صور قاتمه

الأسبوعين دول انا مطبق فى الزقازيق يعني ما روحتش البيت
بس نزلت وسط البلد علشان احضر حفل توقيع كتاب تهامي اللى فى عمر بوك استور
وانا رايح م الزقازيق للقاهرة وانا راجع شوفت كام منظر اضايقت اوي الصراحة وكمان افتكرت كام موقف عدوا عليا ما يتنسوش ومواقف تجرح اوي وتضايق كتير
هبدأ بالمواقف اللى عدت عليا النهاردة
اول موقف قبل ما اتحرك م الزقازيق
نازل م التاكسي عند الموقف لقيت ولاد كتير م اللى بيعيشوا فى الشارع بصراحه كنت مضايق قوي ( عليهم مش منهم ) بس مقدرتش اعمل حاجة
شوية روحت اشوف الحجز لقيت لسه فاضل يجي ساعة وربع قلت اجيب حاجة اكلها جيبت باكو بوريو لأني اصلا بعشقه
المهم شويه ولقيت بنت من اللى قابلتهم لما نزلت بصت في باكو البوريو اديتهولها وانا مضايق اوي على الولاد دول كلهم اللى في الشارع وكل يوم والتاني الحكومة دايرة تقول مفيش مشاكل
امال يا ربي دول ايه بس دول مش مشاكل
دول تقدم ورقي
*****
دي واحدة ، التانية وانا فى المترو
نزلت كلية الزراعة قبل عبود وركبت مترو للسادات وانا راكب لقيت واحد قاعد وبنته الصغيره علي حجره
الراجل يبص لبنته ويبوسها وبعدين يقعد يكلم نفسه ويقلب ايديه وكان خلاص شكله هيعيط وكل شوية يبص للبنت ويبوسها ويضمها ليه اكتر
بجد المنظر كان صعب اوي اوي ومكنش عايز توضيح ان الراجل طحنته رحاية الدنيا وخايف على بنته من مستقبل اقل ما يقال عنه انه اسود سواد ليله من غير نجوم ولا قمر
ما بقيتش عارف اعمل ايه ساعتها الراجل صعبان عليا اوي بس اى تدخل منى معناه جرح لكرامته ومقدرتش اخليني ابطل اتابعه وما ابصش عليه وعلى بنته اللى زى القمر واللى شكلها بيقول ما كملتش تلات سنين على بعض
معرفش الراجل كان بيفكر في ايه بالظبط بس اكيد كان خايف
خايف م الاسعار وخايف البنت تنام من غير عشا وخايف وخايف وخايف
وكل يوم والتاني الحكومة طالعه تقول الحياة حلوة وميت فل وعشرة
*****
التالتة دي من قبل كدا والاخيرة علشان ما اتعبكوش معايا
المرة دي كانت وانا مع بابا ساعة مولد النبي اللى فات دا
واحدة جاية تشتري حلاوة المولد لولادها ومعاها ابنها الصغير الست عايزة تشتري لولادها حلاوة بصت على حلاوة كويسة ونضيفة بس للأسف طلعت غالية اشترت م الرخصية ... الرخيصة اللى هى انشف مال حجر وما تتاكلش وما حدش يرضي يبصلها اصلا بس هتعمل ايه يعني ما هى لازم تأكل عيلها علشان ما يبصوش لبرا وما يطلبوش حاجة من ايد حد وفى نفس الوقت معهاش اللى يخليها تشتري الحلو
نظره عينيها بجد جرحتى اوى ومكنتش عارف اتصرف فى وقتها
فكرت فى الموقف بعدين لقيت انى كان ممكن اتصرف واديها اللى هى عايزاه الحلو ومن غير ما اجرحها او احسسها بانها محتاجه بس ساعتها مقدرتش اخدت هى الوحشة ومشيت وانا مضايق اوي
لحد دلوقت زعلان من نفسي انى معملتش الصح وما اديتهاش الحاجة الكويسة وبتمني الوقت يرجع من تاني علشان اعمل دا لكن تفكيري ما اسعفنيش ساعتها
ربنا يسامحنى لو كنت غلطان
بس بعيد عني انا
فين الدولة والحكومة من كل دا
ليه فى ناس بتاكل اكل محدش يرضي يأكله للحيوانات اللى عنده
ليه فى ناس اصلا مش لاقيه تاكل
ليه فى ناااااااااااااااااااااااااااس كتييييييييييييييييييييييييييير اوي بتنام من غير عشا وبتصحي من غير فطار
انا مضايق اوي وكاره الدنيا اوي وتعبان اوي
حتى حسبي الله ونعم الوكيل بدأت افقد الامل انها تنفع معاهم ( انا مش بكفر لا سمح الله بس ما بقتش عارف اعمل ايه )
انا زهقان

وصلـــــــــــــــــــــــــــــــــــــــــــــــــــــــت

بدأ أول نشاط من كتيبه كليات الحاسبات والمعلومات
فى البلوج بتاعنا
http://fcis-daily.blogspot.com/
مستنيكوا هناك وانتظروا كل جديد منا قريب جدا

محاولات جادة للحياة

بدأت أول خطوة

ادعولي الدنيا تكمل معايا زي ما بتمني وادعولي واجه كل الصعاب واتخطها

ربنا معايا

تشي

مولاي صل وسلم دائما ابدا

النهاردة مولد النبي عليه افضل الصلاوات والتسليم
يوم عادي بيعدي زى اى يوم محدش بيحاول يعمل فيه حاجة اللهم إلا لو كان هياكل حلاوة المولد
فى ناس بتصوم اليوم دا وناس بتحاول تعمل خير
وفى أغلبية مش بتحاول تعمل اي حاجة اصلا
وزيه زى اى يوم
بالنسبة ليا هو زى اى يوم فعلا وللأسف
بس نفسي فى يوم مولده كلنا نعيد التفكير فى سيرته العطرة
نشوف تسامحه وحبه وطيبته
نشوف محمد الإنسان مش محمد النبي ( وإن كانوا الاتنين متداخلين )
لكن اقصد نشوفه فى تعاملاته واخلاق
ونعمل زيه ونتعايش مع الاخر بكل ود واحترام
نعيد قراءة كل احاديثه فى الاخلاق والتسامح

فى يوم ميلاده نتعلم من جديد ازاى نتعامل مع بعضنا والابتسامة عنوان لكلامنا
ازاى نتقبل الاخر ونتناقش علشان يظهر الحق

بس كدا نفسي اشوف الناس كلها مبتسمه ومش بتتجادل لأجل الجدال

تحياتى
تشي

منك لله يا اتصالات

فرحت اوي بخط اتصالات علشان بعرف ادخل ع النت بيه
لكن انهاردة لو انتحرت هيبقي بسبه بكلم حد ( مش مهم مين الحد دا دلوقتى ) والرخم يفصل فى اوقات قاتلة بجد خلي صورتي وحشة أوي قدام الحد دا
منك لله يا اتصالات
سوري اوي للحد دا ( مشيها الحد دلوقتى لغاية لما نخلص كلامنا ) والله مش بإيدي وانا اسف اوي

My Desktop

دا الديسكتوب عندي بحبه جدا
وبحس لما بشوفه بألفه غريبة
كل لما ازهق اروح جايبه واقفل كل حاجة تانية دونه

اضغط ع الصورة علشان تشوفها بالحجم الطبيعي ليها

قالوا وقلت

قالوا وقلت

قالوا : التكبر على المتكبر تواضع .
فقلت : التكبر تكبر بكل الاحوال .
قالوا : الوحدة خير من جليس السوء .
فقلت : الوحدة خير جليس على الإطلاق .
قالوا : استقبال الموت خير من استدباره .
فقلت : ومصادقته افضل كثيرا .
قالوا : قطار الفشل يسير على قضبان الكسل .
فقلت : قطار الفشل يسير على قضيبي الكسل والملل .
قالوا : إذا هبت ريحك فأغتنمها .
فقلت : إذا هبت ريحك فأغتنم خيرها واحذر من غدرها .
قالوا : ملكت نفسي حين ملكت منطقي .
فقلت : وملكت منطقي حين ملكت زمام قلبي .
قالوا : إن الغصون إذا قومتها اعتدلت .
فقلت : وإذا غاليت فى تقويمها انكسرت .
قالوا : تعاشروا كالإخوان وتحاسبوا كالغرباء .
فقلت : تعاشروا كالإخوان وتحاسبوا كالأخوان .
قالوا : احضر الناس رأيا من لم يغضب .
فقلت : وأسرع الناس رأيا من لم يفكر .
قالوا : من كتم سره كان الخيار بيده .
فقلت : ومن داوم كتم الاسرار ضاق قلبه .
قالوا : الاقتصاد فى النفقة نصف المعيشة .
فقلت : اصرف ما فى الجيب يأتيك ما فى الغيب .
قالوا : المساوة فى الظلم عدل .
فقلت : العدل والظلم نقيضان لا يجتمعان والظلم سواء ساوي او لم يساوي هو ظلم بين .

تشي

يوم جميل

النهاردة كان يوم حلو اوي اوي
خلصني من رخامة يوم النتيجة
بجد انا شاكر جدا ليكي
ربنا يخليكي للبشرية للأبد

شكرا

تشي

نتيجتي بانت ::: تحديث

فى تحديث مهم اوي من تحت

" الصورة دي مش عندنا بس هى شبه اللى عندنا إلى حد ما وهبقي انزل الصور اللى نزلتها لما ارجع البيت علشان هى ع الموبايل دلوقتى "

النهاردة بعد محاضرة الانجلش كانت الدفعة كلها واقفة فى مبني السكاشن استعداداً لتعليق النتيجة المباركة فجأة لقيت تتار بيجري عند واحد من الالواح الزجاجية قلت بس جالك الموت يا تارك الصلا طبعا زحمة اوي وانا مش بحب الزحمة الصراحة روحت وقفت بعيد وطلعت الموبايل واقعدت اصور تلك اللحظة التاريخية ولكن لان صورة موبايلي وحشة استعنت بموبايل الواد احمد فهمي حبيبي وصورت يجي 15 صورة كدا ولا 20 صورة فى الحدود دي يعني والناس كان منظرها ولا كأنهم بيوزعوا لحمة مش بيوروهم نتيجة الدكتور قبلها مبشرنا بيها يعني الحكاية مش مستاهله دا كله قعدت شوية كدا على ما الدنيا هديت وبعدين اتحركت بخطوات ثابته نحو النتيجة ( دن دن دن دن ) ( دي موسيقي تصويرية علشان اللحظة يعني وحركات كدا المهم بقي ايه
ايه
اه الموسيقي التصويرية
لا
النتيجة وما ادراك ما النتيجة حيث تتصلب اعضائك ويشخص بصرك بيدور على اسمك لتصائب باكتئاب مزمن قد يطول وقد يطول حسب الحاله بالظبط
المهم بقي العبد لله ايه راح علشان يشوف النتيجة ثاغر الفاه مبتسم المحيا ضاحكا بشوشا ( ولا كأني رايح افتح القسطنطينة بجيش عداده مليار من الجنود الروشة ) طبعا كان منظري غريب جدا وسط ناس منهم اللى بيعيط واللى اخذته العزة وكتم فى قلبه مع لمحه حزن بسيطة
قوم ايه بقا انا - وانا بحالتي السعيدة دي - قررت انى اشوف نتيجتي وانا ماشي بتلك الخطا الثابته ( سالفة الذكر سيادتك ) لقيت ورق كتيييييييييييير واسامى كتير
- أنا اسمي مكتوب يا مرسي
- لا
- طايب
جيت ارجع بعد ما اسمي طلع مش مكتوب قاللي مرسي لا دور انا مش واخد بالى اوي
قلت امري لله وادور
دورت بقي قوم ايه
لقيت اسمي مكتوب اه والله طلع مكتوب ( يعني طلع مرسي كداب ) مش مهم المهم ايه
قول ايه
قولتلي ايه
المهم بقي ايه ان اسمي مكتوب والنتيجة قدامه لكن فى واحد مخبي النتيجة بكتفه
- كتفك يا كابتن
- اهدي لو سمحت مش ناقصه هي
- هى مين
- نظرة بدون رد
- طب كتفك يا كابتن
- يا عم من حلاوتها اوي عايز تشوفها
- ( وقد بلغ بيا الغيظ اقصاه ) انت مال اللى جابوك
-خلاص اهو شوفها إلهي تسقط
- ههههههههههههههه قول يا رب
- يا رب يا اخويا يا رب
- من قلبك ؟؟!!؟؟
- اه من قلبي في حاجة
- لا مفيش وسع كتفك بقي
المهم انه وسع كتفه فى الاخر بعد دعاء منه ما عداش من سقف الكلية لانه ما استجيبش ( بضم التاء )
استنوا استنوا شوية ما تفرحوش قوي كدا هو انا قولت النتيجة انا قولت انى ما سقطتش بس دا ما يعنيش انكوا تفرحوا
اصبروا التقيل جاى ورا
الاسم مكتوب اخر واحد فى الكشف مع انى احمد يعني المفروض اكون فى الاول لكن هذا ما جنيت على نفسي وما جني على احد
قبل ما ابص على اسمي قلت اخد نظره عامة لقيت الجدول مليان نقط غامة كتييييييييييير اصلا مكانش فى اماكن بيضا غير نادر يعني
والنقط الغامقة لمن لا يعلم هى تعني انك شايل المادة او ع الرفع يعني انت ونصيبك قلت بسم الله واستجمعت شجاعتي وتوجهت بالنظر لنتيجتي
ف قوم ايه بقي شوفت نتيجتي
- ويا ريتني ما شوفت
اقولكوا الاول على توقعاتي للنتيجة وبعدين النتيجة
انا كنت متوقع اشيل اكونومي ( اقتصاد يعني لا مؤاخذة ) ( انا اصلا معرفش ليه المادة دي لواحد بتاع حاسبات ومعلومات زيي بس مش مهم ما المنظومة كلها بايظة من ساسها لراسها جت على دي ) المهم ايه انا متخيل انى هشيل المادة دي لانى فعلا ما حليتش اللى يأهلني للنجاح غير ان الدكتور ( عميد الكلية اللى بيدينا المادة دي ) كان قايل ان فى 65 واحد شايلين المادة واكيد يعني انا مش هخون زمايلي وما اشيلهاش
قوم ايه بقي شوفت النتيجة اتصدمت
لقيت فعلا فى مادة واحد ض ( ع الرفع يعني ) قولت اكيد هى الاكونومي بنت " التييييييييييييت " دي طلعت مش هى
اه والله مش هى طلعت مادة تانية ومعرفش ليه وازاي يعني طلعت ومادة حالل فيها حوالي 75 % وكنت بحضر سكاشنها عكس الاكونومي اللى ما حضرتش غير سكشن واحد بس وولا محاضرة علشان المعيد اللى كان بيديهالنا " تيييييييييت " وكمان مكنتش حالل فيها غير مثلا 25% بس ، لكن ليس كل ما يبغاه المرء يلقاه والدنيا بتمشي عكس ما انت عايزها المهم معايا المادة دي ع الرفع ربنا يسهل الترم الجاي ( شكلها مش هتترفع بعد البوست دا ) وبقية المواد الحمد لله عديت فيها غير مادة معايا من السنة اللى فاتت والدكتور ( هو هو بتاع الاكونومي وهوهو عميد الكلية بردو .... أه والله هو :(( !! ) المادة دي الدكتور شيلها لاربعين واحد من اصل سبعة واربعين كانوا شايلنها ودا لسبب وجيه للغاية انهم ما اشتروش الكتاب بتاع المادة دي السنة دي مع انه والله معانا من السنة اللى فاتت بس تقول ايه بقي دنييييييييييييييا
كدا بيس اوي والترم دا كويس وإن شاء الله هتبقي فل الترم دا بس لما نشوف لو فى مواد اترفعت ولا حاجة

اخر حاجة انا مبسوط وعادي وبيس ومش زعلان خااااااااااااالص ولا مضايق خاااااااااالص ولوز وموز واخر حلاوة ويا رب الكلية باللى فيها تولع النهاردة بالليل الساعة خمسة وتمانية وعشرين دقيقة وسبعة وتلاتين ثانية بالظبط

اخرحاجة بعد اخر حاجة اللى فوق كلمة ( قوم ايه ) اللى لبستني البوست دا من إلهام واحد قالها قدامي 150 مرة فى الدقيقة

*******
تحديث مهم أوي
*******

مكنتش الصبح مضايق ولا زعلان لان عارف ان ام الكوسة ماليه الكلية من اولها لأخرها وعارف انها منظومة بنت *** *****من اولها لأخرها مكنتش خايف غير لما اقولهم فى البيت وعلشان ماما ما تضايقش وانا مش ناقص اضايقها يعني مش طالبه حد يقولي امال انت بتاخد الفلوس تعمل بيها ايه
************
الفلوس كنت بتنيل يعني اصرفها ع الرقصات ما انا بجيب كتب ما بتتفتحش علشان الشيت بيتسلم معاها وعلشان عليها عشر درجات علشان دكتور قال فى المحاضرة واحد ما بيحضرش وما حلش حلو فى النظري وما جابش الكتاب انجحه ليه
كل دكتور فى الكلية بيعيش الدور ولا كأنه زويل عصره وزمانه بروح اهله
ليه اشيل مادة حالل فيها 75% تقريبا وحضرت كل سكاشنها تقريبا ما عدا مرتين مستأذن فيهم وكل محاضراتها وجايب فى البروجكت بتاعها 15 /15 وفى الشفوي 5/5 ليييييييييييييييه علشان ام الكوسة
ليه اشيل مادة من السنة اللى فاتت والسنة دي حليت فيها 90 % صح ومتأكد منه وبردو اشيلها علشان ما اشتريتش الكتاب اللى جيبته السنة اللى فاتت اصلا
ليه انجح فى مادة تانية ما حليتش فيها حتى 50 % على بعض لييييييييييييه
ليه 15 % نسبة النجاح فى مادة
ليه 24 واحد بس طالعين صافيين فى الدفعة كلها
ليه ام الدكاترة لما يخنقوا على بعض يطلع على دماغ اهلينا احنا
ليه واحد ملوش لازمة ولا راح ولا جه يجي يخنق عليا ويعيش ويعمل اخ اكبر وناصح وليه واحد تاني يشمت فيا وهو ولا يسوى اصلا
ليه لو واحد جايب خمسة مقبول هيبقي مرتب من الخمسة وعشرين اوائل ع الدفعة
ليه المهزلة دي كلها
انا مش مضايق علشان النتجية لكن اضايقت من النتايج اللي اتربت عليها
اخر حاجة بجد بكره كل دكاتره الكلية واحد واحد مفيش ولا واحد ليه فى قلبي او عقلي ذرة احترام وكلهم بلا استثناء
حاسس انى ما استريحتش نفسيا علشان ما شتمتهمش اون لاين بس والله م ساعتين قاعد افكر اشتمهم ولا اقول حسبي الله ونعم والوكيل ومع ان الاخيرة مش هترضي غروري لكن
حسبي الله ونعم الوكيل فى كل دكتور ظلمنى وظلم اى حد فى الدفعة ومش مسامحه ليوم الدين
*******
بس كدا عقبالكوا كلكوا احسن منى بكتيييييييير ويا رب اخلص بقي علشان انا خلاص خلصت وطلع " تييييييييييييت " اهلي

تشي

يا سمرا

يا مصر يا سمرة
ياللي انتى فى حبك كل الحرية
فكرة البراء اشرف
اخراج دعاء الشامي

بس

عايز اترمي فى حضنك واعيط اوي
بس

إبراهيم عيسي عنده حق :: تحديث

تحديث
***********

على موقع عشرينات لقيت موضوع عن ان مجموعة من الهاكرز ( قصدي الكراكرز ) بدأوا يخربوا مواقع منشور عليها الصور وقال ايه فرحانين قوي .... مع ان اصلا المواقع فى اوروبا مش غاليه زى عندنا وهما معاهم الكود اكيد ولو موقع باظ هيعملوا الف غيره والصور هتتنشر اكتر ودا اصلا مجهود مهدر ع الفاضي
يعني بدل ما تخربوا اعملوا مواقع واتكلموا فيها عن النبي بالانجلش وبالدانماركي عرفوهم ان النبي دا مش اللى انتوا رسمتوه النبي دا رحمه وهدي واخلاق و و و .... مش هخلص لو قعدت اكتب للصبح
بلاش غباء فى التعامل مع الازمة .....

لموضوع فى عشرينات من هنا

***********

أول مرة يتبادر لذهني كذا بوست عايز اكتبهم فى نفس الوقت يعني البوست بتاع دلوقتى واللى عن ابراهيم عيسي ومقاله المثير للجدل
تانى واحد كان عن عيد الحب من وجهه نظري
تالت واحد كان عن الحب بذات نفسه
والرابع عن المباديء وعن إن الغاية لا تبرر الوسيلة والضرورات ليس دائما تبيح المحظورات

****************
خلينا بقي فى بوست النهاردة ......
ما بقيتش بداوم على شراء الجرايد والدستور منهم وبقالى حوالى شهرين ما جيبتش ولا جرنال
دستور الاسبوع دا خلاني اشتريه حاجتين الاولي مقال ابراهيم عيسي واللى قريت نقد ليه فى مدونة صوت الحرية وبعديها على طول لقيت احمد فهمي صديقي العزيز بيقولي الدستور الاسبوع دا بيقولوا جامد ( وبغض النظر عن انها مش بيقولوا لان اللى قال مكنش جمع بس هعديهاله ) المهم قولت لو لقيت الجرنال وانا راجع البيت هجيبه وقد كان وقريت مقال ابراهيم عيسي وانا راجع بالمترو وتقريبا متفق معاه بنسبه 90 إلى 95 % .........

إبراهيم عيسي بمقال عن ازمة الدانمارك وبعنوان مثير جدا ومتصدر للجرنال بيقول :
لأجل النبي توقفوا عن الدفاع عن النبي
عنوان البعض قال عليه مستفز والبعض قال نقري المقال ونحكم وانا قريت المقال
بيتكلم ابراهيم عيسي فى المقال عن ازمة نشر الرسوم المسيئة فى بعض صحف الدانمارك للمرة التانية بعد المرة الاولي اللى نشرتها صحيفة واحدة بس .
ابراهيم عيسي بيتكلم عن اننا ساوينا بين اسرائيل كعدو للعرب وبين الدانمارك بعد الحادثة الشهيرة وما عملناش حساب ان العمل دا كان عمل فرد واحد وصحيفة واحدة انتشارها قليل وفى رأيّ دا صحيح تماما واحنا السبب الاكبر والاول فى انتشار الرسوم بالصورة اللى هى عليه دلوقتى ... دي اول حاجة .
كمان فى المقال ان الصحيفة دي نشرت صور ساخرة للمسيح عليه السلام وان محدش فتح " بقه " فقط لأن دي حرية رأي هما مؤمنين بيها ( مش معني كلامي انى مؤمن بالإساءة أو معاها على فكره ) وفى ظل كلام عيسي عن ان العمل دا فردي واننا ما فهمناش كدا وصبنا جم غضبنا على الدانمارك دولة وشعب رغم اعتذارهم الاتنين شعبا وحكومة وبيسأل عيسي ايه اللى المفروض الدنمارك تعمله علشان نسامحهم على اللى عملوه .
فى المقال بردو عن ان العرب نفسهم قصير وما بينفعوش فى حاجة وان حماسنا الكبير على طول بيخمد وبينفد وما بيبقاش ليه فايده فى الاخر
ودا انا شايفه واضح اوى فى قضية المقاطعة ( اللى احنا اصلا عاملينها على مزاجنا ) مقاطعة المنتجات الامريكية والإسرائلية بقالها كتيييييييييييير لكن ولحد دلوقتى كوكا كولا بتشجع مصر مع اللى بيفهموا واللى ما بيفهموش والمتفائلين والمتشائمين ولسه بيبسي هى اللى ورا المشجعين المصريين ولسه بيبسي بردو ماليه الدنيا والصحف بدوري الصحف بتاعها مع إن المفروض ان دول شركتين كبار جدا محطوطين فى صدر قائمة المقاطعة وقيس على كدا ماكدونالز وكنتاكي وغيرها وغيرها .
وكمان احنا بنقاطع بمزاجنا يعني ما احنا شغالين بويندوز وهو اصلا اميركي الصنع وبتاع مايكروسوفت اللى صاحبها يهودي الديانة ( ومحدش يقول مفيش بديل لأن لينوكس موجود وببلاش مش مسروق زى تعاملنا مع الويندوز ) وغيره وغيره بنستخدمه واحنا عارفين كويس انه امريكي بس احنا بنقاطع بمزاجنا مش بنقاطع بضمير .
عيسي بردو اتكلم عن ان اقتصاد الدانمارك وعن إن المقاطعة بتضر رجال الاعمال مش الدانمارك الدولة وحتى لو مش كدا فالدانمارك لو حصلها اى ضرر فهي هتعوضه من منحها ومساعداتها العينية اللى موجهه للعرب وبالذات فلسطين والسودان .
نقطة كمان مهمة اوى فى المقال واننا عاقبنا الكل لخطأ الفرد وغاب عن عيسي ان دي اصلا ثقافة اصيله فينا والجملة المشهورة واللى بكرهها بكل حواسي ومشاعري " الحسنة بتخص والسيئة بتعم " مع انه على أقل تقدير المفروض الاتنين كل منهم يخص بس عادتنا يعني ولا هنشتريها .

حاجة مهمة اوي بيشير ليها عيسي وهى اللى ادت لنشر الرسوم مرة تانية فى 17 جريدة المرة دي
السبب هو اكتشاف تنظيم حاول اغتيال صاحب الرسوم دي
انا بقي عن نفسي اموت واعرف مين اللى قال ان القتل حل من حلول الاسلام ؟؟؟؟ القتل حل متخلف وعقيم وجاهلي والاسلام قال نخاطبهم بالتي هى احسن وقال دا علشان ان اللي بينك وبينه يبقي حبيب بدل ما هو عدو والنتيجة ان المشكلة زادت وكبرت بسبب غباء وتطرف وارهاب ولو نفتكر كويس هنلاقي ان الفيلم اللى عمله المخرج فان جوخ واللى كان بيتكلم عن واحدة محجبة وبعدين قلعت الحجاب وكان مكتوب على جسمها ايات قرأنية والفيلم اصلا ما اخدش شهرته غير بعد مقتل مخرج الفيلم واللي سمعت ان هولندا هتعيد نشر الفيلم تضامنا مع الدانمارك ( يعني بدل ما ننصر النبي ادينا بهدلنا الدنيا )

نرجع لعيسي تاني وهو بيقول ان التحدي ملوش لازمة واننا نعمل راسنا براسهم وفى رأيي انا احنا مش قدهم ودا يبقي قصر ديل ومكابرة منا زى ما احنا اتغابينا وعاملناهم علشان واحد فيهم غلط هما كمان هيتعاملوا بنفس المنطق وهيعاقبونا كلنا وهيضايقونا علشان بعض منا اتغابي وحاول انه يتعامل بغباء وتطرف وحاجة اوى كمان مهمة كمية المظاهرات الهابلة اللى احنا عملناها دي كلها لازمتها ايه يوكنش احنا اللى عملنا الرسوم دي والمظاهرات دي قايمة ضدنا ولا ايه بالظبط المفروض ان الدانمارك تخاف م المظاهرات دي وتكش وتقول سامحونى والنبي واحنا اتلمينا بربطه المعلم وطلعنا نوريهم عضلتنا واننا مش قليلين !!؟؟ بلا خيبة والنبي بدل ما كل واحد طالع ينبح صوته وهما كدا كدا مش هيسمهو لو قعد يزعق لعشر سنين قدام بدل المظاهرات دي كل واحد يعمل حاجة تخلي البلد تتحرك خطوة لقدام ع الاقل يبقي عمل حاجة بدل نبحه صوته ع الفاضي .
حاجة كمان مهمة بيشير ليها عيسي وهى حوار دعاتنا من الاستاذ عمرو خالد والدكتور طارق السويدان وكان معاهم معز مسعود وغيرهم وعملوا حوار معاهم ( ودا فى نظري الحاجة الوحيدة اللى شوفتها اتعملت صح فى الازمة دي ) لكن عيسي بيقول ان تفكير شعب مش هيتغير فى تلات ايام هما اللى اتعمل فيهم الحوار دا لا ومش كدا وبس لا دا الدعاة دول اتهاجموا كمان علشان راحوا يقولولهم انتوا فاهمين غلط احنا مش وحشين كدا والصح اهو ودا اللى سبب كمان ان الناس اللى راحت علشان الحوار رجعوا يدافعوا عن نفسهم واتنسي موضوع الحوار دا علشان كل واحد يدافع عن نفسه ضد تهمة اصلا ليست بتهمة لكنه التخلف والتعصب الاعمي والتقوقع داخل نفسنا ومعرفش هنفضل كدا لحد امتى !!؟؟

فى الاخر عيسي بيقول ان الحل هو التجاهل التام للقضية دي ودي الحته الوحيدة اللى بختلف معاه فيها لاني شايف ان الحوار هو الوسيلة الناجحة واللى المفروض يتم تجاهله هو اللى بيعمله المتخلفين من مهاجمة اللى بيتوجهوا للحوار

بيذكر عيسي شوية اولويات وهى طبعا فى اطار معارضته السياسية لكن الاهم هو اللى مكتوب بعد كدا

ان الموظف يبطل يفتح درجه وياخد رشاوي او ما يتحايل المصريين ويطلقوا عليه اكراميات
ان المنافقين يبطلوا ينافقوا رؤسائهم فى العمل
ان العمل يبطل يكروت الشغل علشان يخلص الوردية بسرعة
ان الوزير المخطئ يعترف ويمشي من غير كلام
ان المدرس يشرح بذمة وبضمير مش يضرب علشان الدروس الخصوصية
ان كل واحد يقري لو ما قراش عن عدل النبي ونوره لولاده قبل ما يناموا
ان كل واحد يتخلق باخلاق النبي وبصفاته
ان كل واحد ما يصليش اداء واجب والسلام لا يصلي علشان يأمر بمعروف وينهي عن منكر ان كل واحد يصلي بقلبه مش مجرد آله بتعمل حركات ملهاش معني

خلص كلام ابراهيم عيسي وتعليقي عليه والكلام تقريبا داخل فى بعضه بس حبيت اوضح وجهه نظري
*******************
حاجة كمان لما نيجي نقاطع يبقي نقاطع كل حاجة مش بمزاجنا اللى مش عايزينه نقاطعه واللى محتاجينه لا ما نقاطعهوش
بلاش الازدواجية فى التعامل دي واللى هى اصلا بقت صفة اصيله فى الشعب المصري
*******************
حاجة كمان
المنتخب بتاعنا ما اخدش الكاس علشان كانوا بيسجدوا بعد كل جول ولا حاجة المنتخب فاز علشان ادي وربنا بيدي كل واحد على قد جهده حتى لو كان غير مسلم ودا واضح من تقدم الغرب علينا وموقف التضامن مع غزة برضه مش هو اللى خلانا نفوز بالكأس لأنه موقف فردي وحتى لو كان جماعى بردو مش هو السبب
السبب الوحيد ان من جد وجد ومن زرع حصد

**********************************

خالص تحياتى
تشي

The Lake House

The Best Scene Ever

- Kate ..
* What ??
- I .....
* You .....
- I Just ...
* What ??
- ... Do you know the song ?
* Yuh !
- Do you sing ??
* Ha ... no ...... nobody wants to hear me sing ....you don't want to hear me sing .
- I don't mean ..... you know ...
* But I can dance

\/
\/
\/

فاقد الشيء أحيانا يعطيه

12 Ways to be happy

1- Make up your mind to be happy .
Learn to find pleasure in simple things .

2- Make the best of your circumstances .
No one has every thing , and every one has something of sarrow intermingled with gladness of life .
The trick is to make the laughter outweigh the tears .

3- Don't take your self too seriously .
Don't think that somehow you should from misfortune that befalls other people .

4- You can't please everybody .
Don't let criticism worry you .

5- Don't let your neighbor ( or any body else ) set your standards .
Be yourself .

6- Do the things you enjoy doing but stay out of debt .

7- Never borrow trouble .
Imaginary things are harder to bear than real ones .

8- Since hate poisons the soul , do not cherish jealousy .
Avoid people who make you un happy .

9- Have many interests .
If you can't travel , read about new places .

10- Don't hold postmortems .
Don't spend your time brooding over sorrows or mistakes .
Don't be one who never gets over the things .

11- Do what you can for those less fortunate than yourself .

12- Keep busy at something .
A busy person never has time to be unhappy .

تاج تربيع

تاجين واحد هجاوب عليه بس والتاني هجاوب عليه وهمرر لكل خلق الله دا انا هفتري بس أصبروا
*********************

أيه صاحبة بلوج ( ايامهم سابقا ) بلا نيلة حاليا لقطت من عندها تاج كدا فى اللذيذ وقلت نجاوب عليه وثوابنا عند ربنا بقي

دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
دايرة مفرغة

كنت تفضل الدخول مستقل او تتبع حزب معين ؟؟؟؟
اكيد مستقل

اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
معتقدش هفضل على طول مستقل زى ما انا لان مفيش اى برنامج من بتوع الاحزاب عاجبني

اول حاجه هتعملها لنفسك ولاسرتك ؟؟؟؟؟
مش هعمل حاجة كأن مفيش حاجة حصلت هعمل للناس مش ليا

ايه المشروع اللى ناوى تعمله لاهل دايرتك ؟؟؟؟
المواصلات المشكلة الازلية لازم احلها او اتحل انا

قعدت فى المجلس جنب نائب مميز . من هو النائب ؟؟
هقعد فى حته فاضية لوحدي مش هقعد جنب حد اهو الواحد ياخد راحته فى النوم برضه

قدمت سؤال للحكومه ايه هو السؤال ؟؟؟؟؟
سمعتوا عن حاجة اسمها الفقرا !!؟؟

طلب احاطه موضوعه ايه ؟؟؟
التعليم واحواله اللى لا تسر اى حد والجزء الضئيل اللى متوفر ليه من ميزانية الدولة مقارنة بدول تانية زى اسرائيل اللى موفره 25% من الميزانية للتعليم مقابل 7 % بس عندنا

وبتقدمه لمين ؟؟؟؟
وزيري التعليم العالى والتربية والتعليم ورئيس الوزراء ووزير المالية

استجواب لاتنين من الوزراء موضوعه ايه ؟؟؟؟وبتستجوب مين؟؟؟
أنظر عاليه
دول تلاته ومعاهم رئيس الوزرا

انت مع الخصخصه ؟؟؟؟؟؟
أه بس لو مققنه يعني مش كل حاجة هنبيع فى حاجات ينفع وحاجات لا وكمان يبقي البيع مش نهائي ممكن يبقي إدارة بس زى ما كان بيحصل فى المترو كدا مثلا وكمان الاصول والاراضي نفسها تبقي للدولة

هل انت مع قطع العلاقه مع اسرائيل ؟؟؟؟؟وما يترتب عليه من معامله العدو ؟؟؟
مينفعش نقوم فى يوم وليلة نقول هنقطع معاهم احنا معناش حاجة نرد بيها عليهم لما نقطع علاقتنا معاهم لما يكون لينا وجود يحترم وكلمة عليا نبقي نقطع نحرق نـ**** زى ما نحب غير ان فى اتفاقيات مينفعش ننقضها كدا هى مش لعبة وواحد يقول والله ما انا لاعب

هل تؤيد الحرب على العراق ؟؟؟؟؟؟؟؟
لا أكيد مش علشان هى دولة صديقة ولا عربية ولكن علشان المبررات الواهية اللى الحرب قامت بيها لكن لو فى دولة حتى لو عربية او اسلامية لكن بتعمل ارهاب بس ارهاب بجد مش اللى امريكا بتضحك بيه ع الدقون يبقي لازم تقف عند حدها

هل تؤيد مرور الامريكان فى القناه ؟؟؟؟؟؟
الكلمة مطاطية كتير الامريكان
فى العام اؤيد اى عابرات او سفن للتجارة او الصناعة شغال وماله
لكن لو للحرب يبقي حسب موقفي من الحرب نفسها هل اؤيدها ولا لأ

هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟
محصلش والله
هو مستر ساركوزى جاب سيرتي فى التحقيقات ولا أيه !!!؟

بتمرر التاج ده لمين ؟؟؟؟؟
التمرير فى التاج اللى تحت

*********************************************
دا كان التاج الاول
اما اللى جاى فهو تاني تاج واللي هجاب عليه وهمرره لكل حد اعرفه ولو حد عايز يخده خير وبركه بس يبقي يسيبلي لينك البلوج بتاعه علشان نبقي نطلع ع الاجابات

1- انت ليه بقيت مدون ( يعنى ايه خلى الفكرة بتاعت التدوين تجيلك اصلا ) ؟؟

مش فاكر الموقف ساعتها كان ايه بالظبط بس كنت مخنوق من المنتديات والاشراف وكدا عملت مدونة علشان ابقي ملك نفسي

2- ايه هى اول مدونة عرفتها ؟؟

هى مدونة دلوقتى ما بقاش بيتحط فيها بوستات وهى دي اللى خلتني ابقي بلوجر وكمان المدونة بتاعه الوعي المصري

3- ايه اكتر سلبية انت شايفها فى المدونات؟؟

مممممممممممممم سؤال لذيذ بس مش عارف له إجابة صراحة

4- ايه اكتر حاجة لمستها بتفيد المجتمع من التدوين ؟؟

يعني بتزود خبرات الشباب وبتزود مدارك العقل والاستيعاب وبتوضح فكرة وجوب تقبل الاخر

5- هل غير التدوين جواك حاجة معينة ؟؟

اه إلى حد كبير

6- هل لقيت التدوين كتفريج هم ومنبر عالى تقدر صوتك يتسمع من عليه ؟؟

لقيت فيه تفريج هم فعلا وبنسبة كبيرة كمان

7- هل حسيت ان التدوين عالم كبير انت عايش جواه واصبحت فرد منه ؟؟

أه وبنسبه كبيرة جدا لدرجة انى مش بقوم من قصاد الكومبيوتر طول اليوم لما اكون فاضي ومفيش ورايا دراسة لو ورايا بقي دراسه بيقل اليوم لخمس ساعات بس انترنت وتدوين

8- هل اكتسبت صداقات من التدوين ؟؟

كتير وبعتز بيها اكتر من الصداقات اللى فى ارض الواقع بنسبه كبيرة بس مش تماما لأن فى ناس مينفعش حد يتخطاهم

9- لو اكتسبت صداقات .. ايه تقيمك ليهم بالنسبة لأصدقاء اللى تعرفهم من الشغل او ( الدراسة أو الجيران أو ... ) ؟؟

بالنسبة ليا انا معظم اصدقاء دراستي طول اليوم ( الاجازات يعني ) نايمين وبالليل ع القهوة ودا مش مودي خالص فبقضيها انا طول الليل والنهار ع النت والتدوين ومفيش مانع شوية جيمز بين الحين والاخر

10- هل أثر التدوين فى نظرتك للحياة من حواليك ؟؟

أه كتير

11- هل قفلت ( أو فكرت تقفل ) مدونتك فى يوم ؟؟ وليه ؟؟
لا محصلش لانى حتى لو بطلت تدوين هتفضل المدونة وقت من حياتى وفترة اعتز بيها حتى لو ندمت عليها لكنها فترة مش هتتمسح

12- هل فكرت تسيب التدوين تماما وتخرج من العالم دا ؟؟ وليه ؟؟
لا لأنه بصراحه عجبني كتير وانتشلني من عالم الواقع لعالم تاني رائع بتختار فيه انت كل حاجة تكون فين امتى وازاى ومحدش بيجبرك تكون فى المكان اللى انت عايزه

13- هتمرر التاج لميييييييييييييييييييين ؟؟
لكل اللى عندي فى الجرازر ريدنج ليست اللى عندي ع السايد بار وعلشان محدش يبقي ليه حجة هكتبهم كل اللى اتوقع انهم يردوا بترتيبهم فى الليست ودا ترتيب عشوائي اصلا
ودروب فروم ذا اوشن بردو
اكيد حبيب قلبي اللى مقدرش انساه فى الاوقات الجميلة دي كييييييييييييييييييييييييكو
وحبيب قلبي التاني بقي احمد باشا فهمي
ومش قادرة كمان
ولمرمر اللى بقاله شهرين سايبة المدونة من غير جرة قلم
ولأبو صلاح علشان يرجع بقوة للمدونة
ولمحمد باشا صبحي اللى تقريبا اكتر حد خد منى تاجات
وللجميل جدا ساجي علشان يبطل شوية من الخزعبلات بتاعته :P
والوافدة الجديدة على عالم التدوين صفا
ولنيرة علشان الدعوة الجميلة بتاعه الاسبوع اللى فات :D
ولسالي صاحبة المستند المفقود واللى شكلها اتحولت علشانه للتحقيق وما ظهرتش من ساعتها ع البلوج
وليوتا البرئية هدية علشان الاغانى الجامدة اللى هى بتجيبها دي
وللواد سمير المهاجر قصدي المسافر اللى اتمسح سهوا وهيرجع بإذن لله لليست
وللمعلم يمني اللى بتغيييييييييييييييييييييييب وتغيب وترجع ببوست كل شهر
ولرامي متسر برويد مكافأة علشان الشريط الجديد
وللأستاذ سمير شاهين بتاع السيما :P
ولمصطفي فتحي عسي ان يرد عليه
ولسعودي علشان يعرف يكمل السعوديات بتاعته على راحته
ولمحمد باشا حمدي المؤلف العظيم
ولأنين ناي دكتور روفي
ولأبي اللى مجهزه لها علشان تاخده بالمركبة وهى جاية
ولنقيب المدونين التخليلي خالو أحمد الصباغ
وللكبير مقاما اسامة باشا يوسف
ولأيه فى ايامها سابقا ولا حالبا مليش دعوة ردا ع التاج اللى فوق خالص
ولمهند باشا الاهلوى اللى زى يعني احسن ناس احسن جمهور احلي فريق وسمعني احلي سلام :P
ولزيزي اللى بتتكلم عن الظمأ وهى معاها البيركله
ولنسرين بسيوني عسي ان تذكرها الاسكندريه

وكدا كفاية اوى للغاية خالص علشان انا حاسس انى فى فرح
واى حد عايز التاج يتفضله مع اطيب التمنيات بالتوفيق على رأي بتوع امتحانات التربية والتعليق

تشي

لا

مش عارف مالي النهاردة
كل اللى كلمونى ع الماسنجر قلتلهم
لا
ومش كدا وبس دي اكتر كلمة قلتها النهاردة
واغلبها كانت لا برخامة
سوري لكل حد اتقاله لا
بس الحكاية كلها
اممممممم
لا مش قايل

عموما يعني
لا

هابي إيجيبتاين داي

يوم لمصر وبس

فى يوم ولا فى الاحلام
يوم بجد خرجنى من حالة الملل الفظيعة اللى كنت عايشها
المكان نقابة الصحفيين - مسرح الدور الأول
الحدث : حفل عشرينات الفني
او زى ما اطقوا عليه ايجيبتين داي على وزن فلانتين يعني بس المرة دي كان فى حب مصر وبما انى واحد من الناس اللى مش حبيبه يعني ملناش فى الفلانتين والكلام الفاضي دا فروحت حفل عشرينات اللى تقريبا مكنتش اعرف عنه حاجة غير طراطيش كلام قالتهولي نيرة الشريف والنت كان عندي بيفصل اصلا وكنت هاتشل منه بس بجد شاااااااااااااااااااكر ليها جدا انها دعتني لليوم دا لأنه كان يوم أكتر من رائع وكمان بشكر كل تيم عشرينات وكان حفل رائع وبصراحة معرفتش افضل فقرة فيه عن التانية .
الحفل كان بدأ بالشاعر على اسماعيل اللى بجد كان فوق الوصف فعلا ودا الوحيد اللى دونا عن بقية الفقرات حسيت انه بيغني لمصر من قلبه مش بيغني بس لأجل الغنا كان بيغني وبيعزف عود باحساس رائع خلاني انتشي ( حلوة انتشي دي مش كدا بردو ) وافتكر تلك المدعوة مصر .
تاني فقرة كانت محمد العزبي والله قلبها هيصة وكان رائع جدا رغم انه كبير جدا بس على مين دا عمل فقرة ولا شاب فى العشرين .
بعديهم بقي دخلت فرقت حبايبنا وهما شوية شباب زى الفل كانوا قشطة قشطة يعني بجد شباب صوتهم كان رائع جدا وكان معاهم عازف عود دمه زى العسل وكان الختام بسمير الاسكندراني وغنى غنا رااااااااااااااائع وبين كل غنوة والتانية يقول كلمتين فى الصميم قشطات يا ابو سمرة والله بس مشي علشان كان عنده فرح بتاع مصطفي سعودي ( معرفش انا مين مصطفي سعودي بس هو كلمه وهو بيغني علشان يأكد عليه يحضر ) واخر حاجة الشاب اللذيذ اللى كان بيقدم والبنت اللى زى العسل اللى كانت بردو بتقدم معاه وكانوا من اجمل الحاجات فى الحفلة قالوا اسماء تيم عشرينات كلهم وكانوا عايزنا نصفق ( هو اصلا غلط فيها معرفش يقولها فصحي ولا عامي ) نص ساعة متواصلة ( إيدي وجعتني يومها ) بس فى بقي شوية حاجات كدا بس هنعديها علشان روعة اليوم بجد يعني مثلا الحفل المفروض يبدأ ستة بدأ سبعة والمفروض يخلص تسه خلص عشرة ونص والناس اصلا بدأت تيجي الساعة ستة وكان التوقيتات مش مظبوطة يعني اللى دخل متأخر واللى قعدوا يقولوله يقفل الفقرة علشان التايم بتاعه خلص وكدا يعني بس عدت وما بوظتش الليلة بس المفروض بقي المرة الجاية يكونوا ادق من كدا لانى بجد بتعصب من أم حكاية المواعيد اللى مش مظبوطة دي بتجيبلي الضغط اصلا
اخر حاجة شكرا كتييييييييييييييييييييييييير جدااااااااااااا لنيرة على الدعوة الراااااااااائعة دي
وشكرا كمان لكل فريق عشرينات اللى عملوا يوم ولا اروع
وإن شاء الله كل سنة زى اليوم دا هبقي فى الإيجيبتاين داي سواء كنت بحب او لا ولا كنت بحب نبقي نروح الايجيبتاين داي كابل :P

تحياتى
تشي