الاعجاب والاتباع

الاعجاب والاتباع فرق كبير بينهم لكن منا اللى بيخلط بينهم وبيعتبرهم حاجة واحدة
الاعجاب لا يعني الاتباع لكن العكس صحيح
انا معجب بالشخص او بتفكيره او بطريقة تعبيره او بكتاباته الادبيه لكنى مش متبع تفكيره او طريقته وليا فكري الخاص وثقافتي الخاصة اللى بتتمحور حوليها حياتي
الاتباع انى اعجبت بشخص او بتفكير شخص واتبعته وسرت عليه
كمان احب اوضح ان كتير متبعين ملتهم مش باختيارهم لكن بانهم اتولدوا لقوا ابهاتهم مسلمين او مسيحين او يهود او غير ذلك ( محدش يقولي الفطرة وكدا وسيبوني اكمل كلامي ) احنا ما اخترناش احنا اتولدنا مخيرين الاختيار لما يجي الطفل لما يتولد نقوله الاسلام بيقول كذا والمسيحية بتقول كذا و..... إلخ ونقوله اختار بقي اللى انت شايفه اصح ويبقي كدا اختار الاتباع والاعجاب مش اتباع اعمي
اكمل كلامي واقول ان الاعجاب ما بيكونش بالشخص ككل لكن الاتباع هو اعجاب بشخص ككل والسير وراءه والسير على منهجه
مثلا انا متبع النبي محمد عليه افضل السلام والصلاة معجب بيه كشخصية كاملة اخلاقه وعقله وتفكيره وسلوكه فى مواقف مختلفه وبأختياري مش علشان انا اتولدت كدا
كمان انا معجب بالتشي مش معني كدا انى شيوعى
معجب بالرومي مش معني كدا انى صوفي معجب بصلاح الدين الايوبي مش معني كدا انى كردي
معجب بحسن نصر الله واحمد مطر مش معني كدا انى شيعي
معجب بسيد قطب وحسن البنا مش معني كدا انى اخوان
معجب بعبد الناصر ومش معني كدا انى اشتراكي
معجب ومعجب ومعجب والقائمة تطول ودا ما يعنيش ابدا انى متبع لمنهج اى منهم ولكني فقط معجب بشيء ما فيهم

يا ريت نعرف ازاى نفرق بين الاعجاب والاتباع
مش معني انه معجب بنوال السعداوى انه متبع تفكيرها مش معني انه بيحب النبي عيسي عليه السلام انه مسيحي أو كافر ( الكلام على مصطفي فتحي )
يا ريت نعرف ازاى نحترم اختلاف الاخر عنا
يا ريت نعرف نحترم بعض وعدم القاء الاتهامات جزافا
يا ريت نعرف نتحكم فى كلامنا
يا ريت نتعلم ثقافة الكلام
يا ريت ما ننصبش انفسنا حكام على البشر مكان الحكم الذي لا يموت ونكفر الناس على مزاجنا
تشي

19 comments:

مصطفى فتحي said...

عارف وانا عيني بتجري على السطور كنت حاسس انك بتتكلم الكلام اللى نفسي اقوله
عيني دمعت لما وصلت لنهاية الموضوع
كل سنة وانت
دايما
حر
وبتقول كلمتي
قصدي كلمتك
انا
بحبك

EGyptiaN GHOST هنا مدونة الشبح المصرى said...

VERY NICE & HAPPY EiD

Che The Mad said...

مصطفي فتحي
نورت
ياااااااااااه دا انا كدا هاخد مقلب فى نفسي دموع غالية قوي علينا يا درش
كل سنة والناس كلها احرار يا رب وكل واحد يقول كلمته وان اتشابهت كلمتي وكلمتك فدا شرف ليا
وانا كمان بحبك

الشبح المصري
هابي عيد ع البشرية كلها

تشي

mohand said...

السلام عليكم
قرأت تعليق حضرتك عند مدونة مصطفي
قولت ادخل ارد عليك هنا
لان عجبني انك علي الاقل رديت وهو مبيردش علي حد
انت قولت ليه مردتش علي مصطفي
هقولك علي اجابتي اللي مش هتقنعك وهتقولي انت دخلت جواه
مصطفي مش منتظر اجابة
مصطفي متبع منهج واحد ومش هيتخلي عنه
بيهاجم اي شئ اسلامي وبيعتبره تخلف وخلافة
عيب الشخص اللي زي ده انه عمره ما هيسمع
لانه خلاص وصف الناس دي انها فئة متخلفة لمجرد انها مختلفة
انا مثلا مش من المدونين الاسلاميين
ولا اتبع منهج معين في مدونتي
ممكن اكتب بوست اسلامي
وبوست ادبي وهكذا
لكن لما بيجي حد يناقشني بتكلم معاه
واوضح وجهه نظري
مصطفي بقي فعلا بيرمي الحجر ويجري
مش عارف هتفهمني ولا لاء
مصطفي متخيل نفسه انه عارف كل حاجه وبيحكم علي اشخاص وعلي مدونات وعلي اشخاص بانها متخلفة لمجرد انها مختلفة
طيب زي ما انت عايز تعيش وتوضح وجهه نظرك سيب غيرك يوضح وجهه نظره
اللي بيهاجموا مصطفي وانا شخصيا بقراء التعليقات وبشوف
بيكونوا بيردوا علي واحد بيجرح فيهم

وعلي فكره منهج الشخص بيكون واضح من كلامه
يعني لما حد بيقول لمصطفي يا علماني
هو بالفعل علماني
لان دا واضح من موضوعاته
وعشان كده مش جاوبت علي تساؤلاته
لانه مش منتظر اجابة
وبص علي موضوعاته السابقة
وردود الناس عليها
---------------------
اختلف معاك بقي في موضوع ان اللي معجب بافكار شخص ميكونش متبعه

تقدر تقولي ان الفنون مش مدارس؟
تقدر تقولي ان الادب مش مدارس
وان الصحافة مش مدارس

اقولك مثلا واحد مثلا في الشعر متبع مدرسة الشعر الحر
هو وصل لاتباع المدرسة ازاي
غير انه تذوق الشعر الحر وعجبة وابدي اعجابة به
وبعد كده اتبعه

الصحافة نفس الكلام

اللي اقصده انك لو معجب بافكار شخص هتكون واخد منها




حاجه اخيره
التكفير بتكون بخروج الانسان او الشخص عن ثوابت دينه
في الحاله دي من حق الغير انه يعتبره كافر
وبعدين الكفر ليس كله كفر بوجود الله او بوحدانيتة

بدليل ان ابليس كفر لانه عصي امر واحد لله
مع انه كان عبده الصالح المتبع

طبعا انا مش بكفر مصطفي
لاني مش عايز اضعه في قالب غير انه شخص حافظ فقط

وفي النهاية يمكنك زيارة اي من مدوناتي
عشان تتاكد ان اتجاهي مش اسلامي
يعني مش بتكلم عن مصطفي بدافع اني من اللي هاجمهم
تحياتي

Che The Mad said...

مهند اسمحلي هرد عليك بس لما ارجع البيت لانى دلوقتى في سيبر
هقولك بس حاجة ع السريع
انا مش صد اى توجه ايا كان يعني مكنش ليها لازمه حكاية انى ازور مدونتك علشان اعرفك ان توجهك مش اسلامي غير انها حاجة الواحد ما يزعلش منها
كمان انا بدخل عندك من قبل كدا وعارف ان توجهك اهلاوى :D

تحياتى وهرد قريب إن شاء الله
تشي

Che The Mad said...

مهند
اولا متقدرش تحكم ان مصطفي بيهاجم اى شيء اسلامي هو بيهاجم عادات سيئة متأصله فينا كمسلمين وملهاش علاقة بالاسلام
عن وصفه للسلفيه انهم متخلفين مش علشان هما متخلفين بس علشان هو ما شافش غير كدا انا عن نفسي شوفت سلفيه مخهم كبير جدا وبيفهموا جدا بس بيحوا عن الدين وليهم اراء غريبه وما بيحكموش عقلهم نهائيا دي اراء وكل واحد حر فى رأيه
انك بتقول ان مصطفي بيرمي الحجر ويجري اصلا غالبا ما بيكونش فى ردود على كلام مصطفي الردود على شخصيته وعلى مصطفي نفسه مفيش حد بيرد ع الكلام المكتوب نفسه
كمان حتى لو هو بيجرح يبقي انا ارد بأسلوب اجبره انى يحترمني مش اشتمه و أكد كلامه عني وانى وحش مش مجرد انى ارد عليه بشتيمه لا انا ارد عليه واقوله حضرتك غلطان واحنا كذا وكذا لكن دا ما بيحصلش
كمان انا مش عارف ليه بتقول علمانى كأنها شتيمه عادي كل واحد ليه اتجاهه علمانى بقي او غيره مش هنختلف بس انك تقول ان دا سبب انك ما ردتش عليه دا غير مقنع على الاطلاق يعني انا ما ردتش علشان هو علمانى مفيش رابط اصلا بين الاتنين بين عدم ردك واتجاهه مهما كان
كنت اتمنى انك ترد على الاسئلة دي احسن كتير

تشي

Che The Mad said...

بخصوص الموضوع بتاعي بقي
انا مش شايف اختلاف انا قلت فى فرق بين الاتباع والاعجاب الاتباع بيحتوى الاتباع تحته لكن الاعجاب مش كدا
انا معجب بافكار شخص بس مش متبعه مفيهاش حاجة لكن انى اتبعه دا بيعني بالطبع اعجابي بأفكاره
اتمني اكون قدرت اوصلك قصدي

تشي

Che The Mad said...

بخصوص التكفير انا مصر ان محدش يقدر يحكم بيه على اى حد ومش احنا اللى نحكم إذا كان خرق ثوابت الدين او لا

عموما تحياتى وانا بزور مدوناتك من زمان وإن كنت ما بعلقش

تشي

mohand said...

السلام عليكم
هههههههههههههه
تشي بص كويس
عشان كده مرضتش اجاوب عن تساؤلاته
لانه مش منتظر اجابات
ودا حال العلمانيين
ادخل مواقعهم وشوف المناظرات
وانت هتفهم كلامي
وعموما علماني لو هو زعلان منها تبقي بالنسبة له شتيمة
لو مش زعلان تبقي مش شتيمة
تشرف في اي وقت

Ma7moud So3ody said...

تشي
تسمح لي انحني
و اقلع القبعه؟؟

كلامك جامد جدا
go on ya man ;)

Ma7moud So3ody said...

تشي
تسمح لي انحني
و اقلع القبعه؟؟

كلامك جامد جدا
go on ya man ;)

Che The Mad said...

محمود باشا سعودي

اخجلتم تواضعنا
دا بس بعض مما عندكم

تحياتى كتير
تشي

commandor said...

تشي كلام جميل جدا ...بس ليا تعليق علي جزئيه صغيرة ..وهلي اللى انته بتقول فيها ان "الاختيار لما يجي الطفل لما يتولد نقوله الاسلام بيقول كذا والمسيحية بتقول كذا و..... إلخ ونقوله اختار بقي اللى انت شايفه اصح ويبقي كدا اختار الاتباع والاعجاب مش اتباع اعمي"

ياتري انت ان شاء الله لما ربنا يرزقك بولد هتعمل معاه الاوبشن ده ولاايه؟

Che The Mad said...

هههههههههه
الموضوع مش كدا خالص بس انا مش هقوله انت مسلم علشان انا مسلم لا هعمله ان الاسلام احن علشان كذا وكذا وكذا هخليه مسلم بالاقتناع مش انه يمشي ورايا وخلاص وعموما بعيد قوي على ما ربنا يرزقنى بولد ويمكن ما يحصلش كمان

تحياتى
تشي

Anonymous said...

ربنا يقدم اللى فيه الخير يارب:)

أكتر حد بيحب مصطفى فى الدنيا said...

السلام عليكم
اول مره ادخل عندك اهلا بيك على فكره انا مش معجب بيك و لا متبعك و دى انا عارف متفرقش معاك و مصطفى ده انا مربيه و هو حبيب قلبى و انا معجب بيه جدا بس درجة اتباعى لأفكاره و الحمد لله صفر بس لازم نفهم ثقافة الإختلاف و مصطفى و انت بتنادوا بكده بس افعالكم عكس كده يا ويل اللى يختلف معاكوا فى الرأى يعنى انتوا بتنادوا بحاجه و بتطبقوا حاجه تانيه خالص يعنى متاح للغير انه يقول على الملتزمين حمير و مبيفهموش و متخلفين و اغبياء بس لو واحد قال كده عليكوا نسمع تريئه و شتيمه و ايدك حمرا و جهل و مش عارف ايه .. يوووووووووووووه كتير و أظن دى ديكتاتوريه مش حريه اخيرا تحياتى ليك و سعيد لزيارتك و اما مصطفى حبيب قلبى فالعلاقه بينى و بينه فوق مستوى الإختلاف حتى لو قطعنا فى بعض احنا بنحب بعض .. أيمن خال مصطفى

Che The Mad said...

مستر ايمن
اول مرة تدخل وشرفتني كتير ويا رب ما تبقاش الاخيرة
ثانيا بالنسبة لمعجب بيا او متبعني انا مش حد اصلا ليه بصمه فى اى حاجة علشان يبقي اهل لأن يتبع انا مجرد واحد عادي خالص ومفيش اي سبب يدعو لاتباعي
حاجة كمان ثالثا يعني مش معني انى بدافع عن حرية التفكير والرأي انا مع مصطفي بتفق واختلف ومش متبع افكاره بنسبه 100% لكن عادي بتفق وباختلف
رابع حاجة انا ما منعتش حد خالص يختلف معايا عادي جدا بل انا بشجع دا وانا موجود فى مجتمع ( الكلية ) كل واحد مختلف عن التاني تماما او بنسبة كبيرة فى اختلاف وعمري ما رفضت دا ابدا لكن رفضي بيكون لفرض رأي ما وعدم قبول الحوار عليه وانا عمري ما عملت كدا
خامس حاجة انا مقلتش لحد ما يقولش عليا كدا ولو قال كدا بحاول اقنعه انه غلط ولو مقتنعش بقي مليش دعوة هعمله ايه كمان انا مش مع وصف اى حد بالحمار او بالشتيمة اصلا وعادي انى انتقد وكمان عادي ان حد ينقدني بس مش يشتمنى واعتقد الافضل ان النقد يكون ع الفكر ومش ع الشخص

تحياتى ويا رب دايما انت ومص
في مع بعض حبايب

تشي

Anonymous said...

مهجب بشخصيه حد ماشى


لكن تدافع عن حد
و هو بيغلط و بيقول كلام غلط فى غلط
و ملوش لازمه

دا ملوش علاقه با الاعجاب

مؤمن

Che The Mad said...

مؤمن
احب اقولك انى مش بدافع عن حد علشان الحد انا بدافع عن فكر عن حريه رأي مش بدافع عن شخص لأجله وفقط
يمكن الكلام اللى هو غلط من وجهه نظرك من وجهه نظر حد تاني صح وقمه الصواب ومتقدرش تحكم بقي

دا فعلا ملوش علاقه بالاعجاب

تحياتي
تشي