ويكي تاني


حاجة كنت عملتها من زمان وتقريبا نسيتها او غفلت عنها بمعني اصح الحاجة هى حملة ويكيبيديا العربية واللى كنت بقول فيها اننا نساعد في تطوير ويكبيديا العربية وبدل ما احنا بنستفيد بس ( دا إذا كان حد بيستفيد من ويكي العربية ) نفيد كمان وكل واحد يدور على حاجة يحاول يترجم ولو جزء صغير اوى منها واللى بعده يكمل واللى يعده تكمل ويكيبيديا العربية وتبقي حاجة نلجأ إليها فى كل وقت محتاجين أي معلومة فى اى حاجة من بوست قديم كتبته زمان فى البلوج القديم بتاعى عن نفس الموضوع
وانا بتكلم مع دروب فروم ذا اوشن الكلام جاب بعضه عن ويكيبيديا وانها مليانة اخطاء كتير فى الترجمات العربية للمقالات وكمان اننا مش بنحاول نصلح الحاجة اللى احنا شايفنها غلط رغم اننا عارفين اننا ممكن نصلحها ، ودى فكرة الويكيبديا اصلا ، ان اللى عارف حاجة يحطها ، واللى شايف حاجة مكتوبة غلط يصححها .. بس للاسف محدش بيعمل كده ، كله بيستفيد بس ، وحتى لما بنفكر نستفيد مش بنلاقى حاجات ، ودا بسببنا احنا ، لو قارنا بين الويكيبديا العربى والويكيبديا الانجليزى .. هنعرف الفرق ، على ويكي انجلش مفيش كلمة تيجى على بالك إلا لما تلاقيها ، لكن على ويكى بتاعتنا ياما دورنا على حاجات مهمة وملقنهاش او لاقينا مقال كلمتين ، وعلشان كدا قولنا نعمل حملة لتطوير ويكي العربية ، كل ماتعرف موضوع وتحس انه مهم، وغيرك هيستفيد لو عرفه ..ادخل على ويكيبديا واكتبه وانشره ، كل ماتدور على حاجة على ويكيبديا عربى وتلاقيها ضعيفه واضطريت تدخل على ويكيبديا انجلش ...ترجم اللى لاقيته وضيفه ، مش هتاخد ربع ساعة وحتى لو اخدت ربع ساعة المرة الجاية هتلاقي اللى انت عايز تستفيد بيه موجود قدامك من غير ما تتعب .
عيب لما نلاقى كل المقالات العربى مكتوب عليها(هذا المقال لا يطابق معايير ويكيبديا)
او نلاقى (هذا المقال بذرة بحاجة للنمو)

ياريت نبقى ايجابين ، ونخلى ويكيبديا العربى ، تبقى شجرة معرفة كبيرة .. نستفيد منها كلنا
يللا كلنا نويكى بالعربى
دا الكلام بتاع البوست القديم ومنه هتوضح الصورة اكتر منه واللى عايز اقوله على رأي كلمتنا يا ريت نبقي بوسيتيف أو +ve
زى ما بيحبوا يكتبوها
يا ريت نبص هنا ونشوف الفرق بين ويكي العربي وويكي الانجلش

دا نتيجة بحث الويكيبيديا العريبة عن كلمة يوتوبيا
من هنا

ودي نتيجة البحث عن نفس الكلمة بالانجليزي
من هنا
حاجة لسه مفكر فيها دلوقتى نتيجة البحث عن نفس الكلمة فى ويكيبيديا العبرية
من هنا

يا ريت كدا نفكر ونشوف الفرق بين التلاتة بجد منظر يكسف جدا ويضايق قد ايه الفرق شاسع بين التلاتة العربية فيها كام سطر العبرية فيها اكتر بس مش قوي يعني على الاقل فيها حاجة مفيدة الانجلش فيها كل حاجة

جيت احسيبها بطرقية عدد المتكلمين باللغة حول العالم لقيت يمكن الانجلش ليه ناس كتير بتتكلم بيه وعلشان كدا مليانه ويكي الانجلش بالمعلومات طيب والعربي ؟؟؟؟ بالتأكيد اكتر من متحدثي العبرية حول العالم يعني المفروض بنفس المقياس نلاقي ويكي العربية احسن
لكن للأسف دي مش الحقيقة

لكن المقياس الصح ان احنا كسلة ( وأنا اول واحد ) الكسل بيجري فى عروقنا مجري الدم وبنعمل بس علشان مصلحتنا الشخصية اخد المعلومة اللى نفسي فيها واجري ومش مهم بقي باقي الدنيا تضرب تولع انا مليش دعوة انا اخدت اللى عايزة ولو ما بطلناش نقول كدا عمرنا ما هنحقق حاجة وهنفضل على طول محلك سر وهنفضل نعتمد على الاخر علشان يجيبلنا كل حاجة لحد عندنا وكل حاجة دي تشمل المعلوماتية برضو
كنت بكلم رامي " مستر برويد " وقالى على ان الويب اتنين محدش عربها ( عملها تعريب يعني ) غير شوية قليلين يتعدوا على صوابع الايد الواحدة ( وهو منهم على فكرة ) ولسه الناس عايشه بويب واحد
مقصدي من الكلام اننا نبدأ بنفسنا ما نستناش حد يطلعنا لقدام لا كل واحد يتحرك ويعمل اللى عليه ( ويا سلام لو يعمل اكتر ) علشان نبقي فعلا بنعمر الارض ونبقي منتجين مش بس مستهلكين لما تجود بيه يد الأخرين

اتمني تكون رسالتى وصلت واتمني كمان اننا ما نكونش سلبيين وكل واحد يبدأ بنفسه

*******************
اللى فكرني بالموضوع حوار مع frakeghost

تحياتى
تشي



***********************************************
تحديث : ازاى نعدل فى ويكيبيديا
هنبدأ فى الموضوع دا مثلا عن اليوتوبيا واللى هو صغير جدا
الموضوع مكتوب تحته
هذه بذرة مقالة عن شخصيات أو مصطلحات متعلقة بالفلسفة تحتاج للنمو والتحسين؛ فساهم في إثرائها بالمشاركة في تحريرها.
فى اعلي المقال ومن ناحية الشمال هنلاقي كلمة ( عدل هذه الصفحة ) زى اللى فى الصورة هندوس عليها ودي هتنقلنا لصفحة التحرير ::

ودي بتبقي موجودة فى جميع صفحات ويكيبيديا وكل المواضيع
دا هيودينا لصفحة التعديلات او التصحيحات على الصفحة اللى احنا عايزين نغير فيها
وعلشان الناس اللى لسه هتتعلم ويكي عامله صفحة ومسمياها ساحة اللعب علشان الناس تجرب فيها

ودي ندخلها من هنا علشان نجرب فيها


فى الصفحة دي واللى بتبقي موجودة فى كل المواضيع فى ادوات علشان تقدر تتعامل مع النص اللى انت بتعمله وعندك مكان الكتابة كمان ودا اللى بنكتب فيه ومن فوق ادوات التنسيق زى المنتديات والبلوجر تقريبا لكن ويكيبيديا التعديلات فى التنسيق ما بتظهرش مباشرة لكن بتتكود وبتظهر فى الاخر خالص لما تعمل حفظ

نشوف بقي الادوات واستعمالها
الاداة دي معوفة طبعا ودي علشان نعمل الخط بولد او عريض يعني ولما بندوس عليها ما بيظهر تأثيرها بس ويكي بتحط كود على الحاجة اللى احنا معلمين عليها ( مظللينها يعني ) والكود بيترجم بعد كدا فى الاخر خالص

الاداة دي كمان معروفة ودي علشان تعمل الكلام مايل
****
والاداتين دول مهمين جدا فى ويكي الخط العريض او البولد بيستخدم لما نكون هنعرف حاجة معينة يعني مثلا لما نيجي نعرف اليوتوبيا مثلا :
اليوتوبيا : لفظ بطلق على مدينة افلاطون الفاضلة
أما الخط المايل فدا بيكون علشان تنسيق اسم الكتب والأفلام والمسرحيات والالعاب يعني مثلا :

شفرة دافنشي واحد من اهم كتب دان براون واشهرهم على الاطلاق
****

الاداة دي بقي وظيفتها انهابتضيف بحث على الكلمة اللى احنا بنظللها وعلشان يوضح الكلام لو مثلا فى المثال اللى فوق

شفرة دافنشي واحد من اهم كتب دان براون واشهرهم على الاطلاق

احنا عايزين نعمل كلمة دان براون لما حد يدوس عليها يتنقل اوتماتيكيا لصفحة دان براومن فى ويكي او ع الاقل يعمل بحث عنها ويوديه لنتيجة الوحيدة او يعرض عليه النتائج ودا اللى بنشوفه فى الويكي الكلام اللى متعلم بالازرق ودي بيكون معناها معلومات عن الحاجة المعمولة بالازرق دي
ودي طريقتها بتكون اننا بنختار الكلمة دان بروان مثلا لما ندوس على العلامة دي هتبقي الكلمة بالشكل دا
[[دان براون]]
لكن لو عايزين نخلي الكلمة تروح لصغحة غيرها فى ويكيبيديا يبقي هنعمل الكود دا [[روايات عربية|روايات]] ودا لازم نضيف العلامة " | " دي ( ودي بتيجي باننا ندوس (شيفت +\) والكلمة التانية بنفسنا بالطريقة دي هتظهر كلمة روايات عربية واللى يدوس عليها يروح لصفحة روايات فى ويكيبيديا

الاداة دي لإضافة رابط او لينك للكلام بس خارج ويكيبيديا يعني برضو فى المثال اللى قبل كدا

شفرة دافنشي
واحد من اهم كتب دان براون واشهرهم على الاطلاق

لو انا عايز اعمل كلمة دان براون لينك لموقعه الرئيسي مش لصفحته فى ويكي هستخدم الاداة دي

لما ادوس عليها هلاقي الكلمة بقت بالشكل دا [دان براون] وبعدين نيجي احنا بقي ونضيف الرابط
[ دان براون http://danbrown.com]
مثلا يعني وبكدا يبقي اللى يدوس على الكلمة تظهر الصفحة danbrown.com

دي علشان نعمل خط كبير ودي غالبا بتكون لعنوان حاجة معينة
دي اداة إضافة الصور ودي ارخم حاجة فى الويكيبيديا ومحتاجة وقت كبير واللى مهتم بإضافة الصور يقري الصفحة دي
من هنا
دي اداة علشان لو فى كلمة معينة وعايزين نعمل بحث عن ملفات فيديو او صوت مرتبطة بيها بنختارهه يعني مثلا لو عاملين موضوع عن الدورة الدموية وعايزين اللى بيقري يشوف لو في فيديوهات عن الدورة الدموية داخل ويكي هنعلم على الكلمة وبعدين ندوس الاداة دي وهتظهر بالشكل دا واحنا بنكتب [[ميديا:الدورة الدموية]] وبكدا يقدر اللي بيقري يعرف اكتر عن الحاجة دي

بقية الادوات فيها اداة للإضافة المعادلات الرياضية واداة لعمل الكلام باهت كتعليق على الموضوع نفسه واداة ترقيم واداة لعمل نقط عند بداية كل سطر واداة علشان تضيف خد افقي كفاصل يعني واخر اداة اداه الجدول واللى بندوس عليه بيظهر مربع يطلب منك تدخل عدد الاعمدة والصفوف اللى عايزها فى الجدول


*************
اخر حاجة عايز اقولها ان كل الادوات دي مش محتاجين منها غير اداتي البلود والمايل علشان هما دول الاكثر استخدام فى الويكي ومش لازم نضيف كل حاجة بس لما نضيف حاجة معينة نضيفها بتنسيق كويس العنوان بولد او عريض واسماء الكتب والافلام بخط مائل
وفى اخر الصفحة هتلاقي حفظ التعديلات هتدوس عليها علشان يتم الحفظ
واللى عايز يشوف اكواد ويكيبيديا لو يحب يكتب بالاكواد هيلاقيها هنا
بس كدا
دا ازاى نضيف او نحرر فى الويكيبيديا بس يا رب الناس كلها تحاول تبقي إيجابية وتعمل حاجة

12 comments:

Anonymous said...

الحملة دي من اكتر الحملات اللي قلايتها على النت وعجبتني
بجد تحياتي ليك
ونفسي تكتب موضوع كبير عنها علشان ننشره في كلمتنا
وليه تكتب
ممكن تبعت نسخة من الموضوع ده بعد ما تظبطه على ايميل المجلة؟
وبكدة يعرفها اكبر عدد من الشباب

Anonymous said...

ههههههههههههههههههههههههههههههه

mohand said...

السلام عليكم

انا كمان مش بثق في ويكبيديا العربي

ولاقيت فيه اخطاء كتيره

بس مكذبش عليك محاولتش اصحح

يمكن عامل الوقت واستغلاله

والايثار بالوقت لحاجتي الشخصية

انانية احاسب نفسي عليها احيانا

ان شاء الله احاول اكون من ضمن اللي يحاولوا يصححوا ويضيفوا

بس المشكلة اني لو كتبت معلومة وطلعت غلط واكتشفت كده
هزعل قوي قوي من نفسي حتي لو تراجعت وصححتها ممكن يكون حد اخدها غلط وانا السبب في كده

تحياتي

Ma7moud So3ody said...

بما ان ان كلمتنا سيرتها جت ف الموضوع
اكيد لازم آجي :D
اولا تحياتي ليك كتير يا تشي ع حماسك و ايجابيتك
وفعلا انا حصلت معايا و انا بابحث عن معلومات بالعربيه عن حاجه مهمه جدا و مش لقيتها

ده دورنا و ان شاء الله نعمل حاجه كويسه
بس لازم فريق عمل محترم نخللي الناس تبعت شغلها عليه يكون فيه مراجعه لغويه تحقق كمان عشان لو في اضافه جديده...وحتى علشان متلاقيش في اكتر من ترجمه لحاجه واحده
الموضوع اكتر من هايل و اعتبرني من العاملين معاكم ان شاء الله على قدر ما استطيع

Che Ahmad said...

مصطفي باشا
منور
سعيد انها الحملة عجبتك وبما انها عجبتك يا ريت بقي تشارك فيها بمجهودك معانا

**********

انونيمس
اولا ايه الضحكة الصفرا دي
ثانيا يا ريتك كنت تبقي عندك شوية شجاعة وتكتب اى اسم بدل ما انت متخفي كدا

**********

مهند باشا
ما هو انت مش بتثق علشان اصلا محدش بيحاول يضيف ليها ولو كل واحد خد مصلحته مشي يبقي مش هتكون احسن خالص بس اكيد هيبقي عندك شوية وقت فراغ بدل ما تضيعهم حاول تفيد بيهم الناس وويكيبيديا واحدة من اهم إن لم تكن الاهم فى الويب كله والمفروض نخليها احسن
المشكلة اللى بتقول عليها مفيش منها خوف لأن فى ناس بتراجع اللى بيتكتب بعد ما تضيفه علشان لو فى حاجة غلط

*********

سعودي باشا

يعني لو مفيش كلمتنا مش هتيجي ( مااااااااشي ماشي )
علشان بقي بعد كدا وانت بتبحث تلاقي اللى عايزه لازم تشارك انت فيها ولما كل واحد يشارك دلوقتى بكره كله هيلاقي اللى هو عايزة

حكاية الفريق دي عايزة ناس متطوعين متفرغين او ع الاقل عندهم وقت فراغ كبير ومينفعش بالنسبة لحد زيي بيسافر يدرس وكدا ممكن نشوف مكان زى الساقية مثلا يعملوا حاجة زى كدا لكن انا مقدرش عليها خالص الحكاية دي
لو تقدر انت هبقي اشارك


تحياتى ليكوا كلكوا وللأنونيموس الجبان :P
تشي

abo salah said...

بعد السلام عليكم

اولا واحشنى جدا جدا جدا والله
وبجد مش عارف اشكرك ازاى عن سؤالك الدائم دا عنى فى عز تقصيرى

وكفاية أوى انك كنت بتسأل وأنت عارف ومتأكد ان ممكن ماأردش عشان مش بأدخل المدونة من اساسه

ثانيا بخصوص حملة ويكى بالعربية انا باحييك عليها وعجبنى حماسك ليها اوى وأنا شوفت البوست دا فى مدونتك القديمة
بس انت عارف هيا المشكلة اننا مفتقدين للعمل الجماعى ومحتاجين نعمل كفريق للتطوير
بس البداية اننا نغير من انفسنا او نبدأ على الاقل بانفسنا

ان شاء الله دعوتك تصل لأكبر عدد ممكن من الجادين وتكون النتيجة متازة بإذن الله

تحياتى ليك

dr.Roufy said...

للأسف ويكي العربي متدهورة ..زي كل ماهو عربي الأيام دي
:)

لكن طبعا دعوتك..رائعة ياتشي..بالذات ان عدد العرب كبيييييير
ومستخدمي النت مننا مش قليلين أبدا
لكن للأسف واضح انه كعادة العرب بنستخدم النت في التفاهات بس

انا معاك في الموضوع دا..وباذن الله هابدأ فيه

تحياتي

Empress appy said...

طيب نصلح ازاى هااا مش تقول الطريقه للناس النايمه فى العسل زى كده علشان اعملها ولا تضرب بقى واخلص منك
ههههههههههه
ابقى قول ازاى الله يكرمك اصلى جهله شويه

Che Ahmad said...

ابو صلاح
وعليكم السلام

والله وانت واحشني وقلقنا عليك يا مان بس الحمد لله عودُ أحمد

حكاية فريق العمل انا عارفها صعبة شوية بس احنا ممكن كل واحد يشتغل لوحده وهما عندهم ناس متطوعين بيراجعوا اللى بيضاف ولو كل واحد اشتغل لوحده بعد كدا ممكن كل شوية يتجمعوا فى مجال معين

**********

دكتور روفي

يا ريت برضو تساعدينا وتنشري الحكاية دي بين اكبر عدد من اللى تعرفيهم وكدا نعمل علشان ويكي احسن

**********

ابي

الطريقة جايه حالا فى تحديث للبوست واديني هعملها اهو بس بلاش ضرب


تحياتى ليكون كلكوا وبالتوفيق إن شاء الله

تشي الحزين

أسامه يوسف said...

تشى
والله أنا كنت باحسبك نسيت حوار الويكى ده
علشان مش شوفت البانر بتاعها عالبلوجين الجداد
بس يالا كويس انك افتكرت وعملتها تانى

بس فى حاجه دلوقتى الترجمه من ويكى انجلش ماشى
بس انت بتتكلم على ان اللى يلاقى حاجه على موقع تانى غير ويكيبيديا وهى مش موجوده عليه يكتبها عليه او يكبيرها

طب وحقوق الملكيه الفكريه
يعنى مثلاً أنا كان عندى كتاب مزنوق فيه وعايزه جداً
ومش موجود فى بلدى مكتبات نضيفه فيها الكتب دى
ومش فاضى انزل الزقازيق
فنزلته من عالنت (وحتى الآن زعلان من نفسى) الكتاب ده موسوعة الظلام بتاع دكتور احمد خالد توفيق
طاب ما أنا لو كبيرت الكتاب كله على الويكى هاتلاقى حاجات جامده جداً
بس الملكيه الفكريه ؟؟!!

مستنى اجابتك يا كنج
ودعواتك مع المنتخب

Che Ahmad said...

اسامة باشا
والله المسألة مش بانرات والسلام بس هى امتى كنت هقدر اتكلم تاني عنها

بص اللى يلاقي اى حاجة عايز يضيفها اوكي لكن بدون خرق لحقوق الملكية الفكرية وعمرك ما هتلاقي اى حاجات محمية فى ويكي
ساعات ناس بتحط وصلات تنزيل لكتب بس من مواقع خارجية

المنتخب كسب اهو يا عم

******
حاجة كمان انا عملت شرح ازاى نضيف فى ويكي ونعدل بس منه لله بلوجر مش راضي ينشره خااااااااااالص
وهنشر التحديث اول ما بلوجر يرضي عليا

تحياتى
تشي الحزين

Che Ahmad said...

انا ضيفت التحديث بعد جهد مضني ومحاولات عميقة علشان بلوجر يرضي عنى ويشتغل وينشر البوست والحمد لله من امبارح بحاول لسه منشور دلوقتى حالا فى بعض اخطاء فى الكلمات زى كلمة معروفة واللى اتكتبت معوفة
واوتوماتيكيا مكتوبة اوتماتيكيا
براون مكتوبة براومن
لصفحة كتوبة لصفغة

اسف جدا ع الاخطاء دي بس لو حاولت اغيرها يبقي بلوجر ممكن يقتلني وهيرفض تماما انه ينشر حاجة انا عارفه شراني

اخر حاجة الكلام دا كله انا اللى كاتبه وشارحه يعني مش ناقل من حاجة وساعات كنت بستعين بويكي بس

خالص تحياتى وامنياتي

تشي الحزين