سقوط فى مكتبة الاسكندرية

فهمي ، سمير ، أنا ، عنتر ( بالترتيب حسب الظهور فى الصورة من اليمين للشمال )


انت تكون فى الاسكندرية
تغير جو وناس وكل حاجة
انها النشوة اللى انتظرها منذ بدأ الخليقة
أنا وصورة على سهوة ( نسبة إلى على سهوة ليه من اغنية السيدة إليسا ) وانا بتأمل البحر وأنظر إلى المجهول من قصاد مكتبة الاسكندرية


ريحة البحر والناس اللى بتصطاد والحبيبة اتنينات ع البحر والهوا اللى يطيرك اتنين كيلو متر واجمل صحبة فى الدنيا
تلاتة من اجمل ايام فى حياتى تقريبا ( لو استثنينا منهم بعض ساعات قليله )
لو اتكلمت هتلكم كتيييييييييييير اوي اصل الايام كانت جامدة موت

أول يوم روحنا مكتبه اسكندرية ولفيناها حته حته ووقعت انا هناك حته وقعه ع الارضية الباركيه
التلاتة زمايلي واقفين وانا بظبط الكاميرا والسيلف تايمر وطالع اجري علشان الحق الصورة وهوووووووووووووووووووووووب روحت متزحلق ع الارضية واخدت حته وقعه ..... لكن ميييييين ما يقع إلا الشاطر قومت فى ثوانى واخدت الصورة معاهم بردو صحيح كانوا هما ميتين على نفسهم م الضحك بس انا كنت واقف ف الصورة عااااااااااادي جدا

خرجنا م المكتبه وطلعنا ع القلعة بس ما دخلنا قضيناها برا ع البحر وفضلنا لغاية غروب الشمس وبعدين طلعنا ع المنشية عند نصب الجندي المجهول قعدنا شوية هناك وبعدين طلعنا على ماكدونالز اتعشينا وشربنا ميلك تشيك الجااااااااااامد وبعدين رجعنا عند الواد فهمي قضينا عنده الليل بنلعب برو إيفيلوشن سوكر ونيد فور سبيد

تاني يوم طلعنا على كوبري ستانلي وقعدنا هناك شوية كتير واخدناها مشي لغاية ستيفانو وروحنا الجراند مول لفينا شوية وبعدين رجعنا على ماكدونالز شربنا ميلك تشيك تاني ومشينا روحنا عند الواد فهمي بردو

طبعا المواقف اللى فى النص واللى لا تنسي كتير بس اللى يفتكر بقي كويس قوي كدا عليكوا وتتكرر إن شاء الله

صحيح قبل ما امشي جمله شوفناها فى سان جيوفاني ( عدينا من قدامه بس ما دخلناش بلاش ذكاء احنا مش ولاد وزرا هنا ) والجملة بتقول :

" وما قصر من الاعمار طول السهر "

الجملة داخله دماغى اوي اوي يعني
تحياتى كتير
تشي أحمد

30 comments:

A7MeD F@hMy said...

مممممممممممم
يا رب تكونوا اتبسطوا يا مستر تشي
يا ريت تتكرر قريب
مستنييييييييييييييييييييكوووووو
كانوا يومين جامدين جدا و كسبتك برضو
هههههههههههههههههه
و لا موست وونتد الواد سمير مسخرة
ههههههههههههههه

gehad_fci said...

ربنا يفرحك كمان وكمان يا احمد
بس هي الصوره دي كانت علي سهوه ولا علي شاي ههههههههههههه
ماشي ياعم يعني قضيت شم النسيم واحنا كنا عمالين نشم في صوابعنا
ناس محظوظه
سلامي

mohand said...

مين قال انه مش بيقصر في الاعمار

يا راجل مسمعتش عن اضرار السهر وانه بياثر علي العين والمخ والحاجات دي كلها

عموما نورت الاسكندرية

واديك انبسطت شوية

تحياتي

marmar said...

ههههههههههههههه

اخيرا روحت الكس ده انا سمعت عالفسحه دى من زماااااااان

وربنا يبسطكم يارب وتفضلوا صحاب كده على طول

عموما كل سنة وانت طيب مع انها متاخرة حبه ونصف

سلام

..??!! A.3nter !!؟؟.. said...

حبيب قلبي تشي

ببعتلك سلامي وبقولك بجد كانوا أجمل يومين في حياتي وحسيت إننا قريبين جداً بس الحمد لله إنك محطتش الصورة بتاعة المكتبة لما وقعت كان شكلي فيها زبالة ههههههههههههههههه بس والله فرحت بيكوا أوي والجو كان رهيب جداً وجميل كان ناقص ننزل البحر بس ملحوقة وإن شاء الله تتكرر في الصيف ودة إجبار علشان عيزين ندخل القبة يا كسالي طبعاً فاهم ههههههههههههههه
سلامي ليك وللجميع

Ma7moud So3ody said...

انا باحسدك يا واد يا احمد
بجد بجد يا بختك
انا بقالي كتير مشفتهاش
وخايف تكون زعلانه مني
تيجي نروح سوا؟
:)

بحبك

ahmedomar said...

ربنا يوعدنا يا عم

بحقد عليك

هههههههههههههههههههه

ربنا يفرحكم كمان وكمان يارب

وعلى فكرة احلى اوقات نقضيها واحنا فى الجامعة لانها مش هتتكرر تانى ابدا

صفا said...

واضح انهم كانوا يومين جامدين
ربنا يفرحكوا كمان وكمان
ويا بختكوا
مش باحسد انا باحقد بس
ههههههههههه

HaMaDa 3aFshA said...

الحمد لله انكوا اتبسطوا
بس ما تقعدش تحكى كتير عنها انت عارف كان نفسى اجى تبع الاتفاق بس والله حصلت ظروف هى اللى عجزتنى فما تحكيش علشان ما تزعلنيش واقعد احسد واحقد وكده بلاش احسن دى حسنة داريها بقى

Traveller said...

تشى
ازيك يا مان
common ca va?
عود احمد الى القاهرة والله بجد انا ماشوفتش يومين اجمد من اليومين دول
بس انسى احلى حاجه الوقعه بتاع المكتبه وكمان الميلك تشيك بتاع ماكدونلز وانسى كمان انا بس اللى هاحط صورة سان جيوفان لانى انا اللى اتعشيت فيه
هههههههههههههههههه
سلالالالالالالالالالامات
Samir The Traveller

Che The Hermit said...

فهمي باشا

اكيد اتبسطنا إن شاء الله تتكرر قريب بس فى البرو إيفليوشن سوكر انا اللى فوزت والفارق كان ليا بماتشين

Che The Hermit said...

جهاد باشا
ويفرحك انت كمان يا جهاد والدنيا كلها
وماكلش دعوة بالسهوة بتاعتي لو سمحت يا جهاد
واحنا والله طلعنا الطلعة دي علشان كام اجازة ورا بعض مش شم النسيم يعني

Che The Hermit said...

مهند باشا

انا اهو سهران لغاية اذان الفجر وما حصلش حاجة يا سيدي سيبها لله وهى تمشي

واسكندرية كانت منورة بأهلها وكويس انى اتبسطت بس كنت هتبسط اوى لو شوفتك والله
المرة الجاية بقي تتعوض

Che The Hermit said...

مرمر

اخيرا
شوفتى المعاناه اللى احنا فيها اصلا ولكننا اخيرا روحنا
ربنا يسمع منك ونفضل دايما اصحاب ومبسوطين
ومايهمكيش مفيش حاجة متأخره

Che The Hermit said...

عنتر باشا

يا رب تكون دايما كل ايامك اجمل ايام يا جميل

والبحر خليها للمرة الجاية إن شاء الله

والقبة بقي والله تعتمد على السهر فى اليوم اللى قبلها ربنا يسهل بقي

Che The Hermit said...

سعوووووووووودي

ايه يا عم حودة مفيناش من حسد يا مان

بس تعرف المرة الجاية انا موافق نروح مع بعض

هتبقي جامدة اخر حاجة

بحبك

Che The Hermit said...

عمر باشا

يا سيدي ما ربنا وعدكوا بالعريش يا عم

ربنا يفرحك انت كمان والناس كلها دايما يا رب
وفعلا احلى اوقات اوقات الجامعة يا رب تدوم كل الايام احلي ايام بس مش فى الجامعة :D

Che The Hermit said...

صفا

كانوا فعلا جامدين جدا
ربنا يفرحك انتى كمان والبشرية جمعاء بس بلاش حقد وإلا هسحب دعوتي :D
خلاص مش هسحبها

Che The Hermit said...

احمد باشا عبد الوهاب
يا سيدي والله كانت ناقصاك انت والشخصية الحيوانية اللى اسمها رامي
بس انا هحكي كتير علشان بعد كدا تحترم اتفاقياتنا العظمي وتولع اى حاجة تاني

بس معلش تتعوض إن شاء الله واديني داريت الحسنة اهو

Che The Hermit said...

سمير باشا ذا ترافيلير

هو عود اه احمد مش اه
بس فعلا كانوا يومين جامدين جدااااااااااا
وبلاش سيرة الوقعة دي تاني بقي كتم ع الموضوع
والميلك تشك اتكلم براحتك فيه انا واخدت من ماكدونالز سعر الاعلان مقدما
وصورة سان جيوفاني اللى انا مصورها ملكش دعوة بيها وبلاش فشر وتقول اتعشيت ليه انت ابوك وزير وانا معرفش ياد

دا انت حتى منوفي

أسامه يوسف said...

سؤااااااااااااااااااال
انت خلصت امتحانات ولا إيه
انا مابارخمش والله بس انت مظبط نفسك
وانا مخنوق اليومين دول علشان جدولى نزل وهاخلص 4/6 (أنا حقوووووود)
عالحموم مبروك عليك يا عم اليومين الحلوين دول مع الشباب
برو ايفوليوشن
ماشيه معاك يا عم
----------------
شكراً يا باشا عالكلمتين اللى فى حقى تحت وانا مش عارف اقولك ايه والله
---------------
عندى ليك خبر وحش عندى
انا تراجعت عن قرارى

سلام

Che The Hermit said...

اوساااااااااااااامة
لا يا عم لسه ما خلصتش والله بس لازم الواحد يظبط نفسه بدل العيشة اللى احنا عايشينها دي
وبلاش تتخنق وخليك دايما فاتح للدنيا ايديك
وبلاش حقد كمان هو انا هلاقيها منك ولا من اللى علقوا قبل كدا

والكلمتين دول حاجة بسيطة خالص وهيتحققوا بإذن الله

والخبر الوحش دا حلو اوى على فكرة :D

بحبك
تشي

Ahmed said...

هاهاهاهاها

لا أطال النوم عمرًا ..
ولا قصر في الأعمار طول السهر ..

..
فيروزتقول :
سهار بعد سهار ..
تـ يحرز المشوار ..

:)

Che The Hermit said...

احمد باشا

يا سيدي دا انا بنتظر تعليقك دايما

فعلا لا اطال النوم وعمرا وربنا يخليلنا فيروز وصوت فيروز واغاني فيروز

بحبك

mohand said...

ارجو المرور علي اخر موضوعاتي في مدونة الباحث عن الحقيقة يهمني رايك
تحياتي

Che The Hermit said...

اوكي علم وينفذ يا افندم

yomna said...

ايوة يا عم...اسكندرية و بحر و هوا يرد الروح و مكتبة و... بلاش بقى لحسن تكون بتفتكرني بقر و لا حاجة

بس بجد يا بختك....يامين يودينا اسكندرية دي دلوقتي في الجو ده

Che The Hermit said...

المعلم يمني بنفسه عندنا
يا مراحب يا مراحب

اهو من كتر القر الواحد هيروح منه احساس اليومين اللى قعدهم
بهزر طبعا المعلم يقول اللى هو عايزة ومحدش يرفع بقه

وممكن نعمل رحلة لكل البلوجرية ولتذهب الامتحانات والدنيا كلها إلى الجحيم

تحياتى
تشي

YOTTA said...

ايوه الناس الرايقة اللى مروقة نفسها دى
وانا هنا باسيح من الحر ومحتاسة وسط الورق والكتب
يلا يارب دايما مبسوط كده
..
صحيح شكرن ع الكلمتين بتوع كلمتين وبس
دايما كده رافع من معنوياتى
:D

Che The Hermit said...

يوتا

والله ولا رايقة ولا حاجة
ادينا عايشين اهو وبنذاكر " او المفروض بنذاكر " ويا رب انا وانتى والدنيا كلها مبسوطين

والكلمتين دول دول حاجة جدا صغيرة خالص

تحياتى كتير
تشي أحمد