تاج تربيع

تاجين واحد هجاوب عليه بس والتاني هجاوب عليه وهمرر لكل خلق الله دا انا هفتري بس أصبروا
*********************

أيه صاحبة بلوج ( ايامهم سابقا ) بلا نيلة حاليا لقطت من عندها تاج كدا فى اللذيذ وقلت نجاوب عليه وثوابنا عند ربنا بقي


دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
دايرة مفرغة

كنت تفضل الدخول مستقل او تتبع حزب معين ؟؟؟؟
اكيد مستقل

اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
معتقدش هفضل على طول مستقل زى ما انا لان مفيش اى برنامج من بتوع الاحزاب عاجبني

اول حاجه هتعملها لنفسك ولاسرتك ؟؟؟؟؟
مش هعمل حاجة كأن مفيش حاجة حصلت هعمل للناس مش ليا

ايه المشروع اللى ناوى تعمله لاهل دايرتك ؟؟؟؟
المواصلات المشكلة الازلية لازم احلها او اتحل انا

قعدت فى المجلس جنب نائب مميز . من هو النائب ؟؟
هقعد فى حته فاضية لوحدي مش هقعد جنب حد اهو الواحد ياخد راحته فى النوم برضه

قدمت سؤال للحكومه ايه هو السؤال ؟؟؟؟؟
سمعتوا عن حاجة اسمها الفقرا !!؟؟

طلب احاطه موضوعه ايه ؟؟؟
التعليم واحواله اللى لا تسر اى حد والجزء الضئيل اللى متوفر ليه من ميزانية الدولة مقارنة بدول تانية زى اسرائيل اللى موفره 25% من الميزانية للتعليم مقابل 7 % بس عندنا

وبتقدمه لمين ؟؟؟؟
وزيري التعليم العالى والتربية والتعليم ورئيس الوزراء ووزير المالية

استجواب لاتنين من الوزراء موضوعه ايه ؟؟؟؟وبتستجوب مين؟؟؟
أنظر عاليه
دول تلاته ومعاهم رئيس الوزرا

انت مع الخصخصه ؟؟؟؟؟؟
أه بس لو مققنه يعني مش كل حاجة هنبيع فى حاجات ينفع وحاجات لا وكمان يبقي البيع مش نهائي ممكن يبقي إدارة بس زى ما كان بيحصل فى المترو كدا مثلا وكمان الاصول والاراضي نفسها تبقي للدولة

هل انت مع قطع العلاقه مع اسرائيل ؟؟؟؟؟وما يترتب عليه من معامله العدو ؟؟؟
مينفعش نقوم فى يوم وليلة نقول هنقطع معاهم احنا معناش حاجة نرد بيها عليهم لما نقطع علاقتنا معاهم لما يكون لينا وجود يحترم وكلمة عليا نبقي نقطع نحرق نـ**** زى ما نحب غير ان فى اتفاقيات مينفعش ننقضها كدا هى مش لعبة وواحد يقول والله ما انا لاعب

هل تؤيد الحرب على العراق ؟؟؟؟؟؟؟؟
لا أكيد مش علشان هى دولة صديقة ولا عربية ولكن علشان المبررات الواهية اللى الحرب قامت بيها لكن لو فى دولة حتى لو عربية او اسلامية لكن بتعمل ارهاب بس ارهاب بجد مش اللى امريكا بتضحك بيه ع الدقون يبقي لازم تقف عند حدها

هل تؤيد مرور الامريكان فى القناه ؟؟؟؟؟؟
الكلمة مطاطية كتير الامريكان
فى العام اؤيد اى عابرات او سفن للتجارة او الصناعة شغال وماله
لكن لو للحرب يبقي حسب موقفي من الحرب نفسها هل اؤيدها ولا لأ

هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟
محصلش والله
هو مستر ساركوزى جاب سيرتي فى التحقيقات ولا أيه !!!؟

بتمرر التاج ده لمين ؟؟؟؟؟
التمرير فى التاج اللى تحت

*********************************************
دا كان التاج الاول
اما اللى جاى فهو تاني تاج واللي هجاب عليه وهمرره لكل حد اعرفه ولو حد عايز يخده خير وبركه بس يبقي يسيبلي لينك البلوج بتاعه علشان نبقي نطلع ع الاجابات

1- انت ليه بقيت مدون ( يعنى ايه خلى الفكرة بتاعت التدوين تجيلك اصلا ) ؟؟
مش فاكر الموقف ساعتها كان ايه بالظبط بس كنت مخنوق من المنتديات والاشراف وكدا عملت مدونة علشان ابقي ملك نفسي

2- ايه هى اول مدونة عرفتها ؟؟
هى مدونة دلوقتى ما بقاش بيتحط فيها بوستات وهى دي اللى خلتني ابقي بلوجر وكمان المدونة بتاعه الوعي المصري

3- ايه اكتر سلبية انت شايفها فى المدونات؟؟
مممممممممممممم سؤال لذيذ بس مش عارف له إجابة صراحة

4- ايه اكتر حاجة لمستها بتفيد المجتمع من التدوين ؟؟
يعني بتزود خبرات الشباب وبتزود مدارك العقل والاستيعاب وبتوضح فكرة وجوب تقبل الاخر

5- هل غير التدوين جواك حاجة معينة ؟؟
اه إلى حد كبير

6- هل لقيت التدوين كتفريج هم ومنبر عالى تقدر صوتك يتسمع من عليه ؟؟
لقيت فيه تفريج هم فعلا وبنسبة كبيرة كمان

7- هل حسيت ان التدوين عالم كبير انت عايش جواه واصبحت فرد منه ؟؟
أه وبنسبه كبيرة جدا لدرجة انى مش بقوم من قصاد الكومبيوتر طول اليوم لما اكون فاضي ومفيش ورايا دراسة لو ورايا بقي دراسه بيقل اليوم لخمس ساعات بس انترنت وتدوين

8- هل اكتسبت صداقات من التدوين ؟؟
كتير وبعتز بيها اكتر من الصداقات اللى فى ارض الواقع بنسبه كبيرة بس مش تماما لأن فى ناس مينفعش حد يتخطاهم

9- لو اكتسبت صداقات .. ايه تقيمك ليهم بالنسبة لأصدقاء اللى تعرفهم من الشغل او ( الدراسة أو الجيران أو ... ) ؟؟
بالنسبة ليا انا معظم اصدقاء دراستي طول اليوم ( الاجازات يعني ) نايمين وبالليل ع القهوة ودا مش مودي خالص فبقضيها انا طول الليل والنهار ع النت والتدوين ومفيش مانع شوية جيمز بين الحين والاخر

10- هل أثر التدوين فى نظرتك للحياة من حواليك ؟؟
أه كتير
11- هل قفلت ( أو فكرت تقفل ) مدونتك فى يوم ؟؟ وليه ؟؟
لا محصلش لانى حتى لو بطلت تدوين هتفضل المدونة وقت من حياتى وفترة اعتز بيها حتى لو ندمت عليها لكنها فترة مش هتتمسح

12- هل فكرت تسيب التدوين تماما وتخرج من العالم دا ؟؟ وليه ؟؟
لا لأنه بصراحه عجبني كتير وانتشلني من عالم الواقع لعالم تاني رائع بتختار فيه انت كل حاجة تكون فين امتى وازاى ومحدش بيجبرك تكون فى المكان اللى انت عايزه

13- هتمرر التاج لميييييييييييييييييييين ؟؟
لكل اللى عندي فى الجرازر ريدنج ليست اللى عندي ع السايد بار وعلشان محدش يبقي ليه حجة هكتبهم كل اللى اتوقع انهم يردوا بترتيبهم فى الليست ودا ترتيب عشوائي اصلا
ودروب فروم ذا اوشن بردو
اكيد حبيب قلبي اللى مقدرش انساه فى الاوقات الجميلة دي كييييييييييييييييييييييييكو
وحبيب قلبي التاني بقي احمد باشا فهمي
ومش قادرة كمان
ولمرمر اللى بقاله شهرين سايبة المدونة من غير جرة قلم
ولأبو صلاح علشان يرجع بقوة للمدونة
ولمحمد باشا صبحي اللى تقريبا اكتر حد خد منى تاجات
وللجميل جدا ساجي علشان يبطل شوية من الخزعبلات بتاعته :P
والوافدة الجديدة على عالم التدوين صفا
ولنيرة علشان الدعوة الجميلة بتاعه الاسبوع اللى فات :D
ولسالي صاحبة المستند المفقود واللى شكلها اتحولت علشانه للتحقيق وما ظهرتش من ساعتها ع البلوج
وليوتا البرئية هدية علشان الاغانى الجامدة اللى هى بتجيبها دي
وللواد سمير المهاجر قصدي المسافر اللى اتمسح سهوا وهيرجع بإذن لله لليست
وللمعلم يمني اللى بتغيييييييييييييييييييييييب وتغيب وترجع ببوست كل شهر
ولرامي متسر برويد مكافأة علشان الشريط الجديد
وللأستاذ سمير شاهين بتاع السيما :P
ولمصطفي فتحي عسي ان يرد عليه
ولسعودي علشان يعرف يكمل السعوديات بتاعته على راحته
ولمحمد باشا حمدي المؤلف العظيم
ولأنين ناي دكتور روفي
ولأبي اللى مجهزه لها علشان تاخده بالمركبة وهى جاية
ولنقيب المدونين التخليلي خالو أحمد الصباغ
وللكبير مقاما اسامة باشا يوسف
ولأيه فى ايامها سابقا ولا حالبا مليش دعوة ردا ع التاج اللى فوق خالص
ولمهند باشا الاهلوى اللى زى يعني احسن ناس احسن جمهور احلي فريق وسمعني احلي سلام :P
ولزيزي اللى بتتكلم عن الظمأ وهى معاها البيركله
ولنسرين بسيوني عسي ان تذكرها الاسكندريه

وكدا كفاية اوى للغاية خالص علشان انا حاسس انى فى فرح
واى حد عايز التاج يتفضله مع اطيب التمنيات بالتوفيق على رأي بتوع امتحانات التربية والتعليق

تشي

13 comments:

صفا سارة said...

اجاباتك على التاج جامده اوى على فكره وان شاء الله هاجاوب عليه

Che Ahmad said...

صفا

شكرا ع الاطراء ومستني إجاباتك

تحياتى
تشي

marmar said...

ايه اجاباتك الجامده دى يا تشى


هجاوب عندى ان شاء الله بس فى وقت لاحق اما اكون فايقه بس علشان الساعه 4 والواحد نايم خلاص

انتظرونا .........

أسامه يوسف said...

ماشى يا عم تشى
بس معلش انا هاتأخر فى الاجابه شويه ممكن بكره ممكن بعده

تمام يا فندم
صحيح هو فين البوست اللى كان بالانجليزى
انا سله كنت هاقراه وبعدين النت فصل وبعدين خرجت وبعدين رجعت نمت وصحيت مش لاقيته

يلا يا سيدى
سيريلاك"سلام"

abo salah said...

بعد السلام عليكم

ازيك ياعم تشي ؟
ماشي ياباشا كده تبقي في حفل عشرينيات في النقابة وما تشوفنيش

طيب دا انا حتي كان صوتي عالي وناقص اطلع اغنى مع فريق حبيبنا

والله عندك حق كان يوم رائع
وتخيل انا كمان كنت في موود وحش جدا .. وما فرفشتش شوية الا لما روحت الحفلة دي

ولولا مصطفي سعودي اللي خد سمير الاسكندراني مننا كنا زمنا باتنا هناك

بصراحة كان يوم جميل الا حاجة واحدة بس ضايقتني وهيا انك تكون معايا فيها وماأشوفكش ولا تشوفني

عامة السنة الجاية هاعمل حسابي وهاحطلك منديل احمر في جيبي عشان تعرفني

وبخصوص التاجات اجاباتك جميلة ياباشا
واتكل علي الله انت بس ورشح نفسك وانا هاديك صوتي

وشكرا ياباشا علي التدبيسة دي
تاجين حتة واحدة وتقولي ارجع للتدوين بقوة
دا انت كده هتقطم وسطي

وقبل انسي
باشكرك ياباشا علي
witty blogger award
وربنا يقدرني واردهالك

تحياتي

Che Ahmad said...

مرمر

شكرا ع الاطراء

مستني اجاباتك ولما الساعة اربعة ما صلتيش الفجر ليه قال هنام قال عيال اخر زمن

**********
يا عم اسامة ولا يهمك انت تجاوب وقت ما تحب
والبوست الانجلش هنزله تاني بس شوية كدا لما نخلص من التاجات

**********
ابو صلاح
ازيك انت واخبارك
عارف انت لو كنت موجود ع البلوج كان بقي ممكن لكن انت كنت غايب غير انى عرفت متأخر جدا
هو انت كنت م اللى بيغنوا معاهم انا كنت منزى فى ركن بعيد هادئ علشان كنت لوحدى مش أكتر

وفعلا اليوم كان جميل وياللا بقي نعمل ايه فى مصطفي سعودي خيرها في غيرها

السنة الجاية إن شاء الله اشوفك بس بلاش حكاية المنديل الاحمر لحسن يقولوا ليه علاقة بالفلانتين ولا حاجة اصل اللون الاحمر فى اليوم دا يالذات يصيبني بالاكتئاب :D

قشطة كدا ضمنا اول صوت ( صوتى مش هيحسب علشان مش ناوي ارشحني )
وعموما دي حاجة صغيره دول تاجين بس ولا فيها قطم وسط ولا حاجة

وع الجايزة دي اقل حاجة وبجد تستحقها يا افندم


تحياتى كتير
تشي

Anonymous said...

أحلى شي انتي انتقمت من التاج ودبستو لعاااالم كتير
:D
اجابات تدل على شخصية صاحبها

دمت بود

روري

Che Ahmad said...

روري
اول زيارة ويا رب ما تكونش الاخيرة
يا ريت يكون البلوج عجبك
وما قلتليش الاجابات بتدل على شخصية عامله ازاى ؟؟

نورتيني
تشي

soso said...

تشىىىىىىىى
انا هنا لم احول الى التحقيق
لسة شوية وهروح لوحدى
شكرا على التاج
اجاباتك شبهى
مبلش اخدة بقى
واقول انظر بلوج تشى














طيب خلاص متزعقش
تمنياتى بالخير لك

soso said...
This comment has been removed by the author.
Ahmed Fahmy said...

مي تووووووووو يا تشي اول ما النت يتظبط ماتقلقش هاجاوب علاطوووووول

Anonymous said...

والله يا تشي مش عارفة اشكرك ازاى

فعلا
بجد
شكرا اوي:)
والله يكرمك

مش قادرة

Che Ahmad said...

كويس الحمد لله
انا قلت المستند الضايع دا بوظ الدني ابس الحمد لله سليمة
وبتشكريني على ايه دا التاج دا اقل واجب يا افندم
وحتى لو اجابتك شبهي التعبير لوحده يستحق انك تجاوبي
:D


**********
فهمي
منتظر اجاباتك اهو النت وصل اهو

**********
مش قادرة
ولا شكر ولا حاجة دا اقل حاجة عندي
ربنا يخليكي



تحياتى كتير
تشي