بـــــــــراح


الشعر المحبوس ف العيون
وشعر الغجرية المجنون
والنفس ع الحبيب بتهون
والليل المليان بالمجون
كله بيطلب السماح
نفسه ف حته براح
زي طير السما مرتاح
لكنه خايف م الجراح
باصص لفوق للسما
بيسأل مين أنا
لكن حياة العنا
ما رضيالوش الهنا
طالب بالليل نور
بس الليل مقهور
علشان يجيب النور
محتاج ورق ممهور
الحب ف القلوب
الحب بلا ذنوب
الحب يبدر الحبوب
للناس لأجل تتوب
العيون ملاياها الدموع
تايهه وسط الجموع
والدمع يهد القلوع 
وصوت البكا مسموع
قلوبنا وحيدة وتعبانين
كما النجوم تايهين
ف الدنيا حيرانين
للحبيب مش واصلين

----------------------------
كتبتها ف امتحان الأم أي أس اللي ما حليتش فيه بربع جنية مخروم حتى ولا بريزة من الفضة الصغيرة الجديدة دي
بس كدا

5 comments:

سهر الليالي said...

طيب كويس انك خرجت من الامتحان بحاجه جميله كدا
رائعه بجد حلو جدا طريقه تنظيمك للمفردات
وعرفت بجد تعبر بصدق عن اللي جواك
احساسك وصل بسرعه لانه من القلب
احييك وانتظر منك المزيد

تحياتي
فراشه الشتاء

تخاريف خاصه! said...

حلوة جدا...سلمت يداك...

عجبنى اوى تعبير.. "نفسي فى حته براح...

Boba said...

الاول يعني ما شاء الله و الله اكبر
ادي الامتحانات ربنا يكتر امتحاناتك يا بني
بس بجد انا مش اخد بال ان دي تاعتك
بس مفاجأة حلوة .. تسلم ايدك

e_emy said...

جميلة بجد

هى كده الامتحانات بطلع المواهب

ربنا يزيدك

وتعوض الامتحان ان شاء الله ف الامتحانات الى جايه

تحياتى ليك

Anonymous said...

ههههههههههههههههههههههههههههه
هههههههههههههههههههههه
انتا فظيييييع
بس
عسل