قالك مقاطعة

بخصوص المقاطعه المقدسة بتاعه بكره
في حاجة قرفاني كدا وهحاول امسك لساني فيها
كل يوم والتاني حد يحط لينك المقاطعه في بروفايله حقه وزي الفل
بس بقي بيروح حاطط الكلمتين دول كمان
"
هنقاطع ليه ؟ 
********* 
لان كل ضغطة من الماوس على الفيس بوك وكل صفحةبنشوفها عليه تعبر فلوس بتدخل للفيس بوك لان لازم الفيس بوك يزود عدد الزيارات اليومية اللى بتسجلها شركة ميكروسوفت ومن خلالها بيبقى زوار الموقع كتير وبالتالى يطلب اكتر واكتر فى ثمن الاعلانات وده غير عقد المساحة اللى بتمنحها شركة ميكروسوفت زيادة مع كل زائر جديد على الفيس بوك " 


اللهم صبرك يا لساني
نفسي اعرف ايه علاقة مايكروسوفت بالموضوع
تقريبا هما فاكريين مايكروسوفت النت دا بتاعها وبتأجر للناس وبتديهم عقد مساحه
تيييييييييييييييييت
اموت واعرف ايه عقد المساحه دا
لا وبتمنحها مايكروسوفت
حد يكسب فيا خيرا ويفهمني الكلمتين اللى فوق
انا واحد بتاع حاسبات ومعلومات
وبقالي خمس سنين بصحي وبنام وبشرب وباكل ع النت اصلا واكتر من ضعفهم مستخدم عادي اني اسمع ف حياتي كلمة عقد
مساحه دي ابدااااااااااااااا
لا وكمان ان مايكروسوفت بتعد الزيارات وبتسجلها ع الفيس بوك 
تيييييييييييييت كمان مرة
انا اول مرة اعرف المعلومة دي
اللهم إلا لو مايكروسوفت اشتغلت مصلحة سجون او تبع امن الدولة
افهم بس حد يفهمني يا بشر
ما يا انا جاهل
يا اما كل واحد بيكوبي وبيبيست الكلمتين الهبل اللى فوق دول يبقي عباره عن
خروف ماشي ف قطيع مش فاهم حاجة بيقوده لاعب سيرك يدعي انه حكيم عبقري

13 comments:

Ahmose said...

يمكن يقصد الاعلانات المدفوعه .. هو منطقى ان لما الزوار يقلوا عدد عرض الاعلانات هيقل وبالتالى هيبقى فى خساره ماديه .. لكن معرفش ايه علاقه مايكروسوفت بالموضوع .. بالاضافه لان العرب اللى بيستخدموا الفيسبوك كلهم حسب احصائيات اليكسا لا يتجاوزوا 4% من المستخدمين الكليين للموقع ده غير ان العرب اصلا مبيدفعوش فلوس اعلانات وبيستغلوا الكوبونات وبعد كده مبيدفعوش مليم لا عالفيس بوك ولا فادورد ولا اي شركه اعلانات تانيه .. حمله مش منطقيه اساسا والهدف بتاعها ضد حريه الرأي والتعبير .. سيبهم براحتهم .. مش هيقدرو يغطوا نور الحريه ..

maii said...

no comment
الا اني اقول
ربنا يشفي كل مريض

El_Tahan said...

انا فكرت كتير اقولك ايه فى الرد ده بس لقيت انسب رد اقوله ليك ان احنا قدرنا نقف ولو لمره واحده قصاد حاجه زى دى مانجيش باه نمسك فى مواضيع جانبيه ونسيب الموضوع الاصلى بجد ياتشى انا عشان بحبك بقولك ياريت تكتب مواضيع لها هدف احسن من كده اخوك المخلص ابو صلاح

*,*AMY LEE*.* said...

انا معاك يا طحان
صح
على الاقل لقينا احنا الناس العاديه بعيد عن الحكومه الي مش قادره تلم الي فيها على كلمه وحده
اهو احنا على الاقل الشعب العربي او الاسلامي قدر يجتمع على حاجه نعملها نوافق عليها كلها
بغض النظر ان كانت ليها معنى او ملهاش
بس مجرد ان الفيس بوك يعرف ان احنا قادرين عللى ان احنا نجتمع على كلمه وحده المليون ولا المليوون ونص العربي ...
يبقىد ي كفايه اوي
وفعلا والحمد لله المقاطعه دي جابت نتيجه وأغلقوا الجروب الي كان مسيئ للرسول وللاسلام
والحمد لله
ولو كانوا قالولنا قاطعوها شهر هنقاطعه برده

Che Ahmad said...

احمس

هي حملة ضد التطور الطبيعي للحياة اصلا

Che Ahmad said...

ميوش

امين

Che Ahmad said...

صلاح

انا مش موافق علي فكرة المقاطعه اصلا ومش دي الحاجة اللى نتحد عليها ف الاصل

Che Ahmad said...

ايميلي

نتلم في كلمة عدله
او كلمة حق
دي اسمها كلمة تهريج

بعدين الجروب ما اتقفلش
الجروب اتعمل عليه هاك

دا اولا

ثانيا
اتعمل بداله عشرين جروب

ابقي قاطعوا تاني

Anonymous said...

معلش متخنقش نفسك :))

Anonymous said...

انا اخدت لفه هنا وعاجباني بلوجايتك ..:)

شكلي هاجي هنا كتييييييييييييير

Che Ahmad said...

هاجر

هحاول ما اخنقش نفسي بس ما اوعدكيش

Che Ahmad said...

هاجر مرة كمان

تنوري دايما
زياراتكم تسرنا :D

Elaimy said...

يا باشا يا بتاع الحاسبات والمعلومات واضح انك قاعد على النت على طول بس بتضيع وقت لأنك لو متابع أخر أخبار الشركات كنت عرفت ان مايكروسوفت ليها حصة متزايدة في الفيس بوك ... اقرا الخبر ده
-----------------------
بعد أن أكد أحد مديري الـ "فيس بوك" أن أي عرض لشراء حصص بالشبكة يجب أن يتم على أساس أن قيمتها السوقية تزيد عن 10 مليارات دولار.

و بعد إجراء عدة جولات من المباحثات بين مديري "الفيس بوك" وشركتي جوجل و ماكرسوفت أعلنت شركة مايكروسوفت عملاق البرمجيات الأمريكية يوم الأربعاء إنها تغلبت على عرض منافس من شركة جوجل لاستثمار 240 مليون دولار في موقع الانترنت الاجتماعي الشهير " فيسبوك" في صفقة تحدد قيمة الموقع الشهير بـ 15 مليار دولار.

إذاعة الدويتشه فيله" الألمانية قالت أنه وبمقتضى الاتفاق ستتوسع مايكروسوفت في تحالفها الحالي مع الموقع لبيع الإعلانات في الولايات المتحدة وعلى المستوي الدولي. وقال محللون في صناعة التكنولوجيا إن مايكروسوفت كانت مستعدة لدفع زيادة كبيرة في السعر لإتمام هذا التحالف وإبعاد موقع جوجل عن توقيع اتفاق مشابه مع الموقع الشهير.

من جهة أخرى فقد أكد "كيفين جونسون" رئيس قسم المنصات والخدمات في مايكروسوفت إن الإقدام على هذا الاستثمار وتوسيع الاتفاق الحالي سيحسن من أمكانية مايكروسوفت و فيسبوك على استغلال الفرص الإعلانية في العالم حيث يبلغ عدد مستخدمي موقع فيسبوك حاليا 42 مليون مستخدم ويتوقع أن يرتفع عددهم إلى 60 مليون بنهاية العام الجاري.

يؤكد الخبراء أن الفيس بوك سيكون أكثر جذبا للإعلانات بسبب نظام الموقع الذي يجعل الأشخاص يستخدمون شخصياتهم الحقيقية في مقابل موقع "ماي سبيس" الذي غالبا ما تكون المشاركة فيه بهويات غير حقيقية.

تجدر الإشارة إلى أن شركة مايكروسوفت العملاقة للبرمجيات دفعت مبلغ 240 مليون دولار للحصول علي حصة قدرها 1.6 بالمائة فقط في موقع الانترنت الاجتماعي الشهير "فيسبوك" الذي أنشأه مارك زوكيربيرج "23 عاما" منذ ثلاث سنوات.