نحن من نسيء

وانا بتمشي فى عالم البلوجرز الواسع عديت على بلوج اسمه سندباد لصاحبه اللى مسمي نفسه ابن السين مع كمية التفاهات اللى البلوج بتاعه ومع ان اللادين زى ما عرفه حد قبل كدا هو طريقه للوصول للحقيقة والحرية واتباعها إلا ان ابن السين دا وضع كل همه فى الإساءة إلى الإسلام والإسلام بيه لا هيزيد ولا هينقص
دا جزء من بوست كتبه ابن السين
ماذا تقرا فى الأخبار عن المسلمين واحوالهم بالطبع لن تجد الا الارهاب والعدوان والقتل وسفك الدماء فتعاليم الاسلام التى تحث على قتل الاخر ومعاداته وتكفيره وماذا تسمع عند الدعاء فى صلاتهم فى اى مسجد من مساجد المسلمين لن تسمع الا (اللهم زلزل الارض من تحت اقدامهم .اللهم يتم اولادهم .اللهم دمر اقتصادهم .اللهم رمل امهاتهم .اللهم ارينا فيهم يوما كيوم عاد وثمود .
أنا مش عايز اعلق على البوست كله لا أنا عايز اعلق على الحته دي بس وأن ازاى أصبحت الاسءة للإسلام منا احنا كمسلمين لأننا نسينا كل الرحمة فى دينا ونسينا أنه دين المعاملة وأصبح دعائنا على الاخرين بيتضمن اننا نتمنى ليهم الموت وان سيداتهم يصبحوا ارامل وان اطفالهم يموتوا كأن دا هو أمر الاسلام لينا من هنا أصبحنا أحنا اللى بنسيء وبنجعل من دعائنا حجة ياخدها علينا البعض مع إن عمر ما الاسلام امرنا بكدا الاسلام ما امرناش بقتل النساء أو الاطفال وما أمرناش ان يكون طريقنا هو القتل والتدمير وأن اللى بيعمل كدا هو عار على الاسلام وصاحب سلوك لايليق على الاطلاق وصمه بالاسلام فالاسلام هو دين السلام وهو اصلا لفظ مشتق من السلام .
يا ريت نكون ارحم من كدا ونعرف ان زى ما احنا هنفضل نتمنى ليهم الموت ربنا مش هيستجيب لأنه اصلا ما أمرناش بالقتل وفى وقت زى دا احنا فى حاجة للحوار اكتر كتير على الاقل لأننا فى موقف الضعيف ودي حقيقة ما ينكرهاش إلا مكابر .
اتمنى اننا قبل ما ندعي نشوف الاسلام صح الاسلام السلس اليسير ومش لازم نكلكع كل حاجة وقبل ما نعمل الحاجة نشوف هيبقي تأثيرها ايه بس كدا كفاية .

11 comments:

Drop of the Ocean said...

بن السين وغيره كتيييير مش بياخدوا بالهم ان فى فرق بين انتقاد الاسلام ، وانتقاد المسلمين ، وانتقاد الثقافة الاسلامية لان كلهم غير بعض. لما المسلمين يدعوا على غير المسلمين ده مش دليل ان "الاسلام دين ارهاب"

محمد-نبى الاسلام- وهو بينزف فى غزوة رفض انه يدعى على الكفار (اعداءه فى وقت حرب) ، قال لم "انى لم ابعث لعانا انما بعثت رحمة" .

للاسف المسلمين خلوا الاسلام دين مشوه تماما واكتر دين يساء فهمه ، ولما حد يسئ فهم دينهم يزعلوا ويتجننوا

لكن ده مش نفى لأن فى الاسلام نقط محل انتقاد فى علاقته بالاخر ، و مظاهر "الامبريالية" الدينية فى القران والسنة ، و محورية الجهاد والحروب فى التاريخ الاسلامى.

مهما كان ، لازم لما ننتقد ننتقد صح

Che Ahmad said...

دروب
جبتي انتى المفيد ما بيفرقوش بين الاسلام والمسلمين
جميل اوى المثال اللى قولتيه

بس كدا
تشي

mesh2dra said...

السلام عليكم

فعلا يا اخي
احنا اللي بنسىء للأسف

****
ارسى بقى على بلوج واحد:P
مش كل شوية تغيير

****

ربنا معاك في الامتحانات
وتعدي على خير

سلاماتي

mesh2dra said...

انا بس جاية أرخم

اخبار الامتحانات ايه

خير ان شاء الله

Anonymous said...

احب بس اقول لحضرتك حاجة ...لو حضرتك فتحت سورة نوح هتلاقي ان سيدنا نوح عليه السلام دعى على الكفار بالهلاك ...وده في القران (وقال نوح رب لا تذر على الارض من الكافرين ديارا * انك ان تذرهم يضلوا عبادك ولا يلدوا الا فاجرا كفار )

يعني وهو رسول دعا عليهم

زائد ان الاية دي موجودة في القران ...يعني الدعاء على الكافرين بالهلاك مشروع ....

وبعدين بعد كل اللي بيعملوه فينا ده ..مش عاوزنا ندعي عليهم بالموت والدمار ......ده ابسط حاجة في حق اخوانا المتبهدلين في فلسطين والعراق وكل مكان ....

يعني انا عندي سؤال

لو حد لا قدر الله كان سبب في موت احد والديك بعيد الشر طبعا وربنا يحفظهم ويحميهم

مش هتدعي عليه ان ربنا ياخده ...وياخد اهله كلهم

احنا مش حسين بالنار عشان احنا مش فيها يابشمهندس......

ولا حضرتك فاكر انهم يعني بيتمنوا لينا الخير .....سبحان الله

ده هم كلهم همهم انه ييتموا اطفالنا ويرملوا نساءنا ويشتتوا شلمنا

وافتكر انك لو عرفت ان لو في انسان مسلم حتى مش كافر بيتمنى ليك الموت ...هتكرهه من كل قلبك وهتتمناله الموت ...ومش بعيد تدعي عليه

يابشمهندس ...اللي عاوز ينتقد الدين مش هيغلب .وهيدور على ميت الف حجة واهية وضعيفة زيه ..المهم حنا منتاثرش بكلام الناس الضعيفة الدنيئة دي

وشكرا جزيلا ليك

Drop of the Ocean said...

غير معرف..

كنت واثقة ان فى حد هيجى يقول الكلمتين دول!!(وش معصب)

نوح دعا قومه الف سنة إلا خمسين عام (950 يعنى سنة لو عندك مشكلة فى الحساب:)) بعدين يأس منهم فدعا عليهم ...لما انت تدعى "الكفار" 950 سنة او حتى 15 سنة وتعمل اللى كل اللى عليك معاهم ومحدش يستجيب ساعتها ادعى عليهم (وش مطلع لسانه)

دلوقتى ادعيهم بدل ماتدعى عليهم

وكمان اشمعنا فى دى سايب الاقتداء بسيدنا محمد وبتقتدى بسيدنا نوح ، بقولك محمد (رفض) يدعى عليهم .. ده لما اهل الطائف طردوه وسلطوا الاطفال يحدفوا عليه حجارة لحد مانزف لما رفع ايده يدعى قال ايه ؟؟؟ "يارب خدهم وخد عيالهم اللى كانوا بيحدفونى بالطوب "؟؟؟ ..قال اللهم انى اشكو اليك ضعف قوتى ...إلخ

وكمان مين المقصودين "بالكفار" اللى بتقول انهم بيتمنوا اننا نهلك دول؟؟؟ والله اليهود نفسهم مش بيدعوا على المسلمين ولا على المسيحين كل صلاة زى مابيعملوا ائمة مساجدنا ... بعيد عنك احنا عندنا عقــدة كراهية بنتولد بيها قال ايه خير اللهم اجعله خير بنشوف ان كل الناس بتكرهنا فنعمل ايه ياترى لازم احنا كمان نكرههم، فنلم شعب او سلالالة او اصحاب توجه معين ونحطهم فى سلة ونختم عليها (اعدائنا) ، على رأى واحد
..الامـــــــــة
..كلهـــــــــا
..محتــاجــــــة
..طـــــــــبيب
!!نفــــــــــسى

تحيــــــاتى :)

Ehab said...

drop from the ocean
rnty sa7 fe mawdo3 el nafsany aha


che
ersaa 3la 7eta ba2a ana t3bet mn kotr el gatey warak :D

we eah a7'er a7'bar wekey
ama ,a3ko ya redala fe el 7ewar daha

Che Ahmad said...

مش قادرة
اديني رسيت ع البلوج دا حتى اشعار اخر
انا خلصت امتحانات اخيرا اهو عديت على خير او على شبه خير بس الحمد لله مفيش خساير فى الارواح :D

مش قادرة تاني
لا دا انتى تشرفي فى اى وقت البلوج بتاعك الامتحانات خلصت خلاص بسه بقي البلوة الكبيرة :)

تحياتى كتير
تشي

Che Ahmad said...

انونيموس
احب اقول لحضرتك ان النبي عليه الصلاة والسلام قال ما بعثت لعانا

وبعدين مين قالك ان الدعاء بالهلاك مشروع رد دروب يكفي بس انا مستغرب من ان فى حد بيفكر بالطريقة دي

وبعدين ايه هو اللى بيعملوه فينا بقي انت من المؤمنين بنظرية المؤامرة شكلك احب اقولك ان اللى بيعملوه فينا احنا السبب الاول فيه

عارف لو حد كان السبب فى اى مصيبه ليا ممكن ادعى عليه بس مش معنى انى ادعى عليه يبقي كدا صح لا انا هكون غلطان ساعتها بس لانى هكون فى حالة نفسية وحشة مش هكون بعي انا بعمل ايه بس عموما مش هدعى على اهلة وكمان معتقدش انى ممكن ادعى بالموت على واحد مهما كان يمكن موته يكون هـ ييتم اولاده اوهيخلي حد تانى فى نفس موقفي وانا محبش حد مهما كان يعيش مأساة انا عشتها او حتى ما عشتهاش

حاجة كمان يمكن احنا مش حاسين ودا صحيح وكمان صحيح انهم مش بيتمنوا لينا الخير بس مش معنى كدا اننا ما نتمناش ليهم الخير النبي عليه افضل السلام كان بيدعوا للكفار ربنا يهديهم ومنعنا من الدعوة عليهم وقال فيما معناه يعني يمكن يخرج من اصلابهم من يعبد الله وينصر الاسلام
على فكرة انا ممكن اكره ولو انى ما بحبش اكره حد ابدا إلا فى الشديد القوي ومش بدعي عليه يمكن ساعات اقول منه لله ولو حد بيتمنالى الموت عادي يعني ما يتمنى اللى عايزة اصلا مش بإيده وانا مش هدعي عليه ولا هكرهه انا اصلا بعيش فى وسط فى منه بيكرهنى وبيتمنى ليا حاجات مش كويسة بس عادي يعني مش بتفرق قوى معايا وعلى فكرة عمري ما اتنميت ولا هتمنى لحد انه يموت مهما كان جنسه او عقيدته ومهما كان موقفه منى
صحيح كمان اللى عاوز ينتقد الدين هيغلب وهيغلب قوي بس اللى عاوز ينتقد سلوكنا احنا المؤمنين بالدين مش هيغلب ابدا وعلى فكرة احنا مش لازم نتأثر بكلام الناس دي اوكى بس برضه لازم نشوف هما قالوا كدا ليه ونصلح من نفسنا علشان ما نسمحش لحد مرة تانية انه يسيئ للإسلام بسبب سلوكنا كمسلمين

تحياتى
تشي

Che Ahmad said...

دروب
انا كمان محتاج دكتور نفسانى
بجد والله بس الاسباب تختلف بقي

ياللا تحياتى كتير
تشي

Che Ahmad said...

ايهاب
اديني رسيت اهو ربنا يستر بس :D
ويكي انا مقصر في حقها على فكرة بس اعمل ايه بقي الكلية والميد تيرمات

ياللا تحياتي
تشي