كلمتين

عجبته نص رسمه الطباشيرة
والاستاذ قالهم يرسموا دايرة
بس هو عاجبته اوي النص التحتاني منها
ورسم نص دايرة باصص لفوق
زي ابتسامة بريئة
شافه الاستاذ زعقله
وضربه عصايتين
ما زعلش وفضل فرحان
ماشي طول الطريق بابتسامة
هابله صحيح بس جميلة
اصلها من قلبه وبريئة
رجع البيت فضل يرسم
انصاص دواير بتضحك
دخلت مامته وزعقت
وقالتله كلمتين
زعل شوية وعمل نفسه نايم
بالليل باباه راجع
فتح نور اوضته لقاه
بيرسم حاجات
شافها لقاها دواير
انصاص دواير
بصله كتير
واداله قلمين
عيط الولد
ومن يومها بيرسم انصاص دواير
بس باصه لتحت
وراسمه وش زعلان
م الدنيا الغريبة
اللى استكرت عليه ضحكتين

6 comments:

صفا سارة said...

جاااااااامده بجد
بس زعلتنى على الولد فى الاخر متعرفش تمشى اى حاجة تفاؤل للاخر ابدا ايه ده :D

Boba said...

ماشي طول الطريق بابتسامة
هابله صحيح بس جميلة
اصلها من قلبه وبريئة
رجع البيت فضل يرسم
انصاص دواير بتضحك

جاااااااااااامده
يخرب بيت الجمال ده

والله يكون في عون اطفلنا

:)

HaMaDa 3aFshA said...

:( :( :(
:((

Che Ahmad said...

صفا

طب وانا مالي
دا حال الدنيا والله

Che Ahmad said...

بوبا

تسلمي
ربنا يكون ف عونا اطفال وكبار

Che Ahmad said...

عفشة

للأسف دا قدرنا