ان يكون الفشل فنًا

كمصريين احنا بارعين في اننا نحول كل فشل لنجاح، براعة منقطعة النظير، اي فشل هو نجاح منا وفشل من اسباب اخري خفية، ربما هي الاخر في احيان كتيره وربما هي القدر في احيان تانية وهكذا.
خد عندك مثلا
ايام صفر المونديال اللي اشهر من نسر العلم اصلا، طلع علينا اعضاء الاتحاد الموقر وقالوا حصل خيانة وكلام كبير كدا، احنا كنا مية مية، وكل شاب مصري كان لابس تيشرت عشرين عشرة، هما اللى وحشين وضحكوا علينا وغرغروا بينا، وعادي الناس بتصدق
كل شوية يطلع مسئول م الحكومة يقول ان المعارضة بتسوء صورة مصر وان العجز سالب معرفش كام مش وحش، اصل احنا السنة اللي فاتت كنا عجز اكبر، دلوقتي احنا حققنا زيادة عن السنة اللي فاتت، هيييييييه، يا عين امك !! هو كدا بقي العجز مكفول وانا معرفش ؟؟ ما هو بردو فشل، ولا فشل السنة علشان اقل من فشل السنة اللي فاتت يبقي نجحنا !! وعادي الناس بتصدق
نيجي للناس بقي
الناس ف حد نفسهم مشكلة، بداية من ربنا عايز كدا، مع ان ربنا مش عايز كدا ولا حاجة بس احنا اللي مش بنعوز نغير الكدا دا، ولحد الكسل وانا يعني هغير حاجة
مثلا مثلا، القلش، واحد بيقلش، وواحد ما بيعرفش يقلش
واحد يقول افيه يقولوله ما بتعرفش تقلش علي فكره، او قلشه سخيفه !!!
فعلا ؟؟
هو القلش بقي فن، وفيه الحلو والوحش
القلش من زمان كان بيتقال ع الكورة
الكورة قلشت من علي رجله يعني الكورة طاشت، خربت، حاجة وحشة يعني
بعد كدا بقي اللي يقول مزحة وحشة وسخيفة قالوا عليها قلشة
بيقول حاجة وقلشت منه
طلعت اوت
دلوقتي لا
بقي في فن
فن الفشل
فن القلش
قلشة حلوة وقلشة وحشة، واحد متذوق للقلش وواحد ملوش ف القلش
بنخترع اختراعات علشان نبرر فشلنا، بل وبنحولها لمنهج حياة !!
انا مندهش الصراحة
دا كتير

4 comments:

بسنت الصاوي said...

كلامك كله صح بس امتى بقى نتغير ؟؟؟؟؟؟؟؟؟

Che Ahmad said...

امتي مش عارف والله
بس هي محتاجة وعي
الطريقة الصح لانتشاره مش عارفها بقي

iHibo said...

الفشل بداية النجاح
وتبريره خوف غير منطقي
سلام

Che Ahmad said...

سلام ورحمة الله
:D
تبريره ممكن خوف وممكن كسل وممكن اي حاجة بس اكيد مش حاجة حلوة