مذاكرة ... مستحيل

الاسبوع دا اللى المفروض انه فى حساباتي انه اصبح منصرم رغم انه لسه باقي منه يومين كاملين إلا انه خلاص ذهب
قضيت الاسبوع فى المدينة الجامعية وللعلم انا بكرهها جدا بس فعلا مجرد القعدة معه زمايلي والناس اللى بحبهم خلانى انسي كل واى حاجة وحشة فيها
اسبوع كامل هو اسبوع الميد تيرمات
اسبوع المفروض انه مذاكره طحن ما ذاكرتش اصلا
لا طحن ولا غير طحن للحق يوم واحد بس ذاكرت فيه
المهم بقي ايه يا سيدي
قضيت اسبوع تهيييييييييييييييييييييييييييييس
كنا حوالى عشرة فى اوضه ما تتحملش غير اربعه ويبقوا مش طايقين بعض بس شيلنا بعض وعملنا احلي تهييس الصراحة
حركات ومقالب وحيااااااااة جامدة ولتذهب المذاكرة إلى الجحيم
من اجمل المواقف الصراحة كان مع الواد سمير الجامد اللى كنت برخم عليه جامد جدا جدا بس هو ما كانش بيسكت وكانت ايده اطول منه بس كله كان تهريج
ولعل مما يذكر 3 زجاجات مياة تم تفريغهم على سمير فى إطار التهريج المتبادل وبردو اسقاطه من فوق السرير بتاعه رأسا بضربه قوية من قدمي تسببت فى ان ايده فضلت 3 ايام مش قادر يحركها ( أحسن يا مان )
اللي كان حكاية كان اخر يوم وكان علينا امتحان انجلش لكننا نفضنا له وقضيناها فى " الجونينة " بتاعه المدينة كان يوم مسخرة وكله اتضرب فى اليوم دا وقعدنا ولعبنا لعبة الصراحة وكل واحد قال رأيه فى الموجودين بمنتهي الصراحة كان يوم قشطة اوي يعني
وحشتوني والله يا شباب وياللا تتكرر مرة كمان بس ما تبقاش فى المدينة

كلمة لكل واحد قبل ما امشي


فهمي حبيب قلبي
انت عارف ان كلامي مش هيعبر عن حاجة عموما بحبك

احمد باشا عبد الوهاب
مطرقة بشرية ودماغ كبيرة ربنا يخليك يا كبير

سمير المهاجر
فى وجودك دايما بكون مبسوط

معتز " وزة :) "
ابن بلد وراجل بجد

رامي " يامي "
الفترة الجاية مهمة اوي خلي بالك واعمل لنفسك علشان محدش هيخاف عليك قدك

احمد عنتر
اعرف انت عايز تكون ايه الاول

صلاح " ابن الناظر " (لسه مش بلوجر )
فاكهة اي حاجة وكل حاجة بس إيده تقيله

مفيش حد نسيته كدا باين
كفاية كدا وكان فى كلام كتير بس هرب مني ونسيته
كويس اصلا انى كتبت البوست دا

تحياتى كتير اوي
تشي أحمد

12 comments:

A7MeD F@hMy said...

كان يوم جامد بجد و فعلا الصراحة اقصر الطرق
تحياتي

gehad_fci said...

والله احسن حاجه الصحبه الكويسه وان الاصحاب يشيلوا بعض
كان نفسي ابقي في مدينه جامعيه بس اللي حصل بقي
كانت عاوز اشوفكوا وانتو بتلعبو لعبه الصراحه دي
اكيد كان كله بيطلع اللي جواه

Traveller said...

احمد (جيفارا)او تشى مش فارقه معاى المهم انك حبيبى يا مان والله كان ايبوع يا صباح الهيبرة والتهييس اللى كان فيه اهم حاجه انى رجلى شبه مكسوررة من الضرب فى العضله الخلفيه منك لله بس بتصعب عليا لما بضربك بحس انى بضرب طفل صغير مع انك بتضحك وانا بضربك ربنا ياخدك ههههههههه
بس سيبك اجمد ليله هى بتاع الجنينه وملهاش حل وبعدين ماكانوش 3ازايز يعنى دول كلهم اتنين ووقعوا على الارض بس ولا يهمك حبيبى بردة
سسلالالالالالالالالالالالالام

HaMaDa 3aFshA said...

حبيب قلبى تشى اللى مش حزين هههههههههه كان يوم زى العسل بس انا ما افتكرش انى تقلت ايدى دى زغزغة هههههههه
ومتشكر يا باشا على وصفك الجميل وزوقك العالى وانت فعلا اخويا وحبيب قلبى ونخليها فى الله "والله انى احبك فى الله"

mohand said...

فكرتني بالذي مضي لما كنا نروح معسكر ونستغل فرصة غياب واحد فينا ونكب ازايز الميه علي السرير بتاعه وميعرفش ينام طوال الليل

واحد من اصحابنا صمم انه هينام برضه ومش هيخلينا نفرح فيه

جاله ارتهاب رئوي حاد

ايام بقي كانت جميله

Che The Hermit said...

فهمي باشا
فعلا كان يوم جامد جدااااااااا
وانت كنت صريح خاااااااااااااااالص

تشي أحمد

Che The Hermit said...

جهاد باشا
ايه النور دا كله
فعلا احسن حاجة فى الدنيا الاصدقاء وما روحناش بعيد ابقي روح مدينة السنة الجاية وكويس انك ما شوفتناش فى الصراحة كانت مسخرة وكله كان بيطلع القطط الفطسانة فى كله

تشي أحمد

Che The Hermit said...

سمير باشا
كان ايبوع هيبره اه ( انت بقيت ألدغ فى السين ولا أيه )
وعموما رجلك تتعوض وفدايا يعني انتوا عندكو كام تشي
وبعدين كانوا 3 ازايز يا نجم
وانت كمان حبيبي

تشي أحمد

Che The Hermit said...

احمد باشا عبد الوهاب
زغزغة ايه يا عم دا انا ضهري واجعني لحد دلوقتى
وماشي نخليها فى الله
انى احبك فى الله يا أخي

تشي أحمد

Che The Hermit said...

مهند باشا
ومضي ليه
رجع الزمان من تاني واعمل رحلة مع اصدقاءك وعييييييييييش
بس حكاية المية ع السرير دي فيها دبح يا عم انا مش قدها
وكمان التهاب رئوي يبقي الواد يموت بقي واشيل انا ذنبه
بس فعلا ايام جميلة طحن

تشي أحمد

أسامه يوسف said...

ماشى يا عم
مهيص انت والشعب كله متكحرت امتحانات

بس بينى وبينك احلى حاجه فى الحياه التنفييييض

تحياتى

Che The Hermit said...

اسامة باشا

مش مهيص منفض
واحلي حاجة التنفيييييييييييييض

سلامات يا جميل
تشي أحمد