بحرك عجايب


من سيدي بشر لأبو العباس

مواطن

بعد إنهاء الرئيس الأمريكي هاري ترومان لفترة ولايته لرئاسة الولايات المتحدة وعودته لولاية ميسوري، سأله واحد من الصحفيين " إذا كان ما بيفتقدش أي شيء بعد تركه لأعلي منصب في البلاد؟" ، رد ترومان: " انا ما تركتش أعلي منصب في البلاد، أنا اتوليت منصب أعلي ، منصبي كمواطن "


مجرد تذكرة

لستم خير أمة أخرجت للناس

يتشدق المسلمون في كل مكان من حوالي حين يصيبهم أي اتهام ( أحنا خير أمة أخرجت للناس، انت ناسي ولا أيه ) وكأن خير أمة أخرجت للناس معصومة من الخطأ ولو أخطأت فالخطأ يتحول إلي محمده يستحقون الشكر عليها، الغريب أن خير أمة تستخدم الآية الشريفة منقوصة ككل شيء في حياتنا، فخير أمة يأتي تعريفها فيما بعد في الآية نفسها بأنها تأمر بالمعروف وتنهي عن المنكر.
والأمر بالمعروف يستوجب القيام به قبل الأمر وكذلك النهي عن المنكر، الغريب أنني لا أري ما يتفق مع أمر بمعروف، بل مع فعل بمعروف في حياتي الصغيرة ومن حولي، بنفس منطق الآية نستحق لقب أزبل أمة أخرجت للناس وبجدارة، كمية القمامة هنا وهناك أكثر من أن تحتمل، والحكومة بالتأكيد لم ترمي تلك القمامة، أيضا أنا نفسي حينما أحمل أي مهملات في جيبي لألقيها بإحدي سلال المهملات يتهمني بعض اصدقائي بالجنون ( ما ترميها ف الارض من نضافتها أوي ) أصبحنا نأمر بالمنكر حقيقة.
الأمر لا يقف فقط عندي، أذهب لأي مصلحة حكومية، لن تنهي أي طلب لك إلا برشوة، إن لم تدفع ستجد المواطن الواقف بجانبك يخبرك ( شخلل جيبك واديله خمسة جنية ف وسط الورق ) مرة أخري نأمر بمنكر، وكثير غير ذلك.
الأمر ألعن وأضل، نحن نربي أبناءنا علي ذلك، حين يأتي أخي الصغير قائلا( كل زمايلي بيغشوا في الامتحان) فيكون رد والدتي( غش زيهم يعني هما يجيبوا درجات عالية وانت لأ ) ليست وحدها جميع الأمهات الذين أعرفهم علي نفس الشاكلة، نربي أبناءنا علي المنكر .
الحقيقة لا أجد ما يجعلنا نحصل علي لقب خير أمة، وحري بنا أن نبحث عن لقب غيره، ربما أزبل أمة، أغبي أمة، أكثر الأمم تخلفا.
يذكرني تمسكنا بخير أمة بتمسك اليهود دوما بأنهم شعب الله المختار، يقتلون الأنبياء ويتخلون عنهم، لكنهم شعب الله المختار، نحن نفعل ما نفعل، ونظل خير أمة.
أسف لا أرانا خير ولا أرانا أمة من الأساس

 
صور ساخرة توضح ما هو أمر بالمنكر
أحمد إبراهيم
09/01/2010

تطرف



من زمان جدا وانا نفسي اتكلم عن الموضوع دا، مشكلتي الاكبر في الحياة إني مش بعرف ارتب افكاري بسرعة، سامحوني لو الكلام مش مرتب، هحاول اقول اللى عندي، وهقوله بالفصحي علشان بحبها .
اكثر ما يضايقني ف وطننا المريض هذا هو تطرفنا جميعا إلا قلة قليلة، الغريب أننا جميعا نتطرف كلٌ في اتجاهه، ومن لا يتطرف مع الجميع ويحاول ان يتكلم يخفت صوته تماما ولا يكاد يُسمع، علي عكس اصوات المتطرفين الآخرين صوتهم يملأ الوطن صريرا ونباحا، التطرف دوما هو الصوت الأعلي، لكن الغريب هو اختفاء الصوت المعتدل، بنظرة بسيطة أجد طرفي التطرف الأكثر ظهورا، هم الإسلاميون والعلمانيون، كلاهما دون استثناء، فمثلا حين حرب غزة الاخيرة منذ عام مضي، خرج علينا احد مشايخ الوهابية ليعلن ان خير وسيلة لرد العدوان واستعادة الاقصي هو العودة للمساجد والاعتكاف بها والدعاء علي إسرائيل، ردي حينها كان كلمة اعتراضية مكونة من ثلاثة أحرف، لكن التالي كان اغرب، خرج احد متطرفي العلمانية ليعلن أن إسرائيل دولة صديقة بيننا معاهدة سلام ويمدح في إسرائيل، لا أعرف ما هذه الغرابة والتطرف، اعتي اصدقاء اسرائيل في اوروبا لم يعلنوا مثل هذا التصريح في وقت مثل هذا، بغض النظر عن اختلافي مع التصريح او اتفاقي لكنه تصريح غبي في وقت اغبي، وكل علي ليلاه يغني.
هذا مثال للتطرف والامثلة كثر، ل مرة اخري التطرف ليس فقط في المواقف السياسية او الدينية، علي المستوي الفردي، أغلب الشعب المصري -العاطفي بطبعه ( لا أعرف من هو صاحب تلك المقولة الملعونة عن الشعب العاطفي ) - ينفعل جدا ويتطرف جدا في ردود أفعاله، أذكر أحد اصدقاء الـ "فيس بوك" الذي لا يتوقف عن سب الحكومة والرئيس ليل نهار عند حرب غزة أيضا علق علي صورة للرئيس مبارك قائلا "أحترم بشدة قرارته في السياسة الخارجية، هو ناجح في ادارة سياسة البلاد الخارجية أما داخل البلاد فهو فاشل تماما" ، كان ذلك لعداءه لحماس والاخوان المسلمين، لا أعرف الحقيقة سببا لهذا التصريح ولا حتي أعرف مبررا، فمنذ عقود بعيدة نحن الآن أفشل ما نكون عن "سياسة خارجية ناجحة"، أنا شخصيا اتطرف بقوة في مواجهة المتأسلمين الوهابيين من زملائي ف الجامعة، وأصب عليهم جم غضبي، ليس مبررا لي تطرفي انه مقابل تطرفهم، ف النهاية هو تطرف، احاول الإقلاع عنه بالتدريج، لكنني كمثال لمجتمعنا ككل، حين أتطرف أصبح مسموع الصوت وينصت الجميع، وحين أهدأ يسمع الناس للمتطرفون هنا وهناك، فأضطر آسفا أن اتطرف لقناعاتي فقط لأُسمع الآخريين لا لأقنعهم.
أعتقد شخصيا أن التطرف واحد من أهم اسباب ما نحن فيه، واتمني أن أستمع قريبا لصوت التعقل يخرج جليا ليهزم صوت التطرف، ونفيق من هذه الغفلة.


أحمد إبراهيم
06/01/2010

خلي عندك صوت


من كام يوم كدا سألني واحد من اعز اصدقائي عن شوية حاجات
يعني ايه برامج انتخابية ومين المرشحين

هقول اللى عارفه ومستني لو في حاجة غلط حد يصححلي

في الأول أهم حاجة اننا كشباب لازم ولابد نطلع بطاقات انتخابية ودا علشان يكون لينا حق التصويت في الانتخابات النيابية لمجلس الشعب الجاية في منتصف السنة دي 2010 والانتخابات الرئاسية في 2011
ليه بطاقة انتخابيه ؟
علشان نقدر يكون لينا صوت مؤثر، نقلل فرص التزوير اللى ممكن تحصل في اي انتخابات، نتحكم في مصيرنا وتكون لينا كلمة مؤثر في مستقبلنا.
لأن اللى جاي مستقبلنا احنا وبس.
ويمكن 2011 هتحدد حاجات كتير بعدها وهترسم مستقبلنا كشباب عشريني في اكتر من حاجة، ولو ما استغلناش الفرصة دي وبقي لينا صوت هنتسني ع الاقل كمان 8 سنين علشان نقدر نعمل حاجة جديدة، ويا عالم وقتها هتكون أيه الظروف ولا هنكون احنا علي قيد الحياة ولا اتوكلنا.

هعمل بطاقة ازاي
لما روحت طلبوا مني صورة من شهادة الميلاد وصورة من البطاقة وبس
ولو اسمك مقيد بالكشوف مش هتحتاج دا بس تاخدهم احتياطي

لما اطلع البطاقة هعمل بيها ايه ؟
بالبطاقة الانتخابية هقدر احدد مين يكون المتحدث بأسمي في مجلس الشعب، واقدر احدد مين هيحقق لي طموحاتي انتخبه ومين لا
هقدر احدد مصير البلد في انتخابات الرئاسة واقدر احدد مين احسن بالنسبة ليا واشارك اني اساعده يوصل للمكان المناسب علشان يحقق لي احلامي ويحقق اللى بحلم بيه للبلد ... مصر

من الاسئلة اللى اتسألتها يعني ايه برنامج انتخابي ؟
كل مرشح بيرشح نفسه لأي منصب سواء رئاسة الجمهورية او مجلس شعب او شوري او حتى نقابات و أي ترشيح بيقدم وعود للناس علشان نتتخبه، حاجات من نوعية هوصل كهرباء للمكان الفلاني ، وهعمل مستشفي وهكذا
دي المفروض انها بتتجمع في برنامج واحد بنقول عليه برنامج انتخابي وبيكون الشخص اللى اطلقه او وعد بيه ملزم انه يحققه في فتره ولايته، والناس اللى انتخبته بتحاسبه عليه هل حققه ولا ما حققوش
وبناء علي انجازه ف البرنامج بيقرروا إذا كانوا عايزينه يبقى مرشحهم لمرة تانية ولا لأ

من الاسئلة اللى اتوجهت بردو ايه المطالب الى بيطالب بيها المرشحين الحاليين للرئاسة؟
لان الدستور المصري حاليا بيعرقل وتقريبا بيخلي من المستحيل ترشيح اي شخص مستقل خارج الاحزاب الموجودة من اكتر من خمس ( او ست ) سنين،  ولأن الاحزاب دي اصبحت مهلهلة (أغلبها) وغير قادره انها تفرز اشخاص قادرين انهم يدخلوا معارك انتخابيه كبيرة زي انتخابات الرئاسة كانت طلبات بعد المرشحين المستقلين بانهم يقدروا يدخلوا الانتخابات ويتاح لأي حد بكونه بس مواطن مصري انه يدخل الانتخابات

من الاسئلة مين اللى هيرشحوا نفسهم؟
لحد دلوقتي مفيش ولا مرشح رشح نفسه لانتخابات الرئاسة وإن كان بعض الناس بينادوا بأشخاص معينين، الابرز محليا هو جمال بيه مبارك واللى لو اترشح هيكون مرشح الحزب الوطني، المستقلين بيتقدمهم دكتور محمد البرادعي اللى بدأ مجموعة من النشطاء السياسين المستقلين في حملة لمطالبته ودعمه للترشيح في 2011، دول الابرز حاليا وإن كان في اسماء تانية مطروحه زي حمدين صباحي وعمرو موسي وعصام العريان وغيرهم

امتي نعرف وامتي يعلن ان الناس دي اتقدمت؟
لسه كتير علي دا لانه هيحصل في بداية 2011 فتح باب التقديم للرئاسة وهيقدم كل الاشخاص والاشخاص الاخيرة اللى هتفضل بعد قفل باب التقديم وقبولهم من اللجنة المسئوله عن الانتخابات هيكونوا دول المرشحين رسميا

ايه المفروض نعمله بقي دلوقتي ؟؟

هتكلم عن رؤيتي الخاصة
الاول زي ما قولت فوق نطلع بطاقات انتخابية ونشارك ف الانتخابات النيابية الجاية في سنة 2010
ندعم محاولات المرشحين المستقلين في اتاحه الفرصة ليهم بدخول الانتخابات والمنافسة النزيهة( بغض النظر عن اسم المتسقل )
نطالب بإشراف قضائي علي الانتخابات البرلمانية 2010 والرئاسية 2011
نشارك بالطريقة اللى شايفنها مناسبة اكتر لينا علشان نخلي مصر أحسن

---------------------
النوت جزء من حملة خلي عندك صوت
http://www.facebook.com/group.php?gid=213501021940&ref=nf