مصر

مهما حصل هتفضلي مصر :)




مبارة الأربع امبارح مكانتش إلا مجرد مبارة حتى انتهاءها بنص ساعة ، لكن بعدها اتغيرت شوية حاجات خلينا نرجع من الاول ، او علي رأي الشوالي ... عاود لي من الاول
قبل المباراة انا كنت مشحون جدا إيجابيا ومتأكد تماما إننا هنفوز بالمباراة لأننا كفرق رياضية أحسن من الشكائر كتير ، ومع إني مضايق من تصرف الشكائريين مع المصريين في الشكائر هناك ، لكن قولت معلش احنا احسن وبنفهم ومبارة تفوت والدنيا تعدي ، اتضايقت جدا خلال المباراة من تصرف لاعبي المصارعة بتوع المنتخب الشكيك وتعمدهم الإيذاء للاعبي المنتخب المصري والضرب بدون كرة ، وعلي رأي صلاح صديقي بيقول : انا عايز اعرف ازاي مدرب يقول للعيبته يتعمدوا الخشونة داخل الملعب ، انا اعرف لاعب بيلعب بخشونة مش فريق كامل ، الحيقية دي من اكتر الحاجات اللى ضايقتني ف الماتش ، لكن اللى حصل بعد كدا لما الماتش انتهي اني اضايقت جدا علشان الفريق الزبالة دا ما يستحقش يطلع كأس حارة دقدق حتي علشان يروح زفت عالم ، والهدف زي الزفت وملوش طعم ولعب زبالة زبالة يعني ، بس خلاص ... ما قد كان قد كان ، وموضوع وخلص ، اضايقت بقي ف الطريق ناس بتصوت وناس بتهبل وناس بتشتم في " مصر " يولع الماتش ع الكورة ، بس مصر لأ احنا ما بننتميش للكورة علشان نخسر ف نشتم في مصر ،  بس اتبسطت في الطريق كان في احتفالية وناس فرحانة بالمنتخب لإنه فعلا لعب حلو ، بس مكانش ليا نفس احتفل معاهم ، المهم رجعت الشقة بتاعتنا ف الزقازيق وفتحت النيل للرياضة وكان إبراهيم حجازي بيتكلم علي اللى بيحصل للمصريين في السودان من ضرب وتهديدات ، الصراحة اكتئبت بسببهم ، يعني فايزين وعملوا كدا ، ساعتها كنت قليل الادب اوي وما مسكتش نفسي .
قبل ما انام قررت اني هلبس العلم زي ما كنت لابسه قبل الماتش بكره واروح بيه الكلية ، وقد كان ...
أول ما نزلت م الشقة هناك ، واحد راجل كبير اتريق بس نفضتله علشان كبير ، وانا مستني اركب للكلية تعليقات كتير علشان اقلع العلم وكله كنت برد عليه ان دي بلدنا ومش ماتش كورة ، وروحت الكلية وكانت التعليقات لكل تعليق مستنيه انا رد ، اللى كان بيقولي لابسه ليه بقوله علشان دي بلدنا واللي مش عاجباه يسيبها ، واللى كان بيقولي اقلعه بقوله اللى مستعر من العلم يسيب البلد ويمشي واللى كان بيقولي ولع فيه بقوله ممكن اولع فيك انت ، وفعلا مكنتش بسكت لحد ، اي حد يعلق تعليق مسموع كنت برد عليه ان دي بلدنا واني فخور اني لابس العلم دا ، المهم فضلت لابسه طول اليوم لحد ما روحت من الزقازيق للبيت وشافني زمايلي من ايام الثانوية البائدة بردو اتريقوا ولكن بردو ما سكتش ومن اجمل الحاجات واحد زميلي شافني وبيقولي لابس ليه ، قولتله علشان دي بلدنا يا عبد الرحيم ومش ماتش كورة وخلص وهتفضل بلدنا وهفضل فخور بالعلم اللى علي كتفي دا ، الصراحة كنت كل لما بقول كدا ببقي فخور بنفسي واني بعمل حاجة راضي عنها اوي ، بس اكتر حاجة عجبتني واحد في الشارع قالى كدا انت قولت الكلمتين الصح ربنا يبارك فيك ، رديت عليه ويا رب الناس كلها تفهم الكلام دا ويبارك في مصر ويخليها لينا ويخلينا ليها .
اخيرا قبل الختام امبارح انتهت عندي بقايا قليلة كانت باقية للعروبة والاخوة والاشقاء ولكنها من اليوم بائدة ولا وجود داخلي إلا لمصر ف المقام الاول ومن ثم الانسانية ف المقام التاني واحب انوه ان شعوب كالشكائر وشبة الجزيرة العربية والخليج العربي لا يصنفوا بالنسبة إلا ضمن البشرية ولا أحمل لهم ادني مشاعر حب او احترام او اي مشاعر حتى الكره لا احمله لهم
هذا وخلص الكلام

7 comments:

Anonymous said...

يسلم تفكيرك وكلامك..يا أحمد
انت عملت الى انا تقريبا عملته مع اختلاف التفاصيل..مصر أكبر من كل ده..ياريت بس الغيرة دي تتوجه صح وتستمر ..للي ينفع مش يضر..ياريت
اما عن القومية والحوارات دي
فمش هقول غير زي ما الأبنودي قال..الله يجازيك يا عم عبد الناصر
:(

علي

Che Ahmad said...

بالظبط يا علي
الله يجازيك يا عمر عبد الناصر

منور يا صديقي العزيز

Anonymous said...

خسرنا ماتش .. بس كسبنا حب مصر :)

Che Ahmad said...

انا بحبها من زمااااااااااااااان
وللأبد

بس مبسوط ان في روح شوفتها ف الناس من حواليا

mesh2dra said...

الجميل بقى
انى "اكتشفت" انى بحب بلدى جداااا
سبحان الله
:))

بس يا تشي
اسمح لي اختلف معاك

اختى الصغيرة لما تطول لسانها عليا اما بأدبها اما بقول لبابا
وبما ان مصر والدول العربية مالهاش بابا وتعتبر مصر هى بابا وماما
فمن حقها تأديب اى حد يقل ادبه بالطريقة اللي هى شايفاها
بس ما بيقاطعوش بعض
ولا بيقرروا انهم ميكونوش اخوات عشان مينفعش
على الاقل يا اخى يربطنا الدين والاسلام
ودى حاجة مش هينة يا احمد

حأدب اخويا الصغير لو قل ادبه وحديله فوق دماغه
بس بيفضل اخويا الصغير

mesh2dra said...

اما في حالة لو هو اللي مش عايز يكون اخويا الصغير فبديله مطلق حريته بس ما اتصرفش بالمثل لانى اعقل ولانى اكبر ولان عليا المسئولية الاكبر وهى المحافظة على علاقتنا واخوتنا

يعنى لو انت مش عايز تكون اخويا
اوك براحتك جدا بس افتكر ان انت اللي قطعت
ويوم ما تحب ترجع حتلاقينى

maii said...

اولا يسلم الدماغ اللي طلعت الكلام ده والايد اللي كتبت والله اقل حاجه اقدر اقولها تسلم
ثانيا بقي علي الرغم من اني كنت من الناس اللي مضايقه من شويه فلعب المنتخب بس ده لحد بعد الماتش بساعات كده وبعدين لما شفت الضغط اللي كان عليهم والتصرفات الزباله من الناس الزباله دول بجد دول زباله او اقل كمان وجو التوتر اللي كانوا عايشين فيه من الحساله دول عرفت ليه ما كسبناش علي الرغم من اننا كنا ماسكين الكوره وبنلعب طول تسعين دقيقه
ثالثا بقي اللي انت عملته ده حصل فعلا النهارده نوره عملته وانا ما كانش معايا علم عشان اعمله وبرده نفس التعليقات الغريبه من الناس اللي عايشه في غيبوبه برده والله انا بعيط بالدموع عاللي بيحصل ده وهفضل حاطه علم مصر لحد ما كرامتنا تترد لينا
رابعا بقي وده الاهم ان علي الرغم من اني في حاجات بضايقني في مصر الي اني بمووووووووووووووووووووووووووووووت فيها وده من زمان وما اتصورش نفسي عايشه فحته غيرها وحبها ده زاد اوي وبان مع اللي حصل ده
ده وهي مطلعه عيني بحبها موت
اسفه عالاطاله