تاااااااااااااااااااج الصبااااااااااااااااغ

خالو احمد الصباغ أبي إلا أن يحدفني بتاج فى دماغي بس الحمد لله جت سليمة
الأسئلة بالاحمر وأكيد الإجابة بالأزرق

1- هل توافق على حزف خانة الديانة من البطاقة الشخصية ؟
هى مسئلة شائكة فعلا انا فى حياتي ما بتعاملش على اساس ديانة الواحد وبالنسبة ليا عادي لو اتشالت من البطاقة بس المشكلة لو بتستخدم فى بعض المصالح ولازم يعرفوا الديانة يبقي ما ينفعش تتشال

2- ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
رأي الشخصي مش بحبهم وشايف سلوكهم دا مشكلة نفسية ولكن دي حريتهم الشخصية اللى عايز يعمل حاجة يعملها احنا مش بنحجر على حرية حد بس بشرط ما يأذينيش باللى هو بيعمله دا بالنسبة للاعتراف بيهم لا طبعا لأنهم اصلا مش كيان ومفيش حاجة اسمها الاعتراف بيهم دا مجرد شخص بيحقق رغبة شخصية ليه ومجرد انها شخصية دا بينفي عنها صفة انها كيان يجب الاعتراف بيهوعلشان ما بحبهمش مليش منهم اصدقاء

3- هل تعتقد بوجود إضطهاد للمسيحين فى مصر ؟

لا طبعا عايشين فل الفل أو على الاقل دا اللى انا شايفه حواليا فى المجتمع اللى انا عايش فيه

4- من هو الشخص الذى تختارة لرئاسة مصر ؟
بص إذا اتكلمنا عن الاسماء المطروحة فأنا مش شايف أى حد ممكن يمسك مصر كل واحد بلاقي فيه حته ناقصه ولحد دلوقتى مش عارف مين ممكن ممحطوط فى المكان دا

5- أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟
ولو ان حكاية الحكم والكلام دا كله مش ف دماغي بس لو حصل دا فى الاحلام يعني يبقي بالصلاة على النبي كدا هشوف دكتور اسامة الغزالى حرب ، فاروق الباز اللى هجيبه من ناسا رأسا علشان يساعدنا وأحمد زويل برضه لازم يبقي معانا وكمان المستشار زكريا عبد العزيز واكيد اكيد يعني خالو احمد برضو ومصطفي فتحي ومحمد حمدي واحمد شقير وحد تاني مش لازم اسمه بس هو عارف نفسه ( هو ولا هي ...؟؟ مش مهم ) ولو حصل بقي ونجحت اروح مدي الباز 25 مليون يورو واقوله يشوف حكاية الممر الموازى لنهر النيل اما زويل فاديله كل الامكانيات المتاحة علشان يظبط كل جامعات مصر واديله وزارة التعليم العالي والمستشار زكريا يمسك دار العدل اللى هتكون مستقلة بنفسها ودكتور اسامه هيكون مستشاري الشخصي اكيد وخالو احمد علشان نمسكه نقابة البلوجنج وتبقي بالبطاقة بقي وليهم نادي وتأمين وهيصة اى خدمة يا ردالة (ويا بنات برضو ) نحن فى خدمة الشعب وبالنسبة للأقباط والأخوان والمرأة كمان يشاركوا فى الحكم ما يشاركوش ليه يعني دا بلد ديمكراتيك يا خبيبي

6- فى رأيك الشخصى .. ما هى أفضل مدونة على بلوجر قمت بزيارتها ؟
ليه بس الإحراج بس بص كل اللى ع السايد بار عندي مدونات زى الفل وفى ناس شايفها فوق انها تتحط عندي وبزروهم من بعيد لبعيد زى خالو احمد والاستاذ شقير وغيرهم كتير

7- أيهما تفضل كزوجة .. إمراءه عاملة ، أم ربة منزل ؟
أكيد عامله

8- اذا تزوجت وأنجبت ولدين وبنتين .. أى الأسماء تحب أن تسمى ؟
يوسف ، يحي ، مريم ، .....؟؟؟؟؟؟؟

9- هل تعتقد أن توريث الحكم فى مصر . . سيتم فعلا أم لا ؟
انت رأيك أيه بص هو هيتم بس السؤال هينح ولا لأ بص هو حسب التوقيت اللى هيتم فيه نقدر نعرف هينج ولا لأ

10- فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟
مفيش حاجة اصلا اسمها حكومة مبارك ، مبارك هو الرئيس اللى بيعين الحكومات لكن فى حكومة نظيف وحكومة عبيد وحكومة صدقي وكدا يعني لكن ما وردش عليا حكومة مبارك دي :D

وادينا خلصنا من التاج والحمد لله افوتكوا بعافيه علشان اخد اسبوع نقاهه من التاج الخفيف خالص دا

تشي

غزة

دي صور كنت عملتها علشان حصار غزة
حبيت اشاركوا بيها
يا ريت تقولولي رأيكوا
بتقبل النقد بصدر رحب كتييييير






والصورة دي بخط ايدي عاديه يعني


تشي

The Lake House *** تحديث

أجمل فيلم شوفته فى حياتى جمعاء
The Lake House
فيلم فوق الوصف فعلا
فيلم تقعد بس قدامه وحواسك كلها معاه
الفيلم مش هعرف اتكلم عنه لأنه يتحس بس
شكرا كتييييييييييييييير قوي للميا اللى مش مستنيه حد علشان محدش جاى لأن الفيلم كان عندها فى السايد بار وأنا حبيت اشوفه علشان فيه ممثلتي المفضلة ساندرا بولاك لكن الفيلم طلع وهم وبجد اول مرة فيلم يأثر فيا بالطريقة دي دا حتى تيتانيك وبريف هارت معملوهاش
الفيلم غير فيا حاجات كتير قوي
فى كام حاجة كنت هكتبهم هنا بس خلاص هكتبهم فى حته تانية بقي
دا لينك مش مضمون للفيلم
اما دا فإن شاء الله مضمون
الفيلم يستحق ان الواحد يتنازل ويضيع من وقته ساعتين إلا ربع ويتفرج عليه
صحيح خلي بالكوا من الساوند تراكس اللى في الفيلم بجد روعة

********************
تحديث

دي اللينكات بتاعه الفيلم كلها
روابط مباشرة
لو عندك برنامج داونلود كليك يمين على الرابط واختار
copy shourtcut
وبعدين حطه فى برنامج الداونلود
الأول
التاني

دي لينكات هتفتح صفحة وبعدين تختاروا منها تحميل
http://ibox.org.ua/99899/
ودا رابيد شير
http://rapidshare.com/files/84728902/FoNeKaT.NeT-SoFi_N_Mi5_-The_Lake_House.part1.rar
http://rapidshare.com/files/84754176/FoNeKaT.NeT-SoFi_N_Mi5_-The_Lake_House.part2.rar
http://rapidshare.com/files/84771176/FoNeKaT.NeT-SoFi_N_Mi5_-The_Lake_House.part3.rar



تحياتى كتير ويا رب يعجبكوا الفيلم

تشي

يــــــــــــــــــــــــــــا ربي


يــــــــــــــــــــــا رب
إن ضاقت قلوب الناس

عما فيا

.........
فعفوك لا يضيق



-----------
الصورة من تصميمي

إقرار

إقرار
أقر انا الموقع ادناه بأنى قمت بتغير اسم اليوسر بتاعى من
Che The Mad
إلى
Che The Hermit
وأنا فى كامل قواى العقلية والجسدية


وهذا إقرار منى بذلك
التوقيع
تشي

مش قادر اكتب

كنت عايز اكتب بوست بس مش قادر خالص صوابعي عبارة عن قطعة تلج حتى الميلز بتاعتي عامل فيها كلها اوف لاين علشان مش قادر اقعد اكتب فى كلام حتى الفيفا مش قادر العبها بعد ما اتغلبت النهاردة من كيكو ومحمد ابن عمتى وكان شكلي وحش بس عادي فزت اخر ماتشين واليوم مكانش يومي الصراحة
تك تك تك تك تك تك تك تك تك تك
دا حالي دلوقتى سلام بقي علشان مش قادر اعمل حاجة تاني غير انى اشوف فيلم مثلا لأن درجة الحرارة هنا 7 درجات مئوية ويوم الجمعة يعني بعد بكرة هتبقي صفر ربنا يستر علينا

تشي

Freeeeeeeeeeeeeeeeeeeeeeeeee

ازيكو كلكوا انا خلصت امتحانات اخيرا
أخيييييييييييييييييييييييييييييييييييييييير أنا حر حر حر
Freeeeeeeeeeeeeeeeeeeeeeeeee
خلصت من امبارح بس سفر سبع ساعات وكمان خمس ساعات فيفا ما قدرتش انزل اى بوستات وقلت اآجله النهاردة بقي
امبارح كان يوم يعني نص جامد مكنش يوم خارق .... قضينا يوم فى الكلية امتحانا امتحان تافهه ولا ليه اى لزمة ووالله ما كنت قاعد لولا الموبايل ويتحرق الامتحان بقي بس ياللا اهى عدت على خير ورجعت بيتنا والحالة اشطات خالص اهي والواحد قاعد بينت اربعة وعشرين ساعة تتخلها فواصل للعب الفيفا ومعرض الكتاب كمان كام يوم وبيس ع الاخر
-------------------
شوفت يوم السبت (أول امبارح يعني ) فيلم حين ميسرة الفيلم هو الهم اللى يبكي والهم اللى يحزن يعني كله بسوداوية مش رؤية المخرج اللى سوداوية لا دا الحقيقة نفسها الفيلم حالة خاصة جدا من نظري وخالد يوسف دخل جوا مجتمع العشوائيات ببراعة يحسد عليها .. كان في انتقادات اتقالت عن الفيلم وطبعا انا داخل ومركز معاها اغلبها كانت صح وكان ممكن خالد يوسف يتلاشاها لو انه عمل الزمن 2009 مثلا وكان هيتفادي حاجات كتير ومحدش كان هياخد الانتقادات دي عليه فى حاجات تاني عن القنابل فى الفيلم وانها اخدت وقت طويل على ما تنفجر عن وقتها الحقيقي ودا فعلا صحيح وكانت برضه حاجة رخمة وكانوا ممكن يتلافوها
اخر مشهد فى الفيلم كان غريب قوي اتنين تقريبا بيدورا على بعض واطفال شوارع والعلاقات بينهم مش عايز احرق الحته دي علشان مهمة بس ابدع فعلا خالد يوسف والواد الممثل دا عمرو سعد الواد كان فعلا جامد ومشروع نجم قادم اتمني انه يكون احسن من اكتشافات قبل كدا اتحرقت بسرعة
-------------------
وانا ع الفيس بوك جالى انفيتيشن لابليكيشن اسئلة وبالاجابات بيقولك انت شبه مين فى المستقبل المهني وكان دا نتيجة الكوير
" Bill Gates - you have got competition! You've got a head for money and money. You'll make it prime-time some day, even if you haven't figured out how yet. A supreme individualist, you should try to shy away from a corporate job. Instead, make your own road - so that you can be your own boss. "
المفارقة انى فعلا بحب بيل جيتس وحلمي الاول انى اكون بيل جيتس العربي المصري ... انى اخلي مصر واحدة من المتحكمة فى سوق الاى تى فى العالم ( يا ريت لو حد هيتريق يوفر الوقت اللى يكتب فيه التعليق ) ياللا دي خطوة مهمة وعلامة ( لأنى مؤمن بالعلامات او الاشارات ) والفيس بوك بيوقلي انت صح خليك زى ما انت واكيد هتوصل ولازم هوصل وهو الحلم ايه غير انك توصله او تموت فى سبيل تحقيقه
-------------------
اخر حاجة سلام كبيييييييييييييييييييييييييير قوي للكبييييييييييييييييييييير قوي ( مقاما مش حجما ) احمد باشا فهمي علشان وحشني كتير

تحياتى كتير وعقبال كل اللى لسه ما خلصش امتحانات
تشي

يا يوم مسخرة بجد

بجد بجد ما بحبش اكون قليل الادب ولا اغلط فى حد بس لما حد يزودها عن اللازم بجد ما بقدرش امسك نفسي
النهاردة كان امتحان السيستم وانا كنت مطبق اصلا جيت ع الساعة تمانية كدا قلت انام ساعة واصحي تسعة البس واروح الامتحان اللى بيبدأ اصلا الساعة عشرة المهم نمت قومت عشرة وتلت معرفش ايه اللى حصلي والموبايل مرنش ليه ياللا مش مشكلة قدر ولطف وكنت فى اللجنة عشرة ونص انا داخل ومش شايف قدامى اصلا بطلع الموبايل اعمله سايلنت او اقفله لقيت عمونا المراقب بيقولي هات الموبايل دا يا كابتن انت كنت نايم ولا ايه قلتله اه بس الموبايل ليه انتوا بتلموا الموبايلز دلوقتى قالي اه أحسن الدكتور يلغيلك الامتحان قلتله وليه يا عم اتفضل الموبايل اهو الطيب احسن الامتحان كان كويس مكنش وحش يعني كان شغال والصراحة المادة دي المعيد بتاعها كان مظبطها خالص وكانت مادة بيس
المهم انا داخل اصلا متأخر واول ما قعدت بدأت احل شوية دخل الدكتور العميد ولم كل الموبايلات واخدها مكتبه وخرجنا من الامتحان ومحاولات مضنية كتيييييييييير ولا حياى لمن تنادي وعدوا علينا بكرة ( والله السكرتير قال لنا كدا بالنص ) بجد دمي محروق قوي وانا ما بحبش اقعد من غير موبايل
ياللا ربنا يسهل لما نعدي عليهم بكرة ونشوف الحل ايه
انا بجد مش راضي اعبر عن اللى جوايا علشان ما بحبش اكون قليل الادب او اغلط فى حد كنت بحترمه فى يوم ياللا فلتذهب الكلية إلى الجحيم كلها كام يوم واخلص الامتحانات وارجع بيتنا واحتل النت من جديد
واخر الكلام سلام وربنا يسترها علينا فى الامتحان الجاي علشان ناس كتير خايفة منه

تشي

البحر والسما والطريق وحياتى والملك

انا برضه بعشقهم بعشقهم وبعشق اسكندرية فى الشتا بالتي شيرت الكات والبنطلون البرمودا أو الشورت وتمطر كمان

انا بعشق البحر - الملك منير
نزلها من هنا

انا بعشق البحر
زيك يا حبيبتي حنون
وساعات زيك مجنون
ومهاجر مسافر
وساعات زيك حيران
وساعات زيك زعلان
وساعات مليان بالصبر
دا انا بعشق البحر

انا بعشق السما
علشان زيك مسامحه
مزروعة نجوم وفرحة
حبيبة وغريبة
وعلشان زيك بعيدة
وساعات زيك قريبة
بعيون متنغمة
دا انا بعشق السما

انا بعشق الطريق
لانه فى لقانا
وفرحنا وشقانا
اصحابنا شبابنا
فى ضحكت دموعنا
وفيه بكيت شموعنا
وضاع فيه الصفير
دا انا بعشق الطريق

انا بعشق البحر
وبعشق السما
وبعشق الطريق
لانهم حياتى
وانت يا حبيبتي انتى كل الحياااااااااااااااااااااااة


أنتِ كل الحياااااااااااااااااااااااااااااااااااة


-----------------------------
على أحر من الجمر مستني الشريط الجديد لأني قربت انتحر من الزبالة اللى بنسمعها دايما
انجز يا ملك

تشي

why......??

............ But WHY !!??
her favorite quote

الجزيرة .. فلتذهب الامتحانات إلى الجحيم

لسه مخلص امتحان وزهقان من الدنيا والمذاكرة والكلية والدكاترة وكل حاجة ليها علاقة بالكلية وفى عز ما انا مندمج وبسمع تيت راديوا فى سيبر بعد الامتحان إذا بصديقي العزيز أحمد فهمي يرفع السماعة من على ودني بكل صفاقة ويقولي تيجي نخش سينما وبكل برود رديت عليه وماله وحطيت السماعة وكملت سماع لتيت راديو كان شغال حربية وحنان والنجوم وهنام (بحب انا القرارات السريعة دي ) وبما ان كيكو لعب الدنيئة وراح سمع الجزيرة مع زمايله ومن غيري فقررت ارد له الصاع صاعين وادخل انا كمان اسمع الجزيرة ومحدش احسن من حد :P

دخلنا حفلة تسعة ونص وكانت مليانه إلى حد ما الفيلم بجد تحفة جدا ورائع وفيه اسقاطات كمان ومش كدا وبس لا دي فى جمل كدا بتعلق قوي ولأنى مش عايز احرق الفيلم لأن دي اكتر حاجة بكرهها فى الدنيا بس من اهم الجمل اللى معلقه معايا حمله محمود باسين ( احنا اللى زينا ما بيدخلوش الجنه احنا جنتنا هنا فى الدنيا ) وكمان ( اللى يبيع حته سلاح يبقي مجرم واللي بييع ألف يبقي وزير ) واجمل حاجة فى الفيلم انه صادم ونهايته غير متوقعه على الاطلاق ودي اكتر حاجة بتعجبني فى اى فيلم ملاكي اسكندرية كان كدا وشقة مصر الجديدة برضو كان كدا وغيرهم كتير كمان مش هنسي جمله احمد السقا ( انا الحكومة ) بصوت هز السينما كلها بجد الفيلم تحفة وتمثيل الناس كلها تحفه وبالذات محمود ياسين وخالد الصاوى وطبعا السقا بس دول كانوا متفوقين جدا كمان هند صبري وزينه والقدير باسم سمرة والإخراج الجامد جدا لشريف عرفة
الفيلم بجد رائع جدا وفيه كل مقومات الفيلم الناجح ولو انى اضايقت فى شوية مشاهد بس مش هقولها علشان ما احرقش الفيلم

اسيبكوا بقي علشان المادة الجاية صعبة شوية والواحد عايز السنة تخلص على خير والاسبوع الجاى دا اصلا اسبوع دكتور شومان بالكامل يعني نقول على نفسنا يا رحمن يا رحيم من دلوقتى ..... أستر يا رب

غياااااااااااااااااااااااااااب .., ادعولي :(

مش عارف ازاي هيهون عليا افضل اسبوعين من غير نت ولا بلوج ولا بلوجز لكنه القدر اللى بيحتم عليا انى ادرس فى اخر بلاد المسلمين صحيح دراسه ملهاش لازمه او اى علاقة بواقع سوق العمل بس معلش بقي بلد شهادات واللى مكتوب ع الجبين لازم تشوفه العين وكفاية كدا علشان انا هعيط حزنا وهموت كمدا على نفسي

والنبي يا جماعة ابقوا ادعولي انتوا عارفين الامتحانات وسنينها السودة والدكاترة كلهم بيطلعوا غضبهم فينا فى الامتحانات

استر يااااااااااااااااا رب

ربنا يوفكوا انتوا كمان لو بتمنتحنوا لو ما بتنمنحنوش يبقي كفارة :D

سلام بقي علشان انا مسافر بكرة بدري
اشوفكوا كمان اسبوعين بقي :((

تشي


-----------------------------------
تحديث
وابتدأت المعمعة ( الامتحان الاول )
واخيرا بعد سهر الليالى ( دا على اساس ان امبارح دا ليالي مش ليلة واحدة ) وسهر حتى الثالثة صباحا ( محدش ياخد فكرة غلط انا كنت سهران بتفرج على ناشونال تريجير بوك اوف سيكرتس الجزء التاني ورغم الاداء العالى من النجم نيكولاس كيدج والباقين اللى مش فاكر اساميهم -قمت من غير ما اشوف النت علشان اعرف اصحي - المهم ان الجزء التاني مكانش زى الاول واللى كان جامد جدا وللعلم دي تاني مرة اشوف الجزء التاني اللى شوفته اول امبارح بس الفيلم فعلا مغري واحسن من انى اقعد اذاكر ) اه صحيح دا انا جاى اتكلم عن المذاكرة والامتحان المهم انا لقطت شوية كلام كدا من اللى كان بيتقال وكان عندي خلفية عن المادة ( خلفية بسيطة والله متفمونيش غلط ) المهم دخلت الامتحان وكان اخر دماغ وطلعت بعد ساعة ونص وخمسة ( مخلصتش بدري بس كتبت كل اللى عارفه ومفيش تاني ) الامتحان الصراحة كان لذيذ جدا وكان فى نقطة متجاوبه المفروض انها كومبليت بس مفيش مكان للنقط ومتجاوبه جاهزة ودي درجة كدا الدكتور بيمسي علينا بيها ( اشطات يا دكتور ) المهم المتحان خلص والفيلم كان حلو وعقبال الفيلم الجاى اقصد الامتحان الجاى وابقوا قابلونى لو نفعت
كان معكم تشي من فترة انعدام الفكر ( حفظ بس مفيش فكر ) ويطلق عليها عبثا فترة الامتحانات
سلامات علشان انا عايز انام مرهق من الامتحان والمذاكرة ( ههههههه )


-----------------------------------
حراااااااااااااااااااااااااااااااااااااام
يظهر ان الدنيا ماشية بالمقلوب يوم ما الواحد ربنا يهديه ويذاكر يلاقي الامتحان يغم ويبقي عايز ينتحر بجد النهاردة الدكتور طلع كل غضبه فينا الدفعة كلها خارجة ساخطه وبتدعي ع الدكتور ربنا يستر فى بقية المواد الواحد مش ناقص اصلا المسألة مش مستحمله اصلا كفاية الهم اللى احنا فيه يعني مش كفاية ان المعيدين مكفرين سيئاتنا لا كمان الدكاترة مرضيوش يعدو الترم غير لما يخنقوا علينا هما كمان ياللا محدش واخد منها حاجة وما باقي إلا وجه الكريم وامتحان يفوت ولا حد يموت وهروح انام علشان امبارح سهران طول الليل كان فى كتاب جامد بقراه اسمه " انت عنيف وانا ايضا " للجامد جدا انيس منصور بس قلت انام ومش مهم اكمله علشان خاطر الامتحان ياللا اكمله النهاردة وابقي اكلمكوا عنه بعد الامتحانات
سلامات بقي دلوقتى تصبحوا على خير

هابي نيو زفت :P

كل سنة وانتوا وكل حد فى كل حته على وجه البسيطة * طيب وبخير وفرحان وسعيد وعنده امتحانات سهله ومعندوش مشاكل وسنه يا رب علينا سعيدة كلنا وكفاية قوى كدا الصراحة

هابي نيو يير

تشي

---------------------------------
* حلوة الحته بتاع البسيطة دي معرفش جبتها منين
Enjoy