غصن أخضر آيل للسقوط


عمرك سمعت عن غُصن أخضر آيل للسقوط!! أهو أنا بقي غصن أخضر آيل للسقوط، أول مرة أعرف إن ممكن غصن يبقي آيل للسقوط، ولو فرضا كان كدا، مش هيكون أخضر، بس ليه الغصن الأخضر يبقي كدا، لو وحيد مش مبرر، شعاع الشمس اللي بيعافر علشان يقابلك دا صديق، بس أنت مش صديق، لو حواليك ألف صديق وأنت مش صديق هتفضل طول عمرك غصن أخضر آيل للسقوط، مش هتجف، علشان بس أنت مش عايز تجف، مش علشان النور، أصل النور مش شعاع شمس، النور جواك، متداري ساعات، وساعات موجوع، بس موجود، وانت عارف، بس خايف، مش مبرر، علشان انت بس غصن، ما انتش عمارة مثلا، كل العمارات هيجيها يوم تجبر السقوط، بس انت وعلشان غصن لأ، يمكن ييجي خريف، تاخد فيه راحتك وتغيب، يمكن بقيت آيل للسقوط من ساعة ما بطلت تغيب ف الخريف، كنت بتخاف ف الصيف، قال علشان العري !!، الصيف بيعريك !!، أمال ايه الخريف؟؟، لأ وكنت بتحبه، أصلك بتدفي، طيب والصيف مش دفا ؟؟، ولا يمكن ما بتحسش؟؟، والشتا ؟؟، بتحب المطر، بيرجعك نضيف، ووحيد، من غير شعاع شمس واحد حتى، بس بيصاحبك ع الندي!!، بتخاف ؟؟، ومين مش بيخاف!!، أصل عارف، بستغربك!!، حد ما يحبش الربيع!!، والورد ؟؟، ما بيوحشكش، ولا بيفكرك بالاصحاب، ما قابلتش في عمرك أصحاب!!، لو كنت عارف مين أنا كنت أقول، مش هتموت، بس معرفش إذا كنت هتعيش ولا لأ، بس عادي، حاول، الحياة ما بتقفش عند أرقام، الحياة أصلا ما بتعرفش تعد، ولا بتخاف، متخداهاش بالحضن، وخاف م الشتا، والمطر، علشان ما تتعبش، أصل الندي بيرطب القلب، وانت مش حمل رطوبة أصلا، خاف علي نفسك، وحاول تحب الربيع، والورد، والأصحاب، وأنت!!
وأنا الغصن ... الأخضر ... الـ آيل للسقوط !!

12 comments:

قطة وخيوط said...

رغم أنى مقدرتش أفهم
ده حوار مع نفسك
ولا لغبطة جواك
ولا الاتنين
ولا حاجة غير كل ده
بس أنا فعلا حبيت كلامك أوى لأنى حسيته جدا
وهو ده أجمل ما فيه أنه يتحس أوى
ده الى مخليه يوصل بالصدق ده

عجبنى أوى تعبير غصن أخضر آيل للسقوط
بجد تعبير حلو أوى

النور جواك .. متداري ساعات .. وساعات موجوع .. بس موجود

الجملة دى بقى بجد تجنن

Anonymous said...

الي بيتوجع هو بس الي بيعرف يحب

Che Ahmad said...

قطة وخيوط
انا شخصيا موش عارف

مبسوط ان الكلام عجبك ووصل :)

انونيموس
رُبَـ ما

Anonymous said...

‏!!!

بنت القسام..بنت البنا said...

إزيك

Anonymous said...

حلوه اوي .. بس علشان افهمها كنت لازم اقراها 3 مرات .. اول مره عملت فكره عامه و التانيه حسيتها و التالته بصوت عالي ... وبجد فهمتك اوي اوي .. بس بجد الكلام دا محتاج صوتك ... لانه طالع من حاجه جواك صحيت و انت بتسكتها يمكن ... يمكن انا غلطانه او فهمته على اساس شيء جوايا بس انا متاكده انه محتاج يتقرأ من حد حاسه علشان الي ادامك يحسه اوي و يمكن انت مش عايز حد يحسه يمكن ... بس بجد حلو اوي

Che Ahmad said...

هو مال الانونيموس كتروا كدا ليه :D
ربنا يزيد ويبارك

الانونيموس الأول
؟؟؟

جي
كويس، خلصت فترة السبات وجه وقت العودة ؟؟

انونيموس الأخير
مش عارف محتاج صوتي ازاي، إلا لو حد يعرفني، ع العموم انا شخصيا ما فهمتش الكلام، وبخصوص الشيء اللي جوايا، دا توقع غير صحيح :D

Anonymous said...

انا الانونيموس الاخير :D
...
اولا مالهك باه الانونيموس ... :'(


ثانيا انا قلتلك يمكن دا فعلا احساس عندك او دا احساسي انا ... يعني مش شرطته بيك


و اما مووضوع الصوت علشان الكلام يتفهم معناه اسرع و يوصل
احساسه .. صوت حد فاهم الكلام ...
مش شرط صوتك يا سيدي ...

و مرسي على الاهتمام بالرد :)

youssef said...

جميلة

:)

Anonymous said...

اه كالعاده
ههههههه
جيلي

Che Ahmad said...

انونيموس

احسن ناس :)

منور :)

Che Ahmad said...

يوسف

الجمال في عين الرائي

جي
حمدالله