ِشيوخ العصر وعصر الجواري

فى تحديثين للبوست تحت .....
-----------------------------------

واقعه اوردتها جريدة الجمهورية طبعا انا مش بقرا الجمهورية علشان محدش ياخد عني فكرة وحشة ولا حاجة :D
بس بجيبها علشان اختى فى الثانوية العامة

المهم بقي يا سيدي الواقعة بتتكلم عن الشيخ خالد الجندي وواقعه ضربه من احدي السيدات قصاد مبني التليفزيون

المهم فى الخبر سطرين
الاول :
المعروف أن الشيخ تزوج عدة مرات وتفاوت زيجاته بين العرفي والرسمي والمسيار
التاني :
الاعتداء علي الشيخ خالد الجندي ليس الأول من نوعه وانما تعرض لمثله عدد من مشايخ الفضائيات والدعاة الجدد قبل فترة مثل عمر عبدالكافي والشيخ محمد جبريل وآخرين ليس هنا مجال الحديث عنهم أو عن ارتباطاتهم العاطفية وزوجاتهم


يعني الشيخ خالد الجندي تعددت زوجاته بين الرسمي والعرفي والمسيار كأنه بيعود بينا للعصر الجاهلي والجواري ومش هو لوحده لا دا كمان الشيخ عمر عبد الكافي والشيخ محمد جبريل واللى بعد عن التليفزيون والاضواء بعد فضيحته وزواجه العرفي وكمان الشيخ محمد هداية واللى مطلق مراته ومش مخليها تشوف اولادها من 7 سنين بهدله فى المحاكم وهو رافش حقها الشرعي والقانوني بل وكمان طلع ما اسموش هدايه دا بس للشهرة ( الخبر قريته عند هارمليس فى جزء ومضات اللى فى السايد بار عنده وموجود فى المصري اليوم )
حكاية كمان ليست بالخفية
ولكن بيتشدق بيها هواه الدين الشكلي عن ابو اسحاق الحويني ويذكرونها بإجلال وهم بيحكوابنفس الطريقة التاليه والحديث موجه ليا :
عارف كان مرة واحد اتصل بالشيخ الحويني ع الهوا وقاله ازاي يا شيخ بتدعوا لربنا وانت مش متجوز اربعه ( !!!!! ) فما كان من الشيخ بعدها على طول إلا انه اتجوز الرابعه لانه كان متجوز تلاته بس !!!!!!!!!!!!!!!!!
يعني الشيخ اتجوز اربعه علشان يرضي الراجل وبيدعي كمان ان التعدد هو سنه عن الرسول وإن دل الرأي العقيم دا يدل عن جهل الشيوخ هؤلاء بالدين اللى بيتكلموا عنه
ربما تكون علاقه هؤلاء الشيوخ بالنساء هى طريقة كشفهم للناس وكشف تشدقهم بالدين واتخاذه كتجارة بس

خير محمد هداية من المصري اليوم من هنا
خبر خالد الجندي من هنا
والجزء التاني للخبر من هنا


تحديث مهم لكل من اتهمني بسوء نيتي
---------------
الموضوع معمول لنقد ظاهرة انتشرت فى مليون غيرها يستحق النقد بس دا شيء ما يخصنيش انا نقدت دي علشان عايز انقدها اللى شايف ان فى حاجات تاني تستحق النقد اكتر ينقدها عنده انا مش ملزم انقد كل حاجة انا بنقد اللى ما يعجبنيش ويلح عليا انى اكتب عنه
بخصوص الموضوع دا بالذات
انا اللى مضايقني مش انهم غلطوا فكل ابن آدم خطاء لكن المؤسف فى الامر ان دول مش اي حد دول دعاه الاسلام دعاه الدين اللى طول اليوم ع الفضائيات شغالين قال الله وقال الرسول والمفروض انهم قدوة لينا كناس عاديه هما بيعلمونا الدين المفروض انهم يعملوا باللى بيقولوه لكن علي العكس تماما مواقفهم كلها يندي لها الجبين
والدليل على المواقف اللينكات الموجودة اما موقف الشيخ الحويني فدا ذكره ليا واحد سلفي بشده ويعشق ابو اسحاق ويعقوب وحسان وذكره ليا على اساس انها حاجة يفخر بيها مش موقف يحسب ضده الشيخ وهحاول اوصل للفيديو بتاعه

تحديث 2
----------------
فى المصري اليوم اتكتب تبرئه للشيخ خالد الجندي من الاتهام اللى ارودته الجمهورية ولكن لتوضيح وجهه نظري من البوست .......
هدفي من البوست هو الحسرة على حال شيوخ الايام دي ودعاه الاسلام وقد ايه اصبح استهوانهم بالدين وازاي بيدعوا لما لا يفعلون مش مجرد نقد لما حدث لخالد الجندي ...
الناس بتقول انهم يخطأوا لانهم بشر دا صح تماما بس اللى اعرفه انهم فى مراكز دعوية كمثل عليا وهما مش اي حد المفروض دي اول حاجة تاني حاجة ان من يخطئ يعترف بخطأه ولا يتمادى الوقائع اللى فاتت كلها مؤكدة بالنسبة ليا ويمكن فى ادله مش موجودة ع النت منها خبر محمد جبريل اللى من زمان جدا ومعرفتش الاقيه فى مصدر ع النت وكمان فيديو الشيخ ابو اسحاق الحويني لكني واثق من الخبرين تمام الثقة
خالد الجندي بنتقد اراءه من زواج المسيار وتحليله ودا كان هدفي من العنوان ( وعصر الجواري ) لانه بيحلل الزواج دا وخبر الشيخ هداية ومحمد جبريل فالشيخ هداية مثلا سبع سنين زوجته وراه علشان تشوف اولادها وهو رافض لو افترضنا انه اخطأ لما ما خلاهاش تشوف اولادها فاولي بيه انه يستمع لما يدعو هو إليه على شاشات الفضائيات ويرجع إلى صوابه ويعترف بخطأه ويمكنها من رؤية اولادها والشيخ جبريل حكاية زوجته العرفية المنقبة اعتقد اشهر من اني احكيها واولي بيه وهو القارئ الدائم للقرآن فى رمضان حتى تدمع عيناه انه يتقي الله وما يقرأه في زيجته دي اما موقف الشيخ ابو اسحاق الحويني فهو مش خطأ منه هو شايف انه بكدا بيكمل دينه وبيتبع سنه الرسول من الزواج من الرابعه ودا شيء فى نظره يشرفه لكني بنتقد حصر الدين والتدين فى الزواج من رابعه او ثالثة واعتبار ان التعدد سنه عن النبي " ص " وهو امر إن دل فهو يدل عن ضيق رؤية وتفسير زيجات الرسول وكمان اختلاف العصور

دا رأيي المتواضع للغاية واللي انا متمسك بيه للغاية حتى يثبت خطأه ويقنعني احد بان الصواب جانبني

خبر فى المصري اليوم بتبرئه الشيخ خالد الجندي من اتهام السيدة المجهولة من هنا

خالص تحياتي ...
تشي أحمد

28 comments:

Traveller said...

والله الواحد مش عارف يقول ايه انا فعلا مصدوم مصدوم فى الناس اللى الواحد بياخدهم مثل اعلى وبيسمع كلامهم ويقول يااااااااه عندنا ناس لسه بيدعوا لدين الله بكل الحرص دة على نشر تعاليمه وهما من ناحيه تانيه خاربين الدنيا
يا حول الله
ربنا يكون فى عونا على الناس دى ويهدينا ويهديهم حزنتنى على الناس دى والله
فعلا سقطوا من نظرى
سلالالالالالالالالام يا تشى

A7MeD F@hMy said...

ممممممممممممم
انا شايف انك متحامل علي الشيوخ كلها يا تشي لو دة فعلا غلط فليهم ناس بيحبوهم فماتكرهش اللي بيحبوهم فيهم و لو انت مش مقتنع بده خلاص اقتنع باللي يعجبك؟
شفت انت موقف اسحاق الحويني بعينك؟؟اشك
ايه الدليل علي اي كلام من اللي مكتوب ع الشيوخ دة؟
دول ليهم جمهيريتهم و العريضة كمان
بدل ما تجيب فضايح للشيوخ و هي مش موجودة اصلا شوف حد تاني و دور علي فضايحه
يا ريت تتقبل نقدي و لو دليل اقوي معاك يا ريت تجيبه

صفا said...

بص يا احمد معاك ان الشيوخ فى الوقت الحالى منهم كتيير جدا الا من رحم ربى اللى ملوش سقطات جامده خصوصا فى تعاملهم مع المرأه وانهم بيعاملوها كانها مخلوق ادنى منهم ومن حقهم التحكم فيها ودى زى عقليه معظم الناس فى المجتمع كله
ومعاك بردو فى انهم المفروض يكونوا قدوة حسنه للجميع والمفروض يراعوا ده فى تعاملاتهم عشان للاسف فى ناس كتير ماشية وراهم من غير اى تفكير
بس للاسف بردو ان معظم الشيوخ اصلا بيحاولوا يطبقوا الدين كانه نصوص بياخدوا بالكلام المكتوب وبس
بس فى الاول والاخر بارجع اقول ان دى حريتهم الشخصيه والعيب على الناس اللى بتمشى وراهم من غير تفكير
وربنا يرحمنا من العقليات دى بئه ويكشفها على حقيقتها

Oss said...

انت غلط فى الأول ياعم تشى
يعنى انت مضطر تجيب الجمهوريه
خلاص يا سيدى
طلع صفحتين الأسئله واركنه فى جنب
مش لازم تقراه علشان ماتعصبش نفسك
انا باعمل كده مع اهرام الجمعه علشان أسامه سرايا ربنا يـــــ
المهم
حوار محمد هدايه قريته فى أكتر من جريده قبل كده
وحوار خالد الجندى لسه قاريه فى المصرى اليوم بتاع السبت
بس كلام العرفى اللى فى النص ده
خلانى ماحترموش بعد ماكنت باستظرفه كداعيه

لكن عمرعبدالكافى ومحمد جبريل أول مره اسمع الكلام ده هنا

فى النهايه الكلام ده كله لو كان صح يبقوا دول ماينفعوش كدعاه للإسلام
ويجب منعهم من كده

-----------------------
قناة الناس انا مابقتش اسمعها خالص بسبب شيوخها المتزمتين وشغالين بنظام حرّم تسلم
استبدلها بالرساله أو اقرأ فهم معتدلين شويه عنها

تحياتى

Dr. Eyad Harfoush said...

عزيزي شي
شكرا للمقال الجميل و المدعم و الموثق بمصادره، قد لا أكون مصدوما على الاطلاق، لانني سمعت بعضا من هذه الاخبار و قرأت بعضا من قبل، لكن حتى وقتها لم اصدم، فمن يتاجر بالدين و يجعله لقمة عيش و سبوبة يفتح منها بيته، لا عجب ان يعامل زوجته هكذا، و لا ريبة في أن يعيش حالة الانحلال ذات الغطاء الشرعي المذعوم هذه!!! فهم على دين سادتهم من شيوخ البترول الوهابي
تحياتي و تقديري

GeHaD-----(male) said...

????????????
لا حول ولا قوه الا بالله
كل واحد هو ونيته بقي ياحمد
مع اني بحب اسمع الشيخ خالد الجندي
اول مره اسمع الكلام دا منك

abo salah said...

بعد السلام عليكم

أزيك ياتشي
والله واحشنى جدا

وأنت خاصة حاططنى فى احراج كبير اوي بسبب ذوقك وسؤالك الدائم عنى فى عز تقصيرى

عامة مش هأقدر اقولك غير انه .. يارب يديم المعروف بنا

وأنك من الشخصيات اللى اعتز بصداقتها
وعايز اقولك انه كان ليا اسبابي في الغياب الطويل دا
بس زي ماقولت في بوستي الأخير مش حابب اتكلم فيها خالص دلوقتي

عامة ربنا يقدرنا دلوقتي علي الالتزام بالتدوين وعدم الانقطاع تاني .. لأني بجد كنت مفتقده ومفتقد ناسه

اما بخصوص موضوعك
فأنا برضه من الناس اللي اتصدمت بالكلام دا ولكن برضه بالنسبة ليا حكاية عمر عبد الكافي ومحمد جبريل وابو اسحاق اول مرة اسمع عنها

اما هداية وخالد الجندي قراتها

ومش عارف اقول غير انه شئ محبط لأن الناس دى احنا بنحبهم وبنأخدهم قدوة

المشكلة ان الشيوخ دول زيهم زي الناس في كونهم لازم يغلطوا .. بس الغلط لما بيجي من حد مش متوقع منه الغلط بيعمل صدمة

وفي الأخر اقول .. ربنا يتولانا جميعا برحته

تحياتي ليك يا تشي

abo salah said...

نسيت اقولك ياأحمد أنه خلاص مش هتستني تاني بقية اليوم اللي ولا علي البال
لأنه البوست القادم بمشيئة الرحمن

تحياتي

عابر سبيل يتمنى لك الخير said...

بسم الله الرحمن الرحيم

بالنسبه لكلامك اخي الفاضل فأول شيء ارى سلبيه مش طبيعيه في التفكير هدانا الله واياك بمعنى ان لما يكون عندك صفحه بيضاء وفيها نقطه سوداء المفروض انك تقول انها صفحه بيضاء ولا تركز على النقطه السوداء وتقترب منها وتكبرها بنظرك كن ايجابيا


وثم ماذا استفدت من التنقيص من قيمه العلماء الذين امضوا حياتهم في طلب العلم الم تسمع بأن لحوم العلماء مسمومه ؟!
هداك الله ثم ان هذا الكلام ارى ان حضرتك اخذته اما من طرف واحد او ان الدليل كما تقول لايدل على الكلام وانما هو ضد الكلام المكتوب ويناقضه

اتمنى ان تكون اكثر ايجابيه وان تفكر بشموليه اكثر ومن جميع الجوانب

المعذره لان تكون اول مشاركه لي في مدونتك انتقاد هادف وان لم يعجبك التعليق يمكنك مسحه كما تشاء

تحياتي لك

Anonymous said...

زي ما قال فمي انت متحامل علي الشيوخ قوي..
لو كلام الناس دي مش عاجبك خلاص ما تسمعش ليهم..
وشوف ايه اللى انت مقتنع بيه وامشي وراه... بس اعرف انك هتلاقي اللي بينتقدك برده...زي ما انت هنا انتقدت الناس دي

*******
وانت عارف ان مفيش حد كامل وهما دعاه الاسلام بشر برده يعني يجوز انهم يخطئو مش حاجه غريبه ..الغريب انهم لو عارفين انهم غلط وبيعملو الغلط ده والناس دي زي ماليها ثغرات اكيد ليهم حسنات..

********
فيه ظواهر كتير تقدر تتكلم عنها بحريه برده وبدون تجريح او تشخيص...
لأن
الناس دي ليهم اللى بيحبهم.. زي ما
انت ليك الناس اللى بتحبهم

******
انااول مرة اسمع الاخبار دي كلها :D

هتشتري الجمهوريه تاني امته؟؟
:P
****
COMANDOR

Che The Hermit said...

سمير

صدمتك بالنسبة ليا مش قوي يعني لاسباب عديدة ع العموم ابقي اقري الموضوغ بعد التحديث هتفهم وجهه نظري اكتر

تحياتي
تشي

Che The Hermit said...

فهمي

يمكن متحامل شوية لكن علشان هما مش اي حد بتحامل عليهم كدا على قدر اهل العزم ...... اكيد مش محتاجني اكمل

انا مش بتكلم على اللي بيعجبني من الشيوخ ومين مش بيعجبني انا بتكلم عن مواقف بعينها ما ينفعش تحصل من رجال ودعاه دين

وبعدين جماهريتهم العريضة لا تعني شيء ع الاطلاق ودا موضوع تاني على فكرة واعتقد انت تعرف وجهه نظري فى دا وفى الجماهيرية العريضة دي

وبعدين انا مش بدور على فضايح زى ما انت بتقول انا بنتقد مواقف معينة ومش فضايح

انت اكتر واحد عارف انى بتقبل النقد وبصدر رحب للغاية ولأطول لنفس وابقي اقري بقية الموضوع

تحياتي
تشي

Che The Hermit said...

صفا

جيبتي م الاخر بس فى حته انها حرية شخصية الشيوخ دول غالبه من الشعب اصبحت بتتخذهم مثل عليا يحتذي بيها فاصبحوا مؤتمنين على غيرهم وهما بنفسهم جعلوا حريتهم الشخصية مقيدة أو منقوصه لانهم مسؤلين عن غيرهم وإن كان العيب فى غيرهم

عموما التحديث للبوست فى وجهه نظري بشكل اكبر

تحياتي
تشي

Che The Hermit said...

اوسسسسسسس الجميل

والله يا عم انا مش بقراه ان اختي بتقولي بص كاتبين ايه عن خالد الجندي وانا والله مش بقرا جرايد خالص حتى الدستور مش بجيبه غير الاربع بس رغم انه ع النت

فى النهاية بحييك على استبدالك الموفق بعض الشيء ومش كله يعني

تحياتي
تشي

Che The Hermit said...

العزيز دكتور اياد

رأيك ربما هو احد المكونات لرأيي فى الاصل وإن كان ليس وحده ولكنه دعمه ومواضيعك الثرية دائما تثري اراءي عموما ربنا يريحنا من شيوخ البترول الوهابي ويكفينا شرهم ويا نحلة لا تقرصيني ..........


تحياتي
تشي

Che The Hermit said...

جهاد باشا

اكيد كل واحد هو ونيته وابقي كمل قراية البوست بعد التحديث

تحياتي
تشي

Che The Hermit said...

ابو صلاح الجميل

عود حميد بعد غيبه طويلة
والله ولك وحشة يا رجل ( حلوة الحته الفصحي اللى فاتت دي )

ويا سيدي ولا احراج ولا حاجة والغايب حجته معاه ;) والحمد لله إنك رجعت فى الاخر

على فكرة البوست مافيهوش حكاوي عن عمر عبد الكافي غير ذكر الجمهورية ليه اما البقية فكلامي عنهم واضح بعد التحديث الاخير

يا ريت تبقي تلقي نظره

تحياتي
تشي

Che The Hermit said...

ابو صلاح تاني

منتظره على احر من الجمر يا جميل

تحياتي
تشي

Che The Hermit said...

عابر السبيل اللى بيتمنالي الخير

فى الاول انا مش بمسح تعليقات ابدا حتي ولو بتنتقدني فما بالك بمن يرد لي الخير حتى لو من وجهه نظره

اولا النقطة السوداء فى الثوب الابيض هى اللى بتخليها كبيرة اوي والمفروض ما تحصلش من الاصل لكنها للأسف مش نقطة واحدة بس دول نقط كتير من ناس المفروض ما يكونش عندها نقاط سوداء نظراً لمراكزهم الحساسه كداعه للدين

وانا على فكرة مش بنتقص ولا حاجة هما اللى انتقصوا باللى عملوه وكمان لم يتراجعوا او يقروا بأخطاهم

ع العموم انا ضفت تحديث بعد ردك يا ريت تطلع عليه

ومشاركتك فى كل الاوقات مرحب بيها وبكل الاشكال كمان

تحياتي
تشي

Che The Hermit said...

كوماندور اللى مش بيشرف غير فى المصايب بس

انا ما قولتش محدش بيمعلهم انا بكرر انا بنتقد حاجات ما عجبتنيش فى تصرفهم ودا حق ليا تماما وع العموم انا برحب بالنقد دايما ولو عندك اتفضل انا مستني والنقد حاجة إيجابيه مش سلبيه

*******

رديت على جزئي حد كامل ومش كامل قبل كدا وفى التحديث

*******

على فكرة كمان انا قولت انا مش بنتقد الظواهر الكتير انت شايفها تستحق النقد اتفضل انقدها عندك واللي بيحب حد مش بيدافع عنه وهو غلطان

*******
اديك سمعت الاخبار وابقي عد الجمايل انى اول من سمعهالك
وبخصوص الجمهورية هشتريها كل يوم علشان اخليك تقراها ما بينفعش معاك غيرها:P:P:P

تحياتي
تشي

dr.Roufy said...

الواحد مابقاش عارف يتكلم ولا عايز يتكلم يا أحمد
بجد الوجع غطى على أي كلام وأي حروف
انا لله وانا اليه راجعون
:(

Yuki said...

لا حول و لا قوة الا بالله

ربنا يهدي كل المسلمين لما يحب و يرضى

و خصوصا اللى يعتبروا دعاه و ناس كتير اوووى بتتأثر بكلامهم

تحياتي ليك في اول زيارة لمدونتك و إن شاء الله مش الأخيرة

Che The Hermit said...

دكتور روفي

الوجع بقي كبير اوي فعلا بس مينفعش ما نتكلمش علشان الوجع كدا هيزيد

لا اسكت الله لنا صوتا فى الحق

تحياتي
تشي

Che The Hermit said...

يوكي

انا بقول المدونة منورة ليه بردو

ربنا يهدينا كلنا يا رب


منورة
تشي

best friend said...

على فكرة انا اول مرة ارد عليك على الرغم انى معجبة بالموضوعات اللى بتقولها ولكن المفروض اننا نتأكد من الكلام ده لانة للاسف اعلامنا دلوقتى مبقاش فيه مصدقية ومش كل خبر بتكتب صح ممكن بل اكيد انها اشاعات ليها سبب اكيد معظمنا فهمه وعموما لو الكلام ده فى شى من الحقيقة فأحنا المفروض نركز على الجزء الايجابى فى علمائنا الافاضل لان مفيش اى حد مبيغلطش وكل انسان ليه فكرة الخاص به

Che The Hermit said...

best friend

اولا مسبوط ان مواضيعي بتعجبك ومستني ردك دايما

اعلامنا دا لو بنتكلم على صحف حكومية زى الجمهورية لكن المصري اليوم والمستقلة معتقدش
لكن انا وضحت ان السلوك العام كله يشين ويدين
واكيد مفيش حد ما بيغلطش لكن دي غلطات شنيعة من باب أتأمرون ودا مينفعش لانهم بيدعوا لشيء وبيعملوا عكسه ودا ما ينفعش اصلا

عموما تحياتي ومنورة
تشي

طيف الاماني said...

اسلوب جميل يا تشي اللي بتتكلم بيه عن افكارك
جميل ان احنا نقرا ونعرف ونحب نفيد غيرنا
بس الاجمل ان حنا نفيد غيرنا بحاجات صحيحه وواثقين منها
مش اي حاجه نعرفها واي حاجه نقراها بتبقي صح
يا مكتر الاشاعات وبالاخص حولين الاحاجات الكويسه الاموجوده
والله اعلم يمكن ليهم مصلحه في تشويه صوره الاسلام
عايزه اقولك ان لو انت شايف عارف حاجه ومقتنع بيها وبتنشرها هنا في البلج بتاعك دي حاجه من حقك ومحدش هيمنعك
بس انت كدا بتعمل زيهم وبتشوه صوره الاسلام قدام اصحاب الديانات الاخري
لان كتير بيدخلوا هنا في البلج
وبيقروا موضيعك وبتعجبهم
احنا كدا بنسواء صوره الاسلام باللي بنكتبه وبنعمله
انت ممكن ترد عليا ان تقول مثلا انك عايزه تفيد غيرك بافكراك وتتكلم عن حاجه جواك
اوك مفيش مشاكل انك تعمل كدا بس من غير ما تشوه حاجه جميله كلنا بنحبها ومؤمنين بيها
حاجه اخيره عايزه اقولها
انت اتكلمت في البوست دا عن شيوخ استحاله يكونوا زي ما اتكلم عنهم
ياريت قبل ما تنشر حاجه تتاكد منها

Che The Hermit said...

طيف الاماني

الكلام انا واثق منه لسببين ان المصادر موجودة ولو كلامها غلط اللى اتغلط فى حقه يقدر يرفع دعوة تعويض بملايين ع الجريدة دي حاجة التانية الكلام اللى بسمعه وبشوفه من الشيوخ دي وعلشان كدا انا واثق م الكلام

اما عن حكاية انى بكتب عنهم ع البلوج وبشوه سمعتهم فدا مكانش هيحصل لو هما بيراعوا الدين فى اللى هما بيعملوه اصلا مش واخدينه تجاره والسلام

اما الاسلام فدول مش صورته ولم ولن يكونوا ولو حد سمحلهم انهم يعبروا عن الاسلام فانا وغيري كتير رافضين دا ان هما يبقوا الصورة بتاعتنا

وبعدين انا حطيت الموضوع باللينكات اللي فيها الكلام دا م الجرايد وكل واحد عنده عقل وهيفكر هل الكلام دا صح ولا لأ انا بكتب افكاري هنا وكل شخص له حق انه يختلف او يتفق مش بجبر حد انه يؤمن بيها

اما عن انى بشوه منظر الناس دي فهو اصلا مشوه بسببهم هو واللى بيحبهم ومرمن بيهم اوكي يا يختلف معايا ويقولي رأيه ونتناقش فيه او ما يقراش الموضوع

حاجة اخيرة
الشيوخ دول مش آلهه ولا انبياء علشان نقول انهم مش كدا ع العموم انا حاطط اللينكات لكل حاجة واللى مش عايز يقتنع او شايف ان الكلام دا كدب علشان المؤامرة العالمية الكبري لهدم الاسلام فهو حر

تشي