عني - لحظات شتات

الكلام دا عني حاجات متفرقة ما بيربطهاش ببعضها شيء غير انها تخصني
------------
ايام الامتحانات كانت راسي مليانة افكار لبوستات كتيرة جدا حاجات كتير شغلاني اعتقد لو كنت كتبتها كلها لكانت جوجل بعتتلي بتقولي حرام عليك سيرفر بلوج اتملي عن اخره لكن لجوجل ان تحمد ربنا ان ما كتبتش حاجة اما انى مكتبتش فدا لان كل الافكار دي طارت إلى غير رجعه اعتقد ومش عارف ليه
اعتقد انى مصاب بمرض تداعي الافكار وبقدر ما بتتداعي الافكار على رأسي بقد ما بفقدها بنفس سرعه تداعيها
-----------
اصبحت مصاب بملل كتير ( انا كل وصف عندي بوصفه بـ كتير ) واصبحت الحياة تكرار دائم مش عارف اغيره ودا احد اهم اسباب حالة الكأبة المزمنة اللى لزمتني من فترة وشكلها هتستمر كتير كدا دا غير حالة النسيان المسيطرة عليا فى كل حاجة وشكل الزهايمر بدأ مبكرا فى التغلغل فى طرقات دماغي
-----------
اصبت باليأس من تحسن امر جيلي من الشباب اللى زي كدا لان اللى شايفه دلوقتى لا يدعو للبشر ( الباء عليها سكون مش فتحه ) بحال من الاحول فكل زمايلي من حواليا حياتهم بقت منصبه ع القهاوي او التليفزيون والاكل والنوم ودمتم على كدا كأن الدنيا قد خلت إلا من الحاجات دي واصبح شكل الشباب حاجة من اتنين يا إما ع القهاوي والضحك جايب اخر الشارع او بدقن عاملة زى المقشة وجلبيه برمودا ومفيش ابدا وسط
-----------
بخصوص التليفزيون انا بجد بقيت بكره الاختراع دا بسبب كمية التفاهه اللى بتقدم من خلاله بقي عبارة عن حاجة من اتنين غسيل مخ وهابي او غسيل مخ هيافه ... فالقنوات كلها دلوقتي يا إما دينية متشدده يا اما قنوات اغاني وافلام ودمتم على كدا اه صحيح وقنوات رياضية
-----------
قررت انى اقاطع الكورة كمشاهد ولكنى متابع دلوقتى يعني ممكن ابقي اشوف النتايج ولا حاجة او اسمعها من حد اعرفه لكني بقيت بتعامل مع الكورة على انها افيون سياسي بيبث علشان الشعب يتلهي بيها ويسيبه من بقية الحاجات ومش مهم الاكل ولا العيش ولا الاسعار ولا الناس تموت ولا اي حاجة المهم المنتخب يفوز بكره :D
----------
بقيت دلوقتى بسمع اتنين بس منير وفيروز طول الوقت وطول اليوم شغال منير او فيروز بعمل سيلكت للفولدر كله واشغل ايهم منير حوالي 200 اغنية وشوية بياخدوا اليوم كله شغالين اما اليوم اللى بعده فبشغل فيروز حوالي 300 اغنية بياخدوا يوم كامل المهم بقي ان مفيش ولا اغنية بتتكر خالص
----------
نفسي اقابل نجيب سويرس واقنعه يعمل قناة اسمها اقرأ تكون تعمل توازن للتليفزيون شوية واشغل فيها كل البلوجز اللى عقلهم شغال ونفسهم يعملوا حاجة علشان البلد تكون احسن واي حد عنده فكر جديد ساره وهند وفهمي ومصطفي العليمي ومصطفي فتحي وسعودي وسالى ونيرة ومحمد حمدي واحمد رمضان القناة تكون ثقافية بلغه شبابية
بخصوص المهندس نجيب سويرس ساعه تصريحه بانه هيعمل شوية قنوات اغاني وترفيه لمواجهه قنوات المد الوهابي بقدر ما كنت مدعم حريته فى التعبير عن رأيه بقدر ما كنت احب يبقي الكلام بتاعه " هاعمل شوية قنوات تربويه ثقافية تعليمية بلغه شبابية عامية بسيطة علشان توصل للشباب " ع العموم نفسي اعمل القناة دي فعلا
----------
مبسوط جدا بالتقدم اللى بنحققه فى حملة اقرأ ... تكون مع مجموعة من اجمل من انجبت مصر فى تاريخها من ملايين السنون ( دا رأيي فيهم ومحدش ليه حاجة عندي انا شايفهم احسن ناس فى الكون محدش ليه عندي حاجة ) استنونا قريب اول شهر يوليو 2008 إن شاء الله وأول الشهر زورونا تجدوا ما يسركم


------------------
مممممممممممممممممممممممممممم
مش عارف ليه بكتب الكلام دا كله بس كنت عايز اكتبه فكتبته

تحياتي
تشي أحمد

22 comments:

Anonymous said...

اشطااااااا
عندي اومتحان بكرا
بس ما قدرتش أقاوم اول تعليق
ادعيلي
مصفي
بحبك ياواد
وليا عندك نزله وسط البلد اول ما أخلص
لأنك بجد اتخنقت من ام المواد دي
سلام
اه
البوست بجد لقيتنى فيه
تسلم

Oss said...

من الآخر البوست ده عنى
كله كله
ماعدا حوار الكوره
(كاس امم اوروبا يا تشييييييييى)
وحوار القناه
تحسبلك يا معلم
وفكره جامده

تحياتى

the unmistakable said...

والله يا عم احمد الحوار ده عاجينى قوى جدا و نفسى بجد اكون احد المشتركين معاكم فى الحملة دى بس اهو بس عندى شوية تعقيبات ان الشباب فيهم اللى بيتقدم برضه مش كله حاطط ايده على خده و بحب اقول للاستاذ او سس ان كلنا بنكتب اللى بيجى على دماغنا و انا بحترم قوى كلام الاستاذ احمد لانه معلمنى القراءة المستمرة و انى مزهقش و احب اقوله الف مبروك على الحملة الجميلة دى و ربنا معاكم بجد و اوعى تنسى الكابتشينو

abo salah said...

بعد السلام عليكم

والله ياأبو حميد أحب اطمنك ان حالتك دي مش حالة شخصية
الظاهر انها حالة عامة

وربنا ان شاء يفك مللك
وثق في مقدرة الله عزوجل وادعوه بالنجاح وانت موقن الاجابة
وبلاش اليأس

بالنسبة للتليفزيون أنا نسيت اقولك انهم نقلوا تابعية الجهاز دا
يعني دلوقتي مابقاش تبع وزارة الاعلام
دا بقي تبع وزارة الصحة بس قسم تخدير

منير و فيروز .. لا تعليق لأن شكلك فنان

واوعى تنسانى بقى لو قدر ربنا وقابلت سويرس مهما كان في بنا عيش وتدوين

من نجاح لنجاح في حملة أقرا ان شاء الله ياأحمد

Eman Henaish said...

ايام الامتحانات كانت راسي مليانة افكار لبوستات كتيرة جدا ......كل الأفكار دي طارت بلا رجعة....أصبحت مصاب بملل
......................
ده شكله فيروس منتشر الأيام دي :)
لأن بجد الحالة دي أنابمر بيها
بجد لو عرفت ليها علاج أكتب بوست للعلاج ده :))

تحياتي علي البوست

Che Ahmad said...

ساجي

عارف يا واد
اهو انا بحبك كدا لله فى لله وبستريحلك كدا بردو لله فى لله

ونزوله وسط البلد لما ارجع من الكس لو روحت

تسلملي عيونك يا الغالي :D
تشي

Che Ahmad said...

اوس

تصدق انا كاس امم اوروبا ما شوفتش فيها غير اخر دقيقتين وضربات الجزاء بتاع ماتش تركيا وبس رغم انها متاحه يعني بس ما بقاش ليا نفس ليها
زهقت

وبالنسبة للقناة قول يا رب

تشي

Che Ahmad said...

وزة

ايه يا واد محسسني انك عامل زى محمد سعد فى فيلم معرفش ايه بالحته بتاعه احب اقول للاستاذ اوس دي
ههههههههههههه
ماشي يا سيدي ربنا يخليك يا رب وترجع الكتاب اللى ضربت عليه ( دي ضريبه انى اخلي اشكالكوا تقرا )
ههههههههههههههههههه
بهزر يا مان ومتخافش مش هنسي الكابتشينو
تشي

Che Ahmad said...

الجميل دائما أبو صلاح

كويس طمنتني والله وربنا يشفينا واياكم من الملل دا علشان وصلت لمرحلة متاخرة اوي

وبالنسبة للتليفزيون شكرا ع المعلومة لأني فعلا مش متابع

وبالنسبة لمنير وفيروز هو بعض مما عندكم

ولو قدر ربنا وقابلت سويرس فكن واثق انى مش هنسي اى حد عنده ابداع مهما كان واكيد انت فى مقدمتهم

تشي

Che Ahmad said...

إيمان

يا هلا فى اول زيارة

والله انا ملقيتش علاج خالص وشكله فعلا فيروس انتشر فى الاونة الاخيرة ( حلوة الاونة الاخيرة دي )

تحياتي
تشي

mesh2dra said...

السلام عليكم

ايام الامتحانات كانت راسي مليانة افكار لبوستات كتيرة جدا حاجات كتير
لان كل الافكار دي طارت إلى غير رجعه

مش لوحدك
الانسان دايما بيبدع وقت المصايب
ازاى متفهمش
يمكن عشان عايز يخرج من المشكلة ،فبيكر ف حاجة تانية
يمكن دي وسيلة للهروب من المذاكرة لحاجات تانية


اصبت باليأس من تحسن امر جيلي من الشباب اللى زي كدا
نصيحة بلاش تفكر كتير ف الموضوع ده
لانك مش حتخلص
وحتتعب اكتر ما انت تعبان
فكر ف الحل ولو ملقتش ماتتعبش نفسك

بخصوص التليفزيون انا بجد بقيت بكره الاختراع
خلاص يا راجل
ده اختراع قديم اوى
جرب تسمع الراديو
مسلسلاته باخباره باغانيه القديمة تحفة
بس بلاش نجوم اف يع لانه مملة
ومش حتستفيد الا بصداع - ده لو انت بتعتبر الصداع استفادة

مبسوط جدا بالتقدم اللى بنحققه فى حملة اقرأ
الله يوفقك دايما يارب

سلاماتى

marmar said...

ايه ده يا جيفارا

ملل ايه بس ده الدنيا ربيع والجو بديع
هههههههههههههههه

ده الاجازة لسه فى اولها يا احمد وانت مش بتكتب غير مخنوق وهطق

يا بنى فكك بقى وعيش حياتك

وانا معاك ان كل الحاجات دى بقت ممله بس نصيبنا كده

سلامى

الم said...

بسم الله
ماشاء الله عليك صادق اوى وظريف كمان
كلامك حلو كتيييييييير
بقولك
بالله عليك بالله عليك لو عملت القناه شغلني معاك
وربنا هنفع
صحيح
انا كمان بعيش لحظات شتاااااااات وكتيرة اوى مش انتا لوحدك
ربنا معاك
تحياتي
جيلي كاستر
مش هتقدر تغمض عنيك

الم said...

انا كمان عندي امتحان بكرا
ياريت يدعييييييلي كتيييييييير
وليك عندي طبق جيلي كاستر
حلو اوى
ايه رائيك ؟

Che Ahmad said...

مش قادرة

فعلا حكاية الابداع فى الوقت اللى ما ينفعش فيه ابداع ظاهرة عامة جدا
ومعايا كانت فعلا وسيلة هروب م المذاكرة انا اصلا ما كنتش بذاكر :D

*******
وبخصوص الحل بحاول أدور عليه وبالنسبة للتليفزيون والراديو مقاطع الاتنين بس ساعات بسمع راديو سوا اون لاين

ليكي فترة ما بتعديش يعني
مستنيكي دايما تنوري
تشي

Che Ahmad said...

ربيع اه
اللى يسمع كدا يفتكرك قاعده فى لندن

وبعدين مليش انا دعوة بالنصيب انا متأكد ان الانسان بيصنع نصيبه بنفسه وانا مش هرضي بالنصيب الموجود دا :D

يلا سلامات
تشي

Che Ahmad said...

ألم

ثانكس كتير على إطرائك
ومبسوط ان الكلام عجبك

وإن شاء الله لو عملت القناة هأخليها للبلوجرز بس احنا عندنا اغلي م البلوجرز فى الدنيا

ومستني نشوف لحظات شتاتك

منورة
تشي

Che Ahmad said...

هدعيلك كتييييييييييييييييييير

بس مش علشان طبق الجيلي كاستر انا مش بدعي بمقابل
ربنا يوفقك يا رب بكره ودايما وكل الاوفات والناس كلها فى كل مكان

تحياتي
تشي

الم said...

اولا
مشكور اوى ع زيارتك
اسعدتني كتير
وشكرا بجد ع دعواتك
امتحان المنطق كان حلو بس الاسلامي الدكتورة جابتو من الملغي وكالعادة محدش حل حاجه
يعنى سقوط سقوط بقه
تعرف
انا بعيش لحظه شتات اوى
ومش عارفه ليه الدينا معايا انا كدة
امبارح كنت بمر بطروف صعبه اوى اوى فوق ماتتخيل وكان زماني المرحومه جيلان بس في كل لحظه كنت بقول يارب اعيش علشان الشخص دهوت وسبحان الله


صعب اوى انك تكون عايش علشان شخص معين وبيمنحك القوة والسعادة والامن والامل في بكرا ومش بتلاقيه جنبك في اصعب المواقف
بجد شئ صعب اوى اما تحس ان وجودك جنب الشخص الى بتحبه هيتعبه اوى
صعب اوى بجد
تعرف
ساعات بنجرح اوى اوى وبتعب اوى بعديها بس برجع اسامح ونجرح تاني واسامح
تفتكر دة ضعف ولا ايه
تعرف
حاجه مؤلمه اوى انك تكون نفسك في الشئ دة ومش قادر تملكه بجد شئ قاسي اوى
احيانا بنكون مستعدين نعمل اى شئ علشان الى بنحبهم ومش بنحتاج مقابل
صدقني مش بحتاج مقابل ومش عاوزة مقابل
بس حرام انك تكون روحك في حد وفجاه تصحي الصبح مش تلاقيه جنبك
ساعات اوى بحتاج انى ابكي بس اقعد اتذلل ع الدموع انها تنزل ومش ترضي
بجد بتحس ان جواك الم فظيع وينطبق عليم لقب يوميات انسان عاش حزين ومات حزين
مش بنفرح ساعه الا لما نكون عارفين اننا هنبكي بعديها الف ساعه
ساعات بكون في مكان ولحظه واحدة وربنا في غمضه عين وبلاقينى في مكان تاني خالص
تعرف
صعب اوى انك تكون ماشي في وسط الضلمه في ساعه من اظلم ساعات الليل وماشي لوحدك
مش عارف السكه ولا عارف تمشي منين ولا مين هيدلك ع الطريق
بتكون عرضه للكلاب الضاله الى في السكه
وتدعي يارب يحصل معجزة وبتحصل كتير معايا
احيانا بقول كلام ومش عارفه ليه بقوله بس بتيجى معايا كدة
يعنى انا مش عارفه اشمعنا مدونتك الى دخلت عليها وكتبت كدة
صدفه غريبه
احيانا ببكى وانا مش عارفه ليه ببكي
بس بكون عارفه ان جوايا حزن كبير وروح حزينه محبوسه جوايا
اما تحس انك عايش في مكان كل الى فيه بيحبوك وبيخافو عليك بس محدش حاسس بيك ولا بالى جواك هما بيحبوك علشان دة الى لازم يحصل بتحس حالك انك عايش في وسط مقابر الناس الى في المقابر دي تعرفك وبتحبك بس محدش حاسس بيك ولا حاسو بيك مش هيقدرو يعملو حاجه
احيانا بنضحي وبكل حاجه في مقابل حاجه واحدة بس بتكون باقيه طول العمر بس خسارة ساعات بنضيعها هي كمان من بين ايدينا او ترفض انها تكون معانا وبنلاقي نفسنا ضيعنا كل حاااااااجه
كل حاجه
بنقعد نبكي ونندم بس لو بصينا كدة
هلاقينى محتفظ باجمل حاجه هي انى حبت الشئ الى ضاع دهوت وعلشانه ضحيت بكل حاجه
ساعات بقف قدام صورة او كتاب او حتى روايه بتعجبنى اوى اسمها
الاقينى سرحت اوى مع الاسم او الصورة ورحت دنيا تانيه واقعد انسجها بخيالي
بس عبيطه تقول ايه كل دة وهم
ايام الامتحانات كان بيجيلي مواضيع كتيرة اوى اوى بجد وافكر حلوة كتير كنت بكبر واطنش
تعرف
مرة كتبت بوست في محاضرة علم النفس كان بوست حلو اوى
ومرة كتبت بوست في الحمام هههههههه
الاغرب
انى كتبت بوست في امتحان حقوق الانسان
ههههههههه
صدعتك
هروح اكمل في اى مكان تاني بقه
سلام

weswes said...

تشى
البوست حلو اى
يمكن مش مترابط ومش عن حاجه معينه بس حقيقى
عامل زاى الدماغ
بظبط
تحياتى

Che Ahmad said...

جيلان

أولا لا شكر على واجب

وبعدين امتحانات ايه بس يا ستي خير إن شاء الله ما تحطيش فى دماغك

بالنسبة للحظات الشتات كلنا بنعيشها بس مين يقدر يخليها فى صالحه مش ضده

وانك خرجتي من ظروف صعبة مش معناها نهاية العالم انتى خرجتي لازم تخرجي اقوي واقدر على انك تواجهى الحياة بعد كدا
متخليهاش تتغلب عليكي وقوليلها لا انا اقوى منك

جيلان
خلي عندك اقتناع ان عمرك ما هتقدري تعيشي علشان شخص قبل ما تعيشي لنفسك لو اهملتي نفسك وسبتيها هتبقي بقايا انسان حتى لما تعوزي تعيشي علشان حد مش هتقدري لانك من جوا مش سليمة ومش تمام

لو شايفة ان وجودك فى حياة حد اخرجي منها وخرجيه من حياتك المفروض ما نسمحش لدنيا انها تقف عند شخص معين بعينه لاننا مش ضامنين الشخص دا اصلا هيفضل قد ايه المفروض نستمر مهما الناس حولينا حصلهم ايه لان دي سنة الحياة
انا يمكن اموت بكره واي حد ممكن يموت فى اي وقت يبقي مهما كان الانسان دا غالي علينا جدا إلا انه المفروض ما يكونش النقطة الفارقة فى حياتنا هو حاجة حلوة جدا ودافع لينا وحاجات كتير لكنه مش نهاية العالم

والمسامحة مش ضعف ابدا لا كانت ولا هتكون لكنها بياض قلب واحد ما بيعرفش يزعل ولا بيعرف يجرح مش ذنب ولا ضعف دا ميزة المفروض نستغلها اما اللى يكرر اخطاءه ويجرحنا دايما على اساس اننا بنسامح دايما يبقي ما يستحقناش ولا يستحق ثقتنا وحبنا ولا اي حاجة خالص

الحاجة اللى نفسك فيها ومش قادرة تملكيه خلاص سيبيه هتتعبي وتتعذبي شوية بس بدل ما يبقي طول العمر متعذبة احسمي امرك من دلوقتى

وكمان ما تجبريش عنيكي تبكي سيبها هي لما تعوز

اقولك كمان على حاجة مش لوحدك اللى محسش بيحس بيكي كتير جدا كدا وانا اولهم وحدة مقيته علشان اللى حواليا مش حاسين بيا بي بدأت اكون عالمي الخاص من ناس بتحس بيا ويستحقوا انهم يكونوا فى حياتي

لما تكوني وسط ضلمة خليكي انتى النور اللى بيدلك وسطها على الطريق الصح

اما الكلام ليه كان هنا مش فى حته تانية فى إرادة القادر ليس إلا
والعياط دا بيجي من جوا سيبيه فى الوقت اللى هو عايزة ما تتحكميش انتى فيه

خليكي اقوي مع نفسك إذا كنتي شايفة انك فقدتي كل حاجة فدي كل حاجة راحت لكن لسه فى حاجات جاية كتير تقدري تكسبيها تماما ابذلي جهدك علشان ما تخسريش اللى فات واللى جاي كمان

وخيلاتك والله مش وهم
انا دايما عندي احلام يقظة لحاجات مستحيلة بس بحلم وانا عارف يا احمد دا مش هيحصل بس بنحصل منها على لذة ونشوة بتخلينا نقدر نكمل الطريق بيها

بخصوص البوستات ابشرك ان اكتر وقت بكتب فيه هو فى المحاضرات وكمان وانا مضايق بكتب كتير جدا وفى الامتحانات والله العظيم بملي ورقه الاسئلة كلام وكتابات ملهاش علاقة بالامتحان خواطر ونثر وشعر حافظه بتاع حد ومقولات ليا ولناس تانية وحاجات كتير اوي

انا ما صدعتش ولا حاجة على العكس جدا انا مستمتع بالحوار وبتمني تكوني دايما احسن

اخر حاجة كلام دكتور ابراهيم الفقي

تذكر أن تعيش كل لحظة وكأنها آخر لحظة في حياتك ، عش بحبك لله سبحانه وتعالى ، عش بالتطبع بأخلاق الرسول علية الصلاة والسلام والرسل والأولياء الصالحين ، عش بالكفاح ، عش بالصبر ، عش بالحب وقدر قيمة الحياة.

تحياتي كتير وإن شاء الله بكره احلي
تشي

Che Ahmad said...

وسام

جبتي م الاخر
انا فعلا طبعت دماغى حطتها فى البوست دا من غير ما اقعد اذوق واظبط فيه

حطيته زى ما هو على طول

منورة دايما
تشي