عينه عشوائية

دا بول ع الفيس بوك ودي نتايجه لغاية ما انا عملت الفوت بتاعي عليه
لو اخدنا الناس اللى عملت فوت هنا كعينه عشوائية للشعب المصري هنلاحظ حجم الهوه واللى لازم وابداً تخلينا في ذيل قائمة دول العالم ونحسب ضمن سقط المتاع اللي ما بيفرقش مع حد
خلينا نشوف البول وهعلق عليه

Autoscale-100x100
the icon amr diab
535
Autoscale-100x100
adel emam
472

Autoscale-100x100
Abo Treka
756
Autoscale-100x100
Amr Khaled
575

Autoscale-100x100
ahmed zweel
300



في المقدمة خالص يتصدر لاعب الأهلي والمنتخب محمد أبو تريكة بعدد756 صوت بنسبة 28.66% ولو ركزنا شوية هنلاقي ان الناس بتتعامل مع تريكة علي انه بطل ، او سوبر هيرو بيسعدها دايما وبيحققلها نجاحات مبهره وعلشان كدا رفعناه فوق اوي لدرجة انه في المركز الأول من خمس أشخاص هما تقريبا كل منهم الأشهر في مجاله

رقم اتنين في القائمة هو عمرو خالد بـ 575 صوت وبنسبه 21.8% من مجموع الأصوات ، وعمرو هنا بيمثل المثل الأعلي للبعض بعد دعوته الوسطية المعتدله اللى جذبت كتير من الشباب لطريقه

التالت هو عمرو دياب بنسبه أقل قليلا 535 صوت أو 20.28% وعمرو هو قمة الهرم الموسيقي في الوطن العربي حسب الخريطة العامه حتى لو شاف البعض عكس كدا لكنه حتى الان رقم واحد في الوطن العربي

رابعا عادل إمام ب472 صوت بنسبه 17.89% وعادل إمام هو ملك الكوميدينات في التلاتين سنة اللى فاتوا ودا خلاه يتربع علي قمه الممثلين اللى بيمثلهم هنا ف البول دا

أخيرا بقي بيقبع في القاع أحمد زويل !!!!!!!!! بعدد أصوات يكسف 300 صوت أو 11.37 من مجموع الأصوات وأحمد زويل هو أشهر عالم مصري واللي حاصل علي جايزة نوبل ومرشح ليها مرة كمان

------------------------------------
دي الإحصاءيات المباشرة
لو بصينا كدا بشوية عمق فى المركز الأول المصريين بينظروا لأبو تريكة علي أنه المثل الأعلي أو القيمة أو البطل زي ما قولت فوق ، ودا لسبب رئيسي في رأيي وهو انعدام البطل وثقافه صناعه الأبطال الفعليين فبقينا بندور علي ابطال هشه ذوات انجازات هشه أيضا لأنهم اللى عندنا واللى ملوش بطل يعمله بطل .
بعد كدا عمرو خالد ، وعمرو هو الداعيه الديني الوسطي اللى انتشر بسرعه البرق بين الشباب بطريقته السلسه الجذابه اللى وصلت لعدد كبير من الشباب ووصل لأنه بقي بالنسبة ليهم البطل او المثل الأعلي وربما المخلص كمان ، وبغض النظر عن رأيي في عمرو كمصلح اجتماعي اكتر منه داعيه دينيه إلا انه وصل لعدد كبير وضعه ف المكانه التانيه .
وراه بقي عمرو دياب ، واللى واحد زميلي علق عليه دا مش مطرب اصلا وملوش دعوة بالطرب ، لكن كاريزما عمرو وذكاءه وانتشاره خلوه مثل اعلي وقدوة تتبع بين شباب المحروسة لدرجة إنه حصل علي المركز التالت
رابعا بيحل عادل إمام ، واللى بينتمي لعالم الفنانين واللى حصل علي نسبه تقارب العشرين في المية ودا رغم ما ينشر دايما علي الوسط الفني عموما ، وما يتناوله عادل إمام من " هيافه " في أفلامه إلا إن كل دا لم يمنع من انه ما زال الأختيار الأول عند البعض وضعته في المركز الرابع .
المصيبة بقي إن أحمد زويل موجود في المركز الأخير وبنسبه لم تكمل الـ 12 في المية حتى ورغم إنه لو غابت القدوة أو البطل المفروض ندور علي الشخص الصح لكن يبدو إن دا ما حصلش بدليل إن الأكثر استحقاقاً في رأيي علي الأقل يقبع بكل خجل في المركز الأخير . !!!

نظره كمان صغيره هنلاقي بيها إن المجالات اللى بيهتم بيها المصريين طبقا للبول كالتالي
في البداية الرياضة متفوقه علي الدين في المركز الأول ، ودا حقيقة ويمكن يلاحظ دا اى شخص يبص لأي جامع أو حتى كنيسة ساعه أي ماتش للمنتخب وهيحس فعلا بحجم الرياضة داخل الشعب المصري المتفوقة علي أي حاجة وكمان نفس الفكرة في عدد القنوات الرياضية المتكاثرة دوما واللى كلها سبحان الله بتكسب ومفيش حاجة منها بتقفل واكيد دا راجع للإقبال اللى عليها ( البديل بس هي اللى بتقفل علشان مش كلها رياضة !! )
في المركز التاني الدين ( أو التدين أيهما شئت ) ودا بيتماشي مع البحث اياه اللى أثبت إن المصريين اكتر شعوب العالم تدينا ( اللهم تقبل )
بعد كدا الموسيقي والغنا وهيظهر دا في كمية المغنيين وشركات الغنا اللى كل كام يوم بتطلع وكمية الأصوات الغريبة اللى بنسمعها كل يوم أو كمية الفلوس اللى بتتصرف علي الألبومات سنوياً
بعد كدا الفن في المركز قبل الأخير واهتمام المصريين الواسع بيه هيبان في كمية القنوات اللى موجودة سواء للأفلام او للمسلسلات علي النايل سات واللى زادت بدرجة مرعبه وكمية الفلوس المصروفة علي الحاجات دي وكمان كمية الأخبار المخصصة ليهم .
وفي المركز الأخير يقبع العلم !!! العلم هو أخر اهتمام للمصريين !! وليه يهتموا بيه اصلا ، ما أكيد دا لازم يبقي حالنا ما دام العلم هو اخر اهتماماتنا ، لازم نبقي الكلاب اللى بتعوي بجوار القافله السائرة إلي المالانهاية ، القافله الغير مستعده ابدا للتوقف لانتظارنا لما ننهض من غفلتنا وغباءنا وتخلفنا
العلم في المركز الأخير !!!
صدق المتنبي لما قال : يا أمة ضحكت من جهلها الأمم

9 comments:

a7mad sala7 said...

النتيجة دى متوقعة

طالما جاية من مستخدمى الفيس بوك

لان الفيس بوك دا معظمه ناس تافهين

وداخلين يروشو شوية

بس ميمنعش ان دى عقلية الشعب المصري يعنى

لكن انا بتكلم على الفيس بوك بشكل اخص

Ahmad Hima said...

احمد باشا
منور
بص يا جميل
بختلف معاك ان الفيس بوك معظمه ناس هايفه
هيما متنوعين زي شعب مصر بالظبط فيهم الهايف وفيهم الملتزم دينيا وفيهم الناشط اجتماعيا وفيهم الناشط سياسيا وفيهم اللى ملهمش فيها وكل الانواع
بالظبط زي مصر
بالنسبة ليا الكويز او البوول دا بيمثل مصر بصورة كبيرة كدا وغير مبالغ فيها إطلاقا

تحياتي يا جميل

HORAS said...

بقالي كتير اووووووي مش بدخل بلوجك أرد فيه بس أكيد بدخل أقري المواضيع

الموضوع دة بالذات شدني علشان تلاقي الإتجاة للرموز التليفزيونية سواء دينية أو فنية لكن العلم في الأرض محدش بيهتم بيه أنت لو فكرت أصلا تسأل حد د\أحمد زويل عمل إيه حيقولك ولا أعرف وإلي حيعمل نفسه فاهم حيقولك أكتشف الفينتو ثانية ههههههههه

والله أنا مش عارف أحنا رايحين علي فين

سلامي ليك

أحمد عنتر
حورس

Yasmine Madkour said...

شيء متوقع و محزن و لكن يبقي الأمل في ال
12 %
و ربنا يستر علي البلد دي

a7mad sala7 said...

لا معظم الطائفة من الشباب
دا بالنسبة للمصريين_

ومعظم شباب الفيس بوك تافهين
من خلال اللى بشوفه يوميا

لو قلتلى ان هيفاء خدت المركز الاول
مش ابوتريكة
هصدق

Ahmad Hima said...

حورس
انا عارف
علي رأي واحد مش فاكر هو مين
نحن نصعد للهاوية

Ahmad Hima said...

جاسمين

يبقي الأمل
واحنا لينا غير الامل

Ahmad Hima said...

ابو صلاح

انا من اللى بشوفه يوميا اقولك ان 75 ع الاقل م الفريندز عندي ناس مثقفة وفاهمه وعندها هدف ف الحياة او ع الاقل عايزة تغير البلد للأحسن

a7mad sala7 said...

فرينداتك بقي

الطيور على اشكالها تقع يا باشا ;)