نتيجتي بانت ::: تحديث

فى تحديث مهم اوي من تحت

" الصورة دي مش عندنا بس هى شبه اللى عندنا إلى حد ما وهبقي انزل الصور اللى نزلتها لما ارجع البيت علشان هى ع الموبايل دلوقتى "

النهاردة بعد محاضرة الانجلش كانت الدفعة كلها واقفة فى مبني السكاشن استعداداً لتعليق النتيجة المباركة فجأة لقيت تتار بيجري عند واحد من الالواح الزجاجية قلت بس جالك الموت يا تارك الصلا طبعا زحمة اوي وانا مش بحب الزحمة الصراحة روحت وقفت بعيد وطلعت الموبايل واقعدت اصور تلك اللحظة التاريخية ولكن لان صورة موبايلي وحشة استعنت بموبايل الواد احمد فهمي حبيبي وصورت يجي 15 صورة كدا ولا 20 صورة فى الحدود دي يعني والناس كان منظرها ولا كأنهم بيوزعوا لحمة مش بيوروهم نتيجة الدكتور قبلها مبشرنا بيها يعني الحكاية مش مستاهله دا كله قعدت شوية كدا على ما الدنيا هديت وبعدين اتحركت بخطوات ثابته نحو النتيجة ( دن دن دن دن ) ( دي موسيقي تصويرية علشان اللحظة يعني وحركات كدا المهم بقي ايه
ايه
اه الموسيقي التصويرية
لا
النتيجة وما ادراك ما النتيجة حيث تتصلب اعضائك ويشخص بصرك بيدور على اسمك لتصائب باكتئاب مزمن قد يطول وقد يطول حسب الحاله بالظبط
المهم بقي العبد لله ايه راح علشان يشوف النتيجة ثاغر الفاه مبتسم المحيا ضاحكا بشوشا ( ولا كأني رايح افتح القسطنطينة بجيش عداده مليار من الجنود الروشة ) طبعا كان منظري غريب جدا وسط ناس منهم اللى بيعيط واللى اخذته العزة وكتم فى قلبه مع لمحه حزن بسيطة
قوم ايه بقا انا - وانا بحالتي السعيدة دي - قررت انى اشوف نتيجتي وانا ماشي بتلك الخطا الثابته ( سالفة الذكر سيادتك ) لقيت ورق كتيييييييييييير واسامى كتير
- أنا اسمي مكتوب يا مرسي
- لا
- طايب
جيت ارجع بعد ما اسمي طلع مش مكتوب قاللي مرسي لا دور انا مش واخد بالى اوي
قلت امري لله وادور
دورت بقي قوم ايه
لقيت اسمي مكتوب اه والله طلع مكتوب ( يعني طلع مرسي كداب ) مش مهم المهم ايه
قول ايه
قولتلي ايه
المهم بقي ايه ان اسمي مكتوب والنتيجة قدامه لكن فى واحد مخبي النتيجة بكتفه
- كتفك يا كابتن
- اهدي لو سمحت مش ناقصه هي
- هى مين
- نظرة بدون رد
- طب كتفك يا كابتن
- يا عم من حلاوتها اوي عايز تشوفها
- ( وقد بلغ بيا الغيظ اقصاه ) انت مال اللى جابوك
-خلاص اهو شوفها إلهي تسقط
- ههههههههههههههه قول يا رب
- يا رب يا اخويا يا رب
- من قلبك ؟؟!!؟؟
- اه من قلبي في حاجة
- لا مفيش وسع كتفك بقي
المهم انه وسع كتفه فى الاخر بعد دعاء منه ما عداش من سقف الكلية لانه ما استجيبش ( بضم التاء )
استنوا استنوا شوية ما تفرحوش قوي كدا هو انا قولت النتيجة انا قولت انى ما سقطتش بس دا ما يعنيش انكوا تفرحوا
اصبروا التقيل جاى ورا
الاسم مكتوب اخر واحد فى الكشف مع انى احمد يعني المفروض اكون فى الاول لكن هذا ما جنيت على نفسي وما جني على احد
قبل ما ابص على اسمي قلت اخد نظره عامة لقيت الجدول مليان نقط غامة كتييييييييييير اصلا مكانش فى اماكن بيضا غير نادر يعني
والنقط الغامقة لمن لا يعلم هى تعني انك شايل المادة او ع الرفع يعني انت ونصيبك قلت بسم الله واستجمعت شجاعتي وتوجهت بالنظر لنتيجتي
ف قوم ايه بقي شوفت نتيجتي
- ويا ريتني ما شوفت
اقولكوا الاول على توقعاتي للنتيجة وبعدين النتيجة
انا كنت متوقع اشيل اكونومي ( اقتصاد يعني لا مؤاخذة ) ( انا اصلا معرفش ليه المادة دي لواحد بتاع حاسبات ومعلومات زيي بس مش مهم ما المنظومة كلها بايظة من ساسها لراسها جت على دي ) المهم ايه انا متخيل انى هشيل المادة دي لانى فعلا ما حليتش اللى يأهلني للنجاح غير ان الدكتور ( عميد الكلية اللى بيدينا المادة دي ) كان قايل ان فى 65 واحد شايلين المادة واكيد يعني انا مش هخون زمايلي وما اشيلهاش
قوم ايه بقي شوفت النتيجة اتصدمت
لقيت فعلا فى مادة واحد ض ( ع الرفع يعني ) قولت اكيد هى الاكونومي بنت " التييييييييييييت " دي طلعت مش هى
اه والله مش هى طلعت مادة تانية ومعرفش ليه وازاي يعني طلعت ومادة حالل فيها حوالي 75 % وكنت بحضر سكاشنها عكس الاكونومي اللى ما حضرتش غير سكشن واحد بس وولا محاضرة علشان المعيد اللى كان بيديهالنا " تيييييييييت " وكمان مكنتش حالل فيها غير مثلا 25% بس ، لكن ليس كل ما يبغاه المرء يلقاه والدنيا بتمشي عكس ما انت عايزها المهم معايا المادة دي ع الرفع ربنا يسهل الترم الجاي ( شكلها مش هتترفع بعد البوست دا ) وبقية المواد الحمد لله عديت فيها غير مادة معايا من السنة اللى فاتت والدكتور ( هو هو بتاع الاكونومي وهوهو عميد الكلية بردو .... أه والله هو :(( !! ) المادة دي الدكتور شيلها لاربعين واحد من اصل سبعة واربعين كانوا شايلنها ودا لسبب وجيه للغاية انهم ما اشتروش الكتاب بتاع المادة دي السنة دي مع انه والله معانا من السنة اللى فاتت بس تقول ايه بقي دنييييييييييييييا
كدا بيس اوي والترم دا كويس وإن شاء الله هتبقي فل الترم دا بس لما نشوف لو فى مواد اترفعت ولا حاجة

اخر حاجة انا مبسوط وعادي وبيس ومش زعلان خااااااااااااالص ولا مضايق خاااااااااالص ولوز وموز واخر حلاوة ويا رب الكلية باللى فيها تولع النهاردة بالليل الساعة خمسة وتمانية وعشرين دقيقة وسبعة وتلاتين ثانية بالظبط

اخرحاجة بعد اخر حاجة اللى فوق كلمة ( قوم ايه ) اللى لبستني البوست دا من إلهام واحد قالها قدامي 150 مرة فى الدقيقة
*******
تحديث مهم أوي
*******
مكنتش الصبح مضايق ولا زعلان لان عارف ان ام الكوسة ماليه الكلية من اولها لأخرها وعارف انها منظومة بنت *** *****من اولها لأخرها مكنتش خايف غير لما اقولهم فى البيت وعلشان ماما ما تضايقش وانا مش ناقص اضايقها يعني مش طالبه حد يقولي امال انت بتاخد الفلوس تعمل بيها ايه
************
الفلوس كنت بتنيل يعني اصرفها ع الرقصات ما انا بجيب كتب ما بتتفتحش علشان الشيت بيتسلم معاها وعلشان عليها عشر درجات علشان دكتور قال فى المحاضرة واحد ما بيحضرش وما حلش حلو فى النظري وما جابش الكتاب انجحه ليه
كل دكتور فى الكلية بيعيش الدور ولا كأنه زويل عصره وزمانه بروح اهله
ليه اشيل مادة حالل فيها 75% تقريبا وحضرت كل سكاشنها تقريبا ما عدا مرتين مستأذن فيهم وكل محاضراتها وجايب فى البروجكت بتاعها 15 /15 وفى الشفوي 5/5 ليييييييييييييييه علشان ام الكوسة
ليه اشيل مادة من السنة اللى فاتت والسنة دي حليت فيها 90 % صح ومتأكد منه وبردو اشيلها علشان ما اشتريتش الكتاب اللى جيبته السنة اللى فاتت اصلا
ليه انجح فى مادة تانية ما حليتش فيها حتى 50 % على بعض لييييييييييييه
ليه 15 % نسبة النجاح فى مادة
ليه 24 واحد بس طالعين صافيين فى الدفعة كلها
ليه ام الدكاترة لما يخنقوا على بعض يطلع على دماغ اهلينا احنا
ليه واحد ملوش لازمة ولا راح ولا جه يجي يخنق عليا ويعيش ويعمل اخ اكبر وناصح وليه واحد تاني يشمت فيا وهو ولا يسوى اصلا
ليه لو واحد جايب خمسة مقبول هيبقي مرتب من الخمسة وعشرين اوائل ع الدفعة
ليه المهزلة دي كلها
انا مش مضايق علشان النتجية لكن اضايقت من النتايج اللي اتربت عليها
اخر حاجة بجد بكره كل دكاتره الكلية واحد واحد مفيش ولا واحد ليه فى قلبي او عقلي ذرة احترام وكلهم بلا استثناء
حاسس انى ما استريحتش نفسيا علشان ما شتمتهمش اون لاين بس والله م ساعتين قاعد افكر اشتمهم ولا اقول حسبي الله ونعم والوكيل ومع ان الاخيرة مش هترضي غروري لكن
حسبي الله ونعم الوكيل فى كل دكتور ظلمنى وظلم اى حد فى الدفعة ومش مسامحه ليوم الدين
*******
بس كدا عقبالكوا كلكوا احسن منى بكتيييييييير ويا رب اخلص بقي علشان انا خلاص خلصت وطلع " تييييييييييييت " اهلي
تشي

26 comments:

Ahmed Al-Sabbagh said...

مبروووووووووووك

حبيت أكون أول المهنئين

أخوك
أحمد الصباغ

قليل من التفكير said...

مبروك وعقبال الترم التاني
.
.

Moustafa` said...

مبروك يا أكبر " تيييت " ف المنطقه
ايه ياعم وقعت قلبنا
بوص ابقى قول نجحت وبعدين ارجعى
وقوم ايه و
اقعد ايه
بس سيبك انت
البوست ده مولد فنان واديب كبير قوى
انت شوقتنى مووت يعنى
ورسمت الحاله احسن م الصوره
نصيحك
فكك م الكليه الخربانه التييت دى
وحول حوارات وتهييس
ربنا معاك وتقضيها رفع وفله بقه يا صاحبى
سلام

Anonymous said...

باشا .. الكلية هتولع كمان 30 دقيقة حسب الإتفاق وحطيت متفجرات تكفي الكلية والكليتين اللي جنبها، قلت لنفسي اعمل خير وارميه بالبحر .. :):)

المهم .. مبروك النجاح وعقبال لما تنجح بالمواد اللي باقية عليك بعد ما يعيدوا بناء الكلية :)

marmar said...
This comment has been removed by the author.
marmar said...

لولولولولولولولولولولولولولولولولولى

مبرووووووووووووووووووووووووك

حلو الراقصه اللى انت كنت عاملها دى يا جيفارا

مشلتش اكونومى شلت داتا

عالعموم مبروك وبلاش الحقد اللى فيك وانت بتدعى عليا

عييييييييييييييييييب

مبروك وعقبال التيرم التان ويكون صافى

Layla said...

مبروووك...نتيجة تفوت ولا حد يموت

:D

ღღ:::bonbony:::ღღ said...

مبرووووووووووووووك يا تشى بس بجد احلى حاجه البوست بتاعك بجد يجنن والله قعدت اضحك عليه تحفه بجد وحلوه اوى بجد حركتك اللى عملتها "رقصه الايكونومى" كانت جامده يالا هتتشهر بيها

أسامه يوسف said...

مبروووووووووووووووووووووووووووووووك
يا تشيييييييييييييييييييييييييييى
ياللى مش حزييييييييييييييييييييين
وكلنا فرحانيييييييييييييييييييين

وربنا يا رب يكرمك دايماً وعقبال الدكتوراه

معلش بردو عالتاج انا داخل مضطر النهارده لاقيت الرساله الأوفلاين بتاعتك قولت لازم ادخل ابارك
تحياتى
لأ
تهانينا القلبيه بالنجاح
أخوك أوس

Anonymous said...

Alf mlion Mabrouk w 3o2balna fe Cairo :(( ed3olna ya gma3a

Ahmed Fahmy said...

هههههههههههههه يخرب عقلك يا تشي
اللي حصل حصل بقي سيبك انت لا بس جامدة رقصة الاكونومي دي هههههههههه
سلامي

Che Ahmad said...

الصباغ باشا
ربنا يبارك فيك ودايما الاول فى كل حاجة

**********
قليل من التفكير
يا رب احسن

**********
ساجي باشا
بجد ربنا يخليك ع الكلام الجامد دا
وربنا يبارك فيك يا رب
وبجد والله انا بفكر افكني من ام الكلية دي واغور اي داهيه تانية بدل العك دا

تحياتى
تشي

Che Ahmad said...

احمد باشا
والله يا رب بجد تولع علشان انا جيبت اخري
ربنا يبارك فيك يا رب ويسمع منك ربنا

**********
مرمر
مبروك علي ايه بلا نيلة ما انتى عارفه اللى فيها
الرقصة مش الراقصه هتفضحينا منك لله
وكمان كانت بتقول
" بقي اشيل داتا وما اشيلش اكونومي "
وعموما لما انا دعيت عليكي عملتي ايه يعني انتى رمتيني بالشنطة بتاعتك في ام دماغي بس طلعت شطنه طائشة وما اصابتنيش
وربنا يسمع منك

**********
مارفل
ربنا يبارك فيك
بس بجد فى ناس ماتت من النتيجة ( ماتت روحيا بس )

تحياتى
تشي

Che Ahmad said...

بونبوني
ربنا يبارك فيكي ومبروك ليكي انتى كمان اصلك من الاربعة وعشرين اياهم
مش بحسد انا بحقد وبنق بس

**********
اسامة باشا الكبير
مين قال مش حزين الحزن دا اقرب صديق ليا فى الدنيا
سيبك انت
ربنا يكرمنا كلنا
ويا عم سيبك التاج هيتجاوب فى اى وقت خير خير إن شاء الله

**********
احمد باشا بركة
منورني هنا يادي الهنا يادي الهنا
يا سيدي ربنا يبارك فيك وعقبال لما نقولك احنا كمان مبروك

تحياتى
تشي

Che Ahmad said...

فهمي باشا
ملعون ابو اللى حصل يا عم
وسيبك انت انا مخنوق خنقة لا تطاق " اصل انا ندل " واخد بالك ندل هاه
ندل مش كدا
عموما شكرا وربنا يستر علينا

تحياتى
تشي

Ahmed Fahmy said...

تشي انت حبيبي لازم كنت تكون مقدر و ما عاش ولا كان اللي يقول عليك ندل

Che Ahmad said...

ههههههههه
ماشي
ومين سمعك من شوية

أسامه يوسف said...

أنا كنت جاى اقولك انى رديت عالتاج وانى فضيت وروقت
بس لما قريت البوست بجد اتنكدت تانى
انا فى الأول باركت فى السريع قبل ما اقرا

بس دلوقتى زعلت
لأن ده بردو نفس اللى حصل معايا
كنت فرحان وبتنطط
ولما عرفت ان فى 25 واحد جايبين اكتر منى من مدرستى بس
منهم 20 ولا يستاهلوا زعلت

بس انت رجعت تانى وكتبت لى كومنتات كتير علشان تهدينى
انا مش هانصحك واقولك لأ ومش لأ

انت ليك حق تزعل
بس ارجع واقرا كومنتاتك عندى ساعة النتيجه بتاعتى ومش تخلينى اقول انك بتاع كلام

وده جزء من حديث الرسو عليه الصلاه والسلام كان بيوجهه لابن عباس وهو صغير

"واعلم ان الأمه لو اجتمعت على ان ينفعوك بشئ لن ينفعوك الا بشئ قد كتبه الله لك وان اجتمعوا على ان يضروك بشئ لن يضروك الا بشئ قد كتبه الله عليك"

صدق رسول الله عليه الصلاة والسلام

مش هاقول اكتر من كده
وربنا يكرمك يا احمد

Anonymous said...

تشي
بجد الف مبروووووووووووك

انا عارفة انى مقصرة
بس والله ما عندى وقت اتنفس

اصبح التجول في المدونات قمة الترفيه

بجد والله انا بعتذر لاقصى حد

Che Ahmad said...

اسامة باشا
انا والله مش مضايقاني النتيجة بس اللى مضايقني الكوسة اكتر
شكرا ليك على مشاركتك الوجدانية ليا بجد

**********
مش قادرة
ربنا يبارك فيكي
ولا يهمك خالص
ربنا معاكي ومع كل الناس وتعدي السنةدي على خير والناس كلها تستريح بقي


تحياتى
تشي

Unknown said...

مش كنت تقولى يا جيفارا انك كنت بترقص كنت اجى اعمل منظر كدة وارش النقطه عييب عليك بس مش مهم تتعوض فى رقصه الترم التانى وربنا يستر ونرقص كلنا وابقى سلملى على جوزك يا اسماعيل بيه ههههههه
سلالالالالالالالالالالالالالالالالالام

Che Ahmad said...

سمير باشا
انت بتزيط ولا ايه
نقطة ايه وبتاع ايه دا سين بينا انت ايه دخلك اصلا
انت تبع مين يا كابتن
هو جوز اسماعيل بيه هو اللى مسلطك علينا اكيد

صحيح مناخيرك لسه حمرا ولا خلاص

تشي

صفا سارة said...

اولا الف مبروك على النجاج
عقبالى يا رب اعدى السنه دى
وبمناسبة الكوسه فيا اخت التناقض حاجة رئيسيه فى الحياه
تفاءل فالمستقبل مبشر بكل خير
ههههههههه

Che Ahmad said...

صفا
يا رب تعدي وبتفوق كمان إن شاء الله
ومين مبشر دا انا معرفش حد بالاسم دا

تحياتى كتير
تشي

yomna said...

اولا طبعا مبروك يابني
كفارة وعقبال البكالوريوس وتخلص من الهم ده
ونحن السابقون وانتم اللحقون
ومتشلش في نفسك اوي كده وتتقهر...انا برده كانت بتحصل معايا في الكلية الحاجات ده....مواد بكبرلها ومبفتحش الكتاب غير قبل لاامتحان بيومين وبجيب فيها جيد جدا مواد تانية بقطعها مذاكرة وبجيب جيد ومقبول...فقررت ساعتها اني مشيلش في نفسي خالص....وهو كله عند العرب صابون... اما بقى موضوع الكوسة فمش هقدر اقول غير لا تعليق ومتقلبش علينا المواجع

a7mad said...

مبرووووووووووك يا باشا
وعقبال السنين الجاية كلها
عن نفسي اقول: حصل معايا نفس الوضع
مادة محدش حاللها جايب فيها امتياز...ومادتين محدش نقص فيهم الا انا...واحده مقبول والتانية في انتظار الرفع