هابي إيجيبتاين داي

يوم لمصر وبس


فى يوم ولا فى الاحلام

يوم بجد خرجنى من حالة الملل الفظيعة اللى كنت عايشها
المكان نقابة الصحفيين - مسرح الدور الأول
الحدث : حفل عشرينات الفني
او زى ما اطقوا عليه ايجيبتين داي على وزن فلانتين يعني بس المرة دي كان فى حب مصر وبما انى واحد من الناس اللى مش حبيبه يعني ملناش فى الفلانتين والكلام الفاضي دا فروحت حفل عشرينات اللى تقريبا مكنتش اعرف عنه حاجة غير طراطيش كلام قالتهولي نيرة الشريف والنت كان عندي بيفصل اصلا وكنت هاتشل منه بس بجد شاااااااااااااااااااكر ليها جدا انها دعتني لليوم دا لأنه كان يوم أكتر من رائع وكمان بشكر كل تيم عشرينات وكان حفل رائع وبصراحة معرفتش افضل فقرة فيه عن التانية .
الحفل كان بدأ بالشاعر على اسماعيل اللى بجد كان فوق الوصف فعلا ودا الوحيد اللى دونا عن بقية الفقرات حسيت انه بيغني لمصر من قلبه مش بيغني بس لأجل الغنا كان بيغني وبيعزف عود باحساس رائع خلاني انتشي ( حلوة انتشي دي مش كدا بردو ) وافتكر تلك المدعوة مصر .
تاني فقرة كانت محمد العزبي والله قلبها هيصة وكان رائع جدا رغم انه كبير جدا بس على مين دا عمل فقرة ولا شاب فى العشرين .
بعديهم بقي دخلت فرقت حبايبنا وهما شوية شباب زى الفل كانوا قشطة قشطة يعني بجد شباب صوتهم كان رائع جدا وكان معاهم عازف عود دمه زى العسل وكان الختام بسمير الاسكندراني وغنى غنا رااااااااااااااائع وبين كل غنوة والتانية يقول كلمتين فى الصميم قشطات يا ابو سمرة والله بس مشي علشان كان عنده فرح بتاع مصطفي سعودي ( معرفش انا مين مصطفي سعودي بس هو كلمه وهو بيغني علشان يأكد عليه يحضر ) واخر حاجة الشاب اللذيذ اللى كان بيقدم والبنت اللى زى العسل اللى كانت بردو بتقدم معاه وكانوا من اجمل الحاجات فى الحفلة قالوا اسماء تيم عشرينات كلهم وكانوا عايزنا نصفق ( هو اصلا غلط فيها معرفش يقولها فصحي ولا عامي ) نص ساعة متواصلة ( إيدي وجعتني يومها ) بس فى بقي شوية حاجات كدا بس هنعديها علشان روعة اليوم بجد يعني مثلا الحفل المفروض يبدأ ستة بدأ سبعة والمفروض يخلص تسه خلص عشرة ونص والناس اصلا بدأت تيجي الساعة ستة وكان التوقيتات مش مظبوطة يعني اللى دخل متأخر واللى قعدوا يقولوله يقفل الفقرة علشان التايم بتاعه خلص وكدا يعني بس عدت وما بوظتش الليلة بس المفروض بقي المرة الجاية يكونوا ادق من كدا لانى بجد بتعصب من أم حكاية المواعيد اللى مش مظبوطة دي بتجيبلي الضغط اصلا
اخر حاجة شكرا كتييييييييييييييييييييييييير جدااااااااااااا لنيرة على الدعوة الراااااااااائعة دي
وشكرا كمان لكل فريق عشرينات اللى عملوا يوم ولا اروع
وإن شاء الله كل سنة زى اليوم دا هبقي فى الإيجيبتاين داي سواء كنت بحب او لا ولا كنت بحب نبقي نروح الايجيبتاين داي كابل
:P

تحياتى
تشي

18 comments:

أسامه يوسف said...

أول كومنت
هييييييييييييييييه
-------------
يلا يا عم تشى
مبروك عليك الفرحه
وأنا مرمى هنا بعيد عن كل حاجه
أنا مش باقر يا عم
أنا باصصلك فيها بس

بس على فكره أنا لو كنت مكانك وكانت الفرصه دى قدامى
كنت هاكسل فى البرد اللى احنا فيه ده

بس كويس انك طلعت من حالة الملل اللى انت فيها
ابوس ايدك بأه شيل البوست بتاع ملل اصل انا كل ما اشوفو يجيلى اكتئاب

تحياتى يا معلم

الأستاذ said...

!ياريتني كنت معاهم

يا خسارة كان نفسي أروح لكن فعلاً مكنتش عارف أصلاً لأن النت كان عندي بايظ
ربنا يوفقك ويارب ألحق المرة الجاية
تحياتي

yomna said...

happy valentine & happy egyptian day
شفت اهو مش حارماك من حاجة...منور يا عم ووحشتني بوستاتك...لولا بس حركة التنقلات اللي بتعملها كل شوية دي كنت زماني ناطتلك في البلوج كل يوم
اول ما تثبت على واحد ابقى قوللي

Nsreen Bsunee said...

الحمدلله انك خرجت من حاله الملل ديه اهم حاجه
وانا لو في مصر السنه الجايه حاحضر برضه الايجيبتين داى
هو فيه غير ايجبت اللى فى القلب بلا فلانطين بلا وجع دماغ
:)
ازيك

s@gi l'ombre said...

السلام عليكم
يا تشى فرح وخرج م الملل اخيرا
يابنى انا كنت حاسس انك ماضى عقد احتكار مع البؤس والشقاء والملل والخنقه من كل حاجه
بس هى دى الضريبه يا واد
انك تبقى غريب وتعيش زمن انت فيه طفره وموصوم بالجنون
ع العموم هابى اجيبشيان داى
وسيبك انت بام فرحت يبقى اكيد هيتعمم ف الشعب المصرى
وانت قلت اسماء كبيره قوى
يا بختك يا عمنا
ابقى لاغينا فى الحفلات دى
عرفنا بيها
عايزيزن نطلع م المود الزفت ده يا واد
تحياتى ليك كتير
عارف ان انت ف الزقازيق دوقتى
بس عودا حميدا يا صاحبى
سلامى ليك

Ma7moud So3ody said...

اولا ازيك..وواحشني
ثانيا..الحمد لله انك فكيت..لأني كنت يأست منك
يا رب دايماً تكون كل ايامنا لذيذه و روشه
واحلاى سلام ليك
محمود سعودي...مش مصطفى سعودي

بحبك

A7MeD F@hMy said...

يا ريت كنت قدرت اجي معاك شكله كان يوم جامد فعلا و صحيح اثبت علي بلوج بقي دوشتنا معاك
هههههههههههه
سلام

Anonymous said...

السلام عليكم
أنا شيرين مجدي من فريق عشرينات
أولا طبعا شكرا على مشاركتك ووجودك وتفاعلك معانا
وثانيا شكرا قويييييييي على البوست الرائع.. ويا رب يقدرنا المرة الجاية نعمل حفلة بلا ثغرات.. بس ايدك معانا بقى في التنظيم..
سلام و Happy Egyptine day
:)

elkamhawi said...

كنت عايز اكون موجود بس يلة تتعوض ان شاء الله
هابى فلانتين للجميع

mesh2dra said...

كويس انك روحت
وكويس انها حلوة
حتخلينى اخد بالي بعد كده من الحاجات دي
اصل كليتنا المبجلة كانت حاطة الاعلان بتاع الحفل في مدخل كليتنا
وانا كبرت بصراحة
لا خلاص كليتنا طلع ذوقها عالي:D

سؤال بس
عشان كده ماضي عندي بتشي اللي مش حزين
لو هو ده السبب اغرقك حفلات من النوعية دي
بس كده:)

YOTTA said...

ماشى ياعم
الناس اللى بتروح حفلات من ورايا دى
بعد كده تبقى تقول
..
.
المهم انك انبسطت
:D

Che The Hermit said...

اسامة باشا
يا عم حسستني انه اول كومنت فى ديوان رئاسة الجمهورية
بص يا مان المرة الجاية لازم تبقي معايا دي اول حاجة
تاني حاجة لما تكون بقالك شهر تقريبا قاعد ع النت بلا حراك لإلا يوم مثلا لمعرض الكتاب وجاتلك فرصة زى دي ما ينفعش تقول لا ابداااااااااااااا

**********
الاستاذ عندنا يا مرحبا يا مرحبا
المرة الجاية اكيد هتبقي هناك
اقولك على فكرة حلوة انت تجيب نمرتك علشان لو النت عندك فاصل ابعت اقولك على طول
بس اهم حاجة تبقي تدفع تمن الرسالة :P
لا خلاص بهزر مش مهم تمن الرسالة بس اكيد تبقي موجود المرة الجاية

**********
يمني
المعلم بنفسه هنا
بس م الاخر بقي يعني انتى بقالك كدا مدة غايبة تماما تماما ومش بتبصي حتى و م الاخر يعني انا بقالى شهرين وشوية بايت هنا قصدي قاعد هناساعات بس بروح البلوج بتاع انا مخنوق بس انت اللى مش بتاخد بالك يا معلم
متبقاش تغيب بقي

تشي

Che The Hermit said...

نسرين
اه الحمد لله علشان كان هيحصل مالا يحمد عقباه
إن شاء الله تبقي فى مصر وتحضري اليوم الجامد دا
اه صحيح هو غير القلب ايجيبت فى
( رتب الجمله السابقة )
:)
انا الحمد لله كويس :P

**********
ساجي
قشطات يا مان ازيك وايه اخبارك
اه شوفت سجل يا تاريخ اشهد يا زمان
لا ما انا لقيت فى العقد ثغرة بس مش هروب نهائي دا فترة كدا والعقد هيتجدد امال انت فاكر ايه
وبعدين ايه الكلام الكبير دا لحسن اخد فى نفسي مقلب يا عم
خلاص بعد كدا انا هبقي اديك ريبورت عن اى حفل او ندوة او اى اى حاجة هروحها سيادتك ويا ريت نتشرف بوجودك :D
انا رجعت م الزقازيق على فكرة

**********
سعودي
انا كويس وتمام وعال
وانت واحشني اكتر وانا قلتلك تعالي عملت فيها عم المهم ماشي ماشي
وكويس انى فكيت اه وادعي والنبي تاني ان كل ايامنا تبقي لذيذة وروشة بس روشة بدماغ مش روشة بتهييس
وعلى فكرة مصطفي دا بجد اوعى يكون اخوك والفرح كان فرحك

انا كمان بحبك

تشي

Che The Hermit said...

فهمي حبيب القلب
ايه يا ريتني دي
احسن علشان انا قلتلك تيجي وانت اللى رفضت تستاهل تستاااااااااااااااهل
وايه دوشتنا دي كمان انت اصلا ما تتكلمش خالص مش كفاية مش بتسمع الكلام ومغرمني مكالمات موبايل ع الفاضي

**********
شيرين مجدي
يا مراحب كتير قوي
بس هو مين اللى المفروض يشكر مين دا انتوا تستاهلوا كل الشكر
البوست دا ولا حاجة خالص وإن شاء الله المرة الجاية تكون كاملة او حتى تقترب من الكمال للغاية
وإذا كان على إيدي ممدودة من دلوقتى ولو عايزين اى مساعدة انا موجود
وهابي إيجيبتاين داى

**********
علاء باشا
اشطة يا مان راجع رأسا من غانا على البلوج تعلق ايه النور دا كله
المرة الجاية اكيد هتبقي موجود قول بس يا رب
هابي فلانتين ( شكل بتحب يا عم الله يسهله اللهم لا قر اللهم لا حسد ) وكمان هابي ايجيبتاين داى

تشي

Che The Hermit said...

مش قادرة
الحاجات دي لازم الواحد ياخد باله منها علشان مش بتتكرر كل يوم

هو علشان كدا بالظبط كنت ماضي بتشي اللى مش حزين بس ما تخدوش على كدا :D

لو فى حفلات انا مستني

**********
يوتا
اصلا انا عرفت قبلها بيوم الساعة كدا حوالي 11 بالليل بعد كدا هبقي اعرف بدري وابلغ الناس كلهم هو فعلا الحفلة كان ناقصها يبقي حد معايا منهم لله بقي اللى قولتلهم يجوا معايا وما عبرونيش

ياللا ويا رب كل الدنيا تبقي مبسوطة دايما يا رب

تشي

LAMIA MAHMOUD said...

جديدة الفكرة ولذيذة مع اني مش من متابعي عشرينات
بس كويس انك قضيت يوم لذيذ
هابي ايجيبتاين داي

marmar said...

يا حلاوتك يا تشى وانت فى الفلانتين

طيب ما انت بتعرف تفرح اهوه

يا بنى الدنيا مش تستاهل اللى انت عمله كل ده
خد من الدنيا اللى هيبصتك وارمى الحاجات اللى هضيقك ورا ظهرك

وان شاء الله تروح السنه الجايه فى الفلانتين وتكون كابل يا عم بس انا هبقى اجى ارخم عليكم بقى

عالعموم
happy valantine 2 all
مع انها متاخرة بس معلش

Che The Hermit said...

لميا
ابقي تابعيهم هتلاقيهم كويسين

**********

مرمر

للأسف بعرف افرح بس وعد وعد وعد وعد
مش هتتكرر تاني
وعموما الدنيا غريبة تثبيته وحوار على رأى ام تي ام

السنة الجاية !!!!!
يمكن القيامة تقوم
او يمكن انا اموت ايهما اقرب يعني
ابقي روحي رخمي بقي على حد تاني

ولا متأخره ولا حاجة عادي دا بقاله اسبوع بس ولا يهمك :P

تشي