالله ومؤمن بيه وبرسله و يوم القيامة اكتر من اكتر تقي ف دنيانا دي، ربنا مش هيعفو عنه لانه تحداه! مع ان ربنا العفو اللي رحمته وسعت كل شيء!! ماعدا الشيطان!!
تلاتة، مين بقي هيدخل الجنة، مبارك هيدخل الجنة علشان موحد ومؤمن بوجود ربنا، وشوية تعذيب يفوتوا ولا حد يموت ومنه للجنة وش، تشي جيفارا اللى حارب الظلم دائما وابدا بدون اسباب غير نصره الملظومين هيدخل النار علشان مكان مؤمن بربنا !! مبارك الظالم هيدخل الجنة وجيفارا اللي قاتل لإحلال العدل هيدخل النار! وعجبي
حبيب العادلي الموحد المؤمن المسلم اللي فشخ وكلابه تمانين مليون خروف قصدي بني ادم هيدخل الجنة فيما ان غاندي الكافر عابد البقر اللي طرد المحتل بدون قطره دماء وبمبدأ اللاعنف هيدخل النار علشان هو مش مؤمن بربنا ولا بالإسلام
بني ادم مسلم هيدخل الجنة رغم انه مقضيها سرقه وقتله اتنين ونام مع ستين واحدة وكان بيرجع يصلي العشا بالليل وساعات بيصلي الفجر هيدخل الجنة بعد ما يتعذب شوية علي ذنوبه.
علي العكس واحد غربي ملحد كافر اخترع ستين اختراع ( نفس عدد البنات اللي نام معاهم الشاب اللى فوقه علي طول) وكان بيمشي ف الشارع يساعد اي حد محتاج مساعده وكان بيتطوع في جهات خيريه في دول العالم التالت هيدخل النار بقي علشان مش مؤمن بربنا !!

هو مش ربنا ادانا عقل ؟؟ طيب اللى معرفش يوصله بالعقل هيعمل ايه ؟؟ هيدخل النار؟؟ طيب ما هو حاول وجرب وفشل؟؟ الفشل مش عيب ولو فشل، فشل علشان ما قدرش يوصل بعقله اللى ربنا اداهوله !! طيب ايه!!
يعني واحد عمل حاجات كتير اوي كويسة جدا وما عملش حاجة وحشة هيدخل النار لمجرد انه فشل في الوصول ؟؟
وواحد مولود واصل جاهز هيدخل الجنة وهو عمل كل شيء وحش في حياته !!
هو في واسطه عند ربنا؟؟ اللى اتولد لأهل مسلمين هيدخل الجيش قصدي الجنة واللى اتولد لاهل فكرتهم عن الدين انه فكره ما كانت منتشرة في القرون الوسطي وحاليا في العالم التالت !!

مش عارف مجرد كلام محتاج جواب حد يرد إن كان يملك رد

أسطورة

في ذلك الركن القصي أنزوي من تلك القاعة الكبري، أنزوي، وحيدا، ساكنا، أخبرتُكِ أنا قبلا أنني أكره السكون، الجميع من حولي لا يتوقفون، الجميع يصيح بصوت عالي، ولا أحد يصيغ السمع إلاي، كأنهم طلاب الثانوية العامة بعد امتحان أرهقهم يتجادلون، يعتريني الصمت ويعتريهم الجنون، وأنتي وسطهم كـ  ثمرة نضجت وها هي أمامهم جميعا تقطف لأحد الحمقي وهم - جميعا - حانقون.
يخبر كل منهم نفسه عن غباءِك باختيارك لهذا التافه من بين الجميع، كلهم يعتقد انه الأحق بكي! وكأنهم حرموكي حقي في الاختيار، وكأنهم هم ليسوا بحمقي، أي حماقات تلك يرتكبون! وأنا، لم تسألين، ولم تقاطعينني، ألم اخبرك يوما انني اكره أن تقاطعينني، أنا من قاطعني !! أسفٌ أنا، نسيت أنك وسطهم هناك تراقصين فتاكِ، أين كنا؟ نعم نعم أنا، في الحقيقة - يا حبيبتي - من بينهم جميعا أنا لا استحقك، أتذكر مقولة لممثلة مسرح فرنسية قديمة تقول فيها عن الرجال الممددين من حوالها يطلبون جميعا رضاها، انها كانت تنتظر ذلك الوغد الذي سيأتي ساحبا أيها إلي كوخه نافضاً عنها الجميع بقسوة وحدة وامتهان، أنا اتهرب أليس كذلك ؟ حسنا! لا أستحقُكِ، تركي إياكي تضيعين يفقدني ميزة استحقاقك، هل يستحق أحدهم أرضه بعد أن باعاها ؟ "عواد باع أرضه يا ولاد !!" أهرب مرة أخري ؟ لا هذه مجرد إراده ما دهمتني لهذه المقولة فقط، يا عزيزتي لا احد يحصل علي قطعة الماس مرتين في حياته! ومن لا يحافظ عليها لا يستحقها!
وهنا! أنا اشاهد قطعة الماس خاصتي يمسك بها أحدهم ليريها للجميع، ليحسدونه ويغتاظون، ويجمع هو من عيونهم الحقد والحسد، ليحوله شهدا يذيقكي إياه عندما تختليان، هل تعلمين، أنا لا أحب الماس في الأساس ! ولم أكن أملك أرضا لأبيعها! أنا ذلك المسافر الذي سيدور العالم بحثا عن اسطورته الذاتية ليخدلها فيموت كمدا من عالم لم يعطه حق قدره!
سأذهب أخيرا، تعلمين أنني أنام مبكرا، ف النوم الباكر يطيل العمر ساعة كل إسبوع، ربما أعيش أربعه ايام أكثر، إن كانت هذه النظرية خاطئة أهديكي الأربعه أيام لتلعقي فيهم الشهد!
أراكي في الجنة إذا

:|

يا جرحي ياللي بعمق الوطن ... كيف اداويك ... كيف اداوي الوطن

خوف

!! خوف 
ثقافة الخوف... مؤمن أنا ان النظام المصري الحالي بيشيع ثقافة الخوف في الشعب، ثقافة جوا الحيطة، والشر وغنيله حتي لو صوتك وحش، وانا عندي عيال يا عم، والشمس اللي خايفين نروح وراها وعمرنا ما كنا اصلا قدامها علشان نبقي وراها.
بابا وانا رايح الزقازيق قبل الامتحانات وانا بسلم عليه، ف بيديني الباكيدج بتاعه النصايح، الصراحة متوقع نوعية ذاكر واجتهد واخر سنة و و و ...، بس للأسف خيب ظني، قالى ركز ف الكلية وملكش دعوة بالمواقع السياسية! قالي ملكش دعوة لا بالبرادعي ولا غيره، انت مش هتغير البلد دي، بلدنا دي اصغر كلب فيها لابس ميري هيدوس عليك ومش انت اللى هتغير، بلدنا دي ما بتتغيرش، بغض النظر عن ما اهتمتش للكلام او لتنفيذه، واعتقد هو عارف كدا بس بيخلص ضميره، بس الشعب اتحول، اللى قاله والدي دا بيقوله كل الاهالي، ملكش دعوة بالسياسة، مش انت اللى هتغير البلد ..... ايه حصل !! وليه بيقولوا كدا !! احنا ليه بقينا كدا، خايفين من ضلنا قبل ما نخاف من غيرنا، في نفس المرة بابا بيقولي النت متراقب والتليفونات متراقبه وكل حاجة متراقبه، خليك بعيد عن اي حاجة، بقينا بنراقب نفسنا علشان خايفين نكون متراقبين !! ليه، قد كدا النظام نجح في بث ثقافة الخوف !! اه الحقيقة، نجح وباتقدار، بس لفتره محددة، لسنين فاتوا كتير، بس مقدرش علي جزء كبير حاليا، اتمني الجزء دا يقدر يغير الباقيين، زي ما قدرت اخلي امي واختي يوقعوا علي بيان التغيير كدا، الحل الوحيد اننا نشر ثقافة مضادة لثقافة الخوف علشان نقدر نتحرر.
بس هل في عز ما النظام داير ينشر الثقافة دي بين الشعب نجا منها ؟؟ ولا طباخ السم كالعادة داقه ؟؟ النظام ولحسن الحظ داق السم وادمنه، بقي نظام بيخاف من خياله، شوية عيال مش مكملين مية وخميسن واحد رعبوا نظام امني كامل ونظام حكم بأكمله !! المشكلة انهم ما عملوش حاجة ولا معاهم حاجة تخوف، بس معاهم عقول، ودا النظام ما يحبوش، محتاجين بشر من غير عقول، مليانين بالخوف وبس، النظام بقي بيخاف مش حتي من اللى ما بيخافوش، لا من الكل، اللى بيخاف واللي مش بيخاف، في يوم زيارة السيد جمال مبارك لمدينة ابو كبير اللى جنب الزقازيق، الزقازيق اتقفلت والناس اللى بتسافر بين الاتنين ما عرفوش يسافروا وزمايلي باتوا ف الزقازيق يومها، ليه!! النظام خايف م الهوا، الطريق علي الجانبين متقفل وممنوع حد يتواجد في الزراعات اللى علي جنب الطريق، وقناصة علي طول الطريق، ونفس الحكاية لو وزير معدي بيتقفل الطريق، عائشة عبد الهادي خرجت من باب خلفي لمجلس الشعب! النظام اصبح بيصطلي بالنار اللى غذي الشعب بيها، الخوف !!
نظام خائف وشعب خائف
!! ومصر 
مصر على حافة الموت

البحر بيضحك ليه

البحر بيضحك ليه
كلمات نجيب سرور
ألحان وغناء الشيخ امام عيسي

ثلاثية القمر

.في تمام اكتمال نور روح الحبيب مــــــــا يُجبرُكَ علي التلاشي *
.وفي تمام اكتمال روحك بالحبيب مــــــــا يُجبرُكَ علي التسامي *
.وفي تمام اكتمال بكى القلب علي الحبيب ما يُجبرُكَ علي التناسي *