الواد ابني

الواد ابنى
أبو لسان طويل
قاللى يعنى يا بابا
سافرت واتغربت
مشوار طويل
وف الآخر راجع
فى شارع
متفرع من شارع
وشقة
فى الدور الرابع
ودولار
نازل طالع
شوية هدوم وحاجات
دكان مستنى التراخيص
ومكنسة على خلاط
وكمبيوتر مش نافع
م الآخر
معرفتش تتصرف
مقدرتش تقول لأ
مش مسافر
من إيه الكحة دى يا بابا؟
دى برد
واللا عمر
واللا سجاير
عارف يا بابا
أنا بقالى أد إيه بستناك
إيه يا بابا
إنت بتعيط
ده أنا كنت بهزر معاك
بهزر معاك
الواد ابني - علي سلامة - المصري اليوم - امبارح 

4 comments:

Mohamed Hamdy said...

بجد وجعتنى !

Boba said...

الراجل ده اصلا مالوش حل
مهما اقرا حاجته كذا مرة
مش بزهق

Ahmed said...

حلوة اوي ورايقة ..
جميلة بجد ..

A7MeD F@hMy said...

يااااااه
اكتر حاجة ضايقتني اليوم الجميل ده
الاحساس صعب اوي
صعب