أطلال بحر

لم يخطيء الشعراء الذين وقفوا علي الأطلال. ربما حين تنهار الديار يصبح أصلها في الذهن أجمل مما كان في الحقيقة، أو ربما كان الأمر عكس ذلك بالضبط. ربما يبعث الضياع صورة الجمال القديم الذي كانت العين غافلة عنه والأصل قائم.
بهاء طاهر

استيتس

تستشعرين الألم .. حقا !! تنفسي من روحي إذن لتعرفي ما وقع الوجع علي النفوس.

انتصارات وهمية

لا أدري بالتحديد لماذا ندمن نحن البشر انتصارات وهمية نرضي بها غرورنا، نعتقد بها أحيانا أننا ننتصر للعلي القدير في السماء، أو لقانون وهمي اصطلحنا عليه، أو لتابوه مقدس صنعناه.
لا أدري حقا لماذا نتوهم الانتصار ولا ننتصر حقا، ننتصر علي الأخرين فقط لنثبت لأنفسنا أننا قادرون علي الانتصار،حتى نتوهم أن طعم الهزيمة لم يعد هو الوحيد الباقي بيننا، نتوهم الأخر أحيانا عدوا، وأحيانا أخري كثيرة نصنع الأخر ثم نلبسه رداء الأعداء، نصنعه لنتغلب عليه، نضفي عليه ما نراه من مساويء الأمور والأخلاق والطباع، ثم نغذيه ليكبر سريعا، ثم نبدأ وقائع هزيمة ما صنعه وهمنا، نجادل ونناقش ونطيل أمد المعركة الوهمية ضد الأخر .. العظيم .. القوي .. المبهر .. السيء .. والوهمي أيضا، نصنع محطات انتظار لمعركتنا العظمي، ننتصر فيها جميعا ثم نسقط وحشنا بالقاضية، فننتشي ويملؤنا الفخر ونتحاكي بالانتصار،وندعو الأخرين لنخب النصر، وننسي كل الهزائم وننسي طعم العلقم الذي لا يغادرنا ليل نهار، ننتشي بالوهم، نغيب عن الواقع غارقين في قضيتنا الوهمية، مستمتعين بنصرنا الزائف، ولا نبرح نوجد الأوهام والانتصارات، ونهرب لها من كل هزائم الواقع التى تحيط بنا من كل طريق، أينما ذهبنا، حيثما حللنا، كيفما فعلنا ... طعم الهزيمة يحيط بنا كما حجر رحا يطحن قمحا ... ونحن قمحه.
*ويقول قائلهم بأنا قد اشتقنا نصرا ... فسمينا الهزيمة الانتصار
-----
إهداء
إلي كل الأخر الوهمي في حياتنا، إلي الجزائر الوهم الأخير الذي صنعناه، إلي كل أخر يصنعه كل منا داخله ... إلي المهزومين في كل مكان .
-----
من وحي موقف تعرضت له في مترو الانفاق وكُتِبت حينها
-----
* من قصيدة هيبة العرش الخلي من الملوك للشاعر تميم البرغوثي

فقط

لديّ اعترافاتٌ نعم، سأغتسلُ بعتباتِكِ، سأُلقيّها كُلّها بينَ يديكِ، فقطْ حينَ أرَكِ تردين رداءَك الملائكي متنزهةً عن كلِ ما سواي

بيكيا

الاخرام الصغيرة في القلب ما بتروحش ... وما بتوجعش، المشكلة لو قلبك بقي غربال، وحتي بيكيا ما هينفعش

لِمَ؟

قلبت فيهم جميعا ولم اجدني، اتراني ذهبت؟ آمِت؟ ولو كان صحيحا، فلم بقيت الصور، لم بقيت تحمل شبحا مني، بعضا مني وابتسامات بهتت وعيون خفتت ... لم ؟

ألوان3

حينما يدلل أحدهم بنفسه علي صحة ما يقول حين يخبرك عبر الماسنجر أنه : يا أمة "دحكت" من جهلها الأمم.
-----
البيان اللى وزع علي مسلمي القدس مؤخرا بيوضح الفارق بين تفكيرنا وتفكير دول الاحتلال الصهيونية وبين استخدامهم لأدوات الإعلام في أيدهم في إصدار بيان زي اللى وزع، وبين أستخدمنا لنفس الأدوات في إصدار بيانات من نوعية بوس الواوا.
-----
أظن أنني سأضيع عمري أبحث عن واحدة تجمع بين كل المتناقضات ولم تخلق بعد.
بهاء طاهر - الحب في المنفي "بتصرف"
-----
الحكومة تردد دوما أن الأحزاب ليس لها قبول في الشارع المصري، والاخوان هم أيضا ليس لهم قبول عند الشعب المصري، ولذا فالحل الوحيد هو الحكومة اللى لا تحمل هي الاخري أي قبول عند المواطن المصري.
عن كاريكاتير في دستور الثلاثاء
-----
الغباء صنعة عربية رائجة، لذا فعلي العرب آلا يقلقوا إن نضبت حقول البترول في الأرض، فحقول الغباء لا تنضب - بل تنمو - في العقل.
-----
صفقة الوطني مع الأحزاب والإخوان الأخيرة، صفقة "وسخة" أسقطت أخر ما بقي من أمل أن يكون لدي هؤلاء - جميعا - قسط أخير من شرف.
-----
عن نفس الصفقة، الوطني يوزع مقاعد المجلس النيابي الأقدم والأهم في الشرق الأوسط ككؤوس النبيذ.
-----
قديما كانت الرغبة في القتل مقيدة بعوائق كثيرة منها الشرطة والخوف والإعدام، الآن فقط أحصل علي صورة للشخص المراد ورقم هاتفه وبعض المعلومات التافهه عنه وانشرها مع اتهام له بانه يسيء للأديان ثم اقرأ علي روحه الفاتحة، لتحصل علي خدمة القتل مع التوصيل للمنازل مجانا.
-----
أولئك الذين دعوا وبكوا لشيخ الأزهر بعد وفاته رغم أنهم " قطعوا ف فروته " وهو حي، هل سيفعلون ذلك مع مبارك إيضا حين يموت ؟؟ مجرد تساؤل.
-----
إجابة التساؤل السابق، مبارك مش بيموت أصلاً.
-----
وحدها فيروز كالحضارة الفرعونية باقية ما دامت علي الأرض الحياة.
-----
-مصر فيها عربيات اكتر من اي بلد عرفتها.
*دا انت لفيت العالم علي كدا.
-لا بس عارف يعني.
*قصدك احصائيات وكدا.
-لا من المسلسات الاجنبي في التليفزيون وكدا.
*آاااه، قولتلي المسلسلات.

الأربعاء 18 مارس 2010

غريب

عفوا التعليق هذه المرة ليس للجميع
-----
أصدقائي الاعزاء
ازيكمُ
الحقيقة بعتقد اني بمتلك مجموعة من أحسن الأصدقاء ف الدنيا،مجرد اعتقاد شخصي كل منكم يستحقه، وجودكم حواليا بيشع كتير من الاوقات النور والحب وحاجات كتير حلوة ودا لو تعلمون لشيء عظيم أن أحصل عليه.
بس في مشكلة صغيرة جدا ملكوش ذنب فيها، إني مختلف شوية ومختل شويتين، سوري يا جماعة علشان بأحبطكوا لما بتحاولوا تساعدوني، المشكلة إني غريب في إنفعالاتي ومش دايما بتبقي متوقعة، ولا الحلول ليها بتكون متوقعة، ورغم محاولاتكم لكنها بتطلع آوت.
أنا أسف علشان مش ببقي كويس لما بتحاولوا تخلوني كدا، عارف قد ايه بتبقوا صادقين في محاولاتكم من حواليا، بس الدنيا مش بالسهولة دي، وطبعا مش عايز اقولكوا اني بطريقة ما في وقت ما ببقي شاكر محاولاتكم دي ومبسوط بيها.
كمان مرة أسف علشان ما بقتش انا زي ما أنا بتاع زمان، اللى هو موجود جنب كل حد قبل ما يبقي محتاج ولحوح علي كل حد علشان يبقي كويس وايدي ممدودة اطول مني علشان أساعد، أسف فعلا ما بقتش قادر أكون الشخص دا، ويمكن دا زي ما ظهر خلاني أتراجع في ترتيب الأصدقاء جوا كل منكم، بس أنا مش زعلان من دا بالمناسبة، بس بقولكوا إني بقيت مش بقدر أعمل دا من وقت لما زاد احتياجي جدا وبقيت مش مكفي نفسي فمش قادر اكفي اللي حواليا.
عايز كمان اقولكوا انكم جميعا ولمرات عديدة أحبطتوني بجدارة، وبدون استثناء، ومش فاكر مواقف بعينها، لكنكم كنتم بتحبطوني دايما، مش هكذب وأقول إني مش بتضايق منكم لما دا بيحصل، علي العكس كنت ببقي مضايق جدا، بس بردو كنت بديكم عذركم.
أيه العذر ؟؟
أسف مرة كمان علشان العذر اللى فوق دا، إني بحملكم اقصي من طاقتكم، وبتسني منكم حاجات بتكونوا ف الأخر مش قدها، مش لعيب فيكم ولكن علشان ما يمكن تسميته عشم-وهو مش عشم أوي يعني- فيكم، بس بحاول بالتدريج إني أبطل عشم ف حد، وأبطل استني من حد حاجة.
بعد حوالي تلت سنين وشوية معاكم اكتشفت إني كما ولدت كما أموت، وحيدا.
في كلام كتير تاه مني أوعدكوا لو افتكرتوا ولحقت اكتبه هكتبه.


-----
صحيح محدش يسألني عن الموقف اللى احبطني فيه علشان مش هبقي فاكره ولو فاكره مش هقوله :)
-----
عنوان النوت نفس عنوان نوت كتبها قمحاوي من كام يوم والحقوق محفوظة ليه

ألوان 2

اللى نعرفه احسن من اللى ما نعرفوش، تصغير لفكرة الخوف من الموت وتعميم ليها علي كل مجهول النتائج في حياة المجتمعات والبشر او الافراد حتى.
-----
من اغبي الحاجات في نظري لما حد يستني النور في الضلمة، النور بيجي في النور.
-----
لما بدور علي حل لوضع مصر الحالي بلاقي مفيش حل، دا مش تشاؤم دا أمر واقع.
-----
رغم إيماني بعدم وجود الحل، بحاول مع اللى بيدعوا وجود حل، ربما هي عقد أوديب.
-----
لو انا مكان النظام الحالي هعمل تمثال لمحمد بن عبد الوهاب قدس الله سره، لغنه السبب الرئيسي في بقاء النظام علي قيد الحياة حتى الآن.
-----
احنا خير أمة أخرجت للناس، احنا بلد مسلم، الخير في وفي امتي، اد ايه احنا بارعين في إيجاد مبررات لأنفسنا لأي حاجة بنعملها وأي وضع أحنا فيه حتى لو كان الوضع دا هو مجرد خراء في مؤخرة العالم.
-----
فضيلة الأختيار، مرض عضال نجونا نحن البشر في مصر من التعرض له، الواحد يتولد علي دين أبويه، يتعلم علي دماغ معلميه، يتشكل علي بيئه محيطيه، يدخل الجامعة كما اراد له مكتب التنسيق، ويشتغل كما اتفقت الحكومة أو الواسطة، ويموت حسب إرادة ربنا او عربية كورولا 2009.
-----
العشق مستنقع عميق صعب الخروج منه، سواء وقعت في حب بشر أو وطن او عشق العشق ذاته.
-----
الإزدواجية !! .. بس.
-----
متوقع - شخصيا - تمرير قانون لا أخلاقي من نوعيه قانون بيع الآثار، مع تصاعد وتيره مسرحية مرتضي-شوبير السخيفة.
-----
المجد لكل من قالوا لا في وجه من قالوا نعم.
-----
بمناسبة الجملة اللى فاتت، فلتتقدس روح أمل دنقل في السماء وتنعم.
-----
- دولة مدنية
* يعني أيه
- يعني نفصل الحياة الدينية عن الحياة السياسية والقوانين وإن الكل امام الدولة سواء
* استغفر الله العظيم
-----
الأحزاب السياسية قبل ما يرجع البرادعي كانت بتعك بغباء، دلوقتي بتعك بنظام.
-----
هو ليه بنخاف من الموت، متفهم الخوف من الغيبوبة أو مرض مزمن، علشان المعانة هتفضل وتستمر، لكن الموت !! خلاص خلصت كل سنة وانت طيب اشوفك هناك.
-----

الأربعاء 10/3/2010

رسائل حزينة

دنيا خساره ..؟؟
قالها الهلال لما لمحني في الطريق محني ..
دنيا خساره ..؟؟
قالها القمر فوق بسمته الشايبه ..
ونا كنت وحدي في الطريق بانزع ثياب الحزن
باغسل عيوني ف بحر ضحكه من عيونك
يا نجمتي المغسوله بالأحلام
ويا ابتسامه في دنيا من غير ابتسام

مجدي نجيب
ديوان صهد الشتا

مشاهدات

النهاردة كنت راجع من الزقازيق
فعند موقف السلام استوقفني موقفين سريعين
-----
ما بين العربيات اللى ماشيه في اربع اشخاص - اعتقد في نهاية عقدهم الثالث ف الحياة - بيبعوا حاجات مش عارف ماهيتها، هي عبارة عن العاب اللى شبه البلالين دي ومعموله علي شكل سبايدر مان، اللى بيبيعوه بالنسبة ليا -واعتقد لكتير من سائقي السيارات ف الطريق- ما يساويش نص جنية، فعلا حاجات مقززة، هي اصلا لا تشبه الرجل العنكبوت إلا في ألوان الشخصية بس، وصناعتها رديئة للغاية، في الفتره اللى العربية اللى كنت راكبها عدت حواليهم عدي مش اقل من خمسمائة عربية، ولا واحدة منهم اشترت من الاشخاص دول حاجة، والاشخاص دول بيجروا وسط العربيات يحطوا البلالين دي ف وش اللى بيسوق، بس تساؤل مر عليا، هما دول لو قولنا انهم بيكسبوا 500% مثلا واللي بيبيعوه دا تكلفته جنية مصري يبقوا بيكسبوا مثلا 5 جنية ف الواحد، بس هو كام واحد اصلا بيشتري طول اليوم اللى هما مرميين فيه ف الشمس ووسط الطريق دا، مش عارف الناس دي بتكسب ازاي ولا بتعيش ازاي الحقيقة والتساؤل ما يزال يتردد في رأسي
-----
التاني
في عند نفس المكان بيعملوا كوبري جديد، عادي احنا بلد الكباري اصلا، بس الغريب ان شخص ما معرفش مين هو ولا ايه منصبه ولا إذا كان الحكومة ولا أشخاص عاديين، المهم الشخص او الاشخاص دول معلقين علي الاساسات بتاعه الكوبري يافطات كلمات اسلامية ، الله اكبر والحمد لله وبحمده و و و و، إلي اخره، ما ركزتش معاهم كلهم
بس بردو دار جوايا تساؤل مين اللى سمح ان الحاجة دي تتحط هنا، وهل اللى حطها وهو مبسوط بالثواب المنتظر ما يعرفش ان تعليقها مخالفة للقانون وعليه إثم؟، ولو الحكومة هي اللى معلقها، مين سمح انها تتعلق وبصف ايه تتعلق وعلي حساب مين
مجرد تساؤلات بس
-----
بس

ألوان

أنت من عبده الشيطان ؟ -
!أنا مش مؤمن بوجود الشيطان أصلا *
-----
مش المشكلة وجود الجنة أو عدم وجودها، المشكلة الحقيقية في وجود النار.
-----
نموذج إرتقاء الأرواح وتدنيها مناسب لفهمي أكثر من إشكالية الجنة والنار.
-----
الإيمان الفطري بالنسبة ليا نوع من الغباء أو الجبن أو ربما كلاهما.
-----
العبادة لمجرد النجاة من النار عبادة للنار، والعبادة رغبة في الجنة عبادة للشهوات.
-----
عبادة الخوف مش قادر اقتنع بيها، ممكن أحترمك وأحبك وأسمع كلامك من غير ما أخاف منك.
-----
مجتمعنا بيتبع طريقة الفزاعة في التربية، المشكلة إنه بيخلي الفزاعة دي هي ربنا.
-----
الشك عمره ما كان خطيئة ولا كان عائق عن الوصول لربنا، بس هو خطئية في عرف مجتمعنا، الناس بتخاف حد يكسر تابوه ما اتفقوا عليه، بيعتبروها إهانة شخصية ليهم، مش للدين أو الإله.
-----

المقطع الأول مش خاص بيا بس جه ف دماغي ف كتبته الباقي بيا