إبراهيم عيسي عنده حق :: تحديث

تحديث
***********
على موقع عشرينات لقيت موضوع عن ان مجموعة من الهاكرز ( قصدي الكراكرز ) بدأوا يخربوا مواقع منشور عليها الصور وقال ايه فرحانين قوي .... مع ان اصلا المواقع فى اوروبا مش غاليه زى عندنا وهما معاهم الكود اكيد ولو موقع باظ هيعملوا الف غيره والصور هتتنشر اكتر ودا اصلا مجهود مهدر ع الفاضي
يعني بدل ما تخربوا اعملوا مواقع واتكلموا فيها عن النبي بالانجلش وبالدانماركي عرفوهم ان النبي دا مش اللى انتوا رسمتوه النبي دا رحمه وهدي واخلاق و و و .... مش هخلص لو قعدت اكتب للصبح
بلاش غباء فى التعامل مع الازمة .....
***********
أول مرة يتبادر لذهني كذا بوست عايز اكتبهم فى نفس الوقت يعني البوست بتاع دلوقتى واللى عن ابراهيم عيسي ومقاله المثير للجدل
تانى واحد كان عن عيد الحب من وجهه نظري
تالت واحد كان عن الحب بذات نفسه
والرابع عن المباديء وعن إن الغاية لا تبرر الوسيلة والضرورات ليس دائما تبيح المحظورات

****************
خلينا بقي فى بوست النهاردة ......
ما بقيتش بداوم على شراء الجرايد والدستور منهم وبقالى حوالى شهرين ما جيبتش ولا جرنال
دستور الاسبوع دا خلاني اشتريه حاجتين الاولي مقال ابراهيم عيسي واللى قريت نقد ليه فى مدونة صوت الحرية وبعديها على طول لقيت احمد فهمي صديقي العزيز بيقولي الدستور الاسبوع دا بيقولوا جامد ( وبغض النظر عن انها مش بيقولوا لان اللى قال مكنش جمع بس هعديهاله ) المهم قولت لو لقيت الجرنال وانا راجع البيت هجيبه وقد كان وقريت مقال ابراهيم عيسي وانا راجع بالمترو وتقريبا متفق معاه بنسبه 90 إلى 95 % .........

إبراهيم عيسي بمقال عن ازمة الدانمارك وبعنوان مثير جدا ومتصدر للجرنال بيقول :
لأجل النبي توقفوا عن الدفاع عن النبي
عنوان البعض قال عليه مستفز والبعض قال نقري المقال ونحكم وانا قريت المقال
بيتكلم ابراهيم عيسي فى المقال عن ازمة نشر الرسوم المسيئة فى بعض صحف الدانمارك للمرة التانية بعد المرة الاولي اللى نشرتها صحيفة واحدة بس .
ابراهيم عيسي بيتكلم عن اننا ساوينا بين اسرائيل كعدو للعرب وبين الدانمارك بعد الحادثة الشهيرة وما عملناش حساب ان العمل دا كان عمل فرد واحد وصحيفة واحدة انتشارها قليل وفى رأيّ دا صحيح تماما واحنا السبب الاكبر والاول فى انتشار الرسوم بالصورة اللى هى عليه دلوقتى ... دي اول حاجة .
كمان فى المقال ان الصحيفة دي نشرت صور ساخرة للمسيح عليه السلام وان محدش فتح " بقه " فقط لأن دي حرية رأي هما مؤمنين بيها ( مش معني كلامي انى مؤمن بالإساءة أو معاها على فكره ) وفى ظل كلام عيسي عن ان العمل دا فردي واننا ما فهمناش كدا وصبنا جم غضبنا على الدانمارك دولة وشعب رغم اعتذارهم الاتنين شعبا وحكومة وبيسأل عيسي ايه اللى المفروض الدنمارك تعمله علشان نسامحهم على اللى عملوه .
فى المقال بردو عن ان العرب نفسهم قصير وما بينفعوش فى حاجة وان حماسنا الكبير على طول بيخمد وبينفد وما بيبقاش ليه فايده فى الاخر
ودا انا شايفه واضح اوى فى قضية المقاطعة ( اللى احنا اصلا عاملينها على مزاجنا ) مقاطعة المنتجات الامريكية والإسرائلية بقالها كتيييييييييييير لكن ولحد دلوقتى كوكا كولا بتشجع مصر مع اللى بيفهموا واللى ما بيفهموش والمتفائلين والمتشائمين ولسه بيبسي هى اللى ورا المشجعين المصريين ولسه بيبسي بردو ماليه الدنيا والصحف بدوري الصحف بتاعها مع إن المفروض ان دول شركتين كبار جدا محطوطين فى صدر قائمة المقاطعة وقيس على كدا ماكدونالز وكنتاكي وغيرها وغيرها .
وكمان احنا بنقاطع بمزاجنا يعني ما احنا شغالين بويندوز وهو اصلا اميركي الصنع وبتاع مايكروسوفت اللى صاحبها يهودي الديانة ( ومحدش يقول مفيش بديل لأن لينوكس موجود وببلاش مش مسروق زى تعاملنا مع الويندوز ) وغيره وغيره بنستخدمه واحنا عارفين كويس انه امريكي بس احنا بنقاطع بمزاجنا مش بنقاطع بضمير .
عيسي بردو اتكلم عن ان اقتصاد الدانمارك وعن إن المقاطعة بتضر رجال الاعمال مش الدانمارك الدولة وحتى لو مش كدا فالدانمارك لو حصلها اى ضرر فهي هتعوضه من منحها ومساعداتها العينية اللى موجهه للعرب وبالذات فلسطين والسودان .
نقطة كمان مهمة اوى فى المقال واننا عاقبنا الكل لخطأ الفرد وغاب عن عيسي ان دي اصلا ثقافة اصيله فينا والجملة المشهورة واللى بكرهها بكل حواسي ومشاعري " الحسنة بتخص والسيئة بتعم " مع انه على أقل تقدير المفروض الاتنين كل منهم يخص بس عادتنا يعني ولا هنشتريها .

حاجة مهمة اوي بيشير ليها عيسي وهى اللى ادت لنشر الرسوم مرة تانية فى 17 جريدة المرة دي
السبب هو اكتشاف تنظيم حاول اغتيال صاحب الرسوم دي
انا بقي عن نفسي اموت واعرف مين اللى قال ان القتل حل من حلول الاسلام ؟؟؟؟ القتل حل متخلف وعقيم وجاهلي والاسلام قال نخاطبهم بالتي هى احسن وقال دا علشان ان اللي بينك وبينه يبقي حبيب بدل ما هو عدو والنتيجة ان المشكلة زادت وكبرت بسبب غباء وتطرف وارهاب ولو نفتكر كويس هنلاقي ان الفيلم اللى عمله المخرج فان جوخ واللى كان بيتكلم عن واحدة محجبة وبعدين قلعت الحجاب وكان مكتوب على جسمها ايات قرأنية والفيلم اصلا ما اخدش شهرته غير بعد مقتل مخرج الفيلم واللي سمعت ان هولندا هتعيد نشر الفيلم تضامنا مع الدانمارك ( يعني بدل ما ننصر النبي ادينا بهدلنا الدنيا )

نرجع لعيسي تاني وهو بيقول ان التحدي ملوش لازمة واننا نعمل راسنا براسهم وفى رأيي انا احنا مش قدهم ودا يبقي قصر ديل ومكابرة منا زى ما احنا اتغابينا وعاملناهم علشان واحد فيهم غلط هما كمان هيتعاملوا بنفس المنطق وهيعاقبونا كلنا وهيضايقونا علشان بعض منا اتغابي وحاول انه يتعامل بغباء وتطرف وحاجة اوى كمان مهمة كمية المظاهرات الهابلة اللى احنا عملناها دي كلها لازمتها ايه يوكنش احنا اللى عملنا الرسوم دي والمظاهرات دي قايمة ضدنا ولا ايه بالظبط المفروض ان الدانمارك تخاف م المظاهرات دي وتكش وتقول سامحونى والنبي واحنا اتلمينا بربطه المعلم وطلعنا نوريهم عضلتنا واننا مش قليلين !!؟؟ بلا خيبة والنبي بدل ما كل واحد طالع ينبح صوته وهما كدا كدا مش هيسمهو لو قعد يزعق لعشر سنين قدام بدل المظاهرات دي كل واحد يعمل حاجة تخلي البلد تتحرك خطوة لقدام ع الاقل يبقي عمل حاجة بدل نبحه صوته ع الفاضي .
حاجة كمان مهمة بيشير ليها عيسي وهى حوار دعاتنا من الاستاذ عمرو خالد والدكتور طارق السويدان وكان معاهم معز مسعود وغيرهم وعملوا حوار معاهم ( ودا فى نظري الحاجة الوحيدة اللى شوفتها اتعملت صح فى الازمة دي ) لكن عيسي بيقول ان تفكير شعب مش هيتغير فى تلات ايام هما اللى اتعمل فيهم الحوار دا لا ومش كدا وبس لا دا الدعاة دول اتهاجموا كمان علشان راحوا يقولولهم انتوا فاهمين غلط احنا مش وحشين كدا والصح اهو ودا اللى سبب كمان ان الناس اللى راحت علشان الحوار رجعوا يدافعوا عن نفسهم واتنسي موضوع الحوار دا علشان كل واحد يدافع عن نفسه ضد تهمة اصلا ليست بتهمة لكنه التخلف والتعصب الاعمي والتقوقع داخل نفسنا ومعرفش هنفضل كدا لحد امتى !!؟؟

فى الاخر عيسي بيقول ان الحل هو التجاهل التام للقضية دي ودي الحته الوحيدة اللى بختلف معاه فيها لاني شايف ان الحوار هو الوسيلة الناجحة واللى المفروض يتم تجاهله هو اللى بيعمله المتخلفين من مهاجمة اللى بيتوجهوا للحوار

بيذكر عيسي شوية اولويات وهى طبعا فى اطار معارضته السياسية لكن الاهم هو اللى مكتوب بعد كدا

ان الموظف يبطل يفتح درجه وياخد رشاوي او ما يتحايل المصريين ويطلقوا عليه اكراميات
ان المنافقين يبطلوا ينافقوا رؤسائهم فى العمل
ان العمل يبطل يكروت الشغل علشان يخلص الوردية بسرعة
ان الوزير المخطئ يعترف ويمشي من غير كلام
ان المدرس يشرح بذمة وبضمير مش يضرب علشان الدروس الخصوصية
ان كل واحد يقري لو ما قراش عن عدل النبي ونوره لولاده قبل ما يناموا
ان كل واحد يتخلق باخلاق النبي وبصفاته
ان كل واحد ما يصليش اداء واجب والسلام لا يصلي علشان يأمر بمعروف وينهي عن منكر ان كل واحد يصلي بقلبه مش مجرد آله بتعمل حركات ملهاش معني

خلص كلام ابراهيم عيسي وتعليقي عليه والكلام تقريبا داخل فى بعضه بس حبيت اوضح وجهه نظري
*******************
حاجة كمان لما نيجي نقاطع يبقي نقاطع كل حاجة مش بمزاجنا اللى مش عايزينه نقاطعه واللى محتاجينه لا ما نقاطعهوش
بلاش الازدواجية فى التعامل دي واللى هى اصلا بقت صفة اصيله فى الشعب المصري
*******************
حاجة كمان
المنتخب بتاعنا ما اخدش الكاس علشان كانوا بيسجدوا بعد كل جول ولا حاجة المنتخب فاز علشان ادي وربنا بيدي كل واحد على قد جهده حتى لو كان غير مسلم ودا واضح من تقدم الغرب علينا وموقف التضامن مع غزة برضه مش هو اللى خلانا نفوز بالكأس لأنه موقف فردي وحتى لو كان جماعى بردو مش هو السبب
السبب الوحيد ان من جد وجد ومن زرع حصد

**********************************

خالص تحياتى
تشي

21 comments:

mesh2dra said...

السلام عليكم

قريت البوست بدون تركيز اوى نظرا للظروف الطارئة والتي تقتضي التوجه وبسرعة الي النوم


ابراهيم عيسى عنده حق
احنا اللي كبرنا الموضوع
واحنا بردو اللي طلعنا مرة واحدة ونمننننننننننننننننننا

حديك مثل بسيط - مع فارق التشبيه طبعا - لو حد جه مثلا ورسم اخي بشكل سىء وفرج الدنيا كلها على صورة اخي البشعة دي
وانا قعدت ألف على نفس الدنيا اللي شافت صورة اخي وازعق باعلى صوت واقول لا مش اخويا ، مش صورة اخويا ، اخويا مش شكله كده
هل ده حل المشكلة
هل اثبت للدنيا ان فعلا اخويا مش شكله كده
هل خلى اللي ماكنش واخد باله اخد باله

طب الحل ايه
الحل انى اوري صورة اخويا الحقيقة للبشر
واوريهم اخى نفسه كدليل واثبات على صحة كلامي

نفس الموضوع
احتجاج واعتراض
طب وبعدين
النتيجة كانت ايه
مزيد ومزيد من الصور السيئة
عملنا حاجة ؟
ولا حاجة
الموضوع اتحل؟
لا ابدا
طب كان اتحل ازاى

اتحل ببساطة وهدوء
بمنتهى البساطة الرسول بتاعنا مكنش شكله كده
بمنتهى الهدوء اجيب ما ييثبت على كرمه واخلاقه الحلوة وعلى سماحة الاسلام
برامج موجهة
لقاء حضارات
ورش عمل
مقابلة طلبة مسلمين مع نظرائهم الغير
وهكذا


امممممممم
مش فاكرة كنت عايزة اقول ايه تانى
تعليقي الاولانى اتمسح
لو افتكرت حاجى اكيد

سلاماتى تشي

Anonymous said...

http://sotelhoria.blogspot.com/
معلش عنده حق في ايه
دة عنوان يتكتب
العنوان مستفز
وبعدين يبطل هوة الاول سب الصحابة وبعدين يجي يقول نعمل ايه
ثم معاك ننصره في نفسنا الاول ماشي بس يا ترى انننا مانعملش حاجة تقولهم مش موافقين على طريقتكوا دي ولا عادي عادي قولوا اللي تقولوه الشتيمة ما بتلزقش امال بتوع الهوليكوست ما بيكحوش معاهم ليه طيب
وبعدين المسيحح اللي بتقول رسموه وهزءوه هم حرين مش هم اللي بيصوروه اصلا انما احنا ما بنصورش انبياءنا
اتطلع على الراابط دة بيرد على تدوينتك ديس
وسلام

Che Ahmad said...

مش قادرة

بجد تعليقك جامد جدا اختصرتي كلام كتير بتشبيهك

حلوة اوي الحلول اللى اقترحتيها دي

تحياتى
تشي

Che Ahmad said...

انونيموس

معرفش انت قريت البوست كله كامل ولا لأ
العنوان مظبوط اوي
العنوان بيقول
علشان خاطر النبي بطلوا تدافعه عنه
بطلوا تدافعه عنه بالطرق الفاشلة دي
بطلوا تدافعوا عنه وانتوا اصلا بتشوهوا صورته

ومين قالك ان ابراهيم عيسي شتم الصحابة هتفتروا ع الراجل كمان لو كدا ابقي وريني صورة من المقال ع الاقل

وبعدين انا ما قولتش ما ننصرش النبي بس قولت نتكلم بعقل
وكمان انا قولت انى مختلف فى حته بسيطة مع ابراهيم عيسي

وكمان ايه جاب ام الهولكوست هنا هى العادة دي مش هنخلص منها بقي

يا عم والمصحف الشريف انا بتكلم فى موضوع معين ايه جاب الهولكوست هنا بس
ايه الحاجة اللى تفقع المرارة دي

انت حورت الموضوع ليه ما تولع الهولكوست واسرائيل كلها

انا بتكلم ع الدانمارك
ايه جاب لجاب دلوقتى
!!!!!!!!!!!!!!!!!

وكمان لينك البلوج اللى انت جابيه انا اصلا حاطه عندي فى الموضوع وقولت ان اصلا الموضوع دا اتكتب علشان اللى قريته هناك يعني انت علقت من غير ما تقري الموضوع كمان بجد انت ضايقتني جدا وانا مش بحب اكون كدا خالص
وكمان اسلوب تعليقك مستفز
لا واكتر واكتر كمان معلق بدون اسم
طيب ليه !!!؟؟؟

مش مهم اسف لو التعليق عصبي شوية
تحياتى رغم كل حاجة
تشي

صفا سارة said...

انا مقال ابراهيم عيسى ده انا متفقة معاه جدا
وهاقولك حاجة الازدواجيه بقت شئ رئيسى فى حياتنا

Che Ahmad said...

صفا
شكرا كتير ع رأيك
وبالنسبة للأزدواجيه هى فعلا حاجة مهمه اوي يظهر الشعب المصري ما يقدرش يستغني عنها

تحياتى
تشي

yomna said...

انا كنت قريت مقال ابراهيم عيسى فعلا وكالعادة كنت متفقة معاه جدا...
الراجل كان عنده حق وخصوصا في كيفية الرد على الناس اللي زي دول


مسمعتش عن مبدا خالف تعرف...ناس مش مشهورة عاوزة تتشهر تقوم تعمل حاجة مطرقعة تخللي الناس تتكلم عنها ... زي افلام ايناس الدغيدي كده
افلام ملهاش اي معنى وفاشلة تحشر فيهم كام مشهد عشان الناس تتكلم عنها...نفس اللي بيعمله خالد يوسف... لو الناس دي تجاهلوها الناس مش هيعملوا كده تاني لانهم هيلاقوا اللي بيعموله مفيش منه فايدة...والجرنان الدانماركي لو مكنش لقى معارضة كبيرة بالشكل ده مكنش نشر الرسوم تاني... هو نشرها لانه عارف ان الناس هتتكلم عنه تاني وهتشهره

استاذ عيسى كان عنده حق...التحاور مع الناس دي مش بيجيب همه

Che Ahmad said...

يمني
قشطة اوى احب الناس الناس للى تكون قاريه الحاجة م الاول دي

حلو اوى تفسيرك وهو تقريبا الاقرب للواقع
كلامك مظبوط اوى يعني لما رسوا المسيح محدش رد عليهم ولا فتح بقه قالوا نشوف حاجة غيره رسموا النبي
كل واحد مضايق من حاجة ولا كاره حاجة طلع غضبه فى الدانمارك
اخر حاجة يمكن التحاور مع الناس اللى رسمت مش هيجيب همه لكن التاحور مع الغرب عموما ومع الشعب الدانمالاكي اكيد هيجيب همه اوهنعرفهم انهم غالطانين بالحكم علينا

تحياتي كتير
تشي

الأستاذ said...

معاه حق جداً
لأننا معدناش ثقافة الرد على الاتهامات أو الدفاع بمرجعية واثقة
على العموم دي مش تقاليد دي ثقافة شعب وربنا يستر وتتغير
إنت كمان مصاب بداء "تداعي الأفكار" ولا إيه؟
ربنا يشفيك يارب
تحياتي

Che Ahmad said...

الاستاذ
يا مراحب
حلوة اوى انها حكاية ثقافة شعب
بس احنا اللى المفروض نغيرها مش نقول ربنا يستر وتتغير ولا ايه رأيك
انت
ايدي في ايدك ونغيرها سوا

وبالنسبة لتداعي الافكار
فعلا دا صحيح
المشكلة انها بتهرب بسرعه اكبر من سرعه تداعيها
مشكلة بس مش مشكلة يعني هى جت على دي

تحياتى
تشي

فتافيت سكر said...

السلام عليكم

زعلت اوي عشان مجبتش عدد الدستور ده ..
هو ابراهيم عسيى صح في حاجات وغلط في حاجات نبتدي بالصح :فعلا الناس عندها ازدواجية وتناقض غريب بنشوفه دلوقت في كل حاجة تقريبا بداية من كثرة عدد المحجبات والمنتقبات وفي المقابل زيادة جرائم العنف والتحرشات .. والقائمة طويلة
وبنعمل اللي يعجبنا وبس وبنقول كلام ومش بنعمل ربعه حتى

وطبعا المظاهرات مش حل هي طريقة بس للتعبير عن استياءنا وغضبنا لكن الحل فعلا هو الحوار وتصحيح صورتنا للغرب زي ما قالت (مش قادرة) واحنا شفنا محاولات قبل كده في الموضوع ده , صحيح انا معرفش اذا كانت نفعت ولا لا بس اهو حاجة ايجابيه بدل رد الفعل السلبي ده

بس انا بتفق معاك انه مقولة (الحسنة تخص والسيئة تعم ) دي اسوء حاجة اتقالت على الاطلاق , انا بعاني منها من ايام الابتدائي

موضوع حلو يا تشي
yasmeen

فتافيت سكر said...

سوري انا خدني الكلام ونسيت اقول الحاجات الغلط في المقال

زي ما قلت يا تشي اننا نتجاهل كل اللي بيحصل هو ده الحل , اكيد لا يعني مثلا لما واحد يقول كلام غلط في حقك تسكت وخلاص ولا تصححه ؟ اكيد هترد وتصحح الكلام ده عشان الناس متاخدش عنك فكرة غلط مش كده ولا ايه ؟

Anonymous said...

أنا أهبل على فكرة .. بالفترة اللي فاتت كلها كنت فاكر إن مدونة "أنا مخنوق" هي المدونة بتاعتك، أكتشفت دلوقتي إنهم مدونتين ..:) معلش بقى العتب على الكبر (23 سنة بالصلاة على النبي) :) :)

المهم .. بالنسبة لموضوع إبراهيم عيسى فأنا متفق معاه بكل حرف، حتى وصولواً للحرف الأخير بتاع إن الحل الوحيد هو السكون والتجاهل، وذلك لعدة أسباب :

1 ـ الرد على السفيه تجاهله.
2 ـ لازم نديهم حريتهم زي ما أحنا مديين لأنفسنا حريتنا، أحنا مديينين لأنفسنا كمسلمين الحقوق علشان نقرر إزاي يعيش المسيحيين واليهود بينا، ومدين لأنفسنا إزاي يتصرفوا، ولو حد منهم اتصرف بطريقة معينة ممكن نعمل مصيبة .. مش بقول إن ده صح بس بقول إن ده حق أدياه المسلميين لأنفسهم بشكل من الأشكال هنا بمصر، فإزاي ندي لأنفسنا الحق ده ونحجر على حرية ناس تانية ببلد تاني متحضر كبير زي الدينمارك ..؟!!

3 ـ مبدأ المرايا : أحنا لازم نشوف نفسنا بمرايا ونعترف آدام أنفسنا إن أحنا مش شاطرين إلا بالصراخ والشتايم والعويل، ومش هنقدر نعمل حاجة .. لا مقاطعة نعرف نقاطع بجد ولا مناقشة نعرف نناقش بجد .. كل اللي نعرف نعمله إننا نطلع بالشوارع ونحرق أعلام .. ولو وقفت أي واحد من اللي بيحرقوا أعلام بالشوارع وأديته مدفع رشاش وخوذة وقلتله يلا على الحرب مش عارف بصراحة رد فعله هيكون إزاي ... :)


بس كده :)

Che Ahmad said...

امانى وياسمين

حكاية الازدواجية دي انا بس اللى اتكلمت عنها وكانت برا المقال بس كانت فى بالى وانا بكتب البوست واتكلمت عنها

وبالنسبة للحوار والمظاهرات متفق معاكي وكمان فى موضوع عدم التجاهل
وبالنسبة للسيئة تعم والحسنة تخص هتكلم فيها تاني


تحياتى كتير
تشي

Che Ahmad said...

ابو حميد
يا سيدي ولا يهمك خالص تنور فى اى وقت وفى اى حته
وبالنسبة للسن يعني عقبال مليون سنه مش 23 بس يا سيدي

بالنسبة لحكاية التجاهل بقي
1- مش يمكن السفيه دا ميعرفش عنك حاجة وانت محتاج تعرفه اكتر
2- فعلا مظبوط بس نديهم الحرية ونقولهم بردو ان رسولنا مش كدا وانتوا شايفينه غلط
3- حكاية المرايا دي صح اوى احنا محتاجين نواجهه نفسنا الاول

شكرا كتير علي رأيك
تحياتى
تشي

Empress appy said...

ايه البوستات الجامده دى
عارف فيه واحد اسمه اسكندريه فاراواى كاتب بوست كده برضه انا عاوزة بس نفهم ونقول ايه ونفهم الناس ايه النبى بتاعنا بس احنا فقدنا الحوار

وحلو ملحوظه المنتخب دى تسلم ايديك

Che Ahmad said...

سيادة الاستاذ الدكتور المهندس الاعلامي الصحفي المعلم الكبير قوي /
ابي باشا
الكوكب تبعي منور بتشريف سيادتكم
قريت بوست الكس فار اواي مع اختلافي معاه فى بعض حاجات إلا انه كان بوست حلو

عموما مبسوط ان البوست عجبك وربنا يسلمك
تحياتى
تشي

Ahmed Al-Sabbagh said...

شكرا على اللقاء الجميل بساقية الصاوى

تعالى عشان تغطية اللقاء

ايميلاتى اهى

ahmed4u21@yahoo.com

ahmed000eg@hotmail.com


تحياتى

أحمد الصباغ

virus said...
This comment has been removed by the author.
virus said...
This comment has been removed by the author.
virus said...

بص يا حمادة .. مش معني إن من جد وجد ومن زرع حصد إن الي اشتغل بس هو اللي حيجيب الحاجه الأحسن .. مش مقياس .. خد عندك أعرف ناس كانت بتدخل الامتاحانات أبيض يا ورد أو ذاكر اسبوع .. أكيد اللي ذاكر اسبوع ده مش حيعمل زي اللي ذاكر طول السنة ومبيصليش ياعم ومع لك جاب أحسن ميت مرة من التاني .. إيه رأيك تاني لو قلنا إن في حرب 73 من غير ما نقول إن لولا التخطيط الصح والامكانيات مكناش نجحنا وبعزيمة أهل البلد .. كل ده كلام زي ما بنقول كده .. في البطيخ .. إنما قول المفسرين والعلماء والمشايخ وهما أهل علم لولا الله أكبر اللي فضل الجنود يرددوها طول الحرب مكناش عملنا حاجه .. أقولك قول والعلم عند الله برضه لعل يكون فعلا سبب نجاحنا هو سجدود اللاعبين بعد كل جون بيجيبوه هو سبب الفوز يمكن ربنا بيجب سجودهم ده .. فبيحب ينجحهم .. علي فكره يا حبيبي البقية في حياتك في وفاة جدتك بثينة .. تحياتي للجميع