موقف

كنت راجع البيت وراكب ميني باص
وقبل ما اركب كنت عطشان وجعان قولت واحدة زبدو تقضي الغرض
ركبت جنب السواق وخلصتها وحطيتها قدامي
شوية اللي جنبي سأل السواق وهو بيمسكها ناحية الشباك عايزها دي يا اسطي، مسكتها ف ايده قولتله بتاعتي، قالي فاضية، قولتله ما انا عارف، قالي طيب هرميها، قولتله ما انا م الصبح مش عايز ارميها، قالي يعني من حلاوة الشارع اوي ما كل الناس بترمي انت اللى هتغير الدنيا يعني ولا هتسيبها للسواق، دخل السواق ف الخط قولت انا مش هخلص كدا ومش هينفع ادي ف دروس غير نفسك وانت ممكن تأثر علشان ما اترميش انا والعلبة سوا، قولت هو الدين مفيش غيره، قولتلهم اصل يا جماعه لو رمتها دي حرام، وسيئات ع الفاضي، ورحت حاططها قدامي، والواحد الصراحة مش ناقص ذنوب، اللي جنبي سكت شوية كدا، راح السواق بحركة لولبية مهلبية قفز قفزة سريعة اخد العلبة ورجع مكانه قالي هي دي ؟ مش هتاخد سيئات يا عم، اهي، وراح راميها، اتصدمت وسكت واتحرق دمي، ومكانش معايا رصيد ادخل ع النت حتى، وكملت بقية الطريق مقهور والله.

14 comments:

ألِف said...

غلطتك أنك لعبت لعبة الدين.

كنت مسكتها في يدّك، و قلت لهم أنك هتبقى ترميها في سلة الزبالة أما تنزل.
كدا تبقى عملت ال أنت عارف أنه صح، و كمان اديتهم الدرس ال أنت عاوزه من غير ما تدّي فرصة لحد يشتغلك.

بسنت الصاوي said...

تصدق انا لو مكانك كنت هبقى مقهورة برضه دي حاجة تشل يعني وهو ماله السواق ايه البرااااااااااااااااااادة دي

سَارةٌ said...

ويلكم انت في إيجيبت ..

اهي دي بقى احلى ميزه فينا كشعب .. مبنحبش نشوف حد ونسيبه فـ حاله .. وبعدينا ده الراجل عملك خدمه جليله .. وخلصك من الإزازه .. تقوم تشكره كده ؟

عامةً مهما عملت او بدأت بنفسك أو حاولت تبعد أي حد عن التدخل فيك وإنه يسيبك في حالك .. مش هتقدر ..

ده إذا مكانتش الناس قلوبها على قلوب بعض .. هنستورد حد تبقى قلوبه علينا من بره ؟

يلا اهي مره مقهور ولا حد يموت ..

كل سنه وانت طيب .. رمضان كريم . :)

على باب الله said...

حافظوا على قذارة مدينتكم

Anonymous said...

ابتسم .. انت في مصر !

someone said...

تصدق إنت فاهمنى !
انا برضه لما بتزنق مع بلطجيه ببقى وعايز أقنعهم بحاجه ببقى سلفى
:D

totahabib said...

وهيا تعباه فى ايه بس ؟؟؟
انا بردو بيحصلى كده بس مش لدرجة انه ياخد الحاجة ويرميها بالعافية
بس يعنى بسمع شوية تريقة حلوين حتى من اصحابى
بس بردو بالعند فيهم مش هرمى حاجة فى الارض

Che Ahmad said...

ألف

ما هو المشكلة انها ما كانتش ف ايدي وقتها والطريق طويل وحاطط كل حاجتي قدامي فـ هما استغلوا دا

Che Ahmad said...

بسنت

سخافة ملهاش حدود

Che Ahmad said...

حباية بندول

بس مش للدرجة دي يعني
الواحد بعد كدا يمشي بيفاطه شكرا لتعاونكم سيبوني ف حالي والنبي

وانتي طيبه :)

Che Ahmad said...

علي باب الله

يعني هي جت عليا
:D

Che Ahmad said...

هاجر

فينك من زمان جدا كدا
ليكي وحشة ف العالم الافتراضي

Che Ahmad said...

عبحميد

ويا ريته بينفع يا صديقي
:D

Che Ahmad said...

totahabib

مش عارف والله تعباه ف ايه ولا عارف منطقه ايه
بس ياللا هنعمل ايه يعني