اقرأ .. تكون ؟؟ - 2



فى بوست عندي ومن حوالي شهرين بالظبط اتكلمت عن حملة
اقرأ ... تكون
البوست من هنا

الحملة اللى كنت بطالب فيها بتفعيل دور القراءة كصاحبة الدور الاهم فى إثراء الثقافة عندنا كشباب مصري

بحاول نشرها كحل امثل فى نظري للقيام من الكبوة وللتحرك شوية نحو مقدمة الركب اللى بشك اصلا اننا لسه بننتمي ليه

اول الفكرة جاتلي وانا قاعد فى الكلية بقرا فى كتاب ولقيت كل لما اخلص كتاب بينتقل تلقائيا ( وعن طيب خاطر ) من إيدي لإيادي اخري تقري ونظرا لأنى والحمد لله عندي كمية مختلفة من الكتب فتكفلت بتوفير كتب لكل اللى نفسه يقرأ بس كان فى اطار اصدقائي وبس ومعرفتش اخرج بفكرة نشر الكتب من الدايرة دي وعلشان كدا خرجت برا الدايرة دي بفكرة جروب الفيس بووك ولكننا اكتشفنا انه مش هيكون ليه دور غير دور دعائي بس لنشر الفكرة لكننا محتاجيين حاجة اكبر من كدا علشان يكون فى فعلا هدف للفكرة او الحملة ويكون هدف ملموس
فكرنا فى حاجات كتير لقينا ان بعضها تحقيقه مستحيل تقريبا دلوقتى على الاقل فى الاجازة دي



فكرنا فى عمل مكتبة على موقع الفور شيرد متقسمه حسب المجالات المختلفة لكن الفكرة كانت هتبقي متأخرة شوية ومش هتحقق الهدف بردو نظرا لان الفورشيرد ليه داونلود ريت محدد مش مسموح بتدعيه لكل اي بي
وعلشان كدا فكرنا فى موقع نرفع عليه الكتب ولقينا كذا موقع بيدعم التنزيل المباشر وبدأنا فى تنفيذ موقع مجاني ( لان الامر كله تطوعي تماما ) وإن شاء الله هنحاول فى اسرع وقت نخلص الموقع ورفع الكتب بس هنحتاج وقت علشان نطلع حاجة راضيين عنها فى المقام الاول لأننا وانا اول واحد ما بحبش حاجة تطلع من تحت إيدي ناقصه ابدا وبدقق فى اقل التفاصيل

فى تفاصيل كتير مش وقت الكلام عنها بس يا ريت لو حد عنده قدره ع المساعدة فى اي حاجة يا ريت يقولي ويا ريت بردو لو حد عنده افكار بس مجرد افكار يقولهالنا

خالص وارق تحياتي
تشي أحمد

12 comments:

Dr. Eyad Harfoush said...

عزيزي Che

فكرة جميلة تخرج من شباب جميل، كنت اشاهد الكاتب المناضل ابراهيم عيسى منذ ايام و هو يكاد يبكي و هو يقول للناس من خلال شاشة التليفزيون "اقروا ..ابوس ايديكم اقروا" فماساتنا يا صديقي هي ثقافة السماع هذه التي سيطرت علينا، و ثقافة الجرائد التي هي بطبيعتها قصيرة الذاكرة جدا و قابلة للتشكيل بحملات مغرضة

فكرة المكتبة الالكترونية رائعة ، عندي مكتبة الكترونية كبيرة بالعربية و الانجليزية، ساحاول في اسرع وقت ان اعد لك قائمة مصنفة و مبوبة بالكتب بها لتختار ما تريده فارسله لك، طبعا كتبي التي من تاليفي تحت امركم لو رايتم وضعها فهي معد في شكل ملفات بي دي اف
تحياتي و تقديري

أسامه يوسف said...

تشيييييييييييييييى
واحشنى موت ياعم
والله أنا مقصر موت بس نعمل ايه
عالعموم انا لسه مخلص النهارده واخدت البراءه

بص يا عم ماتزعلش من حوار التشووز بتاع اليوزرز اللى عندى لأنى قافلها وهمسحها قريب وهافتح واحده تانيه علشان حوار كده هبأه اقوله فى البلوج الجديده

انا لسه كنت باقلب فى البلوج عندك
وصدمت
نامووووووووووس
انت زعلان علشان الزقازيق فيها ناموس
يعنى القاهره مافيهاش ولا إيه ؟؟
ما أنا قاعد أهو ومافيش ولا ناموسه
هما اتنين على دراعى اليمين وواحده عالكى بورد واربعه بيطيروا حاولين دماغى
ززززززززززز
ايه القرف ده
معاك حق

نيجى للمفيد
بالنسبه للموقع ده انا معاك وميه ميه
بس حقوق الملكيه
انا بانزل كتب من عالنت فعلاً بس وانا بانزلها باكون حاسس بالذنب
ياريت تفهمنى
وربنا يوفقكم

سلام ياعم
أوسس

ahmedomar said...

فكرة جميلة ومفيدة جدا يابو حميد

منتظرها بفارغ الصبر

عمر

the unmistakable said...

كلام جميل انك تتطلع شاب مثقف و تبقى اكثر توعية عم الناس اللى جنبك و جميل اوى الشعار انك لو قريت تكون انسان نافع و يارب الحملة تنجح و دواتى ليك يا تشى يا كبير

Empress appy said...

انا طبعا مقصرة معاك بس معلش غصب عنى والله المواصلا والكعبلات هههههههههه
حلوة فكرة الموضوع ده يا ريت تبلغنى بيها اول حد على طول لانى نفسى اقرى كتير بجد

Capt. Haytham Harfoush said...

عزيزى Che Ahmed

أنا سعيد جدا أن شاب مثلك يكون له أفكار كهذه, و سعيد بتعليقاتك فى مدونة الدكتور اياد, و سوف نتكلم أكثر بعد قرأتى لباقى مدوناتك

تحياتى

Che Ahmad said...

العزيز دكتور اياد

مبسوط جدا ان الفكرة عجبتك وبالنسبة للمكتبة اللى عند حضرتك اكيد هتفيدنا كتير وكتبك الخاصة اكيد هتثري المكتبة

اتطلع الحقيقة لدور لحضرتك اكبر

تقديري
تشي أحمد

Che Ahmad said...

اسامة يوسف

مستني البلوج الجديد يا اسامة

اما بخصوص الناموس فانا كنت بخلص علبة بيروسول فى اليوم الواحد والله

حكاية الملكية الفكرية دي عندك فيها حق بس الصراحة انا مش منحاز ليها منحاز للناس اللى هتقري ومعهاش فلوس تجيب كتب

تحياتي
تشي أحمد

Che Ahmad said...

عمر

قريب جدا إن شاء الله يا عمر

تشي

Che Ahmad said...

the unmistakable

يا رب الحملة تنجح وشكرا على دعمك المعنوي

تحياتي
تشي أحمد

Che Ahmad said...

ابي

ولا يهمك المهم انك بتعدي

اول ما اخلص الفكرة هبلغك وناس كتييييييييير على طول

هحاول اخلص فى اقرب وقت

تحياتي
تشي أحمد

Che Ahmad said...

العزيز كابتن هيثم

البلوج منور على فكرة الدكتور والكابتن فى مرة واحدة

انا سعيد بوجودى فى مكدونة دكتور اياد لان دايما بعرف اكتر

منتظر نتكلم اكتر

تقديري
تشي أحمد