عالم وسخة

دا اللى هو أحنا ... أحنا عالم وسخة ، ونستاهل كل اللى أحنا فيه ، علشان محدش هو اللى عمل فينا كدا غيرنا ، عالم وسخة التعبير الوحيد في موقفي دا من حرقة الدم اللى أنا فيها دي والله ، إيه رأيكوا نشوف الفيديو دا وبعدين نكمل ؟؟




مبسوطين يا عالم مبسوطين ، اللى فالحين فيه الاغاني حرام ولا حلال ، وابو تريكة هيلعب الماتش الجاي ولا لأ ، مبسوطين ، طبعا مبسوطين علشان هنصعد كاس العالم ، وانا كمان مبسوط ، دا احنا هنحط علي كوكب الارض والكواكب المجاورة وعلي المقيمين خارج المجرة مراعاة فروق التوقيت ، هنصعد كاس العالم ، ملعون ابو الكيميا ، علي العلم ، ع اللي هيتعلموا اصلا ، مالها الكورة ، بتكسب ملايين وزي الفل ، الواحد يخلص ابتدائيه ويروح يتمرن ويبقي احسن من الف دكتور ويفتح الف بيت وعيلة ، وايه يعني ، أهم حاجة أن النقاب فرض ، وشيخ الأزهر ابن تيت ، ونور الشريف راجل عظيم وبيواجه الامبراطورية الصهيونية العالمية وحده وازاي جريدة تفتري عليه ، دا عامل مسلسلين السنة دي رضي الله عنه ، مبسوطين ، انا رأيي نقلب الجامعات ديسكوهات ، وملاعب ، والرجالة تلعب كورة والستات يرقصوا ، وهنحط ع العالم ، وهنصعد كاس العالم ، بس عمرنا ما هنظمه ، أحنا بس هنصعد ليه ، وهناخد الكاس كمان ومن موقفنا بالكاس هنحط ع العالم ، لا تقولي نوبل ولا أي حاجة ، أهم حاجة انك ما تناقش ، ما تناقش أي حد ، دكتورك ف الجامعة ما تناقشهوش ، ولا احنا قولنا نقفل الجامعات اصلا ونقلب الدكاترة مدربين وياخدوا كورسات عند حسن شحاتة ، وشيخ الجامع متناقشهوش علشان هو معاه توكيل رسمي من السماء ان السمع والطاعه له ، قرارات الحكومة ما تناقشهاش علشان الحكومة لا يأتيها الباطل من بين يديها ولا من خلفها ، أحنا أسياد العالم ، أحنا خير أمة اخرجت للناس ، مش مهم نأمر بالمعروف ولا بالمنكر ، أحنا خير أمة وبس ، أحنا شعب الله المختار أصلا ، ولا تقولي بحث علمي ولا تقدم حضاري ، نظمنا كاس العالم للشباب وهنصعد كاس العالم للكبار ، ايه تاني فاضل يتعمل ، احنا وصلنا لأوج المجد أصلا .
هي دي المواضيع بتاعتكوا
يا عالم يا وسخة احنا في مزبلة العالم ، واللى فالحين فيه جمعة الغضب من اجل الأقصي
الأقصي مش هيتحرر طول ما كل واحد فاكر انه هيدعي وبس ، ما كل واحد يحترم نفسه ، ما كل واحد يقرا ، يا أمة اقرأ ، يا أمة بيقرأ كل واحد فيها ف السنة ربع صفحة بس ، الإسرائيلين اللى انتوا مطلعين عين اهاليهم دعا وشتيمة بيقرا الواحد أربعين كتاب ، يا عالم بنت كلب ربع صفحة واربعين كتاب ، النسبة 0.625% ما بينا وما بينهم ف القراية ، مش مكسوفين من نفسنا ، اللى فالحين فيه الكلام ، أحنا عالم وسخة ، وهنفضل عالم وسخة لحد ما نحترم نفسنا ، ومحدش يقولي حكومة ، مكتبة المجلس الثقافي البريطاني في مصر اغلقت لعدم الاقبال ، لعدم الاقبال ، علشان شعب مش عايز يقرا اصلا ، علشان حرام فلوس دافع الضرايب البريطاني تضيع ع الهوا ، تتقفل وتتفتح ف اسرائيل علشان بيقروا ، وبياخدوا نوبل ، م الاخر ايوة زويل مش بتاعنا ولم جه قولتلوا ابني الجامعه زي ما انت عايز وهنديك تصريح ، يا ولاد الكلب ، والباز جه ومشيتوه ، ومصطفي السيد جه ومحدش عبر امه ، راح الخليج بيبوسوا تراب جزمته .
احنا عالم وسخة ، واللى بيحصل فينا دا حقنا ، ومش هناخد نوبل طول ما اكتر شخص بيأثر فينا هو محمد ابو تريكة وتامر حسني ، انا محروق دمي ع الاخر ومش طايق حاجة ، ملعون ابو دا شعب ، شعبنا ، الشعب اللى انا منه ، شعب الله المختار
اتفو

12 comments:

Nafary said...

ما يعجبني ويغيظيني ايضا
انك دائما تقول ما اريد ان اقوله بنسبه تسعه اعشار أو يزيد
تفقدني الكلمات فلا اجد ما تستحقه من تعليق
ولكنك هذه المره كنت غير كل المرات
واعذرني ان لم اجد سوى هذا التعليق

يا عااااااااااالم ياااااااااااااوسخه

Mr.ProiD said...

عندك حق في كل كلمة قلتها يا صاحبي

و ده ديماً اللي انا بقوله كل ما حد يقولي الحكومه و الدنيا و الدين

الحكومه اللي مش عاجباكو منكم اساسا يعني لو كنا احنا معدولين كانوا هيبقوا معدولين .. و في الأول و في الآخر احنا احسن شعب ميدورش علي حقه في اي و كل حاجه و ده اللي جايبنا ورا

هتقولي ايه اللي انت جاي تتكلم فيه ده و ايه علاقته بالبوست هقولك هو ده بدايه كل شئ احنا فيه

اتنازلنا عن حقنا في التعليم و القرايه و الثقافه و الجياه نفسها

ضاعت مننا كل القيم و المعايير الحضاريه

اصبحنا شعب تافه بل اتفه شعوب العالم

كل اللي بندور عليه مين اللي بترقص في الكليب الفلاني و توقعاتك ايه لماتش مصر مع تفاهنا العزب

فعلاً فعلاً احنا عالم وسخه

Mohamed Ekram said...

ههههههههههههههههه عمرك ما هتتغير... بس المهم تكون فشيت غلك وطلعت الي جواك... اصل مختصر الكلام انه مفيش فايدة... مهما تحاول مفيش فايدة... مفيش الا حل من ثلاثة... الاول ان تنزل صاعقة من السما وتاخذ الكل والكل يستريح... ودي مش بعيدة من الي احنا بنعمله في نفسنا... يا اما ينزلنا نبي او رسول... ودي اكيد مش هتحصل... يا اما كل واحد يصلح في نفسه الاول وفي الدائرة الصغيره الي حوليه... على الاقل لما يقف قدام ربنا بقول انا عملت حاجة... لكن لو بتتكلم على المستوى العام يبقى مفيييييييش فايدة... هههههههههههههه سيبك انت انا عايز ارفع طلب للمشير طنطاوي ينزل قرار بالاجازة للعساكر في الجيش علشان نؤدي دورنا الوطني ونشجع مصر يوم ماتشها مع الجزائر :)

Cardiology Man said...

استريحت!
كده استريحت لما شتمت أهلك وأبوك وأمك وجيرانك وجدودك وجيرانك وأساتذتك وبلدك وكل اللي عايش فيها!
ما حدش يقدر ينكر إن إسرائيل والغرب متفوقين علينا في كل المجالات تقريباً، علم واقتصاد وفنون وأدب ورياضة وغيره، بس هل ده هو الحل، بس لو عايز تبقى زيهم اعمل زيهم، واعتقدش إن كان من ضمن اللي هما عملوه علشان يبقوا كده كان إنهم قالوا على نفسهم إحنا فشلة وعالم وسخة وعمرنا ماهننضف، هل تعتقد ذلك؟
الطريق طويل جداً وكل دقيقة تأخير عن إنك تبدأه هتأخرك شهور عن الوصول، هل بدأت بنفسك، هل حاولت توعي اللي حواليك؟ هل حالوت تعلم أخوك الصغير أو ابنك إنه لازم يقرا وماتبقاش كل علاقته بالقراية هي كتب المدرسة وبس، هل انت في شغلك بتأديه بصدق وإخلاص بدون كلفتة ولا تزويغ وبتشتغل وانت قلبك على مصلحة الأمة، لو بتعمل ده كله فعلاً ممكن تبقى بتعمله من غير ما تشتم في نفسك وفي بلدك لأن الشتيمة بتاعتك دي مش هاتزقنا ولو لخطوة واحدة قدام.

جايز تقول عليا باحلم أو مش عايش في الزمن ده، بس هل ده غلط إني أحلم، ولا انت ناس إن مشروع زي دولة إسرائيل دي كانت في البداية حلم اجتهد أصحابه على تحقيقه (بغض النظر عن الوسائل) لحد ما بقى حقيقة، وما تنساش إن اللي حلم بده مش هو اللي أسس الدولة ولا شاف هي وصلت لإيه دلوقت، الأحلام الكبيرة دي لازم تعمل على تحقيقها بدون ما تتخيل لإنك في يوم بتشوفها تتحقق، انت بتحلم لأجيال جاية، وما تتخيلش إن الحكاية كلها نبي أو مهدي منتظر هاينزل لنا كلنا هانمشي وراه وفي الآخر هاننتصر على العالم دي، من غير علم ولا عمل، وما تستناش قائد أو زعيم يجي ويقول لك اشتغل واجتهد علشان تبقى زي أمريكا ولا غيرها، لأن ده مش هايحصل إلا لما تكون التربة صالحة والشعب مهيأ لكده، ولو حصل والتربة مش صالحة هايفشل 100% وهيؤدي لإحباط هايرجعنا لورا مش هايقدمنا خطوة واحدة.

Ahmad Hima said...

اسامة
كلانا يحدث معه نفس الشيء
ربما الوحي يهبط علي احدانا فقط فينطق عن الاخر مرة انا مرة انت
وهكذا

Ahmad Hima said...

Mr.ProiD
ليك وحشة
للأسف كلامك صح
يا رب نفوق ونبص لنفسنا

Ahmad Hima said...

عزيزي اكرام

انت عارف اني وانت واسامة وغيرنا
اخترنا الحل التالت
بس انت عارف بردو ، ساعات الواحد بيجي عليه وقت يحبط ويا يسكت ف يموت يا يتكلم ف يقول اي كلام مش دايما بيكون مسئول

منورني

Ahmad Hima said...

Cardiology Man
معاك جدا
استريحت لما طلعت اللى جوايا
حتى لو كان شتيمة بقي
بخصوص التوعية ، اه الحمد لله
مش لوحدي ، انا جزء من منظومة جوا الكلية عندنا هدفها التغيير ، نخلي حياة البشر احسن
المفروض ما اشتمش
بس وقت ما كتبت البوست كان فاض بيا
كنت محروق دمي ع الاخر
كنت زهقت
محدش بيفضل طول الوقت جواه امل
بيجي لحظات ونقع ، للأسف
بس بنقوم
وغالبا بنقوم اقوي

انت مش بتحلم
دا اللى لازم يحصل لو عايزين نشوف بلدنا ذات قيمة ف يوم م الايام

انا عمري لا انتظرت لا مهدي ولا مسيح ، مش كفرا بيهم بس مش هفضل قاعد مستني حدث مجهول ربما افني قبل ما يحدث ، انا بعتبر اني المهدي دا ، وكل واحد انا شايف لازم يعتبر نفسه كدا ، يكون مهدي لنفسه وللي حواليه علشان يصلح نفسه واللى حواليه والدايرة تكبر

لما حد ما يجي الوقت بقي وتكون البلد حالها اتصلح
لنا الله

maiyosh said...

اولا وقبل ما اكتب تعليقي ...احب اقولك بالراحه شويه وما تحرقش في دمك كده حرام عليك نفسك
تاني حاجه بقي :انا بقالي تقريبا بتاع شهرين ما ضحكتش من قلبي زي ما قريت البوست بتاعك ده اولا من اسلوبك في الكلام اللي انت متمييز بيه واللي انا المره دي معااااااااااااك جدا فيه وبقولك زودلي شويه شتايم من عندك ليا يعني من اللي قلبك يحبه وضحكت برده لما شفت الفيديو يعني وزي ما تقول كده هم يضحك وهم يبكي بس انا مالاقيتش حاجه اعملها غير اني اضحك علي نفسنا واللي انا منهم برده واعتقد اننا هنفضل نضحك علي نفسنا كتيير ومش هنعمل حاجه غير الكوره وتامر حسني ..هههههههههههههههه
وارجع واقول برده بالراحه يا احمد
وتيييييييييييييييت
ههههههههههههههه
بس بجد وانا في عز ضحكي وانا بسمع الفيديو بجد عنيا كان ماليها الدموع علي حالنا ....ويمكن انا عشان بتكلم مع بابا فالمواضيع دي وموضوع البلد دي بذات كتير ....فبجد انا واخده موقف من زمان يمكن من وانا صغيره عن اللي بيحصل في بلدنا

ربنا يستر عالايام اللي جايه يا احمد

Ahmad Hima said...

ميوش

حرقة الدم بقت بتتصرف للمصرين علي بطاقات التموين وبياخدوها ف الجامعات مقرر رسمي ، فبقت العادي دلوقتى

فعلا هو هم يضحك وهم يبكي
بس انا تعبت م الضحك والبكا قولت اتكلم
علي رأي عمنا جاهين
اتكلموا اتكلموا اتكلموا

Anonymous said...

ايون
إحنا عالم وسخه ومش هننضف

Che Ahmad said...

قول يا رب ننضف