ملعون ابو الغباء

-*فى تحديث فى اخر البوست*-

انا نفسي اعرف كمية الغباء والانقيادية فينا كعرب هيفضل لحد امتى
جروب مخصوص ع الفيس بوك معمول مخصوص علشان التصويت للإسلام فى استفتاء عامله قال التلفزيون الفرنسي قال ولو قطعنا بانه فعلا صحيح مش اشتغاله لكن الالعن بقي فى الكلام اللى عالجروب انا اعرف اني اقول لحد روح جاوب على استفتاء مش روح جاوب على استفتاء باللى اقولك عليه دا

وعلشان تظهر الصورة دا الكلام اللى فى الجروب



التلفزيون الفرنسي يصوت عن أهم دين في العالم..

والإسلام حتى الان ولله الحمد في المقدمة..

فشدوا همتكم ليبقى داااااااائماً وأبداً في المقدمة..

التصويت في هذا الرابط

http://www.arte.tv/fr/934300.htm

طريقة التصويت هي :

في السؤال الأول الاختيار الخامس

Musulmane

أما بقية الأسئلة اختر الجواب الأول ما عدا السؤال قبل الأخير اختر الجواب الثاني
Une regle de vie
والسؤال الأخير اختر الإجابة التي تناسب عمرك.

أتمنى من الجميع التصويت ..
صوت لن تخسر شيئاهي 10 ثوان من وقتك ..


شرح الأسئلة :

السؤال الأول :

أي الأديان الأقرب والذي ترتاح له نفسك؟
De quelle religion vous sentez-vous le plus proche ?
الجواب: الإسلام Musulmane

السؤال الثاني:

هل أنت مؤمن Etes-vous croyant?
الجواب: نعم Oui

السؤال الثالث:

هل تحضر مكان العبادة ( هل تذهب للمسجد مثلاً) Fréquentez-vous un lieu de culte?
الجواب: بانتظام Regulièrement

السؤال الرابع:

هل تمارس العبادة؟ Pratiquez-vous la prière?
الجواب: بانتظام. Regulièrement

السؤال الخامس:

هل يجب على المسئولين الدينيين أن يناقشوا موضوعات حديث السّاعة ؟
Les autorités religieuses doivent-elles prendre position sur les thèmes d'actualité ?
الجواب: نعم على الكل Oui sur tous

السؤال السادس:

هل تعتقد أن الدين يجيب على حاجيات الفرد؟
Pensez-vous que la religion répond aux attentes de l'individu?
الإجابة: نعم. Oui

السؤال السابع:

الدين بالنسبة لك: La religion est-elle pour vous :
الجواب: قاعدة حياة Une règle de vie

السؤال الثامن:

في أي فئة تصنف عمرك؟ -- ؟Dans quelle tranche d'age vous situez-vous ?
الجواب: تحت 20 سنة
بين 20- 35 سنة
بين 35 - 55 سنة
اكبر من 55

ثم اضغط على voter للتصويت

وسوف تري نتيجة التصويت بشاشة اخري حال ضغطك على التصويت

وابشروا بالخير الاسلام هو الاعلى نسبة والحمد لله


انا بقي وفى الكلام دا كله نفسي اعرف معناه ايه انى اروح اقول لواحد فى استفتاء روح اختار كذا وكذا وكذا ليه هو حمار ما بيفهمش يعني

ما يمكن انا مش بروح اصلي بانتظام فى الجامع ولا مش بمارس العبادة بانتظام لازم يعني اجاوب على الاسئلة بنفس الكلام اللى هما قاليلين عليه ولا ايه

بس فى ديمقراطية سابوا كل واحد يجاوب اخر سؤال على مزاجه ( لا والنبي ) (غطيني وصوتي يا بهيييييييييييييييه ) هو المفروض نكون كلنا نفس الحاجة ونفس الاجابات يعني ولا ايه
دا الرسول عليه افضل التسليم قال فيما معناه " لا تكن إمعه إذا احسن الناس احسنوا وإذا اساؤوا اسئت " يعني مش علشان الناس بتعمل انا كمان اعمل بدون اقتناع قالوا السؤال الاول اختار اول حاجة يبقي اختارها وانا زى الحمار " ولا مؤاخذة " كأن ربنا خلقنا بدون عقول

المصيبة الاكبر بقي ان التصويت مش لاكتر دين فى العالم التصويت علشان يشوفوا التزام الناس بالدين وتعاملهم معاه فى المراحل السنية المختلفه ورأيهم حول علاقة الدين بالحياة العامة وكدا مش بيشوفوا اكتر دين انتشار فى العالم " يا اغبيا " لكن الفهم السطحي سمه مميزة لينا على الدوام وبقينا " بنهيص " فى اى حاجة والسلام

حاجة كمان بقي تغيظ عدد الناس اللى ف الجروب 31 ألف وكسر يعني فى اكتر من 31 ماشيين والسلام ورا كلام وخلاص ما فكروش يشغلوا عقلهم ويقولوا صح ولا غلط ..... لنا الله
* صحيح : كان المفروض يتحط بدل كلمة العرب المسلمين لكن من الخطأ لصق الاسلام بالمسلمين دلوقتى لأنهم ما يعبروش عنه بحال من الاحوال ( طبعا إلا من رحم ربي وهم قله قليلة جدا جدا جدا جدا جدا )

دا لينك الجروب لو حد عايز يلقي نظرة
http://www.facebook.com/group.php?gid=6117092052



* تحديث ( 1 )

إضافة للمتميز دوما صديقي العزيز احمد عبد الوهاب
HaMaDa 3aFshA said...

احمد باشا وملاحظاته الجميلة
بس اسمحلى برده التمسلهم العذر يمكن مش فاهمين كويس وبعدين الحب اعمى وكلنا محبين للرسول "ص"وكله كان عاوز يقدم اى حاجة يقدر عليها
بس هما غلطوا فى حاجة هو احنا كلنا لما نقول ايوة احنا فعلا ملتزمين مية مية يعنى طريقة معيشتنا ونظام حياتنا هو ده الاسلام وهى دى تعاليمه احنا لو قلنا اننا فى التمام وبنفذ بالحرف وبصوا لاخلاقنا ونظام حياتنا اللى زى الزفت الا من رحم ربى هنودى الاسلام فى داهية هيقولوا دول اكتر ناس بتطبق ومع ذلك اكثقرهم فسادا يبقى ظلمنا الاسلام اللى ما قالش على حاجة من اللى احنا بنعملها انهاردة كل ذنبه ان احنا انتسبناله يبقى حرام نضيعه وسط الاديان دا حتى الاسلام ما قالش اكدبوا ولا حتى فى المزاح
وشكرا

دا الكومنت بتاع احمد وفعلا هو عنده حق فى الحته التانية ( مش بتاعه التمسلهم العذر علشان انا مش هلتمسلهم :D )
المهم فعلا لو كلنا روحنا وسمعنا الكلام وجاوبنا زى ما هم قايلين كدا يبقي الاسلام كدا اكتر دين ناس عملت منه فوتنج واكتر ناس منه بتصلي دايما وبتروح الجوامع وبتتبعه فى امور حياتها المختلفة ..... قشطة اوى لحد هنا نبص بقي لحال المسلمين اخلاق زى الزفت ، فساد ، رشاوي ، احتكار ، استغلال ، كره وبغضاء وكل حاجة وحشة ...... !! طيب لو دول المسلمين ولما هما مرتبطين بإسلامهم .... يبقي اكيد هو دا اسلامهم
استني استني استني بتقول ايه يعني احنا بدل ما نرفع الاسلام بنسيء إليه .. اه والله بنسيء ، شوفت ازاى ... يعني يضاف ع الكلام اللى فوق ان الهدف اللى هما راسمينه فى عقولهم كمان مش هيتحقق ............. أشك لو اصلا فى عندهم عقول علشان يعملوا حاجة زي كدا ... ملعون ابو الغباء اللى عمل عشش وبيوت فى عقولنا كمان مرة
******************

خلص كلامي وتحياتى
تشي أحمد

12 comments:

مصطفى فتحي said...

بجد حاجة تكسف
ناس حافظة مش فاهمة
السؤال هو: ليه دايما عايزين نثبت للاآخر ان الاسلام اهم دين؟

ليه متكونش اخلاقنا وتعاملتنا وحترامنا للآخر هي الاجابة العملية على السؤال

بجد
يلعن ابو الغباء والحفظ والتلقين

أسامه يوسف said...

فكرتنى يا تشى بحاجتين

الأولى:-
نكتة الراجل اللى راح فى الاستفتاء وعمل لا
طلع قابل واحد صاحبه قاله عملت ايه
قاله لا
قاله يا نهارك اسود دول بيصوروا بكاميرات وهيبيتوك فى الحجز
الراجل خد بعضه وجرى راح يقولوهم انا غلط انا غلط انا عملت لا وعايز اعمل نعم
قالوله ماتخافش احنا صلحنالك


التانيه:-
كنت فى دورة كمبيوتر تبع الوزاره وفى آخر الدوره حاجه زى استبيان لرأيك فى الدوره
المدربه اللى بتدينا الدوره قالتلنا اعملوا كله ممتاز
طبعاً الشعب المصرى اشتغل وكله ممتاز ممتاز ممتاز
الا انا وواحد صحبى
عملناها بمزاجنا
فى الآخر واد صغير بيبص على ورقتى لاقانى عامل غير اللى عاملينه قاعد يقلى انت غلط انت غلط وخطف الورقه وجرى عالمدربه يوريها غلطتى الشنيعه فى حق العالم وازاى ان هتقوم حروب بسبب غلطتى دى
وانا طبعاً متكوم عالأرض من الضحك عالهبل
المدربه بصتلى بغيظ ولما شافتنى عامل على كفاءة المدرب ممتاز (وهى تستاهل) راحة ساكته


ايه رأيك فى شعبنا اللذيييييييييذ
تحياتى
OSS

صفا سارة said...

احمد
مش قادره اقول حاجة غير انى هاجيب بهيه عندى بردو
حسبى الله ونعم الوكيل

mohand said...

هههههههههههههههههههههه

خلاص يا ابو حميد متحرقش دمك


الله المستعان

HaMaDa 3aFshA said...

احمد باشا وملاحظاته الجميلة
بس اسمحلى برده التمسلهم العذر يمكن مش فاهمين كويس وبعدين الحب اعمى وكلنا محبين للرسول "ص"وكله كان عاوز يقدم اى حاجة يقدر عليها
بس هما غلطوا فى حاجة هو احنا كلنا لما نقول ايوة احنا فعلا ملتزمين مية مية يعنى طريقة معيشتنا ونظام حياتنا هو ده الاسلام وهى دى تعاليمه احنا لو قلنا اننا فى التمام وبنفذ بالحرف وبصوا لاخلاقنا ونظام حياتنا اللى زى الزفت الا من رحم ربى هنودى الاسلام فى داهية هيقولوا دول اكتر ناس بتطبق ومع ذلك اكثقرهم فسادا يبقى ظلمنا الاسلام اللى ما قالش على حاجة من اللى احنا بنعملها انهاردة كل ذنبه ان احنا انتسبناله يبقى حرام نضيعه وسط الاديان دا حتى الاسلام ما قالش اكدبوا ولا حتى فى المزاح
وشكرا

Che Ahmad said...

مصطفي
المشكلة مش هنا وبس
المشكلة اننا عايزين نثبت للأخر بالعافية وبالكذب والتدليس والنفاق والغباء

يلعن ابو الانقيادية بدون تفكير

منورني يا جميل
تشي أحمد

Che Ahmad said...

اسامة

ههههههههههههه
ضحكتني وانا مليش نفس يا واد

ضحكني اوي الواد اللى بيقولك انت عامل غلط
هههههههههههههههه
من اولها كدا بيعلموا الاطفال انهم يمشوا ورا اي حاجة تتقال وخلاص

بس كويس انك كنت عامل قدامها ممتاز علشان ما كانتش ناقصه مشاكل

تحياتي يا كبير
تشي أحمد

Che Ahmad said...

صفا

ههههههههههههههه
لما بهية تخلص صويت عندي هبعتهالك إن شاء الله

سلامات
تشي أحمد

Che Ahmad said...

مهند حبيبي

هههههههههههههه
هى مش طالبه حرقة دم والله بس الواحد بيقع فى حاجات كدا تفرس وتجيب الضغط

ايدك معانا واكيد ربنا المستعان

تحياتي يا مان
تشي أحمد

Che Ahmad said...

احمد باشا عبد الوهاب
انا رديت عليك فى تحديث كامل عندي وتقريبا انا موافق على اغلب كلامك لكني مش شايف سبب وجيه انى التمس العذر ليهم

مع حبي
تشي أحمد

::: D ξ S ї g ή є я ::: said...

اسمحلي اخي العزيز أرد عليك ...

اول شيء ماهو تحديد الهدف من الموضوع اللي حضرتك نزلته :

1- عايز تقول انك غير عن الناس ؟
وده حقك .

2- عايز تقول للناس ممكن تفوقو من النوم بتاعكو ؟!
ودي حاجه حلوه ان فيه حد صاحي على الأقل !!!

لكن عندي تعليق صغير اشمعنى الجروب ده هوا للي حرق دمك !! مافيه حاجات كتير احنا بنعمله على نفس الشكل !!!
وبنفس الطريقه !!!
تسمح لي اجاوب عنك زي ما جاوبت عن اللي عمل الجروب برضو ( ده اسمه ارهاب فكري )

ماهو ارهااااب الفكري ؟؟
هوا انك تخلي الناس تسوي الحاجه اللي انت عايزها من غير ما تقول لهم اعملو كده بشكل مباشر !!
ازاي ..بص يا باشا
انت دلوقت قاعد في النص مع ناس روشه واخر جمال بيتكلمو عن الدين وعن نصرة النبي عليه السلاة والسلام
هما مش كويسين اوي في الصلاه بس اهم قاعدين بيتكلمو في حاجه ممكن تشفع لهم
تقوم حضرتك داخل عليهم في النص وتقلو لهم ايه رأيكم نروح نسمع حاجه مزيكاتي ونعمر الجو ونزبط لنا مزه حلوه الكل هيسكت احنا كنا في صلاه ودين وانت صاحب مزاج بقى !!
تقوم حضرتك تعمل تصويت علشان تظهر انك مش لوحدك اوي واننا كلنا وحشين ومحدش احسن من التاني ...
اللي عايز يروح المسجد يروح احنا كلنا رايحين على الكفتيريا..
طبعا علشان تخلي اللي عايز يروخح المسجد وتظهره بمظهر انه انسان ناقص لازم تقول الكلمه بطريقه بايخه شويه وترمي بوشك شمال شويه ولما تقول كلمة الكفتريا ارفع صوتك ولعلع علشان يتزبط الجو !!!


ده الارهاب الفكري !! الجروب اللي حضرتك زعلان منه انا شايف انه مالوش داعي يبقى جروب على الفيس بس الكلام اللي في الجروب مافيهوش اي عيب ولا اي حاجه يا باشا علشان تنزل حضرتك موضوع ( ولا تعليق ) علشان تقول الجروب سخيف !!!!

طب يا باشا مافيه قنوات أسخف وأسخف !!!

مافيه استفتاءات هااايفه عن فنانين وممثلات وعالم بنت ستين جزمه اكلونا واكلو ام البلد ...
ولا هيا مجرد نفخ كلام وخلاص ؟؟؟
ولا هيا شويه برطشه كلام والسلام
اتمنى ما تحددش تاني في حديثك وتكون شخص واعي بأصول الحضاره
ويا سيدي انا عايزك تتكلم براحتك وتفتح قلبك ..
بس رتب أفكارك واعرف انت عايز تتكلم عن ايه بالزبط !!
هل انت عايز تتكلم عن الجروب ولا عن الارهاب الفكري اللي بنعيشه كل يوم ولا عن الضغط النفسي اللي بتلاقيه في كل حته ولا عن الناس اللي بتشارك في جروب زي ده ولا عن موضوع الاستفتاءات حقيقي ولا بس مجرد فلم هندي !!!
ويا معلم ( معلش احنا بنتكلم )


باي

Che Ahmad said...

ديزاينر

ردي عليك فى موضوع لوحده

تحياتى
تشي احمد