صور قاتمه


الأسبوعين دول انا مطبق فى الزقازيق يعني ما روحتش البيت
بس نزلت وسط البلد علشان احضر حفل توقيع كتاب تهامي اللى فى عمر بوك استور
وانا رايح م الزقازيق للقاهرة وانا راجع شوفت كام منظر اضايقت اوي الصراحة وكمان افتكرت كام موقف عدوا عليا ما يتنسوش ومواقف تجرح اوي وتضايق كتير
هبدأ بالمواقف اللى عدت عليا النهاردة
اول موقف قبل ما اتحرك م الزقازيق
نازل م التاكسي عند الموقف لقيت ولاد كتير م اللى بيعيشوا فى الشارع بصراحه كنت مضايق قوي ( عليهم مش منهم ) بس مقدرتش اعمل حاجة
شوية روحت اشوف الحجز لقيت لسه فاضل يجي ساعة وربع قلت اجيب حاجة اكلها جيبت باكو بوريو لأني اصلا بعشقه
المهم شويه ولقيت بنت من اللى قابلتهم لما نزلت بصت في باكو البوريو اديتهولها وانا مضايق اوي على الولاد دول كلهم اللى في الشارع وكل يوم والتاني الحكومة دايرة تقول مفيش مشاكل
امال يا ربي دول ايه بس دول مش مشاكل
دول تقدم ورقي
*****
دي واحدة ، التانية وانا فى المترو
نزلت كلية الزراعة قبل عبود وركبت مترو للسادات وانا راكب لقيت واحد قاعد وبنته الصغيره علي حجره
الراجل يبص لبنته ويبوسها وبعدين يقعد يكلم نفسه ويقلب ايديه وكان خلاص شكله هيعيط وكل شوية يبص للبنت ويبوسها ويضمها ليه اكتر
بجد المنظر كان صعب اوي اوي ومكنش عايز توضيح ان الراجل طحنته رحاية الدنيا وخايف على بنته من مستقبل اقل ما يقال عنه انه اسود سواد ليله من غير نجوم ولا قمر
ما بقيتش عارف اعمل ايه ساعتها الراجل صعبان عليا اوي بس اى تدخل منى معناه جرح لكرامته ومقدرتش اخليني ابطل اتابعه وما ابصش عليه وعلى بنته اللى زى القمر واللى شكلها بيقول ما كملتش تلات سنين على بعض
معرفش الراجل كان بيفكر في ايه بالظبط بس اكيد كان خايف
خايف م الاسعار وخايف البنت تنام من غير عشا وخايف وخايف وخايف
وكل يوم والتاني الحكومة طالعه تقول الحياة حلوة وميت فل وعشرة
*****
التالتة دي من قبل كدا والاخيرة علشان ما اتعبكوش معايا
المرة دي كانت وانا مع بابا ساعة مولد النبي اللى فات دا
واحدة جاية تشتري حلاوة المولد لولادها ومعاها ابنها الصغير الست عايزة تشتري لولادها حلاوة بصت على حلاوة كويسة ونضيفة بس للأسف طلعت غالية اشترت م الرخصية ... الرخيصة اللى هى انشف مال حجر وما تتاكلش وما حدش يرضي يبصلها اصلا بس هتعمل ايه يعني ما هى لازم تأكل عيلها علشان ما يبصوش لبرا وما يطلبوش حاجة من ايد حد وفى نفس الوقت معهاش اللى يخليها تشتري الحلو
نظره عينيها بجد جرحتى اوى ومكنتش عارف اتصرف فى وقتها
فكرت فى الموقف بعدين لقيت انى كان ممكن اتصرف واديها اللى هى عايزاه الحلو ومن غير ما اجرحها او احسسها بانها محتاجه بس ساعتها مقدرتش اخدت هى الوحشة ومشيت وانا مضايق اوي
لحد دلوقت زعلان من نفسي انى معملتش الصح وما اديتهاش الحاجة الكويسة وبتمني الوقت يرجع من تاني علشان اعمل دا لكن تفكيري ما اسعفنيش ساعتها
ربنا يسامحنى لو كنت غلطان
بس بعيد عني انا
فين الدولة والحكومة من كل دا
ليه فى ناس بتاكل اكل محدش يرضي يأكله للحيوانات اللى عنده
ليه فى ناس اصلا مش لاقيه تاكل
ليه فى ناااااااااااااااااااااااااااس كتييييييييييييييييييييييييييير اوي بتنام من غير عشا وبتصحي من غير فطار
انا مضايق اوي وكاره الدنيا اوي وتعبان اوي
حتى حسبي الله ونعم الوكيل بدأت افقد الامل انها تنفع معاهم ( انا مش بكفر لا سمح الله بس ما بقتش عارف اعمل ايه )
انا زهقان

26 comments:

Ahmed Al-Sabbagh said...


والله يا احمد انت انسان مرهف الحس

واخلاقك نبيلة

فعلا الحالة محزنة اوى ودول بنشوفهم كل يوم ليل نهار فى كل مكان

بس يمكن من كتر الواحد ما عنيه اتعودت على منظر الاطفال الصغيرين اللى نايمين فى الشارع ما بقاش يتأثر زى الاول
:((

تحياتى لك
احمد

زهرة الحب said...
This comment has been removed by the author.
أسامه يوسف said...

بص يا احمد
انت حساس وده كويس
والمفروض الناس كلها تكون زيك
الحال دلوقتى فعلاً يخلى الواحد يعيط
الناس دى ليه كده
والحكومه دى سايباهم ليه
وازاى الحال وصل بينا للدرجه دى
و بردو الناس غلطانه
فيها ايه لما الاقى واحد صغير مش لاقى ياكل باصص لحاجه مش هتفرق معايا
البوريو اللى بربع او بنص جنيه مش هيفرق معاك
لكن ده ممكن يكون وجبه كامله ليه

حاجه تحزن

طاب احنا زى ما لمينا من بعض فى المدارس لمستشفى السرطان ليه مش كل طالب يدفع جنيه فى المدرسه ونكون مبلغ محترم من مدارسنا وجامعتنا ونساعد بيه الناس دى

بس المشكله هندى الفلوس دى لمين

احنا نبدأ حمله من عندك من هنا وفكر فيها

تحياتى
وربنا يحفظنا ويحفظ اطفالنا وقرايبنا
اسامه

marmar said...

بجد يا احمد حاجه كويسه انك تحس بالناس دى

والله انا فكرت فى الموضوع ده كتير

ويتضايق اوى اما بكون قاعده فى الجامعه الكبيره مثلا ويجى عيل يبيعلك مناديل مثلا ويقعد يتحايل عليك انك تشترى وواحد تانى يقعد يقولك والنبى خد منى عايزة افطر

وحصل موقف استغربت ليه جدا
فى مرة وحده كانت بتبيع مناديل وقالتلى خدى والكلام اللى بيقوله ده اديت لها فلوس وقولتلها مش عايزة انا معايا قالتلى خلاص مش وخده الفلوس وسبتهالى والله ساعتها كنت هعيط خلاص وقمت مشيت وراها وخدت منها المناديل علشان تاخد الفلوس وتشترىى مناديل جديده تبيعها
شفت مع انها محتاجه بس مرضيتش تخد الفلوس من غير مقابل

بجد بيحصل حاجات من دى كتيييييييير
وبرده صعب اوى انك تكون بتاكل حاجه وتشوف عيل بيبص ويكون نفسه فيها

بجد الواحد مش بيقدر يعمل حاجه غير انه يساعدهم او يبص يتحسر عالناس دى ويوم ما بتقول ااننا عملنا حاجه بنكون دعينا ليهم

مش عارفه ازاى الحكومة سايبه ده كله ومهتمه برغيف العيش يبعوه ازاى
شويه يبعوه فى اكياس وشويه يوصلوه للبيت
حاجه تقرف بجد

بجد حسبى الله ونعم الوكيل

يلا ربنا يرحمنا جميعا

mohand said...

مواقف تتعب القلب

بس حسبي الله ونعم الوكيل تصلح


متقلقش قريب ربنا هينتقم


تحياتي

Che The Hermit said...

الصباغ باشا

ربنا يخليك بس اوعي التكرار دا يخلي قلبك يبقي اقسي بل العكس المفروض يخليك ترق عليهم وتعطف اكتر

تحياتى
تشي

Che The Hermit said...

زهرة حبي انا
انتى اجمل حد فى الدنيا وحبي ليكي اكتر من اى حاجة فى الدنيا

والمواقف دي كتيرت اوي بطريقة تضايق انا ذكرت تلاتة بس ومقدرتش افتكر تاني

بس الناس مش حكاية قلوبها بقت زى الحجر بس كل واحد اللى فيه مكفيه وكل واحد بيقول ياللا نفسي وياللا ولادي واللى ورايا مسئوليتهم

وفى الاول وفى الاخر ايه ما اهو الامل الوحيد ربنا
ما بقاش في حاجة اعرفها ممكن تتعمل بس بردو لن يغير الله ما بقوم حتي يغيروا ما بأنفسهم
ربنا يتولانا برحمته يا رب

حبي
تشي

Che The Hermit said...

اسامة باشا
مش عارف مش لازم الناس كلها تكون زي بس الناس كلها لازم يكون عندها عقل وتفكر فى الناس دي

انا بردو معاك ان الحكومة والناس غلطانين
لكن غلط الناس فى الاصل مترتب على غلط الحكومة صحيح كله غلط بس بردو لازم يكون فى تصرف م الحكومة
والمشكلة فى البوريو او غيره بتاع دلوقتى
المشكلة فى بعد كدا هتاكل دي وغيرها منين
وعلى فكرة حكاية لم الفلوس دي فاشلة جدا ومش موضوعنا دلوقتى بس المشكلة زى ما بتقول مين هياخد الفلوس ومين يضمن انها تتصرف صح
الحملة دي عايزة شغل جامد واوعدك إن شاء الله لو قدرت اعمل حاجة هعملها

تحياتي وربنا يستجيب منك ويحفظ الناس كلها
تشي

Che The Hermit said...

مرمر
الموقف اللى حكيتيه دا بيدل على انهم عندهم كرامة يعني مش بيطلبوا حاجة غير لو محتاجين قوي وحنا محتاجين نفكر فيهم اكتر

بس فى حاجة مهمة اوي
م العيش كمان مهم
يعني انتى عايزهم يسبوهم من رغيف العيش
اصلك ما شوفتيش اللى بيحصل واللى بيموتوا فى الطوابير
الحكاية كلها هم فى هم وربنا يستر بجد

تحياتى
تشي

Che The Hermit said...

مهند
دايما انت كدا السهل الممتنع
كلامك ما قل ودل
ماشي يا سيدي
حسبي الله ونعم الوكيل ويا رب يكون الانتقام قريب علشان الناس بدأت تجيب اخر
بدأت ايه
دا هى جابت اخر خلاص

تحياتى كتير
تشي

صفا said...

المواقف دى كل يوم بنشوفها
ماشى الحكومة غلط والناس غلط وكل واحد بيقول وانا مالى الحل ان كل واحد يقدر يعمل حاجة يعملها لان بالاسلوب اللى الكل عايشة دلوقتى هنضيع اكتر م احنا ضايعين والناش دى هتضيع اكتر وبدل متحاول توصل لانها تكسب من الحلال هتسرق لانها مهيبقاش قدامها حل تانى

HaMaDa 3aFshA said...

احمد حبيب قلبى والدماغ الكبيرة الواد المصراوى بجد اسمحلى ارد
والله الكلام اللى انت قلته والمواقف دى مواقف صعبة ومؤثرة وتدمى القلوب بجد وفيه اصعب من كده كمان بس الناس ما بقتش بتشوف او ما بقتش عاوزه تشوف كله بيغمى عنيه ويقول انا مالى ...............
وانت مالك ازاى ؟؟؟؟؟؟؟؟ "من لم يهتم لامر المسلمين فليس منهم"
"المسلم للمسلم كالبنيان يشد بعضه بعضا"
خلاص الرحمة راحت من قلوبنا القلوب قست وغلظت فين الدموع اللى بتنزل من خشية الله
وكلنا بيقول الحكومة ما احنا بقالنا مية سنة بنقول الحكومة وما بيسمعوش لينا يبقى نبتدى احنا نغير قلى ازاى؟
اقلك علماء الاقتصاد بتوعنا قالوا لو كل واحد من اغنياء المسلمين خرج زكاة ماله المفروضة عليه لن يبقى فقير واحد فى الدول الاسلامية وعاملين دراسات واحصاءات بكده
لو كل واحد فينا طبق سنة النبى والمنهج الربانى مش هتشوف كده كلنا هنحس ببعض وهنقف جمب بعض مش هتهنأوجارك فقير لسه ما اكلش ولا لبس انت متغطى وهو عريان
لان لو طبقت المنهج صح هتلاقيه بيقول"مازال جبريل يوصينى بالجار حتى ظننت انه سيورثه"
ولما انا ارعى جارى وانت ترعى جارك هنلاقيها سلسلة مترابطة
لو كل واحد اجترم الكبير وعطف على الصغير والتزم باداب دينه مش هيبقى فيه مشكلة
فيه حديث قدسى بيقول فيما معناه"انا الله قلوب الملوك فى يدى اقلبها كيف اشاء فان اطاعنى العباد حولت قلوب ملوكهم عليهم بالرأفة والرحمة وان عصونى حولت قلوب ملوكهم عليهم بالغلظة والقسوة فلا تشغلوا انفسكم بالدعاء على ملوككم ولكن اشغلوا انفسكم بذكرى "
يبقى نطيع ربنا هيحول قلوبهم علينا بالعطف والرحمة مش الحكومة اللى بتقتل فى بعضها على طوابير العيش ولا هما اللى بيقتلونا احنا اللى نقتل بعض بايدينا هو اللى واقف معاك فى الطابور داذنبه ايه وما تقلش من اللى شايفينه ما هما لو تخلقوا باخلاق الاسلام كانوا هيتحملوا بعض وما تزعلش نفسك على موضوع الحلاوة ما كانش مقدر ليها تاكلها ولا انت مقدر ليك تاخد الاجر ده وادعى ربنا ييسر لنا الامور ويكشف لنا الكروب ويخرجنا مما نحن فيه

Che The Hermit said...

صفا
تقريبا كلنا غلط بس محدش عارف يعمل الصح
لازم حد يوجه الناس كلها لحاجة صح تتعمل مش كل واحد مع نفسه المشكلة اننا لازم نجتمع علشان نلاقي حل واحنا ما بنجتمعش غير على حاجات تافهه ولا تسوي
ع الكورة
ع الافلام
ع الراقصات
لكن حاجة محترمة مفيش

لك الله يا وطن يتداعي

تحياتي
تشي

Che The Hermit said...

احمد باشا عفشة
عارف كلامك حلو اوى وزي الفل بس انت بتكلم مين
بتكلمني انا ولا بتكلم مين ما انا زي زيك زي اغلب الناس من الطبقة الوسطى اللى قربت تضمحل والواحد ما بقاش فى ايده حاجة يعملها الزكاة والكلام دا لو لسه البلد شغاله بشرع ربنا لكن القانون يختلف عما انزل وكلامك ما ينفعش يتطبق دلوقتى لان القوانين كلها دلوقتى بتصب في مصلحة اشخاص بعينهم
يا عم احمد الدنيا بقي كل واحد فيها بيدور على رزق عياله
قولي انت لما واحد عياله بيناموا من غير عشا هيبص لحد تاني ولا هيدور مين تاني مش لاقي ياكل ما كلنا فى الهم سوا ومحدش يعني احسن من حد
لما واحد وهو بيقبض مرتبه بيفكر هيكمل بيه نص الشهر ازاى عايزة يروح يتبرع ولا يدفع لحد حاجة
وبعدين الحديث القدسي انا معاك فيه ولن يغير الله ما بقوم حتى يغيروا ما بأنفسهم لكن دا ما يمنعش ان الحكومة غلطانة تماما والغلط راكبها من ساسها لراسها
وانا الصراحة مش بحب نظام اننا نقول ربنا وما نعملش حاجة دا

بص الموضوع كبير اوي
بس يا ريت يكون رائي واضح

تحياتى
تشي

mesh2dra said...

السلام عليكم

ياااه يا تشي
مفيش مشاكل
دى حكومتنا نايمة في العسل

انت عايزهم يبصوا لشوية شعب
انت اكيد بتهزر

الحكومة معمولة من اجل انهم يحلوا مشاكل الناس اللي ليها شعبية
الحضري مثلا
انما شعب ايه اللي انت بتتكلم عنه

خالد الجندى تقريبا
قال انه نزل منطقة في المطرية
منطقة قحط وعشوائية
بيدي التاحة للبنت
البنت خافت
ماشافتش شكل التفاحة مش ما اكلتهاش

حسبي الله ونعم الوكيل الف مرة

Anonymous said...

بص يا أحمد لازم تبطل تشوف الحاجات دي ..
لأنها موجودة بكل حتة وبكل مكان .. موجودة بكل شارع وتحت كل ستار وبجانب كل زاوية وعند أول تقاطع وتاني تقاطع وعاشر تقاطع ..
الحاجات دي مش هتعرف تعمل فيها حاجة وكل اللي هيحصل إنك هتحرق دمك وتتضايق وتحس إنك مش قادر تعمل حاجة ..

هتقدر تساعد واحد ؟اتنين ؟ عشرة ؟ وبعدين .. الدولة لازم تساعد الملايين التانية دي لأنك لا أنت ولا أنا ولا خمسين معانا نقدر نساعدهم كلهم ..

ساعات أحنا نفسنا محتاجين حد يساعدنا
Ahmed
www.ahmedism.co.nr

YOTTA said...

بعد المشاهد المشرقة دى
اللى لونها بمبى بمبى بمبى
وتقول معندكش امل وقرفان وزهقان؟؟
!!
لا مالكش حق
!
;)

Che The Hermit said...

مش قادرة
عاش من شافك
بجد تعليقك دايما بيبهرني فعلا مشكلة الحضري اهم كتير م مشكلة الناس دي والناس دي ليه الحكومة تبصلهم اصلا

هم يبكي وهم بيكي برضو

تحياتى
تشي

Che The Hermit said...

أحمد باشا
انا محتاج حد يساعدني اه
بس مش معني كدا انى ما اساعدش بص انا هساعد لحد ما اموت
احمد قال فى تلعيق من اللى فوق من لم يهتم بأمر المسلمين فليس منهم

لازم تكون عندنا النية الصادقة علشان نعمل حاجة

تحياتى كتير
تشي

Che The Hermit said...

يوتا
اصل انا ما بيتمرش فيا
زى اغلب الشعب بتاعنا
معلش ربنا يصبر الحكومة علينا

:P

تحياتى
تشي

Traveller said...

ازيك يااحمد والله على قد ماالكلام دة بيحصل قدامنا كل يوم وبيتعب الواحد نفسيا علىقد مااسلوبك فى نقل الواقع بصورة حيه خلانى اتعب نفسيا زى مااكون شايف المواقف دى قدام عينى ربنا ينتقم منها الحكومه الفالصو بتاعتنا والناس اللى زمتهم اوسع من المحيط الهادى نعمل ايه غير اننا نقول حسبنا الله ونعم الوكيل واكيد الناس اللى بتنام من غير عشا وتصحى من غير فطار ربنا هيشملهم برحمته وباشكرك على اسلوبك الرائع مرة تانيه
سلالالالالالالالالالالالالالالامى

Che The Hermit said...

سمير باشا
اسف لو كان الكلام قاسي او يضايق او يجرح بس دي حقيقة قدامنا

والحكومة فعلا غلطانة بس احنا كمان غلطانين والمفروض يكون لينا موقف

ياللا ربنا معاهم ومعانا احنا كمان

تحياتى
تشي

a7mad said...

على فكرة انا برضه بشوف حاجات من دي كتير كل يوم وانا رايح الجامعه....وبشوف برضه مناظر تانية تقطع القلب في مستشفى الجامعه...
بشوف الناس اللي بتدخل الكلية وتقعد تدور على متبرعين بالدم...وبشوف الناس اللي بيموت لهم حد بيبقوا طالعين من المستشفيات عاملين ازاي
واللي اكتر من دا كله الاطفال اللي عندهم سرطان....انا رحتلهم مرة واحده وبعد كدا مقدرتش اروحلهم تاني

وغيره كتير
بس هنعمل ايه هي بلدنا كدا...
وعالجانب الاخر في بورتو مارينا واكبر مول في الساحل الشمالي واكبر ملاهي مائية واكبر وافخم واوسع...الخ
حاجة تكسف والله اللي احنا فيه

Che The Hermit said...

احمد باشا
لقيت فعلا ان المواقف اكبر من ان تعد اوتحصي كتير ببشاعة يعني
بس هنعمل ايه لازم نعمل ونعمل كتير اوي كمان

وبالنسبة للجانب الاخر .... فعلا حاجة تكسف

تحياتى
تشي

ميار said...

والله يااحمد انت بجد زعلتنى اوى من نفسى لانى من الناس الى مرفهين اوى فى حياتهم بس انا والله مشوفتش ناس من دول يمكن لانى مش عايزة اشوفهم مش عارفه بجد
ولا يمكن لانهم قليلين اوى فى بلدى او فى المنطقه الى انا عايشه فيها مش عارفه انا بجد زعلانه اوى من نفسى
ايه يابنى الى انت عملته فيا ده انا مش قادرة امسك دموعى
بس انا والله فعلا مشوفتش ناس من دول بس ده تقريبا قليل اوى فى بلدى على فكرة انا من دمياط

Che The Hermit said...

ميار

ياه دا كويس والله فى ناس بتدور فى المواضيع القديمة اهو

ممممممممممممممممممممممممممممم

مش عارف السبب بالظبط بس ممكن اقولك مش بتحبي تشوفيهم او بتشوفيهم بس بتعملي مش شايفاهم علشان ما احتكتيش بيهم ما بيعلقوش فى الذاكرة

حاولي تعملي حاجة لو شوفتي حد من الناس دول

نورتي البلوج
تحياتي
تشي أحمد