الحب حرية

المرة دي فى حاجة واقفة ف زوري وعايز اتكلم عنها

انا هتكلم من وجهه نظري الشخصية جدا علشان ناس كتير اتكلمت فى الموضوع دا قبلي

الحكاية وما فيها حكاية الجواز واجبار الاهل البنت انها تتجوز اي حد ما دام بينام كل يوم على كوم فلوس وشقه ع النيل وشغال شغلانة زى الفل هو ولا بيفهم فيها حاجة بس معاه واسطة قد الدنيا وخاله العقيد الفلانى وعمه اللوا العلانى وشيل يا ابني الليلة دا انت لقطة والله والواحد يخلص من الهم اللى على قلبه دا اللى اسمه بنته مجازا


بضايق من الشخصية اللى بالمنظر دا ومش بحترمها مش بحترم اي اب يبيع بنته لمجرد عريس جاهز بدون ما يلتفت إليها مش بحترم اى انسان بيحجر الحب وبيعتبره " قله أدب ونقص دين " مش بحترم اللى مستني بنته تقول ووشها ف الارض " موافقه يا بابا " لمجرد انه موافق

صديقي العزيز احمد فهمي بيقولي يا ابني امال عايز ايه ما هو لازم كل اب خايف على بنته وبيتمنالها حد ما تتبهدلش معاه ولا تتعب وردي المعروف بس دا بيبعيها وهى يمكن تكون ما بتحبوش يرد هو تاني ما كل ابهات مصر كدا
يااااااااااا سلام وانا علشان كلهم كدا يبقي دي حاجة حلوة الرسول عليه افضل تسليم قال " وإن تتبع أكثر من فى الارض يضلوك " وقال كمان " لا تكن إمعه .... " يعني مش علشان الناس كلها كدا يبقي دا الصح ومش علشان الناس كلها كدا انا كمان اكون كدا

صديقي العزيز الاخر احمد عبد الوهاب قالي ان الاسلام وسيدنا محمد بيطالبونا اننا نزوج البنت لمن احبت فى واقعه ايام رسول الله ( أنا مش عارف الواقعة بالظبط لكن احمد حكهالي واكيد لو فيها حاجة مش مظبوط هيقولها فى التعليقات وهصلحها ودا معناها) الواقعة بتقول ان اهل فتاه راحوا لرسول الله وقالوا انهم اختاروا لبنتهم رجل علشان تتزوجه لكنها كانت بتحب شخص اخر وكان رد رسول الله زوجوها لمن احبت ( أو كما قال عليه الصلاة والسلام )

رسول الله إذا طالب بزواج البنت لمن تحب ( طبعا لما يكون انسان محترم مش لمن تحب اى واحد والسلام )

أنا متأكد تماما ان مهما الأهل قفلوا على بناتهم مش هيقدروا يحكموهم وهيحبوا من وراهم يبقا لزمتها ايه بقي ما نكون اصحاب ولما بنت او ولد يحب اهله يعرفوا وينصحوه ويكونوا دايما معاه بيقولوله دا الصح ودا الغلط واعمل كذا وما تعملش كذا ليه الحب عندنا هو الخطيئة ليه دايما الحب عندنا ممنوع الاقتراب او التصوير او التخيل او الحلم بيه ليه دايما الاهل بيحطوا حواليه ملاااااين الاسلاك الشائكة وهو اسمى المشاعر الانسانية وليه رغم كل اللى الأهل بيعملوه بردو الولاد او البنات بيحبوا بعيد عن الاهل وبيخبوا عن اهلهم وبيفضلوا دايما خايفين على حبهم لما يظهر للنور ليه دايما الاهل لينا زى " البعبع " اللى دايما خايفين نحكيلهم ليه كل اب مش صديق بنته بيثق فيها وبتثق فيه وبيضمها لما تحب ويقولها والله وكبرتي وبقيتي عروسة ويتعرف ع اللى هى حبته ويبقي الحب دا شجرة جميلة ونضيفة هو بيرعاها بنفسه دل ما تطلع الشجرة دي بينهم هما الاتنين مش لاقيه حد يرعاها ويخاف عليها

منكرش ان اغلب ناس مصر بيفكروا بالطريقة الجاهليه دي يمكن يكون اهلي انا كدا ( ويمكن لا لسه مش عارف ) وناس كتير اوي اوي كدا وحواليا وحوالين كل حد بيقرا ومش بعيد حد يكون شايف ان دا الحل الامثل فى الجواز وان جواز الحب دا قلة ادب وقله حيا وكفر وخروج عن الملة كمان
لكن مهما عمل الاهل او اي حد مش هيمنعوا الحب بين البشر

عايز نظرة كدا لواحدة بتحب واحد واهلها خلوها تتجوز غيره بالذمة هتحب " الشخص التاني اللى المفروض جوزها " هتبقي باصه فى عنيه وشايفها حبيبها اللى " اتسرق منها " دا عدل وهيرضيكوا هل هيرضيكوا انها تبقي نايمة فى السرير بتحلم بحبيبها وجوزها جنبها هل هيرضيكوا انها تعمل حاجة من اتنين :-
الأول تبقي اله تفريخ .. تولد وتربي وتعمل الاكل وتكنس وتعسل ومنزوعة المشاعر والاحاسيس إلا مشاعر محرمة لحبيبها المفقود ودمتم
التاني .. انها تكره العيشة مع حد ما بتبادلوش اي مشاعر وترجعلكوا مطلقة بعدها

رجوع تاني لأحمد فهمي لما بقوله يا ابني انا لو مكان اي اب لكنت شجعت بنتى ع الحب وكنت صاحبها وصديقها لأني عارف ان من غيري هتحب وهتتحب يبقي ليه بقي العناد والمكابرة فهمي قالى وانا كمان ساعتها

يا كل اهل فى كل حته لا هتمنعوا الحب ولا اللى بيحبوا خلوكوا اصحابنا علشان تكسبونا ونكون بيكوا احلي ولربنا اقرب وما تسيبوناش نكرهكوا ونكره التصريح ليكوا بحاجة ايا كانت

منير بيقول

دا الحب حرية .. الحب حرية
والقلب لو يتقتل ابدا ملوش دية

الحب حرية عايزنها حرية بإرادتكوا اوكي مش عايزين هنخليها حرية ومن وراكوا والاختيار ليكوا
القلوب مش هتتقتل ولو قتلتوها علشان شايف مصلحة فى كدا هتترد سهامكوا ليها بكل قوة وغضب ووحشية
اي اهل هيمنعوا بنتهم او ابنهم من اللى بيحوه هيعيش طول عمره ( او عمرها ) يكرهوا اهلهم

يارب كل اهل يحضنوا كل قصه حب طاهرة بين اتنين علشان ما نلاقيش بعد كدا اطفال معقدين نفسيا او بيوت مفيهاش نفحة حب وكل حوار بين الام والاب عن الفلوس والمصروف والدروس الخصوصية والولد عايز يروح للدكتور والفلوس قليلة وخناقة اخر كل يوم
( او على رأي سحر الموجي ... تحتل سخمت البيت وتعيث فيه فساد )

خلص كلامي

**********
تحديث
بوست طلب منى احمد عبد الوهاب انى احط لينكه وهو عن شروط الحب فى الاسلام بدل ما يكتبها تاني فى كومنت
من هنا

أرق تحياتي
تشي أحمد