خطاب بعلم الوصول

ازيك يا عم عيد

تصدق واحشني

ما تقولش بتيجي كل سنة والكلام دا علشان مش باكل منه ، دا انا كل سنة ف الميعاد اللى الناس بيقولوا انك بتيجي فيه بستني ومش بتيجي ، ما تقولش بتيجي بس ، طيب بأمارة ايه ؟؟

تعرف ، يمكن تكون بتعدي علي ناس وناس ، واكيد انا من الناس اللى مش بتعدي عليهم

اصله مش معقول تكون بتيجي وانا بقالي يجي سبع سنين بستناك وانت بتضحك عليا ، تعرف انا يمكن من اخر ايام اعدادي ومعرفكش ، نسيت شكلك وريحتك ، بغض النظر عن ريحة اللحمة اللى بيقولوا انها لازمة لما انت تيجي ، وبغض النظر اني بفطر بعد رمضان بس انت ما بتجيش ، دا انا بنزل اصلي العيد زي الناس بردو ، واقول يمكن يجي لو صليت وما بتجيش ، طيب ايه ؟؟

تصدق اني مش فاكر اخر مرة عديت عليا كان شكلك عامل ازاي ، دا انا اخر مرة قالوا انك جيت فيها فضلت مطبق علشان ما تقولش لقتني نايم ولا حاجة ، وفضلت مستني وصليت وسلمت ع الناس اللى اعرفهم واللي معرفهومش ، ولقيت الناس فرحانة وبتقول العيد جه العيد جه ، بس انا مش لقيتك يا عم عيد ، اسئلهم جه فين يقولولي جه ، زهقت ونمت ، وسبتك قاعد معاهم وناسيني ، يا عم عيد .

طب اقولك كمان ، انا بطلت اخد عيدية ، اه والله ، ما انت ما بتجيش ، ومحدش بيقولي اخد عيدية ، وانا مش بقول لحد اني عايز ، ومش بدي لحد عيدية بردو ، تعرف لو علي عيد الكبير ، ماشي ، ليها سبب وهعديهالك واقول دا بسببي ، بس خلاص راح السبب ، فكها بقي وعدي ، طب والصغير ؟؟ مش بسببي بقي ، مليش فيه انا ، وبعدين يا راجل دا انا كنت مبسوط ، اه والله وانت سيد العارفين انا كل فين وفين لما اتبسط ، تيجي انت ليهم كلهم وما تجيليش ؟؟

انا مش زعلان منك علي فكرة ، اصلي انا ف الاساس مش عايز ابقي سعيد

بس ولو يعني

اكسر بخاطري مرة وتعالي وخليني اقول اني سعيد

دا انت تلت تربع كلمة سعيد

تصدق بالله ما مكلمك تاني

ولا هسألك ما جتيش ليه

ولا هسأل فيك

والنهاردة هفضل صاحي لحد الصلا وهصلي وانام

وابقي روحلهم بقي وسبني لوحدي

انا اللى هسيبك لوحدك

!! ياااا .... عم عيد

أحمد تشي