نظرية المؤامرة

واحدة من اكتر الحاجات اللى بتضايقني فى العالم العربي والمصريين أنهم مؤمنين حتى النخاع بنظرية المؤامرة وغرقانين فيها حتى النشوة لأنها اسهل الاسباب لأي فشل او حتى غير فشل مقدروش يفسروه فمثلا لو واحد جاب مجموع وحش فى الثانوية العامة مش بعيد نلاقيه بيرمي السبب على اسرائيل لأنها عارفه انه هيبقي نابغة فقامت مبوظاله الليلة علشان ما يدخلش هندسة ويدمرهم - طبعا أنا هنا ببالغ بس وجود النظرية دي موجود بمنظر يضايق جدا - يعني مثلا فى حادثة ابو تريكة الاخيرة وحصوله على الانذار لقينا وسائل الاعلام العربية والبلوجرز العرب بيمجدوا تريكة ( وإن كان فعلا يستحق ) لكنهم فى ذات الوقت بيشتموا فى اسرائيلا والحكم اليهودي أكيد اللى ادي تريكة إنذار علشان اظهر تعاطفه مع غزة ومش بس كدا دول ثاروا لما الاتحاد الافريقي لكرة القدم الكاف قال انه ممكن يتوقف وقالوا اشمعني لاعب غانا لما رفع علم إسرائيل .... أقولكوا انا بقي اشمعني اللى عمله لاعب غانا كان بعد انتهاء الماتش يعني مفيش لا حكم ولا غيره ودا كان احتفال بالفوز لكن تريكة عمل كدا فى وسط المباراة دي اول نقطة تاني نقطة انتقادهم للكاف وانهم يستشهدوا بواقعة لاعب غانا تفتقد كل اوجه المنطق فتريكة فى بطولة تتبع الكاف لكن لاعب غانا كان فى كأس العالم يعني بطولة تبع الاتحاد الدولي الفيفا مش الافريقي الكاف وعليه مينفعش نحاسب الاتنين بنفس الطريقة لأن كل منهم اتحاد مستقل وإن كان الكاف يقع تحت لواء الفيفا ، دي نقطة كمان ، أخر حاجة بقي ان القوانين اللى حطها الكاف واضحة وصريحة وبتقول يمنع استخدام الشعارات السياسية خلال مباريات كأس الامم الفريقية وعليه ابو تريكة يستحق الانذار بل والإيقاف كمان لأنه خرق واحد من قوانين الاتحاد المنظم للبطولة رغم وضوحه ومعرفته بيه ...... دا بالنسبة لقضية زى قضية تريكة لكن فى اوقات تانية بنلاقي كلام ما يدخلش الدماغ اصلا زى اللى قال ان اللى عمل العملية الاخيرة بتاعه عبد المنعم رياض هو اسرائيل بغرض قلب مصر رأسا على عقب وكمان عملية طابا وما ننساش عملية برجي امريكا اللى برضوا اتهموا اسرائيل انهم اللى عملوا كدا وقالوا وعادوا عن ستة آلاف واحد ما كانوش فى البرج يومها وغيره كتير من بس اننا بنرمي اخطائنا على عاتق اسرائيل وامريكا دون التمعن والنظر لحالنا وازاى نقوم من السبات العميق اللى احنا فيه .
دي بس كانت رؤية صغيره بعد ما اتضايقت من كمية الهجوم على الحكم والكاف لإشهار البطاقة الصفراء والتهديد بالإيقاف رغم استحقاق تريكة للأتنين .

تشي

17 comments:

صفا سارة said...

معاك حق فعلا ونظريه المؤامره دى بتهيألى اخترعناها لاننا مبنحبش نعترف اننا عملنا حاجة غلط والمشكله بئه اننا بنكدب الكدبه ونصدقها .

mohand said...

السلام عليكم


اتفق معاك في نقاط ونقاط لاء

اولا اثبتت اللوائح ان ابو تريكة لم يرفع شعار عنصري ولا ضد لون ولا جنس ولا شعب ولا اي حاجه من دي


اذن لا يستحق الايقاف


ابو تريكة خد الانذار عشان رفع القميص فوق صدرة وحطة علي وشه
ودي مسأله تقديريه للحكم
كان ممكن ميديش انذار اساسا


الاتحاد الافريقي يتبع الاتحاد الدولي
ولعلمك موضوع الايقاف اللي كان هيتعرض له ابو تريكة لو كان فعلا رفع شعار ضد شعب او جنس او لون
كان قانون من الفيفا بعد حادثة لاعب غانا
يعني القانون جاي من الفيفا للكاف

لاعب غانا رفع العلم اكتر من مرة اساسا
مش مره واحده
وتم عقابة عن طريق اتحاد بلاده

انا شخصيا شايف ان الموضوع كبر عن حجمة
بس اللي كبره في الاساس الصحف الاسرائيلية


علي فكرة انا من المقتنعين بنظرية المؤامرة
بس مش في كل المواضيع

تحياتي شي

Che Ahmad said...

صفا
بالظبط كدا لاننا بنخاف نعترف بواقع مقيت بالنسبة لينا وبنضحك على نفسنا بالظبط زى ما قلتي نكدب الكدبة ونصدقها

مهند
وعليكم السلام
دايما وجودك بيفرص حالة جميلة من النقاش بحبها كتير

انا ما قلتش عنصرية خالص واللى عمله تريكة مش مضايقني على العكس دا شيء مشرف ليه ولينا كمصرين لأننا الدولة العربية الوحيدة اللى منها واحد عمل كدا بس القانون واضح وبيقول شعار سياسي ودا اللى تريكة فعلا عمله وانا ما جيبتش سيرة عنصري خالص
وعليه يستحق الايقاف لأنه سياسي

والإنذار سواء لأنه حط التيشيرت على راسه او قلعها ونسبية الامر للحكم دا كله ما يمنعش اللى اتقال ع الحكم فى الاعلام العربي او ع البلوجزر العربية وانه مضايق من اللى تريكه عمله وانه عميل و و و إلخ إلخ

ومسألة ان القانون صدر بعد حادثة لاعب غانا برضو مش هتفرق كتير فى الموضوع لانه برضه المقارنة ملهاش وجود تريكة ولا عب غانا دا قبل القانون ودا بعده برضو المقارنة مكش متساويه

وبالنسبة لعقاب اللاعب عن طريق اتحاد بلاده ملهوش دعوة بالمشكلة بتاعتنا واتحاد بلاده يعقابه لأنه رفع علم غيرها بعد انتصارها

اخر حته بقي فى تعليقك

انا شخصيا شايف ان الموضوع كبر عن حجمة
بس اللي كبره في الاساس الصحف الاسرائيلية


دا برضه يندرج تحت بند نظرية المؤامرة وازاى ان الموضوع اللى كبرته الصحف الاسرائيلية يا ريت تشرح لي الحته دي

واقتناعك من عدمه لا يفسد للود قضية بس يا ريت يكون المواضيع اللى بتقتنع فيها بالنظرية دي في محلها علشان ما نرميش كل حاجة من على عاتقنا على دول تانية


تحياتى كتير
تشي

mesh2dra said...

السلام عليكم

متفقة معاك جدا في وجود نظرية المؤامرة
نظرية المؤامرة والشماعة من الحاجتين الاساسيتين اللي بنعلق عليهم فشلنا

تشي
شكرا بجد على توصيلك للرسالة
فعلا مش عارفة اشكرك ازاى

سلاماتي

عاشــــــ النقاب ـقــــة"نونو" said...

اولا اشكرك على الدعوة
الموضوع دة شغلني زمان شوية وكنت فعلا كل ماتيجي سيرة المؤامرة اقول ايوة هم كدة يعلقوا ضعفنا على الحجة دي
لحد ما قريت كتاب بروتوكولات حكماء صهيون اللي ترجمه عباس العقاد هو جزئين بس ذهلت لما قريته فعلاحسيت اني بقرا عن الليي حصلنا وهيحصلنا وباذن الله اللي بتمنى انه ما يحصل لنا
بس برضه لي راي لولا بعدنا عن الدين ولولا اعتمادنا اللي بشوفه دلوقتي اعتماد كلي من جوانب كتير سواء تكنولوجية زي النت وبرامج الكمبيوتر وزي اتفاقيات الصناعة زي الكويز مثلا وحاجات كتير طالما فيه اعتماد عليهم وسايبين نفسنا كدة يبقى لازم اللي رسموه وخططوه يتحقق
هتستغرب لما تقرا انهم مخططين لميت سنة ادام والخطط ماشية تمام فعلا
اقرا الكتاب ويا ريت تعمل تدوينة بعدها تقول رايك من تاني
اما عن موضوع ابوتريكة انا ما ليش في الكورة بالتلاتة ولو فيه قوانين تجرم دة انا معاك لكن لازم ما يبقاش فيه كيل بمكيالين وانا عن نفسي احترمت ابو تريكة جدا بعد الموقف دة لانه بطريقة ما سواء بقى قانونية ولا غيره عبر وقال احنا معاكم يا غزة ومش ناسيين
عمل انا باعتبرها كدة لما يكون ابني في
في سجن واتفتح باب وانا واقفة على الباب دة وما ينفعش ادخل احضنه احتراما للقوانين هقف اتفرج عشان القوانين
لا هدخل احضنه واملي عيني واللي عاوزينه يعملوه
دة ببساطة رايي

Che Ahmad said...

مش قادرة
وعليكم السلام

نظرية المؤامرة انا بعتبرها فى حد ذاتها شماعه من شماعتنا الكتير

وبخصوص الرسالة ولا يهمك خالص نحن نعمل من اجل ارضاء الاخرين ومن غير شكر ولا حاجة

**********

nonoymm

العفو على ايه
انا ما قريتش الكتاب بتاع بروتوكولات حكام صهوين ولو قريته مش هقراه بترجمه العقاد وهحاول اقراه انجليزي علشان كل الكتب المترجمة اللى قريتها حاجة تضايق بجد
بس دا مش مبرر لما هما عاملين لـ 200 سنه قدام وماشيين عليه بالظبط من غير اخطاء دا يبقي هما منظمين جدا وعارفين ماشيين ازاى لكن مش معني كدا انهم السبب فى اى حاجة بتحصلنا

واللى مش عارف افسره ليه اعتمادنا ع الكومبيوتر وبرامج التكنولوجيا حاجة وحشة بالعكس دي اداه مهمة جدا لازم نعرف نستغلها كويس وفى نا س فى حياتها عايشه عليهم بس وهو تقريبا من اكبر الصناعات دلوقتى الكومبيوتر والانترنت ومينفعش نقول ان دول سبب اننا نرجع ورا او انهم ينفذوا مخططاتهم ابدا دول سبب لو عرفنا نستغله يبقي فى صالحنا لو استخدمناه جيمز وشات بس يبقي هنروح فى ستين داهية

فى حكاية تريكة هو عمل حاجة كويسه جدا بس مخالفة للقوانين وبالظبط زى المثل اللى ضربتيه هتعملي حاجة هى الصح بس مخالفة للقوانين وفى الحالة دي اتخاذ إى اجراء ضدك يعتبر عادل لانك خرقتي القوانين ودا اللى حصل لتركية

بس كدا
تحياتى كتيييييير
تشي

mohand said...

السلام عليكم

حبيبي يا تشي

انا مبقولش انك جبت سيرة العنصرية

انا بتكلم علي ان القانون اساسا بيعاقب علي اظهار لافيتات عنصرية او معادية لبلد او جنس او لون او دين او عرق

يعني اساسا القانون لا يعاقب ابو تريكة لهذا السبب مينفعش يتعاقب

فهمتني يا صديقي

نيجي لنقطة الصحف الاسرائيلية
حضرتك تاني يوم الصحف الاسرائيلية نزلت صور ابو تريكة وانه معادي للسامية وطلبت من الفيفا بشكل غير رسمي معاقبتة وايقافة

د اللي كبر الموضوع
ودا مقصدي


اقتناعي بنظرية المؤامرة مش بيخليني اتواكل علي الموضوع ده وارمي عليه كل العيوب


فهمتني تاني يا صديقي برضه


فيه ايه تاني انت رديت عليه
استني اشوف


اه بالنسبة ان الالعب لو كان رفع العلم بعد صدور القانون مكنش هيتعاقب من الفيفا برضه لانه مكنش بيعادي دولة او جنس او غيره

وانا مش مع مقارنة موضوع لاعب غانا بالفنان ابو تريكة


حاجه اخيره

ابو تريكة دا حبيب قلبي
انت ناسي اني اهلاوي رسمي ورابطة ومشجعين وشغل طحن كمان

تحياتي
وعلي فكره بعتلك اوف لاين
مش عارف وصلك ولا لاء

Hypatia said...

اعتقد رغم ان موقف ابوتريكه موقف انسانى ومحترم لكن هو يستحق الانذار ولا اظن ان فيه اى ظلم وقع عليه واحترامنا لموقف ابوتريكه شئ طبيعي لكن عدم تقبلنا للوائح والقوانين وهجومنا عليها بالشكل ده هو اللى مش طبيعي


نظريه المؤامره اكيد موجوده لكن احنا حولناها لشئ مضحك جدا بسبب لصقها باى حدث او موقف فى وقت مش بعيد حصلت هوجه بسبب تقبيل بوش لفتاه كويتيه محجبه على وجنتها وثارت الدنيا وثار بعض المدونين واعتبرو ان بوش اختار تقبيل المحجبه تحديدا اهانة للاسلام
متصور قد ايه خيالنا بقي وااااااااسع

هم يضحك

مدونتك جميله يا احمد

Che Ahmad said...

مهند
وانت كمان حبيبي يا مهند كفاية اننا اهلاوية زى بعض :D
انا بالنسبة للقانون اللى قريته وفى صحف مصر انه بيعاقب على الشعارات السياسية بس مش لازم العنصرية بس عموما مش هنختلف يعني فى الحته دي
وبالنسبة للصحف الاسرائلية دا العادي بتاعها حكاية معاداة السامية دي دا كانوا هيلبسوها لصاحب دار نشر ميريت

حلو قوي ان اقتناعك بالنظرية بيخليك ما تعتمدش عليها وترمي ورا ضهرك
لو الموضوع موضوع شعارات سياسية فالمفروض كان لاعب غانا يتعاقب لما عمل كدا لكن لو عنصرية بيقي برآءة
حاجة كمان ابو تريكة حبيب قلوب كل المصريين مش انت لوحدك :P
والاوف لاين ما وصلش على فكرة

تحياتى
تشي

Che Ahmad said...

نسرين
لخصتي كل الكلام فى حته واحدة اننا ما بنتقبلش اللوائح والقوانين لو مش على هوانا وعدم تقبلنا ليها كمان بيكون واهن وضعيف واهبل نشجب ونستنكر إنذار ابو تريكة ويااااااااااا فرحتى

وجود النظرية فى حد ذاته انا ما بنكروش لكن وجودها بتلك الكثافة فى كل حاجة واننا نعملها شماعة لما ما نلاقيش شماعة من الشماعات الكتييييييير بتاعتنا دي حاجة تضايق
وهى يعني جت على موقف بوش ياللا محدش واخد منها حاجة واهو بوش سايبهالهم مخضرة لما نشوف

انا دلوقتى الهم اللى بشوفه هم يبكي وهم يحيرك تبكي ولا تضحك لكن ماشوفتش هم له هدف واضح انه يضحكك

سعيد ان المدونة عجبتك
ويا ريت ما تبقاش اخر مرة
نورتيني
تشي

Anonymous said...

اكيييييد ، فى مؤمرات بتعملها الدول او الكيانات المتصارعة ضد بعضها.
المؤمن بنظرية المؤامرة بيبقى فاكر ان كل الاحداث السياسية فى العالم بتحركها ايادى خفية لعدونا الاول اللى هو اليهود/الصهاينة/اسرائيل على حسب بقى .
لو الدول المانحة ادت دولة معينة نص مليون زيادة عن المطلوب يقولوا اكييييد اليهود خلوهم يعملوا كده عشان يدعموا الحزب (س)العميل ضد حزب (ص) ، لو نقصوا نص مليون عن المطلوب يقولوا اكييييد اليهود هما اللى خلوهم يعملوا كده يضغطوا على حكومة (ع) بلو بلو بلو .

كله من غير اى دليل ولا اى تحليل محايد حقيقى لأى موقف حتى نونويم قالتلى "ثمار نظرية المؤمرة بانت عليكى" ، لامؤاخذة يانونو ياعسل بعاكسك بس والله :):)

والدليل الابدى والوحيد كتاب برتوكولات حكماء صهيون ، اللى كل الناس قالت عليه مزيف و فشنك وملهوش اى وثائق (واحد شيوعى شارب كاسين فودكا ع الصبح لقى رواية فرنسية ساخرة محظورة بتنتقد سياسة امبراطور فرنسا راح فبركها على الصهاينة عشان يخدم هدف سياسى(دى بقى بالوثائق)) .
قال قال قاااال الصهاينة هيروجوا لحرية التعبير والليبرالية عشان يخدموا اهدافهم !!! دول يبقوا الصهاينة حلوين اوى ياولاد سلمات لولاد عمنا اليهود ، احم قصدى ولاد القردة الصهاينة :)

بوست جميل

تحياتى:)

azmeralda said...

نظرية المؤامرة... يالهوي ... من اسخف الحاجات اللي في الكون كل حاجة يقولك شفت دي فيها ريحة اسرائيل... حتي قرص الطعمية اللي صغر وبقي لا يري بالعين المجردة يقولك اسرائيل ... رحمتك يا رب

Che Ahmad said...

دروب
اكيييييييييييد كلامك مظبوط بس ايه حكاية كتاب بروتوكولات صهيون دا كمان انا كدا مش عارف له اصل لسه بقي هقعد ادور ياللا مش مشكلة هدور واشوف اصله وفصله

مي
والفول اللى غلي وخروجنا من كأس الامم على ايد كوت ديفوار إن شاء الله برضه سببه إسرائيل
امال هو هى سايبة :D
نورتوني


تحياتى
تشي

Empress appy said...

نظريه المؤامرة امممممممم
انتعارف انا جارتى عامل عليا مؤمراة واللى بعتها اسرائيل هههههههه
بص هقولك ليه احنا حتى خلينا الحر مؤامرة يهوديه
لاننا لازم نلاقى شماعه نحط عليها غلطنا او نتكلم عن حد تانى هو السبب فى فشلنا انما نقف ونواجهه نفسنا اكيد مش بنقدر

Che Ahmad said...

appy
على فكرة يعني على فكرة قبل اى حاجة انتى راكته المركبة الفضائية بتاعتك فى الممنوع ودا ما ينفعش معايا خالص
ندخل فى الكلام:D
كلام جميل كلام معقول وجارتك دي ارفعي عليها قضية خيانة عظمة ( دي عضمة يعني مش عظمي ) :P

مستني اليوم اللى نقدر نواجهه فيه نفسنا واخطائنا

تحياتى وبلاش حكاية الباركنج فى الممنوع دي تاني بعد إذنك
تشي

Sara said...

بجد الواحد زهق اصلا من كتر ما التفكير السطحى بينتشر بين الناس لا وكمان بينتشر قسرا وقهرا وبوضع اليد يعني تلاقي رسايل مغرقة ايميلك والفيس بوك واوفلاين وفي كل حتة تفتح الحنفية تلاقي هجوم من الافكار دي وبتجبرك عليها يعني تحسسك انها صح وخلاص مش محتاج تشغل مخك مش محتاج تفكر مش محتاج تدور هو انت بساعمل فورورد وساعد وساهم في انقاذ البلد وفي انقاذ دينك ونصرة نبيك حاجة بجد بقت مستفزة
ياريت تبص على اللينكين دول بجد من احسن الحاجات اللى قرتها عن الحاجات اللى زي دي
http://osamasherif.blogspot.com/2007/12/blog-post.html
http://metwallyheinzmann.blogspot.com/

وشكرا

Che Ahmad said...

سارة
الرسايل دي فعلا بتستفزني جدا وبقيت بتجاهلها علشان ما احرقش دمى ع الفاضي
واكتر حاجة ممكن تخلي الواحد يقتنع انها صح كثافتها يعني لما يوصلني نفس الرسالة من عشرين شخص مختلفين فى الغالب هقول عندهم حق ما داموا اجتمعوا على حاجة لكني اكتشفت ان دا مش صحيح نهائيا ولازم اركز فى كل حاجة بس دلوقتى بقيت غالبا بتجاهلها
ممكن ارقي نكتة مثلا ولا حاجة لكن شوية الهبل اللي بيتبعت بطلته

شكرا ع اللينكات

تحياتى
تشي