الحب حرية

المرة دي فى حاجة واقفة ف زوري وعايز اتكلم عنها

انا هتكلم من وجهه نظري الشخصية جدا علشان ناس كتير اتكلمت فى الموضوع دا قبلي

الحكاية وما فيها حكاية الجواز واجبار الاهل البنت انها تتجوز اي حد ما دام بينام كل يوم على كوم فلوس وشقه ع النيل وشغال شغلانة زى الفل هو ولا بيفهم فيها حاجة بس معاه واسطة قد الدنيا وخاله العقيد الفلانى وعمه اللوا العلانى وشيل يا ابني الليلة دا انت لقطة والله والواحد يخلص من الهم اللى على قلبه دا اللى اسمه بنته مجازا


بضايق من الشخصية اللى بالمنظر دا ومش بحترمها مش بحترم اي اب يبيع بنته لمجرد عريس جاهز بدون ما يلتفت إليها مش بحترم اى انسان بيحجر الحب وبيعتبره " قله أدب ونقص دين " مش بحترم اللى مستني بنته تقول ووشها ف الارض " موافقه يا بابا " لمجرد انه موافق

صديقي العزيز احمد فهمي بيقولي يا ابني امال عايز ايه ما هو لازم كل اب خايف على بنته وبيتمنالها حد ما تتبهدلش معاه ولا تتعب وردي المعروف بس دا بيبعيها وهى يمكن تكون ما بتحبوش يرد هو تاني ما كل ابهات مصر كدا
يااااااااااا سلام وانا علشان كلهم كدا يبقي دي حاجة حلوة الرسول عليه افضل تسليم قال " وإن تتبع أكثر من فى الارض يضلوك " وقال كمان " لا تكن إمعه .... " يعني مش علشان الناس كلها كدا يبقي دا الصح ومش علشان الناس كلها كدا انا كمان اكون كدا

صديقي العزيز الاخر احمد عبد الوهاب قالي ان الاسلام وسيدنا محمد بيطالبونا اننا نزوج البنت لمن احبت فى واقعه ايام رسول الله ( أنا مش عارف الواقعة بالظبط لكن احمد حكهالي واكيد لو فيها حاجة مش مظبوط هيقولها فى التعليقات وهصلحها ودا معناها) الواقعة بتقول ان اهل فتاه راحوا لرسول الله وقالوا انهم اختاروا لبنتهم رجل علشان تتزوجه لكنها كانت بتحب شخص اخر وكان رد رسول الله زوجوها لمن احبت ( أو كما قال عليه الصلاة والسلام )

رسول الله إذا طالب بزواج البنت لمن تحب ( طبعا لما يكون انسان محترم مش لمن تحب اى واحد والسلام )

أنا متأكد تماما ان مهما الأهل قفلوا على بناتهم مش هيقدروا يحكموهم وهيحبوا من وراهم يبقا لزمتها ايه بقي ما نكون اصحاب ولما بنت او ولد يحب اهله يعرفوا وينصحوه ويكونوا دايما معاه بيقولوله دا الصح ودا الغلط واعمل كذا وما تعملش كذا ليه الحب عندنا هو الخطيئة ليه دايما الحب عندنا ممنوع الاقتراب او التصوير او التخيل او الحلم بيه ليه دايما الاهل بيحطوا حواليه ملاااااين الاسلاك الشائكة وهو اسمى المشاعر الانسانية وليه رغم كل اللى الأهل بيعملوه بردو الولاد او البنات بيحبوا بعيد عن الاهل وبيخبوا عن اهلهم وبيفضلوا دايما خايفين على حبهم لما يظهر للنور ليه دايما الاهل لينا زى " البعبع " اللى دايما خايفين نحكيلهم ليه كل اب مش صديق بنته بيثق فيها وبتثق فيه وبيضمها لما تحب ويقولها والله وكبرتي وبقيتي عروسة ويتعرف ع اللى هى حبته ويبقي الحب دا شجرة جميلة ونضيفة هو بيرعاها بنفسه دل ما تطلع الشجرة دي بينهم هما الاتنين مش لاقيه حد يرعاها ويخاف عليها

منكرش ان اغلب ناس مصر بيفكروا بالطريقة الجاهليه دي يمكن يكون اهلي انا كدا ( ويمكن لا لسه مش عارف ) وناس كتير اوي اوي كدا وحواليا وحوالين كل حد بيقرا ومش بعيد حد يكون شايف ان دا الحل الامثل فى الجواز وان جواز الحب دا قلة ادب وقله حيا وكفر وخروج عن الملة كمان
لكن مهما عمل الاهل او اي حد مش هيمنعوا الحب بين البشر

عايز نظرة كدا لواحدة بتحب واحد واهلها خلوها تتجوز غيره بالذمة هتحب " الشخص التاني اللى المفروض جوزها " هتبقي باصه فى عنيه وشايفها حبيبها اللى " اتسرق منها " دا عدل وهيرضيكوا هل هيرضيكوا انها تبقي نايمة فى السرير بتحلم بحبيبها وجوزها جنبها هل هيرضيكوا انها تعمل حاجة من اتنين :-
الأول تبقي اله تفريخ .. تولد وتربي وتعمل الاكل وتكنس وتعسل ومنزوعة المشاعر والاحاسيس إلا مشاعر محرمة لحبيبها المفقود ودمتم
التاني .. انها تكره العيشة مع حد ما بتبادلوش اي مشاعر وترجعلكوا مطلقة بعدها

رجوع تاني لأحمد فهمي لما بقوله يا ابني انا لو مكان اي اب لكنت شجعت بنتى ع الحب وكنت صاحبها وصديقها لأني عارف ان من غيري هتحب وهتتحب يبقي ليه بقي العناد والمكابرة فهمي قالى وانا كمان ساعتها


يا كل اهل فى كل حته لا هتمنعوا الحب ولا اللى بيحبوا خلوكوا اصحابنا علشان تكسبونا ونكون بيكوا احلي ولربنا اقرب وما تسيبوناش نكرهكوا ونكره التصريح ليكوا بحاجة ايا كانت

منير بيقول

دا الحب حرية .. الحب حرية
والقلب لو يتقتل ابدا ملوش دية

الحب حرية عايزنها حرية بإرادتكوا اوكي مش عايزين هنخليها حرية ومن وراكوا والاختيار ليكوا
القلوب مش هتتقتل ولو قتلتوها علشان شايف مصلحة فى كدا هتترد سهامكوا ليها بكل قوة وغضب ووحشية

اي اهل هيمنعوا بنتهم او ابنهم من اللى بيحوه هيعيش طول عمره ( او عمرها ) يكرهوا اهلهم

يارب كل اهل يحضنوا كل قصه حب طاهرة بين اتنين علشان ما نلاقيش بعد كدا اطفال معقدين نفسيا او بيوت مفيهاش نفحة حب وكل حوار بين الام والاب عن الفلوس والمصروف والدروس الخصوصية والولد عايز يروح للدكتور والفلوس قليلة وخناقة اخر كل يوم
( او على رأي سحر الموجي ... تحتل سخمت البيت وتعيث فيه فساد )

خلص كلامي
أرق تحياتي
تشي أحمد

19 comments:

A7MeD F@hMy said...

انا بفكر اكتب البوست ده من زمان بس انت سبقتني لو لقيتني هاجيب جديد عن اللي انت كاتبه هتبه
بالنسبة للبوست
موافقة تامة
امتياز بجد

صفا said...

شوف فى البدايه كده البوست جامد جدا وده مش جديد عليك طبعا
بص بئه انا متفقة معاك فى كل الكلام اللى انت قولته بس هاقولك على حاجة دلوقتى صعب انك تغير المفاهيم دى عند معظم الاهالى يبقى الحل ان كل واحد يتمسك بافكاره وانا عندى اقتناع تام ان محدش بيعمل حاجة غصب عنه غير بئه اللى معندوش شخصيه وبردو الحل ان جيل دلوقتى يقتنع بالافكار دى لان للاسف لسه فى نسبه كبيره مقتنعة بالافكار دى يبقى خليك فى الجيل الجديد افضل
واسفة على التطويل
اه وبغض النظر عن كام كلمة كده فى الموضوع بما انك قولت انك بتتكلم من وجهة نظر بعض الناس

s@gi said...

طب ما تقول لولدك
ولوالد اللى هتحبها كده
-------
انا عن نفسى - متكتف علشان الرأى الآخر المتحجر ده .. وعلشان المجتمع اللى ماسك كاميرا ومستنى غلط علشان يعمل قصه
باعتبار ان الحب غلط
--------
ياراجل ف اكر من انك تشوف اللى بتحبها تدير وشك
علشان ما تعملهاش سمعك
قال ايه بتحبها
--------
استمر ف التفنيد للرأى الغبى ده وأكيد هتلاقى حل
-------
سلامى كتير واتمنى تتحلى بشجاعه كافيه انك تعمل ده ف الحقيقيه مع اهلك واهل اللى هترتبط بيها
وتتغلب عل القيود

gehad_fci said...

ايه يابو حميد انت حاولت تخطب ولا حاجه
هههههههههههههه
اما الواحد يحب يتجوز بعد كدا نروح واخدين قرض من البنك ونهج بره البلد
ههههه بهزر ياراجل

قال رسول الله صلي الله عليه وسلم"إذا جائكم من ترضون دينه وخلقه فزوجوه"وبعد كدا بقي كل حاجه تكون كويسه ان شاء الله محدش عارف بكره في ايه
تحياتي

ahmedomar said...
This comment has been removed by the author.
HaMaDa 3aFshA said...

حبيب قلبى يا بو حميد بافكارك الجامدة وموضوعاتك الشيقة
الاول خد نص الحديث اللى انت بتستندله من كلامى
" عن ابن عباس رضي الله عنهما ان رجلا قال "يارسول الله في حجري يتيمة قد خطبها رجل موسر ورجل معدم، فنحن نحب الموسر وهي تحب المعدم، فقال صلى الله عليه وسلم: (لم نر للمتحابين غير النكاح) اخرجه ابن ماجه والحاكم"
نرجع بقا للموضوع انا من النحية دى اتكلمت فى شروط الحب ده وضوابطه قبل كده فى بوست كامل وانت عارفه فمش هكرر كلامى ابقى بص عليه تانى
اما هنا فمن وجهة نظرى برده انت لو بجد بتحبها اتقدملهاعلشان ترفع عنك وعنها الشبهات الكلام سهل اهه
طيب مش قادر متهيألى انى احبها فى سرى واكتم حبها فى قلبى دا اعظم واسمى من انى اصارحها واشبع شهوتى من الكلام معاها واريح قلبى واشغلها معايا وممكن الظروف ما تسمحش يبقى جرحتها جرح كبير بدل ما هحبها يبقى هكسرها لا وممكن لو اتكلمت معاها أضرها هى والفت الانظار ليها واتسبب انها تتوصف باوصاف هى ابعد ماتكون عنها
متهيألى لو انت مستطيع تتقدملها وعندك الشجاعة الكافية لده اتفضل مش هتقدر وهتعطلها جمبك سنين وممكن من غير فايدة يبقى الافضل تخلى فيه ما بينكوا احترام وبلاش جرح او غيره وسيبها فى حالها وانت فى حالك وقول يارب يوفقنى ويوفقها
سلام يا باشا

GiGi said...

بوست بجد رائع
والمشكله ان اهالينا فاكرينا اغبياء واننا لما نحب يبقى اكيد حبينا غلط
مع انا تربتهم ويحضرنى كلمه جميله جدا لدكتور عمر عبد الكافى قالها زي ماهى هو احنا ماربينهم هبل
ورايه انه لازم البنت يتاخد رايها
يارب اهالينا تسمعنا عايزين نعمل دايما حاجه ترضى ربنا ارجوكم ساعدونا

Che The Hermit said...

فهمي

منور دايما
شكرا على رأيك ومستني لو عندك جديد

تشي

Che The Hermit said...

صفا

شكرا فى البداية كدا

مقتنع تماما ان الجيل اللى فات مش كله هيغير افكاره بس انا بقول وجهه نظري وايه اللى هسحصل لو فضل كدا ومقتنع بردو ان المفروض الجيل الجديد يكون اكتر تفهم مع ان منهم مقتنع بالافكار القديمة لسه بردو

والتطويل عندنا مرغوب على فكرة

تشي

Che The Hermit said...

ساجي

بص اهم من اقول لوالدي ان اهلها يكونوا عارفين ودي حاجة انا بفضلها بس لو هما متعنتين وافكارهم متخلفة يبقي مش هينفع يعرفوا حاجة المشكلة مش نقول ولا لأ المشلكة فى الافكار الموجودة نفسها

-----

وزى ما انت بتقول دا كله علشان المجتمع صاحب الافكار المتحجرة والحل فى رأيي انى ما ابصش لكلام الناس مع انها حاجة صعبة اوي

-----

وعلى فكرة انا كنت اتغلبت ع القيود دي قبل كدا وهفضل دايما اتغلب عليها

بحبك
تشي

Che The Hermit said...

جهاد

لا والله يا جهاد ما حاولتش ولا حاجة ولا بفكر فى القريب ان اخطب اصلا بس الموضوع مضايقني

وعلى فكرة الحديث تمام وكل حاجة بس هو خارج نطاق انتقادي للأفكار القديمة دي

نورتني
تشي

Che The Hermit said...

عمر

شكرا ع الكومنت ولو انى معرفش مسحته ليه مع انه كان اكتر من رائع

مستنيك دايما
تشي

Che The Hermit said...

عفشة

شكرا على نص الحديث الاول

كلامك منطقي وعقلاني بس على ارض الواقع التنفيذ بيبقي صعب والتعنت من الاهل دلوقتى كتيييييييييييييييير

تشي

Che The Hermit said...

جيجي

شكرا على رأيك فى الاول

فعلا الاهل بيفقدوا ثقتهم فى اولادهم فى النقطة دي بالذات مع انهم هما اللى مربينا ومعلمينا الاختيار وغيره

عجبتني اوى جمله دكتور عمر ويا رب اهلينا يسمعوا

تشي

سى السيد said...

احمد باشا
البوست جامد
وفعلا مشكله جامده والله
لاتن بعد كده بيترتب عليها مصايب كتير
بسبب الاجبار
وكلنا عارفين المصايب دى
بس هو الاب عاوز يرتاح وكبر دماغه
ةويجى واحد يشيل اليله
مش مهم بقى اى حاجه تانيه
بالنسبه لموضوع الحب دى اكبر مشكله لينا
ولوكان فيه لو 10% تفهم من اهلينا
كان الوضوع سهل بالنسبه لينات
وبالنسبه لهم
وبكرر اعجابى بالبوست الرائع دا
وفكرته الاكثر من رائعه

Che The Hermit said...

سي السيد

ياااااااااااااه
منورني والله بعد غياب

شكرا اوي على رأيك فى البوست وفعلا مصايب كتير بتحصل بسبب التعنت والافكار دي

سلاماتي يا جميل
تشي

Nour said...

احم احم
اولا اسفة على التطفل
بس البوست عجبنى جدا وقلت لازم اكتب كومنت عليه بعد اذنك طبعا
انا فى رأيى
ان لو كل اب صاحب ابنه وكل ام صاحبت بنتها
مشاكل كتير فى مجتمعنا هتتحل
زى الجواز العرفى والعلاقات الغير الشرعية
سواء بدافع الحب او لا
لان الولد والبنت هيسمعوا كلام اهلهم عن اقتناع وحب مش عن غصب او عشان التقاليد والعادات كده
ولو كل اسرة طبقت دينا صح هتبقى الحياة جميلة جدا
وانا شايفة ان الحب مش حرام ولا عيب
الحب مشاعر سامية جدا ومش اى حد يعرف يقدرها
بس تقريبا كل الناس بتحس بيها لاننا مولودين بيها
وبالنسبة للأب اللى بيجوز بنته للى معاه فلوس وهكذا
هو بيبقى نوعين
اما نوع سى السيد اللى هو كلمته مش ممكن تنزل الارض والكلام الفارغ ده
وطبعا ده مش له حل ويبقى سبب فى تعاسة اسرته كلها
والنوع التانى اللى بيجى بالتفاهم
يعنى البنت تتكلم مع والدها بالعقل وتقنعه والله بجد الكلام بالعقل بينفع فى احيان كتير اوى واسأل مجرب
وفى نقطة مهمة جدا ان الاب ممكن يكون متفاهم جدا بس خوفه على بنته من الزمن بيجبره انه يقبل بعريس زى كده
مش لأنه عايز يتخلص منها ولا حاجة
بالعكس ده بيبقى خايف عليها اكتر من نفسه
وربنا يهدى الجميع
ويرزقك ببنت الحلال

Che The Hermit said...

نور

منورة البلوج
وعلى فكرة مفيش فى عالم البلوجز حاجة اسمها تطفل او بعد إذنك

انا كمان معاكي ان المفروض الاهل يصاحبوا ولادهم وبناتهم
علشان يتجبنوا حاجات كتير ايا كانت

اما حكاية الاب فأنا ملقتش غير النوع الاول والله وبس

بس اتمني اشوف النوع التاني

منورة ويا ريت متكونش اخر مرة

تحياتي
تشي

the unmistakable said...

انا عارف انى داخل على البوست ماتخر اوى بس و الله ظروف
البوست جامد اوى و الفكرة جامدة موز و انا كنت عملت من ضمن السلسلة بتاعتى الكيف فى الحب بس الحب ده اجمل شئ فى الوجود و الحب انواع انما انت اخترت نظام واحد و هو الجواز
الجواز اليومين دول كده و الله عاذر الاب و الام على الظرروف المنيلة بتاعت اليومين دول و بتاعت كل يوم انت اصلا لو حتروح تتجوز واحدة حتبقى عاوز تروح ملو هدومك و معاك و معاك ...........
بس انا كنت عاوز اقولك ان القرار اليومين دول فى ايد البنت م زى زمان الاب و الام بس بيرجح واحد و بيقولوا رأيهم و الموافقة بتيجى من قبل البنت ان كانت عاوزاه و لا م هو ده العريس الموعود
انا فكرت و قولت انه لازم يكون لااتنين راضين بالقليل و الحب انشاء الله حيغى الموضوع و كله فى سبيل مستقبل افضل من اجل الاولاد و المجتمع و مجتمع خالى من المشاكل
و يارب اكون وضحت الفكرة بتاعتى ان المشكله هى الرضى