أسف

أنا أسف لكل حد زعلته فى اي حاجة
يمكن فى حاجات كتير مش واخد بالي منها
يمكن فى حاجات كتير غلط بتحصل بعديها
يمكن فى حاجات حلوة ومش بشوفها

فى ناس كتير بتشرف بمجرد وجودها فى حياتي
وناس كتير بتمني مكنتش عرفتها

متأكد تماما دلوقتى انى مش محتاج لحد لا اللي يشرفني ولا اللى ما يشرفنيش
بقت الحياة كلها عبث وكلام فاضي ومش مستاهله حتى واحد يبصلها

عايز ابعد عن كل حد اعرفه
اقفل البلوج والميل واغير نمرة الموبايل واروح حته بعيدة محدش يعرفني فيها

12 comments:

ahmedomar said...

احمد هيما

هنصحك نصيحة من اخوك انسى كل حاجة لحد ما تخص

خلصت اعمل اللى انت عاوزه

حاول تاخد هدنة مع نفسك وتحاول تتصافى معاها

بس اعرف انك عمرك ما هتعرف تعيش بدون ناس

انت ممكن تكون مصدوم فى ناس بس دة ميخليكش تغير نظرتك فى الناس كلها

انا متاكد انك لما هتقعد وتفكر لوحدك هتعرف الصح فين

تحياتى

عمر

صفا سارة said...

احمد مينفعش تدخل الناس كلها فى بعضها كده ومينفعش يكون قرارك الانسحاب كده ومن امته كان الهروب هو الحل بالنسبة ليك حاول تفكر تانى فى كلامك ده ولو عاوز تبعد عن حد يبقى تبعد عن اللى بيضايقك

Drop of the Ocean said...

ممممممممم..بعد اذنك يعنى انا هفكر بصوت عالى..ممكن؟
تعرف ، حكاية "تبعد" دى لو فكرت فيها
هتلاقيها فكرة.. بس فكرة وحشة
(غير لو كنت ناوى تبعد اوى لحد الجنة مثلا)
انا مش فاهمة انت عايز تبعد وتنعزل؟ ولا عايز تبعد وتبدأ حياة جديدة؟
لو عايز تبعد وتنعزل دى حاجة مينفعش تتعمل ، على فكرة حاجة كويسة انك متبقاش محتاج "حد" كاشخاص ، بس انت مضطر تبقى محتاج علاقات انسانية حتى مع "ويلسون" (عارفه؟ توم هانكس لما تاه ف جزيرة كان بياكل ويشرب بس كان هيموت عشان "لوحده" فعمل "ويلسون" ده وعاش معاه يكلمه ويخاصمه ويصالحه:) )
http://www.michaelckennedy.net/blog/content/binary/cast_away_movie_Wilson_football.jpg
فحكاية الانعزال نلغيها
طيب لو عايز تبدأ حياة جديدة فى مكان جديد وناس جديدة وترمى اللى فاتت ،التغيير جميل وبينفع اوى .. بس ده غير الهروب،اصل الناس هما الناس .. بنقابلهم ونفراقهم .. والدنيا هى الدنيا حلو و مر .. لو لغيت حياتك القديمة بالحلو والمر .. للاسف المر اللى ف الحياة الجديدة ده هيصدمك من تانى ويخليك عايز تسيب الجديدة كمان (سورى).. ونفضل ف دايرة.. لكن لو اتعلمنا منه بدل مانلغيه ونهرب منه كده كل مرة خسايرنا هتقل ونبقى دوسنا ف الدنيا

بجد يااحمد الدنيا هى الدنيا ، سواء كنت وحيد او مع الناس دول او مع ناس غيرهم .. هى الدنيا كده .. منقدرش نغير الناس لكن نقدر نغير شكل علاقتنا بيهم .. منقدرش نغير الدنيا لكن نقدر نغير نظرتنا ليها.. فاكر لما "اسرار انثى" قالتلى جربى (جرعات من الصفائية)، جربها كده ..حاول تشوف كل حاجة شفافة.. حتى الحاجات السودا خليها اسود شفاف عشان تشوف الحاجات اللبنى والموف اللى وراها

بما ان انا وانت لازق فينا كلمة "كل حاجة هتبقى كويسة" وقعدين مستنين وطلع كله فشر اصلا، ممكن نخليها "فى حاجة ما هتبقى كويسة" ده بقى انا متأكدة منه

طيب ياعم انت لو انت خلاص مش محتاج حد فى حدود محتاجالك .. قضيها "فعل خير" :)) ده مش بيبسط ؟ ..

استجم شوية ولا شويتين ،خد هدنه زى ماعمر بيقول وفكر مع نفسك وغير نظرتك لحاجات كتير، وظبط توقعاتك من كل حاجة ومن كل حد تعرفه ،حط كل شخص وكل حاجة ف حياتك ف مكانها المظبوط بالنسبة لك بس بردو خلى الاماكن دى ديناميكية .. زود الاكصدامات و الكوتشات اللى حواليك ، بعد كده يخلص الاستجمام وترجع للدنيا تانى تواجها منغير ماتصدتم بيها ، وتتاقلم معاها منغير ماتديها فرصة تغيرك


سووووورى ع الرغى ده كله ،وسورى لو فى حاجات ملهاش لازم ولا مش راكبة على بعضها .. اصل انت قومت وسيبتنى مكبــــوتة ،استحمل بقى :(( .. والله يااحمد .. والمسيح الحى كمان ، لو غيرت رقمك وايميلك منغير ماتدينى الجداد .. ممممممم.. مش عارفة هعمل ايه يعنى بس اوعى تعملها وخلاص :(((


(اكبر حضـــــــــن الكترونى فى الوطن العربى وشمال افريقيا)

و فى امل بردو ان كل حاجة تبقى كويسة:) عارف ليه؟ عشان انت حد كويس اوى وجميل اوى ، وانت الحاجة المشتركة بين كل الحاجات اللى حواليك:)

(على فكرة انا بطلت كلام بالعافية وخبيت من نفسى الكيبورد.. متخيل كمية الكبت؟)

Che Ahmad said...

عمر

شريط منير بجد نساني مؤقتا وبعد الامتحان هنسي تماما

معترف باهمية وجود الناس بس يمكن حالتي النفسية الوحشة هى السبب فى دا كله

بدور ع الهدنة والله ومش عارف

Che Ahmad said...

صفا

بفكر تاني دايما كلامي كان تفريغ لشحنة غضب جوايا يمكن

اكيد مش هيكون هروب لو كان بقدر ما هيكون حياة جديدة

يمكن

Che Ahmad said...

دروب

بجد مش هقول اكتر من شكر كبييييييييييييييييييييييييييييييييييييير اوي

حضن اكبر من الحضن بتاعك ( اكبر حضن فى العالم كله )

GiGi world said...

لا خليك هنا واكتب كل حاجه عايز تقولها دي احلى حاجه فى عالم التدوين تكتب اي حاجه وفى اي وقت ومفيش اي نوع من القيود
استمر ياايها الشاب الرائع بس بعد اامتحانت ماشي ماشي مش هقول تاني بعد الامتحانات عايزين تقدير جامد كده
يارب

ahmedomar said...

ايوة كدة يابو حميد

انت كدة احمد هيما بجد

سلام يا تشى يا سعيد مؤقتا

ههههههههههههههههه

YOTTA said...

حالة وهتعدى يا احمد
المهم انك وانت فيها تبقى مؤمن انها هتعدى

شكرا على موقفك الشهم مع الكتكوت..اصله يا عينى جه ف وقت غلط وانا مش عارفه اعدى كتير واكله..
:)
خلى بالك منك

Che Ahmad said...

جيجي

انا هنا موجود هكتب واقول كل اللى فى نفسي واديني خلصت امتحانات تقريبا كمان

شكرا ع الدعم المعنوي

تشي

Che Ahmad said...

عمر

يا رب افضل احمد هيما اللى بجد

سلام يا جميل
تشي

Che Ahmad said...

يوووووتا

اعتقد قربت تعدي خلاص

وبالنسبة للكتكوت والله انا كنت معيشه خالص واكل ولعب وكل حاجة

متخافيش " الكتكوت فى ايد امينة " ( مش امينة بتاعه سي السيد )

سلاماتي
تشي